Когниција

Home
Когниција

Центар за невропсихологија, психотерапија и за психодијагностика

Даваме услуги од следниве области:
• невропсихолошка процена на внимание, концентрација, помнење, говорно- јазични способности, визуелна перцепција, процена на конструктивни капацитети, на егзекутивни способности, на промени во однесување и сл.;
• индивидуално приспособени програми за когнитивен тренинг и за неврокогнитивна рехабилитација;
• психолошка евалуација т.е. процена на интелектуални спос

обности, профил на личност и сл.;
• индивидуална психотерапија;
• поддршка на семејства;
• едукација од област на клиничка невропсихологија и од останати области во домен на психологија.

За помош можете да ни се обратите:
• доколку имате било какви тешкотии во Вашето когнитивно функционирање, без разлика дали се работи за помнење, внимание, говор и сл.;
• доколку чувствувате најразлични стравови, изразена загриженост, анксиозност, доколку имате соматоформни нарушувања, лоша концентрација, нарушен сон, недостаток на волја и мотивација...;
• доколку немате психички тегоби, но сакате подобро да се запознаете себе си, да го подобрите секојдневното фукционирање, побргу да учите, да
бидете поуспешни во улогата на родител, да бидете поспонтани...;
• доколку сакате процена на интелектуалните способности, процена на структура та на Вашата личност, за профил на личноста;
• доколку доживувате интензивна трема при јавни настапи и останати слични ситуации;
• доколку имате конфликти во семејството, со професорите, на работното место...;
• доколку имате проблем во препознавање и во изразување емоции;
• доколку сте изложени на стрес и сакате да го намалите неговото влијание и да научите да го неутрализирате;
• доколку имате криза во учењето или во професионалниот развој.

Услугата можете да ја добиете во живо или он-лајн, по претходно закажување на термин на понудените контакт телефони, на и-мејл адресата или на веб страната на Когниција. Основните научни, професионални и етички начела и принципи коишто важат за психотерапијата и за советувањето во кабинет важат и за онлајн-психотерапија и онлајн-советување.

24/08/2025

"Улизица“ - личност која премногу ласка, се обидува да се додвори на авторитети или луѓе од кои очекува корист.

Ниска самодоверба?! Некои луѓе доживуваат дека не се доволни сами по себе, па мора да се „допаднат“ за да добијат прифаќање или сигурност.

Понекогаш претставува стратегија за преживување/опстанок, особено во средини каде што моќта и контролата се концентрирани кај малку луѓе (шеф, авторитет, влијателна група). Ласкањето и додворувањето може да биде начин за добивање привилегии.

Кај нарцисоидни или манипулативни личности претставува свесна тактика за да манипулираат и извлечат корист.

Некои пак се водени од потребата за припаѓање и премногу се потпираат на туѓото одобрување за да се чувствуваат вредни и безбедни.

Во некои општества и контексти, почитта кон авторитет се меша со ласкање, па тоа станува „нормално“ однесување.

Во секоја од наведените можности, на „улизиците“ им недостасува вистинска автентичност.

Општествениот период кој следи ќе биде плодна почва за нивно цветање.

22/08/2025

Голема сила лежи во оној кој може да премолчи и кога е во право. 🌿

Тоа бара навистина личносен капацитет и зрелост. Честопати луѓето сакаат да докажат дека се во право за да ја задоволат својата гордост. А понекогаш мудроста е во тишината. Молчењето е знак на самоконтрола, достоинство и поголемо разбирање на ситуацијата.

Без грижа, вистината си го наоѓа патот, без ние да мораме да ја докажуваме.

20/08/2025

Срамот е социјална емоција која ја регулира социјалната динамика.
Претставува социјална кочница и нè спречува да правиме работи кои би нѐ исклучиле од заедницата.
Другата негова димензија е морална совест: Чувството дека „нешто не е во ред со моето однесување“ често е посилно од надворешната казна.
Тој нè тера да погледнеме во себе и да се коригираме.
Луѓето кои знаат да чувствуваат здрав срам се поприфатени, затоа што покажуваат емпатија и одговорност.

