Faten fawaz

21/03/2026

يا رب، برّد قلب "إمّي" لبنان، وريّح بال كل إم عم بترمّم شقف الخوف ببيتها بكلمة حنونة أو لقمة طيّبة. 🕯️

19/03/2026

العيد.. يبدأ من "سلام" خلاياكِ

منقول "كل عام وأنتم بخير"، بس الخير هالسنة مش كلمة.. هو قرار.

بصفتي مدربة صحية مَرقت بـ ٥ حروب، تعلمت إنو الحروب اللي بتبدأ بـ أوطانا، بيوتنا، وشوارعنا، بتخلص لما نهدّي الحرب اللي بـ صدورنا.

الخير الحقيقي ببلش من جوا:
لما تهدي جهازك العصبي بـ "نَفَس عميق"، إنتِ عم تنشري طاقة هدوء لعيلتك.
لما تريحي معدتك المشنّجة بـ "لقمة حنيّة"، إنتِ عم تعطي جسمك إشارة أمان.
لما تتقبلي تعبك وتصالحي روحك، إنتِ عم تزرعي أول بذور السلام بالأرض.

العدوى مش بس للمرض.. "السكينة" كمان معدية. 🤍
لما نكون متصالحين مع أجسامنا المنهكة، طاقتنا بتتغير، والخير بينتقل منا لـ ولادنا، لـ جيراننا، ولـ وطنا.. لحد ما توقف كل طبول الحرب قدام قوة "هدوئنا".

دعوتي لِك بهالعيد:
كوني إنتِ "الخير" اللي ناطرتيه. كوني السلام اللي عم تفتشي عليه.
يا رب، هالعيد يكون بداية لـ نهاية كل وجع، ولـ ولادة "لبنان" بـ قلوبنا قبل شوارعنا.

كل عام وإنتِ بخير.. وصحة.. وسلام داخلي ما بتهزّه ريح. 🕯️

16/03/2026

لمّا نظريات التغذية تلتقي مع "أصوات القصف".. 🔊🤡
يا جماعة، خلينا نكون صريحين.. الـ Cortisol بلبنان مش هرمون، هو "جارنا اللجوج" اللي قاعد معنا ٢٤ ساعة.
قانون الجاذبية اللبناني حالياً:
1️⃣ الخضرا والـ Kale؟ هلق وقت "المنقوشة" اللي بتسند القلب والروح.
2️⃣ الـ 8 ساعات نوم؟ هول منسمع فيهن بالمسلسلات التركية بس.
3️⃣ الـ Emotional Eating: هيدا مش غلط، هيدا جسمنا عم يحاول يعمل "Buffering" للصدمة بلقمة طيبة. 🍫
رسالتي إلكن اليوم:
إذا مبارح بالليل خلصتي نص خزانة المونة وأنتِ عم تلحقي الأخبار.. اعذري حالك.
بوضعنا هيدا، الـ "بقاء" أهم من الـ "كالوريز".
"لَح تِقطع".. وبس تقطع، منرجع للمي الفاتر والديتوكس. هلق، كلي شي بيطمنك وبخليكي قوية.
مين عملت "مداهمة" عالمطبخ مبارح بالليل؟ اعترفي بالتعليقات وخلينا نواسي بعض! 👇😂

14/03/2026

عن إحساس الـ "Shutdown" اللي ساكن فينا.. 🇱🇧

في وجع أصعب من البكي، هو الوجع اللي بيعملنا "نشفان".

بنوعى كل يوم، منعمل واجباتنا، ومنطمن عاللي حوالينا.. بس الحقيقة إنو أرواحنا تعبت من المحاولة. عم نعيش "بالجسم" بس، أما القلب والبال صاروا بغير مكان.

كمدربة صحية، بدي خبرك إنو هيدا الـ "Shutdown" مش ضعف:
هيدا جسمك عم يحاول يحميكي من الصدمات المتتالية. لما الدماغ يشوف إنو الحمل صار فوق الطاقة، بيعمل "Numbness" لتقدر يكفي.

طبيعي تحسي إنك:
❌ مش عم تقدري تفرحي ولا حتى تبكي.
❌ مش عم تقدري تركزي أو تاخدي قرار.
❌ عم تحسي حالك "متفرجة" على حياتك مش جزء منها.

يا جسمي.. بعتذر منك لأنو الـ "حياة" بلبنان صارت مجرد "بقاء".

اعذري حالك اليوم إذا كنتِ بهالحالة. هيدا مش كسل، هيدا نظام حماية. خدي نَفَس، وما تطلبي من حالك أكتر من إنك بس تكوني موجودة.

