What are the opening hours?

Monday 07:00 - 20:00 Tuesday 07:00 - 20:00 Wednesday 07:00 - 20:00 Thursday 07:00 - 20:00 Friday 07:00 - 20:00 Saturday 07:00 - 20:00 Sunday 07:00 - 20:00

https://www.facebook.com/120383184501129/

LifeCare, 366 A, Gandama Street, 8 Ward, Dagon (2025)

13/09/2025

🌟 တီဘီရောဂါကို ကာကွယ်ပြီး မိသားစုနဲ့မိမိ ရဲ့အနာဂတ်ကို ကာကွယ်ပါ🌟
TB တွေ့လို့ နိုင်ငံခြားမသွားလိုက်ရဘဲ ပိုက်ဆံတွေကုန်သွားတာ၊ အိမ်မက်တွေ အကောင်ထည်ဖော်ဖို့ နောက်ကြသွားတာတွေ နီးစပ်ရာတွေကကြားနေရပါတယ်။ TB ဟာကာကွယ်လို့ရပါတယ်။ ကျွန်တော်တို့ သိပ်မသိသေးတဲ့ TB ကိုဘယ်လိုကာကွယ်လို့ ရမလဲဆိုတာကို ပြောပြပေးပါမယ်။ အချိန်လေးပေးပြီးဖတ်စေချင်ပါတယ်ခင်ဗျ။
လူအများစုက တီဘီရောဂါကာကွယ်ရေးအတွက် BCG ကာကွယ်ဆေးကိုသာသိကြပြီး တီဘီ ကာကွယ်ဆေး (TB Preventive Treatment - TPT) ကို သိပ်မသိကြပါဘူး။ တကယ်တော့ ဒီနှစ်ခုဟာ မတူညီတဲ့ ရည်ရွယ်ချက်တွေနဲ့ ကာကွယ်ပေးပါတယ်။
________________________________________
💉 BCG ကာကွယ်ဆေး
• မွေးကင်းစကလေးတွေကို ပြင်းထန်တီဘီရောဂါတွေကနေ ကာကွယ်ပေးပါတယ်။
• မြန်မာနိုင်ငံရဲ့ အမျိုးသား ကာကွယ်ဆေးထိုးအစီအစဉ်မှာ အခမဲ့ ထိုးနှံပေးပါတယ်။
• လက်မောင်းမှာ အမာရွတ်လေးတစ်ခု ကျန်ခဲ့တတ်တာ ပုံမှန်ပါပဲ ✅။
• ကလေးငယ်တိုင်း အစောပိုင်းကာကွယ်မှု ရရှိဖို့ BCG ကာကွယ်ဆေးကို မဖြစ်မနေထိုးသင့်ပါတယ်။
________________________________________
💊 တီဘီ ကာကွယ်ဆေး (Tuberculosis Preventive Treatment - TPT)
တီဘီပိုးကို ထိတွေ့ခဲ့သောသူများရဲ့ 10-30% မှာမိမိခုခံအားကတိုက်ထုတ်သော်လည်း ခန္ဒာကိုယ်ထဲမှာရှင်သန်ကျန်နေနိုင်ပြီး အဲ့ထဲက 10% က TB ရောဂါကိုခံစားရပါတယ်။ ကျန်တဲ့ 90% မှာတော့ TB ပိုးဟာခန္ဒာကိုယ်ထဲမှာပုန်းနေတတ်ပြီး Latent TB ဟုခေါ်သော လက္ခဏာမပြသော TB ဖြစ်လာပါတယ်။

တီဘီကာကွယ်ဆေးဆိုတာ တီဘီရောဂါပိုးနဲ့ ထိတွေ့ခဲ့ရသူတွေအတွက် ဖြစ်ပါတယ်။ ဒီဆေးက တီဘီရောဂါပိုးကို ရောဂါအဖြစ် ပြောင်းလဲမလာအောင် ကာကွယ်ပေးတာပါ။

👨‍👩‍👧 ဘယ်သူတွေ TPT သောက်သင့်လဲ?
• တီဘီလူနာနဲ့ အတူနေထိုင်တဲ့ အသက် ၅ နှစ်အောက် ကလေးငယ်များ
• HIV ပိုးရှိသူများ (အသက်အရွယ်မရွေး)
• တီဘီလူနာရဲ့ အိမ်ထောင်စုဝင်များ (တီဘီရောဂါမရှိကြောင်း စစ်ဆေးပြီးနောက်)
• ဆေးကုသမှုမခံယူထားသောတီဘီလူနာနှင့် ၃ လအတွင်း တစ်ပတ်လျှင် ၈ နာရီထက်ပို၍ အတူနေသူများ (တီဘီရောဂါမရှိကြောင်း စစ်ဆေးပြီးနောက်)
• အခြားသော အန္တရာယ်ရှိနိုင်တဲ့ အုပ်စုများ (silicosis ရှိသူ၊ အင်္ဂါအစားထိုးကုသသူများ၊ ကိုယ်ခံအားနည်းသူများ)
• လိုအပ်လျှင်ကိုယ်ဝန်ဆောင်မိခင်တွေအနေနဲ့ ဆရာဝန်နဲ့ တိုင်ပင်ပြီး TPT ယူသင့်ပါတယ်။

🚫 ဘယ်သူတွေ TPT မသောက်သင့်ဘူးလဲ?
• လက်ရှိ တီဘီရောဂါ ခံစားနေရသူများ (သူတို့က ပုံမှန်တီဘီဆေးကုသမှု လိုအပ်ပါတယ်)
• အသည်းရောဂါပြင်းထန်စွာ ခံစားနေရသူများ
• တီဘီဆေးနဲ့ ဓာတ်မတည့်သူများ
🔎 TPT မစခင် ဆရာဝန်တွေက ဘာတွေစစ်ဆေးမလဲ?
• တီဘီရောဂါလက္ခဏာများ (ချောင်းဆိုး၊ ကိုယ်ပူ၊ ကိုယ်အလေးချိန်ကျဆင်း၊ ညဘက်ချွေးထွက်) ရှိမရှိ စစ်ဆေးခြင်း
• ရင်ဘတ်ဓာတ်မှန်နှင့် သလိပ်စစ်ဆေးခြင်း
• အသည်းစစ်ဆေးခြင်း
• လိုအပ်ပါက HIV (သို့) ကိုယ်ဝန်ရှိမရှိ စစ်ဆေးခြင်း။

📅 TPT ဆေးညွှန်းများ (မြန်မာ့အမျိုးသားတီဘီထိန်းချုပ်ရေးအစီအစဉ် - NTP အကြံပြုချက်များအရ)
• 3HP - တစ်ပတ်တစ်ကြိမ်၊ ၃ လ - Isoniazid (H) + Rifapentine (P)
• 6H - နေ့စဉ်၊ ၆ လ - Isoniazid (H)
💡 သင့်အတွက် ဘယ်ဆေးက အသင့်တော်ဆုံးလဲဆိုတာ ဆရာဝန်က ရွေးချယ်ပေးပါလိမ့်မယ်။ အစိုးရကျန်းမာရေးဌာနတွေနဲ့ NGO ဆေးခန်းများစွာမှာ အခမဲ့ရနိုင်ပါတယ်။

🩺 TPT သောက်နေစဉ်ကာလအတွင်း...
• ဘေးထွက်ဆိုးကျိုး ရှိမရှိနဲ့ ဆေးမှန်မှန်သောက်ရဲ့လားဆိုတာကို လစဉ် စစ်ဆေးပါတယ်။
• အာရုံကြောဆိုင်ရာ ပြဿနာတွေ မဖြစ်အောင် Isoniazid ဆေးနဲ့အတူ ဗီတာမင် B6 ကို တွဲဖက်ပေးလေ့ရှိပါတယ်။
________________________________________
✅ အဓိက မှတ်သားစရာ
• BCG ဟာ မွေးကင်းစကလေးငယ်တိုင်းကို ကြိုတင်ကာကွယ်ပေးဖို့ အတွက်ဖြစ်ပြီး၊ TPT ကတော့ တီဘီပိုးနဲ့ ထိတွေ့ခဲ့တဲ့သူတွေကို ရောဂါအဖြစ် မပြောင်းအောင် ကာကွယ်ဖို့အတွက်ပါ။
• မွေးကင်းစကလေးငယ်တိုင်းကို BCG ကာကွယ်ဆေး ထိုးနှံပေးပါ။
• မိသားစုဝင်တစ်ဦးဦးမှာ တီဘီရောဂါရှိရင် အနီးဆုံးတီဘီဆေးခန်းကို သွားရောက်ပြီး စစ်ဆေးမှုနဲ့ TPT ရယူပါ၊ ကာကွယ်ပါ။
ကြိုတင်ကာကွယ်ခြင်းက အသက်ပေါင်းများစွာကို ကယ်တင်နိုင်ပြီး တီဘီရောဂါကူးစက်မှု သံသရာကို ဖြတ်တောက်နိုင်ကာ မိမိနှင့် မိသားစုအနာဂတ်ကိုလည်းကာကွယ်နိုင်ပါတယ်။

