What are the opening hours?

Monday 08:30 - 12:30 17:00 - 20:00 Tuesday 08:30 - 12:30 17:00 - 20:00 Wednesday 08:30 - 12:30 17:00 - 20:00 Thursday 08:30 - 12:30 17:00 - 20:00 Friday 08:30 - 12:30 17:00 - 20:00 Saturday 08:30 - 12:30 17:00 - 20:00 Sunday 08:30 - 12:30 17:00 - 20:00

https://www.facebook.com/101583188906166/

Dr.Win Sein - ကျားဆေးခန်း, No. 4, Pyay Road, Taikkyi (2025)

18/07/2023

#အမေးအဖြေကဏ္ဍ
#သားအိမ်အသားလုံး

၁) သားအိမ်အသားလုံးက ဘာလို့ ဖြစ်တာလဲ?
- သားအိမ်အသားလုံးဟာ ကင်ဆာ မဟုတ်သလို၊ ကင်ဆာ အဖြစ်သို့ မပြောင်းပါ။
- မျိုးရိုးလိုက်ခြင်း၊ မျိုးဗီဇဖောက်ပြန်ခြင်းနဲ့ မိန်းမဟော်မုန်းများခြင်းတို့ကြောင်း ဖြစ်တတ်ပါတယ်။
- အပျိုဖော်ဝင် စောသူ၊ သားသမီးမရှိ(သို့)နည်းတဲ့ သူ၊ ကိုယ်အလေးချိန်များသူ၊ ကိုယ်လက်လှုပ်ရှားမှုနည်းသူ စတဲ့ အမျိုးသမီးတွေမှာ အဖြစ်များကြပါတယ်။

၂) ဘာလက္ခဏာ‌တွေ ပြလဲ?
-အတော်များများ လက္ခဏာ မပြပါဘူး
-သားအိမ်အသားလုံးအရွယ်နဲ့ နေရာပေါ် မူတည်ပြီး အောက်ပါလက္ခဏာတွေ တွေ့နိုင်ပါတယ်။
--ရာသီပေါ်ချိန် သွေးဆင်းများခြင်း။
--ဆီးစပ်ကိုက်ခဲနာကျင်ခြင်း။
--ဆီးခုံရိုးတဝိုက် မအီမသာဖြစ်ခြင်း။
--ဆီးမကြာခဏသွားခြင်း။
--က‌ေလးရဖို့ ခက်ခဲခြင်း။
--ဆီးခုံတစ်ဝိုက် အလုံးစမ်းမိခြင်း။

၃) ဘယ်လိုသိနိုင်မလဲ?
-အသားလုံးအရွယ်ကြီးရင် ဝမ်းဗိုက်ပေါ်က စမ်းသပ်ကြည့်ရုံနဲ့တင် တွေ့နိုင်ပါတယ်။ အာထရာဆောင်းရိုက်ခြင်းဖြင့် အသားလုံး အရေအတွက်၊ အရွယ်အစားနဲ့ တည်နေရာကို သိနိုင်ပါတယ်။

၄) ဆေးနဲ့ ကုသလို့ ရလား?
- အသားလုံးရှိသော်လည်း ဝေ‌ဒနာ တစုံတရာ မရှိလျှင်ဖြစ်စေ၊ အရွယ်အစား သေးငယ်လျှင်ဖြစ်စေ၊ သွေးဆုံးချိန်နီးကပ်လာလျှင်ဖြစ်စေ၊ မဖြစ်မနေ ကုသရန် မလိုအပ်ပါ။ စောင့်ကြည့်ခြင်းဖြင့် လုံလောက်ပါတယ်။
- သာမန်ထက်သွေးဆင်းများလျှင်၊ သွေးအားနည်းစပြုလျှင် သံဓာတ်ပါဝင်မှုများသော ဗီတာမင်အားဆေးများကို သောက်သုံးရပါမယ်။
- အသားလုံးရှိသူ အမျိုးသမီးတချို့အတွက် ရာသီပေါ်ချိန်မှာ ကိုက်ခဲနာကျင်တာ အထိုက်အလျောက်သက်သာသလို၊ သွေးဆင်းနည်းသွားဖို့ အကိုက်အခဲ ပျောက်ဆေးနဲ့ သွေးထိန်းဆေးများ ပေးနိုင်ပါတယ်။
- အသားလုံးလည်းရှိနေတယ်။ သားသမီးလည်း မရချင်တော့ဘူးဆိုရင် သန္ဓေတားဟော်မုန်း သောက်ဆေး၊ ထိုးဆေး၊ အရေပြားအောက်ထည့်ဆေး၊ သားအိမ်တွင်းထည့် ဟော်မုန်းပစ္စည်း တခုခု သုံးစွဲသင့်ပါတယ်။ သွေးဆင်းနည်းဖို့ အထောက်အကူဖြစ်လေ့ရှိပါတယ်။
- အသားလုံး ကျုံ့ဝင်စေသောဆေး‌တွေက
ဈေးနှုန်းကြီးမြင့်တဲ့အပြင် ဘေးထွက်ဆိုးကျိုးလည်း ရှိပါတယ်။ ဆေးသုံးစွဲစဉ် အသားလုံး ကျုံ့ဝင်သေးငယ်သွားပြီး၊ ဆေးရပ်လိုက်တဲ့အခါ ပြန်ကြီးထွားလာတတ်ပါတယ်။ ခွဲစိတ်ရန်ပြင်ဆင်မှုပြုချိန်မှာသာ သုံးစွဲဖို့ သင့်လျော်ပါတယ်။

