https://www.facebook.com/113295418432765/

Maghdouche - History & Heritage, Maghdouché, Saïda (2025)

22/05/2025

[من له أُذنان تسمعان فليسمع]

جدودكن فلحوا الأرض، وعمرو البيوت حجر حجر، وستاتكن راحو على فلسطين عاجريهن وعالدواب تيبعوا القمح، ومنهن راحوا ع مصر يشتغلو بالبيوت... وبخبّر الدكتور بهيج الناشف بكتابه عن مغدوشة:

"... والملفت في الأمر أنهم كانوا بعد أن يتمّموا صلاة الذبيحة الإلهية يوم الأحد في مقام السيّدة، يصطفّون صفًا واحدًا، يناول أحدهم الآخر حجرًا تلو الحجر [من أحجار بقايا برج الصليبيين]، وهكذا دوليك، حتى يصل إلى المكان الذي خُصّص لبناء الكنيسة. أما البناؤون الذين أشرفوا على بناء الكنيسة فهم أبناء القرية أنفسهم، بالتعاون وبتوجيه من بنّائين إثنين من آل الخرياطي من قرية جون، للذين هما نفسيهما أشرفا على بناء كاتدرائية مار نقولا في صيدا. ومنذ ذلك الوقت تعلّم أبناء مغدوشة فن البناء والنحت، وأتمّوا بناء كنيستهم بأيديهم في الفترة الزمنية الممتدّة من السنة ١٨٨٥ إلى السنة ١٨٩٥ م."

الدكتور بهيج الناشف، مغدوشة في محيطها عبر العصور، الجزء الثاني ص ٧٨
(الصورة المرفقة كمان من كلام الدكتور بهيج من نفس الصفحة)

21/07/2023

Ayda Hayeck
متل ما وعدناكي هيدي شجرة عيلة أجدادك بترجع تقريباً لسنة ١٨٠٠. فيها خمسة أجيال كاملين وجزء من السادس: عايدة (١/١)، اهلها، (٢/٢)، جدودها وستاتها (٤/٤)، جدود وستات اهلها، (٨/٨)، جدود وستات جدودها وستاتها(١٦/١٦)، والجيل السادس (١٧/٣٢). المجموع ٤٨ شخص من ضمنن ٩ عيل مغدوشيّة (إحّ): الحايك، الشباب، خليل، الناشف، الطيار، كنعان، إيليا، حداد، وفرحات.

في كتير شجر عيل عاملينا أهل مغدوشة ل عيلهن، كتير حلوين وقيمتها كبيرة. بس هالاشجار بتبلش من شرش وبتعد المتحدرين منه، يلي بيحملوا إسمه. بنفس الوقت أنا بهمني نوع تاني من الشجر هي اللي بتعد شخص مع كل أسلافه (جدود وستات). رح استغل الفرصة وإحكي شوي عن نوع هالشجرة، وبالأجمال عن الحافز الأساسي ل مشروع «مغدوشة - تراث وتاريخ».

متل ما حكيت من قبل بأحد المنشورات، كل شخص من مغدوشة عندُه أصول من كتير عيَل مختلفة، ولكن الأغلبيّة بيعرفوا بس كم عيلة لأن الإسم بينتقل من البيّ ل الولاد. بلّشت القصة معي حشريّة تأعرف اكتر عن أصول جدودي وستاتي، وصرت فكّر طيّب هالإمات والستات شاركوا جينئّا ٥٠٪ بتكوين ولادهن، وحتى لو ولادهن بالتبني، شاركوا بتربيتن ولبل يمكن اكتر من ٥٠٪. حملوا فيهن تسع شهور وسهروا علين وطعموهن من عرق جبينن وغسّلو تيابن على إديهن وحملوا جرات الميّ قبل طلوع الضو من بير الضيعة، وعاشوا حرب الجبل، والحرب العالميه الأولى، والمجاعة، والأوبئة، والحرب التانية، والحرب الأهلية... طيّب معقول ينّسى تاريخن، عالقليلة إسمن ينحفظ متل جد الجد.

من أنا وزغير بعرف إني روي إبن حنا إبن يعقوب إبن حنا إبن جريس،
بس أنا كمان روي إبن نجوى بنت فريدة، بنت مريم، بنت نايلة. وإنتو ولاد مين يا روحي؟

15/07/2023

فقرة

اليوم ما عندي حزورة، بس عندي سؤال إلكن.

حدا بيعرف شي عن تاريخ العنبرة والسروة؟
- أي سنة نزرعو؟
- مين زرعهن؟
- شو نوعهن بالضبط؟ (الإسم العلمي مثلاً.)
- أو أيّ خبرية أو نهفة عنهن.

اللي بيلاقيلنا الأجوبة إله هدية شجرة عيلة أجداده من صفحتنا!

