02/02/2026
الحمدلله الذي بنعمته تتم الصالحات
من ٤٠ يوم الله رزقنا مولودنا و قطعة من قلبنا ابننا البكر علي الرضا.
اللهم أنبته نباتا حسنا و اجعله من الصالحين.
علي الرضا اجا ع حياتنا بتاريخ ٢٤-١٢-٢٠٢٥، ليلة ميلاد سيدنا عيسى(ع) ، كانت العيلة كلها مجتمعة و اجا هو هديتها.
ولادة علي الرضا كانت كتير مميزة فوق ما كتير ناس بتتصور .
تمّت داخل العيادة اللي تأسست من سنة ١٩٩٨ على تحويطة الغدير، و شهدت كتير ولادات ، حتى تكللت اخر شي بولادة علي الرضا على ايد مؤسستها القابلة القانونية Hoda Fayssal ، اللي من خلاها تصير teta♥️
كتير ناس عارضوني : "كيف بدها امك تولدك؟ معقول تتأثر لأنك بنتها؟ ليه بدك تولدي بالعيادة؟ طيب على القليلة بالمستشفى!"
و انا متمسكة بأجوبتي : "اذا امي ما ولدتني مين بيولدني؟؟ غيري ابدى مني انها تولده؟ شو بها العيادة؟ مجهزة من كل شي ، اللي بقبله ع غيري ما بقبله ع نفسي؟"
كانت خطتي من الاساس، و الأحب ع قلبي ، اني ولّد بالعيادة عند ماما ، و من جواتي كنت متأكدة اني ح اقدر .
تجربتي كانت مليانة مشاعر حلوة رغم وجعها ، فيها البكي و الضحك و الصبر و القوة و الايمان مع ثقة بالنفس و بالرب .
و كل هيدا عم يصير بكل احترافية بإشراف طبي دقيق من والدتي مع تحسين كل الظروف المحاطة فيي.
حتى انه من كتر جمال اللي مرقت فيه، قدرت امسك طفلي اول ما خلق و احضنه و انا اللي نشفه بكل محبة و حرارة ... اي حتى خلال ولادتي شتغلت😆😉
و لكل يللي سألني اذا خفت ، انا كيف بدي خاف و ربي معي الحامي ، مرتاحة و مآمنة بنفسي و على يقين اني بين اكتر ايدين امينة و قلب بيعتل همي.
مستحيل كنت فكّر ولّد بمكان تاني او عند شخص تاني الا اذا اضطر الامر .
لأن مستحيل كون مرتاحة و مبسوطة و حس بالأمان و الدفا متل ما حسيت جوا العيادة ، و مستحيل كنت اوثق بقلب او قوة او خبرة سنين شخص غير امي .
بتشكر كل الاشخاص و عيلتي الحلوة اللي كانوا ناطريني ع نار بدموع كلها حب و فرح،
و زوجي اللي دعمني بخياري ، ما تردد و ما تركني للحظة هو و قلبه معي و عليي،
و امي اللي كانت الجزء الاساسي من التجربة لأنها اشتغلت شغل جبار و آمنت فيي للأخير .
كانت خطوة شجاعة بفتخر اني عملتها و مستحيل غيّر ايّ تفصيل فيها.
تجربة فريدة بعنوان :
القابلة الام ولدت القابلة البنت داخل عيادتها الخاصة
Une nouvelle aventure d'accouchement physiologique en clinique privée ♥️
