27/09/2025
ရှင်ပြုသည် ဆိုသည်မှာ
🌸🔺🌿🌸🔺🌿🌸🔺
ဒို့ ရှင်ပြုတယ်ဆိုတာ မသေအောင်ပြောတာ၊
ရှင်တာဆိုတာ သေတာနဲ့ဆန့်ကျင်ဘက်မဟုတ်ဘူးလား။
( မှန်ပါဘုရား ... )
ရှင်ပြုတယ်ဆိုတာ ရှင်အောင်ပြုတာ
အဲဒါကို ရှင်ပြုတဲ့. . . ကြားဖူးလား ။
ဒို့ အခုလက်ရှိရွာထဲလူတွေနဲ့ ရွာထဲစိတ်အတိုင်းဆိုရင်
ဒို့က ခင်မင်စိတ်နဲ့လိုက်လုပ်နေရတာ ။
ရွာထဲမှာ ပစ္စည်းမခင်မင်ရင်လည်းမရနိုင်ဘူးလေ၊
ငွေကစ ခင်မင်မှရတယ် ဟုတ်ဗျာ ။
( တင်ပါ့ဘုရား ... )
ရွာထဲမှာက လိုချင်စိတ်နဲ့လုပ်ရတာ ။
ဒို့ သာသနာမှာက လိုချင်စိတ်ပယ်ရတယ်၊
မလိုချင်အောင်ကြိုးစားရတယ် ဟုတ်နော်...။
လိုချင်စိတ်ရဲ့ဆက်တွဲက ဘာလာမှာတုန်းဆိုရင်...
လိုချင်တာမရရင် မကျေနပ်စိတ်လာမှာပေါ့ ဟုတ်နော်။
လိုချင်စိတ်အားကြီးနေလို့ဖြစ်စေ၊
မကျေနပ်စိတ်အားကြီးနေလို့ဖြစ်စေ၊
စိတ်မဲကြီးဝင်လာရင် ဘာဖြစ်ဖြစ်လည်းဝင်လာမှာပဲ ။
`မောဟ´ ဆိုတာ ဘာဖြစ်ဖြစ်ကိုပြောတာပါ ။
• လောဘလွန်တော့ ဒို့စာလိုတော့ အဟီရိကပေါ့၊
ရှက်ရကောင်းမှန်းမသိတော့ဘူးလေ။
• ဒေါသလွန်လာတော့ အနောတ္တပ္ပဖြစ်သွားမှာပေါ့၊
ကြောက်ရကောင်းမှန်းမသိတော့ဘူးလေ။
• အဟီရိက အနောတ္တပ္ပ ဆိုတဲ့`မောဟ´က
တခြားကလာတာမဟုတ်ဘူး၊ ဒို့ လောဘလွန်
ဒေါသလွန်ကနေလာတာ၊ ဟုတ်နော်... ။
ပြီးတော့ ဒေါသလွန် လောဘလွန်တဲ့ပုဂ္ဂိုလ်
ကိုယ့်စိတ်ကိုယ့်ဆီမှာမရှိဘူး ပျံ့နေတယ်။
ပျံ့နေတယ်ဗျ ဥဒ္ဓစ္စစိတ် ...
