Hela osu

28/09/2025

ඔබ කවදා හෝ ඔබේ මුත්‍රා වල වර්ණය දෙස බලා එයින් කියවෙන්නේ කුමක්දැයි සිතා තිබේද? ඇත්ත වශයෙන්ම, මුත්‍රා වල වර්ණයෙන් ඔබේ ශරීරය තුළ සිදුවන බොහෝ දේ ගැන පැවසිය හැකියි.

💛 ⚪️ පැහැදිලි හෝ ලා කහ පැහැය
බොහෝ විට ඔබ දැකිය යුත්තේ මෙම වර්ණයයි. මෙයින් අදහස් වන්නේ ඔබ හොඳින් ජලය පානය කර ඇති බවත්, ඔබේ වකුගඩු නිසි ලෙස ක්‍රියා කරන බවත්ය. ප්‍රමාණවත් තරම් ජලය පානය කිරීමෙන් ඔබේ ශරීරයේ ඇති විෂ ද්‍රව්‍ය ඉවත් කිරීමට උපකාරී වන අතර, ලා කහ පැහැය සාමාන්‍යයෙන් ඔබ හොඳ සෞඛ්‍ය තත්ත්වයකින් සිටින බවට ලකුණකි.

💛 තද කහ පැහැය
තද කහ පැහැයෙන් අදහස් විය හැක්කේ ඔබ තරමක් විජලනයට පත්ව ඇති බවයි. ඔබ ප්‍රමාණවත් තරම් ජලය පානය නොකරන විට, ඔබේ ශරීරය වැඩිපුර ජලය රඳවා ගැනීමට උත්සාහ කරයි. එමඟින් ඔබේ මුත්‍රා වඩාත් සාන්ද්‍රණය වී තද පැහැයක් ගනී. මෙවැනි අවස්ථාවකදී කළ යුත්තේ වතුර වීදුරුවක් පානය කිරීමයි 👍🏼

💙💚 නිල් හෝ කොළ පැහැය
ටිකක් අමුතුයි නේද?
නිල් හෝ කොළ පැහැති මුත්‍රා දුර්ලභ නමුත්, එය සිදුවිය හැකිය! සමහර විට, ආහාර වර්ණක (මෙතිලීන් බ්ලූ - methylene blue) හෝ ඇතැම් ඖෂධ (ඇමිට්‍රිප්ටිලයින් - amitriptyline) මෙයට හේතු විය හැක. එය සාමාන්‍යයෙන් ගැටලුවක් නොවන නමුත්, මෙම තත්ත්වය දිගටම පැවතුණහොත් වෛද්‍යවරයෙකු සමඟ කතා කරන්න.

💚 කොළ පැහැති මුත්‍රා
මෙය, විශේෂිත බැක්ටීරියා වර්ගයක් (Pseudomonas aeruginosa සහ E. Coli හි ඇතැම් ප්‍රභේද) මගින් ඇතිවන මුත්‍රා ආසාදනයක (UTI) ලක්ෂණයක් විය හැකිය.
මෙය සුලබ තත්ත්වයක් නොවුණත්, ඔබට කොළ පැහැති මුත්‍රා සමග යම් අපහසුතාවයක් දැනේ නම් වෛද්‍යවරයෙකු හමුවන්න.

❤️ මුත්‍රාවල ලේ (hematuria)
මුත්‍රාවල ලේ තිබීම සාමාන්‍ය තත්ත්වයක් නොවන අතර එය මුත්‍රා ආසාදනයක් (UTI), වකුගඩු ගල් හෝ වෙනත් වකුගඩු ආශ්‍රිත ගැටලුවක ලකුණක් විය හැකිය. මෙවැනි තත්ත්වයක් ඇති වුවහොත්, විශේෂයෙන්ම එය වේදනාකාරී නම් හෝ කිහිප වරක් සිදුවේ නම් වෛද්‍යවරයෙකු හමුවීම ඉතා වැදගත් වේ.

💜 දම් පැහැති මුත්‍රා
මෙය අතිශයින්ම දුර්ලභ තත්ත්වයක් වන නමුත්, "දම් පැහැති මුත්‍රා මල්ලේ සින්ඩ්‍රෝමය" (purple urine bag syndrome) ලෙස හැඳින්වෙන තත්ත්වය හේතුවෙන් කැතීටර (catheters) භාවිතා කරන පුද්ගලයින් තුළ එය සිදුවිය හැකිය. එය සුලබ නොවන අතර සාමාන්‍යයෙන් සිදුවන්නේ මුත්‍රා කැතීටරයක් භාවිතා කරන සහ ඇතැම් බැක්ටීරියා ආසාදන ඇති අය තුළ පමණි. මෙය වෛද්‍යවරයෙකු හමුවීමට සංඥාවකි.

🤎 දුඹුරු හෝ කෝලා පැහැති මුත්‍රා
දුඹුරු පැහැති මුත්‍රා විජලනය නිසා ඇතිවිය හැකි නමුත්, එය අක්මාවේ හෝ වකුගඩු වල ගැටලු වැනි වඩාත් බරපතල තත්ත්වයන්ගේ ලකුණක් ද විය හැකිය. මෙයින් මුත්‍රාවල පැරණි රුධිරය ඇති බව ද අදහස් විය හැකි අතර, එය සෞඛ්‍ය මධ්‍යස්ථානයකදී පරීක්ෂා කර ගත යුතුය.

