Lege Artis by Jordan Gjurcheski

13/08/2025

🦷 Преобразба на една насмевка.
Оваа промена која се гледа на сликите е само јагода на шлагот, задоволство за окото. Она што е вистинска суштината и вистинско задоволство на душата на стоматологот е преобразбата која се крие под оваа фасада. Преобразба на здравјето на сите ткива во устата. Преобразба на коската, забот и непцето.
🦷 Пред да се дојде до завршната фаза и поставување на забите, кај овој пациент претходеа бројни зафати за лекување на воспаление на непце, одново лекување на сите стари недолекувани заби и воспалителни процеси во коската околу забите и чистење и пополнување на сите расипани заби. После тоа, со мирна совест, можевме да поставиме вештачки заби и со поголема самодоверба, да посакаме долговечност на истите.
🦷 Кај овој пациент се изработени странични мостови изработени од метал-порцелан, додека предните заби се изработени од "безметален" материјал, циркониум оксид. Разликата во бојата и изгледот помеѓу двата материјали кај овој случај е скоро незабележителна.

02/08/2025

🦷Довербата на пациентот е рамноправен играч во процесот на создавање на големи резултати.
Ова е една ризична игра во која секој чекор на стоматологот, сестрата и забниот техничар е исклучително важен, но вербата која ни ја дава пациентот, навистина може да ја одреди насоката во која ќе се движи процесот и значително да влијае на резултатот.
🦷Овој пациент реши целата своја доверба да ја даде во наши раце. Сериозноста на почетната состојба бараше бавен и постепен пристап во решавање на проблемите.
🦷Третманот започна со вадење на неповратно оштетените заби и лекување на воспалителни процеси кои долго време создавале проблеми на пациентот.
Во втората фаза, поставени беа импланти на местата каде што недостасуваа заби и конечно, после неколку месеци, во третата фаза беа изработени протетските конструкции кои го дадоа завршиниот изглед на терапијата.
🦷Во овој случај изработивме странични порцелански мостови кои со зашрафување ги зацврстивме врз поставените импланти, а во предниот дел од вилиците, врз предните заби изработивме безметални мостови со кои комплетно го променивме естетскиот изглед на старите заби.
🦷Конечно, пациентот е во можност правилно да се храни, соодветно да ја џвака храната и задоволно да се смее.
На крај, топката повторно ја префрливме во негови раце. Овие протетски изработки бараат исклучителна внимателност, хигиена и одржување и со соодветна едукација, се надеваме дека долги години и без поголеми проблеми ќе бидат во служба на пациентот.

17/05/2025

All on six концепт!

Имај трпение. Сите работи се тешки пред да станат лесни. - Saadi

🦷Практикувањето на бавна стоматологија овозможува да имаме предвидливи резултати. Тоа значи, почитување на секој чекор на научната постапка, имање трпение да се дочекаат резултатите и најважно од сè, балансирање помеѓу желбите и очекувањата на пациентот од една страна, и реалните можности кои ги нуди науката и струката, од друга страна.
🦷All on six концептот подразбира поставување на 6 импланти во една вилица со помош на кои и врз кои ќе се изврши целосна протетска реконструкција на беззабоста. Овој концепт се користи кога во вилицата нема останато ниту еден заб, или кога преостанатите заби се до тој степен уништени или расклатени што не претставуваат здрава основа за било кое друго протетско решение. За да се постават доволен број на импланти, потребно е да има доволно количество на коска, а доколку нема, во тој случај потребно е да се направи реконструкција на изгубената коска.
🦷Пациентката ја работевме во три фази.
I фаза: Sinus lift. Поради недоволно количество на коска, во првата фаза беше изведена хируршка интервенција за подигнување на виличниот синус (празнина во коската на горната вилица). Со подигнување на лигавицата на синусот и поставување вештачка коска, се овозможува добивање на доволна висина и ширина на коска за во иднина да може да се постават имплантите. Потребно е да поминат 8-9 месеци додека се продолжи кон следната фаза.
II фаза: вадење на заболените заби и имедијатно поставување и оптоварување на имплантите. Тоа значи дека имплантите се поставуваат веднаш, во ист момент после вадењето на забите. Исто така, се изработуваат привремени заби кои може да се постават веднаш после поставувањето на имплантите. Практично, тоа значи дека пациентот добива нови, привремени заби веднаш (или за неколку дена) после вадењето на забите и поставувањето на имплантите.
III фаза: изработка на дефинитивен и траен протетски надоместок. Дефинитивните заби се изработуваат после 4-6 месеци од поставувањето на имплантите. Тие се изработуваат врз основа на прецизен отпечаток кој идентично ја прикажува позицијата на имплантите. Дефинитивните заби лежат интимно околу непцето, даваат задоволителен естетски ефект и се зашрафуваат врз имплантите.
🦷 Од исклучителна важност кај ваквите сложени протетски случаи е да се едуцира пациентот за правилно и редовно одржување на одлична хигиена околу вештачките заби. Половина од успехот и гаранцијата за трајноста на изработката е во рацете на пациентот.
🦷 На крај, на пациентот му посакуваме долготрајност на изработката и пријатно користење. За да имаме целосен ефект, како и целосно здравје на устата, во следна фаза е договорена реконструкција на забите во долната вилица.