အဲဒီမောဟဆိုတာလည်း
အဲဒီလောဘ ဒေါသ ၂ခုနဲ့လုပ်ရတာပါ။
သို့သော် ရွာထဲမှာဒေါသနည်းပါတယ်၊သောကများပါတယ်၊
သောကနဲ့လုပ်ရတာများပါတယ်၊ ဟုတ်နော်... ။
ကိုယ် ကိုယ်တိုင်ခေါင်းမှမအေး စိတ်မှအထိုင်မကျဘဲ၊
ဘာလုပ်လုပ် ယတိပြတ်မဆုံးဖြတ်နိုင်ဘူး ။
အဲ့တော့ ကိုယ် ကိုယ်တိုင်မသိတော့
ချီတုံချတုံ ' ဝိစိကိစ္ဆာ ' လည်း မောဟလည်း ဝင်မှာပဲ ။
အဲဒါအကုန်လုံးပေါင်းရင်တော့
ကြိုက်စိတ်တခုအကြောင်းပြုလို့ အဲဒါဖြစ်တာ ။
• အဲ့တာဖြစ်လို့ သေခါနီး သက်မဲ့ပစ္စည်းဖြစ်ဖြစ်၊
သက်ရှိပစ္စည်းဖြစ်ဖြစ်၊ ဟောဒါငါ့ပစ္စည်း
ဟောဒါက ငါ့သားငါ့သမီး၊ ငါ့မိသားစု
သူတို့အပေါ်ကိုခင်မင်စိတ်နဲ့သေရင် `ပြိတ္တာ´။
• သူတို့အပေါ် ငါမရှိရင် ဒင်းကလေးတို့ဆိုရင်
စိတ်မချစိတ်နဲ့သေရင်တော့ `ငရဲ´သွားမှာ။
• ပြီးတော့ ဒါကတော့ငါ့မိသားစုပဲ ဒါကတော့ငါ့အိမ်ပဲ၊
သေစရာရှိတာတောင် ဆေးရုံမှာသေမယ်ဆိုရင်တောင်
အသေမခံဘူး၊သေချင်းသေ ငါ့အိမ်ပြန်ပို့
ငါ့အိမ်မှာပဲသေမယ်။ ရှိသလား ဒီလိုမျိုး ....
( ရှိပါတယ်ဘုရား ... )
ဲဒါကငါ့အိမ် ဒါကငါ့မိသားစု ဒီစိတ်နဲ့သေရင်အဲဒီနားမှာပဲ
တိရစ္ဆာန်လာဖြစ်မှာ၊ စွဲတဲ့နေရာလာပြီး`တိရစ္ဆာန်´ဖြစ်မှာပဲ ။
• အသူရကာယ်ဆိုတာ စာလိုကျတော့
အကောင်ကြီးတွေကိုခေါ်တာပါ။
ပြိတ္တာဆိုတာက အိမ်စွဲတဲ့ပုဂ္ဂိုလ်ကလည်း လက်ရှိဒီရုပ်
ဒီအရွယ်ဒီပုံစံအတိုင်းပါ မပြောင်းဘူး
အသူရကာယ်ကျတော့ပြောင်းတယ် ။
အသူရကာယ်က ဘယ်လိုလူတွေရောက်တတ်တုန်းဆိုတော့
အလှူမတတ်သူတွေရောက်တာ၊ ကျောင်းလှူတယ်
ဒါငါ့ကျောင်း ငါ့ကျောင်းနဲ့ ဒိဋ္ဌိနဲ့စွဲနေတယ်လေ၊
သေခါနီးကျောင်းအာရုံပြု ၊ အဲဒါသဘက်ဖြစ်။
အဲဒါကို ` အသူရကာယ်´ ခေါ်တာလေ ...
ရှေးခေတ်ကတော့သဘက်လို့သုံးတယ် ဒို့တောက ။
သူကအကောင်ကြီးတယ်...
ဒီလိုသေလို့ဒီလိုပုံစံအရွယ်မဟုတ်ဘူး။
• အသူရကာယ်ဆိုတာ အလှူမတတ်သူတွေ
ရောက်တာတဲ့ဗျ၊ အလှူမတတ် ၊
ကျောင်းဒကာ ကျောင်းပြန်စောင့်ရတတ်တယ်၊
အလှူမတတ် ဘုရားဒကာ ဘုရားပြန်စောင့် ။
အဲဒါကို အပါယ်လေးဘုံလို့ခေါ်တာပါ ။
• အဲဒီဘဝတွေရောက်တော့ ဒို့ ပါရမီမတက်တော့ဘူးလေ။
တိရစ္ဆာန်တဘဝလုံးကြည့်ပါ ပါရမီမတက်ပါဘူး။
တက်ဖို့နေနေသာသာ တက်ရကောင်းမှန်းကိုမသိတာ။
သူတို့မှာဓာတ်ကောင်၊ ဒို့လိုကုသိုလ်နဲ့ဖြစ်တာ
မဟုတ်တဲ့အတွက် ဥာဏ်မပါဘူး ။
ဓာတ်ကောင်က သူ့ဓာတ်နဲ့တည့်ရင် ကြိုက်တယ်၊
မတည့်ရင် မကြိုက်ဘူး ။
အဲ့တော့ တိရစ္ဆာန်ဘဝ ဘဝပေါင်းများစွာ ဒီစိတ်နဲ့သွားတာ။
အဲ့တော့ အပါယ်လေးဘုံမှာ အညွှန့်တက်လို့လား?
