Dr Gayan Kumuditha Dayaratna

24/10/2025

24/10/2025

⭕🦴🩻🚑🏥🩺🚒AI, Google (අන්තර්ජාලය) සහ ලංකාවේ රෝගීන්
===================================

⭕වර්තමාන කාලයේ තියෙන අලුත්ම රැල්ල තමා තමාට රෝගයක් හැදුනහම ඒකේ රෝග ලක්ෂණ Chat GPT වගේ AI tool එකකින් හොයලා බලලා ලෙඩේ මොකක්ද කියලා දැනගන්න හදන එක.

⭕ශෝෂල් මීඩියා වල ඕක ප්‍රවර්ධනය කරන පුද්ගලයින් එමටයි. ඊට අමතරව දකින දකින කෙනා කියන දේවල් විශ්වාස කරන්න අපේ මිනිස්සුන් හරි කැමති නිසා ඔය වගේ දේවල් වලට යොමුවන ප්‍රවණතාව වැඩියි.

⭕කොටින්ම කිව්වොත් දෙන්නම කතුරකින් කපන්න දන්න නිසා බාබර්ගෙන් ඇඳුම් මහන හැටි ඉගෙන ගෙන ටේලර්ගෙන් කොණ්ඩෙ කපන්නේ ඉගෙන ගන්න පුළුවන් කියලා මිනිස්සු විශ්වාස කරන බවක් පේනවා.

⭕කිසිම වෛද්‍ය පුහුණුවක් නැති ඔබ AI/google වලින් රෝග ලක්ෂණ හොයා බලාගන්න රෝග නිර්ණය කර ගැනීම කොතරම් භයානකද කියන එක ඔබට අවබෝධ වෙලා නැතුව ඇති.

⭕දිනෙන් දිනම ඔහොම් කරන්න ගිහිල්ලා අමාරුව වැටිච්ච රෝගීන් අපිට හමුවෙනවා. මේ ලියලා තියෙන්නේ ඒ වගේ අවස්ථාවක් ගැන.

⭕මීට සති කිහිපයකට පෙර යාපනය ප්‍රදේශයේ විනෝද සවාරියක් ගිය තරුණයෙක් තමන්ට ආපු දකුණු උරෙහිසේ කැක්කුම එන්න හේතුව AI වලින් හොයලා බලලා තියෙනවා.

⭕අන්තිමට ඔහු තීරණය කරනවා ඔහුගේ උරහිස කැක්කුම එන්න හේතුව ඔහු එම දින කීපයේ වොලි බෝල් ගහන්න ගිහින් උරහිසේ මස් පිඩුවේ ඇදීමක් කියලා.

⭕දන්නා ෆාමසියක යහළුවෙකුගෙන්ම හොඳම බ්‍රෑන්ඩ් එකකුයි කැක්කුම් පෙති ඉල්ලගෙන බීලා physiotherapy වලට යොමු වෙලා තිබ්බා.

⭕බලාපොරොත්තු වූ ආකාරයට උරහිස කැක්කුම සුව නොවූ නිසා පවුලේ වෛද්‍යවරයා ගාවට යොමු වූ පසු එම වෛද්‍යවරයා මෙම රෝගියාවේ මට යොමු කරලා තිබ්බා.

⭕යොමු කරන්න හේතුව හැටියට ලියවිලා තිබ්බේ උරහිස කැක්කුම හරහාම විස්තර කළ නොහැකි ඇඟේ පතේ අපහසුතාව සහ උණ ගතියක් රෝගියාට තිබීමයි.

⭕උරහිස කැක්කුමක් එක්ක රෝගියෙක් එනකොට අපි මුලින්ම සලකා බලන්නේ උරහිසේ මස් පිඩුවල එන ආතරයිටිස් රෝග. ඕවාට කියන්නේ tendinitis කියලා. වෙනත් ආතරයිටිස් රෝග සහ ආතරයිටිස් නොවන රෝග වලට උරහිස කැක්කුම එන්න පුළුවන්.

⭕රෝගියාගෙන් විස්තර අහගෙන යනකොට අපූරු කතාවක් කිව්වා. සර් මම ටිකක් drink එක දාලා සෙල්ලම් කලේ. මටත් මතක නෑ කොයි වෙලාවෙද උරහිසට මොනවද වුනේ කියලා. මම ඇහුවා මොනවද ඔයා ඔච්චර බිව්වේ කියලා. දන්නැද්ද සර්, නොබීපු දෙයක් නෑ, විස්කි ඉඳන් රා වෙනකම් ඔක්කොම බිව්වා කියලා.

⭕පසුව රෝගියා පරීක්ශා කරන්න උරහිස බලනකොට උරහිසේ ආතරයිටිස් රෝගියෙකූගෙන් බලාපොරොත්තු වූ වෙනස්කම් දැක්කේ නැහැ. ඒ වගේ වෙලාවට කරන්නේ උරහිසේ කැක්කුම වෙන තැනක තිබ්බ රෝගයක් නිසා ආපු කැක්කුමක්ද කියල හොයන එක. ඕකට කියන්නේ referred pain කියලා.

⭕තව විස්තර අහගෙන යනකොට කෑම බීමට ඇති අපහසුව, උණ ගතිය, බඩේ අපහසුතාවක වගේ රෝග ලක්ශණ තියන බව කියා සිටියා.

⭕අවසානයේ බඩේ ultrasound (ස්කෑන්) එකෙන් හොයාගත්තා ඔහුට අක්මාවේ සැරව ගෙඩියක් තියන බව. ඔය රා බීපු කථාව වැදගත් වෙන්නේ ඔතනදී. මොකෝ රා වලින් හැදෙනවා amoebic liver abcess කියන තත්වය. ඔය රෝගීන් bacterial liver abcess (බැක්ටීරියා නිසා අක්මාවේ එන විසර ගෙඩි) රෝගීන් වගේ දැඩි රෝග ලක්ශණ පෙන්නන්නේ නැහැ.

⭕ඔය විසර ගෙඩියක් පිපිරුනොත් ජීවිත හානිය පවා වෙන්න පුලුවන්.

⭕අනෙක් තමා රෝගියා රෝග ලක්ශණ ආපු දවසෙ ඉඳන්ම ඉතාම ප්‍රබල වේදනා නාශකයක් එක්ක පැනඩෝල් බීපු නිසා රෝග ලක්ෂණ ආවේ කොටසක් විතරයි.

⭕රෝගියාව මම ඒ සම්බන්ධ විශේෂඥ වෛද්‍යවරයකුට යොමු කලා. කොහොම හරි රෝගියා පණ බේරගත්තා.

⭕දෙන්න තියන පණිවිඩේ තමා සෝෂල් මීඩියා වල බලිය ගහන MBBS (Facebook) දොස්තරල කියන ආකාරයට AI වලින් බලල බෙහෙත් කරගන්න යන්න එක දැලි පිහියෙන් කිරි කනව වගේ වැඩක්.

