11/01/2026
Speech & Language Therapy වලදී අපි මූලිකවම කතා කරන වැදගත්ම මාතෘකා දෙකක් තමයි කතනය (Speech) සහ භාෂාව (Language) කියන්නේ. මෙහිදී භාෂාව ලෙස අදහස් කරන්නේ සිංහල, English හෝ தமிழ் යනාදී භාෂාවන් කතා කිරීමට දරුවාට ඇති හැකියාව නෙවෙයි.
සරලවම අපි මෙහිදි භාෂාව ලෙස හඳුන්වන්නේ ‘අවබෝධ කර ගැනීමේ (Comprehension) හා අදහස්/ සිතුවිලි ප්රකාශ කිරීමේ (Expression) ක්රියාවලියයි’. මෙය වාචිකව, ලිඛිතව මෙන් ම සංඥා භාවිතය මඟින් ද සිදු කරන්න පුලුවන්. ඒ නිසාම,
“භාෂාව අපිට අපේ අදහස්, සිතුවිලි හා හැඟීම් අන් අය සමඟ බෙදා හදා ගැනීමට ඉඩ සලස්වනවා”
දරුවා වයසින් වැඩෙත්ම ඔවුන්ගේ බුද්ධි වර්ධනය, සමාජ කුසලතා හා අන්තර්ක්රියා, කතන හැකියාවන් සහ ක්රියාකාරකම් යනාදියේ වර්ධනයන් සිදු වෙනවා වගේම ඔවුන්ගේ භාෂාමය සංවර්ධනය ද සිදු වෙනවා. දරුවා එක් එක් වයස්වල දී මුනින් අතට හැරීම, දන ගාගෙන යාම, සිට ගැනීමට උත්සහ දැරීම, වැටි වැටි ඇවිදීමේ සිට දුව පැන සෙල්ලම් කරන අවධීන් දක්වා වර්ධනය වෙනවා වගේම භාෂාවත් මේ අයුරින් වර්ධනය වෙනවා.
අලුත උපන් දරුවෙකුගේ ප්රධානතම භාෂා සන්නිවේදන මාද්යය ‘හැඬීම’ යි. ඉන්පසු බහ තේරීම, වචන කතා කිරීම, වචන එකතු කර වාක්ය ගොඩ නැගීමට පටන් ගන්නා දරුවා අවුරුදු 04, 05 පමණ වන විට පැහැදිලි කතනයක් දක්වා ඔවුන් භාෂාමය අතින් සංවර්ධනය වෙනවා. ඒ වගේ ම සරල විධාන අනුගමනයේ සිට සංකීර්ණ විධාන අනුගමනය දක්වා භාෂාව තේරුම් ගැනීමේ හැකියාවන් වැඩි වෙනවා.
දෙමාපියන් වන ඔබට ඔබේ දරුවා සම්බන්ධයෙන් පහත ආකාරයේ ගැටලු ඇති වෙන්න පුලුවන්
👣දරුවාගේ වයසේ අනිත් ළමයි එක්ක බලද්දි එයා කතා කරනවා මදි.
👣 දරුවට අපි කියන ඒවා තේරුම් ගන්න අමාරුයි.
👣 දරුවාට වචන ගළපලා කියන්න තේරෙන්නේ නෑ.
භාෂාව තේරුම් ගැනීමේ/අවබෝධ කර ගැනීමේ ගැටලු ඇති දරුවෙක් නම්,
❗️දරුවාට සරල හෝ සංකීර්ණ විධාන අනුගමනය කිරීමට නොහැකි වීම. ( උදා: බබාගේ කාමරයට ගිහින් ටී ෂර්ට් එක ගෙනල්ලා අම්මට දෙන්න)
❗️තවත් පුද්ගලයෙකු සමඟ කතා කරන විටදී හෝ පරිසරයේ වෙනත් ශබ්ධ තියෙන විට දරුවා අප කතා කරන දේට අවධානය නොදීම.
❗️විහිළු ආදිය අවබෝධ කර ගැනීමට නොහැකි වීම.
