22/10/2025
~~~ ယောင်တတ်တဲ့သူတစ်ယောက်ကို ခါးကိုကလိယားထိုးလိုက်တဲ့အခါ ဆက်ခနဲတွန့်သွားပြီး မကြားဝံ့မနာသာစကားတွေ ၁မိနစ်လောက် ဆက်တိုင်အော်ဆဲနေတာမျိုး ကြုံဖူး / ကြားဖူးကြမယ်ထင်ပါတယ်။
❓ဘာလို့ဒီလိုဖြစ်တာလဲ
❓ဘာကြောင့်များလဲ
- ပုံမှန်အချိန်ဆို ဒီလူဟာ အခုလိုရိုင်းရိုင်းစိုင်းစိုင်းဆဲတတ်တဲ့သူမဟုတ်ပါဘူး။
- ခါးကိုတို့လိုက်လို့ယောင်သွားတဲ့အခါ သူမဟုတ်တဲ့လူတစ်ယောက်လို ထိန်းချုပ်လို့မရတော့ဘဲ ဆဲမိသွားတာပါ။
- ဒီလိုယောင်တတ်သူတွေက သူတို့ကိုယ်သူတို့ယောင်တတ်မှန်းလဲသိပါတယ်၊ ယောင်တဲ့အချိန် ဆဲလိုက်တာတွေကိုလဲ မှတ်မိပါတယ်၊ ဒါပေမယ့် နောက်တစ်ခါမယောင်အောင် ထိန်းနိုင်စွမ်းမရှိပါဘူး၊ ခါးတို့ခံရတိုင်း သူ့ရဲ့ထိန်းချုပ်မှုလွတ်ပြီး ဆဲမိနေတော့တာပါပဲ။
- နာမည်အနေနဲ့ စကားလုံးတစ်ခုခုဖော်ပြရရင် ဒါဟာ Dissociation ပါပဲ။ ကိုယ့်ကိုကိုယ်ထိန်းချုပ်မှုကင်းမဲ့သွားတဲ့ အခြေအနေလို့ ဆိုရပါမယ်။
~~~
ဘာလို့ဒီလိုဖြစ်တာလဲဆိုတာကို စိတ်ပညာရှုထောင့်တစ်ခုကနေကြည်ရင် Ego အားနည်းလို့ဖြစ်ရတယ်လို့ သတ်မှတ်တယ် ❗️
~~~ သုတေသနစစ်တမ်းတွေအရ Dissociation ဖြစ်တတ်တဲ့သူတွေဟာ
- ကိုယ့်ကိုကိုယ်ယုံကြည်မှုနည်းတတ်တယ်
- ပွင့်ပွင့်လင်းလင်းမပြောတတ်ဘူး
- သူများအလိုလိုက်နေတတ်ကြတယ်
- ကိုယ့်ကိုကိုယ်ခံယူထားတဲ့ အားနည်းချက် တစ်ခုခုရှိနေတတ်တယ်
- ငယ်ဘဝစိတ်ဒဏ်ရာတွေများတတ်တယ်
- ခက်ခဲကြပ်တည်းတဲ့ ဘဝအခြေအနေတွေရှိနေတတ်တယ်
အစရှိတဲ့ အချက်တွေကြောင့် သူများတွေထက်စာရင် ego အားနည်းမယ်လို့ ယူဆရတယ်။
~~~ Dissociation ဖြစ်သွားတာကြောင့် စိတ်သက်သာရာ ရသွားတယ်။
- လူတစ်ယောက်က သူမကျေနပ်တဲ့အကြောင်းကို မပြောရဲဘူး၊ ဖြစ်နေတဲ့ပြဿနာကို ရင်ဆိုင်မဖြေရှင်းရဲဘူး၊ အဲ့တော့ မကြိုက်ဘဲနဲ့ ငုံ့ခံလိုက်ရတယ်။
- တနည်းအားဖြင့် ဖြစ်သင့်တာတွေဆိုတာကိုပဲလုပ်နေရပြီး ကိုယ်ဖြစ်ချင်တာရဲ့ ဆန့်ကျင်ဘက်ကိုချည်းလုပ်နေရတဲ့အခါ မကျေမနပ်တွေများလာတယ်။
