Кафе-книжарницата „Децата од нашата улица“ е несекојдневно место во градот, со локација на познатата улица Ленинова. Името го добила според истоимениот роман за деца на Неџати Зекирија. Оваа кафе-книжарница веднаш ќе ви го привлече вниманието со пријатниот амбиент, бидејќи нуди вистинско уживање за тој што ќе дојде да се напие кафе, коктел или вино, читајќи си го омилениот наслов. Во книжарницата
има секаков вид литература, домашна и странска, класици и бестселери. „Децата од нашата улица“ соработуваат со повеќе издавачки куќи: „Арс ламина“, „Блесок“, „Култура“, „Магор“, „Манускрипт“, а најавена е соработка и со „Матица“ и со „Три“.
Идејата е ова место да прерасне во мултикултурен простор, каде што секојдневно ќе се одржуваат разновидни културни настани: поетски читања, изложби, промоции со гостувања на писатели, музички настани. Исто така и оние што сакаат да си купат некој наслов ќе можат да го направат тоа по мошне прифатливи цени.
