30/09/2022
ရန်ကုန်မှာတော့ မသိဘူး၊ နယ်မှာတော့ ဆေးခန်းလာပြရင် ဆေးမထိုးပေးလို့မရဘူးဗျ ။
ခဗျားတို့သိတဲ့အတိုင်းပဲ အထွေထွေရောဂါကုဆေးခန်းဆိုတာကလည်း ကျန်းမာရေး ဝန်ဆောင်မှုပေးတဲ့ အသေးစားစီးပွားရေးလုပ်ငန်းလေးတစ်ခုပဲ ။ ကျွန်တော်တို့အနေနဲ့က လူတွေနေမကောင်းဖြစ်ရင် ပျောက်အောင်သက်သာအောင်ကုပေးရသလို တစ်ချိန်ထဲမှာပဲ အန္တရာယ်မရှိဘူးဆိုရင် လူနာအလိုကျ ( customer အလိုကျ) လိုက်လျောရတာလေးတွေလည်းရှိတယ် ။
လူနာအများစု ( အသက်ကြီး ၊ အတန်းပညာနှိမ့် ၊ ဆေးပညာဗဟုသုတနည်း ၊ ရွာမှာနေ ) က ဆေးထိုးမှ ပျောက်တယ်လို့ ယူဆကြတယ် ။ သူတို့တွေးတာက ဆရာဝန်ဆီလာတာ ဆေးထိုးချင်လို့ ၊ ဆေးသောက်ရုံပဲဆို ဆေးဆိုင်ပဲ သွားဝယ်မှာပေါ့ ။ ဆေးဆိုင်မှာ ဆေးဝယ်သောက်တာ မပျောက်လို့ ဆရာဝန်ဆီလာဆေးထိုးတာပေါ့။ အဲ့လိုတွေးတာ ။ ကိုယ်ကဆေးထိုးမပေးလိုက်ရင် placebo ဇောက်ထိုးရမယ်ထင်တယ် ။ ရောဂါကပျောက်လာရင်တောင် မပျောက်ဘူးထင်မယ် ။ နောက်ပြီး သူတို့က ဆရာဝန်စမ်းသပ်ခဆို သိပ်မပေးချင်ဘဲ ဆေးထိုးခလို့ပဲ သက်မှတ်ထားကြတယ် ။ ပညာကို တန်ဖိုးမထားတတ်တဲ့ society ဖြစ်နေတာလည်း ပါတယ် ။ ပညာအတွက် ပိုက်ဆံသိပ်မပေးချင်ကြဘူး ။
အခု ဒီဟာကို ဆန့်ကျင်ဖို့က လုံးဝကို မထိုးသင့်တဲ့ ကလေးတွေကို လုံးဝမထိုးပါကနေစနေရတယ် ။ ကလေးတင်ပါးကတော့ တကယ်ပြောတာ လုံးဝမထိုးသင့်ဘူး ထိုးလည်းမထိုးရဲဘူး ။ မကျေနပ်ရင် အခြားထိုးပေးတဲ့ဆရာဆီသွား ဒီလိုပဲပြောရတာ။ အခုတဖြည်းဖြည်းနဲ့အောင်မြင်လာတယ် ။ ဘာလို့ဆို ကလေးလူနာကနေရမယ့် ငွေကြေးထိခိုက်မှုကို ကျွန်တော်က ခံသင့်သလောက်ခံနိုင်တယ် ။ ကလေးမိဘအချို့ကလည်း ကလေးကိုဆေးမထိုးသင့်တာ အနည်းနဲ့အများ လက်ခံကြတယ် ။
အဲ့ လူကြီးတွေကို မလိုအပ်ဘဲဆေးမထိုးဖို့ကတော့ အဲ့ယဉ်ကျေးမှုက ချက်ချင်းပြောင်းဖို့မလွယ်သလို ခုနလို ဆေးမထိုးပေးလို့ ကိုယ့်ဆီလာမထိုးလို့ လူနာတွေ ဝုန်းဒိုင်းကျသွားတာကို ကိုယ်က မခံနိုင်ဘူး။ ဆေးကုတိုင်း အဲ့ကိစ္စ HE ပေးဖို့ကလည်း ထင်သလောက်မလွယ်ဘူးလေ ။ ဆရာတစ်ယောက်ဆို ဆေးမထိုး ဆေးခန်းဖွင့်ထားတယ်။ လုံးဝမထိုးဘူး။ သူ့ဆီလည်း သူ့မိတ်နဲ့သူ ပြုံကျနေတာပဲ။ ဒါပေမယ့် သူက ဘောစိဗျ ။ ငွေကြေးအတွက် ဆေးမကုဘူးဆိုတဲ့ အချိန်ရောက်လာရင် ကျွန်တော်လည်း အဲ့လိုလုပ်မယ် စိတ်ကူးတယ် ။ ဆေးလုံးဝမထိုးဘူးတော့မဟုတ်ဘူး ။ တော်ရုံမလိုအပ်ရင် လုံးဝမထိုးဘူးလို့ ငြင်းရဲတဲ့အခြေအနေမျိုးပေါ့ ။
အခုကတော့ မဖြစ်မနေဆန့်ကျင်သင့်တာကို ဆန့်ကျင်ပြီး ကိုယ့်စီးပွားရေးကို အများကြီးထိခိုက်နိုင်တာကိုတော့ မဆန့်ကျင်ရဲသေးဘူးလို့ပဲ ပြောရမှာပါပဲ ။ ဒီ ပို့စ်ကို ဖတ်တဲ့ မိတ်ဆွေတွေကတော့ ဖြစ်နိုင်ရင် မလိုအပ်ရင် ဆေးမထိုးပေးတာက ဘေးထွက်ဆိုးကျိုးပိုနည်းတယ်ဆိုတာကို သိစေချင်တယ် ။
အကြောဆေးရဲ့ဘေးထွက်ဆိုးကျိုးတွေဆို ချက်ချင်း shock ဖြစ်တတ်တာ ၊ infection ဝင်တာတွေက ကြောက်စရာကောင်းတယ်။ အသားဆေးဆိုလည်း အကြောထိသွားပြီး ခြေမသန်စွမ်းဖြစ်တာ ၊ ပိုးဝင်ပြီး အနာရင်းလာတာ ၊ ခွဲစိတ်ပစ်ရတာ ၊ မလိုအပ်ဘဲ အသားနာတာ အဲ့လိုဟာတွေက ဖြစ်တတ်တယ် ။ အဲ့တော့ သောက်ဆေးလောက်နဲ့ပျောက်နိုင်မယ့် ရောဂါဆို ဆေးမထိုးတာ အကောင်းဆုံးပဲ ။
Credit to ဆရာဝန်ဖင်ရှည်