⭕දොස්තරලගෙ වැඩේ තමන් කරගන්න යන්න එපා. AI වලින් රිපෝර්ට් එකක් කියවගන්න පුලුවන් වුනාට සුදුසුකම්ලත් වෛද්‍යවරයෙකුගේ clinical acumen (ඉව) ආදේශය කරන්න බැහැ.

⭕මට ඕක එවපු වෛද්‍යවරයාට මෙතන මොකක් හරි වෙන අවුලක් තියනවා කියල අවබෝධ වුන නිසා තමා රෝගය හොයාගන්න පුලුවන් වුනේ.

⭕දෙයක් කියලා දැනුවත් වෙන්න AI හොඳ වුනාට AI වලින් බලල රෝග වලට බේත් කරගන්න ගියොත් නම් ඔහොම වෙන්න පුලුවන්.

⭕දොස්තරලට වරදින්න පුලුවන්. මටත් වැරදිලා තියනවා. හැබැයි AI එකකින් ලෙඩේ විස්තර බලන රෝගියාට වරදින්න තියන අවස්ථාව ඊට සිය දහස් ගුණයක් වැඩියි.

⭕AI සහ රෝගීන් කියන්නේ නිකම් දොස්තරල සහ පොහොර වගේ. ඕන දෙයක් ගැන කොහෙන් හරි කියවගෙන රඟපාන එකට වඩා ඒකට practically මුහුණ දෙන එක හාත්පසින්ම වෙනස්.

⭕Dr HEGK Dayaratna
සන්ඳි කායික රෝග ඇතුලු ආතරයිට්ස් රෝග රක්තවාතවේද සහ සන්ඳි ආශ්‍රිත රෝග සම්බන්ධ වෛද්‍ය
MBBS, MRCP (Rheumatology)(UK)

13/10/2025

🩻🦴🚑🏥🩺💊👨‍⚕️දනිස් බද්ධ කරන එක ප්‍රමාද කරන එක කොච්චර නැනවත්ද ? කොච්චර නැනවත්ද ?
===================================

🔶 දනිස් වල ආතරයිටිස් තියන රෝගීන් ඉතාම බහුලව ඉන්නවා.

🔶 මෙම රෝගීන්ගෙන් කොටසකට අනිවාර්යයෙන් දනිස් බද්ධ කිරීමකට යන්න වෙනවා.

🔶 බද්ධ නොකර ඉන්න තිබ්බ දනිස් පවා ඒ තත්වයකට යන්න ප්‍රධානම හේතු තමා වැරදි රෝග නිර්ණය, නිසි ප්‍රතිකාර නිසි කලට ලබා නොගැනීම, වැලදී ඇති ආතරයිටිස් රෝගයේ ස්වභාවය වැනි කාරණා

🔶 බහුතරයක් දැනුවත් නොවුනාට දනිස්සට එන්න පුලුවන් ආතරයිටිස් වර්ග තියනවා නිට්ටාවට සුව කරන්න පුලුවන්, සමහර රෝගීන් නිට්ටාවට සුව නොවුනට දනිස්ස ඇද නොවී බේර ගන්න පුලුවන්, සමහර රෝගී හන්ඳි කොහොමත් බද්ධ කරන්නම වෙන ගාණට ඇද වෙනවා.

⛔ ගොඩක් ලෙඩ්ඩු අමාරුවෙ වැටෙන්නෙ හැම ලෙඩාටම ඇවිල්ල තියෙන්නේ primary osteoarthritis කියල හිතාගෙන බෙහෙත් කරන සුදුසුකම් නොලත් පුද්ගලයන් නිසා.

🔶 දනිස්ස බද්ධ කරන ගාණට ඇද වුනහම කිසිම බෙහෙතක් බීල හෝ දනිස්සට දෙන කිසිම injection එකකින් දනිස්සෙ ගෙවිච්ච කාටිලේජ සම්පූර්ණව හදාගන්න බෑ.

🔶 දනිස්ස බද්ධ කරන්න යොමුවෙන්නෙ බොහෝ විට අවුරුදු හැට ඉක්මවා ගිය රෝගීන්. වයස ප්‍රධාන හේතුවක් වෙනවා දනිස්ස නොදා ප්‍රමාද කලහම එන ගැටලු වලට.

✅ දැන් බලමු දනිස්ස දාගන්න එක ප්‍රමාද කරගෙන යනකොට මොකද වෙන්නෙ කියල.

✅ බද්ධ කරන්න කියන්නෙ ඉතාම සැලකියයුතු ආකාරයට ගෙවී ගිය දනිස් සන්ධි.

✅ පලවෙනිම කාරණාව තමා සැත්කම එපා කිව්වට දනිස්ස තවත් ගෙවෙන එක නතර වෙන්නෙ නෑ.

🔺 අන්තිමට ඔත්පල වෙලා ඇඳට වැටෙනවා.

🔺 ජීවිතයේ අවසාන කාලයේ ඇදට වැටෙනවා කියන එක එම පුදගලයාට පමණක් නෙවේ, දරු මුණුපුරන්ට පවා බලපානවා.

🔺 මොකෝ වැසිකිලියට යන්න පවා වෙනත් කෙනෙක්ගේ උදව් ඕන වෙන තත්වයට ගියහම එක්කෝ ළඟම කෙනෙක්ට (බොහෝ විට දුව) රෝගියා බලාගන්න ගෙදර නතර වෙන්න වෙනවා (කර කර හිටපු රැකියාව අතඇරල පවා)

🔺 පවුලෙ ආර්ථිකයට කෙලින්ම ඕක බලපානවා

🔺 දෙවැන්න තමා ඇදවූ දනිස්සක් සමඟ ඇවිදගෙන යනකොට වැඩි වෙන බිම ඇද වැටීමේ අවදානම (Falls risk).

🔺 දනිස්ස බද්ධ කරන්න යොමුවෙන ලෙඩ්ඩුන්ගෙ වයසත් එක්ක එන අස්ථිවල හයිය අඩුවෙන osteoporosis රෝගය ඉතා බහුලව තියනවා.

🔺 බිම වැටුනොත් උකුල පවා කැඩෙන්න පවා පුලුවන්.

🔺 ඔබ නොදන්නවා වුනාට osteoporosis රෝගය නිසා උකුල කැඩෙන කාන්ථාවන්ගෙන් දල වශයෙන් තුන්දෙනෙක්ගෙන් එක් අයෙක් මාස 12ක් ඇතුලත මිය යනවා. සමහරු ජීවත් වෙලා සිටියත් සදාකාලිකව ඇඳට වැටෙනවා.

🔺 දනිස්ස බද්ධ කරගත් විට වැටෙන අවදානම අඩුවෙන නිසා උකුල, කොන්ඳ, අතේ අස්ථි කැඩෙන අවදානම අවම වෙනවා.

