27/08/2023
ඔබට වයස 40 නම් මේ කරුණු 10 ගැන සැලකිලිමත් වන්න
වයස 40 සීමාවේ ඔබ ඔබේ වෛද්‍යවරයා කී පරිදි සීනි ,කොලෙස්ටරෝල් පරීක්ෂා කලා විය හැකියි, බර අඩු කරගැනීමට ව්‍යායාම ආරම්භ කලා විය හැකියි ඒත් මේ වයසේ දී බහුලව දකින්න ලැබෙන මේ දේවල් 10 ගැන සැලකිල්ලට ගන්න
1. මුත්‍රා පහවීම පාලනය අපහසුතා
මුත්‍රාශය ආශ්‍රිත ස්නායු වල වෙනස්කම් නිසා මෙය ඇති වන අතර නිශ්චිත වෛද්‍ය ප්‍රතිකාර ,මුත්‍රාශය ආශ්‍රිත මාංශ පේශී ව්‍යායාම වලින් මෙය වලක්වා ගත හැකිය.
2. ආර්තවහරණ ආසන්න (Perimenapausal) ලක්ෂණ
වයස 40 දී මාස් ශුද්ධිය නතර නොවූවත් ඒ ආශ්‍රිත කායික හා මානසික වෙනස්කම් මද වශයෙන් ආරම්භ විය හැකිය .මෙය රෝගයක් නොවන අතර හෝමෝන වෙනස්කම් නිසා සිදු වන්නකි .ඕසප් අක්‍රමිකතා ,අධික රුධිර වහනය ,ලිංගික කටයුතු සදහා උදාසීන බව මීට අයත්ය.හෝමෝන ප්‍රතිකාර මේ සදහා යොදා ගත හැකිය .
3. වකුගඩු ගල්
වයසත් සමග ශරීරයේ විජලනය වැඩිපුර සිදුවන නිසා වකුගඩු වල ගල් සෑදීමට වැඩි ප්‍රවනතාවක් ඇත.හොද ආහාර රටා මගින් ,ප්‍රමාණවත් ලෙස ජලය පානය (පිරිමි -ලීටර 3.7, ගැහැනු -ලීටර 2.7 පමණ ) මගින් මෙම තත්ත්වය වලක්වා ගත හැක.
4. මුත්‍රා ආසාදන
ස්ත්‍රී ,පුරුෂ දෙපිරිසටම 40 පසු මේ තත්ත්වය වැඩි විය හැක. මුත්‍රා පද්ධතියේ වෙනස්කම් ,මුත්‍රා pH අගයේ වෙනස්කම් මීට හේතු වේ.හොදින් ජලය පානය කිරීම මෙහිදී ද වැදගත් අතර ලිංගික කටයුතු වලට පෙර හා පසු මුත්‍රා කිරීමට ද අමතක නොකළ යුතුය.
තවද ව්‍යායාම මගින් ද ,පිරිමින් හට සතියකට වැඩි වාර ගනනක් ශුක්‍රානු මෝචන අවස්ථා ඇති කරගැනීම මගින් ද මෙම ආසාදන වලක්වා ගත හැකි බව සොයාගෙන ඇත.
5. ආහාර අසාත්මිකතා
40 න් පසු පෙර නොතිබුණු ආහාර අසාත්මිකතා ඇති විය හැක.සමහර බෙහෙත් වර්ග නිසා , සමහර කෘමි දශ්ඨන නිසා මෙසේ සිදු විය හැකි බවට මත ප්‍රකාශ වේ.මේවායින් වැලකීම අපහසු වූවද අසාත්මිකතාවයක් ඇති වූ විට කලින්ම එය හදුනා ගැනීමට දැන සිටීම වැදගත් වේ.
6.ඔස්ටියෝආතරයිටිස්
වයස 40 න් පසු ඇතිවීමේ හැකියාව වැඩි ය.සමබල ආහාර ,තමන්ට ගැලපෙන බර උසුලන ව්‍යායාම මගින් මේවායින් වැලකිය හැක.
7.අධික රුධිර පීඩනය
මේ ගැන හොදින් සැලකිලිමත් විය යුතුය ,නැත්නම් ආඝාත තත්ත්ව, හ්‍රර්ද්‍යාබාධ වලට මෙය හේතු වේ.
හොද ආහාර රටා ,ව්‍යායාම ,ලුණු භාවිතය අඩු කිරීම මගින් මෙය අඩු කරගත හැක.
8. ලිංගික අප්‍රාණිකත්වය
වයසත් සමග පුරුෂ ලිංගය ප්‍රාණවත් බාවය ආරම්භය හා පවත්වාගෙන යාම අපහසු විය හැක .ස්තූලතාවය,අධික රුධිර පීඩනය ,metabolic syndrome වැනි සමහර තත්ත්ව නිසා ලිංගේන්ද්‍රයට රුධිර සැපයුම අඩු වීම මීට හේතු විය හැක .මෙයට වෛද්‍ය ප්‍රතිකාර ඇති අතර තවද සහකරු ,සහකාරිය සමග විවිධත්වයක් ඇතිව ලිංගිකත්වය රස විදීමට ද පුරුදු විය යුතුය.
9. සමේ පිළිකා
වයසත් සමග මෙම ප්‍රවනතාවය වැඩි අතර අධිකව හිරු එළියට නිරාවරණය වීම ප්‍රධාන හේතුවකි.
සමේ ඇති කුඩා ලප,කැලැල් ගැන අවධානයෙන් සිටිය යුතු අතර ඒවා ප්‍රමාණයෙන් වැඩි වන්නේ නම් වෛද්‍ය උපදෙස් ලබා ගත යුතුය.අධික හිරු රශ්මියෙන් වැලකීමට සුදුසු ඇදුම් ,sun cream භාවිතා කල හැක.
10.විශාදිය හා anxiety තත්ත්ව
මෙම කාලයේදී ඇතිවන ආර්ථික ප්‍රශ්න ,දෙමාපියන් වයෝවෘධ වීම නිසා ඇති වන ගැටලු ,දරුවන් සිටීනම් ඔවුන්ගේ ප්‍රශ්න , වයස සමග කායික ස්වරූපයේ වෙනස්වීම මෙවන් මානසික ගැටලු වලට හේතු වේ.නිතර හොද මිතුරන් සමග දුක සැප බෙදාහදා ගැනීම අවශ්‍ය විට මනෝ චිකිත්සකවරයෙකුගේ සහය ලබා ගැනීම සිදු කල යුතුය.
