21/07/2023
ක්ෂණික මෝචනය, අප්‍රාණිකතත්වය, ඇතුළු කිරීමේ අපහසුව, සුරතාන්තයට පත් නොවීම වගේ දේවල් වෛද්‍යවරුන්ට ඉදිරිපත් කෙරෙන සුලබ ලිංගික ගැටළු.
බොහෝ දෙනෙක් මේ ප්‍රශ්න අරගෙන යන්නෙ නාරිවේද, ලිංගාශ්‍රිත රෝග, මෞත්‍ර ලිංගික, කායික රෝග ආදිය පිලිබඳ වෛද්‍ය වරු ලඟට. මේ ගැටළු සුලබ උනත් මේව විසඳන්න භාවිතා කරන ක්‍රම ඒ තරම් සාර්ථක ඒවා නෙවෙයි.
උදාහරණයක් විදිහට ක්ෂණික මෝචනය හෝ අප්‍රාණිකත්වය විසඳන්න මේ කාලෙ පාවිච්චි වෙන සුලබම ප්‍රතිකර්මය ඖෂ.ධ. විශාදය (Depression) රෝගයට භාවිතා කෙරෙන ඖෂ.ධ තමයි ක්ෂණික මෝචනය විසඳන්න අද භාවිතා කරන්නෙ.
හැබැයි ඒ ඖෂ.ධ ගන්න හුඟ දෙනෙකුට ඒවා ගත්තම අමාරුයි, ඔලුව කැක්කුමයි, අප්‍රාණිකත්වය එනවා. ඒව නැවත්තුවම ක්ෂණික මෝචනය අයෙමත් එන්නත් පුළුවන්.
අනිත් ගැටළු වලටත් එහෙමයි. ශල්‍ය කර්ම, ලේසර් ප්‍රතිකාර වැනි විවිධ දේවල් විශාල වියදමක් දරල සිදු කලත් ඒවා සාර්ථක නැහැ.
හැබැයි මේ සියලු ගැටළු නිට්ටාවට සුව කරන්න පුළුවන් මාස්ටර්ස් සහ ජොන්සන් (Masters & Johnson) කියන ඇමරිකානු පර්යේෂකයින් දෙන්නා නිර්මාණය කරපු චර්යා ප්‍රතිකාර ක්‍රමය යොදාගෙන. කිසිම ඖෂ.ධයක් භාවිතා නොකර
පහුගිය අවුරුදු 50 කට අධික කාලයක් ලෝකය පුරා මෙවැනි ගැටළු වලට භාවිතා කරපු සාර්ථකම ප්‍රතිකාර ක්‍රමය මාස්ටර්ස් සහ ජොන්සන් ලගේ චර්යා ප්‍රතිකාර.
එකේදි ක්ෂණික මෝචනය තියන පුද්ගලයට මෝචනය වීම පාලනය කරගන්න පුහුණු කරනවා.අප්‍රාණිකත්වය, සුරතාන්තයට පත් නොවීම පේශි තද වීම නිසා ඇතුළු කිරීමේ අපහසුව වගේ අනික් බහුල ගැටලුත් මාස්ටර්ස් සහ ජොන්සන්ලගෙ චර්යා ප්‍රතිකාර ක්‍රම වලින් සාර්ථකව විසඳන්න පුළුවන්.
කොච්චර සාර්ථක උනත් අවාසනාවකට මේ චර්යා ප්‍රතිකාර ක්‍රම යොදා ගැනෙනවා අඩුයි. මේවා පුහුණු කරන්න, කියාදෙන්න, කාලය ටිකක් වැය වෙනවා. බොහෝ වෛද්‍ය වරුන්ට එහෙම වැය කරන්න කාලය නැහැ. අනිත් එක ඖෂ.ධ වලට තියන අනවශ්‍ය නැඹුරුව. වෛද්‍යවරයෙක් ලඟට ගියොත් බොන්න මොකක් හෝ දෙන්න ඕන කියල බොහෝ අය බලාපොරොත්තු වෙනවා. ඒ දේවල් නිසා අන්තිමට වෙන්නෙ ඉතාම ප්‍රතිපල දායක මේ වගේ ප්‍රතිකාර ක්‍රම යටපත් වෙලා යන එක.
