04/01/2026
⚠️مو كل “عادي” يحتاج إنذار⚠️
في أمور طبيعي تصير بين زوجين: اختلاف رأي، ضغط يوم، مزاج يتغير.
بس الخطر يبدأ يوم “العادي” يصير تخدير للألم.
مو لأن الحدث كبير.
لأن تفسيرك للحدث يصير غلط ويتكرر وينبني فوقه تراكم.
تأخر بالرد؟
العقل يقول: “يتعمد يتجاهلني.”
نبرة ناشفة؟
العقل يقول: “يبي يهينّي.”
خلاف على المصروف؟
العقل يقول: “ما يقدرني.”
هني أنت مو تتعامل مع “الحدث”
أنت تتعامل مع خوف: هجر، إهانة، فشل، انكشاف، نقص قيمة وتطلع ردة الفعل دفاعية، ويطلع جرح، وبعدين صمت، وبعدين نفور.
وبعد شهور/سنين يطلع الكلام اللي يفاجئ أحد الاطراف:
“أبي الطلاق.”
وأحدهم يقول: “أنا ما كنت أدري إنك واصل لهالمرحلة.”
إذا تبي علاقة ما تنكسر من التراكم:
ابدأ من أبسط نقطة:
صحّح تفسيرك قبل لا ترد.
اسأل: شنو تفسيري؟ شنو دليلي؟ شنو تفسير ثاني محتمل؟
وبعدها خذ قرارك بوعي مو بردة فعل.
