07/11/2022
FYI
ဝိလာသီ အသင်းကြီးမှ မတည်၍ ကျောက်ကပ်အစားထိုးကုသပေးရန်အတွက် လျှောက်လွှာ ခေါ်ယူခြင်း။
*************************************
(၁) ဝိလာသီ အသင်းကြီး၏ ကျောက်ကပ်အစားထိုးပေးရခြင်း အဓိက ရည်ရွယ်ချက်ဖြစ်သည့် - အစားထိုးပြီးပါက မိမိပတ်ဝန်းကျင် လူ့လောကအတွက်သော်လည်းကောင်း/မိမိနှင့်ဘဝတူ ကျောက်ကပ် ဝေဒနာရှင်များအတွက်သော်လည်ကောင်း အကျိုးပြုနိုင်မည့် လူကိုသာ ဦးစားပေးရွေးချယ်မည်ဖြစ်သည်။
(၂) ကျောက်ကပ်ပျက်စီး၍ လက်ရှိပုံမှန် ကျောက်ကပ်ဆေးနေရသူဖြစ်ရမည်။
(၃) အစားထိုးကုသရန်အတွက် အမှန်တကယ် ခက်ခဲရုန်းကန်နေရသူဖြစ်ရမည်။(မိမိကိုယ်ပိုင်ငွေကြေးဖြင့် အချိန်မရွေး ကုသနိုင်သူမျိုးထက် ကြိုးပမ်းရုန်းကန်၍ အစားထိုးရန် ငွေကြေးစုဆောင်းနေရသူမျိုးဖြစ်ရမည်။)
(၄) ကျောက်ကပ်အလှူရှင် အဆင်သင့်ရှာဖွေထားပြီး ဖြစ်ရမည်။(ဆွေမျိုးဖြစ်စေ/သူစိမ်းဖြစ်စေ)
(၅) လူနာ၏နောက်တွင် အဓိက ငွေကြေးထောက်ပံ့ပေးနိုင်မည့်သူ တဦးဦးကို တင်ပြနိုင်ရမည်။(ဥပမာ - မိဘဆွေမျိုး အစရှိသဖြင့်)။အစားထိုးပြီးပါက တသက်လုံး နောက်ဆက်တွဲပြုလုပ်သွားရမည့် သွေးစစ်ခများ၊စျေးကြီးပါသော သောက်ဆေးများအတွက် တာဝန်ယူရန်ဖြစ်သည်။
(၆) အစားထိုးမည့်လူနာသည် မိမိကျောက်ကပ်ရောဂါနှင့် ပတ်သတ်သည့် ကျွမ်းကျင်သော ဆေးပညာဗဟုသုတ ရှိသူဖြစ်ရမည်။(အစားထိုးပြီးပါက အနေထိုင်အစားသောက် မဆင်ခြင်သည်ဖြစ်စေ/ဆေးပညာဗဟုသုတအားနည်းပြီး လွဲမှားသော လုပ်ဆောင်ချက်များကြောင့် အစားထိုးကျောက်ကပ်မှာ ပြန်လည်ပျက်စီးနိုင်ပါသောကြောင့်ဖြစ်သည်။)
(၇) ပြည်တွင်းအစားထိုးပေးရန် ခွဲစိတ်ခ ဆေးရုံသွင်းငွေသာ အသင်းမှ အပြည့်ဝထောက်ပံ့ပေးမည်ဖြစ်ပါသောကြောင့် တခြား ကုန်ကျစရိတ်အဝဝ အား တာဝန်ယူနိုင်သူဖြစ်ရမည်။(အစားမထိုးမီပြုလုပ်ရသည့် အခြေခံသွေးစစ်ခများ/စင်ကာပူပို့စစ်ရသည့် သွေးနှောသွေးစစ်ခများ/အစားထိုးရာတွင် အသုံးပြုမည့် စျေးကြီးပါသော ဆေးများ/အစားထိုးပြီး ကံမကောင်းမှုကြောင့် Rejection ဖြစ်ပါက နောက်ဆက်တွဲကုန်ကျမည့် ငွေကြေးစရိတ်များအတွက် လူနာဘက်မှ မိမိငွေကြေးဖြင့် ဆောင်ရွက်ရမည်။)
(၈) အထူးသိထားရန်မှာ အသင်းမှ အစားထိုးခွဲစိတ်ခ ဆေးရုံစရိတ်ကိုသာ အပြည့်ဝ ထောက်ပံ့ပေးသွားမည်ဖြစ်သည်။
(၉) ပြည်တွင်းအစားထိုးကုသမှုဖြစ်ပါသောကြောင့် အလှည့်ကျရောက်ရန်မှာ ကြာရှည်စွာစောင့်ဆိုင်းရမည်ဖြစ်သဖြင့် ခွဲစိတ်မည့်အချိန်ကာလထိတိုင်အောင် လုံလောက်သော ကျန်းမာရေးလိုအပ်ချက် ပြည့်စုံသူဖြစ်ရမည်။(ထိုသို့ ပြည့်စုံရန်လည်း ကြိုတင်ပြင်ဆင် ဂရုစိုက်ထားနိုင်ရမည်။)
(၁၀) အထက်ပါအချက်အရ အစားထိုးစောင့်ဆိုင်းနေရသည့် ကာလများအတွင်း အလှူငွေပိုမိုရရှိခဲ့ပါကလည်း ခွဲစိတ်ခအပြင် ပိုမိုထောက်ပံ့ပေးနိုင်ရန် အသင်းမှဆောင်ရွက်ပေးသွားမည်။(အလှူငွေရရှိမှုအပေါ်မူတည်၍ အကောင်းဆုံး ကြိုးစားပေးသွားမည်ဖြစ်သည်။)
(၁၁) အစားထိုးစောင့်ဆိုင်းနေရသည့် ကာလသည် မည်မျှကြာမည် မခန့်မှန်းနိုင်ပါသောကြောင့် အပြီးသတ်လူနာရွေးချယ်ရာတွင် (၃)ဦး (သို့မဟုတ်) (၅)ဦး ထိရွေးချယ်ထားမည်။တစ်ဦးထဲရွေးချယ်ထားပါက စောင့်ဆိုင်းနေရသည့်ကာလများအတွင်း ကျန်းမာရေးအခြေနေကြောင့် အစားထိုးရန် စံချိန်မမှီတော့ခြင်း/လူနာဆုံးပါးသွားနိုင်ခြင်း အစရှိသည့် ပြသာနာများအား ကာကွယ်နိုင်ရန်ဖြစ်သည်။
(၁၂) အပြီးသတ်အစားထိုးရန် အချိန်ကျရောက်ခါမှသာ အဆုံးသတ် လူနာတဦးအား ရွေးချယ်သွားမည်ဖြစ်ပါသည်။
*အထက်ပါ စည်းကမ်းချက်များအား သေချာနားလည်စွာ ဖတ်ရှူပြီး မိမိနှင့်ကိုက်ညီမှသာ လျှောက်ထားပေးပါရန် သတိပေးပြောကြားလိုပါသည်။ရွေးချယ်မည့် အသင်းအဖွဲ့ဝင်များထဲတွင် လက်ရှိကျောက်ကပ်ဆေးလောကမှ လူနာများနှင့် အကျွမ်းတဝင်ရှိပြီး မြင်တွေ့နေကြဖြစ်နေသောကြောင့် မည်သူမည်ပုံရှိသည်ကို သိရှိပြီးဖြစ်သည့်အတွက် မကိုက်ညီပါက ထည့်သွင်းစဥ်းစားပေးမည်မဟုတ်ပါ။
အကယ်၍ အထက်ပါအချက်အလက်များနှင့် ကိုက်ညီပါက အောက်ပါ လျှောက်လွှာ အချက်အလက်များအားဖြည့်၍ ဝိလာသီအသင်း၏ ပေ့ မက်ဆင်ဂျာ(cb) သို့ပေးပို့လျှောက်ထားရမည်ဖြစ်သည်။
(cmt တွင်လျှောက်ထားခြင်း မပြုလုပ်ပါရန်)
(1) အမည်
(2) အသက်
(3) HD သက်တမ်း
(4) ကျောက်ကပ်ပျက်စီးရသည့် အကြောင်းအရင်း
(5) ကျောက်ကပ်အလှုရှင်၏ နာမည်နှင့် တော်စပ်ပုံ(ဥပမာ - ဦးဘ/ဖခင်)။
သူစိမ်းဆိုပါက သူစိမ်းဟုရေးပါ။
(6) လူနာအားနောက်မှ ငွေကြေးထောက်ပံ့ပေးမည့်သူ
(7) လူနာ၏ ပညာအရည်အချင်းနှင့် လက်ရှိအလုပ်အကိုင်
(8) လူနာ၏ မိသားစု စီးပွားရေးနောက်ခံ - (ဥပမာ - စျေးရောင်းပါသည်)
(9) အစားထိုးရန်အတွက် ပြင်ဆင်ထားမှုရှိပါက လူနာ+အလှူရှင် ၏ ကျောက်ကပ်ဆရာဝန်နှင့် ပြသစစ်ဆေးထားမှု ဆေးမှတ်တမ်း
(မရှိပါက ကျောက်ကပ်ဆရာဝန်နှင့် ပုံမှန်ပြသနေကျ ဆေးမှတ်တမ်း)
(10) လူနာ၏ ကိုယ်ရေးအကျဥ်း
(11) လူနာဓာက်ပုံတပုံ။(mask မထားထားဘဲ မျက်နှာမြင်သာသည့်ပုံ/ ကျောက်ကပ်ဆေးနေသည့် ပုံမဟုတ်လဲရပါသည်။)
*************************************
အထက်ပါ (၁၁) ချက်အား ပြည့်စုံစွာ ဖြည့်စွက်ပြီး အသင်း၏ ပေ့ မက်ဆင်ဂျာ(cb) သို့လျှောက်ထားပေးပါရန်။
လျှောက်ထားရမည့် (၁၁) ချက်အား ဖြည့်စွက်ရလွယ်ကူစေရန် ကွန်းမန့်တွင် သီးသန့်မန့်ထားပေးပါသည်။(Copy/paste) လုပ်ကာ အဆင်သင့်ဖြည့်စွက်နိုင်ပါသည်။
(အငြင်းပွားဖွယ်ရာ တစုံတရာ ကြုံတွေ့ပါက အသင်း၏ ဆုံးဖြတ်ချက်သည်သာ အတည်ဖြစ်သည်။)