🔺 ඔය කාරණාව නිසා තමා දනිස්සේ සැලකියයුතු ලෙස ආතරයිටිස් තියන රෝගීන් අනිවාර්යයෙන් osteoporosis ලෙඩේ තියනවද කියල බලාගන්න ඕනේ

🔺 ඉහත සඳහන් කල ආකාරයකටම ලොකු සෞඛ්‍යය ගැටලුවක් සිදුනොවුනත් වයස යනකොට හැරමිටියක් හෝ වෝකර් එකක් නැතුව ඇවිදිගන්න පුලුවන් වෙන එක මානසිකව සහ ශාරීරිකව ඉතාම වැදගත් දෙයක්.

🔺 තමන්ගෙ දරු මුණුපුරන් සමඟ නිදහසේ විනෝද ගමනක් යන්න, එහෙම නැත්තම් පන්සලකට පල්ලිකට අනෙක් කෙනෙක්ගෙ උදව් නැතුව යාගන්න පුලුවන් කම තියෙන එක ඉතාම වැදගත්.

🔺 ඔබට වගකිවයුතු වැඩිහිටියෙක් නම් දනිස්සක් බද්ධ කරගන්න කිව්වොත් ඒකට ඔබට අවස්ථාව හම්බුවෙන මුල් අවස්ථාවෙම කරගන්න.

🔺 අරයට මෙයාට ඔපරේෂන් කරල එහෙම වුනා මෙහෙම වුනා, අරයට මෙයා කලා වගේ අරව ගාල මේව ගාල අඩුකරගන්නවා වගේ නිදහසේ කාරණ හොය හොය ඉන්න එපා.

🔺 අන්තිමට ඔබට දනිස්ස දැන් නම් දාගත්තනම් හොඳයි කියල හිතෙනකොට තවත් වයස ගිහින් මහලු වයසත් එක්ක එන වෙනත් සෞඛ්‍යය ගැටලු හින්ඳ සැත්කම කරගන්න බැරිවෙන්න පුලුවන්. නැත්තම් තමන්ගෙ නම පෙරැත්තු ලේකනයේ අවුරුදු ගාණකින් පිටිපස්සට ගිහිල්ල තියෙන්න පුලුවන්.

🔺 අන්තිමට කියන්න තියෙන්නේ ඔබ අමාරුවෙ වැටෙනකොට ඔබ විතරක් නෙවේ, ඔබට ආදරේ කරන හැමෝම අමාරුවෙ වැටෙන බව දැනගන්න.

✅ සිතන්න.......

Dr HEGK Dayaratna
සන්ධි කායික රෝග සහ රක්තවාතාත්මක ඇතුලු ආතරයිටිස් රෝග පිළිබද වෛද්‍ය
Special interest in Rheumatology
MBBS,MRCP (Rheumatology)(UK)

13/10/2025

🩻🦴🏥👨‍⚕️🚑🏥🩺Chikungunya (චිකුන්ගුන්යා); ඔබටත් මේ පාර වයිරස් උණ එක්ක හන්ඳි අමාරු ආවාද ?

⭕ මේ පනිවිඩය කිහිප වතාවක් මාධ්‍ය ඹස්සේ සෞඛ්‍ය අංශ දාල තියනවා. නැවතත් දාන්නේ විද්‍යාත්මක පදනමක් නැති ප්‍රතිකාර කරගන්න ගිහිල්ලා තරුණ අය පවා රෝදපුටුවල ප්‍රතිකාර ගන්න තත්වයකට පත්ව ඇති නිසා.

⭕ කාලෙන් කාලෙට වයිරස් උණ පැතිරෙන එක සාමාන්‍යය දෙයක්.

⭕ බොහෝ විට වයිරස් උණක් එක්ක කැස්ස, උණ, සෙම්ප්‍රතිශ්‍යාව, rash එකක් සහ හන්දිපත් සහ මස්පිඩු රුදාව එන එක සාමාන්‍ය දෙයක්.

⭕ නමුත් මේ පාර තත්වය පොඩ්ඩක් වෙනස්. උණ හොඳ වෙලා සති දෙක තුනකින් හන්ඳි කැක්කුම ඇවිල්ලා ඉඳිමීම ඇවිල්ලා ලෙඩුන් බහුලව එනවා.

⭕ ඒකට හේතුව වෙන්න ඕනේ මේ දවස් වල පැතිරෙනවා කියන චිකුන්ගුන්යා උණ. හැබැයි වෙනත් වයිරස් රෝග එක්කත් ආතරයිටිස් එන්න පුලුවන්

⭕ මේකෙ ලියල තියෙන්නේ ඔය චිකුන්ගුන්යා එක්ක එන ආතරයිටිස් ගැන.

⭕ චිකුන්ගුන්යා උණ හැදෙන්නේ එම වයිරස් එක බෝවෙච්ච මදුරුවන් හරහා.ඕකෙ එන රෝග ලක්ශණ සාමාන්‍යයෙන් වයිරස් උණක් වගේම වුණාට දැඩි උණ එක්ක දැඩි හන්ඳි සහ මස්පිඩු වේදනාව දකින්න පුලුවන්.

⭕ මෙම වයිරස් එක කෙලින්ම හන්ඳි (synovium) සහ මස්පිඩු වලට කෙලින්ම බෝ වෙනවා. Acute arthralgia (හන්ඳිපත් රුදාව) arthritis (හන්ඳි රුදාව සහ ඉදිමීම) එන්නෙ ඕක නිසා.

⭕ හැබැයි සැලකියයුතු රෝගීන් ප්‍රමාණයකට දින කිහිපයක් ඇතුලත ඔය තත්වය මග හැරෙනවා.

⭕ ලෙඩෙත් එක්කම එන ආතරයිටිස් (acute arthritis) එක සාමාන්‍යයෙන් හන්ඳි දෙක තුනකින් පටන් අරගෙන දින දෙක තුනකින් හන්ඳි ගොඩකට පැතිරෙනවා.

⭕ බහුතරයක් රෝගීන්ට අත, වලලුකර මැණික්කටුව වගේ හන්ඳි වලට වැඩිපුර ලෙඩේ එනවා. හන්ඳි වල වතුර පවා එන්න පුලුවන්.

⭕ ලෙඩේ හොඳවෙනකොට සැලකියයුතු රෝගීන් ප්‍රමාණයකට හන්ඳි අමාරුවත් හොඳ වෙනවා.

⭕ චිකුන්ගුන්යා හැදෙන රෝගීන්ගෙන් සැලකියයුතු ප්‍රමාණයකට දිගුකාලින ආතරයිටිස් රෝගයක් (chronic inflammatory arthritis) එන්න පුලුවන්.

⭕ මේකට හේතුව 100%ක් හොයාගෙන නෑ. නමුත් ඇඟ ඇතුලෙ ලෙඩේ හොඳ වුනාට ඉතුරුවෙන්න පුලුවන් වයිරසයේ RNA කොටස් වලින් ආතරයිටිස් ක්‍රියාවලිය ඇතිකරනවා හෝ molecular mimicry ලෙස හැඳින්වෙන වයිරසයට විරුද්ධව හදපු ප්‍රතිදේහ හන්ඳි වලට සංඝටක වැරදියට හදුනාගෙන ඒක විනාශ කරනවා යැයි සැක කරනවා.