- ကိုယ့်ရဲ့ ပုံမှန်စိတ်အရ ဘယ်လိုဖြေရှင်းရမလဲမသိဘူး၊ ဒီအခါ ကိုယ်မဟုတ်တဲ့ အခြားသူတစ်ယောက်ပုံစံပြောင်းသွားပြီး ကိုယ်မလုပ်လောက်တဲ့အလုပ်တွေလုပ်လိုက်တယ်၊ ပြီးတော့လဲ ကိုယ်ကအဲ့လိုလုပ်လိုက်တာ တမင်သက်သက်လည်းမဟုတ်ဘူးလေ။
- ဒီလိုပုံစံနဲ့ dissociation ဖြစ်ပြီး ကိုယ့်ရဲ့ မကျေနပ်စိတ်ကို သက်သာစေတယ်။
~~~ ခါးတို့တဲ့အခါ ဆဲတတ်တဲ့သူဆိုရင်
- သူငယ်ငယ်ကတည်းက ခါးတို့တာကိုမကြိုက်ဘူး။
- ခါးတို့မခံချင်လို့ရှောင်ပြေးတဲ့အခါ၊ မကြိုက်မှန်းသိလေ ပိုစလေဆိုတဲ့သူတွေနဲ့ ကြုံရတယ်။
- ပါတ်ဝန်းကျင်ကလဲ ခါးတို့တဲ့သူကိုမပြစ်မတင်ဘူး၊ မကြိုက်တဲ့သူကိုပဲ 'နင်ကဒီလောက်လေးစတာကိုဘာဖြစ်နေတာလဲ'လို့ ဆိုတတ်ကြတယ်။
- အဲ့တော့ ဘယ်လိုဖြေရှင်းရမှန်းမသိ၊ ဘာလုပ်လို့လုပ်ရမှန်းမသိတဲ့အခါ dissociation ဖြစ်သွားတယ်။ ခါးတို့လိုက်တာနဲ့ ထိန်းလို့မရဘဲ ဆဲတတ်တဲ့သူဖြစ်လာတယ်၊ တမင်ဆဲတာမဟုတ်ဘူး၊ သူထိန်းလို့မရဘူး။
- အဲ့တော့ သူ့ကိုခါးတို့ရင်ဆဲမှာပဲဆိုတာ လူတိုင်းသိတဲ့ ပုံသေဖြစ်စဥ်ဖြစ်လာတယ်။
- တစ်ယောက်ယောက်က ခါးတို့တဲ့အခါ ဆဲတဲ့သူရဲ့အပြစ်မဟုတ်တော့ဘူး၊ တို့တဲ့သူရဲ့အပြစ်ဖြစ်သွားတယ်။
- ဘယ်သူကမှ ကိုယ့်ဘက်ကပါပြီး ခါးတို့သူကိုအပြစ်မတင်ရင်တောင်မှ ကိုယ်ကဆဲလိုက်ရလို့ မသိစိတ်ထဲမှာ ကျေနပ်သွားတယ်။
~~~ ~~~ ~~~
လူတစ်ယောက် ကလေးတစ်ယောက်ဟာ မွေးကတည်းက၊ စကားစပြောတတ်ကတည်းက ခါးတို့ရင် ဆဲတတ်တာမှမဟုတ်တာ ...
သူအသက်အရွယ်တစ်ခုခုရောက်တော့မှ ဒီအကျင့်၊ ဒီအပြုအမူက တဖြည်းဖြည်းပေါ်လာတာလေ ...
~~~ ~~~ ~~~
ဒီအယူအဆကို Victim Blame လုပ်သလို မသုံးမိဖို့လိုတယ်။ ဒီလူဟာ Ego အားနည်းလို့သာ ဒီလိုစိတ်ပြဿနာဖြစ်ရပါတယ်လို့ အားနည်းသူကို ထပ်ပြီးနှိမ်ဖို့ ပြောတာမဟုတ်ဘူး။
စိတ်ပိုင်းဆိုင်ရာ၊ အပြုအမူဆိုင်ရာ ပြဿနာတစ်ခုခုဖြစ်လာရင် ဒီပြဿနာဟာ ကာယကံရှင်နဲ့ပဲဆိုင်တာမဟုတ်ဘဲ ဘေးကလူတွေရဲ့ ပယောဂလည်း မကင်းဘူးဆိုတာကို ဖော်ပြချင်တာ ...