Reference: WHO, NTP

10/09/2025

🦠 တီဘီ အဆုတ်ရောင် (TB) ရောဂါ (သို့) ကျွန်တော်တို့ရဲ့ ဘုံရန်သူ
ကျွန်တော်တို့ရဲ့ရန်ကုန်မြို့ကြီးဟာ မပြီးဆုံးနိုင်‌သေးသောTB တိုက်ပွဲကိုတိုက်နေရတာဖြစ်ပါတယ်။ လူဦးရေ ၁၀၀,၀၀၀ မှာ ၈၀၀ က TB ပိုးတွေ့နေရပါတယ်။ တီဘီရောဂါဟာ အဖြစ်များပေမယ့် စောစောသိ၊ စောစောကုရင် ပျောက်ကင်းနိုင်တဲ့ ရောဂါတစ်ခုပါ။ မိမိနဲ့ မိသားစုကို ဘေးကင်းအောင်ထားနိုင်ဖို့ TB နဲ့ပတ်သက်ပြီး ဒီအချက်တွေကို သိထားဖို့ လိုအပ်ပါတယ်။
________________________________________
👉 ဘယ်အချိန်မှာ တီဘီလို့ သံသယရှိရမလဲ?
မိမိ (သို့မဟုတ်) မိသားစုဝင်တစ်ဦးဦးမှာ အောက်ပါလက္ခဏာတွေ ရှိနေရင် ဆရာဝန်နဲ့ အမြန်ဆုံးပြသပြီး စစ်ဆေးသင့်ပါတယ်၊
• ချောင်းဆိုးတာ ၂ ပတ်ကျော် ကြာနေရင်
• သွေးပါအောင် ချောင်းဆိုးရင်
• အဖျားကြီးတာ၊ အထူးသဖြင့် ညနေဘက် ဖျားတာများရင်
• ညဘက် ချွေးထွက်များရင်
• ကိုယ်အလေးချိန်ကျပြီး အစားအသောက်ပျက်ရင်
• အားအင်ကုန်ခမ်းပြီး အမြဲတမ်း ပင်ပန်းနွမ်းနယ်နေရင်
________________________________________
👉 တီဘီကို ဘယ်လို စစ်ဆေးအတည်ပြုမလဲ?
တီဘီရောဂါ ကိုအလွယ်တကူစစ်ဆေးနိုင်ပြီး အောက်ဖော်ပြပါ စစ်ဆေးမှု့များကို အစိုးရကျန်းမာရေးဌာန/ဆေးရုံဆေးခန်းတွေနဲ့ NGO ဆေးခန်းများစွာမှာ အခမဲ့ စစ်ဆေးပေးနေပါတယ်။
• သလိပ်စစ်ဆေးခြင်း - သလိပ် (အချွဲ) မှာ တီဘီပိုးရှိ၊ မရှိကို စစ်ဆေးတာပါ။
• ရင်ဘတ်ဓာတ်မှန် (Chest X-ray) - အဆုတ်မှာ ဖြစ်နေတဲ့ ရောဂါလက္ခဏာတွေကို ကြည့်တာပါ။
• GeneXpert စမ်းသပ်စစ်ဆေးခြင်း - ရောဂါပိုးကို မြန်မြန်ဆန်ဆန်ရှာဖွေနိုင်ပြီး ဆေးယဉ်ပါးမှု ရှိ၊ မရှိကိုပါ တစ်ခါတည်းသိနိုင်တဲ့ ခေတ်မီနည်းလမ်းဖြစ်ပါတယ်။
________________________________________
👉 တီဘီ ဘယ်လို ကူးစက်သလဲ? ဘယ်လိုကာကွယ်မလဲ?
တီဘီပိုးရှိသူ ချောင်းဆိုးတာ၊ နှာချေတာ၊ စကားပြောတာတွေကနေ လေထဲကတစ်ဆင့် ကူးစက်ပါတယ်။ လူထူထပ်တဲ့နေရာတွေ ဒါမှမဟုတ် လေဝင်လေထွက်မကောင်းတဲ့ အခန်းတွေမှာ အလွယ်တကူ ကူးစက်နိုင်ပါတယ်။
ကာကွယ်နိုင်ရန်: ✅ ချောင်းဆိုးရင် သို့မဟုတ် နှာချေရင် ပါးစပ်ကို ဖုံးအုပ်ပါ။ ✅ ရောဂါလက္ခဏာရှိရင် နှာခေါင်းစည်း (Mask) တပ်ဆင်ပါ။ ✅ လေဝင်လေထွက်ကောင်းအောင် ပြတင်းပေါက်တွေကို ဖွင့်ထားပါ။ ✅ စောစော စစ်ဆေးပြီး ကုသမှုခံယူပါ။ ✅ လက္ခဏာရှိတဲ့ သူငယ်ချင်း၊ မိသားစုဝင်တွေကို စောစောစစ်ဆေးဖို့ တိုက်တွန်းပေးပါ။ ✅ လိုအပ်သူများ TB ကာကွယ်ဆေးသောက်ပါ (TPT) (နောက်ပို့စ်တွင် အသေးစိတ်ဖော်ပြပေးပါမယ်။)
________________________________________
👉 တီဘီ ကုသမှုအစီအစဉ်နဲ့ ရောဂါပျောက်ကင်းနိုင်ခြေ
တီဘီရောဂါဟာ မှန်ကန်တဲ့ဆေးဝါးနဲ့ ကုသရင် ပျောက်ကင်းနိုင်ပါတယ်။
• ကုသမှုကြာချိန် - ပုံမှန်အားဖြင့် ၆ လကြာမြင့်ပါတယ်။ (ဆေးယဉ်ပါးတီဘီဆိုရင်တော့ ပိုကြာနိုင်ပါတယ် - ၈လ မှ ၂၄လ) ။
• ဆေးဝါး - အမျိုးသား တီဘီ တိုက်ဖျက်ရေး အစီအစဉ်အောက်မှာ ဆေးဝါးများ အခမဲ့ ရရှိနိုင်ပါတယ်။
• အောင်မြင်မှု - ဆေးကို ပုံမှန်သောက်သုံးပြီး သတ်မှတ်ကာလပြည့်အောင် ကုသရင် ၉၀% နီးပါး ပျောက်ကင်းပါတယ်။
________________________________________
⚠️ ကုသမှုမခံယူရင် ဒါမှမဟုတ် ဆေးပြည့်အောင်မသောက်ရင် ဖြစ်လာနိုင်တဲ့ အန္တရာယ်များ
တီဘီဟာ ကုသမှုမခံယူရင် အသက်အန္တရာယ်ရှိသလို၊ ဆေးပုံမှန်မသောက်ရင်လည်း နောက်ဆက်တွဲ ပြဿနာတွေ ပိုဆိုးစေနိုင်ပါတယ်။
• အဆုတ်ပြင်းထန်စွာပျက်စီးခြင်း
• အခြားအင်္ဂါများသို့ ပျံ့နှံ့ခြင်း - ဦးနှောက်၊ ကျောက်ကပ်၊ အရိုး၊ အဆစ်နဲ့ ကျောရိုး စတဲ့ ခန္ဓာကိုယ်အစိတ်ပိုင်းတွေဆီ ပိုးပြန့်သွားနိုင်ပါတယ်။
• အသက်ဆုံးရှုံးခြင်း
• ဆေးယဉ်ပါးတီဘီ (MDR-TB) ဖြစ်ခြင်း
💡 ဆေးယဉ်ပါးတီဘီ (MDR-TB) ဆိုတာ ဘာလဲ?
• ဖြစ်ရခြင်းအကြောင်းရင်း - လူနာက ဆေးတွေကို ပုံမှန်မသောက်လို့၊ ဆေးဖြတ်လိုက်လို့ တီဘီပိုးတွေက ပုံမှန်ပေးနေတဲ့ အဓိကဆေးဝါးနှစ်မျိုး (Isoniazid နဲ့ Rifampicin) ကို ခံနိုင်ရည်ရှိသွားတာပါ။
• အန္တရာယ် - MDR-TB ဟာ ကုသဖို့ ပိုခက်ခဲပြီး ကုသချိန် ၁၈ လကနေ ၂၄ လအထိ ကြာမြင့်ပါတယ်။ ပိုပြင်းတဲ့ ဆေးဝါးတွေ သုံးရတာကြောင့် ဘေးထွက်ဆိုးကျိုးလည်း ပိုများနိုင်သော်လည်း ကုသမှုမခံယူလျှင် အသက်ဆုံးရှုံးနိုင်ပါတယ်။
________________________________________
✅ အဓိကမှတ်သားထားဖို့လိုတာတွေကတော့
• ပျောက်ကင်းနိုင်ပါတယ်။
• စောစောသံသယရှိပါ။
• စောစော စစ်ပါ (လွယ်ကူပြီး အခမဲ့ရပါတယ်)။
• စောစော ကုပါ။ ဆေးလုံးဝမဖြတ်ဘဲ ဆေးပြည့်အောင် သောက်ပါ။
• ဆေးမဖြတ်ဘဲ သောက်ခြင်းဖြင့် ဆေးယဉ်ပါးတီဘီ (MDR-TB) ဖြစ်ခြင်းမှ ကာကွယ်ပါ။
• ရောဂါပိုးမပြန့်ပွားအောင် ကာကွယ်ပြီး မိသားစုနဲ့ မိမိပတ်ဝန်းကျင်မှသူတွေကို ကာကွယ်ပါ။
• လိုအပ်သူများ TB ကာကွယ်ဆေးသောက်ပါ (TPT) (နောက်ပို့စ်တွင် အသေးစိတ်ဖော်ပြပေးပါမယ်)။

