13/07/2025
2025.07.12 සිට ඉදිරි සතියෙ ලග්න පලාපල
--------------------------
📝 මේෂ
සිතට සතුට
මේෂ ලග්නයෙන් උපන් ඔබට මෙම සතිය හදිසි ධන ලාභ ලැබීමේ වාසනාව උදා කරන අතර, වෙළඳාම් කරන අයට විශේෂයෙන් යහපත් කාලයකි. යාන වාහන සම්බන්ධ ගැටලු නිරවුල් වනු ඇත. විරුද්ධ පාර්ශ්වයේ අයෙකු සමඟ නව සම්බන්ධතාවයකට අඩිතාලමක් වැටෙනු ඇත. දූ දරුවන් වෙනුවෙන් වැඩි කාලයක් වෙන් කිරීමට ඔබට සිදුවනු ඇත. බාල සහෝදර සහෝදරියන්ට යහපත් දවස් වන අතර, ඔවුන් නිසා ඔබේ සිතට සතුටක් ඇති වනු ඇත. හිතවත් කෙනෙකුගෙන් ඔබ ඉල්ලූ දෙයක් ලැබෙනු ඇත. ගෙදර දොරේ වැඩ කටයුතු පිළිබඳව අවධානය යොමු වන අතර, අතපසුව තිබූ වැඩ කටයුතු ඉක්මන් කර ගැනීමට ඔබට අවස්ථාව ලැබේ. සතිය මැදදී රැකියා කටයුතු පිළිබඳ යහපත් ආරංචියක් ලැබෙනු ඇත. බලාපොරොත්තු නොවූ මුදලක් අතට ලැබීමට ද ඉඩ ඇත. සතිය අගදී ඔබට ප්‍රීතිදායක ගමනක් යෙදෙනු ඇත. කෙසේ වෙතත්, අන් අයගේ කටයුතුවලට මැදිහත් වීමෙන් වැළකිය යුතුය. මන්ද ඒ හේතුවෙන් ඔබට දෝෂාරෝපණයක් හට ගත හැකි බැවිනි.
ශුභ දිනය : බ්‍රහස්පතින්දා
ශුභ වර්ණය : රන්වන්
ජය අංකය : 03
📝 වෘෂභ
ප්‍රීතිජනක අවස්ථාවක්
වෘෂභ ලග්නයෙන් උපන් ඔබට මෙම සතිය ආදායම් මාර්ගය පිළිබඳව තබා තිබූ බලාපොරොත්තුවක් ඉටුවන බව පෙන්නුම් කරයි. ධන ලාභ හිමිවන අතර, පෙර පැවති කරදර තරමක් දුරට හෝ මගහැරී යන කාලයකි. නිවසට නව බඩුබාහිරාදිය ගෙන ඒමට අවස්ථාව සැලසේ. දුරස්ව සිටි දූ දරුවන් නැවත සමීප වනු ඇත. මිතුරන්ගෙන් උදව් උපකාර හිමිවන දවස් වෙති. අධ්‍යාපන කටයුතුවල නිරත වන අයට මෙම සතිය ඉතා යහපත් වේ. අළුත් උසස් දේවල් ඉගෙනීමට අදහස් පහළවන අතර, පුණ්‍ය කටයුත්තකට සම්බන්ධවීමට ද ඔබට අවස්ථාව ලැබේ. සතිය මැදදී ලියකියවිලි සම්බන්ධයෙන් ගැටලුකාරී තත්ත්වයක් හෝ අස්ථානගත වීමක් පෙන්නුම් කරන බැවින් ඒ පිළිබඳව කල්පනාකාරී වන්න. හදිසියේ සිටි තැනින් දුරස් වීමට සිදුවිය හැකිය. ශරීර සෞඛ්‍යය පිළිබඳව විමසා බැලීමේදී හිසේ ආබාධයකට ඉඩක් පවතී. සතිය අගදී ඔබට ප්‍රීතිජනක අවස්ථාවක් යෙදෙනු ඇත. විරුද්ධ පාර්ශ්වයේ කෙනෙකුගෙන් විශේෂ යමක් ලැබීමට ද ඉඩ තිබේ.