20/06/2024

🦷Бавна стоматологија! Потребно е време, трпение и доверба за да се случи оздравување! Кај овој случај, потребна беше една и пол година за да се добие ваков здрав изглед на забите и непцето околу нив.
🦷Пациентката беше со нарушено пародонтално здравје, присуство на изразено воспалена гингива, длабоки пародонтални џебови и одреден степен на подвижност на поедини заби. Исто така, се забележуваше и присуство на одредени ортодонтски неправилности на поедини заби и на забниот низ. Имено, вторите инцизиви (секачи) имаа нетипична форма и изразена големина (макродонција). Се забележува и вроден недостаток (хиподонција) на двата канини (кучешки заби). Одредени заби во фронтот беа со обратен преклоп (долните доаѓаа преку горните заби). Присутни беа и стари композитни пломби, а исто така имаше и недостаток на поедини заби во бочна регија.
🦷Изведен беше третман на пародонталната болест, инструкции и едукација за правилно одржување на орална хигиена како и совет за повремено професионално одржување на состојбата.
🦷Поставена беше фиксна протеза и со благи и контролирани сили беше извршена корекција на преклопот на забите и нивниот неправилен распоред.
🦷Бочните беззаби места беа решени со изработка на порцелански мостови.
🦷Сменети беа старите и оштетени композитни пломби, а големите втори секачи беа преобликувани за да добијат правилна и естетски прифатлива форма.
🦷Недостатокот на канините, беше решен со поставување на фибер лента на задната страна на постоечките заби, со цел премостување на дефектот и рачно моделирање на забите кои недостасуваат, со користење на нано-композитен материјал.
🦷Фибер лентата претставува добро, економски и естетски прифатливо решение со цел, надоместување на еден заб, а притоа да се зачуваат соседните заби, односно, да не се врши нивно состружување или оштетување.

