11/04/2025
සව් හාල්( Sago seed)
සව් යනු මූලික වශයෙන් Metroxylon sagu (sago palm plant) වැනි නිවර්තන කලාපයේ වගා කෙරෙන තාල වර්ගයේ ශාකවල කදන් වලින් ලබා ගන්නා පිෂ්ටමය ආහාරයකි.මෙය කැලරිවලින් බහුල ආහාරයක් වූවද එහි ප්‍රෝටීන්, මේදය, විටමින් සහ තන්තු අන්තර්ගතය සාපේක්ෂව අඩුය.
සව් ලබාගන්නා ශාක සාමාන්‍යයෙන් ඉන්දුනීසියාව, පැපුවා නිව්ගිනියාව, සහ පිලිපීනය වැනි රටවල බහුලව වගා කරනු ලබන අතර එම රටවල ඇතැම් ජන කොටස් සව් ප්‍රධාන ආහාරයක් ලෙස ද භාවිතා කරයි.
සව් , පෑන් කේක්,බිස්කට්, නූඩ්ල්ස්, පාන් සහ පුඩිං වැනි බොහෝ ආහාර වර්ග සඳහා යොදා ගැනේ.එසේම සව්, ජලය සමග මිශ්‍ර කර සාදා ගන්න තලප ප්‍රධාන ආහාරයක් ලෙස ද ඇතැම් රටවල භාවිතා කරයි.ලංකාවේ සව් කැඳ, සව් බොර, සව් අලුවා, සව් තලප, වැනි ආහාර සෑදීමට සව් භාවිතා වේ. සව් කැලරි බහුල ආහාරයක් වන බැවින් එය ශරීර ශක්තිය ඉහල නැංවීමට සමත් වේ.එමෙන්ම ආහාර දිරවීමේ ක්‍රියාවලිය පහසු කරවයි.ඊට අමතරව සව් වල අඩංගු කැල්සියම් සහ යකඩ, අස්ථි සෞඛ්‍ය නංවාලීමටත් රතු රුධිර සෛල ගණන වැඩි කිරීමටත් උපකාරී වේ.