10/09/2025

Health Check up တွေကို ပါရမီမှာ စစ်လို့ရလား 💬⁉️

ကျန်းမာရေးစစ်ဆေးခြင်းဟာ ကိုယ့်မှာ ဖြစ်လာနိုင်ချေရှိတဲ့ ရောဂါတွေကို စောစီးစွာသိရှိပြီး ကြိုတင်စွာ ကာကွယ် ကုသထားနိုင်ဖို့ အတွက် အရေးပါတဲ့ စစ်ဆေးမှုဖြစ်ပါတယ်။

Health Check up လို့ပြောလိုက်တာနဲ့ ကုန်ကျစရိတ်များမယ်လို့ တွေးကြပေမဲ့ ✨ပါရမီအထွေထွေရောဂါကုဆေးရုံမှာတော့ Promotion များစွာနဲ့ အသက်သာဆုံး စစ်ဆေးလို့ရနေပါတယ်။

ပါရမီက ကလေးဆေးရုံမဟုတ်ဘူးလား 💬😳

ပါရမီအထွေထွေရောဂါကုဆေးရုံဟာ လွန်ခဲ့တဲ့နှစ်များစွာထဲကကျွမ်းကျင်က‌လေးအထူးကုဆရာဝန်တွေရှိတာကြောင့် မိဘတိုင်းကအားကိုးခဲ့ရပါတယ်။

နှစ်၊လတွေကြာလာချိန်မှာတော့ တိုးတက်ခေတ်မှီတဲ့ နည်းပညာမြင့်စက်သစ်တွေနဲ့အတူ ကလေး၊လူကြီး၊အရွယ်မရွေးကို ကျန်းမာသက်သာအောင် ကုသပေးလာနိုင်ခဲ့တာဖြစ်ပါတယ်။

ပါရမီဆေးရုံမှာ လူကြီးတွေလည်း အကောင်းဆုံးကုသမှုခံယူလို့ရနေပါပြီနော် ။💁‍♀

အရွယ်မရွေးကို ကုသမှုပေးရုံသာမက အသက်အရွယ်အလိုက် လိုအပ်သော Health Check up တွေဖြစ်တဲ့

🩺💜Medical Check up

Medical Check up မှာမှ

အသက် (၄၀) အောက်အမျိုးသားအမျိုးသမီးတွေအတွက် Mildlife Wellness Master Package

အသက်(၄၀) အထက်အမျိုးသားတွေအတွက် Vital Men (40)+ package

အသက်(၄၀) အထက်အမျိုးသမီးတွေအတွက် Vital Women (40)+ Package တွေအပြင်

🩺💜Healthy Child medical check up

🩺💜Colon Cencer Screening နဲ့

Occupational health Screening တို့ကိုလည်း မှန်ကန်တိကျစွာ စစ်ဆေးမှုတွေ ပြုလုပ်လို့ရပါတယ်။

📌 Medical Check up တွေမှာလည်း Dental check up free လက်ဆောင်ပါဝင်ပါသေးတယ်။

ကျန်းမာရေးစစ်ဆေးမှုတွေကို ပါရမီအထွေထွေရောဂါကုဆေးရုံမှာ အကောင်းဆုံးနဲ့ မှန်ကန်တိကျစွာ စစ်ဆေးလို့ ရနေတာ သိသွားပြီဆိုရင်‌တော့

သင့်ကျန်းမာရေးအတွက်အကောင်းဆုံးစစ်ဆေးမှုကို ပါရမီနဲ့အတူအစပျိုးလိုက်ရအောင်နော်။ 🩺💜

#ပါရမီအထွေထွေရောဂါကုဆေးရုံ

05/09/2025

🌸 ဆိုင်းနပ်စ်ရောင်ခြင်း သို့ ဆိုင်းနပ်စ်ပိုးဝင်ခြင်း (နှာခေါင်းပိတ်ရောဂါ) ဆိုတာ ဘာလဲ?
ဆိုင်းနပ်စ်ဆိုတာ မျက်နှာထဲက လေဝင်လေထွက်ရှိတဲ့ နေရာ (sinuses) တွေဖြစ်ပြီး ချွဲတွေနဲ့ ပြည့်ပြီး ပိတ်လာတဲ့အခါ ဆိုင်းနပ်စ်ရောင်ချင်း သို့ ဆိုင်းနပ်စ်ပိုးဝင်ခြင်း (နှာခေါင်းပိတ်ရောဂါ) ဖြစ်တတ်ပါတယ်။

🦠 ဖြစ်ရတဲ့အကြောင်းရင်းများ
• အအေးမိခြင်း ဒါမှမဟုတ် တုပ်ကွေးမိခြင်း 🤧
• ဓာတ်မတည့်ခြင်း (ဖုန်၊ ဝတ်မှုန်၊ မီးခိုး) 🌿
• လေထုညစ်ညမ်းမှု ဒါမှမဟုတ် ဓာတုပစ္စည်းများနဲ့ မကြာခဏ ထိတွေ့ခြင်း
• သွားပိုးဝင်ခြင်း သို့မဟုတ် နှာခေါင်းနဲ့ဆိုင်တဲ့ ပြဿနာများ
😷 အဓိက လက္ခဏာများ
• နှာခေါင်းပိတ်ခြင်း သို့မဟုတ် နှာရည်ယိုခြင်း
• ခေါင်းကိုက်ခြင်း
• မျက်နှာတစ်ဝိုက် (အထူးသဖြင့် မျက်လုံးနဲ့ နဖူး) ကိုက်ခဲခြင်း
• မျက်နှာတွင် ဖိအားနှင့် လေးလံမှု ခံစားရခြင်း
• နှာခေါင်းထဲကချွဲများ လည်ချောင်းထဲသို့ကျခြင်း
• ညဘက်တွင် ချောင်းပိုဆိုးခြင်း
• အနံ့ခံနိုင်စွမ်း ကျဆင်းခြင်း
🏡 အိမ်တွင်းကုထုံးများ
• ရေနွေးငွေ့ကို ရှူခြင်း
• မျက်နှာပေါ်တွင် ရေနွေးစိမ်ထားသော မျက်နှာသုတ်ပဝါတင်ခြင်း 🌫️
• ပူနွေးသော အရည်များများ သောက်ခြင်း ♨️
• နှာခေါင်းကို ရှင်းလင်းရန် ဆားရည် သို့ နှာခေါင်းဆေးရေတို့ဖြင့် နှာခေါင်းဆေးခြင်း 💧 လုံလောက်စွာ အနားယူခြင်းနှင့် ကိုယ်ခံစွမ်းအား မြှင့်တင်ခြင်း 🛌
🚨 ဆရာဝန်ပြသင့်တဲ့ အချက်များ
• ဒီအချက်တွေ သတိထားမိရင် မစောင့်ဘဲ ဆရာဝန်နဲ့ တိုင်ပင်သင့်ပါတယ်: ပြင်းထန်ခေါင်းကိုက်ခြင်းနဲ့အတူ အဖျားကြီးခြင်း
• မျက်လုံးရောင်ရမ်းခြင်း၊ အမြင်အာရုံပြဿနာများ
• လက္ခဏာများက ၁၀ ရက်ထက်ပို၍ ကြာလာခြင်း သို့မဟုတ် ပိုဆိုးလာခြင်း
• အသက်ရှူရခက်ခဲခြင်း သို့မဟုတ် ရင်ဘတ်အောင့်ခြင်း
⚠️ နောက်ဆက်တွဲ ပြဿနာများ (မကုသဘဲထားပါက)
• မျက်လုံးသို့ ပိုးပျံ့နှံ့ခြင်း
• ဆိုင်းနပ်စ်ကြာရှည်စွာရောင်ခြင်း (ရေရှည်ပြဿနာ)
• ဦးနှောက်အတွင်း ပိုးဝင်ခြင်း (အလွန်ဖြစ်ခဲ)
💡 မိသားစု အကြံပြုချက်:
အိမ်တွင်းကုသမှုက အကူအညီဖြစ်စေပေမယ့် မသက်သာရင်တော့ စိတ်ချရပြီး ထိရောက်တဲ့ကုသမှုအတွက် ဆရာဝန်နှင့် စောစောတိုင်ပင်သင့်ပါတယ်။

#ကျန်းမာစွာနေထိုင်ရေး

18/08/2025

🐶 ခွေး(သို့)ကြောင် ကိုက်ခံရရင် ဘာဖြစ်တတ်လဲ....?
ခွေးရူးပြန်ရောဂါဟာ ရောဂါပိုးရှိတဲ့ တိရစ္ဆာန်တွေ၊ အထူးသဖြင့် ခွေးတွေ၊ ကြောင်တွေရဲ့ ကိုက်တာ၊ ခြစ်တာ၊ သွားရည်ကနေတဆင့် ကူးစက်တတ်တာပါ။ ခွေးရူးပြန်ရောဂါဟာ လက္ခဏာပြပြီဆိုတာနဲ့ သေဆုံးနိုင်ခြေ ၉၉.၉% လောက်ရှိပါတယ်။
ဒါပေမယ့် ၁၀၀% ကာကွယ်နိုင်တဲ့ ရောဂါဖြစ်ပါတယ်! 🛡️

