د.هاجر الدعيكي - أخصائية نساء و ولادة و خصوبة

09/01/2026

في نقطة ليا فترة نبي نتكلم عليها ولازم نكونو واعيين بيها كويس وهي لما تجيك حالة بنوته (انسة) وفيها مشكلة سواء كتلة او كيس ع المبيض او تشوهات خلقية في الرحم هنا التشخيص جدا حساس ولازم الكلام يكون مبني ع صورة صحيحة
مانقدروش نستخدمو جهاز ع البطن ونعتمدو عليه 🤔🤔 لانه محدود الدقة والصورة ابدا مش واضحة
ومانقدرش ندير جهاز مهبلي 🫤
الحل الافضل هوا سونار شرجي
امن، وصورة واضحة واقرب لرحم والمبايض ،وبديل ممتاز 👌لجهاز المهبلي
وكل المصادر العلمية تاكداستخدامه في حالات هاذي بس محتاج الدكتور يفهم الحالة ويوضحلها كل خطوة قبل ما يديرها باش تكون متعاونه ومتفهمه الوضع
حطيت صورة توضحية لبنوته درتلها جهاز شرجي وكان عندها كيس بطانه رحم مهاجرة ع المبيض (كيس شوكولاتي)

د.هاجر الدعيكي
اخصائية طب جنين
نساء و ولادة

19/12/2025

Fetal tachycardia 🫀
تسرع نبضات قلب البييي 👶
نبضات قلب البيبي الطبيعية تكون 110 _160اكثر من هكي يعتبر تسرع نبضات الجنين معناه في مشكلة .

عندنا اسباب مباشرة زي مشكلة في توصيل الكهربي لعضلة القلب عند البيبي نفسه زي SVT ,atrial flutter
او اسباب غير مباشرة زي حرارة عند الام او عدوى و التهابات تأثر ع البيبي هكي او عدوي للبيبي نفسه بغض النظر عن السبب بزبط

نكتشفو فيه بصدفه واحنا نديرو في جهاز و وقتها لازم نستبعدو الاسباب زي العدوى و التهابات باش نقدرو نعطو علاج لان لو مشكلة في توصيل الكهرباء في قلب ممكن نعطي الام حبوب زي دايجوكسن مرضى القلب يعرفو الدواء هذا وينقص من سرعه نبضات البيبي لان لو ماتعالجش يدير فشل في القلب ويتجمع سوائل في محيط البطن والصدر وتزيد المشكلة سوء .

الحالة هاذي يفرق جدا معاها تشخيصها وعلاجها وهي حامل كل ما نكتشفو المشكلة بكري كل ما البيبي يكون احسن وفرصته اكبر 👌

د.هاجر الدعيكي
اخصائية طب جنين
نساء و ولادة

16/12/2025

IUCD
اللولب وقصص اللولب طبعا هوا كوسيلة منع حمل كويسة جدا بغض النظر عن نوعه سواء هرموني او نحاسي طبعا وكل حالة شن يمشي معاها اكثر الفكرة في طريقة تركيبه وامتى و وين اللولب لي في الصورة والفيديو لحالتين مختلفات اللولب متشلقب 120 درجة لانه تركب في القيصرية وماتركبش صح هلبا دكاترة ترفض فكرة تركبه في القصرية اصلا بس في طرق صح باش مايتشلقبش هكي🧐 او نصبرو ونركبوه بعد 6 اسابيع نجو لي وين لازم لي يركبه يعرف شن يدير ويكون يركب وهوا يدير في جهاز باش مايصيرش زي الفيديو ونلقوه مخترق الرحم وماشي مرشوق 🫣في المبيض والامعاء وياما شوفنا حاجات غريبة
القاعدة الذهبية انه يتركب في وقت مزبوط وعند حد يركب وهوا يشوف بالجهاز والمتابعه بعد مانركبوه كل شوي نتاكدو انه في مكانه 👍👍

د.هاجر الدعيكي
اخصائية طب جنين
نساء و ولادة

14/12/2025

Quadruplt pregnancy 👶👶👶👶
حمل بأربعه توائم 🤔
صدمه كبيرة والام بروحها مصدمه وخاصة انها عندها 5 صغار في الحوش 😵‍💫والسبب انها خدت تنشيط حبوب ومش عارفه السبب الحقيقي لي خلاها تاخدهم هي ماكنتش متوقعه انه يصير هكي وتحمل باربعه صارلها زي مسلسل كارثة طبيعية بزبط
الحالة هاذي تعتبر نادرة شوية لان يصير هكي من الحقن المجهري مش من تنشيط عادي وعادة نعرضو ع الام خيار انقصو عدد الاجنه لان كل ما يزيد عدد البيبي يزيد الخطورة ع الام والبيبيات زي ضغط الحمل والسكر وتسمم الحمل ومشاكل في المشيمة والبيبيات يصيرلهم ولادوة مبكرة و يبو حضانات ومشاكل في تنفس والاهم تشوهات خلقية تزيد هلبا
الحالة هاذي بصرحه ماكنتش صعبة زي ماتوقعت كانو البيبيات محترمين ومسالمين متعاونين معاي خلوني نشوف كل خاجة ودرنا كشف كامل وهاذي حاجة متعادة في تؤم لان يكونو ضاغطين ع بعض ويتعاوكو بس هاذو كانو متفقين الحق ومتفاهمين كانو بنتين و ولدين 👼👼ربي يكون في عون الام بصراحة حالة حلوة ومبسوطه انها جت عندي واشتغلت عليها 🥰🥰