19/04/2024

🦷 Sinus lift. Подигнување на синусниот под. Пополнување на синусниот под со вештачка коска. Ова претставува корективна хируршка постапка со помош на која се зголемува коскениот волумен во нивото на максиларниот (горновиличниот) синус, со цел да се обезбедат просторни услови за поставување на забни импланти.
🦷Горновиличниот синус претставува коскена празнина сместена во горната вилица, во проекција над корените на горните моларни заби (катници). Оваа празнина е исполнета со воздух, а обвиткана со лигавица (мембрана), слична како лигавицата на носот. Големината на синусот е многу варијабилна, а кај некои луѓе оваа празнина, со тек на време се спушта помеѓу корените на горните заби. Особено после вадење на горните заби, коската која била околу корените постепено се намалува/губи, синусот понекогаш толку многу се спушта, и практично, во тие случаи скоро целата горна вилица е исполнета со воздух.
🦷Првиот и задолжителен услов за да се постават забни импланти е присуство на доволен волумен на коска во вилиците (минимална висина од 8мм и минимална ширина од 6-7мм). Во случај кога имаме исклучително изразен синус во горната вилица, со минимално коска околу него, едноставно е невозможно да се постават импланти. Единствената опција кај овие пациенти претставува постапката на sinus lift, односно, подигнување на подот на синусот (лигавицата, мембраната која го обвиткува) и пополнување на таа празнина со вештачка коска.
🦷Постапката се изведува под локална анестезија, пациентот не чувствува болка, а постоперативните симптоми и тегоби најчесто се лесно решливи и краткотрајни.
🦷Класичниот пристап е со отворање на коскено прозорче од надворешниот ѕид на синусот. Потоа, со помош на специјални тапи инструменти, многу внимателно и нежно се одлепува лигавицата/мембраната од коската и се подигнува, со што се прави простор за вештачката коска. Направениот простор понатаму се исполнува со вештачка коска, отворот се покрива со одредени мембрани и раната се зашива. После оваа постапка, се чека околу 6-9 месеци за да се случи целосно зараснување на поставената коска и формирање на нова коска на самото место. Во тој момент, коската е спремна за да бидат поставени забните импланти.
🦷Употреба на PRF (Platelet rich fibrin, тромбоцитно збогатен фибрин) како помагач на зараснување на раните кај хируршките интервенции. Со помош на едноставни физички методи (центрифугирање) на сопствената крв на пациентот, се добиваат крвни продукти (чепови, мембрани, течност-плазма) кои се богати со голем број на молекули - фактори кои го потпомагаат зараснувањето на раните. Може да се употребуваат во секоја фаза од хируршката постапка (подготвување на коска, поставување мембрани, боцкање околу раната).
🦷Пациентот се обучува за постоперативна нега на раната, нега и проодност на носните ходници, задолжително зема антибиотска терапија во првите денови, а му се препорачува, во месеците кои следат да зема додатоци во исхраната (вит. Ц, вит. Д, колаген..)

16/04/2024

15/04/2024

За повеќе инормации контактирајте нѐ на 070 879 439 (смс или Viber)

26/03/2024

🦷 Хируршка терапија на гингивални рецесии (повлекување на непце). Гингивалните рецесии претставуваат многу честа неправилност на мекото ткиво, непцето, кое ги обвиткува забите. Може да се јават во склоп на напредна пародонтална болест, и во тој случај се следени со изразено воспаление на непцето и коската, изразен губиток на ткиво, присутно крварење, оток и црвенило на непцето. Тогаш, приоритет на лекувањето ќе биде смирување на пародонталното воспаление.
🦷 Но, доста често, гингивалните рецесии се јавуваат и изолирано, кај релативно здраво непце, кај пациенти кои одржуваат добра орална хигиена и немаат напредната пародонтопатија. Причините во тој случај може да се повеќе, како на пример: неправилна поставеност на забите, анатомски (генетски) предиспозиции (недоволно коскено ткиво пред коренот, неправилен сооднос на цврста и подвижна лигавица-розево и црвено непце), лоши навики (бруксизам, груба и прекумерна хигиена), трауматско загризување, трауматски повреди, итн. Поради кобинација од овие фактори, рецесиите често имаат тенденција да напредуваат, а со тоа и да се појави и преосетливост на забите и понатамошно оштетување на одголениот корен на забот. Во такви случаи, препорачливо е да се изврши хируршка корекција на овие случаи.
🦷 Постојат повеќе хируршки техники со помош на кои се прави корекција на оваа промена. Целта е да се врати непцето во првобитна положба, но уште поважно, да се добие добар сооднос на розева-црвена лигавица, односно, да се добие доволно дебел и широк слој на розево-цврсто непце пред коренот на забот, како би се спречило понатамошно напредување на промената. Покрај хируршкото затворање на промената, потребно е поставување на одреден трансплантат-графт кој ќе даде поткрепа и сигурност во постигнувањето на посакуваната состојба на непцето. Графтот може да биде земен од сопствено ткиво или како комерцијален производ од животинско потекло.
🦷 Златен стандард за третирање на гингивалните рецесии претставува комбинација од две техники: коронарно поместен резен - тунел техника (coronally advanced flap-CAF) + сврзноткивен трансплантат од тврдо непце (connective tissue palatal graft-CTPG). Научно е поткрепено дека комбинацијата на овие две техники (и нивните модификации) дава најдобри резултати во третманот на гингивалните рецесии.
🦷 Кај нашиот пациент беа присутни гингивални рецесии на два заби (според класификација Miller I и II), присутен естетски дефект, осетливост на ладно и тенденција за понатамошно напредување на проблемот. Желбата на пациентот да го реши овој проблем, се совпадна со нашата замисла за овој третман, што резултираше со успешно изведена хируршка постапка. Под локална анестезија, сосема безболно, беше подигнато непцето околу зафатените заби и беше направено лежиште. После тоа, беше земен сврзноткивен графт од тврдото непце и беше позициониран и фиксиран во соодветното лежиште. Со користење на соодветни техники на шиење, интервенцијата беше успешно завршена.
🦷 Пациентот добро се опоравува, без значителни проблеми, а за да ги видиме вистинските придобивки од оваа интервенција, треба да сме трпеливи, да почекаме одредено време (недели или месеци), а пациентот да биде дисциплиниран и да ги следи нашите совети и упатства.