📌 ဘယ်လိုကာကွယ်ကြမလဲ?
ခွေး (သို့) ကြောင် နှင့်ထိတွေ့မိတဲ့ပေါ်မူတည်ပါတယ်။
အဆင့် (၁) - အန္တရာယ်မရှိတဲ့ အနေအထား
✅ ခွေးကို ထိတွေ့တာ၊ အစာကျွေးတာ၊ ခြစ်ရာ၊ ကိုက်ရာမရှိဘဲ အရေပြား ပုံမှန်အတိုင်းရှိနေခြင်း။ 👉ကာကွယ်ဆေးထိုးစရာမလိုပါ။ လက် (သို့) ထိတွေ့သောနေရာကို သေချာ ဆေးရပါမယ်။

အဆင့် (၂) - ⚠️ သွေးမထွက်တဲ့ ခြစ်ရာ၊ ပွန်းပဲ့ရာတွေရှိခြင်း။
👉 * ကိုက်ခံရတဲ့နေရာကို ရေလောင်း၍ ၁၅ မိနစ်ကြာအောင် ဆေးကြောပါ။
👉 * ခွေးရူးပြန် ကာကွယ်ဆေး (rabies vaccine) ထိုးဖို့ လိုပါမယ်။ မစောင့်ပါနဲ့ ချက်ချင်းဆေးခန်းသွားဖို့လိုပါမယ်။

အဆင့် (၃) - 🚨 တစ်ချက်တည်းဖြစ်စေ၊ အများအပြားဖြစ်စေ သွေးထွက်အောင် ကိုက်ခြင်း၊ ခြစ်ခြင်း၊ ဒါမှမဟုတ် သွားရည်ကနေတစ်ဆင့် အရေပြားပေါက်ပြဲရာ၊ မျက်လုံး၊ ပါးစပ်၊ နှာခေါင်း တို့နှင့်ထိတွေ့ခြင်း။
👉 * ကိုက်ခံရတဲ့နေရာကို ရေလောင်း၍ ၁၅ မိနစ်ကြာအောင် ဆေးကြောပါ။
👉 * ခွေးရူးပြန် ကာကွယ်ဆေး (rabies vaccine) နဲ့ Immune globulin (RIG) နှစ်ခုလုံး ထိုးဖို့လိုအပ်ပါတယ်။ မစောင့်ပါနဲ့ ချက်ချင်းဆေးခန်းသွားဖို့လိုပါမယ်။

🩺 ကာကွယ်ဆေးထိုးပြီးနောက် ဘာတွေဆက်လုပ်ရမလဲ?
*ဆေးထိုးပြီးတဲ့အခါ ထိုးတဲ့နေရာမှာ နာကျင်တာ၊ နီရဲတာနဲ့ အဖုသေးသေးလေးတွေ ထွက်တာမျိုးဖြစ်နိုင်ပြီး ဘာမှလုပ်စရာမလိုပါ။ အရမ်းနာကျင်တာ၊ ဖျားတာနဲ့ ခန္ဓာကိုယ်ယားယံတာမျိုးဆိုရင်တော့ ဆရာဝန်နဲ့ အမြန်ဆုံး ပြန်ပြဖို့လိုပါမယ်။
**ကာကွယ်ဆေးတွေကို သတ်မှတ်ရက်အတိုင်း မကျော်ဘဲ ပုံမှန်သွားရောက်ထိုးနှံဖို့က အရေးကြီးဆုံးပါပဲ။ သတ်မှတ်ထားတဲ့အတိုင်း အစအဆုံးထိုးပြီးမှသာ စိတ်ချရမှာဖြစ်တဲ့အတွက် ဆေးထိုးတာကို လုံးဝမရပ်ပစ်လိုက်ပါနဲ့။

💡 အိမ်မွေးခွေး(သို့) ကြောင်ကိုက်ခံရရင်ရော ဘာလုပ်ရမလဲ?
သင့်အိမ်မွေးခွေးလေးဟာ ကာကွယ်ဆေး ပုံမှန်ထိုးထားပြီးသား ဖြစ်ရင်တောင် ကိုက်ခံရပြီဆိုရင်တော့ အပေါ်က အဆင့် (၂) နဲ့ (၃) အတိုင်း ကိုက်ခံရတဲ့နေရာကို အရင်ဆုံး သေချာဆေးကြောပါ။ ပြီးရင် ဆရာဝန်နဲ့ သွားရောက်ပြသပါ သင့်ခွေးလေးရဲ့ ကာကွယ်ဆေးထိုး မှတ်တမ်းအပေါ်မူတည်ပြီး လမ်းညွှန်ပေးပါလိမ့်မယ်။ အိမ်မွေးခွေးဖြစ်လို့ စိတ်ချလက်ချ မနေဘဲ ဆေးဘက်ဆိုင်ရာ အကူအညီယူတာဟာ အကောင်းဆုံးနဲ့ အလုံခြုံဆုံးပါပဲ။
🐾 အိမ်မွေးတိရစ္ဆာန်ပိုင်ရှင်တွေအတွက် 🐈🦮
* ခွေးနဲ့ကြောင်တွေကို နှစ်စဉ် ကာကွယ်ဆေး ပုံမှန်ထိုးပေးပါ။
* အိမ်မွေးတိရစ္ဆာန်တွေကို အပြင်က တိရစ္ဆာန်တွေနဲ့ မကိုက်မိအောင်သတိထားရပါမယ်။
* လူနဲ့ အခြားတိရစ္ဆာန်တွေနဲ့ တွေ့တဲ့အခါ ခွေးလေးတွေ စိတ်တည်ငြိမ်အောင် လေ့ကျင့်ပေးပါ။

**လမ်းဘေးခွေးလေးတွေလဲချစ်တတ် အစာကြွေးပြီး ထိတွေ့ကိုင်တွယ်တတ်တဲ့သူတွေကတော့ Pre Exposure Prophylaxis အနေနဲ့ ခွေးရူးပြန်ကာကွယ်ဆေးကိုကြိုထိုးထားသင့်ပါတယ်။**
🐩🐕🐈အားလုံးအန္တရာယ်ကင်းကင်းနဲ့ မိမိရဲ့ ခွေးလေးတွေ ကြောင်လေးတွေကို ချစ်လိုက်ကြရအောင်!!

10/08/2025

💡 "Know Your Numbers" | သင့်ကျန်းမာရေးရဲ့ အရေးကြီးတဲ့ ကိန်းဂဏန်းတွေကို သိပါသလား? 📊

📜 "Know Your Numbers" ဆိုတာဘာလဲ?
၂၀၀၁ ခုနှစ်လောက်မှာ UK နိုင်ငံမှာ သွေးပေါင်ချိန်တိုင်းအောင် ပြည်သူ့ကျန်းမာရေးလှုံ့ဆော်မှုတစ်ခု ကနေ အစပြုခဲ့ပြီး၊ ၂၀၀၇ ခုနှစ်နောက်ပိုင်းမှာ နိုင်ငံတကာ ကျန်းမာရေး အဖွဲ့အစည်းကြီးတွေက ပြည်သူ့ကျန်းမာရေး လှုံ့ဆော်မှုတစ်ခု အဖြစ်အသွင်ပြောင်း စတင်ပြုလုပ်ခဲ့တာ ခုဆို ၂၄ နှစ်ရှိ သွားခဲ့ပါပြီ။ လူအများ နားလည်လွယ်ပြီး မှတ်မိလွယ်အောင်၊ “ကိုယ့်ကျန်းမာရေးကို ကိုယ်တိုင်တာဝန်ယူတတ်စေဖို့” ရည်ရွယ်ပြီး ဒီဆောင်ပုဒ်ကို ကျယ်ကျယ်ပြန့်ပြန့် အသုံးပြုလာကြတာ ဖြစ်ပါတယ်။

🔢 သင်သိထားသင့်တဲ့ အဓိကကျန်းမာရေးကိန်းဂဏန်းများ

1. သွေးပေါင်ချိန် (Blood Pressure): ကိန်းဂဏန်းနှစ်ခုရှိပါတယ်။ နှလုံးညှစ်လိုက်တဲ့အခါ သွေးကြောနံရံပေါ်သက်ရောက်တဲ့အား (Systolic - အပေါ်သွေးပေါင်ချိန်) နဲ့ နှလုံးပြန်အနားယူချိန် သက်ရောက်တဲ့အား (Diastolic - အောက်သွေးပေါင်ချိန်) ပါ။ ကျန်းမာတဲ့ သွေးပေါင်ချိန်ကို 130/80 mmHg အောက်လို့ သတ်မှတ်ကြပါတယ်။

2. သွေးတွင်းအဆီဓာတ် (Cholesterol): စုစုပေါင်း ကိုလက်စထရော၊ LDL (မကောင်းတဲ့အဆီ)၊ HDL (ကောင်းတဲ့အဆီ) နဲ့ ထရိုင်ဂလစ်စရိုက် (Triglycerides) တို့ ပါဝင်ပါတယ်။

3. သွေးချိုဓာတ် (Blood Sugar): အစာမစားမီ တိုင်းတာတဲ့ သွေးချိုဓာတ် (Fasting Glucose - ၁၀၀ mg/dl အောက်) ဒါမှမဟုတ် ၃ လပျမ်းမျှသွေးချိုကိုပြတဲ့ HbA1c (၅.၇ % အောက်) နဲ့ တိုင်းတာနိုင်ပါတယ်။