د.هاجر الدعيكي
اخصائية طب جنين
نساء و ولادة

11/12/2025

TGA🚨🚨 حالة تشوه في الاوعية في القلب من حالات النادرة انه يكون الشريان الاورطي مكان الرئوي والعكس مع وجود غرفة واحدة في القلب🫀 الحالة هاذي محتاجة متابعة ع طول الحمل معانا والبيبي لازم يدير عملية بعد الولادة هذا علاش لازم مكان الولادة يكون مكان مجهز وعندهم علم بحالة البيبي
تشخيص حالة زي هاذي مش ساهل ومحتاج ناس متخصصة في قلب الجنين تحديدا مش طب جنين وخلاص 👀
الحمدلله قدرت نشخصها وعرضتها ع أستاذة طب قلب جنين وتم تأكيد التشخيص 💪
د.هاجر الدعيكي
اخصائية طب جنين
نساد و ولادة

05/12/2025

04/12/2025

Clift lip 🚨🚨
الشفة الارنبية او المشقوقة تشوه في الوجه وحالة مش نادرة لان ممكن تصير لهلبا اسباب زي التدخين🚬 والكحول خلال اول اسابيع الحمل او الام تاخد عدوى او فيروس خلال اول فترة من الحمل في شوية من المتلازمات تكون فيها النوع هذا من تشوه مع اختلاف الدرجات لان في نوع يكون شق في الشفة والحنك وفي نوع من جيهتين اليمين واليسار المشكلة هاذي تتحل بعد الولادة بعملية لان مايقدرش البيبي يرضع وخاصة لو الحنك فيه شق
الفكرة انه لازم نشخصو الحاجة هاذي بكري وهي ساهل جدا نشوفها ونشحصوها بالجهاز🔎🔎 باش الام تكون مستعدة وجاهزة نفسيا للمشكلة هاذي وتنعرض ع دكتور جراحة اطفال للعملية بعد الولادة
د.هاجر الدعيكي
اخصائية طب جنين
نساء و ولادة

18/02/2025

هاذي الحالة كانت معاي من كم يوم كانت جاية تبي ادير جهاز روتيني نكتشوفو ان البيبي عنده مشكله وهي الأمفالوسيل (Omphalocele) هو عيب خلقي يصير لما عضلات بطن الجنين ما تقفلش كويس وهو في بطن أمه، فيطلع جزء من الأمعاء أو الكبد أو أعضاء ثانية في كيس رقيق برة البطن. الحالة هادي تتشاف بالسونار قبل الولادة، وبعد ما يتولد البيبي، الأطباء يقرروا إذا يحتاج عملية جراحية باش يرجّعوا الأعضاء لمكانها ويسكروا البطن.

مع العناية الطبية، أغلب الأطفال اللي عندهم الأمفالوسيل يقدروا يعيشوا حياة طبيعية بعد العلاج. المهم المتابعة مع الدكتور والدعاء، وربّي يشفي كل مريض. ❤️

د.هاجر الدعيكي
زمالة مصرية نساء و ولادة وطب جنين

31/01/2025

خلال مراجعة روتينية لأم حامل فالشهر السابع ، تبين وجود زيادة في مية الجنين سببه كان انسداد خلقي في امعاء للجنين .
هذه من فوائد الكشف الروتيني نعرفوا بيها المشكلة بكري و يتم حلها فالوقت المناسب من غير تأخير او مفاجئات بعد الولادة .

د.هاجر الدعيكي
اخصائي طب جنين و جهاز موجات فوق صوتيه
طبيبة نساء و ولادة

22/01/2025

الكشف المبكر بالجهاز بين 11 الى 13 اسبوع من اهم الكشوفات يبين لو فيه احتمال وجود مرض متلازمة داون (منغولي)
الصورة تبين شكل دماغ الداخلي و نبضات القلب و الصمامات و حجم الجنين .

د.هاجر الدعيكي

اخصائي طب جنين و جهاز موجات فوق صوتية
طبيبة نساء و ولادة في مستشفى القصر العيني ب مصر

05/01/2025

عودة للملاعب بعد طول انقطاع اعتذر عن الغياب ان شاءالله من اليوم حنرجعو للبوستات والاستشارات 👩‍🔬🤰