🖤 කළු හෝ තද දුඹුරු පැහැය
ඉතා තද පැහැති මුත්‍රා, ඇල්කැප්ටොනුරියා (alkaptonuria) නම් දුර්ලභ ජානමය රෝගයක් වැනි බරපතල තත්ත්වයන් පෙන්නුම් කළ හැකිය. දැඩි මාංශ පේශි වලට සිදුවූ හානියකදී ද එය සිදුවිය හැක. තද පැහැති මුත්‍රා දුටුවහොත් සෑම විටම සෞඛ්‍ය මධ්‍යස්ථානයකට යොමු විය යුතුය.

⚪️ කැලඹුණු හෝ කිරි පැහැති මුත්‍රා
මෙය මුත්‍රා ආසාදනයක් (UTI) හෝ වෙනත් වකුගඩු ආශ්‍රිත ගැටලුවක ලකුණක් විය හැකිය. එමෙන්ම මුත්‍රාවල ප්‍රෝටීන් අධිකව තිබීම ද මෙයින් අදහස් විය හැකි අතර, එය වකුගඩු ආශ්‍රිත ගැටලු පිළිබඳව සංඥා කළ හැකිය. මෙම තත්ත්වය නොනැවතුණහොත්, එය පරීක්ෂා කර ගැනීම වඩාත් සුදුසුය.

ඇත්ත වශයෙන්ම, කිරි, චීස් වැනි පොස්පරස් බහුල ආහාර අධිකව පරිභෝජනය කිරීමෙන් පසුවද මුත්‍රා කැලඹුණු ස්වභාවයක් ගත හැකිය.

එය විශාල ගැටලුවක් නොවිය හැකි නමුත්, දැවිල්ල හෝ අපහසුතාව වැනි වෙනත් රෝග ලක්ෂණ සමඟ එය ඇතිවේ නම්, ඔබ අනිවාර්යයෙන්ම වෛද්‍යවරයෙකු සමඟ කතා කළ යුතුය.

මෙම වෙනස්කම් පිළිබඳව අවධානය යොමු කිරීම සහ ඒවා දිගටම පැවතුණහොත් වෘත්තීය උපදෙස් ලබා ගැනීම වටී.
බොහෝ වෙනස්කම් හානිකර නොවන සහ තාවකාලික වන අතර, සමහරක් වෛද්‍ය ප්‍රතිකාර අවශ්‍ය බවට සංඥා කළ හැකිය.

උපුටා ගැනීමකි..

15/09/2025

ශරීරයේ උෂ්ණාධික බව පාලනය කරගමු: ඔබ දැනගත යුතුම කරුණු

ශරීරයේ උෂ්ණාධික බව යනු බොහෝ දෙනෙක් පීඩා විඳින පොදු සෞඛ්‍ය ගැටලුවකි. මෙය රෝගී තත්ත්වයක් නොවුනත්, නොසලකා හැරියහොත් විවිධ රෝගාබාධ රැසකට මඟ පෑදිය හැකිය. අපගේ ආහාර රටාව සහ ජීවන පුරුදු මෙයට සෘජුවම බලපායි. මෙම ලිපියෙන්, ශරීරයේ උෂ්ණාධික බව හඳුනාගැනීමට උපකාරී වන ලක්ෂණ, එයට හේතු වන ආහාර සහ එය පාලනය කිරීමට ගත හැකි ස්වභාවික පිළියම් පිළිබඳව විස්තරාත්මකව සාකච්ඡා කෙරේ.

ශරීරය උෂ්ණාධික බව පෙන්වන පොදු ලක්ෂණ

ඔබගේ ශරීරයද උෂ්ණාධිකදැයි හඳුනාගැනීමට උපකාරී වන පොදු ලක්ෂණ කිහිපයක් පහත දැක්වේ.

සම ආශ්‍රිත ගැටලු: සිරුරේ සහ ඇස්වල දැවිල්ල, සම පුරා බිබිලි හෝ කුෂ්ඨ ඇතිවීම, සම වියළීම, මුහුණේ කුරුලෑ, තොල් සහ යටිපතුල් පැලීම.

හිසකෙස් ආශ්‍රිත ගැටලු: හිසකෙස් අකලට සුදු වීම, අධික ලෙස හිසකෙස් ගැලවී යාම, හිස් හොරි සහ හිස් කබලේ කුඩා බිබිලි ඇතිවීම.

ශරීරයේ ක්‍රියාකාරීත්වය: නිතර අධික ලෙස දහඩිය දැමීම (විශේෂයෙන් අත්ලට සහ පතුල්වලට), දහඩිය දුගඳ වීම, ශරීරය අවපැහැ ගැන්වීම.

ජීරණ පද්ධතියේ ගැටලු: ගැස්ට්‍රයිටිස්, මලබද්ධය සහ අර්ශස් වැනි තත්ත්ව.

වෙනත් ලක්ෂණ: දරුවන් පිළිසිඳ ගැනීමට ප්‍රමාද වීම, ගර්භාෂගත රෝග, ඇතැම් ආහාර සඳහා ආසාත්මිකතා ඇතිවීම.