4. ကိုယ်အလေးချိန်နှင့် အရပ်အချိုးအစား (BMI): သင့်ရဲ့ အရပ်အမောင်းနဲ့ ကိုယ်အလေးချိန်ကို တွက်ချက်ထားတဲ့ ညွှန်းကိန်းဖြစ်ပါတယ်။ ကျန်းမာရေးနှင့်ညီညွတ်သော BMI သည် 18.5 မှ 22.9 kg/m2 အတွင်း ရှိသင့်ပါတယ်။
5. ခါးအတိုင်းအတာ (Waist Circumference): ဗိုက်မှာရှိတဲ့ အဆီပမာဏကို ညွှန်ပြပါတယ်၊
• ယောကျ်ားများ – ၄၀ လက်မ (၁၀၂ စင်တီမီတာ) ထက်နည်းရမည်။
• မိန်းမများ – ၃၅ လက်မ (၈၉ စင်တီမီတာ) ထက်နည်းရမည်။

6. နှလုံးခုန်နှုန်း (Heart Rate): အနားယူချိန်မှာရှိတဲ့ နှလုံးခုန်နှုန်းက သင့်ရဲ့ကြံ့ခိုင်မှုကို ပြသတဲ့ အညွှန်းကိန်းတစ်ခုပါ။ 📈 ပုံမှန်အားဖြင့် တစ်မိနစ်လျှင် ၆၀ မှ ၁၀၀ နှလုံးခုန်နှုန်း (bpm) ကြားသာရှိသင့်ပါတယ်။

✅ ဒါတွေကိုသိထားဖို့ ဘာကြောင့်အရေးကြီးတာလဲ?

• ရောဂါကို စောစီးစွာသိနိုင်ခြင်း - နှလုံးရောဂါ၊ ဆီးချိုရောဂါတို့လို နာတာရှည်ရောဂါတွေဟာ သိသာတဲ့လက္ခဏာမပြဘဲ ဖြစ်ပွားနိုင်ပါတယ်။ ဒီကိန်းဂဏန်းတွေကို သိထားခြင်းဖြင့် ရောဂါကို စောစောသိပြီး ကုသမှုခံယူနိုင်မှာပါ။
• ပြောင်းလဲဖို့ တွန်းအားဖြစ်စေခြင်း - ကိုယ့်ရဲ့ ကိန်းဂဏန်းတွေကို သိရှိခြင်းက ပိုကျန်းမာတဲ့အလေ့အကျင့်တွေဆီကို ပြောင်းလဲဖို့ ခိုင်မာတဲ့တွန်းအားတစ်ခု ဖြစ်စေပါတယ်။
• ကြိုတင်ကာကွယ်စောင့်ရှောက်မှု - ရောဂါဖြစ်နိုင်ခြေအချက်တွေကို စောစောသိပြီး ဖြေရှင်းခြင်းအားဖြင့် နာတာရှည်ရောဂါတွေ မဖြစ်အောင် ဒါမှမဟုတ် နောက်ကျပြီးမှ မသိရအောင် ကာကွယ်နိုင်မှာပါ။
🚀 ဘယ်လိုစတင်ကြမလဲ?
• ပုံမှန်ကျန်းမာရေးစစ်ဆေးပါ - သင့်ရဲ့ ကိန်းဂဏန်းတွေကို သိရှိနိုင်ဖို့ ဆရာဝန်နဲ့ ပုံမှန်ကျန်းမာရေးစစ်ဆေးမှု ပြုလုပ်ပါ။
• ကျွမ်းကျင်သူတွေနဲ့ ဆွေးနွေးပါ - သင့်ရဲ့ ကိန်းဂဏန်းတွေက ကောင်းလား၊ မကောင်းလားဆိုတာ ကျန်းမာရေးဝန်ထမ်းတွေနဲ့ သေချာဆွေးနွေးတိုင်ပင်ပါ။
• နေထိုင်မှုပုံစံပြောင်းလဲပါ - အစားအသောက်၊ လေ့ကျင့်ခန်းနဲ့ တခြားလူနေမှုပုံစံတွေကို ကောင်းမွန်အောင် ပြောင်းလဲပါ။
• တိုးတက်မှုကို မှတ်တမ်းတင်ပါ: တိုးတက်လာတဲ့အဖြေတွေကို ထိမ်းသိမ်းထားပြီး ကျန်းမာအောင်နေထိုင်သွားပါ။

ကျန်းမာတဲ့အနာဂတ်ကို ပိုင်ဆိုင်နိုင်ဖို့ ဒီနေ့ပဲ သင့်ကျန်းမာရေးကိန်းဂဏန်းတွေကို စပြီးသိအောင်လုပ်ဖို့တိုက်တွန်းလိုက်ပါတယ်။ ❤️

#ကျန်းမာရေးကိန်းဂဏန်းများ #ကြိုတင်ကာကွယ်ခြင်း #ကျန်းမာစွာနေထိုင်ရေး #ကျန်းမာရေးစစ်ဆေးခြင်း

09/08/2025

🤔ခဏခဏ ရင်ဘတ်အောင့်တာ ဘာမှမဟုတ်ဘူးလို့ ထင်နေလား? 🤔 နှလုံးကပြတတ်တဲ့ အရေးပေါ်လက္ခဏာတွေအကြောင်း သိထားသင့်တယ်နော်။ ❤️

ကျွန်တော်တို့တွေက နာကျင်ကိုက်ခဲမှုလေးတွေကို "ခဏနေရင် သက်သာသွားမှာပါ" ဆိုပြီး မကြာခဏဆိုသလို လျစ်လျူရှုတတ်ကြတယ်ဟုတ်? ဒါပေမဲ့ တချို့လက္ခဏာတွေ၊ အထူးသဖြင့် နှလုံးကလာတဲ့ သတိပေးသံတွေကိုတော့ လုံးဝမပေါ့ဆသင့်ပါဘူး။
ဒါဟာ ကိုယ့်အတွက်ရော၊ ကိုယ်ချစ်ရတဲ့သူတွေအတွက်ပါ အသက်ကယ်နိုင်မှာမို့ ဒီပို့စ်ကို တင်ပေးလိုက်ပါတယ်။ 👇
________________________________________
🚨 ဒါတွေခံစားနေရရင် သတိထားတော့နော်
နှလုံးရောဂါလက္ခဏာတွေက တစ်ခုမက ဖြစ်တတ်ပါတယ်။
❤️ ရင်ဘတ်အောင့်ခြင်း - ရင်ဘတ်အလယ်မှာ တင်းကျပ်နေမယ်၊ ဖိထားသလို၊ ညှစ်ထားသလို ခံစားရမယ်။
👋 နာကျင်မှုပျံ့နှံ့ခြင်း - နာကျင်မှုက ရင်ဘတ်ကနေ လက်မောင်း၊ လည်ပင်း၊ မေးရိုး၊ ကျောဘက်အထိ ပျံ့သွားတတ်တယ်။
😮‍💨 အသက်ရှူမဝခြင်း - ရုတ်တရက် မောလာပြီး အသက်ရှူရခက်လာမယ်။
💦 ချွေးစေးပြန်ခြင်း - အကြောင်းရင်းမရှိဘဲ ချွေးအေးတွေ ရွှဲနေအောင် ထွက်လာမယ်။
🤢 ပျို့အန်ခြင်း - မအီမသာဖြစ်ပြီး အန်ချင်သလိုဖြစ်မယ်။
😵 ခေါင်းမူးခြင်း - မိုက်ခနဲဖြစ်ပြီး သတိလစ်မလို ခံစားရမယ်။
⚠️ အထူးသတိပြုရန်
အမျိုးသမီးတွေ၊ သက်ကြီးပိုင်းတွေနဲ့ ဆီးချိုသမားတွေမှာဆိုရင် ရင်ဘတ်အောင့်တာမျိုးထက် "အလွန်အမင်းနုံးချိခြင်း"၊ "အသက်ရှူမဝခြင်း" လိုမျိုး ပုံမှန်မဟုတ်တဲ့လက္ခဏာတွေလည်း ပြတတ်ပါတယ်။
________________________________________
⚡ ဘယ်သူတွေက ပိုဂရုစိုက်သင့်လဲ? (Checklist လေးလုပ်ကြည့်ရအောင်)
ကိုယ့်မှာ ဒီအချက်လေးတွေ ရှိနေလား? ရှိနေရင်တော့ တခြားသူတွေထက် ပိုသတိထားနေထိုင်သင့်ပါတယ်နော်။
• သွေးတိုး၊ ဆီးချို၊ သွေးတွင်းအဆီများခြင်း
• ဆေးလိပ်သောက်ခြင်း
• အဝလွန်ခြင်း
• မိသားစုထဲမှာ နှလုံးရောဂါရာဇဝင်ရှိခြင်း
________________________________________
❗ "ခဏနေရင် သက်သာသွားမှာပါ" ဆိုပြီး ဘာလို့အချိန်မဆွဲသင့်တာလဲ?
နှလုံးရောဂါမှာ "အချိန်တိုင်းဟာ နှလုံးကြွက်သားအတွက် အသက်ပါပဲ"။ အချိန်တစ်မိနစ် နောက်ကျသွားတိုင်းမှာ နှလုံးကြွက်သားတွေက အစားပြန်မရနိုင်အောင် ပျက်စီးသွားပါတယ်။ အချိန်ကြာလေလေ၊ နှလုံးထိခိုက်မှုများလေလေ၊ အသက်ရှင်ဖို့ အခွင့်အရေးနည်းလေလေပါပဲ။ ဒါကြောင့် လုံးဝ အချိန်မဆွဲပါနဲ့။
________________________________________
⏱ ဒီအခြေအနေတွေမှာတော့ မဖြစ်မနေ ဆေးရုံသွားပါ 🚑
✅ ရင်ဘတ်အောင့်တာ ၂-၃ မိနစ်ထက်ကျော်လွန်လာလျှင်
✅ နာကျင်မှုက တခြားနေရာတွေကို ပျံ့နှံ့လာလျှင်
✅ အသက်ရှူမဝခြင်းနဲ့အတူ ချွေးထွက်၊ ပျို့အန်လျှင်
✅ သတိလစ်မေ့မြောသွားလျှင်
________________________________________
📢 နောက်ဆုံးအနေနဲ့ မှာချင်တာကတော့...
ကိုယ့်ကျန်းမာရေးကို ဂရုစိုက်တာက ကိုယ့်ကိုယ်ကို အချစ်ဆုံးဆိုတာကို ပြသခြင်းတစ်မျိုးပါပဲ။ "ဘာမှမဟုတ်လောက်ပါဘူး" ဆိုပြီး ပေါ့ဆလိုက်တာထက် "ဘာမှမဖြစ်ဘူး" ဆိုတဲ့အဖြေကို ဆရာဝန်ဆီက ကြားရတာက အများကြီး ပိုစိတ်ချရပါတယ်။
ဒီအချက်အလက်လေးတွေကို ကိုယ်တိုင်လည်းသိ၊ ကိုယ်ချစ်ရတဲ့သူတွေကိုလည်း ဂရုစိုက်နိုင်အောင် Share လုပ်ပေးလိုက်ပါဦးနော်။ ❤️

