07/03/2025
ඊයේ දින (2025-03-06) ඌව පළාත් ගරු ආණ්ඩුකාර කපිල ජයසේකර මැතිතුමා මහියංගන මූලික රෝහලේ නිරීක්ෂණ චාරිකාවක නිරත විය.
එහිදී රෝහල් අධ්‍යක්ෂ වෛද්‍ය සෙනරත් බණ්ඩාර මහතා විසින් රෝහලේ වත්මන් තත්ත්වය පිළිබඳව ගරු ආණ්ඩුකාර තුමා දැනුවත් කිරීම සිදුකරන ලදී.
ඒ අනුව ගරු ආණ්ඩුකාරතුමා රෝහලේ සියලුම ආංශයන් වෙත ගොස් ඒ ඒ අංශයන්හි වත්මන් තත්ත්වය හා වැඩි දියුණු විය යුතු ආකාරය පිළිබඳ රෝහල් අධ්‍යක්ෂකතුමා සමග ඉතාමත් සුහද සාකච්ඡාවකද නිරත විය.
එමෙන්ම එහිදී විශේෂඥ වෛද්‍යවරුන්ගේ ඉල්ලීම් පරිදි මහියංගන මූලික රෝහල වෙත අත්‍යවශ්‍යව ඇති වෛද්‍ය උපකරණ හා කාර්ය මණ්ඩලය ලබාදීමේ ඇති හැකියාව පිළිබඳ කඩිනමින් සොයා බැලීමටද පොරොන්දු විය.
එමෙන්ම මහියංගන මූලික රෝහලේ රසායනාගාරය තුළ සාර්ථකව ක්‍රියාත්මක වන රසායනාගාර දත්ත කළමනාකරණ පද්ධතිය ගරු ආණ්ඩුකාරතුමාගේ විශේෂ ඇගමකට ලක් වූ අතර රසායනාගාරය මගින් අප සේවාලාභීන්ට අමතරව පළාතේ අනෙකුත් රෝහල් හා සෞඛ්‍ය ආයතනයන්හි රසායනාගාර පරීක්ෂණ සිදුකරවාදීමට ද පහසුකම් සැලසීම පිළිබඳව විශේෂ ප්‍රශංසාවක් ද සිදු කරන ලදී..
එමෙන්ම මහියංගන මූලික රෝහල දිස්ත්‍රික් මහ රෝහලක් තත්ත්වයට උසස් කොට මධ්‍යම රජයට පවරා ගැනීම පිළිබඳ ගරු පාර්ලිමේන්තු මන්ත්‍රී සුදත් බලගල්ල සහෝදරයා විසින් පාර්ලිමේන්තුවට ඉදිරිපත් කරන ලදුව මේ වන විට ක්‍රියාත්මක වෙමින් පවතින ක්‍රියාවලිය සඳහා අවශ්‍ය සියලුම සහයෝගයන් ඌව පළාත් ගරු ආණ්ඩුකාර වරයා ලෙස නොපැකිළිව ලබාදීමට කටයුතු කරන බවද එතුමා ප්‍රකාශ කරන ලදී.
ඌව පළාත් ගරු ආණ්ඩුකාරතුමා ලෙස ඉතාමත් කාර්යබහුල මොහොතක රෝහලේ කටයුතු සොයා බැලීමට නිරීක්ෂණ චාරිකාවකට එක්වීම පිළිබඳව අප රෝහලෙන් සේවාවන් ලබන පළාත් තුනකට අයත් දිස්ත්‍රික්ක හතක ජනතාවකගේ ස්තුතියි එතුමා වෙත පුදකර සිටිමු....
මහින්ද හෙට්ටිආරච්චි
මාධ්‍ය ඒකකය.
මූලික රෝහල
මහියංගන.