ශුභ දිනය : සිකුරාදා
ශුභ වර්ණය : රෝස
ජය අංකය : 06
📝 මිථුන
රැකියා ලාභ
මිථුන ලග්නයෙන් උපන් ඔබට මෙම සතියේ වියදම් කිරීමේදී වෙනදාට වඩා තරමක් කල්පනාකාරී වීමට සිදුවනු ඇත. ආගමික කටයුත්තකට කාලය වෙන් වන අතර, සහෝදර සහෝදරියන්ගෙන් උදව් උපකාර ලැබීමට හේතුයි. රැකියාව සම්බන්ධයෙන් යම් බලාපොරොත්තුවක් තිබුණේ නම්, එය ඉටුවන බව පෙන්නුම් කරයි. උසස් දේවල් ඉගෙනීමට සිත යොමු වන අතර, දරුවෙකු පිළිබඳ සතුටුදායක ආරංචියක් අසන්නට ලැබේ. සතිය මැදදී බලාපොරොත්තු වූ මුදලක් අතට ලැබිය හැකිය. නිවසේ අලංකාරය පිණිස යම් වැඩ කටයුත්තකට අත ගසයි. ස්ත්‍රී පාර්ශ්වයේ කෙනෙකුගෙන් යම් දෙයක් බලාපොරොත්තුවෙන් සිටියේ නම් එය ලැබේ. ප්‍රේමය සහ විවාහය පැත්තෙන් බලාපොරොත්තු සහගත දෑ ඉටුවේ. සතිය අගදී මිතුරෙකු සම්බන්ධ සතුටු පණිවුඩයක් ලැබෙනු ඇත. කලක් පැවති රෝගාබාධ තත්ත්වයක් මගහැරී යාමට අවස්ථාව යෙදේ.
ශුභ දිනය : බදාදා
ශුභ වර්ණය : කොළ
ජය අංකය : 05
📝 කටක
නොසිතූ ගමනක්
කටක ලග්නයෙන් උපන් ඔබට මෙම සතියේ වියහියදම් පිළිබඳව කල්පනාකාරී විය යුතුය. මන්ද අනවශ්‍ය ලෙස වැයවීම් හෝ කලබලකාරී ස්වභාවය නිසා අතපසුවීම් සිදුවිය හැකි බැවිනි. රැකියාවක් බලාපොරොත්තුවෙන් සිටින අයට එම බලාපොරොත්තුවට යහපත් ප්‍රතිචාර ලැබෙන දවස්ය. පවුලේ වගකීම්වලදී මූලික වීමට ඔබට සිදුවන අතර, ගෙවල් ඉඩම් පිළිබඳව යම් දියුණුවක් ඇතිවනු ඇත. ඒ සම්බන්ධයෙන් ගැටලු හෝ පැටලිලි පැවතියේ නම්, ඒවායින් නිදහස් වීමට ද ඔබට හැකියාව ලැබේ. ආගම දහම පිළිබඳව සිතේ භක්තිය වැඩි කරයි. සතිය මැදදී පැරණි සබඳකමක් අලුත් වන අතර, නොසිතූ ගමනක් යෙදිය හැකි බැවින් ඒ සඳහා කල් ඇතිව සූදානම්ව සිටීම යහපත් වේ. ඉගෙනීම් කටයුතුවල නිරතව සිටින අයගේ ඒ සඳහා ඇති උනන්දුව වර්ධනය වන අතර, අලුත් පොතපත ලැබීමට ද ඉඩ තිබේ. සතිය අගදී නව මිතුරෙකු මුණගැසෙනු ඇත. කෙසේ වෙතත්, චෝදනාවක් එල්ල වීමට ඉඩ පවතින බැවින් ඉවසීමෙන් සහ දුරදිග සිතා බැලීමෙන් යුක්තව වැඩ කටයුතු කිරීමට වග බලා ගන්න.