#နှလုံးကျန်းမာရေး #နှလုံးရောဂါ #ကျန်းမာရေးအသိ #အရေးပေါ်

08/08/2025

ကမ်းခြေကိုချစ်တဲ့သူတွေအတွက် အန္တရာယ်ကင်းကင်း ပျော်ရွှင်နိုင်ဖို့ သိထားသင့်တဲ့အချက်များ 🏖️

ကမ်းခြေတွေရဲ့အလှဟာ ဘယ်နေရာနဲ့မှမတူအောင် ဆွဲဆောင်မှုရှိပြီး အပန်းဖြေဖို့အတွက် အကောင်းဆုံးနေရာလေးတွေပါ။ ဒီလိုလှပတဲ့ပင်လယ်ကြီးနဲ့အတူ ချစ်ရသူတွေနဲ့ ပျော်ရွှင်ဖို့သွားပေမယ့် ဝမ်းနဲစရာဖြစ်ရက်နဲ့ ကြုံတွေ့ခဲ့ရတဲ့ သတင်းတွေ ပို့စ်တွေဒီရက်ပိုင်းမှာတွေ့လို့ ကိုယ်ကိုတိုင်လဲ ရေကြောက်တဲ့သူတစ်ယောက်ဖြစ်နေလို့ ဒီပို့စ်လေးကို မျှဝေလိုက်ပါတယ်။

⚠️ရေဆွဲအား (Rip Current) ဆိုတာဘာလဲဆိုတာ အတူတူလေ့လာကြည့်ရအောင် ⚠️

ရေဆွဲအားဆိုတာ သင့်ကို ရေအောက်ဆွဲချသွားတဲ့ လှိုင်းမဟုတ်ပါဘူး။ သူက ကမ်းခြေကနေ ပင်လယ်ထဲကို ပြန်စီးထွက်သွားတဲ့ အားပြင်းပြီး ကျဉ်းမြောင်းတဲ့ "ရေစီးကြောင်းလေး" တစ်ခုပါ။
ပင်လယ်ထဲမှာ မြစ်ငယ်လေးတစ်ခု စီးဆင်းနေသလိုပါပဲ။ ဒီရေစီးကြောင်းက အရမ်းအားပြင်းတော့ ပိုမြန်တဲ့အရှိန်နဲ့ သင့်ကို ကမ်းနဲ့ဝေးရာကို ဆွဲခေါ်သွားနိုင်ပါတယ်။

👀 ရေဆွဲအားကို ဘယ်လိုသတိထားကြည့်မလဲ? 👀

ရေဆွဲအားရဲ့ သတိပေးလက္ခဏာတွေကို သာမန်မျက်စိနဲ့တောင် အလွယ်တကူ သတိထားကြည့်ရှုနိုင်ပါတယ်။ ရေထဲမဆင်းခင် ခဏလောက် အချိန်ယူပြီး ဒီအချက်လေးတွေ ရှိမရှိ ကြည့်လိုက်ကြပါနော်:
• 🌊လှိုင်းများကြားက ကွက်လပ်နေရာ: လှိုင်းတွေရိုက်ခတ်နေတဲ့ကြားထဲမှာ လှိုင်းမရှိဘဲ ငြိမ်သက်နေတဲ့နေရာလေး တွေ့ဖူးကြမှာပါ? အဲ့ဒါက ရေကူးဖို့အကောင်းဆုံးနေရာလို့ ထင်ရပေမဲ့ တကယ်တော့ ရေဆွဲအား ဖြစ်နေတတ်ပါတယ်။
• နောက်ကျိနေတဲ့ ရေပြင်: တခြားနေရာတွေထက် ရေအရောင်က သဲတွေပါပြီး နောက်ကျိနေမယ်၊ ပွက်ဆူနေသလိုဖြစ်ပြီး ပင်လယ်ထဲကို စီးထွက်နေတယ်ဆိုရင် သတိထားပါ။
• ပင်လယ်ထဲ မျောပါနေတဲ့ အမှိုက်များ: ရေမှော်၊ ရေမြှုပ်လေးတွေက ကမ်းခြေဘက်ကို မလာဘဲ ပင်လယ်ထဲကို တဖြည်းဖြည်းမျောပါသွားနေရင် ဒါလည်း လက္ခဏာတစ်ခုပါပဲ။

အရေးကြီးဆုံးကတော့ ⚠️: စိတ်ထဲမှာတစ်ခုခုထင်နေရင်၊ ဒါမှမဟုတ် မသေချာဘူးဆိုရင် ရေထဲမဆင်းတာက အကောင်းဆုံးပါပဲနော်။

🏊‍♀️ရေဆွဲအားထဲပါသွားခဲ့ရင် ဘယ်လိုလုပ်မလဲ?🏊

မတော်တဆ ရေဆွဲအားထဲ ပါသွားခဲ့ရင်လည်း စိတ်ကိုတည်ငြိမ်အောင်ထားပြီး ဒီအချက်လေးတွေကို သတိရလိုက်ပါနော်။
1. လုံးဝစိတ်မလှုပ်ရှားပါနဲ့။ ရေစီးကိုဆန်ပြီး လုံးဝမကူးပါနဲ့။ ဒါက အရေးကြီးဆုံးပါပဲ။ ကမ်းခြေကိုတည့်တည့်ပြန်ကူးဖို့ကြိုးစားလေ အားကုန်ပြီး ပိုပင်ပန်းလေပါပဲ။ ဒါကြောင့် စိတ်ကိုငြိမ်ငြိမ်ထားပြီး အင်အားချွေတာဖို့ ရေပေါ်မှာ ပေါလောပေါ်အောင်ကြိုးစားပါ။
2. ကမ်းခြေနဲ့အပြိုင် ဘေးတိုက်ကူးပါ။ ရေဆွဲအား ထဲကနေလွတ်ဖို့ ကမ်းခြေနဲ့အပြိုင် ဘယ်ဘက်ပဲဖြစ်ဖြစ်၊ ညာဘက်ပဲဖြစ်ဖြစ် ဘေးတိုက်ကူးပါ။ ရေဆွဲအားက သိပ်မကျယ်တာကြောင့် ခဏလေးကူးလိုက်ရင်ပဲ ရေစီးအရှိန်လျော့သွားတာကို ခံစားမိပါလိမ့်မယ်။
3. ကမ်းခြေဘက်ကို ပြန်ကူးပါ။ ရေဆွဲအားထဲကနေ လွတ်ပြီဆိုတာနဲ့ ကမ်းခြေဘက်ကို ထောင့်ဖြတ်အနေအထားနဲ့ ဖြည်းဖြည်းချင်း ပြန်ကူးလာခဲ့ပါ။