ශරීරයේ උෂ්ණය ඉහළ නංවන ආහාරපාන
අප දිනපතා ගන්නා සමහර ආහාර ශරීරයේ උෂ්ණත්වය ඉහළ නැංවීමට සෘජුවම බලපායි. උෂ්ණාධික සිරුරක් ඇත්නම්, මෙම ආහාර හැකිතාක් පාලනය කිරීම වැදගත් වේ.

අධික සැර සහ ආම්ලික දේ: මිරිස්, අබ, විනාකිරි, ගොරකා, බිලිං.

සකස්කළ සහ තෙල් සහිත ආහාර: තෙල් අධික බැදුම් වර්ග, අච්චාරු, චට්නි, මෝජු, ලුණු දෙහි, සෝස් වර්ග, ටින් මාළු, ජාඩි, කරවල.

මාංශ සහ මුහුදු ආහාර: බල මාළු, ඉස්සන්, දැල්ලන්, කකුළුවන්, හරක් මස්.

එළවළු සහ පලතුරු: අන්නාසි, රට දෙල්, රාබු, තක්කාලි, සුදුළූණු.

වෙනත්: කොල්ලු, මධ්‍යසාර.

ශරීරය සිසිල් කරන ස්වභාවික ආහාර සහ පිළියම්
ශරීරයේ උෂ්ණාධික බව පාලනය කිරීමට නම්, ඉහත ආහාර සීමා කරන අතරතුර, ශරීරය සිසිල් කරන ගුණදායක ආහාරපාන දෛනිකව එකතු කර ගැනීම අනිවාර්ය වේ.

ඖෂධීය පාන වර්ග:

තැඹිලි / පොල් වතුර: විජලනය වළක්වා ශරීරය ක්ෂණිකව සිසිල් කරයි.

නෙල්ලි: පානයක් ලෙස හෝ නැවුම් ගෙඩි ලෙස ආහාරයට ගත හැක.

බෙලි: නැවුම් පළතුරක් ලෙස මෙන්ම, බෙලිමල් හෝ බෙලි කටු තම්බා බීමෙන්ද ඇඟ සිසිල් වේ.

රණවරා: රණවරා මල් හෝ කොළ තම්බා තේ වෙනුවට පානය කළ හැක. රණවරා දළු මැල්ලුමක් ලෙසද ගුණදායකයි.

පොල්පලා, රසකිඳ, ඉරමුසු: මේවා තම්බා පානය කිරීමෙන් මුත්‍රා ආසාදන වළක්වා ශරීරයේ දැවිල්ල අඩු කරයි.

බාර්ලි සහ සව්: තම්බා එම වතුර පානය කිරීමෙන් සිරුරට සිසිලසක් ලැබේ.

කොළ කැඳ: දිනපතා උදෑසන හිස්බඩ හාතාවාරිය, පොල්පලා වැනි කොළ වර්ගයකින් සාදන ලද කැඳ වීදුරුවක් පානය කිරීම ඉතාම ගුණදායකය.

එළවළු සහ පලතුරු:

පිපිඤ්ඤා, කොමඩු, කැකිරි: ජල ප්‍රතිශතය අධික නිසා සිරුර සිසිල් කර විජලනය වළක්වයි.

අළු පුහුල්: වෑංජනයක් ලෙස හෝ යුෂ ලෙසද ඉතා ගුණදායකයි.

මෑ, වම්බොටු, කොහිල: ශීත ගුණයෙන් යුතු එළවළු වර්ග වේ.

වෙනත් ගුණදායක ආහාර:

දිය බත්: අපේ පැරැන්නන්ගේ ප්‍රධාන ආහාරයකි. ගැස්ට්‍රයිටිස් වැනි රෝගවලට සහනය ගෙන දෙන අතර සිරුර සිසිල් කරයි.

මුං ඇට: තම්බා ආහාරයට ගැනීම හෝ කැඳ ලෙස සකසා ගැනීම ගුණදායකයි.

කිරි වර්ග: එළකිරි, එළුකිරි සහ විශේෂයෙන් මීකිරි ශරීරයට සිසිලසක් ගෙන දෙයි.

කස කසා ඇට: බීම වර්ගවලට එකතු කර පානය කිරීමෙන් සිසිලසක් ලැබේ.

අනුගමනය කළ යුතු අනෙකුත් වැදගත් පුරුදු
හොඳින් ජලය පානය කරන්න: දිනකට අවම වශයෙන් වතුර ලීටර් 2-3ක් වත් පානය කරන්න.

ක්ෂණික ආහාරවලින් වළකින්න: විවිධ රසායනික යෙදූ පැණි බීම, සෝඩා සහ ශීත කළ සකස් කළ ආහාර ගැනීමෙන් වළකින්න.

ප්‍රමාණවත් නින්දක් ලබන්න: රාත්‍රියට හොඳින් නිදාගන්න. දහවල් කාලයේ නිදාගැනීම අවම කරන්න.

මානසික ආතතිය පාලනය කරන්න: මානසික පීඩනය ශරීරයේ උෂ්ණත්වය ඉහළ යාමට හේතුවකි.

