25/05/2025
လူတူၺ်းၶႃႈၼေႃႈ ယူဝ်ၸၢင်ႈမေႃယူႇမေႃၵိၼ်
ၵူၼ်းဢၼ်မေႃယူႇမေႃၵိၼ်ၼၼ်ႉ ၶဝ်တေႁူႉ 5 လွင်ႈၼႆႉ ။
1. မၼ်းဢမ်ႇလၢတ်ႈၵူႈလွင်ႈ ဢၼ်မၼ်းဝူၼ်ႉ
ၵူၺ်းၵႃႈမၼ်းဝူၼ်ႉၵူႈလွင်ႈဢၼ်တေလၢတ်ႈ ၊
ၵွပ်ႈမၼ်းႁူႉတီႈပွင်ႇၵႂၢမ်းဢၼ်ဝႃႈ ၵႂၢမ်းလီၶဝ်ႈႁူၽႂ်ဢမ်ႇၸႃႉ ၵႂၢမ်းၸႃႉၶဝ်ႈႁူၽႂ်ဢမ်ႇလီ ။
2. မၼ်းဢမ်ႇယိပ်းမၼ်ႈတိတ်းၸပ်းၼိူဝ် လွင်ႈဢၼ်မၼ်းႁၵ်ႉ လႄႈယၢမ်ႈလႆႈပိူင်ႇမႃး ၊
ပေႃးလွင်ႈဢၼ်မၼ်းႁၵ်ႉၼၼ်ႉ ပဵၼ်လွင်ႈယႃႉၸၢတ်ႈပၢၼ်မၼ်း ပေႃးပဵၼ်ဢၼ်ႁဵတ်းႁႂ်ႈမၼ်းလႆႈၸဵပ်းၸႂ်ယွၼ်ႉမၼ်းၸိုင် မၼ်တေပွႆႇပႅတ်ႈႁတ်းႁတ်း တတ်းပႅတ်ႈၶၢတ်ႇၶၢတ်ႇၵမ်းလဵဝ်ယဝ်ႉ ၊ လွင်ႈႁတ်းၸုၼ်းပွႆႇပႅတ်ႈ လွင်ႈဢၼ်ႁဝ်းႁၵ်ႉသေဢမ်ႇပဵၼ်ၽွၼ်းလီတႃႇႁဝ်းၼၼ်ႉ ပဵၼ်တၢင်းႁတ်းႁၢၼ် ဢမ်ႇၸႂ်ႈလွင်ႈဢူၼ်ႈဢွၼ်ႇ၊ ၵူၺ်းၵႃႈ ပဵၼ်လွင်ႈႁူႉၵႃႈၶၼ်တူဝ်ၵဝ်ႇသေ လိူၵ်ႈဢဝ်လွင်ႈဢွင်ႇမၢၼ်ပုၼ်ႈပၢင်ႈတူဝ်ၵဝ်ႇ ။
3. မၼ်းၼပ်ႉယမ်ၵူႈၵေႃႉ ။
ပႅၵ်ႉသမ်ႉဝႃႈ ပဵၼ်ဝၼ်းဢၼ်ၽႂ်ဢမ်ႇႁၼ်ၵႃႈၶၼ်ၸဝ်ႈၵဝ်ႇၵေႃႈယဝ်ႉ ၊ ၵွပ်ႈပိူဝ်ႈမၼ်းႁူႉဝႃႈ သႃႇရေႇၵူၼ်းၼႆႉ ဢမ်ႇလႆႈတႅၵ်ႈတီႈၼႃႈၵၢၼ်တႃငၢၼ်း ဢမ်ႇၼၼ် ငိုၼ်းလိူၼ် ၊ ၵူၺ်းၵႃႈ မၼ်းမေႃႁၼ်မေႃတူၺ်းၵူၼ်း ဝႃႈ ၵူၼ်းၵေႃႉၼၼ်ႉ မၼ်းမေႃဝႆႉၵႃႈၶၼ်ပိူၼ်ႈ မေႃၼပ်ႉယမ်ပိူၼ်ႈၵႃႈႁိုဝ်ၼႆယဝ်ႉ ။
4. မၼ်းဢမ်ႇဢဝ်ၸၢတ်ႈပၢၼ်မၼ်းၵႂႃႇတႅၵ်ႈၼိူင်းၵၼ်တင်းၸၢတ်ႈပၢၼ်ပိူၼ်ႈ။
ၵွပ်ႈပိူဝ်ႈမၼ်းပွင်ႇၸႂ်ဝႃႈ လွင်ႈမူၼ်ႈသိူဝ်းပိူၼ်ႈၼၼ်ႉ ဢမ်ႇလႆႈမႃးႁိမ်ဢဝ် လွင်ႈမူၼ်ႈသိူဝ်းမၼ်းသေၵႂႃႇႁဵတ်းပဵၼ်လူး ။
5. မၼ်းႁူႉဝႃႈ တေလီလၢတ်ႈမိူဝ်ႈလႂ် မိူဝ်လႂ်လီယူႇယဵၼ်ယဵၼ် ။
ၵွပ်ႈဝႃႈ မၢင်ပွၵ်ႈၼႆႉ ၶေႃႈတွပ်ႇဢၼ်လီသေပိူၼ်ႈၼၼ်ႉ ပဵၼ်လွင်ႈတဵတ်ႇယဵၼ် ၊ မၢင်ပွၵ်ႈၼႆႉပေႃးဢမ်ႇလၢတ်ႈၵေႃႈ ဢမ်ႇတုမ်ႉတိူဝ်ႉၽႂ် လႄႈ ဢမ်ႇသုမ်းသႃႇရေႇၸဝ်ႈၵဝ်ႇ ။
ၵူၼ်းဢၼ်မေႃယူႇမေႃၵိၼ်ၼၼ်ႉ ဢမ်ႇတၢပ်ႈပဵၼ်ၵူၼ်းဢၼ်ၵတ်ႉၶႅၼ်ႇသေပိူၼ်ႈ ၊ ၵူၺ်းၵႃႈ ၶဝ်ပဵၼ်ၵူၼ်းဢၼ်မေႃပွင်ႇၸႂ်ၼိူဝ်ၸၢတ်ႈပၢၼ်ၸဝ်ႈၵဝ်ႇလီလီၼၼ်ႉၵူၺ်း ၊ ၵူၼ်းမေႃယူႇမေႃၵိၼ်ၼႆႉ ဢမ်ႇၸႂ်ႈၵူၼ်းႁဵတ်းၵႅင်ႈ ၊ ၵူၺ်းၵႃႈမၼ်းပဵၼ်လွၵ်းလၢႆးလီ တွၼ်ႈတႃႇၶဝ်ႈၸွမ်းၼႂ်းတူင်ႇဝူင်းၵူႈလွင်ႈလွင်ႈၼၼ်ႉၵူၺ်း ။
ၵဵပ်းႁွမ်တွမ်တႅမ်ႈ ယွတ်ႈၽိူဝ်ၼုမ်ႇ
#လိၵ်ႈလၢႆးလီလူ