❗️ලැජ්ජා සහගත බව හෝ තනිව සිටීමට උත්සහ දැරීම
❗️සාමාන්ය සංවාදයක් තුළ කතබහ කරන දේවල් දරුවාට ග්රහණය කර ගැනීමට අපහසු වීම හා වැදගත් කරුණු අවබෝධ නොවීම.
ආදී ගැටලු තියෙන්න පුලුවන්.
ඒ වගේ ම,
❗️කතා කිරීමේ දී වයසට ගැළපෙන පරිදි වචන ප්රමාණයක් දරුවා තුළ නොමැති වීම හා අනෙකාට පැහැදිලි වන ලෙස කතා කිරීමට තරම් වචන ප්රමාණයක් දරුවා නොදැන සිටීම.
❗️දරුවාට පැහැදිලිව වාක්ය ගොඩ නැඟීමට අපහසු වීම.
❗️විස්තර කර දේවල් ප්රකාශ කිරීමට ඇති ගැටලු (උදා- දරුවා දැකපු දෙයක් හෝ පින්තූරයක් විස්තර කිරීමට අපහසු වීම, පෙර පාසලේ දී කළ දේවල් විස්තර කිරීමට අපහසු වීම)
❗️විවිධ වචන භාවිතා කළ ද තේරුමක් සහිත ( meaningful) වාක්යයක් ගොඩ නැගීමට අපහසු වීම.
❗️එකම වචන හෝ වාක්ය නැවත නැවත භාවිතා කර දරුවා කතා කිරීම.
❗️අනෙක් අය සමඟ එකතු වීමට උත්සාහ නොදැරීම.
යනාදි ලක්ෂණ කතා කිරීම ආශ්රිතව දරුවාට තියෙන්න පුලුවන්. (දරුවාගේ එක් එක් වයස්වල දී ඉහත කුසලතා වෙනස් වේ)
විශේෂයෙන් ම දරුවාට අවුරුදු 04,05 හා 06 යන වයස්වල දී ද ඉහත ලක්ෂණ තිබේ නම් ඔබ අනිවාර්යයෙන් ම මේ පිළිබඳව වැඩි වශයෙන් සැලකිලිමත් වීම ඉතාම වටිනවා. නැත්නම්,
✏️දරුවා කතා කරන දේවල් ඔවුන්ගේ ගුරුතුමියට හා අනෙක් යහළුවන් ට අපැහැදිලි වීම.
✏️දරුවා තුළ ඇති විශ්වාසනීයත්වය අඩු වීම.
✏️දරුවා සමාජය තුළ හුදකලා වීම.
✏️දරුවාට කීමට අවශ්ය දේ අවශ්ය ආකාරයෙන් කීමට අපහසු වීම
නිසා ඔහු/ ඇය ගැන ඇති ආත්ම විශ්වාසය අඩු වීම හා ආවේගශීලී හැසිරීම් වැඩි වීම. යනාදී දේවල් ඇති වීමට හැකි ඉඩකඩ වැඩියි.
නිවැරදි ප්රතිකාරවලට යොමු වීම තුළින්,
🍀දරුවාගේ වයසග ගැළපෙන පරිදි ඔවුන්ගේ කුසලතා සංවර්ධනය වී තිබෙනවාද යන්න දැන ගැනීමේ හැකියාව
🍀අවශ්ය ප්රතිකාරවලට ඉක්මනින් යොමු වීමේ හැකියාව
🍀 හඳුනාගත් ගැටලු සම්බන්ධයෙන් කටයුතු කිරීම. ( උදා : ඇහුම්කන් දීමේ කුසලතා උගන්වීම, උපදෙස් අවබෝධ කරගැනීම වැඩි දියුණු කිරීම, වාක්ය ගොඩ නැඟීම, සරල කතන්දරයක් පැවසීම යනාදී) සිදු වෙනවා.
ඔබේ දරුවාට ඉහත ලක්ෂණ තියෙනවානම්, වැඩි විස්තර දැන ගැනීමට අප හා සම්බන්ධ වෙන්න.
සටහන,
Miracle L Speech & Hearing
කථන හා භාෂා චිකිත්සක
තිසාරා මදුශානි
☎️ 0761 838484
Battaramulla | Ambalangoda | Gampaha | Kurunegala
