08/06/2022
නහර ගැට ගැහෙන අය කියවන්න
ඕ වයසින් අවුරුදු 65 ක පමණ කාන්තාවක්. මා හමුවට ආවේ කකුලේ තිබුණ තුවාලයකට බෙහෙත් දා ගැනීමට...
ඉතින් මා ඇගෙන් විස්තර විමසනවා...
ඩොක්ටර් මගේ මේ තුවාලය දැන් අවුරුදු 7ක් විතර. කොච්චර බෙහෙත් දැම්මත් හොඳ වෙන්නෙ නෑනෙ... ඒ මදිවට කකුලෙ ඇස්වටේ කලුවෙලා කසනවත් එක්ක. දැන් නම් මට ඇති වෙලා තියන්නෙ.
වැඩි දුර පරීක්ෂා කිරීමේදී මා දකින්නේ ඇගේ කකුලේ නහර ගැට ගැසී ඇති බව.
මෙම තත්වය ඇතිවිට කකුලේ තුවාල ඇති වීම සාමාන්‍ය දෙයක්. ගැට ගැසුනු නහර ප්‍රකෘති තත්ත්වයට පත් කරන තුරු තුවාල සුව නොවන තරම්.
ඉතින් මා ඒ බව ඈ හට පැවසුවෙමි...
අම්මා ඔයාගේ කකුලේ ගැට ගැහිලා තියෙන නහර අයින් කරනකම් ඔය තුවාලෙ හොඳ වෙන්නෙ නෑ... කැමති නම් අපේ ඉස්පිරිතාලෙ ඔපරේෂන් සායනයට එන්න. අපි scan කරලා බලලා ඕකට බෙහෙත් කරමු.
වැඩක් නෑ මහත්තයෝ මෙයා ඉස්පිරිතාලෙ clinic එකට ගියා. නහර ගැට ගැහිච්ච එකේ දරුණුම තත්ත්වෙ තියන්නෙ කියල ඔපරේෂන් කරන්න දිනේකුත් දුන්නා. ඒත් මෙයා ඔපරේෂන් කරගන්න කැමති නෑනෙ...
පසෙක සිටි ඇගේ සැමියා මට එසේ කියනවා...
එහෙනම් ලබන සතියේ clinic එකට එන්න. අපි ඔපරේෂන් කරන්න දිනයක් දාගමු.
මා එසේ කීවත් ඈ කිසි දිනෙක අපේ සායනයට පැමිණියේ නැහැ.
නමුත් තුවාලයට බෙහෙත් දා ගැනීමට නම් ඈ පුද්ගලික වෛද්‍ය මධ්‍යස්ථානයට නිතරම පැමිණෙනවා.
ඒ එන හැම වරකම මා ඈ හට පවසා සිටින්නේ සායනයට පැමිණෙන ලෙස. නමුත් ඈ නොවේ කිසි දිනෙක සායනයට පැමිණෙන්නේ...
නමුත් පසුගිය දිනෙක අහම්බෙන් මෙන් ඈ හමුවන්නේ මා සේවය කරනා ශල්‍ය වාට්ටුවේදී...
ඔපරේෂන් එක කරගන්නද ආවෙ?
නෑ මහත්තයෝ... මං ටික දවසක් ගෙදර හිටියෙ නෑ. ඒ ටිකට තුවාලෙට පණුවො ගහල. තුවාලෙ ගැන හිතලම ද කොහෙද දැන් මෙයාගෙ සිහි කල්පනාවත් එච්චරම හොඳ නෑ වගේ...
ඉතින් අපි ඇගේ කතාව මදකට පසෙකින් තබමු...
ඉහළට ඉලිප්පී දඟර ගැසුණු රුධිර නාළ සහිත අය ඔබ බොහෝවිට දැක ඇති.
මෙසේ වන්නේ පාදයේ ඇති ශිරා රුධිර නාළ වල ඇතිවන දුර්වලතා හේතුවෙන්. එවිට එම නාළ වල ඇති රුධිරය ආපසු ගමන් කිරීම වළක්වන වෑල්ව හරි හැටි ක්‍රියා කරන්නේ නැති අතර රුධිර නාළ වල රුධිරය එකතුවීම සිදුවනවා. මෙම තත්ත්වය ක්‍රමයෙන් වර්ධනය වනවිටයි නහර ඉළිප්පී ගැට ගැසී ඇති ලෙස පිටතට පෙනෙන්නේ...
වයසට යාම
පවුලේ ආරයට
ගර්භනීවීම
නිතරම හිටගෙන සිටීම, මෙසේ නහර ගැට ගැසීම ඇති කිරීමට සුලභව හේතු වනවා.