වෛද්‍ය උපදෙස් ලබාගන්න: ඉහත ලක්ෂණ දිගටම පවතී නම්, සුදුසුකම් ලත් වෛද්‍යවරයෙකුගේ උපදෙස් ලබාගැනීම වැදගත් වේ.

ස්තූතිය: මෙම ලිපියේ මුල් අදහස් හිමිකරුට.

15/09/2025

දිවුල් වල සැඟවුණු ගුණ - සරලව දැනගනිමු
දිවුල් කියන්නේ අතිශයින්ම පෝෂණීය මෙන්ම ඖෂධීය ගුණයෙන් ඉහළ, සුපිරි පළතුරක්. එහි ඇති වටිනාකම ගැන කෙටියෙන් මෙසේ දැනුවත් වෙමු.

ප්‍රෝටීන් බහුල අපේ දිවුල්
සාමාන්‍යයෙන් පළතුරු වල ප්‍රෝටීන් ඇත්තේම නැති තරම්. සමහර පළතුරුවල ප්‍රෝටීන් ස්වල්පයක් තිබුණත්, දිවුල් ඒ අතරින් විශේෂයි. උදාහරණයක් ලෙස, ප්‍රෝටීන් වැඩි පළතුරක් ලෙස සැලකෙන පේර ග්‍රෑම් 100ක ඇත්තේ ප්‍රෝටීන් ග්‍රෑම් 2.6ක් පමණි.

නමුත්, නවීන පර්යේෂණ අනුව දිවුල් ග්‍රෑම් 100ක, ප්‍රෝටීන් ග්‍රෑම් 3.6 සිට 8.5 දක්වා ඉහළ ප්‍රමාණයක් අඩංගු බව සොයාගෙන තිබෙනවා.

ඔබ දිවුල් මද ග්‍රෑම් 100කට පොල් කිරි මිලි ලීටර් 100ක් එකතු කළොත්, එයට තවත් ප්‍රෝටීන් ග්‍රෑම් 2.3ක් සහ සිරුරට හිතකර මේදය ග්‍රෑම් 5-7ක් පමණ එකතු වෙනවා.

වර්ධනය වන දරුවන්ට කදිම ආහාරයක්
වර්ධනය වන දරුවන්ට ශරීර වර්ධනය සඳහා ප්‍රෝටීන් සහ මොළයේ වර්ධනය සඳහා හිතකර මේදය අත්‍යවශ්‍යයි. වර්තමානයේ බොහෝ දරුවන් පිටි, සීනි, ලුණු, සහ කෘත්‍රිම රසකාරක අධික, පෝෂණ ගුණය අඩු ආහාර වලට පුරුදු වී සිටිනවා.

මේ වගේ දරුවන්ට පොල් කිරි සමඟ මිශ්‍ර කළ දිවුල් ලබා දීම ඉතා හොඳ විකල්පයක්. එය ඔවුන්ගේ වර්ධනයට අවශ්‍ය පෝෂණය ලබා දෙන සුපිරි ආහාරයකි.

වකුගඩු වලට දෙන ආරක්ෂාව
විද්‍යාත්මකව Limonia acidissima ලෙස හඳුන්වන දිවුල්, වකුගඩු වල ගල් ඇතිවීම වැළැක්වීමට සහ වකුගඩු වල ඇති විෂ ද්‍රව්‍ය ඉවත් කිරීමට උපකාරී වන බව සොයාගෙන තිබෙනවා. වකුගඩු ආරක්ෂා කිරීමේ මෙම හැකියාව "Nephroprotective" ගුණය ලෙස හැඳින්වේ.

ශරීරයේ විෂ නසන ගුණය (Detoxification)
දිවුල් වල අඩංගු ප්‍රබල ප්‍රතිඔක්සිකාරක (antioxidants) සහ ශාක රසායනික ද්‍රව්‍ය, අපගේ අක්මාවේ සහ ආහාර මාර්ග පද්ධතියේ ඇති විෂ ද්‍රව්‍ය ඉවත් කිරීමට විශාල දායකත්වයක් සපයනවා.

බෝ නොවන රෝග වලින් ආරක්ෂාවක්
දියවැඩියාව, හෘද රෝග වැනි බෝ නොවන රෝග රැසකින් අපව ආරක්ෂා කළ හැකි ශාක රසායනික ද්‍රව්‍ය විශාල ප්‍රමාණයක් දිවුල් වල අඩංගුයි. මේ නිසා විද්‍යාඥයන් දිවුල්, "බහුවිධ ක්‍රියාකාරීත්වයකින් යුතු සුපිරි ආහාරයක්" (multi-functional food) ලෙස සලකනවා.

දිවුල් සහ මීකිරි - සුපිරි සංයෝගය
දකුණු පළාතේ බොහෝ දෙනෙක් දිවුල් වලට මීකිරි දමා ආහාරයට ගන්නවා. මීකිරි ග්‍රෑම් 100ක, ශාක ප්‍රෝටීන වලට වඩා වටිනා සත්ව ප්‍රෝටීන් ග්‍රෑම් 11ක් පමණ තිබෙනවා. එමෙන්ම එයට හිතකර මේදය ග්‍රෑම් 6-7ක් ද එකතු වෙනවා.

