10/07/2025
ការការពារមេរោគ HIV បានវិវត្តពីការរការពារដោយប្រើស្រោមអនាម័យ ឈានដល់ការប្រើប្រាស់ថ្នាំការពារ ប្រភេទ PrEP ដែលជាប្រភេទថ្នាំលេប។ ហើយបច្ចុប្បន្ននេះមានវត្តមាន PrEP ប្រភេទថ្មីដែលជាថ្នាំចាក់ មួយទៀតគឺ Lenacapavir។
Lenacapavir គឺជាម៉ូលេគុលថ្នាំដែលប្រើដើម្បីជួយការពារ និងអាចប្រើប្រាស់សម្រាប់ព្យាបាលមេរោគ HIV ដោយប្រើគួបផ្សំជាមួយម៉ូលេគុលថ្នាំដ៏ទៃទៀតសម្រាប់អ្នកមានបញ្ហាស៊ាំជាមួយការព្យាបាលដំណាក់កាលចុងក្រោយ។ វាជាសារធាតុសកម្ម (active ingredient) ដែលអាចប្រើជាថ្នាំ PrEP ដើម្បីការពារការឆ្លងមិនឲ្យកើតឡើង។
Lenacapavir ត្រូវបានបង្កើតឡើងដោយក្រុមហ៊ុនធំមួយនៅសហរដ្ឋអាមេរិកឈ្មោះ Gilead Sciences ដែលមានបទពិសោធន៍យូរឆ្នាំក្នុងការអភិវឌ្ឍថ្នាំប្រឆាំងនឹងមេរោគ HIV។
នៅពាក់កណ្ដាលឆ្នាំ 2025 Lenacapavir ត្រូវបានអនុម័តដោយ USFDA (U.S. Food and Drug Administration) ជាផ្លូវការ និងក្លាយជាថ្នាំប្រឹពចាក់ (injectable PrEP) ដំបូងគេ ដែលអាចការពារ បានរយៈពេល ៦ ខែក្នុងការចាក់ម្ដង។ វាជាជម្រើសថ្មីសម្រាប់អ្នកដែលមិនចង់ប្រើថ្នាំប្រចាំថ្ងៃ។
ទោះបីជាវាជាជំហានជោគជ័យផ្នែកវិទ្យាសាស្ត្រថ្មីក៏ដោយ ប៉ុន្តែតម្លៃថ្នាំ Lenacapavir គឺពិតជាខ្ពស់ខ្លាំងឥតឧបមា ដោយមួយម្ជុលអាចមានតម្លៃរហូតដល់ទៅជាង១ម៉ឺនដុល្លារ។ ដូច្នេះហើយ អ្នកមិនអាចពឹងផ្អែកលើវាទាំងស្រុងបានទេ។
អ្វីដែលអ្នកអាចធ្វើបានគឺ៖
✅ ស្វែងយល់ពីការការពារដែលមានស្រាប់
✅ ពិនិត្យសុខភាពជាប្រចាំ
✅ ចេះថែរក្សាខ្លួន និងមានភាពទំនួលខុសត្រូវក្នុងទំនាក់ទំនងផ្លូវភេទ
Lenacapavir គឺជាជម្រើសមួយ ប៉ុន្តែមិនមែនជាដំណោះស្រាយសម្រាប់មនុស្សគ្រប់គ្នាទេ។
ដូចគ្នានេះផងដែរ ថ្នាំ PrEP ទាំងថ្នាំចាក់ និងថ្នាំលេប គឺវាអាចការពារអ្នកតែពីមេរោគ HIV ប៉ុណ្ណោះ។ ដូចនេះ ប្រសិនបើអ្នករួមភេទដោយមិនប្រើប្រាស់ស្រោមអនាម័យទេ អ្នកអាចប្រឈមនឹង ការឆ្លងជំងឺកាមរោគផ្សេងទៀតដូចជា ជំងឺស្វាយ ជំងឺប្រមេះទឹកបាយ ជំងឺប្រមេះទឹកថ្លា ឬ ជំងឺសិរមាន់ជាដើម។
ការការពារខ្លួនដោយប្រើស្រោម នៅតែជាជំហានដំបូងនិងសំខាន់បំផុត!
ឯកសារយោង៖ https://www.unaids.org/en/resources/presscentre/pressreleaseandstatementarchive/2025/june/20250618_lenacapavir #:~:text=GENEVA%2C%2018%20June%202025%E2%80%94The,injectable%20lenacapavir%20for%20HIV%20prevention.
