10/06/2025
ສູນວິໄຈພະຍາດຊືມເຊື້ອ ລາວ-ຄຣິສຕົຟ ເມຣິເອີ ກະຊວງສາທາລະນະສຸກ ໄດ້ຈັດກອງປະຊຸມສຳມະນາລະດັບຂົງເຂດອາຊີລຸ່ມແມ່ນໍ້າຂອງປະຈຳປີ 2025 ກ່ຽວກັບ ພະຍາດໄວຣັດຕັບອັກເສບ, ໃນຫົວຂໍ້ ຄວາມຄຶບໜ້າການລຶບລ້າງພະຍາດຕັບອັກເສບ ກອງປະຊຸມໄດ້ໃຫ້ກຽດເຂົ້າຮ່ວມເປັນປະທານ ໂດຍ ທ່ານ ປອ ດຣ.ພອນປະດິດ ສັງໄຊຍະລາດ ຫົວຫນ້າກົມຄວບຄຸມພະຍາດຕິດຕໍ່, ທັງເປັນຫົວຫນ້າສູນວິໄຈພະຍາດຊືມເຊື້ອ ລາວ-ຄຣິສຕົຟ ເມຣິເອີ ແລະ ຜູ້ຕາງໜ້າຈາກສະຖານທູດຟຣັງ ປະຈຳລາວ, ທ່ານ ນາງ Nathalie Brat, ທີ່ປຶກສາຝ່າຍການຮ່ວມມື ແລະ ວັດທະນະທຳ, ຜູ້ຕາງໜ້າຈາກກະຊວງການຕ່າງປະເທດ,ຄະນະກົມ ບັນດາສູນອ້ອມຂ້າງ,ຄະນະກຳມະການຕັບອັກເສບແຫ່ງຊາດ, ທ່ານໝໍປິ່ນປົວຈາກໂຮງຫມໍສູນກາງ, ຈາກໂຮງໝໍແຂວງ ທັງ 16 ແຂວງ, ຊ່ຽວຊານ ແລະ ນັກວິຊາການຈາກປະເທດໄທ, ພະມ້າ, ກໍາປູເຈຍ, ວຽດນາມ, ຝຣັງ, ຊ່ຽວຊານຈາກ ອົງການອະໄມໂລກ ປະຈຳລາວ ແລະ ປະຈຳພາກພື້ນ ຢູ່ຟີລິບປິນ ກໍ່ໄດ້ເຂົ້າຮ່ວມ,
ສປປ ລາວ ແມ່ນຫນຶ່ງໃນບັນດາປະເທດທີ່ມີອັດຕາການຕິດເຊຶ້ອໄວເອີລັສຕັບອັກເສບ B ສູງສົມຄວນ ຢູ່ທີ່ປະມານ 4-6% ແລະ ໄວລັສຕັບອັກເສບ C ປະມານ 1.6% ຂອງປະຊາກອນ. ປະຊາຊົນຈຳນວນຫຼາຍຍັງບໍ່ຮູ້ຕົວເອັງວ່າຕິດເຊື້ອຊຳເຮຶ້ອ ຫຼື ມີພະຍາດຕັບຊູດໂຊມຮຸນແຮງ, ເຮັດໃຫ້ມີອັດຕາການເສຍຊີວິດຍ້ອນມະເຮງຕັບ ຫຼື ຕັບແຂງເປັນອັນດັບ 1 ໃນພະຍາດມະເຮັງ. ເພື່ອຊ່ວຍແກ້ໄຂບັນຫາຂອງພະຍາດນີ້ ດັ່ງນັ້ນ ສູນວິໃຈພະຍາດຊຶມເຊື້ອ ລາວ-ຄຮິສຕົຟ ເມລີເອີ ຈຶ່ງໄດ້ຈັດກອງປະຊຸມວິທະຍາສາດ ກ່ຽວກັບ ໄວຣັສຕັບອັກເສບຄັ້ງທຳອິດ ໃນປີ 2012 ໃນລະດັບປະເທດ ແລະ ໄດ້ສຶບຕໍ່ຈັດ 1ຄັ້ງ ຕໍ່ປີ. ຈາກນັ້ນ ຈຶ່ງຄ່ອຍຂະຫຍາຍຂື້ນໄປເລຶ້ອຍໆ ຈົນກາຍເປັນລະດັບພູມມິພາກລຸ່ມແມ່ນ້ຳຂອງໃນປີ 2015 ທີ່ລວມເອົາປະເທດໃນອາຊຽນ ເຊັ່ນ: ກຳປູເຈຍ, ໄທ, ຫວຽດນາມ, ແລະ ມຽນມາ,
ມາໃນປີນີ້ກໍ່ເຊັ່ນດຽວກັນ, ໂດຍໄດ້ຮັບການຮ່ວມມືຈາກທັງພາຍໃນ ແລະ ຕ່າງປະເທດ ຈຶ່ງໄດ້ຈັດກອງປະຊຸມນີ້ຂື້ນ ເປັນເວລາ 2 ວັນ, ໂດຍມີຜູ້ສະໜັບສະໜູນຫຼັກແມ່ນ ມູນນິທິເມລິເອີ ປະເທດຝລັ່ງ, ສະຖານທູດຝລັ່ງປະຈຳລາວ, ແລະ ບໍລິສັດໂອເພັນຊອສເທັກໂນໂລຢີ ຈຳກັດພຽງຜູ້ດຽວ (OST). ຈຸດປະສົງຫລັກ ແມ່ນເພື່ອສ້າງຄວາມເຂັ້ມແຂງ ແລະ ການແລກປ່ຽນຄວາມຮູ້ປະສົບການດ້ານການຄົ້ນຄ້ວາວິທະຍາສາດ ກ່ຽວກັບ ພະຍາດໄວລັສຕັບອັກເສບ B, C, ແລະ D, ສະຫນັບສະຫນູນເປົ້າໝາຍການລົບລ້າງພະຍາດນີ້ໃນປີ 2030, ໂດຍໄດ້ນຳສະເໜີຫຼາຍຫົວຂໍ້ແຕກຕ່າງກັນ ເຊັ່ນ: ການປ້ອງກັນການສົ່ງເຊຶ້ອຈາກແມ່ສູ່ລູກ, ການສັກວັກຊີນກັນໄວລັສຕັບອັກເສບ B, ອັບເດດຄູ່ມືການກວດບົ່ງມະຕິ, ການປິ່ນປົວ ແລະ ການຕິດຕາມຄົນເຈັບທີ່ເປັນຕັບອັກເສບຊໍາເຮຶ້ອ, ຄວາມຄຶບໜ້າຂອງການລົບລ້າງພະຍາດຕັບອັກເສບ C ໃນແຕ່ລະປະເທດ, ສົ່ງເສີມ ແລະ ທັງແກ້ໄຂສິ່ງທ້າທາຍຂອງພະຍາດນີ້ໃນຂົງເຂດດ້ານສາທາລະນະສຸກ.
ວັນທີ 4 ຫາ 5 ມິຖຸນາ 2025.ທີ່ ໂຮງແຮມດອນຈັນພາເລດ.
