12/06/2025
ມະເຮັງຮີມສົບ ຫລື ປາກລຸ່ມ 👄🫦🦠
ມະເຮັງປາກລຸ່ມແມ່ນມະເຮັງຊ່ອງປາກຊະນິດໜຶ່ງທີ່ພົບເຫັນເລື້ອຍໆ, ໂດຍສະເພາະຢູ່ປາກລຸ່ມ, ເພາະວ່າເປັນບໍລິເວນທີ່ສຳຜັດກັບປັດໃຈສ່ຽງຕ່າງໆໄດ້ງ່າຍ.
🔵 ລັກສະນະ ແລະອາການຂອງມະເຮັງປາກລຸ່ມ
ໃນໄລຍະທຳອິດ, ມະເຮັງປາກມັກຈະຍັງບໍ່ມີອາການເຈັບປວດ, ເຮັດໃຫ້ຫຼາຍຄົນລະເລີຍ ແລະໄດ້ຮັບການກວດພົບຊ້າ. ແຕ່ຖ້າພົບອາການເຫຼົ່ານີ້, ຄວນຟ້າວໄປພົບແພດ ຫຼືທັນຕະແພດເພື່ອກວດວິນິດໄສ:
* ບາດແຜເຮື້ອຮັງ: ມີບາດແຜຢູ່ປາກລຸ່ມທີ່ບໍ່ເຊົາພາຍໃນ 2-3 ອາທິດ ອາດມີຂອບໜາ ແລະແຂງ, ບາງຄັ້ງອາດເປັນບາດແຜຕື້ນໆ, ມີອາການເຈັບ ຫຼືບໍ່ເຈັບກໍໄດ້.
* ກ້ອນເນື້ອ ຫຼືຕຸ່ມ: ມີຕຸ່ມ ຫຼືກ້ອນເນື້ອໃຫຍ່ໄວທີ່ປາກ, ຜິວໜ້າຂຸຂະ ຫຼືອາດມີລັກສະນະຄ້າຍດອກກະຫຼ່ຳ.
* ຮອຍໂລກສີຂາວ ຫຼືແດງ: ມີຮອຍປື້ນສີຂາວຄ້າຍກຳມະຫຍີ່, ຮອຍສີແດງ, ຫຼືຮອຍດ່າງສີແດງຂາວພາຍໃນຊ່ອງປາກ ເຊິ່ງອາດປ່ຽນເປັນມະເຮັງໄດ້ໃນພາຍຫຼັງ.
* ອາການຊາ: ມັກເກີດຈາກມະເຮັງລາມ ແລະທຳລາຍເສັ້ນປະສາດ ອາດຮູ້ສຶກຊາບໍລິເວນປາກລຸ່ມ.
* ເລືອດອອກຜິດປົກກະຕິ: ມີເລືອດອອກງ່າຍຈາກບາດແຜໃນປາກໂດຍບໍ່ຮູ້ສາເຫດ.
* ບັນຫາໃນການຄ້ຽວ, ກືນ ຫຼືເວົ້າ: ຫາກມະເຮັງລາມ, ອາດເຮັດໃຫ້ມີບັນຫາໃນການເຄື່ອນໄຫວປາກ, ຄ້ຽວອາຫານ, ກືນອາຫານ, ຫຼືເວົ້າລຳບາກ, ອ້າປາກໄດ້ຈຳກັດ.
🔵 ສາເຫດ ແລະປັດໃຈສ່ຽງຂອງມະເຮັງປາກລຸ່ມ
ເຖິງແມ່ນວ່າຍັງບໍ່ຮູ້ສາເຫດທີ່ແທ້ຈິງຂອງການເກີດມະເຮັງປາກ, ແຕ່ມີປັດໃຈສ່ຽງຫຼາຍຢ່າງທີ່ເພີ່ມໂອກາດໃນການເກີດພະຍາດໄດ້ແກ່:
* ການສູບຢາ ແລະດື່ມເຫຼົ້າ: ເປັນປັດໃຈສ່ຽງທີ່ສຳຄັນທີ່ສຸດ. ຜູ້ທີ່ສູບຢາ ແລະດື່ມເຫຼົ້າຈັດ ມີໂອກາດເປັນມະເຮັງໃນຊ່ອງປາກຫຼາຍກວ່າຄົນປົກກະຕິເຖິງປະມານ 15 ເທົ່າ.
* ການຄ້ຽວໝາກ, ພູ, ຢາສູບ, ຢາເສັ້ນ: ສິ່ງເຫຼົ່ານີ້ມີສານກໍ່ມະເຮັງເຈືອປົນຢູ່.
* ການສຳຜັດແສງແດດເປັນເວລາດົນ: ໂດຍສະເພາະມະເຮັງປາກມັກຈະກ່ຽວຂ້ອງກັບການສຳຜັດແສງແດດເປັນປະຈຳ.
* ສຸຂະອະນາໄມໃນຊ່ອງປາກບໍ່ດີ: ເຊັ່ນ: ແຂ້ວແມງເຮື້ອຮັງ, ພະຍາດເຫືອກ, ການລະຄາຍເຄືອງເຮື້ອຮັງຈາກແຂ້ວທີ່ແຫຼມຄົມ, ແຂ້ວແຕກ, ຫັກ ຫຼືແຂ້ວປອມທີ່ບໍ່ພໍດີ ເຊິ່ງອາດເຮັດໃຫ້ເກີດບາດແຜເຮື້ອຮັງ.
* ການກິນອາຫານ ແລະເຄື່ອງດື່ມທີ່ຮ້ອນຈັດເກີນໄປ: ຄວາມຮ້ອນເຮື້ອຮັງອາດລະຄາຍເຄືອງເຍື່ອບຸໃນຊ່ອງປາກ.
* ການຕິດເຊື້ອໄວຣັສ HPV: ໂດຍສະເພາະສາຍພັນ 16 ແລະ 18 (ຄືກັນກັບມະເຮັງປາກມົດລູກ).
* ການໃຊ້ຢາກົດພູມຄຸ້ມກັນ: ໃນຄົນເຈັບທີ່ໄດ້ຮັບການປ່ຽນຖ່າຍອະໄວຍະວະ.
* ການກິນຜັກ ແລະໝາກໄມ້ນ້ອຍ: ອາດສົ່ງຜົນຕໍ່ລະບົບພູມຄຸ້ມກັນ ແລະການປ້ອງກັນມະເຮັງ.
🔵 ການບົງມະຕິ
ຫາກມີອາການທີ່ໜ້າສົງໄສ, ຄວນຟ້າວໄປພົບແພດ ຫຼືທັນຕະແພດ. ແພດຈະທຳການສອບຖາມປະຫວັດ, ກວດຮ່າງກາຍ, ແລະອາດມີການກວດເພີ່ມເຕີມເຊັ່ນ:
* ການກວດຊິ້ນເນື້ອ (Biopsy): ເປັນການນຳຊິ້ນເນື້ອບໍລິເວນທີ່ສົງໄສໄປກວດທາງພະຍາດວິທະຍາ ເພື່ອຢືນຢັນການວິນິດໄສ.
* ການສ່ອງກ້ອງ: ເພື່ອປະເມີນຂອບເຂດຂອງຮອຍໂລກ.
* ການຖ່າຍພາບລັງສີ: ເຊັ່ນ: CT Scan, MRI ເພື່ອເບິ່ງການແຜ່ກະຈາຍຂອງມະເຮັງ.
♥️ການປິ່ນປົວ
ວິທີການປິ່ນປົວມະເຮັງປາກຂຶ້ນຢູ່ກັບຊະນິດ, ຂະໜາດ, ຕຳແໜ່ງຂອງມະເຮັງ ແລະໄລຍະຂອງພະຍາດ. ໂດຍທົ່ວໄປມັກໃຊ້ການປິ່ນປົວຫຼັກດັ່ງນີ້:
* ການຜ່າຕັດ❗❗: ເປັນວິທີຫຼັກໃນການປິ່ນປົວມະເຮັງປາກ ໂດຍຈະຕັດເນື້ອງອກອອກໃຫ້ໝົດ, ລວມທັງເນື້ອເຍື່ອອ້ອມຂ້າງ ແລະອາດລວມເຖິງການເລາະຕ່ອມນ້ຳເຫຼືອງທີ່ຄໍຫາກມີການແຜ່ກະຈາຍ.
