01/08/2025
AHF Laos ໄດ້ປຶກສາຫາລືກັບ ສຕອ ເຊີ່ງມີທ່ານ ດຣ. ບົວທອງ ຮັກສາການຫົວໜ້າສູນ ແລະ ທ່ານ ດຣ. ບຸນເລີດ ຮອງຫົວໜ້າສູນ ພ້ອມດ້ວຍທິມງານວິຊາການ ແລະ ຜູ້ປະສານງານໂຄງການ ໄດ້ສົນທະນາຮ່ວມກັບທ່ານ ດຣ. ສຸລິວັນ ຜູ້ຕ່າງໜ້າຂອງ AHF Laos ພ້ອມດ້ວຍທິມງານ. ປະເດັນຫຼັກຂອງການສົນທະນາແມ່ນເນັ້ນແຜນການຮ່ວມມືສະໜັບສະໜູນຂອງອົງການ ໃນວຽກງານການປ້ອງກັນການລະບາດຂອງເຊື້ອເຮສໄອວີ ແລະ ພຕພ, ການຊ່ວຍເຫຼືອການປິ່ນປົວກໍລະນີທີ່ມີອາການຮຸ່ນແຮງທີ່ຈຳເປັນຕ້ອງໃຊ້ຢາພິເສດສະເພາະທີ່ຂ້ອນຂ້າງມີຄ່າໃຊ້ຈ່າຍສູງ ເຊີ່ງປັດຈຸບັັນບໍ່ມີໂຄງການໃດໃຫ້ການຊ່ວຍເຫຼືອແກ່ຄົນເຈັບ, ການແນະນຳກຸ່ມທີ່ມີຄວາມສ່ຽງໃຫ້ເຂົ້າເຖີງການນຳໃຊ້ຢາປ້ອງກັນ (PrEP) ເປັນຕົ້ນ. ພ້ອມກັນນັ້ນ ທາງ ສຕອ ກໍ່ໄດ້ຂໍການສະໜັບສະໜູນໃນການຂະຫຍາຍພື້ນທີ່ໂຄງການອອກໄປສູ່ແຂວງໃໝ່ເພີ່ມເຕີມ ຖ້າມີຂໍ້ຈຳກັດດ້ານງົບປະມານ ກໍ່ຂໍໃຫ້ພິຈາລະນາເນັ້ນສະເພາະກິດຈະການລົງໂຄສະນາກວດເລືອດໃນຊຸມຊົນ ເພື່ອໃຫ້ສາມາດບັນບຸເປົ້າໝາຍ 95 ທີໜຶ່ງ(ກຸ່ມສ່ຽງໄດ້ຮັບການກວດເລືອດ ແລະ ຮູ້ສະຖານະຂອງຕົນເອງ) ແລະ 95 ທີສອງ (ຄົນຕິດເຊື້ອໄດ້ຮັບການປິ່ນປົວ). ທາງອົງການຍິນດີນຳເອົາຄຳສະເໜີໄປພິຈາລະນາ ແລະ ປຶກສາກັບທາງຫ້ອງການໃຫ່ຍເພື່ອຕັດສິນໃຈວ່າຈະສາມາດສະໜອງໄດ້ເທົ່າໃດ ແລະ ອັນໃດແດ່. ນອກນັ້ນ ທາງອົງການກໍ່ໄດ້ແລກປ່ຽນກ່ຽວກັບປະເດັນຄຸນນະພາບການບໍລິການໃນສູນປິ່ນປົວ ເນື່ອງຈາກວ່າອັດສ່ວນຂອງຄົນເຈັບທີ່ຂາດຢາສູງກ່ວາປະເທດອື່ນໃນພາກພື້ນທີ່ອົງການຮ່ວມມື. ອົງການຕ້ອງການຈະສຶກສາເບີ່ງສາເຫດເພື່ອຈະໄດ້ນຳມາປັບປຸງການບໍລິການໃຫ້ດີຂຶ້ນ. ນອກນີ້ກໍ່ໄດ້ປຶກສາກ່ຽວກັບການນຳໃຊ້ທຶນໃນການລົງກວດໃນຊຸມຊົນທີ່ເຫັນວ່າບໍ່ຄ່ອຍພົບຄົນຕິດເຊື້ອເຮສໄອວີ ອາດຍ້ອນການກຳນົດກຸ່ມເປົ້າໝາຍທີ່ບໍ່ມີຄວາມສ່ຽງສູງບໍ່ ເຊີ່ງຈະຕ້ອງໄດ້ທົບທວນໃໝ່ເພື່ອໃຫ້ການນຳໃຊ້ງົບປະມານມີປະສິດທິຜົນ. ເພາະໃນຄວາມເປັນຈິງ ອັດຕາຄົນຕິດເຊື້ອແມ່ນຍັງສູງສັງເກດໄດ້ຈາກກໍລະນີຍ່າງເຂົ້າມາຮັບບໍລິການເອງໃນໂຮງໝໍເຊີ່ງມີຈຳນວນຄົນທີ່ຕິດເຊື້ອເພີ່ມຂຶ້ນທຽບໃສ່ຊຸມປີຜ່ານມາ.