මීටත් වඩා වැදගත් වන්නේ, මීකිරි වල සිරුරට හිතකර බැක්ටීරියා වර්ග (Probiotics) අඩංගු වීමයි. දිවුල් වල ඇති තන්තු (Prebiotics), එම හිතකර බැක්ටීරියාවන්ට වර්ධනය වීමට අවශ්‍ය හොඳම ආහාරය සපයනවා.

මේ අනුව, දිවුල් සහ මීකිරි සංයෝගය කියන්නේ පෝෂණීය ගුණයෙන් ඉහළ, අති විශිෂ්ට ආහාරයකි.

උපුටා ගැනීම: ගැමුණු සාලිය පෙරේරා (මහජන සෞඛ්‍ය පරීක්ෂක)

18/08/2025

උදේ 5 ට නැගිටින්න. 🌞

බොහෝ කාර්ය බහුල මිනිසුන්ට තියෙන ගැටලුවක් තමා දවසේ පැය 24 තමුන්ගෙ කටයුතු ටික කරගන්න මදිවීම. ඒකට හොඳ සූත්‍රයයක් රොබින් ශර්මා 5 AM Club පොතේ ලියල තියෙනවා. (පුළුවන් නං පොත හොයාගෙන කියවන්න.) ඔබට දවස දිගු වෙලා දැනේවි. ඒ වගේම ඉර පායන්න ඉස්සල්ලා නැගිට්ටම හම්බවෙන සෞඛ්‍ය ප්‍රතිලාභයයි, උද්‍යෝගීමත්භාවයත් ලැබේවි.

#පිටු 50 ක් කියවන්න 📚

සාමාන්‍යයෙන් රාත්‍රි ආහාරයෙන් පසු අඩු තරමින් පැය දෙකක් යනකං වත් නින්දට යන්න එපා කියන සෞඛ්‍ය විශේඥයන්ගෙ මතයට ගරු කරන්න. රාත්‍රි නින්දට පැයකට කලින් රූපවාහිනී තිර, පරිඝණක තිර, ස්මාට් ෆෝන් තිර වලින් ඈත්වීම බාධා නැති නින්දකට මඟ පාදනවා. ඒ වෙලාව කියවන්න පාවිච්චි කරන්න. ඔබ ඉන්න ප්‍රදේශයක පුස්තකාලයක සාමාජිකත්වය ගන්න. එහෙම නැත්තං වැටුප් ලබන අයෙක් නම් මාසෙකට පොතකට, දෙකකට මුදලක් වෙන් කරන්න. (ඔබ දවසකට පිටු 50 ගානෙ දවස් 300 ක් කියෙව්වොත් පිටු 15,000 ක් කියවලා වසර අවසානයේ) ඒක සාමාන්‍යයෙන් පොත් 50 ක් විතර. ඒ පුරුද්ද ඔබව මානසිකව ස්ථාවර කරනවා වගේම දැණුමෙන් පොහොසත් කරනවා )

#දවසකට Green Tea තුන හතරක් බොන්න. ☕

අපි ගන්න ආහාර වල ඇති විෂ ඉවත් කරන්න හොඳම ප්‍රති ඔක්සිකාරකයක් ග්‍රීන් ටී. ඒ වගේම ඒකෙන් සීනි ඇඟට එන්නෙත් නෑ. ( දිගුකල් ජීවත් වන ජපානයේ ඔකිනාවා වැසියන් දවසකට ග්‍රීන් ටී පහක් වත් බොනවා )

#අවුරුද්දකට චිත්‍රපටි තුන හතරක් වත් බලන්න. 🎥 🎥

පුළුවන් හැම වෙලාවකම සිනමා ශාලාවකට ගිහිංම චිත්‍රපට බලන්න. ගෙදර tv එකේ වගෙ advertisement නැතුව, බාධක නැතුව චිත්‍රපටය රස විඳින්න. අපේ සිනමා ශාලාවල බලන්න බැරි ලෝකෙ උසස් චිත්‍රපට අන්තරජාලයෙන් බාගත කරගෙන නරඹන්න. ( දරුවන්ව චිත්‍රපට බලන්න හුරු කරවන්න )

#සංගීතයට සවන් දෙන්න. 🎶 🎶

සිත නිවන සංගීතයට සවන් දෙන්න. යුරෝපීයන් සිංදු අහනව වෙනුවට බීතෝවන්, මොසාට්, බාක් වගේ සංගීතඥයන්ගේ සංගීත කණ්ඩ වලට නිරන්තරව සවන් දෙනවා. ( අපි බිව්වම හයියෙන් සිංදු කිව්වට එයාලා වයින් වීදුරුවක්, මධු විතක් තොලගාන්නෙ ඒ වගෙ සංගීතයකට සම වැදෙමින් ) අමරදේව, විකටර්, නන්දා වගෙ මධුර හඬවල් වලට සවන් දෙන්න. ඔබට මානසික ආතතියෙන් මිදෙන්න වෛද්‍යවරුන් සොයා යන්න ඕන වෙන එකක් නෑ.