( မတက်ပါဘုရား ... )
အဲ့တော့ အညွှန့်မတက်ရင် သစ်ပင်မှာသေတာပေါ့ ။
ဒီကြား ထဲ သစ်ပင်အခြောက်ကြီးဆိုတော့
ပိုးကိုက်ခံရအုန်းမှာထင်တယ်... ။
မြွေကြည့်ပါ၊ တဘဝလုံးလုံး ကြွက်တို့ ဖားတို့
အဲဒါတွေလိုက်စားနေရတာ ... ။
သူများအသက်နဲ့အသက်ရှင်ရတဲ့တိရစ္ဆာန်မှန်သမျှ
သူ့မှာ အညွှန့်မတက်တဲ့အပြင် ပိုးကိုက်ခံရသေးတယ်။
ပိုးကိုက်ခံရမှတော့ ပင်တိုင်တောင်ရှိပါအုန်းမလား၊
( မရှိပါဘုရား ... )
• အဲ့တာအသေပဲလေ၊ ဟုတ်ကဲ့လား ...။
အဲဒီဘဝတွေရောက်တော့ သက်တော့သက်ရှိမှာပေါ့၊
ဘဝရှိ အသက်ရှိလိမ့်မယ်ထင်တယ် ။
ဘဝတော့ရှိမှာပေါ့ ပါရမီရှေ့မတိုးတဲ့အတွက်
အဲဒါ အသေဘဝ ... ။
အဲ့ဒိအသေကလွတ်အောင် အပါယ်ကလွတ်အောင်
ပြုစုတာကို ရှင်အောင်ပြုလို့ ' ရှင်ပြု ' လို့ခေါ်တာ။
အဲ့ဒိအသေက ရှင်အောင်ပြုတာကို ရှင်ပြုတာ ။
( မှန်ပါဘုရား ... )
ဘယ့်နှယ်တုန်း ရှင့်ဒကာကြီး ပြုနိုင်ပါ့မလား ။
( ကြိုးစားပါ့မယ်ဘုရား ... )
ဒို့ လူဖြစ်တော့ အညွှန့်ရှိတယ်လေ တက်နိုင်တယ်၊
အရွက်ကောမထွက်နိုင်ဘူးလား ။
လူသည်အရွက်လည်းထွက်ပါတယ်
အညွှန့်လည်းတက်ပါတယ် ... ။
• နတ်မှာတော့ အညွှန့်တော့တက်နိုင်ပါတယ်၊
အရွက်မထွက်ဘူး ... ။
သူတို့က ဒို့လိုဘူတရုပ်မဟုတ်ဘူး ဥပါဒါန်ရုပ်တွေလေ၊
အစွဲရုပ်ခေါ်သပေါ့ ... ။
အစွဲရုပ်ဆိုတော့ ဒို့လို လှူဖို့ရာပစ္စည်းမရှာနိုင်မဖွေနိုင်ဘူး၊
ဒို့လိုလည်းမကျင့်နိုင်ဘူး ... ။
ဒို့ စာကဆိုတာတော့ ဒီကကျင့်နည်းပါသွားမှ၊
ဒီကအရှိန်ပါသွားမှ ဟိုမှာအညွန့်တက်တာ ။
ဒီကဘာမှပါမသွားဘူး ဒါနတခုကောင်းလေးနဲ့
နတ်သွားဖြစ်ရင်၊ ဟိုကျ ယောင်ပေယောင်ပေနဲ့
အချိန်ကုန်မှာ ဟုတ်ဗျာ ...။
ဒို့ရန်ကုန်လိုပြောရင် ညစျေးတန်းလျှောက်တာနဲ့ပြီးသွားမှာ။
ဒို့ လူမှာက အညွှန့်လည်းတက် အရွက်လည်းထွက်နိုင်ရင်၊
ပွင့်လည်းပွင့် သီးလည်းသီးနိုင်တယ် ဟုတ်နော် ... ။
အဲဒီလို အညွှန့်လည်းတက်တယ် အရွက်လည်းရှိတယ်၊
အဲဒီကနေ အရွက်ကြောင့် အညွှန့်ကြောင့် သူ့မှီခိုပြီး၊
ပွင့်ပြီ သီးပြီဆိုရင် ရှင်ပြီနော် ... ။
အဲဒီလိုကိုရှင်ရမှာတဲ့ဗျ ... ။
• ရှင်ပြုတယ်ဆိုတာ အဲဒါပြောတာ ...