ශුභ දිනය : සිකුරාදා
ශුභ වර්ණය : රෝස
ජය අංකය : 06
📝 සිංහ
අලුත් වැඩක්
සිංහ ලග්නයෙන් උපන් ඔබට මෙම සතියේ වෙළඳ ව්‍යාපාර කටයුතු කරන අයට ඉතා යහපත් වන අතර, අලුත් වැඩ කටයුතු ඇරඹීමට ද සුදුසු කාලයකි. ඒ සඳහා ඔබට දැඩි උනන්දුවක් ද ඇති වනු ඇත. රැකියා කටයුතු සම්බන්ධයෙන් පැවැති බාධා අවහිරකම් ද ඉවත්ව යන බව පෙන්නුම් කරයි. විවිධාකාර ලාභ ලැබෙන අතර, යහපත් ආධාරකරුවන් ද මුණගැසේ. ගෙදර දොර අලුත්වැඩියා කටයුත්තක් පිළිබඳව ඔබ කල්පනා කරන අතර, සමහර විට ඒ සඳහා ප්‍රථම පියවර ද ගැනීමට ඉඩ තිබේ. සතිය මැදදී උසස් අධ්‍යාපන කටයුතුවල නිරතව සිටින අයට විශේෂයෙන් යහපත්ය. ඔබ වෙහෙස මහන්සියෙන් වැඩ කටයුතු කරන්නට පෙළඹෙනු ඇත. මුදල් ලාභයක් ලැබෙන අතර, එයින් කොටසක් පුණ්‍ය කටයුත්තකට වෙන් කිරීමට සිත යොමු වනු ඇත. සතිය අගදී සැලසුම්කර තිබූ වැඩක් අතපසු විය හැකිය. ශරීර සෞඛ්‍යයට බාධාවක් වෙතොත්, ඒ බඩ සහ පාද ආශ්‍රිතව විය හැකි බැවින් ඒ පිළිබඳව සැලකිලිමත් වන්න.
ශුභ දිනය : සිකුරාදා
ශුභ වර්ණය : රෝස
ජය අංකය : 06
📝 කන්‍යා
මංගල යෝග
කන්‍යා ලග්නයෙන් උපන් ඔබට මෙම සතියේ මුදල් පිළිබඳව තිබූ ගැටළුවක් නිරවුල් වනු ඇත. මංගල යෝග ක්‍රියාත්මක වන කාලයක් බැවින්, තරුණ තරුණියන් අතර ආදර සබඳතා ඇති වන අතර යෝජනා ස්ථිර වනු ඇත. විනෝදය පිණිස වියදම් බහුල විය හැකි අතර, උත්සව අවස්ථාවක ඉඟි ද පෙනේ. තෑගි බෝග ලැබෙනු ඇති අතර, ඔබේ දියුණුවට හේතුවන විශේෂ කරුණක් යෙදෙනු ඇත. සතුරන්ගෙන් කරදර ඇති නොවනු ඇත. අසනීප තත්ත්වයකින් සිටියේ නම් එය මගහැරී යාමට අවස්ථාව යෙදේ. අධ්‍යාපන කටයුතු කරන අයට ඊට උදව් උපකාර හා ආධාර ලැබෙන දවස්ය. නිර්මාණශීලී දේවල් ආරම්භ කිරීමට යහපත් කාලයකි.
සතිය මැදදී වැයපස අධික වන බව පෙන්නුම් කරන නිසාවෙන් කල්පනාකාරීව වියහියදම් කිරීමට සිත තබාගන්න. සුළු සුළු ගමන් බිමන් ද යෙදෙනු ඇත. සතිය අගදී පැරණි හිතවත්කමක් අලුත් වන අතර, ඔබ කැමති සිත සතුටු කරවන දෙයක් ලැබේ. මව් පාර්ශ්වයේ අයගෙන් උදව් උපකාර හෝ විශේෂ ලැබීම් ද පවතී.