၅) ဘယ်အခါ ခွဲစိတ်ဖို့ သင့်သလဲ?
- သားအိမ်အသားလုံးဟာ ဒုက္ခပေးလာတယ်။ ဆေးဝါးများနဲ့ ထိထိရောက်ရောက် မသက်သာဘူးဖြစ်လာရင် ခွဲစိတ်ကုသနိုင်ပါတယ်။
အရွယ်ရှိသေးတဲ့ အမျိုးသမီးများ၊ သားသမီးရယူရန် ဆန္ဒရှိသူများအနေနှင့် အသားလုံးများကိုသာ ရွေးပြီး ခွဲထုတ်လို့ရနိုင်ပါတယ်။
သားအိမ်တခုလုံး ထုတ်ပစ်ရန် သင့်တော်သူများ၊ စိတ်အားထက်သန်သူများလည်း ရှိနိုင်ပါတယ်။

၆) တခြား ကုသလို့ရမယ့် နည်းလမ်းတွေရော ရှိလား?
- သားအိမ်အသားလုံးကို ပံ့ပိုးပေးသော သွေးကြောအား ပိတ်ပြစ်ခြင်း၊ သားအိမ်အသားလုံးကို အသံလှိုင်းလွန် အပူဓာတ်ဖြင့် ဖျက်ဆီးခြင်း၊ သားအိမ်အသားလုံးကို ရေဒီယိုလှိုင်းသွင်း၍ ဖျက်ဆီးခြင်း နည်းလမ်းများဖြင့်လည်း စမ်းသပ်ကုသနေကြပါတယ်။

- တဦးနဲ့ တဦး ဝေဒနာ မတူနိုင်သလို သင့်လျော်တဲ့ ကုထုံးများလည်း ကွဲပြားနိုင်တာကြောင့် ဆရာဝန်နဲ့ တဦးချင်း အကျေအလည် ဆွေးနွေးဖို့လိုအပ်ပါတယ်။

29/05/2023

ဒညင်းသီးထဲမှာ ပါတဲ့အက်ဆစ်ကို
Djenkolic acid လို့ ခေါ်ပါတယ်။

အရပ်ထဲမှာတော့
"ရေ၅ထပ်သွန်ပြီးပြုတ်တယ်"
"အဆိပ်ထုတ်ပြီးပြုတ်တယ်"တို့
"ထန်းလျှက်နဲ့ပြုတ်ရင်အဆိပ်ပြေတယ်"တို့
"ထိပ်ကအဆိပ်ဆံလေးထုတ်ပြီးပြုတ်ရင်
ဘာမှမဖြစ်ဘူး"တို့ စသဖြင့် မျိုးစုံကြားရပါတယ်

တကယ်တော့အဆိပ်ဆံလို့သိနေတဲ့နေရာက
ဒညင်းအပင်ပေါက်မယ့်နေရာဖြစ်ပါတယ်။
အဆိပ်နဲ့မဆိုင်ပါဘူး
အယူအဆမှားနေတာပါ။

ဒညင်းသီး အသားတစ်ခုလုံးမှာ အဆိပ်ဓာတ် Djenkolic acid တွေ အပြည့်ပါပါတယ်။

ဒညင်းသီးစားလိုက်တဲ့အခါမှာ
ဒီ အဆိပ်ဓာတ်က အစာအိမ်ကတဆင့်
အူထဲကိုအရင်ရောက်ပါတယ်

အူထဲကနေစုပ်ယူပြီး သွေးထဲမှာရှိနေတုန်းမှာ
ပျော်ဝင်အဆင့်မှာပဲ ရှိနေပြီး
ပျောက်မသွားပါဘူး