⭕ සමහරුන්ට ආතරයිටිස් එක එනවා යනවා වගේ තත්වයක් එනවා. සමහරුන්ට දිගටම ලෙඩේ ඇඟේ තියනවා.

⭕ අනික් කාරනව තමා දැනටම දිගුකාලීන ආතරයිටිස් තියන රෝගීන්ට එම රෝගය හොඳටම වැඩි වෙන්න පුලුවන් චිකුන්ගුන්යා හින්ඳ

⭕ චිකුන්ගුන්යා එක්ක එන දිගුකාලින ආතරයිටිස් රූමටොයිඩ් ආතරයිටිස් රෝගයට සමාන රෝග ලක්ශණ පෙන්නුම් කරනවා.

⭕ මේකට ප්‍රතිකාර කරන එක පහසුයි. දිගුකාලින ආතරයිටිස් රෝග වලට දෙන බෙහෙත් මාස කිහිපයකට පවා පාවිච්චි කරන්න වෙනවා.

⭕ හැබැයි Acute arthritis එකට බෙහෙත් කරන ක්‍රමයට නෙවෙයි chronic arthritis එකට බෙහෙත් කරන්නේ.

⭕ හන්ඳි ඇදවෙනකම් ලෝකෙ තියන ඔක්කොම ටෙස්ට් කර කර ඉන්නෙ නෑ. කොහොමත් මේකට එන ආතරයිටිස් එකට Rheumatoid factor, anti CCP antibodies වගේ ආතරයිටිස් ටෙස්ට් positive වෙන්නෙත් නෑ.

⭕ Individual patient centered management එකක්, එහෙමත් නැත්තම් ලෙඩාටම හරියන බෙහෙත් එකතුවක් තමා දෙන්නේ.

⭕ හරියට ප්‍රතිකාර කලොත් හතර හන්ඳි ඇදකරගන්නෙ නැතුව ගොඩ යන්න පුලුවන්

⭕ ළඟදිම ඔය ලෙඩේටම කියල අලුතෙන්ම හදපු තෙලක් කවුරුහරි එලියට දැම්මොත් පුදුම වෙන්න එපා 😁. ඒවා ගාන ගමන් හරි නිසි ප්‍රතිකාර ගන්න.

Dr එච් ඊ ඡී කේ දයාරත්න
සන්ධි සහ සන්ධි ආශ්‍රිත රෝග වෛද්‍ය
MBBS,MRCP (RHEUMATOLOGY)(UK)

13/10/2025

https://www.facebook.com/share/1H3Y4PBRYB/?mibextid=wwXIfr

Wherever the Art of medicine is Loved ,There is Also a Love of Humanity

25/09/2025

⭕නිසි කලට ප්‍රතිකාර නොකලහම විනාශ වෙන හන්ඳි සහ ජීවිත.

⭕මැනික්කටුව කියන්නේ මිනිස් සිරුරේ තියන වැදගත්ම හන්ඳියක්.

⭕අතේ ඇඟිලි වල චලන පරාසයෙන් නිසි ප්‍රයෝජනයක් ගන්න ඕනේ නම් මැනික්කටුව හොඳටම වැඩ කරන්න ඕනේ.

⭕මැනික්කටුව කියන්නේ අස්ථි දහයක සහ සන්ධි කිහිපයක එකතුවක්. උඩ බාහුවේ සිට අත්ලට යන ස්නායු මස්පිඩු ගමන් කරන්නේ මැණික් කටුව හරහා.

⭕උඩ බාහුවේ ප්‍රධාන අස්ථි දෙක වෙන Radius සහ Ulna කියන අස්ථි දෙක සහ Scaphoid, Lunate, Triquetrum, Pisiform, Trapezium, Trapezoid, Capitate, Hamate කියන කුඩා අස්ථි අට ඔය සන්ධියට අයිතියි.

⭕ඔය සංකූල පිහිටීම නිසා මැණික්කටටු පස් ආකාරයට චලනය කරන්න පුලුවන්. ඒවා තමා පහල ඔය තියෙන්නේ.

✅Extension - 70-90°
✅Flexion - 80-90°
✅Radial deviation - 15-20°
✅Ulnar deviation - 30-45°
✅Circumduction - 360°

⭕කොටින්ම කියනව නම් මැනික්කටුව ඕන විදිහකට චලනය කරන්න පුලුවන්.

⭕අතේ ක්‍රියාකාරිත්වයට ඔය චලන පරාස ඉතාම වැදගත්. හැබැයි මොනයම් ආකාරයක හෝ ඔය සන්ධියේ ගැටලු ආවොත් වෙන දේ තමා ඔය චලන පරාසය අඩුවෙන එක.

⭕මැනික්කටුව සන්ධියේ Rheumatoid arthritis, psoriatic arthritis වගේ දරුණු ආතරයිටිස් එන්න පුලුවන්.

⭕මැනික්කටුවෙ ආතරයිටිස් එකක් ආවහම වෙන්නේ මැනික්කටුවේ වේදනාව සහ ඉදිමීම. මුලින්ම එන්නේ synovitis කියන තත්වය. ඒක නිසා හන්ඳියේ වතුර එන්න පුලුවන්.

⭕මැනික්කටුවෙ ආතරයිටිස් එනකොට සාමාන්‍යයයෙන් වෙන හන්ඳි එක්ක තමා එන්නේ. එහෙම නැතුව මැනික්කටුවෙ විතරක්ම වුනත් ආතරයිටිස් එන්න පුලුවන්.

⭕නිසි දැනුමක් තියන හන්ඳි රෝග විශේෂඳයෙක් inflammatory polyarthritis එකක් (රූමටොයිඩ් ආතරයිටිස්, psoriatic arthritis, peripheral spondyloarthritis වගේ) තියන රෝගියෙක් බලනකොට අනිවාර්යයෙන් බලන්න ඕනේ හන්ඳියක් තමා මැනික්කටුව. අනික්වා තමා වලලුකර සහ වැලමිට.

⭕ඒකට හේතුව තමා ඔය හන්ඳි වල ආතරයිටිස් එකට නිසි කලට නිසි ප්‍රතිකාර දෙන්නෙ නැතිනම් හන්ඳියට වෙන හානිය නිසා හන්ඳියේ චලන පරාසය සෑහෙන සීමා වෙනවා. අනික ඔය හන්ඳි බද්ධ කරන පහසුකම් ලංකාවේ නැහැ.

⭕ඔය ඉහත A කියන X ray එක අවුරුදු 30 ක විතර කාන්ථාවකගේ. අවුරුදු ගාණක් එක එක දේවල් උල උල ඉඳල. දැන් අතේ දැඩි වේදනවක් තියනවා වගේම මැනික්කටුව නිකම්ම ගල් වෙලා වගේ තියෙන්නේ.

⭕ඕකට කියන්නේ wrist ankylosis කියල. ඔය තත්වෙට මැනික්කටුව නරක් වුනහම නම් එදිනෙදා කාර්‍ය්යන් පවා ඉතාම අපහසුවෙනවා. ඔය හන්ඳියට කොතරම් ප්‍රතිකාර කලත් යතාතත්වයට ගන්න බෑ.