ရှင်အောင်ပြုရမှာ ဟုတ်နော် ... ။
• အဲ့တော့ ရှင်ဒကာ ရှင်အမဆိုတာ
လယ်ပိုင်ရှင်ယာပိုင်ရှင်ပဲ။
လယ်ပိုင်ရှင်ယာပိုင်ရှင်က မျိုးစေ့ချပြီးရင်
ရှင်အောင်ပြုစုရမှာ ။
ရှင်အောင်ပြုစုမှ အရွက်ထွက်မှာ အညွှန့်တက်မှာ
အနှံကြီးမှာပေါ့ ။
ပြီးတော့ လယ်သမားယာသမားက
စိုက်ပြီးတဲ့နောက်လည်း၊အခုခေတ်ပြောတဲ့
နှံဖျက်ပိုးတို့ ရွက်လိပ်ပိုးတို့
ဒါတွေမကျအောင်လည်း ထိန်းရအုန်းမှာဗျ ။
အဲတော့ ဒို့က ရှင်ပြုတာက သင်္ကန်းလေးစီးလိုက်ပြီး
ကတုံးလေးတုံးလိုက်ရင် ပြီးပြီလို့ထင်တာနော် ။
အဲလိုမဟုတ်ဘူး ရှင်အောင်ပြုရမှာနော် ။
ဒို့စာလိုတော့ သာမဏေရ
သမဏနဲ့ ဧရ ၂ခုပေါင်းမှ သာမဏေရ ခေါ်တာ ။
သာမဏဆိုတာ ငြိမ်သက်အေးချမ်းခြင်းရှိသူလို့
အဓိပ္ပါယ်ရတယ် ... ။
• ဘိက္ခုဆိုတာ ရဟန်း
• ကိုရင်ကျတော့ သာမဏေ
ဘိက္ခုကျတော့ ကိလေသာကိုအကြွင်းမဲ့ဖျက်ဆီးပစ်တာ၊
" ကိလေသေ ဘိန္ဒတီတိ ဘိက္ခု "
ကိလေသာကိုဖျက်ဆီးတာရဟန်း၊
အဲဒါကို ဘိက္ခုလို့ခေါ်တာ ။
ကိလေသာကိုဖျက်ဆီးတာမဟုတ်ဘူး၊
ထကြွသောင်းကျန်းနေတဲ့ကိလေသာကို
အေးငြိမ်းအောင်လုပ်တာ သမဏ ကိုရင် ။
အဲ့တော့ သမဏဆိုတာအဲ့ဒါပြောတာဗျ
ကိလေသာငြိမ်းအောင်လုပ်ရမှာ ။
ရှိတဲ့အရွယ်ကတော့ မိဘကမွေးတဲ့ကလေးလေ
ကလေးကတော့ ကလေးလိုဆော့မှာပေါ့
သို့သော် ကျင့်နေတဲ့အချိန်မှာ သာမဏေဖြစ်ရမယ်။
ဒို့ ရန်ကုန်မှာကျတော့ ဆရာများက
သူတို့ကိုပုံသွင်းကောင်းတယ် ။
ဆရာတွေကတော့ လူငှားတွေနဲ့တူပါတယ် ။
ငယ်သူလေးတွေကျတော့ ငယ်သူနဲ့တန်အောင်၊
၁၅မိနစ်စီ တရားအထိုင်ခိုင်း ကလေးကဒါလောက်ပဲရမှာပေါ့၊
ဒို့ လူကြီးလို ၁နာရီ ၂နာရီတော့မရနိုင်ဘူး ။
၁၅မိနစ်တန်းဖြုတ်ရင်တော့ ကလေးပဲ ...