#ස්වභාවික ආහාර වලට යොමු වෙන්න. 🌳

කෑම පිඟාන වර්ණවත් කරගන්න. ඒකෙ කොළ, දුඹුරු, කහ, රතු වගෙ පාට තියෙනවනං හොඳ ආහාර වේලක්. එළවළු පුළුවන් තරං තම්බලා ආහාරයට ගැනීම නවත්තන්න. කුළුබඩු වලින් ආහාරය රසවත් කරගන්න. ( කිසිම විටක ආහාර රසවත් කරන කෘතිම කැට පාවිච්චි කරන්න එපා) මේ ලෝකෙ තියෙන හොඳම කුළුබඩු තියෙන්නෙ අපිට. ඒවම පාවිච්චි කරන්න. ( බොහෝ කුළුබඩු පිළිකා ඇතිවීම වලක්වනවා) ආහාර වලට වැඩිපුර මාළු එකතුකර ගන්න. ( ලොව වැඩිම කාලයක් ජීවත්වන ජපානයේ ඔකිනාවා වැසියන්ගෙ ප්‍රධාන ආහාරයක් තමා බලයා, කෙලවල්ලා කියන්නෙ) අපි ඉතිං එක දවසක් කෑවොත් ඌෂ්ණයි කියලා අනිත් දවසෙ කන්නෙ නෑ. අලුත් අවුරුද්දෙදි කෑමෙදි සුදු බත් වෙනුවට රතු බතුත්, වැඩියෙන් එළවළු, අල වර්ග, ඇට වර්ග වලට තැනක් දෙන්න. පුළුවන් නං සතියට දවසක් එළවළු විතරක් ආහාරයට ගන්න. එක දවසකට Vegetarian වෙන්න. ( එදාට සෝයාමීට් කන්න එපා.ඒක හොඳ ආහාරයක් නෙමෙයි )උත්සහ කරන්න මාස දෙක තුනකට වතාවක් එක දවසක් සම්පූර්ණයෙන්ම පළතුරු වලින් ජීවත්වෙන්න.

#ව්යායාම කරන්න 🏃 🧘🏃🚶

දවසකට ඔබට, මට මෙන්ම බිල් ගේට්ස් ටත් පැය 24 යි තියෙන්නෙ. ගේට්ස් අපට වඩා අතිශයින් කාර්ය බහුල උනත් ඔහු දවසකට පැයක් exercise කරනවා. ඔබට gym එකකට යන්න පුළුවන් නං යන්න දෙපාරක් හිතන්නෙ නැතිව. බැරිනං යෝග පංතියකට ගිහිං මාස පහ හයක් ඒකෙ මූලික තාක්ෂණික කරුණු ඉගෙන ගන්න. ඊට පස්සෙ ගෙදර ඉඳං කරන්න. කුඩා ඉඩක් හොඳටම ඇති. උපකරණයකට කියලා අවශ්‍ය වෙන්නෙ මැට් එකක් විතරයි බිමට එලා ගන්න. යෝග කියන්නෙ ලොව හොඳම ව්‍යායාම වලින් එකක්. ඇවිදින්න, දුවන්න පහසුකම් තියෙනවනං ඒකත් හොඳටම හොඳයි.

මම ඉන්දියාවෙදි දැක තියෙනවා සාරිය ඇඳලා, නයිකි සපත්තු දාලා ඇවිදින කාන්තාවන්. හොඳින් හිතන්න. ඔබ දත් මදින්න දවසකට අනිවාර්යයෙන් ම වෙලාවක් වෙන් කරනවා. නමුත් දතක් දෙකක් නෙමේ, දත් සියල්ල නැතිවත් අපට ජීවත් වෙන්න පුළුවන්. ඒත් ඔබට හෘදය වස්තුව නැතුව ජීවත් වෙන්න බෑ. නමුත් අපි දවසකට දත්වලට දෙන වෙලාව හෘදයට දෙනවද ? අන්තර්ජාලයට ගිහිං ව්‍යායාම පාඩම් ඉගෙන ගන්නත් පුළුවන්.

උදාහරණයක් විදියට Shiatsu, Qigong, Tai chi, Radio taiso වගේ පෙරදිග සරල ව්‍යායාම ඔබට පහසුවෙන් ඉගෙන ගෙන පහසුවෙන් කරන්න පුළුවන්.

#පළතුරු ආහාරයට ගන්න 🍇🍐🍉🍓🍌🍋🍍🍎🍏🥑🥑🥑🥑

අපි නිවර්තන කලාපීය රටක් විදියට පළතුරු වලින් පොහොසත් රටක්. කාලෙන් කාලෙට ඉතා හොඳ පළතුරු අපේ රට අපට දුන්නත් අපි ඒකෙන් නියම ප්‍රයෝජනය ගන්නවද ? අඹ, දිවුල්, කොමඩු, අලිපේර, රඹුටන්, මැංගුස්, කෙසෙල් , ගස්ලබු වගෙ නහුතයක් පළතුරු අපට තියෙනවා. මෑතක කල පර්යේෂණයකින් සොයාගෙන තියෙනවා පිළිකාව පරදවන හොඳම ආහාරයක් බව මැංගුස්ටීන්. අපි ඒක ඌෂ්නයි කියලා කන්නෙ නෑ. ඇඹරැල්ලා පොත්තත් සමඟ ජූස් හදලා බීලා තියෙන අය ඒකෙ රසය දන්නවා ඇති.

