Советувалиште за студенти по медицина

14/08/2025

https://www.youtube.com/watch?v=LDF4_qVgbFU&list=RDLDF4_qVgbFU&start_radio=1
Она лето кога баш би било убаво да e како во песнава...

From Original ALbum - Ella Fitzgerald, Louis Armstrong - Porgy & Bess 1957 (Original Remastered 2011) http://itunes.apple.com/it/album/porgy-bess-1957-origin...

25/06/2025

Јунска сесија, пак и пак и пак...
Овој пат од гледна точка на наставник...
Сизифова работа...
Се сретнувате со тромав систем, кој во сесијата ги става на сериозен тест и вашите уверувања и вашите етички и ментални сили.
Се сретнувате со студенти, кои се во исцрпувачка трка да соберат што повеќе преодни оцени во своите индекси, а по пат немаат никаква идеја ниту што учат, ниту кој предмет природно, суштински и причинско-последично му претходи на кој друг предмет, а при тоа се детрминирани да си ги соберат „покемончињата“.
Се сретнувате и со многу други апсурдности...
И во тој општ хаос, повремено ќе сретнете студенти кои точно знаат што учат и зошто тоа го учат.
Овие вторите ви ја даваат силата утре пак да почнете да го буткате истиот камен од подножјето кон врвот, надевајќи се дека утре пак ќе сретнете некоја ретка личност по угорницата...
Сепак едвај чекате да заврши бесмислената трка, оти сте на граница на прегорување, ако си дозволите да сте искрени со себе...

Фото
Од Franz Stuck — Stuck, Franz von: Sisyphus., Јавна сопственост,

17/06/2025

Јунска сесија - пак и пак и пак...
Усен испит...
Не излегувајте на усен испит ако во текот на подготовката за испит сте решиле да ја прескокнете азбуката и сте решиле напамет да ги меморизирате техничките процедури со идеја дека само за нив ќе бидете прашани... Нема! Ќе бидете прашани за азбуката, сигурно!
Па, така, без азбука не може да се направи разлика меѓу коагулација и аглутинација, меѓу аглутинини и аглутиногени, меѓу неутрофили и лимфоцити...
Не е пријатно за никого. Ниту за наставниците, ниту за студентите.
А воопшто не е академски, уште помалку достоинствено...

16/06/2025

Јунска сесија пак и пак и пак...
Како до успешна јунска сесија?
Прво со искрен, јасен и реален одговор на прашањето: ШТО Е УСПЕШНА СЕСИЈА ЗА МЕНЕ?
А потоа кога тоа е расчистено:
Со целосна информираност за тоа кој предмет е условен за кој семестар
Со целосна информираност кој предмет колку е голем, колку е важен и колку тежи
Со правење реален план и организација на учењето и почнување рано со учење
Со комбинирање на пристапи кон учењето
Со комбинирање повеќе стилови на учење
Со учење во друштво
СО ЧЕСТО ПОВТОРУВАЊЕ НА НАУЧЕНОТО
Со здрави навики и грижа за сопственото здравје
Со среќа на сите!
https://szspm.wordpress.com

09/06/2025

Колку студенти од Кочани студираат на нашиот факултет? Знаеме ли? Сме ги прашале ли како се ?
Како се справуваат со девастирачката трагедија што ги погоди? Како можеме да им се најдеме?
Оти нема некој од Кочани кој не познава некого кој што загубил некој свој.
Кога патем, ќе ги прашаш како сте, како оди, тие се смешкаат и викаат „добро е, може многу полошо“. И кога ќе го видат твојот збунет поглед, ќе ти кажат„ не знам дали знаете јас сум од Кочани“ . А гласот им трепери. Што да им кажеш на тоа, скаменето? И тие ги земаат твоите неми зборови и продолжуваат „нема што да се каже“.
А некој тагата ја убива со работа, па швајцува испити и колоквиуми. И ти си викаш, овој е супер, ништо не му треба. Но, некој не знае од кај да почне, ниту што да прави со себе и со својот ден, па не се појавува ниту на вежби, ниту на колоквиуми, ниту на испити. А ти си викаш, мрзлив е, арогантен, незаинтересиран...
Понекогаш и не мора да се каже ништо, може само да се биде тука, да се слуша, може да се праша како да се најдам. Оти кога се наоѓаме, и двете страни добиваат.
А може и да се понуди стручен разговор, може да се организираат групи за поддршка, може да се организираат туторства, менторства, дополнителни сесии, како дел од еден долг процес на зацелување на сите...
Оти, никогаш не е доцна!

06/06/2025

Кога си одиш замислено по патот и си ги сортираш своите грижи и обврски и ги сретнуваш пред тебе. Те застануваат насмеани, те поздравуваат и ти кажуваат дека одат на последниот академски час.
И веднаш ти го полнат срцето со радост, надеж, ентузијазам, ти даваат сила и те потсетуваат зошто си тука, кој е твојот повик, која е твојата улога.
Ви посакувам успешна кариера и секое добро почитувани и драги колеги!