၁၅မိနစ်ထိုင်နေတဲ့အချိန်ဟာ ကိလေသာ
ငြိမ်သက်နေတာလေ၊ သာမဏေပေါ့ ... ။
အဲဒီကလေးတွေက အိမ်ပြန်လာရင်
ည၇နာရီဆို ဘုရားဝတ်တက်ပြီ။
ဒါပြီး၁၅မိနစ်တရားထိုင်ကုန်ကြပြီ ။
အလေ့အကျင့်နော် ကောင်းတာဖြစ်ဖြစ် ဆိုးတာဖြစ်ဖြစ်
ကျင့်ယူရတာနော်၊ အလကားနေရင်းတတ်တာမရှိဘူး ။
ဒီလိုဆို သူတို့လေးတွေ ပါရမီမရှင်သန်နိုင်ဘူးလား ။
( ရှင်သန်နိုင်ပါတယ်ဘုရား ... )
ဒီကလေးတွေက ကျုပ်တို့ ခင်ဗျားတို့ထက်သာတယ်၊
သူတို့က ကျုပ်တို့လိုစိတ်မနှံ့ဘူး ။
ကျုပ်တို့လူကြီးတွေက စိတ်နံ့တာ စကြာဝဠာအထိနှံ့တာဗျ။
စိတ်မနှံ့တာကလေး ဘယ်မှမသွားဘူးလေ၊
အတွေ့အကြုံလည်းဘယ်မှမရှိဘူးလေ၊
သူတို့က ခဏလေးနဲ့ရတာ လူကြီးလိုမဟုတ်ဘူး၊
မြင်တာတော်တော်မြန်ပါတယ် ။
ပြင်ကြည့်ပါ ဥယျာဉ်မှုးက၊
ဆရာသမားများ ရဟန်းများကလည်း
အဲဒီလိုပုံသွင်းပေးကြရမယ် ရှင်ကျန်နေရစ်ရမယ်။
အသွင်းနဲ့တင်မပြီးစေရဘူး သာမဏေတက်ကြရမှာ။
သာသနာနဲ့ကြုံတုန်း ဒီသာသနာမှာသီးရင်သီး၊
နောက်သာသနာဆိုတာလည်း ဒီကမျိုးစေ့ချန်ထားမှလေ၊
မျိုးစေ့မှချန်မထားရင် နောက်သာသနာမှာ
စိုက်စရာပျိုးစရာ ရှိမှာမဟုတ်ဘူးလေ ။
အဲ့တော့ ဒို့က ပြုစုပျိုးထောင်ရမှာ၊
သူတို့ရှင်အောင်ပြုစုပျိုးထောင်ဖို့
မယ်တော် ခမည်းတော်နဲ့ ဥပစ္ဈယ်ဆရာအရေးကြီးဆုံး ။
ဒါရှင်ပြု ဒို့အမြဲပြောနေကြစကားတွေပါ ...
ဒို့ကရှင်အောင်ပြုရမှာနော်...
• လူကလူ
• လူကနတ်
• လူကအရိယာ
အဲဒါရှင်တာ အပင်တက်တာ။
အဲ့သလောက်ထိရှင်အောင်ပြုရမှာဗျ ...
ပြုနိုင်ကြပါ့မလား ရှင်ဒကာ ရှင်ဒကာမတွေက ။
( ကြိုစားပါ့မယ်ဘုရား ...)
မဟာဗောဓိမြိုင်ဆရာတော်ဘုရားကြီး