ශුභ දිනය : සිකුරාදා
ශුභ වර්ණය : රෝස
ජය අංකය : 06
📝 තුලා
දේපළ ලාභ
තුලා ලග්නයෙන් උපන් ඔබට මෙම සතියේ තම වැඩ කටයුතු ඉක්මනින්ම ඉටුකර ගැනීමට අවකාශය සහ උදව් උපකාර ලැබෙන බව පෙන්නුම් කරයි. දේපළ හා ඉඩකඩම් සම්බන්ධයෙන් යහපත් වන අතර, විදේශ කටයුතු පිළිබඳ බලාපොරොත්තු ඉටුවීමට හෝ එවැනි ආරංචියක් ලැබීමට ඉඩ ඇත. සතිය මැදදී කාලයක පටන් සිතේ පැවැති බලාපොරොත්තුවක් ඉටු කර ගැනීමට ඔබට හැකියාව ලැබෙනු ඇත. මිල මුදල් පිළිබඳ ගැටලු මඟහැරී යන අතර, ආලය සහ විවාහය පැත්තෙන් යහපත් වනු ඇත. තරුණ තරුණියන් අතර නව ප්‍රේම සබඳතා ඇතිවිය හැකි අතර, මංගල යෝජනා ස්ථිර වනු ඇත. සතිය අගදී මවගෙන් හෝ එම පාර්ශ්වයෙන් ලැබීම් සහිතය. දූ දරුවන්ගේ දියුණුව සහ ජයග්‍රහණවලට ඉඩකඩ පවතී. රැකියාව සම්බන්ධයෙන් අයහපත් තත්ත්වයක් තිබුණේ නම් එය මඟහැරී යනු ඇත. ශරීර සෞඛ්‍යය පිළිබඳව පරීක්ෂා කිරීමේදී විශේෂයෙන් සෙම් දෝෂයකට ඉඩකඩ පවතින බැවින් ඒ පිළිබඳව සැලකිලිමත් වන්න.
ශුභ දිනය : සඳුදා
ශුභ වර්ණය : සුදු
ජය අංකය : 02
📝 වෘශ්චික
බාධා මගහැරේ
වෘශ්චික ලග්නයෙන් උපන් ඔබට මෙම සතියේ තම වැඩ කටයුතු අවහිරයකින් තොරව කරගෙන යෑමට අවස්ථාව ලැබේ. ඔබේ සහෝදරයෙකුට හදිසි ධන ලාභයක් හිමිවන කාලපරිච්ඡේදයකි. දරුවන් පිළිබඳව තබා තිබූ බලාපොරොත්තුවක් ඉටුවන අතර, ඒ පිළිබඳව යහපත් ආරංචියක් ද ලැබෙනු ඇත. මුදල් බලාපොරොත්තුවක් ද ඉටුවන ස්වභාවයක් පවතී. සතිය මැදදී අලුත් වැඩකට අතගැසීමට අවස්ථාව ලැබෙන අතර, ප්‍රයෝජනවත් අය ආශ්‍රයට ලැබෙනු ඇත. ලියකියවිලි කටයුතු වැඩි විය හැකි අතර, හදිසියේ එවැනි දෙයක අවශ්‍යතාවය ඉස්මතු විය හැකිය. ඉගෙනීම් කටයුතුවල නිරතව සිටින අයට ශුභදායකය. දේපල හා ඉඩකඩම් සම්බන්ධයෙන් යහපත් වන අතර, භූමි ලාභ ද සහිත කාලයකි. සතිය අගදී ඔබට හෝ පවුලේ අයට අවශ්‍ය කරන දෑ මිලට ගැනීමට අවස්ථාව ලැබේ. ක්‍රීඩා ආදී විනෝදජනක දෙයට හිත ඇදී යන අතර ඒ සඳහා කටයුතු ද යෙදෙනු ඇත. ඔබේ මවට කාලයක් තිස්සේ කරදරකාරීව තිබූ දෙයකින් නිදහස් වීමට අවකාශය සැලසෙන බව ද පෙන්නුම් කරයි.