15/03/2024

🦷Терапија на делумна беззабост со метал-порцелански протетски надоместоци (коронки или мостови). Овој тип на терапија подразбира подготовка, состружување на преостанатите заби и изработка на мостови со помош на кои се премостува дефектот и се коригираат одредени недостатоци на забите (форма, боја и позиција).
🦷Целта на оваа терапија е да се постигне функционална рехабилитација на џвакањето, растеретување на виличниот зглоб, џвакалните мускули и постигнување на естетска целина.
🦷Задолжителен услов да за се спроведе овој тип на терапија е да има доволен број на преостанати заби, правилно излекувани коренски канали на забите и задоволително здравје на непцето и коската околу преостанатите заби-носачи.
🦷Кај овој пациент беа отстранети старите мостови, спроведена беше терапија за смирување на воспалението на непцето, изведена беше гингивектомија (хируршко порамнување на непцевата линија) и изработени беа циркуларни мостови во двете вилици.
🦷Употребата на розев порцелан претставува естетска мерка која се користи во случај кога има поголем недостаток на непце околу забите и присуство на асиметрија на забите и непцето. Со правилен избор на розева нијанса, се постигнува задоволителен естетски ефект и симетрија на изработените заби.

02/03/2024

🦷Ламинати, винири, фасети, лушпици, сите поими се синоним за еден вид на естетски третман на одредени неправилности на забите. Нивната најголема предност е што се изработуваат со минимална дебелина, понекогаш помалку од 1мм и во некои случаи може да се постават на забите без да има потреба од состружување на забните површини. Во најголем број од случаите се изведува минимално состружување на забите, кое не навлегува подлабоко од дебелината на емајлот.
🦷Ламинатите се користат за естетска корекција на неправилности како што се: неправилна форма, корекција на боја, простори меѓу забите, механичко и хемиско излижување на забите, итн.
🦷Подготовката на забите е сосема безболна, а нивната минимална дебелина даваат чувство на природност и брзо прифаќање од страна на пациентите.
🦷Најважната предност е тоа што се изработуваат врз основа на прецизен компјутерски дизајн што овозможува интимно и прецизно налегнување врз забната површина што гарантира лесно одржување на хигиена околу нив и добро здравје на непцето околу забите.
🦷Може да бидат изработени од најразлични материјали како композити, циркониум оксид, литиум дисиликат (E-max).
🦷Кај прикажаниот случај се забележува оштетување (излижување) на забните површини од хемиска природа (најверојатно поради прекумерна употреба на кисели напитоци). Овие забни ерозии го оштетуваат емајлот на забот што предизвикува не само естетски проблеми туку и појава на преосетливост на забите. Со цел да се спречи понатамошното продлабочување на овие промени, мора да се спроведе соодветен третман на истите.
🦷Кај овој случај изведовме минимално состружување и беа изработени ламинати од литиум дисиликат (Е-мах).

