24/01/2022
ကိုယ့်အသည်းလေးတွေကိုပျော်အောင်ထားကြစေလို
ကဲ ... ကျွန်တော်က ဒီနေ့မှာ ကိုယ့်အသည်းလေးတွေကို ဘယ်လိုပျော်အောင်ထားကြမလဲ ဆိုတဲ့အကြောင်းလေး ပြောပြပေးချင်ပါတယ်
(ချောကလက်တွေ ပန်းစီးတွေနဲ့ပျော်အောင်လုပ်တာမဟုတ်ဘူးနော်😂)
အသည်းလေး(liver)ကိုပြောတာပါ (အသဲလေး ချစ်ချစ်လေးတွေကိုပြောတာမဟုတ်ပါ😂)
👉🏻မိမိရဲ့ အသည်းလေးတွေကို မပျော်ရွှင်အောင် မကျန်းမာအောင် လုပ်တဲ့အထဲမှာ အသည်းရောင်အသားဝါပိုးတွေက ထိပ်ဆုံးကပါ..
ကမ္ဘာကျန်းမာရေးအဖွဲ့အစည်းကြီး WHO ဟာဆိုရင် ကမ္ဘာ့လူဦးရေရဲ့ (296 )million ခန့်ဟာ နာတာရှည်အသည်းရောင်အသားဝါပိုး ကူးစက်ခံနေရပြီး နှစ်စဉ်နှစ်တိုင်း (1.5 )millionခန့် လူနာသစ်တွေ ထပ်တိုးနေတယ်လို့ဆိုထားပါတယ်
👉🏻အသည်းရောင်အသားဝါပိုးဟာ A,B,C,D,E (၅)မျိုးထိ ရှိပါတယ်…
အဲ့ဒီထဲကမှ လူသိအများဆုံးနဲ့ အန္တရာယ် အရှိဆုံးကတော့ Bပိုးနဲ့ C ပိုးပါ
အသည်းရောင်အသားဝါ Bပိုးရဲ့ 60% နဲ့ C ပိုးရဲ့ 35% တို့က နာတာရှည်အသားရောင်ခြင်း,အသည်းခြောက်ခြင်း နှင့် အသည်းကင်ဆာရောဂါတွေထိ ဖြစ်စေနိုင်ပါတယ်
👉🏻ဘယ်လိုနည်းလမ်းတွေကတစ်ဆင့်ကူးစက်နိုင်လဲ?
✔️ရောဂါပိုးရှိသောလူ၏ သွေး,ခန္တာကိုယ်မှ ထွက်သောအရည်တွေက တစ်ဆင့်ကူးစက်တတ်ပါတယ်
ဒါ့အပြင်
✔️ရောဂါပိုးရှိသူနှင့် အကာအကွယ်မဲ့လိင်ဆက်ဆံခြင်း
✔️မူးယစ်ဆေးသုံးစွဲသူများ အချင်းချင်း ဆေးထိုးအပ် မျှဝေသုံးခြင်း
✔️ရောဂါပိုးရှိသော မိခင်မှ မွေးဖွားလာသော ကလေးကို ကူးစက်ခြင်း
✔️ကျန်းမာရေးစောင့်ရှောက်မှုပေးသည့်နေရာများတွင် ရောဂါပိုးရှိသူအသုံးပြုပြီးသော ဆေးထိုးအပ်များနှင့် ခွဲစိတ်ပစ္စည်းများ ထိရှမိခြင်း
✔️ရောဂါပိုးရှိသူ၏ အသုံးအဆောင်များ (ဥပမာ-မုတ်ဆိတ်ရိတ်ဓါး,လက်သည်းညှပ်,သွားတိုက်တံ) စသည့်အရာများကို ပြန်လည်အသုံးပြုမိခြင်း
အစရှိသည့် နည်းလမ်းတွေကတစ်ဆင့်ကူးစက်တတ်ပါတယ်
👉🏻ရောဂါလက္ခဏာတွေက ဘာတွေလဲ?
