26/04/2026
✅ကိုယ်ဝန်ဆောင်စဉ် ခြေချောင်း လက်ချောင်းများ ထုံကျဉ်ခြင်း
ကိုယ်ဝန်ဆောင်မိခင်တစ်ဦးနဲ့တစ်ဦးကြားထဲမှာ ထုံကျဉ်ကိုက်ခဲတဲ့ဝေဒနာဟာ အနည်းနဲ့အများကွဲပြားခြားနားလေ့ရှိပါတယ်။ သို့ပေသိခြေချောင်းလက်ချောင်းလေးတွေ ထုံကျဉ်ကိုက်ခဲတာကျတော့ အများစုတူတတ်ကြပါတယ်။
ကိုယ်ဝန်ဆောင်ချိန် ခြေချောင်းလက်ချောင်းတွေ ထုံကျဉ်ကိုက်ခဲတာဟာ ကိုယ်ဝန်(၄)လလောက်မှာ ခဏတာ စတင်ပေါ်လာတတ်ပြီးတော့ ပြန်ပျောက်သွားတတ်ပါတယ်။ဒီအချိန်မှာ အဖြစ်လည်းနည်းပြီးတော့ ဝေဒနာကလည်းမပြင်းထန်သေးပါဘူး။
အများစုကတော့ကိုယ်ဝန်နောက်ဆုံး သုံးလပတ်မှာ အဖြစ်များကြပါတယ်။ ထုံကျဉ်ကိုက်ခဲတာက လက်ချောင်း ၊ခြေချောင်း၊ လက်ကောက်ဝတ်၊ ခြေချင်းဝတ် ကနေတဆင့် ပေါင် တင်ပါး နဲ့ နောက်ဆုံးမှာ ခါးတွေအထိပါ ထုံကျဉ်ကိုက်ခဲတဲ့ဝေဒနာတွေကရောက်ရှိသွားပါတော့တယ်။
မနက်အိပ်ရာထချိန်၊ ညတရေးနိုးချိန်၊ ဒါမှမဟုတ် အိပ်ရာကနေ ရုတ်တရက်ထပြီးလှုပ်ရှားချိန်မှာ ဒီလက္ခဏာတွေ ခံစားရနိုင်ပါတယ်။အချို့ကိုယ်ဝန်ဆောင်အမျိုးသမီးတွေမှာ လက်ကထိလို့ထိမှန်းမသိဘဲ ထုံနေတာမျိုး၊ ပူခနဲဖြာထွက်သွားတဲ့ခံစားချက်မျိုး နဲ့ ကျဉ်ခနဲနာကျင်မှုမျိုးတွေ ခံစားရတတ်ပါတယ်။
ဒီလိုကိုက်ခဲနာကျင်တဲ့ဝေဒနာဟာ ကိုယ်ဝန်ဆောင်မိခင်ရဲ့ကျန်းမာရေးအပေါ်ကြီးကြီးမားမားသက်ရောက်မှုမရှိပေမယ့် နေ့စဉ်ပြုလုပ်နေတဲ့လုပ်ငန်းဆောင်တာတွေကိုတော့ သက်တောင့်သက်သာနဲ့ ကောင်းကောင်းမွန်မွန်လုပ်ဆောင်နိုင်ခြင်းမရှိတော့ပါဘူး။
✅အဓိကဖြစ်ရတဲ့အကြောင်းရင်းများ
၁)ကိုယ်ဝန်ဆောင်ချိန်မှာ ကြီးထွားလာတဲ့ ကလေးငယ်အတွက် သားအိမ်ထဲ နေရာပိုရစေဖို့ ၊ကိုယ်အလေးချိန်တိုးလာမှုကို ခံနိုင်ရည်ရှိစေဖို့၊ ခန္ဓာကိုယ်ထဲမှာရှိတဲ့ အရွတ် (Ligaments) ၊အဆစ်တွေနဲ့ ကြွက်သားတွေကို ပျော့ပြောင်းပြေလျော့လာစေဖို့ အတွက် (Relaxin)ဟော်မုန်းတွေ အများကြီးထုတ်လွှတ်ပေးရပါတယ်။ (Relaxin)ဟော်မုန်းကို မျိုးဥအိမ်ကထုတ်လွှတ်ပေးသလို သန္ဓသေားရဲ့အချင်းကနေလည်းထုတ်လွှတ်ပေးပါတယ်။ မွေးဖွားချိန်မှာလည်း ကလေးငယ် ချောချောမွေ့မွေ့ထွက်လာနိုင်ဖို့အတွက်တင်ပါးဆုံရိုးမှာရှိတဲ့အရွတ်တွေကို ပျော့ပျောင်းစေပြီး တင်ပါးဆုံရိုးကို ပိုမိုကျယ်လာစေဖို့ ကူညီပေးပါတယ်။ အရွတ် နဲ့ အရိုးတွေပျော့ပြောင်းလာတာမို့ ကိုယ်ဟန်အနေအထားပုံစံပြောင်းလဲလာကာ ရလဒ်အနေနဲ့ အာရုံကြောညပ်တာဖြစ်လာနိုင်ပြီး စူးခနဲနာကျင်တာ၊ ခြေထောက် ၊ ပေါင်၊ ခါးနဲ့ တင်ပါးထဲက ထုံကျဉ်တာတွေ ဖြစ်လာနိုင်ပါတယ်။
၂)အလားတူပါပဲ ကလေးပိုထွားလာတာနဲ့အမျှ သားအိမ်ကကြီးထွားလေးလံလာပြီး ကြွက်သား၊ အရွတ်နဲ့အာရုံကြောတွေမှာ အရင်နဲ့မတူဘဲ ဝန်ပိုပိစေနိုင်လို့ ထုံကျဉ်တဲ့ ခံစားမှုတြွေဖစ်စေနိုင်ပါတယ်။
၃)ကိုယ်ဝန်ဆောင်စဉ် ခန္ဓာကိုယ်ကနေ ရေဓာတ်နဲ့ ဆားဓာတ်တွေကို ပိုမိုထိန်းထားခြင်း (Fluid retention) ကြောင့် တစ်ရှူးတွေရောင်ရမ်းပြီး အရည်တွေစုလာတာကြောင့် အာရုံကြောတွေကို ဖိမိရာမှ ထုံကျင်ခြင်းဆိုတဲ့ဝေဒနာတွေ ဖြစ်ပေါ်လာပါတော့တယ်။ခြေထောက်တွေ လက်တွေဖောင်းလာရောင်လာလေ့ရှိပါတယ်။ ဒီလိုဖြစ်လာတဲ့အခါ လက်ချောင်း၊ ခြေချောင်းထိပ်တွေအပြင် လက်ကောက်ဝတ်၊ ခါး၊ ခြေထောက်တို့မှာ ထုံကျဉ်တာတွေပိုဖြစ်လာနိုင်ပါတယ်။
၄)ကိုယ်ဝန်ဆောင်စဉ်အာဟာရတွေကို မျှမျှတတနဲ့လုံလောက်စွာ စံနစ်တကျစားသုံးတတ်ခြင်းဟာလည်းအရေးကြီးသောအခန်းကဏ္ဍကနေပါဝင်ပါတယ်။ကိုယ်ဝန်ဆောင်မိခင်တယောက် အာဟာရချို့တဲ့လာပြီဆိုရင် ခုခံအားတွေကျဆင်းလာတာ၊ သွေးလည်ပတ်မှုမကောင်းမွန်တော့တာ ၊သွေးအားနည်းတာ နဲ့ နောက်ဆုံးမှာခြေလက်တွေထုံကျဉ်လာတာတွေပါဖြစ်လာပါတော့တယ်။