* ການສາຍແສງ: ອາດໃຊ້ຢ່າງດຽວ ຫຼືໃຊ້ຮ່ວມກັບການຜ່າຕັດ ໂດຍສະເພາະໃນກໍລະນີທີ່ມະເຮັງມີຂະໜາດໃຫຍ່, ຫຼືມີການແຜ່ກະຈາຍໄປຕ່ອມນ້ຳເຫຼືອງ.
* ເຄມີບຳບັດ: ອາດໃຫ້ຮ່ວມກັບການຜ່າຕັດ ຫຼືການສາຍແສງ, ໃນກໍລະນີທີ່ມະເຮັງມີຂະໜາດໃຫຍ່, ຫຼືຢູ່ໃນໄລຍະແຜ່ກະຈາຍ.
🛡️ ການປ້ອງກັນ
ການປ້ອງກັນມະເຮັງປາກລຸ່ມສາມາດເຮັດໄດ້ໂດຍການຫຼຸດປັດໃຈສ່ຽງຕ່າງໆດັ່ງນີ້:
* ງົດສູບຢາ ແລະຫຼຸດການດື່ມເຫຼົ້າ: ເປັນສິ່ງສຳຄັນທີ່ສຸດ.
* ຫຼີກລ້ຽງການຄ້ຽວໝາກ, ພູ, ຢາສູບ, ຢາເສັ້ນ.
* ຫຼີກລ້ຽງການສຳຜັດແສງແດດຈັດເປັນເວລາດົນ: ໃສ່ໝວກ, ທາລິບປາມປ້ອງກັນແສງແດດ ແລະໃຊ້ຄີມກັນແດດບໍລິເວນປາກ.
* ເບິ່ງແຍງຮັກສາສຸຂະອະນາໄມໃນຊ່ອງປາກໃຫ້ດີ: ຖູແຂ້ວໃຫ້ສະອາດ, ພົບທັນຕະແພດເປັນປະຈຳທຸກ 6 ເດືອນ ເພື່ອກວດສຸຂະພາບຊ່ອງປາກ ແລະແຂ້ວ.
* ຫາກມີແຂ້ວທີ່ແຫຼມຄົມ, ແຂ້ວຫັກ ຫຼືແຂ້ວປອມທີ່ບໍ່ພໍດີ: ຄວນຟ້າວປຶກສາທັນຕະແພດເພື່ອແກ້ໄຂ.
* ກິນອາຫານທີ່ມີປະໂຫຍດ: ເນັ້ນຜັກ ແລະໝາກໄມ້ສົດ.
* ຫາກມີບາດແຜໃນປາກທີ່ບໍ່ເຊົາເກີນ 2-3 ອາທິດ: ຄວນຟ້າວໄປພົບແພດ ຫຼືທັນຕະແພດທັນທີ.
ການກວດພົບມະເຮັງໃນໄລຍະທຳອິດມີຄວາມສຳຄັນຢ່າງຍິ່ງຕໍ່ໂອກາດໃນການປິ່ນປົວໃຫ້ຫາຍຂາດ. ດັ່ງນັ້ນ, ຫາກມີຂໍ້ສົງໄສ ຫຼື ມີຄວາມຜິດປົກກະຕິໃດໆ ໃນຊ່ອງປາກ, ຄວນຟ້າວປຶກສາຜູ້ຊ່ຽວຊານທັນທີ.
🧑⚕️🩺 ປທ ດຣ ຈັນທະວີ ສຸກສະຫວັນ ຍີນດີໃຫ້ຄຳປືກສາ ແລະ ປີ່ນປົວພະຍາດດັ່ງກ່າວ 📞 020 56656363 ♥️