⭕අනික් පැත්තෙ තියන B කියන x ray එක ආතරයිටිස් නැති කෙනෙක්ගේ. නෝමල් X ray එකේ මැනික්කටටුවෙ අස්ථි පැහැදිලව දකින්න පුලුවන්. ඒ කියන්නේ හන්ඳිය මනා විදිහට හසුරුවන්න පුලුවන්.

⭕මොනව හරි ගාලා හන්ඳියක කැක්කුම අඩුවෙනව කියන්නේ ආතරයිටිස් හොඳ වෙනව කියන එක නෙවේ. ඔය වගේ හන්ඳිවලට DMARDs කියන කුලකයේ බෙහෙත් දෙන්න ඕනේ. නිවැරදි ප්‍රතිකාර ගත්තොත් ඔහොම වෙන්නෙ නෑ.

(X ray ලෙඩා ගෙන් අවසර අරගෙන දැම්මෙ)

⭕Dr HEGK DAyaratna
සන්ඳි සහ සන්ඳි ආශ්‍රිත රෝග සම්බන්ධ වෙද්‍යය

MBBS(SL) MRCP speciality Rheumatology)

19/09/2025

⭕💪🙆‍♂️ආතරයිටිස් වලට කන්න සුදුසු කෑම මොනවාද?
========================================

⭕මේක ඉතාම බහුලවම රෝගීන් අහන ප්‍රශ්නයක්.

⭕එහෙම මේ කෑම වර්ග අනිවාර්යයෙන් කන්න එපා හෝ අනිවාර්යයෙන් සීමා කරන්න කියන එකම ආතරයිටිස් රෝගයයි තියෙන්නේ.

⭕ඒකට කියන්නේ Gout කියලා (ලෙඩේ ගැන විස්තරේ පලවෙනි කමෙන්ට් එකේ).

⭕Gout තියන අයට purine වැඩිපුර අඩංගු red meat (හරක් මස්, එලු මස්, ඌරු මස්), sea food (කකුලුවෝ, දැල්ලෝ), සමහර එලවලු (මශ්රූම්, නිවිති) වගේ ආහාර "වැඩිපුර කන" එක සුදුසු නෑ. මොකෝ එම කෑම වලින් gouty ආතරයිටිස් රෝගය වැඩි කරනවා.

⭕Gout රෝගීන් ඊට අමතරව විශේෂයෙන්ම බියර් ඇතුලු මත්පැන් පාවිච්චිය අවම කරන්න ඕනේ.

⭕අනෙක් වර්ග වල ආතරයිටිස් තියන රෝගීන්ට අර දියවැඩියාවට තියනවා වගේ වෙනමම විශේෂිත ආහාර වේලක් නැහැ.

⭕Internet එකේ තියන බොරු වලට සහ බොරු සමාජගත කරන සුදුසුකම් නොලත් ශෝශල් මීඩියාකාරයින්ට අහුවෙන්න එපා.

⭕විද්‍යාත්මකව ඔප්පු කරල තියන දේවල් මම පහත ලියාගෙන යන්නම්.

⭕සියලුම ආතරයිටිස් රෝගීන් කරන්න ඕනේ වැදගත්ම දේ තමා BMI එක හොඳම අගයේ තියා ගන්න එක. දකුණු ආසියාතික රටවල එම අගය 18.5-23 km/m2 අතර.

⭕ස්ථුලතාවය සහ ආතරයිටිස් ගැන ලියපු ලිපිය දෙවනි කමෙන්ට් එකේ තියනවා. කියවලා බලන්න.

⭕රූමටොයිඩ් සහ ඒ වගේ inflammatory ආතරයිටිස් රෝගීන්ට පපුවේ අමාරු හැදෙන අවදානම වැඩි නිසා saturated fat ප්‍රමාණය අඩු කරගෙන unsaturated fat ප්‍රමාණය වැඩිකර ගන්න එක සුදුසුයි.

⭕සාඩින්, මැකරල්, සැමන්, බල මාලු වගේ unsaturated fish oil වැඩි කෑමත් රෝගීන්ට සුදුසුයි.

⭕Calcium, Vitamin D සහ යකඩ අඩංගු ආහාර වැඩි කරගැනීම උදව් වෙන්න පුලුවන්.

⭕ඒ වගේම බහුලව ලුණු අධික ආහාර පරිභෝජනය නිසා ප්‍රතිශක්ති පද්ධතියේ එන වෙනස්කම් නිසා ආතරයිටිස් වලට බලපෑම් එන්න පුලුවන්.

⭕Supplement එකක් එහෙම නැතිනම් ආහාර අතිරේකයක් ගන්නවා නම් ගන්න ඕනේ fish oil එකක් සහ vitamin D එකක්.

⭕හැබැයි ආහාර අතිරේකය සහ තමාට දෙන DMARDs ප්‍රතිකාරය (ලෙඩේ හොඳ කරන හෝ control කරන බෙහෙත) දෙකම ගන්න මුදල් "නැතිනම්" ගන්න ඕනේ DMARDs බෙහෙත / බෙහෙත් මිසක් ආහාර අතිරේකය නෙවේ.

⭕සමහර වෙලාවට ආහාර අතිරේකය DMARDs බෙහෙතට වඩා මිල අධික නිසා රෝගීන් හිතනවා ආහාර අතිරේකය තමා ලෙඩේට බෙහෙත කියලා.

⭕සරලව කියනවානම් කෑම සහ ආතරයිටිස් වලදි, අංක එක තමා නිසි වයිද්‍යවරයෙකුගෙන් නිසි ප්‍රතිකාර ලබාගන්න එක.

⭕දෙවැන්න තමා ඇඟේ බර සුදුසු අගයක තියාගන්න එක.

⭕තුන්වැන්න තමා Calcium, Vitamin D, යකඩ ආහාර වලට අමතරව ලබාගන්න එක.

⭕හතරවැන්න තමා පුලුවන් ආකාරයට ඉහත කී සංඝටක නිස් පරිදි වෙනස් වෙන විදිහට ආහාර රටාවේ ගුණාත්මක බව වෙනස් කරගන්න එක. (Mediterranean style diet එකක්)

⭕කෑමෙන් විතරක් පාලනය කරන්න හෝ හොඳකරන්න පුලුවන් ආතරයිටිස් රෝග නැහැ.

⭕යම්කිසි කෑමකට හෝ ආහාර අතිරේකයකට ආතරයිටිස් රෝග ලක්ශණ අඩුවෙනවා කියන්නේ ලෙඩේ හොඳවෙනවා කියන එක නෙවේ. ඒකට ප්‍රතිකාර වෙනම ගන්න ඕනේ.

⭕සීතල කෑම, උෂ්ණ කෑම කථාව හරිම සරලයි. සීතල හෝ උෂ්ණ හෝ වේවා යම් කෑමකට ආතරයිටිස් එක වැඩි වෙනවා කියල තේරෙනවා නම් ඒ කෑම වර්ගය පාවිච්චිය නතර කරන්න.