නුවරඑළියෙ විකුනාගන්න බැරි තරං Strawberry හැදුනට අපි කන්නෙ නෑ ගනං කියලා. ඒ අපිම නුවරඑළියෙ සීතලට බොන්න මධුවිතට ඒ වගෙ කිහිප ගුණයක් වියදම් කරනවා. අලි පේර ලෝකයේ හොඳම පළතුර ලෙස සැලකෙනවා. අපේ උඩ රට පළාත්වල ළමයි අලිපේර වලින් cricket ගහනව ඒවා හැදෙන කාලෙට. දිනපතා ඔබේ ආහාරයට පළතුරු එකතුකර ගන්න. අවශ්‍ය විටමින් ටික ඒකෙන් ලැබෙනවා.

#එළිමහනේ ඉන්න. 🏖️️🏞️🏜️
ලොව සතුටින්ම ඉන්න මිනිස්සු ඉන්නෙ ෆින්ලන්තයෙ. එයාලා නිතර එළිමහනෙ ඉන්න ජාතියක්. පාක් එකකට, මුහුදු වෙරළකට යන්න පුළුවන් කමක් තියෙන හැම වෙලාවෙම යන්න. දිගුකල් ජීවත්වන ඔකිනාවා වැසියන්ගෙ එක රහසක් තමයි හොඳින් හිරු එළියට නිරාවරනය වීම. හිරු අපට අවශ්‍ය විටමින් විතරක් නෙමෙයි ජීවය, උද්‍යෝගයද සපයනවා. හිරු නැගීම, බැසීම නැරඹීමත් හරිම අපූරුයි.

#සිනාසෙන්න 😊😋😍😃

Laughter the best medicine කියල කියනවා. ඒ නිසා පුළුවන් හැම වෙලාවකම හිනාවෙන්න. යුරෝපයෙ විතරක් නෙවි, ඉන්දියාවෙ පවා laughing clinics තියෙනවා දැං. අපිට හිනාවෙන්න කොච්චර අමතක වෙලාද කිව්වොත් clinic ගිහිං හිනාවෙන තත්වයකට ඇවිත් අපි. පුලු පුළුවන් වෙලාවට චාලී චැප්ලින්, Mr. බීන් වගෙ චරිතත් එක්ක ආශ්‍රය කරන්න. ජීවිතේ හැම මොහොතක්ම සතුටින් ගත කරන්න.

#ඔබේදෙපා පාවිච්චියට ගන්න. 🚶🚶🚶🏃

ලොව දිගුකල් ජීවත්වන ඔකිනාවා වැසියන්ගෙ තවත් රහසක් තමා ඒ. එයාලා හොඳින් ඇවිදින අය. ව්‍යායාමය ට විතරක් නෙමෙයි, කාර්යාලයෙ මහලකින් මහලකට යන්න, ගෙදර ඉඳං කඩේට යන්න වගෙ දේවල් වලට දෙපාම පාවිච්චි කරන්න. පුළුවන් නං කොච්චර පියවර තියනවද කියල හොයාගන්න පුළුවන් ගැජට් එකක් ඔරලෝසුව වෙනුවට පාවිච්චියට ගන්න. ඒක ඔබව motivate කරනවා ඇවිදින්න.

#ස්වභාවිකවතුර බොන්න.

හැකියාවක් තියෙනවනං නළ ජලය වෙනුවට, ෆිල්ටර් ජලය වෙනුවට ස්වභාවික උල්පත් ජලය බීමට ගන්න. පර්යේෂණ ඔප්පු කරලා තියෙනවා ස්වභාවික ජලය මිනිස් සිරුරට ඉතා ගුනදායකයි කියලා. උදේ නැගිට්ට ගමන් වතුර (අඩු තරමින් ලීටර බාගයක් වත් ) පානය කරන්න. තේ හෝ කෝපි බොනවා නං ඊට පැය බාගෙකට පස්සෙයි. දවස පුරා තිබහ එන්නෙ නැතුවම වතුර බොන්න. දවස අවසානයේ ලීටර හයක් වත් බීලා තියෙන්න ඕන.

#සුවසේනිදන්න 🛌🛌🛌🛌🛌

අඩු තරමින් දවසකට පැය හයක් (6) නොකඩවා ලැබෙන නින්දක් මනුෂ්‍යයෙකුට අවශ්‍යයි. පිරිසිඳු වාතාශ්‍රය තියෙන තද කළුවර කාමරයක නිදියන්න. රාත්‍රි ආහාරය කලින් අරන් පැය දෙකකට පස්සෙ රාත්‍රි 11 ට කලින් නිදන්න පුළුවන් නං අගෙයි. මේ සටහනේ පෙර කිව්වා වගෙ නිදන්න පැයකට කලින් විද්‍යුත් තිරවලින් ඈත්වෙන්න. පුළුවන් තරං මනස නිරවුල් කරගන්න නිදන්න කලින්.