ကျွန်တော်တို့ဆေးကျောင်းတုန်းက ပါမောက္ခ ဆရာကြီးတစ်ယောက် ပြောပြဖူးတာလေး မှတ်မိသွားတယ်
#အသည်းဆိုတိုင်းဝါဝါ မထင်နဲ့ တဲ့
ဆရာကြီးပြောခဲ့ဖူးသလိုပါပဲ လူတွေအများစုထင်ကြတာက မျက်လုံးတွေဝါ,အသားတွေဝါ မှ အသည်းရောဂါလို့ ထင်တတ်ကြတာပါ
လူတို့စိတ်ထဲစွဲနေတာ က အသားမဝါရင် အသည်းရောဂါ မဟုတ်ဘူးလို့ စွဲနေကြတာပါ
တကယ်တော့ ဒါတွေဟာ လုံးဝ မှားယွင်းပါတယ်❌
အခုပြောမဲ့ B ပိုးနဲ့ C ပိုးဟာ အစပိုင်းမှာ ဘာရောဂါလက္ခဏာမှ မပြတတ်ပါဘူး
▪️မောပန်းနွမ်းနယ်တယ်
▪️အစားအသောက်ပျက်တယ်
▪️အသားတွေအဆစ်အမြစ်တွေ နာကျင်တယ် စတဲ့မထင်မရှား အအေးမိသလို လက္ခဏာ လေးတွေပဲ ခံစားရတတ်ပါတယ်
ရောဂါ အဆင့်မြင့်လာမှသာ
✔️အသားတွေဝါမယ် မျက်လုံးတွေဝါမယ်
✔️ဗိုက်အောင့်မယ်
✔️ဝမ်းမဲမဲသွားမယ်
✔️ဆီးအရောင်ရင့်မယ်
✔️ဝမ်းအရောင်ဖျော့မယ်
✔️ခြေထောက်တွေဖောမယ်
✔️အသားတွေယားမယ် ဒီလို လက္ခဏာတွေ ဖြစ်တတ်တာပါ
ဒီလိုရောဂါ လက္ခဏာတွေပြလာတဲ့ အချိန်ရောက်ရင်တော့ ရောဂါဟာ တော်တော်လေး အဆင့်မြင့်တဲ့အခြေအနေ ကိုရောက်သွားတတ်ပါတယ်
👉🏻ဒါကြောင့် မဖြစ်ခင်မှာ ကြိုတင်ကာကွယ်တဲ့အနေနဲ့ ကာကွယ်ဆေးထိုး ဖို့အလွန်အရေးကြီးပါတယ်
‼️Bပိုးကကာကွယ်ဆေး ထိုးလို့ရပါတယ်
‼️C ပိုးကတော့ကာကွယ်ဆေး မရှိသေးပါဘူး
👉🏻 Bပိုး ကာကွယ်ဆေးက တစ်ကြိမ်ထဲ ထိုးရုံနဲ့ရပါသလား?
မရပါ...
B ပိုးကာကွယ်ဆေးဟာ (၃)ကြိမ်တိတိ ထိုးရတာပါ.အများဆုံးအသုံးပြုကြတာကတော့ 0-1-6 ဆိုတဲ့ နည်းစနစ်ထိုးကြတာ များပါတယ်
🔸ပထမဆုံးအကြိမ် ထိုးပြီး (1) လအကြာမှာ ဒုတိယအကြိမ် ထိုးပေးရပါတယ်
🔸ဒုတိယအကြိမ်ထိုးပြီး (6)လအကြာမှာ တတိယ အကြိမ် ထိုးရတာပါ
မိမိ ထိုးရမယ့် ရက်ကို သေချာမှတ်ပြီး သုံးကြိမ်လုံးပြည့်စုံ ထိုးနှံမှသာ ကာကွယ်ဆေးအောင်တယ်လို့ဆိုနိုင်တာပါ
🔸ကလေးငယ်တွေဆိုရင်လဲ မွေးပြီးပြီးချင်း တတ်နိုင်သမျှစောစီးစွာ ကာကွယ်ဆေးထိုးတာဟာအကောင်ဆုံးလို့ WHO ကဆိုပါတယ်
👉🏻ကာကွယ်ဆေး အရင်က တစ်ခါမှ မထိုးဖူးဘူး. ခုမှ ရောဂါပိုးရှိတဲ့လူအသုံးပြုထားတဲ့ ဆေးထိုးအပ်နဲ့ ထိုးမိတာ အဲ့တာ ကာကွယ်ဆေးထိုးရင်ရော effective ဖြစ်ပါဦးမလား?
ဖြစ်ပါတယ် …(post exposure prophylaxis လို့ခေါ်ပါတယ်)
ရောဂါပိုးရှိသူရဲ့ သွေးနဲ့ထိတွေ့မိ ပြီးပြီးချင်း (၂၄) နာရီ အတွင်း ကာကွယ်ဆေးထိုးနိုင်ပါတယ်
👉🏻သွေးစစ်လိုက်တာ ရောဂါပိုးတွေ့တာနဲ့ လန့်ဖြန့်ပြီး virus သတ်ဆေး ချက်ချင်းသောက်စရာလိုလား?