මීට අමතරව
ගර්භාශයේ ෆයිබ්‍රොයිඩ් ගෙඩි
ඩිම්බකෝෂ වල ගැටිති/පිළිකා
මෞත්‍ර ලිංගික පද්ධතියේ ඇතිවන පිළිකා
පාදයේ ශිරා වල ඇතිවන ලේ කැටි සිරවීම්
වැනි විවිධ හේතුන් නිසා පාදයේ රුධිර ගමනාගමනය අවහිර වූ විට ද මෙසේ නහර ගැට ගැසීම ඇති වනවා...
මේ කුමන ආකාරයකින් හෝ නහර ගැට ගැසීම ඇතිවූ විට සහ ප්‍රතිකාර නොලදහොත් පාදයේ වළලුකර ආශ්‍රිතව කලු පැහැ වීම,
කකුල ඉදිමීම
නිතරම කසන සුළු වීම
හම ඝනකම් වීම
සුව නොවන තුවාල ඇතිවීම
සහ ගැට ගැසුණු දුර්වල රුධිර නාළ පිපිරී ලේ යාම
සිදුවනවා.
එසේ නොවීමට නම් නිසි කලට ප්‍රතිකාර ගැනීම වැදගත්.
ප්‍රතිකාර ගැනීමට පැමිණෙන රෝගීන්ගේ පාදයේ රුධිර නාළ ආශ්‍රිතව scan පරීක්ෂණයක් සිදුකර නහර ගැට ගැසීම කුමන අවධියේ තිබේ දැයි සොයා බැලෙනවා.
මුල් අවධියේ ඇති නහර ගැට ගැසීමක් නම්
පාදයේ නහර තදවන ලෙස මේස් දැමීම( compression stockings),
ඉළිප්පුණු නහර හැකිලවීමට ඒවාට ඖෂධ එන්නත් කිරීම,
ලේසර් කිරීම
වැනි ප්‍රතිකාර විධි සිදු කළ හැකියි.
නමුත් නහර ගැටගැසීම පසු අවධීන් වල තිබේනම් ගැට ගැසුණු නහර ඉවත්කිරීමට ශල්‍ය කර්මයක් සිදුකළයුතු වනවා. එය කොන්දට එන්නතක් විද ඉණෙන් පහළ හිරිවට්ටවා සිදුකරන්නක්.
ඉතින් ඔබත් දන්නා අයෙකුගේ පාදයේ නහර ගැටගැසී ඇත්නම්, සුව නොවන තුවාල ඇත්නම්, නිවැරදි වෛද්‍ය ප්‍රතිකාර සඳහා යොමු කිරීම වැදගත්.
එවන් අයගේ තුවාලයට සුව වීමට නම් බෙහෙත් දැමීම පමණක් ප්‍රමාණවත් නොවන බව තේරුම් කරවන්න.
ඒ වගේම ඔබටත් පාද වල නහර ගැට ගැසීම ඇත්නම් රෝගය උත්සන්න වනතුරු නොසිට ඉක්මන් ප්‍රතිකාර ලබාගැනීම වැදගත්.
මොකද ඔපරේෂන් එක සිදු කළත් පාදයේ ඇතිවූ වෙනස් කම් (හම ඝනකම් වීම, කළු වී යාම ආදිය ) 100%ක් ම යථා තත්ත්වයට පත්වෙන්නේ නැති තරම්...
අදට ඇති.
සුව නොවන තුවාල 2 ලිපියෙන් හමුවෙමු.
මම වෛද්‍ය නවෝද්. ( SHO Surgery - Base hospital Elpitiya )
පෝස්ට් එක වැදගත් නම් තව කෙනෙක්ට බලන්න share කරගෙන ම යන්න අමතක කරන්න එපා. හැබැයි පෝස්ට් එක copy paste කරලා ඔයාගේ වගේ දාන්න නම් එපා.
මේ වගේ පෝස්ට් තව කියවන්න like කරලා තියාගන්න මගේ facebook පිටුව, ඩොකාගේ ඩයරිය.
කලින් ලිපි පොතක් විදියට කියවන්න කැමති නම් ග්‍රන්ථ .lk එකෙන් ගෙදරටම ගෙන්නගන්න පුළුවන්. මෙන්න link එක. දැන් ආයෙත් stock තියෙනවා.
https://cutt.ly/oxXG78C
මගේ travel youtube channel එක පැත්තටත් එන්න.
https://youtu.be/hB4yqO1yDNA