✌️ပျော်စရာကောင်းတဲ့ ကမ်းခြေခရီးစဉ်အတွက် နောက်ထပ်အကြံပြုချင်တာတွေကတော့✌️

• အတူတူ ပျော်ရွှင်ပါ - သူငယ်ချင်း၊ မိသားစုနဲ့ အတူတူရေကူးခြင်းက ပိုပြီးဘေးကင်းပျော်ရွှင်စေပါတယ်။
• ကျန်းမာစွာ ပျော်ရွှင်ပါ - ပျော်ပွဲရွှင်ပွဲတွေနဲ့ ကမ်းခြေခရီးက ခွဲခြားလို့မရပေမဲ့ အမူးလွန်နေရင်တော့ ရေကူးခြင်းကို ရှောင်ကြဉ်သင့်ပါတယ်။
• ရာသီဥတုကို သတိပြုပါ - မိုးရာသီမှာ လှိုင်းတွေက ပိုကြမ်းတမ်းတတ်တာကြောင့် ရာသီဥတုအခြေအနေကို အမြဲသတိထားပါ။
• အချင်းချင်း ဂရုစိုက်ပါ - မြန်မာနိုင်ငံကမ်းခြေအများစုမှာ အသက်ကယ်သမားမရှိတတ်ပါဘူး။ ဒါကြောင့် ကိုယ့်ရဲ့လုံခြုံရေးကို ကိုယ်တိုင်တာဝန်ယူပြီး အချင်းချင်းလည်း ဂရုစိုက်ဖို့လိုအပ်ပါတယ်။

😍ဘေးကင်းလုံခြုံပြီး ပျော်ရွှင်စရာကောင်းတဲ့ ကမ်းခြေခရီးလေးကို ပိုင်ဆိုင်နိုင်ကြပါစေ။😍

#ချောင်းသာ #ငွေဆောင်

07/08/2025

🦟 မိုးရာသီရဲ့ အန္တရာယ် – သွေးလွန်တုပ်ကွေးကို အတူတကွ ကာကွယ်ကြပါစို့ 🦟

မိုးရာသီရောက်လာတာနဲ့အမျှ ခြင်မှတစ်ဆင့်ကူးစက်တက်သော သွေးလွန်တုပ်ကွေးရောဂါ ဖြစ်ပွားမှု များလာတာကို တွေ့ရပါတယ်။ အထူးသဖြင့် ကလေးငယ်များအတွက် အန္တရာယ်များတဲ့ရောဂါ ဖြစ်ပါတယ်။

📍 သတိထားရန် ရောဂါလက္ခဏာများ
▪️ ကိုယ်အပူချိန် အလွန်မြင့်တက်ခြင်း
▪️ ခေါင်းပြင်းထန်စွာ ကိုက်ခဲခြင်း
▪️ မျက်လုံးနောက်မှ နာကျင်ခြင်း
▪️ ကြွက်သားနှင့် အဆစ်အမြစ်များ နာကျင်ခြင်း
▪️ အရေပြားပေါ် အနီကွက်များ ထွက်ခြင်း

❗ အရေးပေါ် လက္ခဏာများ
အောက်ပါအတိုင်း ဖြစ်လာလျှင် ချက်ချင်း နီးစပ်ရာ ဆေးရုံကို သွားရပါမည်။
• အန်ခြင်း
• ဗိုက်အလွန်အောင့်ခြင်း
• သွားဖုံး/နှာခေါင်းမှ သွေးယိုခြင်း

✅ ကာကွယ်ခြင်းသည် အကောင်းဆုံးပါ
ခြင်များမပေါက်ဖွားရန် ကာကွယ်နိုင်သောနည်းလမ်းများ – “ဖုံး၊ သွန်၊ လဲ၊ စစ်”
🛑 ဖုံး – ရေလှောင်ကန်၊ ရေအိုးများကို လုံအောင် ဖုံးပါ။
🚫 သွန် – ရေအောင်းနေသောနေရာများကို ရေသွန်ပြီး သန့်ရှင်းရေး လုပ်ပါ။
🔁 လဲ – ရေရှိသော အိုး၊ ခွက်များကို နေ့စဉ် ရေလဲလှယ်ပါ။
🔍 စစ် – ရေမြောင်း၊ ပိတ်ဆို့နေတဲ့နေရာတွေကို စစ်ဆေးရှင်းလင်းပါ။
🛡️ မိမိကိုယ်ကို ကာကွယ်ဖို့ (ခြင်ကိုက်မခံရအောင်)
• လက်ရှည်၊ ဘောင်းဘီရှည် ဝတ်ပါ
• ခြင်ထောင် အသုံးပြုပါ

📢 ဒီအချက်တွေကို လိုက်နာပြီး သင့်မိသားစုနဲ့ ပတ်ဝန်းကျင်ကို သွေးလွန်တုပ်ကွေးအန္တရာယ်ကနေ ကာကွယ်နိုင်ပါတယ်။

20/12/2023

ရာသီတုပ်ကွေး 🤧ကို ဘယ်လိုသက်သာအောင်နေကြမလဲ?

ရာသီတုပ်ကွေးအကြောင်းနှင့် လက္ခဏာများကို ရှေ့ Post တွင်ဖော်ပြထားပြီးဖြစ်ပါတယ်။
👉https://m.facebook.com/story.php?story_fbid=pfbid0ZuHPZvT7SZbPzVLzwtaEFiHjiC9T8Yz5g7ZMF4t4uJeJ2e3PJFK6BoaMgb3GGL3Xl&id=61553606275068&mibextid=UyTHkb 👈
ဖော်ပြထားသော အထူးဂရုစိုက်ရမည့်သူများ မဟုတ်လျှင် တုပ်ကွေးသည် ဆေးခန်းပြစရာ မလိုပဲ အောက်ပါအချက်များ ပြုလုပ်ရုံနဲ့ သက်သာနိုင်ပါသည်။

ပြုလုပ်ရမည့် အချက်များကတော့
➡️အရည်🥛🥣များများသောက်ပါ။ (ရေ၊ ဟင်းချိုပူပူနှင့် ဓာတ်ဆားရည် တို့သောက်နိုင်ပါတယ်။)
➡️အနားယူပါ🙇‍♂️၊ အိပ်ရေးဝအောင်😴 အိပ်ရပါမည်။
➡️အဖျားကျဆေး 🤒သောက်ရပါမည်၊ (Acetaminophen (Paracetamol) သို့ Ibuprofen(Advil)) ကြွက်သားကိုက်ခဲခြင်း နှင့် ခေါင်းကိုက်ခြင်းကိုပါ သက်သာစေနိုင်ပါသည်။

အနားလည်းယူ ဗိုင်းရပ်စ်ပိုး ပျံ့နှံ့မှုကိုပါလျော့ကျစေရန် အဖျားကျပြီး ၂၄နာရီထိ (အဖျားပျောက်ဆေးမသောက်ဘဲ) 🏠အိမ်မှာနေသင့်ပါတယ်။
အများစုကတော့ တုပ်ကွေးဗိုင်းရပ်စ် ကူးစက်ခံရပြီး တစ်ပတ်အတွင်း သက်သာလာတတ်ကြသော်လည်း ချောင်းဆိုးတာကတော့ တစ်ပတ် သို့မဟုတ် နှစ်ပတ်အထိ ကြာနိုင်ပါသည်။

🚨အသက်ရှုရခက်ခဲခြင်း သို့မဟုတ် အသက်ရှုကြပ်ခြင်း၊
🚨ရင်ဘတ်အောင့်ခြင်း၊
🚨မူးဝေမှု့ ဆက်တိုက်ဖြစ်ခြင်း၊
🚨တက်ခြင်း၊
🚨ကြွက်သားများ ပြင်းထန်စွာ အားနည်းခြင်း သို့မဟုတ် နာကျင်ခြင်း၊
စသည့် လက္ခဏာများ ရှိလာပါက🧑‍⚕️ ဆရာဝန် နှင့်ချက်ချင်းပြဖို့လိုအပ်ပါတယ်။

အားလုံး နှစ်သစ်မှာ ကျန်းမာကြပါစေကြောင်း LifeCare ကဆုတောင်းပေးလိုက်ပါတယ်ခင်ဗျ။
🙏🙏🙏

07/12/2023

ဒီဇင်ဘာ, ၄ ရက်နေ့ မှ ၈ ရက်နေ့သည် National Influenza Vaccination Week (CDC) ဖြစ်သောကြောင့် LifeCare ကရောသီတုပ်ကွေး (Influenza/Flu) အကြောင်းပြောပြချင်ပါသည်။

တုပ်ကွေး (Flu) နှင့် အအေးမိခြင်း (Common Cold) တူပါသလား?
တုပ်ကွေးနှင့် အအေးမိခြင်း ရောဂါလက္ခဏာများမှာ တူညီသော်လည်း အအေးမိခြင်းလက္ခဏာများ သည် တစ်ဖြည်းဖြည်းပြတတ်ပြီး တုပ်ကွေးလက္ခဏာများမှာ အလျှင်အမြန်ဖြစ်ပေါ်လာတတ် သည့်အပြင် ရောဂါလက္ခဏာများလဲ ပိုခံစားရ တတ်ပါသည်။

ဘာကြောင့်ဖြစ်လဲ?
Influenza ဟုခေါ်သော ဗိုင်းရပ်စ်ပိုးသည် အသက်ရှူလမ်းကြောင်းစနစ်၏ အစိတ်အပိုင်းဖြစ်သည့် နှာခေါင်း၊ လည်ချောင်းနှင့် အဆုတ်တို့ကို ကူးစက်စေပြီး ရာသီတုပ်ကွေးကို ဖြစ်စေပါသည်။