🤔 Кои се условите за да може некој да се срами?

Интернализација на норми! Човек мора да има внатрешно усвоени правила на однесување, не само да ги знае, туку да ги смета за „свои“.

Емпатија т.е. капацитет да ја почувствува реакцијата на другите, да замисли како изгледа во нивните очи.

Самосвест т.е. да има јасна слика за себе и за тоа каков сака да биде.

Општествениот контекст е важен. Ако општеството не санкционира ништо, тешко е поединец да чувствува срам и обратно, силна култура на одговорност го поттикнува срамот.

🤔 Што се случува кога владее безсрамност и апатија?

Кога „нормата“ е дека сите прават што сакаат без грижа, луѓето постепено губат чувствителност за срам. Поединецот не ја чувствува тежината на грешката и отсуствува одговорност и грижа за заедницата.

🤔 Како да го вратиме чувството на срам?

Преку рехабилитација на вредностите, јавна одговорност, модели на однесување и преку развивање емпатија.

Да го вратиме срамот повторно во мода!

18/08/2025

Психологијата прави разлика меѓу „интелектуалец“ и „интелигенција“. „Интелектуалец“ повеќе е идентитет и стил на живеење, отколку само „висок IQ“. Интелектуалецот се занимава со идеи, знаење и култура, има развиени когнитивни способности (логичко размислување, анализа, критичко мислење), сака да учи, чита, истражува и дискутира за општествени, научни, уметнички или филозофски теми, не се води само од емоции или практични интереси, туку и од стремеж за разбирање на светотт, отворен е кон искуства, љубопитен, има богата имагинација, сака апстрактни идеи и уметност. Често има добро развиена метакогниција (свесност за сопственото мислење и способност да го преиспитуваат).

🧠 Интелигентна личност има висока способност за решавање проблеми, брзо учење, логичко размислување и адаптација.
Интелигенцијата може да се мери преку тестови за IQ или когнитивни задачи.
Нивниот фокус е на практично користење на знаењето за да се најдат решенија.

Некој може да е многу интелигентен, но не и интелектуалец, ако не сака да размислува критички или да се занимава со идеи.

И уште нешто многу важно, завршен факултет (мастер, докторат...) не е критериум за интелектуалец!

16/08/2025

Систематско и свесно изживување врз животни е знак за сериозна психопатологија.

⚠️ Еден од најчестите психолошки профили на луѓе кои се изживуваат врз животни е психопатската структура. Ладнокрвни се, без емпатија, гледаат на животните (и луѓето) како предмети, не како на живи суштества.
⚠️ Не многу подалеку се и садистите кои пак чувствуваат задоволство и уживање од нанесување болка.
Изживувањето претставува за нив извор на „моќ“.
⚠️ Антисоцијалната личност ги крши правилата и законите без грижа на совест. Често користи насилство, вклучително и врз животни.
⚠️ Изразено нарцисоидните структури се сметаат себеси за „над“ другите. Може да мачи животни ако му „пречат“ или не служат на неговите потреби.
⚠️ Фрустрирани и трауматизирани личности, кои и самите биле жртви на насилство, понекогаш ја пренасочуваат болката кон послабите од себе (животни, деца).

‼️ Истражувањата покажуваат дека луѓето кои мачат животни имаат значително поголема веројатност да бидат насилни и кон луѓе.
Малтретирањето на животни често се смета за „прв степеник“ во ескалацијата на насилство.

Заедничка одговорност е да пријавуваме насилство врз животни и да бараме истото да се санкционира‼️

15/08/2025

Невроестетиката проучува како мозокот ја доживува убавината, уметноста и естетските искуства.
Тоа е спој на невронаука, психологија и уметност.

