27/10/2025
Woch vun der Demokratie !
🗓️ 27 - 31 Oktober
Mäi Message un déi Jonk – Demokratie, dat sidd och Dir.
Et gëtt oft gesot, dass Dir d’Zukunft vum Land sidd. An dat stëmmt – mee net nëmmen. Dir sidd haut schonn en onersetzbare Bestanddeel vun eiser Gesellschaft.
Dir engagéiert Iech, Dir hutt eng Meenung, stellt Froen, denkt no, sidd net mat allem averstanen – a genee dat ass wichteg. Dir hëlleft eis, d’Welt, an där mir zesumme liewen, besser ze verstoen a virunzebréngen. Alles dat si wichteg Fundamenter fir eng lieweg a gesond Demokratie.
Wa mir wëllen, dass eis Demokratie och an Zukunft staark bleift, da musse mir Iech stäerken. Kanner a Jonker mat engem kritesche Geescht, mat Courage an Engagement, sinn d'Schlësselfigure vun enger gerechter Zukunft.
Dobäi spillt Bildung eng entscheedend Roll – net nëmmen, fir Wëssen ze vermëttelen, mee och, fir wichteg Wäerter ze stäerken: Toleranz, Solidaritéit a géigesäitege Respekt.
Et geet drëm, Iech ze stäerken, fir dass Dir léiert, Iech eng eege Meenung ze bilden, aner Meenungen ze respektéieren an zesummen no Léisungen ze sichen. Demokratie lieft vun der Participatioun am Alldag – ob an der Schoul, doheem oder an der Fräizäit.
Dofir ass et esou wichteg, dass mir d’Woch vun der Demokratie zesumme feieren. Si steet ganz am Zeeche vun Iech – de Kanner a Jonken – an Ärem Recht op Matbestëmmung. Am ganze Land fannen dës Woch vill verschidden Aktivitéite statt: Hei kënnt Dir Äre Standpunkt ausdrécken, Froe stellen, Ängschten deelen, Iddien an Usätz virstellen – a virun allem: Demokratie liewen.
Mee et geet net nëmmen ëm dës eng Woch. Déi Jonk bréngen sech dat ganzt Joer iwwer aktiv an – an der nationaler Schülerkonferenz (CNEL), am Jugendrot (CGJL), an de Schülercomitéen, an de Kannergemengeréit an op villen anere Plazen am Land.
Dir weist eis dobäi kloer: Déi Jonk kënnen net nëmme kritesch denken, mee och konkret Verantwortung iwwerhuelen a Léisunge mat op den Dësch leeën.
Mee Engagement muss och Gehéier fannen. Als Erwuessener hu mir d’Flicht, Iech nozelauschteren. D’Politik muss oppen an zougänglech sinn, fir dass déi Jonk eng wichteg Roll an eiser Gesellschaft kënnen iwwerhuelen.
Déi gréisst Gefor fir Fräiheet an Demokratie ass ze mengen, si wiere fir ëmmer garantéiert. Dobäi weist grad déi rezent Geschicht eis de Géigendeel. Besonnesch an de soziale Medien hu mer verléiert, eis nozelauschteren an zesummen no Gemeinsamkeeten ze sichen. Dofir kënnt et op eis all un, fir eng Welt opzebauen, an där Meenungsfräiheet, Gläichberechtegung, Solidaritéit a Respekt virun anere Mënsche groussgeschriwwe ginn.
Demokratie ass net selbstverständlech – si entsteet all Dag, duerch d’Participatioun vun eis alleguer.
