18/04/2026
ទូលព្រះបង្គំយើងខ្ញុំទាំងអស់គ្នាជាថ្នាក់ដឹកនាំ មន្រ្តីរាជការ ព្រមទាំងបុគ្គលិកទាំងអស់នៃមន្ទីរពេទ្យមិត្តភាពកម្ពុជា-ចិន ព្រះកុសុមៈ សូមព្រះបរមរាជានុញ្ញាតលើកហត្ថប្រណម្យបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក ទេវតាឆ្នាំថ្មីព្រះនាម រាក្យសាទេវី ទេវតាថែរក្សាព្រះមហាសេតច្ឆត្ត ព្រះបារមីនៃដួងវិញ្ញាណក្ខន្ធអតីតព្រះមហាក្សត្រខ្មែរគ្រប់ព្រះអង្គ ជាពិសេសដួងវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ "ព្រះបរមរតនកោដ្ឋ" សូមតាមជួយបីបាច់ថែរក្សា ការពារ និងប្រោសប្រទានព្រះរាជសព្ទសាធុការពរ បវរសួស្តី ជ័យមង្គល វិបុលសុខ មហាប្រសើរគ្រប់ប្រការថ្វាយ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ក្នុងវេលាដែល ព្រះអង្គកំពុងគង់ប្រថាប់នៅមន្ទីរពេទ្យរដ្ឋធានីប៉េកាំង នៃសាធារណរដ្ឋប្រជាមានិតចិន ដើម្បីព្យាបាលព្រះរោគដោយការវះកាត់តាមវេជ្ជបញ្ជា សូមព្រះអង្គឆ្លងកាត់ការវះកាត់ជោគជ័យ ទទួលបានព្រះរាជសុខភាពល្អបរិបូរណ៌ ចៀសចាកឆ្ងាយពីព្រះរោគាព្យាធិនានា និងសូមព្រះអង្គទ្រង់ប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ដើម្បីបន្តគង់ប្រថាប់នៅជាម្លប់ដ៏ត្រជាក់ត្រជុំ ចម្រុងចម្រើន ថ្កុំថ្កើង រុងរឿង ដល់ប្រជានុរាស្ត្ររបស់ព្រះអង្គជានិច្ចនិរន្ត។