⭕ඒක උඩහ ගෙදර සුමනාවතීට පල්ලෙහා ගෙදර කරුණාවතීට කියන්න ඕනෙ නෑ. මොකෝ ඔයා කියන දේ අඩු කල්පනාව තියන කෙනෙක් වැරදියට තේරුම් අරගෙන එයාට ඇඟට අවශ්‍යයම කෑම වර්ගයක් එයා නොකා ඉන්න පුලුවන්.

⭕දැන් මේක කියවලා කෑම වෙනස් කරන්න කියලා ගෙදර ඉන්න අනික් මිනිස්සු බඩගින්නෙ තියන්න එපා. කෑම හදාගන්න කලින් නිසි ලෙස ප්‍රතිකාර ගන්න යොමුවෙන්න.

⭕Dr එච් ඊ ඡී කේ දයාරත්න
සන්ධි සහ සන්ධි ආශ්‍රිත රෝග වෛද්‍ය
MBBS, MRCP (Rheumatology)

12/09/2025

❇️ Scoliosis

Lateral curvature of the spine >10°, often with vertebral rotation.

Etiology
✔️ Idiopathic (most common) – Especially in adolescents (F > M)
✔️ Congenital – Vertebral anomalies (e.g., hemivertebra)
✔️ Neuromuscular – Cerebral palsy, muscular dystrophy
✔️ Syndromic – Marfan syndrome, neurofibromatosis

Clinical Features
✔️ Asymmetry in shoulder or hip height
✔️ Rib hump on forward bend test (Adam’s test)
✔️ Usually painless
✔️ Severe cases → Restrictive lung disease

Diagnosis
✔️ Standing spinal X-ray
✔️ Cobb angle measurement (≥10° diagnostic)

Management
✔️ 40–50°: Surgical correction (spinal fusion)

❇️ Kyphosis

Excessive forward curvature of thoracic spine (>40–45°)

Etiology
✔️ Postural kyphosis – Common, flexible, correctable
✔️ Scheuermann disease – Juvenile structural kyphosis (wedge-shaped vertebrae)
✔️ Osteoporotic compression fractures – Elderly
✔️ Congenital or traumatic causes

Clinical Features
✔️ Hunchback appearance
✔️ Back pain (variable)
✔️ Decreased height in elderly
✔️ Severe kyphosis → Restrictive lung pattern

Diagnosis
✔️ Lateral spinal X-ray – Measures kyphotic angle
✔️ MRI – If neurologic symptoms or atypical presentation

Management
✔️ Postural – Physical therapy
✔️ Scheuermann’s – Bracing, surgery if severe
✔️ Osteoporotic – Bisphosphonates, vertebroplasty for fractures

26/08/2025

⭕දකුණු දනිස්සට එක ආතරයිටිස් එකක්, වම් දනිස්සට වෙන ආතරයිටිස් එකක් - එහෙමත් වෙන්න පුලුවන්ද ?
==========================

⭕දනිස් කැක්කුමක් එක්ක ඕන වයසක ලෙඩෙක් ආවොත් ඕන රෝගියායෙක්ට ඇහෙන කතාව තමා කාටිලේජ ගෙවෙන්න ඇවිල්ලා, කැල්සියම් බැඳිලා, මැරබෝන් ගෙවිලා වගේ වැල් බයිලා.

⭕සමහරු, විශේෂයෙන්ම හොර වෙද්දු ඔය කෙබර ඇදබාන්නෙ X ray එකක් හෝ ලේ රිපෝට් එකක් වත් නොකර. ඇත්තටම ඒ ගොල්ලන්ට ඒවා බලන්න තේරෙන්නෙත් නැහැනෙ.

⭕ඔය අවුරුදු 55ක විතර කාන්ථාවක්ගේ X ray එකක් සහ ලේ රිපෝට් කීපයක්. ලෙඩා පලවෙනි වතාවට තමා MBBS doctor කෙනෙක් හම්බුවෙලා තිබ්බේ. ඒ වයිද්‍යවරයා තමා ඔය රෝගියා මට යොමුකලේ.

⭕මේ ලෙඩාට දකුණු දනිස්සට ඇවිල්ලා තියෙන්නේ Rheumatoid Arthritis කියන එක. Rheumatoid arthritis එක නිසා හන්ඳිය ගෙවෙනකොට දනිස්සේ එලිය පැත්ත සහ ඇතුල්පැත්ත දෙකම දලවශයෙන් සමානව ගෙවෙනවා (X ray එක බලන්න, R කියල දාල තියෙන්නේ දකුණ කියන එක)

✅ලෙඩේ සැරටම ආපු නිසා තමා අර ලේ රිපෝර්ට් තුනේම ආතරයිටිස් එක පෙන්නන්නේ.

✅වැදගත් දේ තමා ඔය රෝගියාට මුලින්ම කැක්කුම ඇවිල්ලා තියෙන්නේ ඔය දරුණුවට ගෙවිල තියන දකුණු දනිස්සේ නෙවේ, අනෙක් කකුලේ.

✅මැරොබෝන් ගෙවිලා කියලා මැරබෝන් පැලවෙනකම් උලලා තිබ්බා ලෝකෙ නැති දේවල් දනිස් දෙකටම (මැරොබෝන් කියල එකක් නම් දන්නෙ නෑ, බෝන් මැරෝ කියන එකේ නම් ලේ හැදෙනවා). මොනව ගෑවත් කවදාවත් රෝගය අඩුවෙන්නේ නෑ. මොකෝ rheumatoid arthritis ලෙඩේ හොඳකරගන්න නම් අනිවාර්යයෙන් DMARDs කියන බෙහෙත් ගන්න ඕනේ.

✅එහෙම නිසි කලට නිසි ප්‍රතිකාරෙ ගත්ත නම් කවදාවත් ඔය දනිස්ස ඔහොම ගෙවෙන්නේ නෑ.

⭕වම් පැත්තේ දනිස්සට ඇවිල්ලා තියෙන්නේ osteoarthritis කියන එක. ඒ රෝගයේදී තමා හන්ඳියේ ඇතුලු පැත්ත ගෙවෙන්නේ. හිමීට දශක ගානක් තිස්සේ ලෙඩේ යනවා. මේක නිට්ටාවට සුව කරන්න පුලුවන් දනිස් බද්ධ කරල විතරක් වුනාට හැමෝටම එහෙම කරන්න වෙන්නෙ නෑ.

✅සමහර අයට දනිස් බද්ද කරන්න වෙනවා. සමහර අයට බොන බෙහෙත් විතරක් සහ ඉන්ජෙක්ශන් ඇති. වම් දනිස්සට අර කලින් කියපු DMARDs කියන ප්‍රතිකාර හරියන්නේ නෑ.

⭕මොනව කලත් දැන් ලෙඩා අමාරුවෙ වැටිලා. දනිස්සක් රජයේ රෝහලක බද්ධ කරන්න වසර ගාණක් පෝලිමේ ඉන්න වෙනවා. කොහොමත් දිගට ප්‍රතිකාර ගන්න වෙනවා.