03/06/2025

На 29 мај оддржавме уште една работилница за психолошка поддршка на студентите на нашиот факултет, последна во оваа учебна година.
Работилница на која се присуствуваше затоа што се сака, а не затоа што се мора.
Тимот на советувалиштето, овој пат засилен со гостинот асистент д-р Вангел Ристовски, повторно обезбеди пријатна атмосфера на еднаквост, почит, прифаќање и поддршка. Учесниците разменија многу искуства, знаења, емоции и убава енергија.
Сите се уверија дека не се сами во своите проблеми, дилеми, тешкотии и добија и си споделија корисни, практични совети за организација на времето и за справување со предизвиците во академската средина.
Многу беше убаво да се биде на тоа место во тоа време!

24/05/2025

Љубезно потсетување.
Во четврток на 29. мај со почеток во 16 часот во Големата сала на деканатот на Медицинскиот факултет ќе одржиме работилница за успешно управување со времето.
Борјан ќе ги донесе својот вулкански ентузијазам, својата искреност и своето успешно справување со испитите.
Матеј ќе гдојде со своето искуство и својата успешна приказна исплетена од многу труд, непоколеблива истрајност, упорност и интензивен личен раст за време на патувањето до звањето доктор на медицина.
Христина ќе биде тука да посочи дека учењето за медицинарите никогаш не престанува и дека секогаш има потреба за модулирање на начините за успешно управување со времето.
Сања ќе посведочи дека за да се оствари некоја цел таа треба да биде блиску до срцето и дека треба да се живее за неа и со неа, без оглед колку време е потребно за тоа.
Дојдете! Ќе се дружиме, ќе споделиме искуства, знаења, емоции!

17/05/2025

Трета колоквиумска се наѕира на патот... А со неа и многу можности - да се процениме до каде сме, уште еднаш да видиме колку можеме и нешто повеќе да научиме! Со среќа на сите "тркачи".

Јуни е на прагот, а тоа не значи само лето. За студентите по медицина е нешто многу повеќе. За некого - прва, за некого - последна, за друг, пак, можеби и условна јунска сесија!
Како да се испланира правилно? Како да се постигне посакуваниот резултат? Дали сум доволно добар? Дали воопшто сум за ова?

Советувалиштето за студенти по медицина ве поканува на работилница на тема - Психолошка подготовка за јунска сесија (Ефикасно менаџирање со времето) на ден 29.05.2025, од 16 часот во Амфитеатар Деканат. Секогаш е убаво кога се собираме, кога се слушаме и си разменуваме искуства.

Многу прашања, многу одговори, но и многу можности - за смирен почеток и успешен крај на уште еден предизвик!

https://docs.google.com/forms/d/1nEK3iLcVcIGc5lfZ935B-KfjXr9ZXQqtD4EjrYc1JL8/edit

09/04/2025

Сакам да предавам.
Мислам дека предавањата, дури и во големи групи се добра работа, ако знаете што сакате да постигнете, како да го постигнете тоа и како да ја пренесете вашата страст за знаење на публиката.
Се согласувам, исто така, дека треба да се има отворен ум за нови идеи и постојано да се приспособува вашиот пристап за да ги постигнете вашите цели.
Денес имавме неочекуван и добродојден посетител и слушател на предавањето во амфитеатар 2.
Отворени умови!
Убавината на академската средина!
Фотографии и документирање на магијата: Благица Стојанова

27/03/2025

Уште малку за ранетите исцелители.
Образецот е архетипски, се однесува на рано доживеаната лична траума, која за да се себе-залечи, на несвесно и свесно ниво мотивира и поттикнува одредени личности да помагаат и да ги лечат другите, па така се создаваат екими (врачи, лекари, исцелители, психолози, стоматолози, травари, фармацевти...).
Суштината е во искуството на паталец и во емпатијата, додека да се стане гаталец од паталец. И тоа до тука е добро. Недоброто почнува кога екимите ќе се одделат од својот порив, ќе ја загубат емпатијата и ќе прегорат.

Патот до модерен еким е многу тежок.
Нема студент по медицина, па и по психологија кој кога учи патологија, психопатологија, интерна медицина или ментални болести, да не се смрзне од страв и да не осети ладна пот на вратот од потенцијална неизлечива болес,т која ќе претпостави дека ја има учејќи и препознавајќи разни симптоми и знаци на таа болест.
Голем е бројот на студенти по медицина кои тогаш трчаат по разни доктори, барајќи си потврда за поставената дијагноза. Што прегледи се направени на кардиологија, што магнетни резонанци на разни органи се направени во трета и четврта година на студиите по медицина од памтивек.
Студентски синдром или привремена хипохондрија - страв од болест.
Воглавно, нормален развоен пат на секој иден еким.
Но, треба да се адресира како појава, не треба да се занемарува и да се потценува искуството на младата личност при тоа.
Одиме понатаму!

25/03/2025

За ранетите исцелители пак и пак и пак...
За аплаузите од младината за медицинскиот персонал што спасува животи...
За студентите по медицина што минатата недела требаше да полагаат колоквиуми, а полагаат оваа недела. Со нив во овие две седмици ќе се видиме прв пат за време на колоквиумот...
За разговорот за емоциите и за преживеаната траума што ќе го оставиме за некогаш после...
За образецот на ранетите исцелители што се повторува во круг...
Разговор за емоциите мора да има. Обука за самопомош и системска поддршка на студентите по медицина и на лекарите при тешки психолошки трауми и хроничен професионален стрес мора да има...Како што има за психолозите...
Само така ќе се прекине кругот на ранетите исцелители...