Се обидува да одговори на прашања:
- Зошто некои слики, музика или форми ни изгледаат „убави“?
- Кои делови од мозокот се активираат кога гледаме уметност или доживуваме естетско задоволство?
- Постојат ли универзални правила за убавината или сè е субјективно?

Како мозокот „одлучува“ дека нешто е убаво?

1️⃣ Првиот поглед претставува сензорна обработка.
Визуелниот кортекс (во тилниот дел на мозокот) ја обработува формата, бојата, текстурата.
Ако е музика, тогаш аудитивниот кортекс ги обработува звуците, ритамот, хармонијата.

Ова е „техничкиот дел“, чисто сензорен прием.

2️⃣ Следи брза проценка. Амигдалата и орбитофронталниот кортекс прават брза емоционална проценка: „Ова ми е пријатно/непријатно?“
Тука влијаат биолошки фактори (симетрија, контраст, природни бои) и лични искуства.

Ова е „внатрешен филтер“ кој решава дали да гледаш/слушаш понатаму.

3️⃣ Ако нешто се оцени како естетски пријатно, системот за награда се активира.
Тоа е истата хемиска „среќна патека“ која се вклучува и при чоколадо, љубов или победа.

Затоа убавината може буквално да „ни даде трепет“ или да предизвика чувство на благодат.

4️⃣ Личен контекст и значење! Префронталниот кортекс и хипокампусот додаваат слоеви на значење: „Ова ме потсетува на детството“ или „Ова е стил што го ценам“.
Тука е местото каде што културата, образованието и искуството ја моделираат нашата естетска проценка.

Затоа нешто што е „убаво“ за тебе, можеби нема да биде за друг – и обратно.

💡 Интересно е што мозокот реагира слично и на уметничка убавина и на убавина во природата – но со фина разлика: природната убавина има посилна врска со еволутивните биолошки сигнали (симетрија, хармонија).

14/08/2025

Семејството е важно! Тоа е првиот извор на љубов, прифаќање и утеха. Ова создава чувство на емоционална стабилност и безбедност.
Во семејството детето учи кои се неговите вредности, верувања и културни корени. Тоа е првата „огледална“ група која му помага да ја изгради сликата за себе.
Преку интеракција со членовите учи комуникација, емпатија и соработка, што подоцна ги применува во поширокото општество.
Семејството нуди психолошка заштита во стресни периоди.
Го моделира однесувањето.
Децата, а и возрасните, често ги усвојуваат моделите на справување и навиките што ги гледаат дома.

Со други зборови, семејството е психолошка „почетна станица“, таму ги добиваме првите „алатки“ за животот.

13/08/2025

Кога е топло телото троши енергија за да ја одржи оптималната температура (околу 37°C). Овој термички стрес го зголемува заморот, ја намалува концентрацијата и ја зголемува раздразливоста.
Мозокот добива помалку ресурси за „високи“ когнитивни функции (одлучување, креативност...), бидејќи приоритет има ладењето на телото.

Екстремната топлина често е поврзана со повеќе раздразливост, вознемиреност и нетрпеливост.
Се јавува и поголема емоционална исцрпеност, што може да води кон апатија.

Когнитивните тешкотии се зачестени. Задачите кои бараат концентрација, брзо мислење или логичко решавање на проблеми се изведуваат потешко.

Топлите ноќи го нарушуваат квалитетот на спиење, што дополнително води кон намалена когнитивна функција, лошо расположение и зголемен стрес следниот ден.

Кога е топло, луѓето имаат тенденција да избегнуваат социјални активности (особено на отворено), што може да води кон изолација и намалена социјална поддршка.

Позитивните ефекти се можни, но обично само ако средината е прилагодена за справување со жештините.

11/08/2025

„Analysis paralysis“ комбинација на когнитивни и емоционални процеси кои водат до блокирање на одлуките.