⭕පණිවිඩේ තමා හැමදාම කියන එක. ලෙඩ වලට බෙහෙත් ගන්න ඕනේ දොස්තරලගෙන මිසක් හොර දොස්තරලගෙන් නෙවේ. ඇඟේ අවයව සවුත්තු වුනහම ගොඩ යනවා කියන එක ඉතින් ලොකු යුද්ධයක්.

⭕Dr HEGK Dayaratna
සන්ඳි කායික රෝග සහ සන්ඳි ආශ්‍රිත රෝග ආතරයිටිස් රක්තවාත සම්බන්ධ වෛද්‍ය
MBBS,MRCP SE (Rheumatology)

18/08/2025

⭕ කොන්ඳෙ කැක්කුම තරුණ කාන්ථාවන් අතර ඉතා බහුලයි.

⭕ කොන්ඳ කැක්කුම ගැන සවිස්තරාත්මකව ලියපු පෝස්ට් එකක් පලවෙනි ලින්ක් එකේ තියෙන්නෙ.

⭕ ඔය පහල තියන X ray එක අවුරුදු විස්සක් වයස ගැගැණු කෙනෙක්ගේ sacroiliac joint එකේ X ray එකක්.

⭕ රෝගියා කිව්වෙ අවුරුදු දෙකක විතර ඉඳන් මට කොන්ඳෙ කැක්කුම තියනවා. උදේට නැගිටිනකොට වැඩියි. මාරුවෙන් මාරුවට තට්ටම් පවා රිදෙනවා කියලා.

⭕ කැක්කුම එක තැන වාඩි වෙලා හිටියොත් වැඩියි. ආයෙ රෑටත් කැක්කුම වැඩි වෙනවා කියලත් රෝගියා සඳහන් කලා.

⭕ රෝගියා තෙල් බෙහෙත් සාත්තු වලට හරි ගියෙ නැති නිසා කොන්ඳෙ කාටිලේජ ප්‍රශ්නයක් කියල හිතාගෙන physiotherapist කෙනෙක් හම්බුවෙන්න ගියහම එතුමා පොඩි exercise ටිකක් කියල දීල සායනයට එවල තිබ්බා ලෙඩේ හරියටම මොකක්ද කියල ලියාගෙන එන්න කියල.

⭕ ඔය රෝගියාගේ උකුලේ sacroiliac joints දෙකේ x ray එකක්. නුපුරුදු ඇහකට ඕක නෝමල් වගෙ පෙනුනට ඔය හන්ඳි දෙකේ Spondyloarthritis කියල හැඳින්වෙන ආතරයිටිස් රෝගයේ ලක්ශණ සැලකියයුතු ලෙස පේන්න තියනවා.

⭕ පසුව ඒක තහවුරු කරන්න කරපු MRI පරීක්ෂණ වාර්ථාව ඒක සනාථ කලා.

⭕ මෙම රෝග තත්වයට biologics කියල හැඳින්වෙන ආතරයිටිස් බෙහෙත් වලට කලින්ම රෝගියාව යොමුකරන්න වෙනවා.

⭕ ප්‍රතිකාර නැතිව හිටියොත් රෝගය නිසා කාලයත් එක්ක කොන්ඳ පොල්ගහක් වගේ කෙලින් වෙලා, බෙල්ලෙන් ඉහල කොටස බිමට නැවෙනවාට අමතරව පෙනහලු, හදවත, ඇස් වගේ අවයව වල සංකුලතා ඇති කරන්න පුලුවන්.

⭕ හැබැයි සාමාන්‍යයෙන් ආතරයිටිස් බලන්න කියල කරන ESR, CRP රිපෝර්ට් දෙක ඔය රෝගියාගේ හැමදාම නෝමල්.

⭕ Rheumatoid factor, ANA වගේ ටෙස්ට් කොහොමත් මෙම රෝගයේදී පොසිටිව් වෙන්නෙ නෑ.

⭕ පණිවිඩේ තමා හැම ආතරයිටිස් ලෙඩක්ම ලේ වල පෙන්නන්නෙ නෑ. නිශ්චිත ප්‍රථිකාර වලට නොපමාව යොමුවෙන්න.

⭕ ලෙඩාගේ රෝගය හොයා ගත්තේ physiotherapist මහතා කල්පනාවෙන් හිටපු හින්ඳා බව විශේෂයෙන් කියන්න ඕනේ.

Dr ගයාන් දයාරත්න
රක්තවාත සහ සන්ධි ආශ්‍රිත රෝග වෛද්‍ය
MBBS, MRCP SPECIALITY IN (RHEUMATOLOGY)
(UK)

18/08/2025

පිළිකාව කියන වචනෙටත් අපි බයයි. ඒත්, මුල් අවස්ථාවේදී හඳුනාගැනීමෙන් ජීවිත බේරා ගන්න පුලුවන්.
මෙම ලිපියෙන් අපි පිළිකාවේ පොදු මූලික ලක්ෂණ කිහිපයක් කතා කරලා තියෙනවා. මේ රෝග ලක්ෂණ ගැන දැනුවත් වීම සහ වහාම වෛද්‍ය උපදෙස් ලබා ගැනීම වැදගත් වෙනවා.

පිළිකාවක් කියන්නේ මොකක්ද?

ශරීරයේ අසාමාන්‍ය සෛල පාලනයකින් තොරව වර්ධනය වෙලා පිළිකා හැදෙනවා. මේ පිළිකා අපේ ඇගේ සාමාන්‍ය ක්‍රියාකාරිත්වයට බාධා කරනවා. පිළිකාවක් ඇඟේ එක තැනකින් තවත් තැනකට පැතිරෙන්න පුලුවන්.

⚠️ ඔයා මේ රෝග ලකෂණ ගැන අවධානයෙන් ඉන්න.

🔴 හේතුවක් නැතුව ඇඟේ බර අඩු වෙනව නම් ඒ පිළිකාවක ලකුණක් වෙන්න පුලුවන් (ආහාර පාලනයකින් හෝ ව්‍යායාම කරන්නේ නැතුව ඔයාගේ බර කිලෝග්‍රෑම් 5 කට වඩා අඩු උනොත්, වෛද්‍යවරයෙකු හමුවන්න.)

🔴 ගැටිති හෝ ඉදිමීම්
පියයුරුවල, කිහිල්ලේ හෝ ශරීරයේ ඕනෑම තැනක තියෙන ගැටිත්තක් පිළිකාවක් වෙන්න පුලුවන්.

🔴 අසාමාන්‍ය ලේ ගැලීම
මලපහ එක්ක, මුත්‍රා එක්ක, කැස්සත් එක්ක, යෝනි මාර්ගයෙන් අසාමාන්‍ය විදියට වෙන ලේ ගැලීමක් පිලිකාවක ලක්ෂණයක් වෙන්න පුලුවන්.

