31/03/2023
දරුවන්ට දිය හැකි වටිනාම දේ මොකක්ද?
මෙම ප්‍රශ්නය මම ඔබෙන් ඇහුවොත්, ඔබ විසින් විවිධ උත්තර දෙනු ඇත. ඉහළ අධ්‍යාපනයක්, ආරක්ෂාව, ආදරය, රැකවරණය, හොඳ විනයක්,ආදි වශයෙන් නොයෙක් උත්තර ඔබ දෙනු ඇත.
ඇතැම් දෙමව්පියන් දරුවන්ට දිය හැකි වටිනාම දේ අධ්‍යාපනය යැයි සිතා ටියුෂන් පන්ති ගොඩකට දමා දරුවන්ට වද දෙමින් වෙහෙසෙති.එක්කෝ ටික කලකින් දරුවන්ට අධ්‍යාපනය එපා වෙති, නැත්නම් ආතතියෙන් අධ්‍යාපනය ලබති.
එසේම දරුවන්ට සැප දීමට සිතා බොහෝ මව්වරු දරුවන් කාට හෝ බාර දී විදෙස්ගත වේ.මෙම දරුවන් විවිධ අතවරයට , හිංසනයට හෝ පීඩාවට පත් වී ජීවිතය අතරමං වේ.
තව පිරිසක් දරුවන් ගේ ඉල්ලීමට ඔවුන්ට ජංගම දුරකථන අරං දෙයි.දරුවන් දුරකථනයෙන් විවිධ ගේම්,ටික්ටොක්,යු ටියුබ්,ආදරය සබදතා ආදි විවිධ ක්‍රියාකාරකම් වල නිරත වී දුරකථන ඇබ්බැහිවෙලා දරුවන් අතරමං වී ඇත.
දෙමාපියන් නොසැලකිල්ල හෝ දෙමාපියන් නොමැති කම නිසා විවිධ මිතුරන් ඇසුරු හා සතුට වෙනුවෙන් මත් ද්‍රව්‍ය, මත් කුඩු වලට ඇබ්බැහි වී දරුවන් අතරමං වී ඇත.
තවත් දෙමාපියන් දරුවන් මුදල් හෝ දේපල රැස් කර දරුවන් ගේ අනාගතය සතුටු කිරීමට මුදල් ගොඩ ගසති.මේ මොහොතේ දරුවන්ට දිය හැකි සතුට වෙනුවෙන් කිසිත් නොකරති.
අපි හැමෝම මේ මොහොතේ සතුටින් සිටීමට උත්සාහ කරයි.දරුවන්ද එසේය, දරුවන් ද සතුට සොයාති, සතුට දැනෙන තැන් සොයා යති.
එසේ නම් දරුවන්ට දිය හැකි වටිනාම දේ මොකක්ද?
ඔව්,දරුවන් දිය හැකි වටිනාම දේ සතුටු පවුල යි.මොකද්ද මේ සතුටු පවුල කියන්නේ.සතුටු පවුල කියන්නේ, පවුල තුළ දෙමාපිය දූදරු සබඳතා සතුටින් ගොඩනගා ගත් පවුලයි.බොහෝ දරුවන්ට පවුලක් ඇත.නමුත් පවුල තුළ සතුට නැත.
නිතරම දරුවන්ට බැන වදින දෙමාපියන්, සංසන්දනය කරමින් දරුවන්ට අභිමානය නොදෙන දෙමාපියන්, නිතරම අම්මා තාත්තා රංඩු කර ගන්න පවුල්, සැමියාගේ බිරිඳගේ අඩු පාඩූ විවේචනය කර දරුවන්ගේ ආදරය එක් පාර්ශවයකට නම්මා ගැනීමට වෙර දරන දෙමාපියන්, නැන්දම්මා ලේලි ගැටුම නිසා නිතර විසිර යන පවුල්, ආතතියෙන් මිරිකෙන අම්මාවරුන් සිටින පවුල්, රැකියාව පරම සතුට කර ගත් දෙමාපියන් සිටින පවුල් මෙකී නොකී විවිධ මානසික බිද වැටුණු පවුල් නිසා දරුවන්ට පවුල තුළ සතුට නොමැතිව අතරමං වී සිටිති.
ඩයනා බර්මුරන් කියන ඇමෙරිකානු ජාතික විශිෂ්ට මනෝවිද්‍යඤවරියක් ඇයගේ සමීක්ෂණ වලින් පෙන්වා දෙන ලද්දකි නම්, දෙමාපිය හැසිරීම් අනුව දරුවන්ගේ හැසිරීම් වෙනස් වන බවයි.එම නිසා දෙමාපිය හැසිරීම් ඉතා වටිනා දෙයකි.
සතුටු පවුලක් තුළ සාර්ථක දෙමාපිය
හැසිරීම් ඇත.න්‍යෂ්ටික පවුල වටා හොදින් ගනුදෙනු කරන විස්තෘත පවුලක් (අත්තම්මා,සීයා,නැන්දලා,මාමලා) ඇත.ඔවුන් දරුවන් ගේ හැගීම් හොදින් තේරුම් ගනී.මව පියා දෙදෙනාගෙම එකගතාවයෙන් ගොඩනගා ගත් විනය පද්ධතියක් තුළ දරුවන් පාලනය වේ.දරුවන් ඉල්ලන හැම දෙයක්ම ලබා දෙන්නේ නැත.බැහැ කියන දේවල් දරුවන්ට පැහැදිලි කර එය නොකරති.දරුවන් සමග දිනකට යම් කාලයක් ගත කරයි.දරුවන් හොදින් දෙමාපියන් හා මානසිකව බැදේ.එකිනෙකාට ගරු කරමින් සිටි .රංඩු සරුවල් නොමැත.ස්වාමියා බිරිඳ සතුටින් බැදිම් පවත්වාගෙන යයි.ගැටුම් සාකච්ඡා කර විසඳාගනී.ඔවුන් එකිනෙකාට ආදරය කරති.කුමන කාර්යයකට නිවසින් බැහැරව ගිය ද තම නිවස තරම් සතුටක් නොමැත.ඔවුන්ගේ සතුට පවුල සමග කාලය ගත කිරීම යි.
දැන් ඔබ කවුද කියලා ඔබෙන් අහන්න?
ඔබේ පවුල කුමන ආකාරයේ ද?
ස්වාමියා බිරිඳ , දරුවන් අතර ඇති සබදතාව පිළිබඳ ඔබ දෙවරක් සිතන්න.
ඔබේ දරුවන්ට දිය හැකි වටිනාම දේ,ඔබේ දරුවන්ට ලැබෙනවා ද?
එසේ නොමැති නම් ඔබ සබදතා ගැටුමකට පත්ව සිටි නම් මනෝවිද්‍යා උපදේශනයේ සහය ලබා ගන්න.පවුල් උපදේශන ක්‍රියාවලිය තුළින් සබදතා උපදේශනය(Relationship counseling), සාක්ෂි පදනම් ප්‍රතිකාර ක්‍රමය (evidence based treatment),ආවේග මුල් කරගත් යුගල ප්‍රතිකාර ( emotional focused couple therapy) වැනි න්‍යායාත්මක පදනමකින් යුක්තව පවුල් උපදේශනය සිදු කරනු ලබයි.
නිලූකා දිසානායක,
ජ්‍යෙෂ්ඨ මනෝවිද්‍යා උපදේශිකා