ශුභ දිනය : සඳුදා
ශුභ වර්ණය : සුදු
ජය අංකය : 02
📝 ධනු
ශුභ ආරංචි
ධනු ලග්නයෙන් උපන් ඔබට මෙම සතිය දූ දරුවන් සිටී නම්, ඔවුන්ට ඉතා යහපත් කාලයකි. ඔවුන්ගෙන් ජයග්‍රහණ හෝ සතුටුදායක ආරංචි ලැබෙනු ඇත. මිල මුදල් පිළිබඳව තිබූ බලාපොරොත්තු ඉටුකර ගැනීමට අවස්ථාව ලැබෙනු ඇති අතර, නොසිතූ හෝ අන්සතු දේවල් ද ලැබිය හැකි කාලපරිච්ඡේදයකි. පවුලෙන් දුරස්ව සිටි කෙනෙකු නැවත සමීප වීමේ ප්‍රවණතාවක් පවතී. කෙසේ වෙතත්, සමාජ ආශ්‍රය කිරීමේදී සහ සමාජ සේවා කටයුතු වලට සහභාගි වීමේදී බොහෝ කල්පනාකාරී විය යුතුය. මන්ද, ඒ සම්බන්ධයෙන් ඔබට අශුභ ප්‍රතිඵල ගෙන දිය හැකි බැවිනි. සතිය මැදදී රැකී රක්ෂා කටයුතු පිළිබඳව බොහෝ කල්පනාකාරී විය යුතු බව පෙන්නුම් කරයි. වගකීම් පැහැර හැරීම නිසා චෝදනා එල්ල වීමට ඉඩ ඇත. සතිය අගදී ක්‍රීඩා ආදී විනෝදජනක දෙයක නිරත වීමට ඔබට ලැබෙනු ඇත. පවුලට අලුතින් කෙනෙකු එකතු වන ආරංචිය ලැබීම හෝ එසේ සිදුවීමට ද ඉඩකඩ පවතී.
ශුභ දිනය : බ්‍රහස්පතින්දා
ශුභ වර්ණය : රන්වන්
ජය අංකය : 03
📝 මකර
ආර්ථික වාසියක්
මකර ලග්නයෙන් උපන් ඔබට මෙම සතියේ දේපළ සහ යාන වාහන සම්බන්ධයෙන් ශුභඵල ගෙන දෙන බව පෙන්නුම් කරයි. ආර්ථික වාසියකට ද ඉඩකඩ පවතින අතර, නිවසට අලුත් බඩු බාහිරාදිය ගෙන ඒමට හැකියාව සැලසේ. වෙළඳ ව්‍යාපාර කටයුතු කරන අයට විශේෂයෙන් යහපත් දවස් වශයෙන් සැලකීමට පුළුවන. පෙර පැවති ණය ගෙවා දැමීමට ඔබට හැකි වනු ඇත.
සතිය මැදදී අමනාපව සිටි කෙනෙකු සමඟ නැවත සුහදතාවය ගොඩනඟා ගැනීමට ඔබට හැකි වනු ඇත. බාල සහෝදරයන්ගෙන් උදව් උපකාර හිමිවන ස්වභාවයක් පෙන්නුම් කරයි. හදිසි ගමනක් යෙදිය හැකි බැවින් කල් වේලා ඇතිව ඊට සූදානම්ව සිටීම යහපත්ය. සතිය අගදී ළෙන්ගතු කෙනෙකු සමඟ ආගමික කටයුත්තක නිරත වීමට ලැබෙනු ඇත. අසනීප තත්ත්වයක් තිබේ නම්, එය සුව අතට හැරෙනු ඇත. සමාජ සේවා කටයුත්තකට අත ගැසීමට අවස්ථාවක් යෙදෙන බව ද පෙන්නුම් කරන අතර, ඔබගේ සහයෝගයට සිටින අයට ද මෙය යහපත් කාලයක් වනු ඇත.