21/02/2024

🦷Хируршки третман на пародонтална болест. Вака, со една реченица би ги опишале сите постапки кои ги направивме за да ги спасиме овие безнадежни заби. Кај овој сложен случај, изведовме низа нехируршки и хируршки постапки, со цел враќање на неколку милиметри изгубена коска која би помогнала во стабилизирање на забите и нивна идна рехабилитација.
🦷По редослед, изведен беше конзервативен третман на пародонталната болест (чистење на забен камен, меки наслаги, обработување на пародонтални џепови), шинирање на забите, модифицирана Widman-ова операција, ВКР (водена коскена регенерација), ВТР (водена ткивна регенерација).
🦷 Накратко, се изведува хируршко отворање на коскените дефекти предизвикани од пародонталната болест, пришто се овозможува под директна контрола на окото да се исчистат сите оштетени и инфицирани ткива, површините за коренот и коската да се обработат механички и хемиски и да се надоместат изгубените ткива преку соодветни постапки. Секако, интервенциите се изведуваат според протоколи кои се научно утврдени.
🦷Водена ткивна и коскена регенерација (ВТР/GTR, ВКР/GBR) претставуваат хируршки методи при кои, со помош на коскени заменици (вештачка коска) и мембрани, му се овозможува на организмот (се води) да ги возобнови изгубените ткива.
🦷Употреба на крвни продукти од сопствената крв на пациентот (PRF/ТЗФ-тромбоцитно збогатен фибрин, PRP/ТЗП-тробмоцитно збогатена плазма). Овие продукти се добиваат со центрифугирање на сопствената крв. Добиените продукти се исклучително богати со мноштво значајни протеини, фактори за раст, клеточни гласници кои во голема мера му помагаат на организмот во заздравување на раните. Од лично и научно искуство, можеме да потврдиме дека употребата на истите во оралната хирургија значително го забрзуваат процесот на зараснување на ткивата.
🦷Интервенцијата се изведува под локална анестезија, сосема безболно. Употребата на PRF во голема мера ги намалуваат постоперативните симптоми и компликации. Прикажаниот пациент уште од првиот ден се чувствува одлично, без никакви симптоми, оток и болка. Во месеците што следат, ќе бидеме со надеж и во исчекување на позитивни резултати од оваа интервенција.

16/02/2024

🦷Апикотомија, апикоектомија и ресекција на врвот на коренот претставуваат варијанти на хируршко лекување на воспалителни или цистични промени локализирани во коската околу коренот на забот.
🦷Воспалителните промени околу врвот на коренот потекнуваат од нелекувани или неправилно лекувани заболувања на пулпата на забот. Во прва линија, овие заболувања се лекуваат амбулантски, конзервативно, со ендодонтски третман на коренските канали. Правилно и прописно лекување на коренските канали е предуслов за здрави околукоренски ткива.
🦷Понекогаш, поради неправилен или задоцнет третман на заболувањата на пулпата, воспалението се проширува на околукоренските структури.
И покрај тежнеењето за конзервативен, ендодонтски третман на овие заболувања, истиот не е секогаш возможен. Во тој случај, единствениот начин за да се зачува забот во уста е хируршкиот третман на околукоренските заболувања.
🦷Кога се одлучуваме за хируршки третман? Тогаш кога правилниот ендодонтски третман не е возможен поради екстремно закривени корени, анатомски аномалии на каналите, скршени инструменти, неуспешни претходни лекувања каде не е возможно повторно лекување, присутни колчиња во каналите кои не може да се извадат, присутни протетски изработки врз заболените заби, или пак кога имаме упорни и повторувачки инфекции кои не реагираат на ендодонтски третман.
🦷Интервенцијата се изведува под локална анестезија, безболно, со минимални и решливи постоперативни компликации. Откако хируршки ќе се подигне непцето над забот, под директна контрола на окото се пристапува кон воспалената и оштетена коска, се врши механичко и хемиско чистење на ткивото, а врвот на коренот кој е зафатен со воспалението се пресекува. На крај, се прави простор/засек на врвот на коренскиот канал и истиот се затвора херметички со соодветно полнење. На тој начин се спречува повторно ширење на инфекцијата од каналот кон коската.
🦷Еден од најважните фактори за успех на оваа хируршка интервенција претставува соодветното и правилно затворање на крајот на коренскиот канал. Материјалот кој се користи за затворање е клучен елемент кој го осигурува позитивниот исход од третманот.
За таа цел може да се користат различни материјали (амалгам, гласјономер, композит, цементи) но никој од нив не ги задоволува сите критериуми за совршен материјал. Воведувањето на МТА (Mineral Trioxide Aggregate) во стоматологијата, а со тоа и во ендодонтската хирургија претставува револуционерен чекор.
🦷МТА (Mineral Trioxide Aggregate) претставува биокомпатибилен материјал кој има повеќе намени во модерната стоматологија. Има многубројни позитивни својства, а доаѓајќи во контакт со ткивата, поттикнува забрзано зараснување на раните и создавање на нова коска. Тоа го прави идеален материјал за затворање на коренскиот канал после апикотомија.