Photo credit: Elie Yacoub, Google Maps

10/07/2023

الصورة نسوة وجرار لمجموعة من نساء بلدة زفتا ( جنوب لبنان ) ، إلتقط هذه الصورة مصور فرنسي سنة 1953 بينما كانت النساء عائدات إلى بيوتهن بعد ملء جرارهن من البئر البعيدة بين زفتا والمروانية .

07/07/2023

صباحو. هيدا «الياس حبيب الناشف» مواليد مغدوشة حوالي ال١٨٩٠، هاجر على أميركا سنة ال١٩١٢.
عندي خبرية كتير حلوة وموثرة عنّه، بس بعد ما عرفت بالضبط كيف بيقرب بيت الناشف بمغدوشة. بحسب معلوماتي في عالأقل ٢ حبيب الناشف بين الجدود:
- حبيب ابراهيم بطرس الناشف، عنده إبن اسمه الياس بس مواليد ال١٩١٠ تقريباً يعني مش نفس الشخص.
- حبيب جرجس أيوب الناشف، يعني بي جدّه لَ رفعت حبيب، بس مش على علمي عنده إبن إسمه الياس.

مين الحربوق/ـة يلّي رح يـ/تحلّ هاللغز؟
يلّا تأسولنا تنشوف.

05/07/2023

حزّورة اليوم:
مين شيخ الشباب أبو الشوارب؟

28/06/2023

المجدّرة المغدوشيّة:

١- ببرغل أو برز؟
٢- بصل محروق أو مش محروق؟
٣- مصفّاية أو مش مصفّاية؟
٤- باردة أو سخنة؟

27/06/2023

«مغارة سيّدة المنطرة كم لم ترونها من قبل»

بالمنشور من ٤ إيام خبرتكن عن تلات أشيا لفتت نظر المؤرخ Ernest Renan بالمنطرة، وحكيت عن أول اتنين: البرج القديم المهدم، والدرج المحفور بالصخر. التالت هو، طبعاً، مغارة السيدة. هيك رسم المغارة الكاتب Renan بعد زيارتُه للمغارة بال١٨٦١. كان بعد ما تعمّرت القناطر، وما نحفرو المداخل الوسط والشمال. المدخل اللي شايفينو هو المدخل اليمين يلي موجود قدّام المذبح، بيذكر الكاتب إنه كان قياسُه بس ١ متر × ١ متر!

بدل وصف الكاتب Renan، حابب اليوم شارك معكن وصف الكاتب Victor Guérin يلّي زار مغدوشة بال١٨٧٥ من بعد ما انزادو القناطر عالمغارة. وعلى فكرة الجدير بالذكر إنه مغدوشة بالتاريخ أنذكرت كجزة من جبل لبنان، وسوريا، بس بهالكتاب انضمت لبلاد الجليل بفلسطين!

رجعو معي ل٢٦ تشرين التاني ١٨٧٥، طلعوا من الغازية، مش من صوب حي المدارس، من صوب السيدة. نقو وسيلة التنقل اللي بتحبوها: إجريكن أو الجحش!

«[٢٦ تشرين التاني ١٨٧٥]

الساعة ١:٣٠، بنزل بحقول مزروعة، والساعة ١:٥٩، بطلع بطلعة ساعة قوية ساعة خفيفة، صوب الشمال الشرقي. بتوصلني على كنيسة صغيرة محفورة بالصخر، طولها تقريباً ٨ امتار وعرضها ٦، قبلها في قناطر معمّرة جديد. يبدو إنه بالزمانات هالمغارة كانت مخصصة للآلهة عشتاروت. اليوم هي مزار للعدرا وإسمها «سيدة المنطرة». ع جنبها في باب بيوصل بمغادرة تانية زغيرة.

على بعد كم ١٠٠ متر صوب الشرق، على هضبة أعلى، بوسط مزروعات حلوة من التين والزيتون، بتوقع بلدة مغدوشة. عدد سكانها، قدّرولي اياه ب٣٠٠ نسمة، كلّهن روم موحّدين (كاتوليك). كنيستها وبيوتها كلها معمّرة بحجار متناسقة وجالسة، جابوها من بقايا قلعة رح إحكيلكن عنها بعد شوي. [...]»

Victor Guérin
Description Géographique, Historique Et Archéologique de la Palestine, Vol. 2: Troisième Partie, Galilée.

26/06/2023

حزّورة اليوم:

قدّيش بتقديركن كان تقريباً عدد سكان مغدوشة سنة ال١٨٧٥؟

حطّو جوابكن بالتعليقات تنشوف مين رح يعطي أقرب رقم. بكرا رح أعطي الجواب الصحيح بحسب أحد المؤرخين الفرنسيين، ورح شارك post بعنوان:

«مغارة سيدة المنطرة كم لم ترونها من قبل!»

Maghdouche - History & Heritage

22/05/2025

21/07/2023

15/07/2023

10/07/2023

07/07/2023

05/07/2023

28/06/2023

27/06/2023

26/06/2023

Address

Website

Alerts

Shortcuts

Share

Category