ဘယ်လိုကူးစက်လဲ?
Influenza ဗိုင်းရပ်စ်ပိုးရှိသူများမှ ချောင်းဆိုး နှာချေသည့်အခါ ထွက်လာသည့် ပိုးများမှတစ်ဆင့် လူများကြားတွင် အလွယ်တကူ ကူးစက်နိုင်ပါသည်။
ကူးစက်ပါက ခံစားရမည့် ရောဂါလက္ခဏာများမှာ
• ခေါင်းကိုက်ခြင်း၊
• ချောင်းဆက်တိုက် ဆိုးခြင်း၊
• အသက်ရှုကြပ်ခြင်း၊
• ပင်ပန်းနွမ်းနယ်ခြင်းနှင့် အားနည်းခြင်း၊
• နှာရည်ယိုခြင်း သို့မဟုတ် နှာစေးခြင်း၊
• လည်ချောင်းနာခြင်း၊
• မျက်စိနာခြင်း၊
• အော့အန်ခြင်းနှင့် ဝမ်းလျှောခြင်း၊
တို့ဖြစ်ပါသည်။

ဘယ်သူတွေပို သတိထားရမလဲ?
တုပ်ကွေးရောဂါရှိသူအများစုသည် သဘာဝအလျှောက်သူ့ဘာသာသူ သက်သာလာကြသော်လည်း တစ်ခါတစ်ရံတွင် နောက်ဆက်တွဲပြဿနာများဖြစ်နိုင်ပြီး အသက်အန္တရာယ် ပေးနိုင်ပါသည်။ အောက်ဖော်ပြသူများတွင်ပို၍ နောက်ဆက်တွဲပြဿနာများဖြစ်နိုင်ပါသည်
• ကိုယ်ခံအားစနစ် အားနည်းသူများ (ကင်ဆာ ဆေးသွင်းနေသူများ၊ HIV ပိုးရှိသူများ)၊
• နာတာရှည်ရောဂါ ဝေဒနာရှင်များ (ပန်းနာရင်ကြပ်၊ နှလုံးရောဂါ၊ လေဖြတ်ထားသူများ၊
COPD)၊
• အသက် ၆ လမှ ၅ နှစ်အောက် ကလေးငယ်များ၊
• ကိုယ်ဝန်ဆောင်မိခင်များ နှင့် လတ်တလော ကလေးမွေးထားသူများ၊
• အသက် ၆၅ နှစ်အထက် လူကြီးများ၊
• လူအများကြားတွင် အလုပ် လုပ်နေသူများ (e.g. ကျန်းမာရေး ဝန်ထမ်းများ)

ဘယ်လိုကာကွယ်ကြမလဲ?
ကာကွယ်ဆေးထိုးခြင်းသည် တုပ်ကွေးရောဂါကို ကာကွယ်ရန် အကောင်းဆုံးနည်းလမ်းဖြစ်ပါသည်။ ၁၀၀% မကာကွယ်နိုင်ပေမယ့် နောက်ဆက်တွဲဆိုးကျိုးများကိုတော့ သိသာစွာလျှော့ချပေးနိုင်ပါသောကြောင့် အထက်ဖော်ပြပါသူများ ကတော့ ကာကွယ်ဆေး ထိုးကိုထိုး သင့်ပါသည်။ အခြားကာကွယ်လို့ရတဲ့ နည်းလမ်းများကတော့
• လက်ပုံမှန်ဆေးပါ၊
• ချောင်းဆိုး နှာချေတဲ့အခါ ပါးစပ်နဲ့ နှာခေါင်းကို အုပ်ထားပါ၊
• နေမကောင်းဖြစ်တဲ့အခါ အိမ်မှာနေပါ၊
• ဖျားနာသူများနှင့် အနီးကပ်ထိတွေ့ခြင်းမှ ရှောင်ကြဉ်ပါ၊
• မျက်လုံး၊ နှာခေါင်း သို့မဟုတ် ပါးစပ်တို့ကို လက်မဆေးပဲ မထိရပါ၊
တို့ပဲဖြစ်ပါသည်။

သက်သာအောင် နေထိုင်နည်းနှင့် ကာကွယ်ဆေးအကြောင်းကိုတော့ နောက်ဆက်တွဲ ပို့စ်တွင်ဖော်ပြပေးပါမယ်။

၂၀၂၃-၂၀၂၄ မှာ Flu ကို LifeCare နဲ့အတူ ကာကွယ်လိုက်ရ အောင်နော်။

04/12/2023

ဆောင်းရာသီ ဝင်လာပြီဆိုတော့ ဆေးရုံဆေးခန်း တွေကိုအလာများတဲ့ ရောဂါတစ်ခုအကြောင်း ပြောပြချင်ပါတယ်။ မနက်ဆို ချောင်းတွေဆိုး သလိပ်တွေထွက် လာပြီး ဆေးရုံဆေးခန်း ပြေးရတဲ့ရောဂါတစ်ခုအကြောင်းဖြစ်ပါတယ်။

👉နာတာရှည် အဆုတ်ရောင်ရမ်းရောဂါ (Chronic obstructive pulmonary disease - COPD)👈

COPD သည် နာတာရှည် အဆုတ်ရောင်ရမ်းသော ရောဂါဖြစ်ပြီး အဆုတ်မှ လေစီးဆင်းမှုကို ပိတ်ဆို့စေကာ ချောင်းဆိုးခြင်း၊ ချွဲသလိပ်ထွက်ခြင်းနှင့် အသက်ရှူကြပ်ခြင်း တို့ကို ဖြစ်စေပါသည်။
ဆေးလိပ်မီးခိုးငွေ့၊ ဓာတ်ငွေ့ သို့မဟုတ် အမှုန်အမွှားတွေကို ကာလရှည်ကြာစွာ ရှုသွင်းမိခြင်း၊ မျိုးရိုးဗီဇ တို့ကြောင့် ဖြစ်တတ်ပါတယ်။

ဖြစ်နိုင်သော ရောဂါလက္ခဏာများမှာ
• အသက်ရှူကြပ်ခြင်း၊
• ရင်ဘတ်တင်းကြပ်ခြင်း၊
• နာတာရှည် ချောင်းဆိုးခြင်း၊
• ချွဲများ (သလိပ်) ထွက်ခြင်း၊
• မကြာခဏ အသက်ရှူလမ်းကြောင်း ပိုးဝင်ခြင်း၊
• ကိုယ်အလေးချိန်ကျခြင်း (နောက်ပိုင်းအဆင့်များတွင်)

ထို့ပြင် COPD ရှိသူများသည် နှလုံးရောဂါ နှင့် အဆုတ်ကင်ဆာ တို့ကို ဖြစ်ပွားနိုင်ခြေ ပိုများပါသည်။

COPD သည် အချိန်ကြာလာသည်နှင့်အမျှ ပိုမိုဆိုးရွားလာသော်လည်း ဆရာဝန်များ၏ ညွန်ကြားချက်များကို လိုက်နာပါက အများစုသည် ရောဂါလက္ခဏာများကို ထိန်းချုပ်နိုင်ပြီး အခြားသောဆက်စပ်အခြေအနေများ ၏အန္တရာယ်ကိုပါ လျှော့ချနိုင်ပါသည်။
• အဆုတ် လုပ်ဆောင်ချက် စစ်ဆေးခြင်း။
• ရင်ဘတ်ဓာတ်မှန်
• CT ဓာတ်မှန်
• သွေးစစ်ဆေး ခြင်း တို့ကိုပြုလုပ် ပြီး ရောဂါကို သိနိုင်ပါသည်။

👉အကောင်ဆုံးကာကွယ်မှုကတော့ ဆေးလိပ်မသောက်ပါနှင့် သောက်နေလျှင်လဲ ရပ်ရပါမည်။ ကာလရှည်ကြာစွာ ဓာတ်ငွေ့ သို့မဟုတ် အမှုန်အမွှားတွေကို ရှုသွင်းမိခြင်းကြောင့် ဖြစ်တယ်ဆိုရန်တော့ လိုအပ်လျှင် အလုပ်နေရာ ပြောင်းရပါမည်။ အသက်ရှူလမ်းကြောင်း ပိုးဝင်လျှင် ရောဂါလက္ခဏာများ ပိုဆိုးတတ်သောကြောင့် နှစ်စဉ် ရာသီတုပ်ကွေးကာကွယ်ဆေး ပုံမှန်ထိုးပေးဖို့ လိုအပ်ပါသည်။ ဆရာဝန် များ၏ ညွှန်ကြားချက်များကို လိုက်နာရပါမည်။👈

Sweet December မှာအားလုံးရောဂါများ ကင်းဝေးကြပါစေကြောင်း ဆုမွန်ကောင်းတောင်းလိုက်ပါတယ်ခင်ဗျ။

Photo credit to foundation.chestnet.org

LifeCare

13/09/2025

10/09/2025

10/09/2025

05/09/2025

18/08/2025

10/08/2025

09/08/2025

08/08/2025

07/08/2025

20/12/2023

07/12/2023

04/12/2023

Address

Opening Hours

Website

Alerts

Shortcuts

Share

Category

Monday	07:00 - 20:00
Tuesday	07:00 - 20:00
Wednesday	07:00 - 20:00
Thursday	07:00 - 20:00
Friday	07:00 - 20:00
Saturday	07:00 - 20:00
Sunday	07:00 - 20:00