‼️B ပိုးရှိတိုင်းလဲ virusသတ်ဆေး တစ်သက်လုံး သောက်စရာမလိုပါဘူး
ဆေးမသောက်ခင်မှာ သက်ဆိုင်ရာ အသည်းဆရာဝန်ကြီးနဲ့ တိုင်ပင်ပြီး
▪️သွေးထဲမှာရှိတဲ့ ပိုးကောင်ရေ (၆)လ တစ်ခါစစ်ဆေးတာ,
▪️အသည်းထဲမှာရှိတဲ့ enzyme တွေစစ်ဆေးတာ စတာမျိုးတွေ စစ်ဆေးရပါတယ်
စစ်ဆေးလိုက်လို့ မိမိသွေးထဲမှာ ပိုးကောင်ရေ များနေရင်(ဒါမှမဟုတ်) အသည်းပျက်စီးနေရင်တော့ ကျွမ်းကျင်ရာ ဆရာဝန်များနှင့်တိုင်ပင်ပြီး ဆေးစွဲသောက်သင့်ပါတယ်
👉🏻ရောဂါပိုးကူးစက်ခံရရင်အလျှင်းပျောက်ကင်းနိုင်လား?
🔸ဒီနေရာမှာ Bပိုးဟာဆိုရင် မိမိမှာ တစ်ခေါက်ဖြစ်ဖူးတာနဲ့ Anti Hbc ဆိုတဲ့ ဓါတ်တစ်မျိုးဟာ မိမိသွေးထဲမှာ အမြဲရှိနေမှာပါ
အလွယ်ပြောရင်တော့ B ပိုးဟာ အလျှင်းမပျောက်ပါဘူး
ဒါပေမဲ့ ပိုးကောင်ရေနည်းအောင် ဆေးပုံမှန်သောက်မယ် ရောဂါအခြေအနေ အမြဲ check up လုပ်မယ်ဆိုရင်တော့ ဆေးမသောက်ပဲ လူကောင်းကဲ့သို့ နေသွားရတဲ့သူတွေလဲ ရှိပါတယ်…
🔸Cပိုးကတော့ ကောင်းတာတစ်ခုက စောစောစီးစီး ကုသမှု ခံယူလျှင် လုံးဝအလျှင်းပျောက်နိုင်ပါတယ်
စောစီးစွာ ကုသမှု မခံယူရင်တော့ အသည်းခြောက်မယ် အသည်းကင်ဆာတွေ ဖြစ်တတ်ပါတယ်
အချုပ်ပြောရရင်တော့ ဘယ်အရာမဆို ကာကွယ်ခြင်းက ကုသခြင်းထက် ပိုကောင်းတာမို့
မိမိရော မိမိချစ်ခင်ရသူတွေရော မကူးစက်အောင်-
‼️ကာကွယ်ဆေး ထိုးနှံမယ်
‼️အရက် ဆေးလိပ်လျှော့သောက်မယ်
‼️တစ်ခါသုံးဆေးထိုးအပ်တွေသာသုံးစွဲမယ်
‼️အခြားသူ၏သွေးနှင့်တိုက်ရိုက် မထိမိအောင်ကာကွယ်မယ်
‼️သွေးသွင်းရန်လိုအပ်ပါကလည်း (အသည်းရောင်ရောဂါ Bပိုး Cပိုး, ငှက်ဖျားရောဂါ, HIVရောဂါ) စတဲ့ရောဂါတွေ လုံးဝကင်းစင်တဲ့သွေးကိုသာသွင်းမယ်
အစရှိတဲ့ အရာတွေကို လိုက်နာဆောင်ရွက်မယ်ဆိုရင်တော့ဖြင့်
#မိမိတို့ရဲ့ အသည်းလေးတွေဟာ ကျန်းမာပြီးပျော်ရွှင်နေမှာဖြစ်ပါတယ်
အကယ်၍ မိတ်ဆွေတို့အနေဖြင့် အသည်းရောင်အသားဝါ Bပိုး, Cပိုးတို့နှင့်ပတ်သက်ပြီး အကြောင်းတစ်စုံတစ်ရာ အသေးစိတ်ဆွေးနွေးသိရှိလိုပါက ကျွန်တော်တို့ ဆေးခန်း page မှာ စုံစမ်းလို့ရသလို ဆေးခန်းမှာလည်း booking တင်လို့ရပါတယ်ခင်ဗျ🤩
အားလုံးပဲ ကျန်းမာချမ်းသာသော မိသားစုဘဝလေးတွေ ပိုင်ဆိုင်ကြပါစေခင်ဗျာ
Hnin
ဟိဏ်းထက် ၂၄ _ နာရီဆေးခန်း
ဆေးခန်း_{ ၁ }၂၂ လမ်း ၈၉ ဘီ
လမ်းထောင့်
အောင်မြေမန္တလာဘောလုံးကွင်း မြောက်ဘက်ပေါက်
ဆေးခန်း { ၂ }၈၉ လမ်း ၂၁ _ ၂၂ ကြား
အောင်သမာဓိရွှေဆိုင်အနီး
09 767298872
ဒေါက်တာ သိုင်းမင်းထက်အောင်အောင်