Кога мозокот е изложен на премногу информации, работната меморија станува преоптоварена. Наместо да се избере решение, се влегува во циклус на споредби и проекции.
Следи хиперанализа.
Наместо да се користи доволно добра информација, лицето бара совршена сигурност, што е невозможна.

Тоа доведува до замор од одлуки
Со секоја нова опција, капацитетот за донесување квалитетни одлуки се намалува.

Тука некаде постои страв од грешка или неуспех: „Ако згрешам, последиците ќе бидат големи.“
Сè мора да биде „идеално“ пред да се почне, па ништо не се почнува.
Кога исходот е непредвидлив, мозокот се обидува да го контролира преку дополнителни анализи.
Следи одложување во име на „уште една проверка“ или „уште едно мислење“. Доминира верување дека со доволно анализа можеш да ги елиминираш сите ризици. Се инсистира на избегнување загуба, дури и по цена на пропуштање добивка.

Последиците по менталното здравје се: хронична анксиозност, намалена самодоверба, пропуштени можности, што дополнително го зајакнува циклусот на страв од одлуки.

10/08/2025

Негуваме култура на насилство, свесно или не, сите сме учесници...
👨‍👩‍👧‍👦 Ако децата растат во средина каде што насилството е начин на решавање конфликти, тие учат дека тоа е „нормално“.
🏫 Училиштата кои толерираат малтретирање (булинг) или реагираат површно, индиректно ја зацврстуваат културата на насилство.
📽 Медиуми и забавна индустрија преку глорификација на агресивни херои, насилни игри или сензационалистички вести, го прават насилството „атрактивно“.
👥️ Дехуманизација: појава кога групи луѓе се опишуваат како „непријатели“ или „закана“, станува полесно да се оправда насилството кон нив.
😅 Хуморот на сметка на насилство ги банализира насилните ситуации и ја намалува осетливоста кон нив.
🏛 Во институционални рамки, кога сторителите на насилство ретко се соочуваат со последици, се праќа порака дека тоа е дозволено. Кога законите се применуваат нееднакво, се создава перцепција дека насилството е оправдано за „некои“ но не и за други.
📌 Економска нестабилност и несигурните услови го зголемуваат бројот на конфликти, а со тоа и толеранцијата кон агресија.

‼️ Со тек на време, луѓето стануваат десензибилизирани, насилството ги шокира помалку, а понекогаш и престануваат да го препознаваат како проблем. Ова создава маѓепсан круг: повеќе насилство → повеќе толеранција → уште повеќе насилство.

08/08/2025

Каква привилегија е да имаш мирно утро. Да се разбудиш без брзање, без аларм, без веднаш да мораш „да фатиш чекор“...
Кога денот почнува смирено, нервниот систем е во рамнотежа. Утрото е време кога мозокот сè уште не е затрупан со информации. Често, токму тогаш се јавуваат креативни идеи и важни внатрешни согледувања.
Каква убавина... мирис на кафе, звукот на тишината, светлина што паѓа низ прозорецот... Спокој. Редок луксуз...

07/08/2025

Убави се луѓето кои имаат капацитет да се радуваат на туѓата среќа и да ги слават туѓите победи.

Не чувствуваат завист од туѓи успеси. Немаат потреба да се натпреваруваат или споредуваат. Доволно се сигурни во себе, па туѓата среќа не ја доживуваат како закана за својата вредност. Искрено се радуваат за другите. Ова е показател за емпатија и социјална зрелост. Често се добри пријатели, ментори или лидери кои сакаат и знаат да дадат поддршка.
Личности се со интегритет.
Ретки се, но се силно инспиративни.

Address

Opening Hours

Monday	09:00 - 20:00
Tuesday	08:00 - 20:00
Wednesday	08:00 - 20:00
Thursday	08:00 - 20:00
Friday	08:00 - 20:00

Telephone

+38976350820

Website

http://kognicija.mk/

Alerts

Be the first to know and let us send you an email when Когниција posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to Когниција:

Want your practice to be the top-listed Clinic?

Country:

City: