28/01/2023
ခံတွင်းနံ့ဆိုးနေလား ???
ခံတွင်းအနံ့ဆိုးခြင်းသည် ရောဂါတစ်ခုဟု မသတ်မှတ်ထားသော်လည်း လူမှုရေးအရ လူမှုဆက်ဆံရေးကို များစွာ အနှောင့်အယှက်ပေးသော အခြေအနေဆိုးတစ်ခု ဖြစ်သည်။ ခံတွင်းအနံ့ဆိုးခြင်းကို Bad breath သို့မဟုတ် Malodour သို့မဟုတ် Halitosis ဟုလည်း ခေါ်ပါသည်။
ခံတွင်းအနံ့ဆိုးရခြင်း၏ အဓိကတရားခံမှာ ခံတွင်းရှိ မကောင်းသော ဘက်တီးရီးယားပိုးများ၏ ဇီဝဖြစ်စဉ်မှ ထွက်ရှိလာသော အညစ်အကြေးများ ဖြစ်သည်။ ထို့အပြင် အခြား အနံ့ဆိုးများ ထွက်စေသည့် ဓာတ်ပစ္စည်းများကြောင့်လည်း ခံတွင်းအနံ့ကို ပိုမိုဆိုးဝါးစေပါသည်။
အဓိကမှာ လေမဲ့အခြေအနေတွင် ပေါက်ပွားသည့် ဂရမ်နက်ဂတစ် ဘက်တီးရီးယားများ (𝗔𝗻𝗮𝗲𝗿𝗼𝗯𝗶𝗰 𝗚𝗿𝗮𝗺 𝗻𝗲𝗴𝗮𝘁𝗶𝘃𝗲 𝗯𝗮𝗰𝘁𝗲𝗿𝗶𝗮) ဖြစ်ပြီး လျှာ၏ မျက်နှာပြင်၌လည်းကောင်း၊ သွားနှင့် သွားဖုံးကြားရှိ ချိုင့်လေးများ (Periodontal pockets) ၌လည်းကောင်း ခိုအောင်းနေလေ့ရှိသည်။ ညအိပ်သောအခါ ပါးစပ်ကို တောက်လျှောက် ပိတ်ထားရသောကြောင့် ခံတွင်း၌ လေမဲ့ အခြေအနေတစ်ရပ် ဖန်တီးပေးထားသလိုဖြစ်၍ တစ်ညလုံး အဆိုပါ ဘက်တီးရီးယားများ ဆက်တိုက်တိုးပွားလာကာ မနက်မိုးလင်းချိန်တွင် ခံတွင်းအနံ့ အဆိုးဆုံးဖြစ်သည်။ ညဘက် သွားတိုက်ပြီး မအိပ်ပါက ပိုမိုဆိုးဝါးပါသည်။
ထို့ကြောင့် ခံတွင်းအနံ့ဆိုးသူများကို ကုသရာတွင် ပဋိဇီဝဆေးများ (Antibiotics) ပေးလိုက်ပါက အဆိုပါ ဘက်တီးရီးယားများ သေဆုံးကုန်သဖြင့် အနံ့လည်း သက်သာသွားနိုင်ပါသည်။ ထို့နောက် အဆိုပါ ဘက်တီးရီးယားများ ပြန်လည်ပွားများ မလာနိုင်စေရန် ခံတွင်းသန့်ရှင်းရေး (𝗢𝗿𝗮𝗹 𝗵𝘆𝗴𝗶𝗲𝗻𝗲) ကို ပြုလုပ်ပေးရန် အထူးလိုအပ်ပါသည်။ ထိုသို့ မပြုလုပ်ပါက ထိုဘက်တီးရီးယားဆိုးများ ပြန်လည်ပွားများလာကာ မူလအတိုင်းပင် ခံတွင်းအနံ့ ပြန်ဆိုးလာပါလိမ့်မည်။ ထိုအခါ ပဋိဇီဝဆေးများ ပြန်သောက်လိုက်၊ သက်သာလိုက်ဖြင့် လုံးလည်လိုက်နေရာမှ ကြာလျှင် အဆိုပါ ပဋိဇီဝဆေးများ မတိုးတော့သည့်အပြင် ယင်းတို့၏ ဘေးထွက်ဆိုးကျိုးများ ခံစားရလာနိုင်ပါသည်။
ယင်းသို့ မဖြစ်စေရန် ခံတွင်းသန့်ရှင်းရေးနှင့်အတူ ပရိုဘိုင်အိုတစ် (𝗣𝗿𝗼𝗯𝗶𝗼𝘁𝗶𝗰𝘀) ငုံဆေးပြားများ ပေး၍ ကုသပါက လွန်စွာ ထိရောက်မှုရှိကြောင်း တွေ့ရပါသည်။ သွားနှင့်ခံတွင်း ကျန်းမာရေးအတွက် တစ်နေ့ ၂ ကြိမ် သွားမှန်မှန်တိုက်ခြင်း (မနက်တစ်ကြိမ်၊ ညတစ်ကြိမ်)၊ အစာစားပြီးတိုင်း ပလုပ်ကျင်းခြင်းတို့ကို မဖြစ်မနေ လုပ်ဆောင်ပေးရန် လိုပါသည်။
ဒေါက်တာခင်မောင်လွင် (FAME)
ဗဟုသုတရစေဖို့ ကူးယူဖော်ပြပါသည်။
ငွေအိုးဆေးဆိုင်
ဆိုင် (၁) - အမှတ် (၅၁၃)၊ အောက်လမ်းမကြီး၊ ထားဝယ်စု၊ ပန်းပဲတန်းရပ်ကွက်၊ မော်လမြိုင်မြို့။
ဖုန်း - 09 973003105
ဆိုင် (၂) - အမှတ် (၁၄)၊ ကျောက်တန်းလမ်း၊ မုပွန်ရပ်ကွက်၊ မော်လမြိုင်မြို့။
ဖုန်း - 09 458793811
#ဆေးဆိုင်
#ငွေအိုး
#လက်လီလက်ကား
#မော်လမြိုင်