#ලස්සනටඅඳින්න 💃👯🕴️

කාන්තාවක් උනත්, පිරිමියෙක් උනත්, කුමන වෘතියක යෙදුනත් පිළිවෙලකට අඳින්න. ඒකට ටයි, කෝට් දාන්න ඕනම නෑ. මාක් සකර්බර්ග්, බිල් ගේට්ස්, ස්ටීව් ජොබ්ස් හරිම සරල ඇදුම් ඇඳි මිනිස්සු. ඔබ තෝරා ගන්නා ඇඳුම්වල වර්ණයන් තවත් කෙනෙක් තුල යහපත් හැඟීමක් ඇත් කරනවා නොඅනුමානයි. දිනපතා ඔපදැමූ පාවහන් පලඳින්න. පිරිසිදුව අඳින්න. හොඳ පර්ෆියුම් එකක් පාවිච්චි කරන්න. හොඳට ඇන්දහම එන ආත්ම විශ්වාසයේ feeling එක විඳින්න.

#ඇවිදින්න 🚶🏕️🗻🏞️🏔️🌍

මේ ව්‍යායාමය පිණිස නෙමේ. සංචාරකයෙක් වෙලා ඇවිදින්න. රටේ ස්වභාවික සුන්දරත්වය, පෙර රජවරු කල නිර්මාණ, ගරා වැටුන විහාරස්ථාන, මුහුදු වෙරළ, කඳු, දියඇලි, වනාන්තර වලට යන්න. ඔබ වැඩ කරලා, වැඩ කරලා මහන්සි වෙලා ඉන්න කොට දවස් කීපයකට වනාන්තරයට හෝ කඳුකරයට යන්න. ඒවයෙ තියෙන ශක්තිය ඇඟට ඇතුල් කර ගන්න. වැඩ කරන කෙනෙක් නං තියෙන නිවාඩු ඔක්කොම ගන්න. නිවාඩු තියෙන්නෙ මිනිස්සුන්ට ඒවා අවශ්‍ය නිසා. අවුරුද්ද අන්තිමට ඒවා ඉතුරු කරලා මං නිවාඩු අරගෙන නෑ කියන්න එපා.

දවසට පැය 8 ගානෙ සතියට පැය 40 ක් වැඩ කරන්න. වැඩ කරද්දි සම්පූර්ණ ශක්තිය යොදවන්න. ඔබේ ආදායම ලබාදෙන රැකියාවට 100% ක් දෙන්න. හැබැයි නිවාඩුත් ගන්න. ඒ නිවාඩුවෙන් ගන්න ශක්තිය ඔබව තව මාස කිහිපයකට ශක්තිමත්ව තබනවා. හැමවිමට refresh වෙන්න. යාල, විල්පත්තුව, උඩවලව, වස්ගමුව, හෝටන් තැන්න වගේ වනෝද්‍යාන ඇතුලත තියෙන නිවාස වෙන් කරගෙන දවසක් දෙකක් ඉන්න. ඩෙල්ෆ්ට්, බත්තලංගුණ්ඩුව වගෙ දූපතක රැයක් ගත කරන්න. කඳු මුදුනක කූඩාරමක දවසක් ගත කරන්න.

#බයිසිකලයක්ගන්න.

බයිසිකලයක් කියන්නෙ මෝටරයක් තියෙන එකක් නෙවි. පාපැදියක්. ජපානය වගේම යූරෝපයත් බයිසිකලයෙන් උපරිම ප්‍රයෝජන ගන්න ජාතීන්. නිවාඩු දවසට හැතැම්ම දහයක් දොලහක් සයිකල් පදින්න. ඒක හොඳම ව්‍යායාමයක්.

නැතුවම Master කෙනෙක් වෙන්න.

ඉස්සෙල්ලත් කිව්වා සතියකට පැය 40 ක් ඔබේ රස්සාවට දෙන්න කියලා. ඔබ කරන්නෙ රැකියාවක්ද, වෘත්තීයක්ද, ස්වයං රැකියාවක්ද, රක්ෂණ නියෝජිතයෙක්ද, ගෘහනියක්ද, ඔබ කවුරුන් වුවත් කරන දෙයෙහි master කෙනෙක් වෙන්න. ලියනවනං මාර්ටින් වික්‍රමසිංහ කෙනෙක්, උයනවනං පබිලිස් කෙනෙක්, අඳුම් මහනවනං ෆවුසුල් හමීඩ් කෙනෙක් වෙන්න. තේ කර්මාන්තයේ මෙරිල් ජේ ප්‍රනාන්දු ( Dilmah) කෙනෙක් වෙන්න. ව්‍යාපාර කළමනාකරණයේ හැරී ජයවර්ධන කෙනෙක් වෙන්න.( පුද්ගලිකව මට MBA, Msc වගෙ උපාධි ගැන ලොකු ගැටලුවක් තියෙනවා) මම මාස්ටර්ස් කියන්නෙ නමට ඉස්සරින් ලියන අකුරු තුනකට නෙවි. මාස්ටර්ස් කියන්නෙ ඒ ඒ ක්ෂෙත්‍රවල ප්‍රවීනත්වයට පත්වීම. ඒක 2021 දි කරන්න බරිවෙයි සමහරවිට. හැබැයි ඔබේ හැකියාවන් ඔප් නංවා ගන්න අවශ්‍ය අවුරුදු ගනනින් එකක් තමා ඉදිරියේ එන්නෙ. ඒක අපතේ යවන්න එපා.

සතුටින් ඉන්න ✋

සටහනේ අයිතිය රුක්මල් ගමගේ සතුයි

14/08/2025