၅)လေ့ကျင့်ခန်းပုံမှန်မလုပ်ခြင်းဟာလည်း ခြေလက်ထုံကျဉ်ခြင်းရဲ့အကြောင်းရင်းတစ်ခုထဲမှာပါဝင်ပါတယ်။အထူးသဖြင့် ကိုယ်ဝန်ဆောင်မိခင်တွေဟာကိုယ်ဝန်လရင့်တာလာတာနဲ့အမျှ ခန္ဓာကိုယ်က လေးလံထိုင်မှိုင်းလာတာရယ်၊ ပင်ပန်းနွမ်းနယ်နေတာကြောင့်ရယ် လေ့ကျင့်ခန်းပြုလုပ်ဖို့ ပျင်းရိလာတတ်ကြပါတယ်။ဒီလိုပျင်းရိပြီး တက်ကြွလှုပ်ရှားမှုမရြှိခင်းဟာ ကိုယ်ဝန်ဆောင်မိခင်တွေရဲ့ခြေလက်တွေကိုပိုခိုင်လာစေပြီး ထုံကျင်ကိုက်ခဲလာစေပါတယ်။ ကလေးမွေးဖွားတဲ့အချိန်မှာလည်း ခက်ခဲတတ်ပါတယ်။ ခြေဖျားလက်ဖျားထိပ်တွေအထိကို သွေးရောက်ရှိမှုနည်းပါးလာပြီးတော့ အောက်စီဂျင် နဲ့ အာဟာရပံ့ပိုးမှုတွေကျဆင်းလာပါတော့တယ်။ဒါဟာ ကိုယ်ဝန်ဆောင်မိခင်တွေရဲ့ခြေချောင်းလက်ချောင်းထုံကျဉ်ခြင်းဖြစ်လာစေတဲ့ အစပါဘဲ။
၆)ကိုယ်ဝန်ဆောင်မိခင်မှာ နဂိုရောဂါအခံတစ်ခုခုဥပမာ- ဆီးချိုရောဂါ၊ အဝလွန်ရောဂါ ၊သွေးတွင်းအဆီများလွန်းတဲ့ရောဂါ ၊အာရုံကြောနဲ့ပတ်သက်တဲ့ရောဂါ နဲ့ သွေးအားနည်းရောဂါတွေရှိခဲ့မယ်ဆိုရင်လည်းပဲ ခြေလက်ထုံကျဉ်တဲ့ပြဿနာတွေက ပိုမိုဆိုးရွားလာနိုင်ပါတယ်။
✅ဘယ်လို သက်သာအောင်လုပ်ရမလဲ?
🍊ရေနွေးနွေးထဲမှာ စိမ်ပေးခြင်း (သို့မဟုတ်) ရေနွေးအိတ်ကပ်ပေးခြင်းက သွေးလည်ပတ်မှုကို တိုးလာစေပြီး ကြွက်သားများကို ပြေလျော့စေကာ ထုံကျဉ်မှုကိုသက်သာစေပါတယ်။
🍊ခြေချောင်းလက်ချောင်းလေးတွေကိုနေ့စဉ်မိနစ်(၃၀)ခန့်ညင်ညင်သာသာနှိပ်ပေးခြင်းအားဖြင့် သွေးလည်ပတ်မှုကိုကောင်းမွန်စေပြီးတော့ ခြေချောင်းလက်ချောင်းထုံကျဉ်တာတွေကိုသက်သာစေပါတယ်။
🍊လက်ချောင်း၊ ခြေချောင်းလေးတွေကို လှုပ်ရှားပေးတာ၊ ခြေကျင်းဝတ်ကို ဝိုင်းပေးတာ စတဲ့ရိုးရှင်းတဲ့ အကြောလျှေ့ာလေ့ကျင့်ခန်းတွေက အာရုံကြောပေါ် ဖိမိနေတဲ့ဖိအား တွေကိုလျော့ကျစေနိုင်ပါတယ်။
🍊ကိုယ်ဝန်ဆောင်မိခင်ဖြည့်စွက် အားဆေးတွေအပြင် Magnesium, Calcium, folic acid, B1, B2 ပါဝင်တဲ့ ဖြည့်စွက်အစားအစာ နဲ့ ဖြည့်စွက်အားဆေးတွေကို သောက်သုံးပေးရမှာဖြစ်ပါတယ်။ကြက်ဥ ၊နွားနို့ နဲ့အစိမ်းရင့်ရောင်ဟင်းသီးဟင်းရွက်များကို ရွေးချယ်စားသုံးပေးရပါမယ်။
🍊ယောဂလိုမျိုး ပေါ့ပါးတဲ့လေ့ကျင့်ခန်းတွေကိုပြုလုပ်ပေးခြင်းအားဖြင့် သွေးလည်ပတ်မှုကောင်းမွန်စေတဲ့အပြင် အဆစ်အမြစ်တွေခိုင်မနေစေဘဲ ပေါ့ပေါ့ပါးပါး သွက်သွက်လက်လက်နဲ့ လှုပ်ရှားစေနိုင်မှာဖြစ်ပါတယ်။ ဒါ့အပြင် ခြေချောင်းလက်ချောင်းတွေ ထုံကျဉ်ကိုက်ခဲတဲ့ဝေဒနာတွေကိုပါ သက်သာစေပါတယ်။ခြေချောင်းလက်ချောင်းတွေဟာ မလှုပ်ရှားလေ ပိုပြီးထုံကျဉ်ကိုက်ခဲလေ မဖြစ်ရလေအောင် OG ကလုပ်ဖို့ခွင့်ပြုထားတဲ့အခြားသော လေ့ကျင့်ခန်းတွေပါ ပြုလုပ်ပေးလို့ရပါတယ်။
🍊လိုအပ်လို့ရှိရင် ဆရာဝန်ကညွှန်ကြားထားတဲ့ အကိုက်အခဲပျောက်ဆေးသောက်တာ၊ အပူသိပ်မပြင်းတဲ့ လိမ်းဆေး လိမ်းပေးတာတွေလည်း ပြုလုပ်နိုင်ပါတယ်။
🍊ကိုယ်ဝန်ဆောင်ခေါင်းအုံးနဲ့အိပ်တာ၊ ကြွက်သားတွေဆန့်ထုတ်အကြောလျှော့တာ၊ ကိုယ်ဝန်ဆောင်လေ့ကျင့်ခန်းလုပ်တာ စတဲ့နည်းလမ်းလေးတွေရှိပါတယ်။
✅ဘယ်အချိန်မှာ ဆရာဝန်နဲ့ပြသသင့်သလဲ?
ကိုယ်ဝန်ဆောင်ချိန်ထုံကျဉ်ခြင်းဟာ ပုံမှန်ဖြစ်လေ့ရှိပေမယ့်လည်း အောက်ပါလက္ခဏာတွေရှိခဲ့ရင် ဆရာဝန်နဲ့ တိုင်ပင်ဆွေးနွေးသင့်ပါတယ်။
အလွန်အမင်း နာကျင်လာခြင်း။
လက်အကြောများ အားနည်းလာခြင်း။ပစ္စည်းများ ကိုင်တွယ်ရာတွင် မကြာခဏပြုတ်ကျခြင်း။
ကိုယ်ဝန်ဆောင်သွေးတိုးရောဂါ (Pre-eclampsia) နှင့် ဆက်စပ်နိုင်သည့် ရုတ်တရက် ရောင်ရမ်းမှုများ ဖြစ်ပေါ်လာခြင်း။
https://my.clevelandclinic.org/health/body/24305-relaxin
https://www.vinmec.com/eng/blog/pregnant-women-often-experience-numbness-in-their-hands-and-feet-during-pregnancy-en #:~:text=Light%20exercise%20can%20help%20pregnant,can%20also%20help%20reduce%20numbness.
#ကိုယ်ဝန်ဆောင်ချိန်ခြေလက်ထုံကျဥ်ခြင်း