ခန္ဓာကိုယ်ထဲကသွေးတွေအားလုံးဟာ
ကျောက်ကပ်ကိုမဖြစ်မနေဖြတ်သန်းရပါတယ်
အဆိုပါအဆိပ်‌ ကျောက်ကပ်ထဲ ရောက်ချိန်၊
ဆီးဖြစ်လာတဲ့အချိန်၊
ဆီးက အက်ဆစ် pH ဘက်ကိုရောက်တဲ့အချိန်မှာမှ
အချိုမှုန့်ချောင်းလေးတွေပုံစံ Crystal အဖြစ်ပြောင်းပြီး ကျောက်ကပ် ပြွန်သေးသေးလေးတွေပေါ်မှာ စိုက်စူးစေပါတော့တယ်။

အဲဒီအချိန်မှာ
ပုံမှန်အလုပ်လုပ်နေရတဲ့ပြွန်တွေပျက်စီးပြီး
ဆီးထဲသွေးပါလာတာမျိုး
ကျောက်ကပ်ပျက်စီးတာမျိုး ဖြစ်လာပါတယ်။

ဘယ်နှစ်ရေပဲပြုတ်ပြုတ်
ဘာထည့်ပြီးပြုတ်ပြုတ်အဆိပ်ဓာတ်ရှိ‌နေတာပဲမို့ ဆီးချို သွေးတိုး ရှိပြီးသားသူများ
ရှောင်သင့်ပါတယ်။

များများစားမှ ဖြစ်တာမျိုး မဟုတ်ဘဲ
တစ်လုံး နှစ်လုံးစားရုံနဲ့လည်း
ဆေးရုံ ရောက်တတ်ပါတယ်။

စားကောင်းပေမယ့် ဒညင်းသီးအစား
အရသာတူတဲ့ မျောက်ငိုသီးလို နှစ်တစ်ရာသီး
ပဲကောလို ဟာတွေ အစားထိုးပြီး စားတာ
အကောင်းဆုံးပါ။

ကျောက်ကပ်က လူ့အတွက်တန်ဖိုးကြီးပါတယ်

ကျောက်ကပ်ပျက်စီးရင်
အမြဲတမ်းကျောက်ကပ်ဆေးနေရတာမျိုးကို
မသေမချင်းလုပ်သွားရမှာပါ
အခြေအနေပေါ်မူတည်ပြီး
နှစ်ပတ်တစ်ခါ သို့မဟုတ် တစ်လတစ်ခါ
ပုံမှန် ကျောက်ကပ်ဆေးရပါတယ်
တစ်ခါဆေးရင် နှစ်သိန်းဝန်းကျင်ကုန်ကျပါတယ်

ကျောက်ကပ်အစားထိုးလဲဖို့ဆိုရင်လည်း
သိန်းရာနဲ့ချီကုန်ပါတယ်

မသိလို့စားခဲ့တာကတော့ ပြင်လို့မရတော့ပေမယ့်
ဒီအန္တရာယ်ကိုသိလာတဲ့အခါ ဆင်ခြင်နိုင်ဖို့
တင်ပြလိုက်ရပါတယ်။

မူရင်းရေးသားသူ
Dr Kyaw Soe Htet ကို ကျေးဇူးတင်ပါတယ်။

28/04/2023

#အ‌မေးအ‌ဖြေကဏ္ဍ

Covid 19 ပြန်ဖြစ်နေပါတယ်။ မျိုးစိတ်အသစ် (Arcturus) ဖြစ်ပြီး ကူးစက်နှုန်းမြန်ပါတယ်။
လက်ဆေးပါ။
Mask တပ်ပါ။
လူထူထပ်နဲ့ နေရာတွေကို ရှောင်ပါ။
သံသယရှိတာနဲ့ ဆေးခန်းဆေးရုံမှာ စစ်ဆေးမှု ခံယူပါ။

စိတ်ပူပြီး လာမေးတဲ့ ကိုယ်ဝန်ဆောင် မေမေနဲ့ နို့တိုက်မေမေတို့အပြင် အခြားမေမေတွေပါ ဗဟုသုတရ‌စေဖို့ ရေးပေးလိုက်ပါတယ်။

၁) Covid ဖြစ်ရင် ဘာလက္ခဏာတွေ ပြမလဲ?
- covid အကူးခံရတဲ့ ၄ ယောက်မှာ ၁ ယောက်ပဲ အောက်ပါလက္ခဏာတွေ ပြပါမယ်။ ကျန်တဲ့ ၃ ယောက်ကတော့ ကိုယ်၌ လက္ခဏာမပြပဲ သူတပါးကို ရောဂါဖြန့်ပေးတဲ့ သူ‌တွေဖြစ်သွားပါလိမ့်မယ်။
- ဖျားခြင်း(ချမ်းတုန်ဖျား ဖျားနိုင်)
- ချောင်းဆိုးခြင်း
- လည်ချောင်းနာခြင်း
- အနံ့/အရသာ ပြောင်းခြင်း
- မျက်သားနီခြင်း
- အသက်ရှူမဝခြင်း
- မောဟိုက်ခြင်း
- ကိုယ်လက်ကိုက်ခဲခြင်း
- ခေါင်းကိုက်ခြင်း
- လည်ချောင်းနာခြင်း
- နှာခေါင်းပိတ်/နှာရည်ယိုခြင်း
- ဝမ်း‌လျောဝမ်းပျက်ခြင်း
- ခံတွင်းပျက်ခြင်း

