30/09/2025
"လူတွေဝေဖန်တာကိုမကြောက်ပါနဲ့"
🎈🔺🎈🔺🎈🔺🎈🔺🎈🔺🎈🔺
လူဆိုတာ
တစ်ယောက်ကိုတစ်ယောက်ဝေဖန်တာပဲ။
ကိုယ့်ကိုတည့်တည့်ဝေဖန်တာလည်းရှိမယ်။
ကွယ်ရာမှာ ဝေဖန်တာလည်းရှိမယ်။
ဝေဖန်တာလည်း မခံချင်၊
စိတ်ဆင်းရဲတာလည်းမခံချင်ရင်
ဘာမှ မလုပ်ဘဲနေမှ။
ဘာမှမလုပ်ဘဲနေရင်တောင်
ဘာမှမလုပ်ဘူးလို့ ဝေဖန်တာခံရမယ်။
ဒါဖြင့်ရင် ဘယ်သူနဲ့မှအတွေ့မခံဘဲ
တစ်ယောက်တည်းနေမှဖြစ်မယ်။
အဲဒါကောဖြစ်နိုင်လား။မဖြစ်နိုင်ဘူး။
လူပီသတဲ့လူတစ်ယောက်ဖြစ်ဖို့ဆိုတာ
လူတွေနဲ့ဆက်ဆံရေး ရှိမှဖြစ်မယ်။
သူတို့ဆီက အကူအညီ ယူရတယ်။
ကိုယ်ကလည်း အကူအညီ ပြန်ပေးရတယ်။
သူတို့ဆီက ပညာယူရတယ်။
ကိုယ်ကလည်းပညာ ပြန်ပေးရတယ်။
တစ်ယောက်နဲ့တစ်ယောက်မကင်းနိုင်တဲ့
လောကကြီးမှာ ဒီခံယူချက်အတိုင်း
ဆက်နေသွားမယ်ဆိုရင်
စိတ်ချမ်းသာဖို့ မလွယ်တော့ဘူး။
အကောင်းဆုံးကဘာလဲ။
ကိုယ့်အယူအဆကို ပြင်ရမယ်။
ဝေဖန်တယ်,အမှားကိုထောက်ပြတယ်ဆိုတာ
educate လုပ်တာ
(ပညာပေးတာ)ဖြစ်သင့်တယ်။
အမှားနည်းပြီးတော့
အရည်အချင်းတက်လာအောင်
ဝေဖန်ပေးသင့်တယ်။
ဝေဖန်တာဟာ punish လုပ်တာ
(ဒဏ်ပေးတာ) မဖြစ်သင့်ဘူး။
ဝေဖန်တဲ့သူကော ဝေဖန်ခံရသူကော
နှစ်ဦးနှစ်ဘက်လုံး သဘောထားမှန်ရင်
သိပ်အကျိုးများတယ်။
လွဲနေတာမှားနေတာကို
ထောက်ပြမယ့်သူရှိမှ ဖြစ်မယ်။
မေတ္တာနဲ့,ကရုဏာနဲ့,ဉာဏ်ပညာနဲ့
ယှဉ်ပြီးတော့ ထောက်ပြရမယ်။
ခံရတဲ့သူကလည်း
ငါ့ကို မုန်းလို့ပြောတာမဟုတ်ဘူး။
အရှက်ခွဲတာ မဟုတ်ဘူး။
အမှားနည်းအောင်,အရည်အချင်းတက်အောင်
ပြောတာလို့ သဘောထားနိုင်ရမယ်။
ဒါဟာ ကိုယ့်စိတ်က
တော်တော်ခိုင်မာမှရတယ်။
သူ ဝေဖန်တာ မှန်နေရင်
ဝမ်းသာစရာတောင်ကောင်းနေသေးတယ်။
ကိုယ့်အမှားကို,ကိုယ်လိုနေတဲ့အချက်ကို
စောစောသိရတာကောင်းတယ်။
သူဝေဖန်တာမမှန်ရင်
ပြန်ရှင်းပြလို့ရရင် ရှင်းပြရမယ်။
မရရင်လည်း ကိုယ့်အလုပ်ကိုယ်
ဆက်လုပ်နိုင်ရမယ်။
ရေရှည်မှာ မှားတယ်၊မှန်တယ်ဆိုတာ
အလုပ်က သက်သေပြပါလိမ့်မယ်။
လောက လူတွေရဲ့ သဘာဝတစ်ခုက
ကြောက်လေ ခြောက်လေပဲ။
ဒါကြောင့်. . .
ဝေဖန်မှာကို သိပ်မကြောက် ပါနဲ့။
သိပ်မကြောက်ရင် ဝေဖန်နေတဲ့သူက
ပြောအား သိပ်မရှိတော့ဘူး။
ဆရာတော်ဦးဇောတိက (မဟာမြိုင်တောရ)
