18/12/2025
مقابلة مع
-ماذا يعني لك عيد الميلاد؟
عيد الميلاد بالنسبة الي يوم عادي لدرجة موجعة، لأنو محدا منا عم يولد ولادة جديدة حقيقية، أغلبيتنا منهتم بهالشجرة وبالأضوية وبهالهدايا ليلة وحدة، ومنرجَع منوعى على نفس الحياة .
عيد الميلاد كل سنة عم يفرجيني أدّيش نحنا متمسكين بنسخة باهتة وتافهة من حالنا، وأدّيش منخاف نهدم ولو حجر صغير من شخصيتنا الوهمية...
لأنو الظاهر الحقيقة بلا زينة بتخوّف... إي بتخَوِّف كتير!
_ اجمل ذكرى بعيد الميلاد.
ما في ذكرى صدقا، لان العيد ولا سنة ترك عندي غير واقع قاسي بعيد عن جوهر هالعيد واقع بيقللي انو كل سنة عم نعْيد نفسنا، نفس الوجوه، نفس الردات، نفس الجرح، نفس الهروب، و حتى الفرحة صارت تمثيلية بس ادام كاميرات وسائل التواصل الاجتماعي.
-معايدة لجمهورك
معايدتي للناس ما فيها لطف أبدا ، بتمنالكن سقوط، سقوط من كل شي عم تستندوا عليه لتصيروا مزيَفين اكتر،
بتمنالكن تنهار صورة الشخص يلي بيضحك للكاميرا بس من جوّا عم يبكي لانو يمكن اول مرة بيشوف حالو بلا تجميل.
هيدي معايدتي من قلبي لالكن ، من دون كذب ودجل وصف كلام.
لان ما برضى حتى معايدتي تكون من نسج الخيال و مش طالعة من قلبي.
وصورة طفولتي مع العيد ما كانت شجرة ولا هدية ولا بيعنيلي الامر،
فهمت انو العدل فكرة مش واقع، ومش كل الولاد بيجيهن هدايا، لليوم في ولاد ما عندن دفا، وفي ولاد بلا اكل، وبلا كهرباء وفي ولاد مدمرة بيوتها وخاصة بلبنان كل طموحهاا سقف يأويها ....
هيدا هو الميلاد؟؟
لأ! هيدا الواقع الحقيقي القاسي يلي ما حدا بيحكي عنو لانو يمكن ما بيلبق لصورة الاحتفالات ولا لستوري الفيسبوك ولا للانستغرام...