"لَح تِقطع".. بس هلق، حقنا نكون تعبانين. 🤍🕯️

12/03/2026

لـ كل قلب عم يدقّ بسرعة اليوم..
بعرف إنو ليلة مبارح ما كانت ليلة نوم. كانت ليلة خوف، ليلة أصوات، وليلة "شدّ أعصاب" خلت أمعاءنا ومعدتنا تشنّج متل القفل.
كمدربة صحية، اليوم ما رح قلك كلي خضرا ونامي بكير. اليوم بدي قلك: حقّك تكوني تعبانة.
تعبنا بلبنان مش بس قلة نوم، هو "استنزاف" لكل خلية بجسمنا عم تحاول تحمينا من الخوف. القولون المشنّج، وجع الراس، والرجفة اللي باليدين.. هيدا جسمك عم يصرخ لأنو الحمل صار تقيل.
بس تذكّري:
جسمك معجزة بالصمود، ومعدتك رح ترجع ترتاح، ونفسك رح يرجع يهدى.. لأنو "لَح تِقطع" متل ما كل شي مرّ وقطع.
شربي مي، خدي نَفَس عميق، وقولي لـ حالك: "برافو عليكي، بعدك واقفة". 🤍
أرسلي هالرسالة لكل امرأة اليوم.. طمنيها إنو التعب اللي حاسة فيه "طبيعي"، وإنو لَح تِقطع. 🕊️

10/03/2026

رسالة اعتذار لجسمي.. ولأمعائي اللي "عم توجعني" 🩹
بعرف إنو معدتي عم تشنّج كل ما بسمع صوت قوي.
بعرف إنو راسي عم يثقل من كتر الأخبار والتحليل.
بعرف إنو نومي مقطّع.. وصبري عم يخلص.
كمدربة صحية، دايماً بقولكن "اهتموا بحالكم".. بس اليوم، بدي قولكن: "اعذروا حالكم".
أمعاءنا المربوطة، الإمساك اللي مش عم يحلّ عنّا، والتعب اللي ساكن بضلوعنا.. هيدا مش مرض. هيدا جسمنا عم يحاول يلملم شقف الخوف اللي فينا ليحمينا.
جسمك عم يصرخ لأنو مش عم يقدر يلحّق يهضم كل هالضغط.
اليوم، هيدي دعوة لنهدي شوي:
✅ شربة مي فاترة.. مش لتعطشي، بس لترطبي قلبك.
✅ دقيقة تنفس عميق.. لتخبري جهازك العصبي إنو "هلق، نحن بخير".
✅ ونظرة عالمراية بـ حنيّة.. قولي لحالك: "برافو عليكي، بعدك واقفة على إجريكي".
قوتنا مش بالحديد، قوتنا بالتحمّل.. بس الحجر بيتعب، فـ كيف جسمنا؟
أرسلي هالبوست لكل امرأة ببيتك، بشغلك، أو بـ "غروب العيلة".. قوليلا: "انتبهي على حالك، إنتِ أغلى ما عنّا". 🕊️💜

10/03/2026

وسط كل شي عم نعيشه، نسينا إنّو جسمنا هو البيت الوحيد اللي باقي لنا. الضغط النفسي مش بس "بِالرأس"، هو "بالخلايا"، بالهضم، وبطاقتنا.
اليوم البوست مش نصيحة مني الكن، اليوم البوست هو مساحة لنسمع صوت جسمنا.
نقّوا الرقم (١، ٢، ٣، أو ٤) من السلايدات اللي بيوصف حالكم اليوم، ورح حاول ردّ على أكبر عدد منكم بحلّ بسيط وسريع.
نحن هون لندعم بعض، لو بكلمة أو بنصيحة زغيرة. 👇

07/03/2026

ليش جسمك "محبوس"؟ (عن الإمساك بظروفنا الصعبة) 🇱🇧👇

بنعرف إنو الأكل قليل الألياف بيعمل إمساك.. بس بلبنان اليوم، المشكلة أكبر من هيك بكتير.

لما نكون عم نتشارك الحمام مع عدد كبير من العالم، أو بمكان ما بنحس فيه بخصوصيتنا الكاملة، دماغنا بيفوت بحالة "تأهب". النتيجة؟ الجهاز الهضمي بـ "يُقفل" حرفياً.

هيدا مش بس وجع بطن، هيدا جسمك عم بيقول: "أنا مش حاسس بالأمان كفاية لأرخي عضلاتي".

عدم تقبّل الواقع أو الـ Resistance للوضع اللي نحن فيه بيخلق تشنج داخلي بيمنعك حتى من أبسط الحقوق الطبيعية.

بالسلايدات خبرتكم عن ٣ خطوات عملية:
١- كيف نستخدم "وضعية الجلوس" لنساعد الأمعاء في ظل العجقة.
٢- كيف "نضحك" على الجهاز العصبي لنعطيه إشارة أمان (Safety Signal).
٣- كيف نستخدم الموجود بالمطبخ لنليّن الحركة.

تذكروا: الاستسلام للواقع الحالي (Surrendering to the moment) مش يعني رضى بالظلم، هو وسيلة لـ "النجاة" بجسم سليم.

خلينا نحكي بصراحة بالتعليقات (أو بالـ DM إذا بتفضل الخصوصية):
مين منكم عم بيعاني من هيدا الموضوع حالياً؟ ووين عم تلاقوا الصعوبة الأكبر؟ 🤍

LebanonCrisis صحة لبنان امساك

27/02/2026

أوقات عادات صغيرة بتعمل فرق كبير
شو أكتر عادة حابة تغيّريها هالسنة؟ 🤍

25/02/2026