06/01/2026
مفيش أي تعارض إطلاقا بين الرضا والحزن
طبيعي وعادي جدا إني أكون مقتنعة بشيء معين أو شايفاه من سنن الحياة لكنه مضايقني.
مفيش حاجة بتعبر عن ده أكتر من كلام الرسول (ص) وقت وفاة ابنه إبراهيم
"إن العين تدمع والقلب يحزن، ولا نقول إلا ما يرضي ربنا، وإنا لفراقك يا إبراهيم لمحزونون"
نفسي نتقبل ده ونتعامل معاه على إنه طبيعي في حاجات كتير.
الناس اللي بتعيط على أحبابهم اللي فقدوهم وبيعبروا عن مشاعرهم ناحية الفقد ده، بلاش نديلهم محاضرات في الرضا لأنهم ممكن جدا يكونوا راضيين.
لما حد يتكلم عن حزنه على حاجة حصلت أو وضع هو فيه، مش شرط يكون محتاج نتكلم معاه بالمنطق عن ضرورة الحدث ده أو إنه طبيعي يحصل، لأنه غالبا عارف ده كويس، لكن بيعبر عن مشاعره ناحيته، وده حقه.
نوسع كده للمشاعر شوية، ادوها مساحتها تطلع 💜