ශුභ දිනය : සිකුරාදා
ශුභ වර්ණය : රෝස
ජය අංකය : 06
📝 කුම්භ
බලාපොරොත්තු ඉටුවේ
කුම්භ ලග්නයෙන් උපන් ඔබට මෙම සතියේ කාලයක පටන් බලාපොරොත්තුවෙන් සිටි දෙයක් ඉෂ්ට කර ගැනීමට අවස්ථාව ලැබෙනු ඇත. තම වැඩ කටයුතු වෙනුවෙන් වැඩිපුර වෙහෙස මහන්සි වනවා ද ඇත. ඉගෙනීම් සහ ඉගැන්වීම් සාර්ථක වන අතර, නව මිතුරු සබඳතාවයක් ද ගොඩනැගෙයි. ඔබේ බාල සහෝදරියට යහපත් කාලයක් වන අතර, ඇය පිළිබඳව සතුටුදායක ආරංචි ලැබීමට නියමිතය. සතිය මැදදී ගනුදෙනු වලින් නිදහස් වීමට ඔබට හැකි වනු ඇත. ආගම දහම පිළිබඳව සිතේ භක්තිය වැඩිවනු ඇත. ගමන් බිමන් නිසා පාඩු සිදුවිය හැකි බැවින් ඒ පිළිබඳව අවධානය යොමු කරන්න. පවුලේ අයෙකු වෙනුවෙන් කාලය වැය කිරීමට ද ඔබට සිදුවිය හැකිය. සතිය අගදී ලියකියවිලි වැඩ යෙදෙන්නේ නම්, බොහෝ කල්පනාකාරීව ඊට සම්බන්ධ විය යුතු බව සිත තබාගන්න. මන්ද, ගැටලු සහ පැටලිලි ඉස්මතු වීමේ ප්‍රවණතාවක් පවතින බැවිනි. ශරීර සෞඛ්‍යය දෙස බැලීමේදී උෂ්ණ ගතිය වැඩි වන අතර, උණ රෝගයක් ඉස්මතු විය හැකි බැවින් ඒ පිළිබඳව සැලකිලිමත් වන්න.
ශුභ දිනය : සිකුරාදා
ශුභ වර්ණය : රෝස
ජය අංකය : 06
📝 මීන
ප්‍රබෝධමත් සතියක්
මීන ලග්නයෙන් උපන් ඔබට මෙම සතියේ නිවසට අලුත් බඩුබාහිරාදිය ගෙන ඒමට අවස්ථාව ලැබෙනු ඇත. දරුවන් ප්‍රමුඛ කරගත් ගමන් බිමන් යෙදෙන අතර, ඔබේ බලාපොරොත්තු සහ අදහස් ඉටු කර ගැනීමට හැකියාව සැලසේ. මිල මුදල් අතින් සතුටුදායක තත්ත්වයක් පවතින අතර, සිතට නව ප්‍රබෝධමත් ගතියක් දැනෙනු ඇත. දේපළ සම්බන්ධයෙන් යහපත් ප්‍රතිඵල ලැබෙනු ඇත. අධ්‍යාපන කටයුතු කරන අයට මෙය යහපත් කාල පරිච්ඡේදයක් වන අතර, අලුත් දේවල් ඉගෙනීමට අවස්ථාව හිමිවෙයි.
සතිය මැදදී මෙතෙක් පීඩාවක්ව තිබූ දෙයකින් නිදහස් වීමට අවකාශ සැලසෙනු ඇත. ඉදිරි වැඩ කටයුතු පිළිබඳව නැවුම් ආකාරයකින් සිතන්නට ඔබ පෙළඹෙනු ඇත. ගමනක් පිළිබඳව තබා තිබූ බලාපොරොත්තුව ද ඉටු වනු ඇත. සතිය අගදී ශරීර සෞඛ්‍යය පිළිබඳව කල්පනාකාරී විය යුතු ස්වභාවයක් පවතී. විශේෂයෙන්ම උදරය ආශ්‍රිතව හා උගුරේ හෝ බෙල්ලේ ආබාධයකට ඉඩකඩ ඇති බැවින් ඒ පිළිබඳව සැලකිලිමත් වන්න.
ශුභ දිනය : බ්‍රහස්පතින්දා
ශුභ වර්ණය : රන්වන්
ජය අංකය : 03
ප්‍රවීණ ජ්‍යෝතීර්වේදීනි
වාස්තු විශේෂඥ
මනෝවිද්‍යා උපදේශිකා
නයෝමී පබසරා මැණිකේ
0772279138