🔴 සමේ වෙනස්කම්
සමේ තියෙන ලප සහ ඒවායේ වෙනස්කම්, හොඳ වෙන්නේ නැති තුවාල සමේ පිලිකා වල අනතුරු ඇඟවීමේ ලකුණක් වෙන්න පුළුවන්.

🔴 දීර්ඝකාලීන පවතින කැස්ස ගොඩක්ම ඔයා දුම් පානය කරන කෙනෙක් නම්, ඒක පෙනහළු පිළිකාවක ලකුණක් වෙන්න පුලුවන්.

🔴 කටහඩේ ගොරෝසු බව උගුරේ පිළිකාවක් වෙන්න පුලුවන්.

🔴 මලපහ කිරීමේ වෙනස්කම්
මලබද්ධය හෝ බුරුලට යාම, හෝ මළපහ වර්ණය වෙනස්වීම් බඩවැල් ව පිළිකාවක් වෙන්න පුලුවන්.

🔴 මුත්‍ර පිට කිරීමේ වෙනස්කම්
නිතර හෝ වේදනාකාරී මුත්‍රා කිරීම මුත්‍රාශයේ පිළිකාවක් වෙන්න පුලුවන්.

🔴 ගිලීමේ අපහසුතා
කෑම ගිලිනකොට හිර වෙනවා වගේ දැනෙනවනම් උගුරේ හෝ ගලනාලයේ පිළිකාවක ලක්ෂණයක් වෙන්න පුලුවන්.

🔴 පැහැදිලි කළ නොහැකි වේදනාව
නොකඩවා පවතින හිසරදය, දීර්ඝ කාලීනව තියෙන කොන්දේ වේදනාව හෝ බඩේ වේදනාවන් පිළිකාවක මුල් ලකුණක් වෙන්න පුලුවන්.

ඉහලින් තියෙන හැම රෝග ලක්ෂණයක්ම පිලිකාවක් වෙන්නේ නෑ. පිළිකා නොවන හේතුවක් හින්ද එන්න පුලුවන්. හොදම දේ රෝග ලක්ෂණ තියෙනවනම් වෛද්‍ය වරයෙකු හමු වීමයි.

❤ඔයා මොනවද කරන්න ඕනේ?

✔️රෝග ලක්ෂණ නොසලකා හරින්න එපා. සති කිහිපයකට වඩා පවතින මෙම රෝග ලක්ෂණ තියෙනව නම් ළගම රජයේ රෝහලේ වෛද්‍යවරයෙකු හමුවන්න.

✔️සෞඛ්‍ය පරීක්ෂාවන් වලින් (මැමෝග්‍රෑම්, පැප් ස්මියර් හෝ කොලොනොස්කොපි වැනි) පිළිකාව මුල් අවධියේ දීම හඳුනාගන්න පුලුවන්.

✔️ඔයාගේ පවුලේ පිලිකා පිලිබද ඉතිහාසය දැනගන්න. ඔබගේ පවුලේ ළගම ඥාතියෙකුට පිලිකාවක් තිබුනේ නම් ඔයාට පිලිකා ඇතිවීමේ අවදානමක් තියෙනවා.

වෛද්‍ය ගයාන් දයාරත්න



🗣ඔයාට මේ ගැන ප්‍රශ්න තියෙනවද? Comment එකකින් අහන්න. පුලුවන් විදියට reply කරන්නම්.

📢 සමාජය දැනුවත් කිරීම යුතුකමක් කියලා මම හිතන නිසා කාර්ය බහුල උනත් මේ වගේ දෙයක් ලියන්න වෙලාව වෙන් කරගන්නවා. මට පුලුවන් ලියලා දාන්න විතරයි.. මේ ලිපිය තව අයට දකින්න share කරන්න. කාටමහරි වැදගත් වේවි.

වෛද්‍ය ගයාන් දයාරත්න
MBBS MRCP speciality in Rheumatology (UK)

🗣Share කරන්න. Copy paste කරන්න එපා. දහසක් වැඩ අස්සේ මේවා ලියන්නේ. කාරුණික ඉල්ලීමක්.😍

,

31/07/2025

ඔයාලා ප්‍රෙශර් වලට බයවෙන්න ඕන හේතු පහක් කියන්නද ???

අංක එක

Silent හැබැයි Dangerous
- ප්‍රෙශර් කියන්නේ මුල් අවදියේදි එහෙම ලොකුවට කැක්කුමක් වේදනාවක් එන ලෙඩක් නෙවෙයි.
- සමහරවිට අහම්බෙන් ප්‍රෙශර් බලනකල්ම් කෙනෙක්ට ප්‍රෙශර් තියෙනවා කියලා නොදැන ඉන්නත් පුලුවන්
- හැබැයි ඇග ඇතුලේ වැඩේ ගානට යනවා.කෙලවෙනකල් දන්නේම නෑ..

අංක දෙක

ප්‍රෙශර් එක ඔයාගේ හදවත ලෙඩ කරනවා
- අපේ රුධිර නාල වල ප්‍රෙශර් වැඩි කිය්න්නේ හාට් එකට වැඩියෙන් වැඩ කරන්න වෙනවා.
- එතකොට ලේසියෙන්ම හාට් ඇටෑක් එන්න පුලුවන්.
- හදවත දුර්වල වෙලා හාට් ෆේලියර් තත්වයක් එන්න පුලුවන්

අංක තුන

පෙශ්‍රර් එක නිසා ඔයාට අංශභාගය එන්න පුලුවන්
- මොළයේ නහරයක් පිපිරිලා වගේම මොළයේ රුධිර නාල වල රුධිර කැටියක් සිරවීමෙනුත් අංශභාග තත්ව ඇතිවෙන්න අධි රුධිර පීඩනය හේතුවක් වෙනවා

හතර

දන්නවද ප්‍රෙශර් වලට ඔයාගේ ඇස් අන්ධ කරන්නත් පුලුවන්..

- ඇස් වල තියන පුංචි පුංචි රුධිර නාල වලට හානි වුනාම ඔයාලගේ ඇස් වල පෙනීම ටිකෙන් ටික අඩුකරලා නැතිම කරලා දාන්න ප්‍රෙශර් වලට පුලුවන්

අංක පහ

වකුගඩු දෙකටත් හානි කරන්න ප්‍රෙශර් වලට පුලුවන්...

- කාලයක් යනකොට වකුගඩු දුර්වල වෙලා ඒවගෙන් කරන වැඩ ටික කරගන්න බැරුව යනවා..

ඉතින් කලින් කිව්වා වගේ ප්‍රෙශර් කියන්නේ මුලදි මුලින් ලොකුවට අමාරු දෙන ලෙඩක් නෙවෙයි.

ඒ නිසා ගොඩක් අය ප්‍රෙශර් වලට බෙහෙත් ගන්න උවමනාවක් කරන්නේ නෑ.

හැබැයි මම කලින් කිව්වා වගේ හිමින් හිමින් අපේ අවයව වලට කරන්න පුලුවන් උපරිම හානියත් කරලා තමයි නවතින්නේ..
Dr Gayan Dayaratna