04/03/2026
မြန်မာနိုင်ငံ လူမှုကယ်ဆယ်ရေးအဖွဲ (မန္တလေးတိုင်းဒေသကြီး ကော်မတီရုံး) နှင့် KBZ Bank၊ KBZ Center Mandalay တို့ ပူးပေါင်းဖွင့်လှစ်သည့် Emergency First Responder Training (Batch-3) ဖွင့်ပွဲကို ယနေ့ မတ်လ (၄) ရက် နံနက် (၁၀) နာရီက ၇၃ လမ်း၊ ၁၁၀ လမ်းထောင့်ရှိ KBZ Center Mandalay တွင် ကျင်းပခဲ့ပါသည်။
သင်တန်းဖွင့်ပွဲသို့ မြန်မာနိုင်ငံ လူမှုကယ်ဆယ်ရေးအဖွဲ့ (မန္တလေးတိုင်းဒေသကြီး ကော်မတီရုံး) ဥက္ကဌ ဦးလှိုင်မင်းဦးနှင့် ကော်မတီအဖွဲ့ဝင်များ၊ KBZ Center Mandalay မှ တာဝန်ရှိသူများ၊ သင်တန်းသားများ တက်ရောက်ခဲ့ကြပါသည်။
ဖြစ်ပေါ်ခဲ့ပြီးသော သဘာဝဘေးအန္တရာယ် ကာလများတွင် ပရဟိတအသင်းများ၏ ကူညီမှု အခန်းကဏ္ဍများသည် လွန်စွာအရေးပါမှု ရှိခဲ့သဖြင့် ယင်းပရဟိတ အသင်းများအား သင်တန်းများ စနစ်တကျ ပို့ချပေးခြင်းဖြင့် နောက်နောင် မလွဲမသွေ ကြုံတွေ့လာနိုင်သည့် သဘာ၀ဘေးများတွင် ဘေးဒဏ်သင့်ပြည်သူများ၏ မဆုံးရှုးသင့်သော အသက်အိုးအိမ်စည်းစိမ်များ ယခုထက်ပိုမို စနစ်တကျ ထိရောက်စွာ ကူညီ/ကယ်ဆယ်ပေးနိုင်ရန် ရည်ရွယ်၍ ဖွင့်လှစ်သင်ကြားပေးနေခြင်းဖြစ်ပြီး ယခုအကြိမ်သည် တတိယမြောက် အပတ်စဥ်သင်တန်း ဖြစ်ပါသည်။
သင်တန်းသို့ မန္တလေးမြို့ပေါ် (၇) မြို့နယ် အပါအဝင် မြင်းခြံ၊ မိတ္ထီလာ၊ ရွာငံ၊ အောင်ပန်း၊ မကွေး၊ မင်းဘူး၊ သာစည်၊ မလှိုင်နှင့် စစ်ကိုင်းစသည့် မြို့နယ်တို့မှ ပရဟိတအသင်းများမှ သင်တန်းသားဦးရေ (၄၀) ဦး တက်ရောက်လျက်ရှိပြီး သင်တန်းကာလမှာ (၁၀) ရက်တာ ကြာမြင့်မည် ဖြစ်ပါသည်။
သင်တန်းတွင် ကယ်ဆယ်ရေးဆိုင်ရာ အခြေခံနည်းစနစ်များ (Basic Rescuer Methods)၊ အရေးပေါ် လူနာရွှေ့ပြောင်းနည်းများ (Patient Transportation Methods)၊ အရေးပေါ် လူနာပြုစုနည်းများ (Emergency First Aid & CPR)၊ ဆေးရုံမရောက်ခင် လူနာစောင့်ရှောက်ခြင်း (Pre Hospital Care)၊ ပစ္စည်းမဲ့ ကယ်ဆယ်ရေး သင်ခန်းစာများ (Rescue Course without equipment) နှင့် အဆင့်မြင့် ကယ်ဆယ်ရေး သင်ခန်းစာများ (အခြေခံ) Advanced Rescue Courses (Basic) တို့ကို ထည့်သွင်းပို့ချသွားမည် ဖြစ်ပါသည်။
