27/03/2022
يومكم قنين ♥️
بنحكيلكم على منتج خرافي والتجربه ليه كانت روعه وملامح الذهول تعلو وجهي😯 بجد نفس هالايموجي..
منتج عالمي ريفوهات عليه برا جدا جميله واول ماسمعت وصل فرحت لاني بنجربه.. 😍
منتج k18 biomimetic hairscince mask🤩
منتج للشعر يحاكي طبيعة الشعره لما تحطيه يتداخل مع بروتين الشعر والروابط الكبريتيه ويعيد بناء البروتين للشعر ويعوض الضرر👌❤️😘
نجو خطوه خطوه عشان عارفتكم تشوقتو 😁
اولا لشن نستخدموه🤔
للشعر المتضرر بسبب المعالجات الكيمائيه زي الفرد والكيراتين والبروتين والبوتوكس.. نعرفو ان هالحاجات تضرر الشعر حتى لو بان في نتيجه في البدايه..🥺
للشعر إلى ديما تستخدميه البيبيليس والاستشوار وللأسف من حيستغنا عنه حتى لو كل فتره بس طبيعي حتستعمليه.. 🥺أو أيضا حابه حمايه حقيقيه من الحراره إلي تتعرضيلها في الاستشوار قبل استعماله..
إلى تحب تصبغ وتميش وتضررت شعرتها ومش قادره توقف صبغات وفي نفس الوقت تبي علاج غير البروتين وغيره🤗 أو تبي تصبغ وتبي حمايه من الصبغه والضرر
لما تنزلي البحر ويتضرر شعرك بالاملاح 🤗
اي ضرر خلا طبيعة شعرك تختلف عما كانت عليه هو حيعيد بناء شعرتك والبروتين بنسبه كبيره 👌❤️
باهي شن هو يادكتوره عباره عن شن🤔
عباره عن ماسك شعر إلى جربته بصوره 5مل فقط وفيه منه 50 مل وبرضو عندهم على هيئة بخاخ..
دكتوره لازم نمشي لصالون أو دكتوره ولا نستخدمه بروحي 🤔
أسهل مافيه استخدامه❤️ اول شي تغسلي شعرك وتنضفيه كويس لو كان في زيوت دايرتلها قبل او حمامات زيت إلى قبل الاستحمام. بعدها ممنوع ماسك أو بلسم للشعر وثقي تمام ان المنتج حيقوم بشغله ويكفي ويوفي😁
بعدين تنشفي شعرك بالفوطه وماتخليشي يقطر لا يعني نشفتي بالفوطه لكن برضو ماجفش 🤗ان شالله نكون وصلت المعلومه😅 وبعدها تحطي كميه متلا إلى استخدمته كمبه 5 مل درت في دي كميه بسيطه متاع واحد مل وفركت يدي وبديت نحط فيه على شعري من لوطه لفوق.. 🤗
هو اقل كميه ملي واحد الي شعر قصير هلبا والي طويل كثيف ممكن اربعه ملي أو أكثر.. يعني عبوه زي هذي تكفيك وزياده. وبرضو صورتلكم الجدول لوطه👇 فيه كل نوع شعر وقداش تحطي منه على شعرك 💆♀️..
بعدها انتظري اربع دقايق بعدها إلى بتحطيه ديريه للشعر سيروم أو زيت أو إلى هو نظامك للشعر. بتجففيه أو بتخليه كيف ماهو ينشف عادي وشوفي النتيجه الجميله 😍
انا اول مره استشورت شعري والنتيجه كانت واضحه ان شعرتي أنعم المع وفيه حيويه. وقف الهيشان ومانفشش طول 😘 جميل جدا وعجبتني النتيجه.. تاني استخدام خليت شعري ينشف بروحه وكانت نتيجه جفاف اقل وهيشان اقل وشعرتي بدت صحيه.. وتالت استخدام برضو نشفته بروحه بلا استشوار وكانت نتيجه جميله وتسريحته أسهل و اسرع ورطب وفيه لمعه ❤️
بجد المنتج روعه وحبيته وخلاني نعاود نرجع نحب شعرتي 😍
في الاستخدام يكون تدوشي مرتين بالأسبوع وحتديري اربع مرات إلى ست مرات على حسب تضرر الشعر يعني حاجه اسبوعين او تلاته مده علاج.. 🤗بعدها تقعدي كل أربع غسلات مره تديريه وعادي جدا تكملي عليه حتى فتره طويله أو تكتفي بمده علاجيه فقط..
الحلو فيه ان يحمي من عوامل الضرر ويعالج الضرر والتلف♥️
العمر يادكتوره عادي نديره لبنتي 🤔
اي من تلات سنين فما فوق.. بس الي امها دايرتلها بروتين أو علاجات غلط وتستخدملها في استشوار ديما🤦♀️. أما إلي ماتعاني من شي ماتستخدمش لبنتها..
المنتج جميل يستحق التجربه جربوه وقولولي
مش حتندمو 😊وحترجعو تحبو شعركم 🥰
ديرو لايك وتاق لصحباتك باش تفيدو بعض🥰ودمتم بصحة وعافيه
د. مريم كبور طبيبه جلديه وتجميل وليزر👩🏻⚕️
