29/03/2022
😍 သြားႏွင့္ခံတြင္းေရာဂါကင္းအျမဲျပံဳးေပ်ာ္ရႊင္😍
🙏🙏🙏 ဆရာDrခင္ေမာင္လြင္ရဲ႕ သြားႏွင့္ခံတြင္းက်န္းမာေရး အေၾကာင္းသိေကာင္းစရာ
https://m.facebook.com/story.php?story_fbid=516055136542973&id=100044154743394
လူတို့၏ ခံတွင်း၌ အဏုဇီဝပိုးပေါင်းများစွာရှိရာ အဓိကအားဖြင့် ရောဂါဖြစ်စေသော ပိုးများ (Pathobiotics)၊ ခံတွင်းကျန်းမာရေးနှင့် ခန္ဓာကိုယ်တစ်ခုလုံး ကျန်းမာရေးအတွက် အထောက်အကူပြုသော ပရိုဘိုင်အိုတစ်များ (Probiotics) နှင့် လောလောဆယ်အားဖြင့် ဒုက္ခလည်းမပေး မည်သည့်တာဝန်မှလည်း မထမ်းဆောင်သေးဘဲ တွယ်ကပ်နေသော အဏုဇီဝပိုးများ (Commensal organisms) ဟူ၍ အုပ်စု (၃) ခု ခွဲခြားနိုင်ပါသည်။
အခြေအနေနှင့် အချိန်အခါပေါ် မူတည်၍ ဘက်တီးရီးယားများ (Bacteria)၊ မှိုပိုးများ (Fungi) နှင့် ဗိုင်းရပ်စ်ပိုးများ (Viruses) ရှိနေတတ်ပါသည်။ ဘက်တီးရီးယားမှာ အများဆုံးဖြစ်ပြီး လူအားလုံး၏ ခံတွင်း၌ တွေ့နိုင်သော မျိုးစိတ်စုစုပေါင်း ၅၀၀ မှ ၁၀၀၀ ခန့် အထိ ရှိပါသည်။ သာမန်လူတစ်ယောက်ကို ကြိုက်သည့် အချိန်တွင် ခံတွင်းရှိ ဘက်တီးရီးယားအမျိုးအစား အရေအတွက်ကို တိုင်းကြည့်လျှင် ၁၀၀ မှ ၂၀၀ အတွင်း ရှိနေလေ့ရှိသည်။ သွားနှင့်ခံတွင်း ကျန်းမာရေးကို ဂရုစိုက်သူများ၏ သွားတစ်ချောင်းစီရှိ မျက်နှာပြင်တွင် ဘက်တီးရီးယား အရေအတွက်မှာ ၁,၀၀၀ မှ ၁၀၀,၀၀၀ (တစ်သိန်း) ခန့်သာ ရှိသော်လည်း သွားနှင့်ခံတွင်း ကျန်းမာရေးကို ဂရုမပြုသူတို့၏ သွားတစ်ချောင်းစီပေါ်ရှိ ဘက်တီးရီးယား (အထူးသဖြင့် ရောဂါပိုးများ) အရေအတွက်မှာ သန်း ၁၀၀ မှ သန်း ၁၀၀၀ (တစ်ဘီလီယံ) အထိ တွေ့ရလေ့ရှိသည်။
ကျန်းမာသန်စွမ်းသူ၏ ခံတွင်း၌ အကျိုးပြု ဘက်တီးရီးယား အရေအတွက်က ရောဂါပိုး အရေအတွက်ထက် များစွာပိုမိုကာ ရောဂါပိုးများကို ကောင်းစွာ ထိန်းချုပ်ထားလေ့ရှိသည်။ ယင်းတို့၏ လုပ်ငန်းဆောင်တာများလည်း ကွဲပြားလျက် ရှိပါသည်။ မကျန်းမာသောသူ အထူးသဖြင့် ခံတွင်းကျန်းမာရေး ချို့တဲ့သူအနေနှင့် ရောဂါဖြစ်စေသော ဘက်တီးရီးယား အရေအတွက်က ပိုမိုများပြားလေ့ရှိကြောင်း တွေ့ရသည်။ သွားပွတ်တံဖြင့် သွားကို သေချာစွာ တိုက်ပြီးပါက ဘက်တီးရီးယား အရေအတွက်မှာ များစွာ လျော့ကျသွားလေ့ရှိပြီး သိန်းဂဏန်းခန့်သာ ကျန်တော့ကြောင်း တွေ့ရပါသည်။ ထို့ကြောင့် သွားပွတ်တံဖြင့် မနက်တစ်ကြိမ်၊ ညတစ်ကြိမ် ပုံမှန် သွားတိုက်ပေးခြင်းဖြင့် သွားနှင့်သွားဖုံး ကျန်းမာရေးအတွက် များစွာ အထောက်အကူပြုပါသည်။
သွားနှင့်ခံတွင်း ကျန်းမာရေးသည် သွားနှင့်ခံတွင်း သီးသန့်အတွက်သာ မဟုတ်ဘဲ ကျွနု်ပ်တို့ ခန္ဓာကိုယ် တစ်ခုလုံး ကျန်းမာရေးအတွက် လွန်စွာမှ အရေးပါလှပါသည်။ အကယ်၍ သွားနှင့်ခံတွင်း ကျန်းမာရေးကို ဂရုမစိုက် ပါက သွားများ တစ်ချောင်းပြီး တစ်ချောင်း ဆုံးရှုံးရ မှာဖြစ်သလို ခန္ဓာကိုယ် အနှံ့အပြား၌လည်း ရောဂါမျိုးစုံ ရရှိနိုင်ကြောင်း ယနေ့ သိလာရပြီး ဖြစ်သည်။ အဆိုပါ ရောဂါပိုးများသည် သွားနှင့်ခံတွင်းမှတစ်ဆင့် တစ်ကိုယ်လုံးသို့ ပျံ့နှံ့ရောက်ရှိကာ နှလုံးရောဂါ၊ အဆုတ်ရောဂါ၊ ဦးနှောက်နှင့် အာရုံကြောရောဂါ၊ ကျောက်ကပ်ရောဂါ အစရှိသည် တို့ကို ဖြစ်စေနိုင်ပေသည်။ မှတ်ဉာဏ်ချို့ယွင်းသည့်ရောဂါ (Dementia) နှင့် အော်ဇိုင်းမား ခေါ် သတိနှင့် မှတ်ဉာဏ် ချို့ယွင်းသောရောဂါ (Alzheimer's disease) တို့ပါ မကျန်အောင် ဒုက္ခပေးနိုင်ပါသည်။ နောက်ဆုံး သက်တမ်း တိုတိုသာ နေရမည်ဖြစ်ကြောင်းလည်း သိလာရပါပြီ။
ဒေါက်တာခင်မောင်လွင် (FAME)
ကိုးကားချက် - "ဘဝလက်တွဲဖော်အစစ် ပရိုဘိုင်အိုတစ်" စာအုပ်၊ အခန်း (၁၁) သွားနှင့်ခံတွင်း ကျန်းမာရေးနှင့် ပရိုဘိုင်အိုတစ်မှ ထုတ်နုတ်ဖော်ပြသည်။
👉https://t.me/drkhinmaunglwin
👉https://t.me/drkhinmaunglwingroup