၂) Covid လား ရာသီဖျားလား ဘယ်လို ခွဲမလဲ?
- နီးစပ်ရာ ဆေးခန်း/ဆေးရုံသို့ သွားပြီး ဆရာဝန်ဆီမှ စမ်းသပ်စစ်ဆေးမှု ယူပါ။ ဘာကြောင့်ဖျားဖျား မပေါ့ဆပါနဲ့။
မေမေတို့ဆို မိမိအတွက်ပဲ ဖြစ်ဖြစ် ကလေးအတွက်ပဲဖြစ်ဖြစ် သံသယရှိရင် ကိုယ့် OG နဲ့ ကိုယ် ပြန်တိုင်ပင်ပါ။

၃) ကိုယ်ဝန်ဆောင် မေမေတွေ covid ပိုဖြစ်နိုင်လား?
- ကိုယ်ဝန်ဆောင်ချိန်မှာ ကိုယ်ခံအားပြောင်းလဲမှု ဖြစ်တာကြောင့် အသက်ရှူလမ်းကြောင်းဆိုင်ရာ ရောဂါတွေ ပိုဖြစ်လွယ်ပါတယ်။ (covid တင်မက flu တုပ်ကွေးပါ)
- ကိုယ်ဝန် ၂၈ ပတ်အထက်
- အသက် ၃၅ နှစ်အထက်
- ကိုယ်အလေးချိန်များသော
- နဂိုရောဂါအခံရှိသော (သွေးတိုး/ဆီးချို)
မေမေတွေ ပိုသတိထားရပါမယ်။

၄) ကိုယ်ဝန်နဲ့ covid ဖြစ်ရင် ကလေးကို ထိခိုက်နိုင်လား?
- ကလေး လမစေ့ ပေါင်မပြည့်ပဲ မွေးတတ်ပါတယ်။ အရေးပေါ် ခွဲမွေးရနိုင်ချေလည်း များပြီး ဗိုက်ထဲ ကလေးသေဆုံးနှုန်းလည်း ၂ ဆ တက်ပါတယ်။
- ကိုယ်လက်အင်္ဂါ ချို့ယွင်းတာ ခုချိန်ထိ မ‌ရှိပါ။

၅) အမေမှာရော ဘာဖြစ်နိုင်လဲ
- Covid ကြောင့် အထူးကြပ်မတ်ဆောင်(ICU) ရောက်တဲ့ လူနာတွေထိမှာ ကိုယ်ဝန်သည်မေမေတွေ အများဆုံးပါ။
- ကိုယ်ဝန်ဆိပ်တက်နိုင်နှုန်း ပိုများပါတယ်။

၆) ကိုယ်ဝန်နဲ့/နို့တိုက်နေတုန်း covid ကာကွယ်ဆေး ထိုးလို့ရလား?
- နို့တိုက်နေတဲ့ မေမေတွေက ရပါတယ်။ ကလေးရော အမေအတွက်ပါ အန္တရာယ် မရှိပါ။
- ကိုယ်ဝန်ဆောင် မေမေတွေအတွက်ကတော့ Pfizer (သို့) Moderna ပဲ ထိုးပါ။

၇) Covid/တုပ်ကွေး ဖြစ်နေရင် နို့ဆက်တိုက်ရမလား?
- အမေနို့ တိုက်နေတဲ့ ကလေးကို အမေနို့ပဲ ဆက်တိုက်ပါ။
နို့မတိုက်မီ ကလေးကို မကိုင်မီ လက်ကို သေချာဆေးပါ။ ကလေးအနီးမှာ နှာချေ ချောင်းဆိုးခြင်း မပြုမိရန် သတိထားပါ။ နို့တိုက်နေစဉ် mask တပ်ပါ။
- နို့ဘူးတိုက်ကျွေးနေလျှင် (သို့) မေမေ့နို့ကို သန့်သန့်ရှင်းရှင်း ညှစ်ပြီး ဘူးနှင့် တိုက်မည်ဆိုလျှင် နေကောင်းကျန်းမာသော အခြားအိမ်သားကို တိုက်ခိုင်းသင့်ပါတယ်။

၈) မေမေတွေ covid ကာကွယ်ဆေးနဲ့ flu ကာကွယ်ဆေး တွဲထိုးလို့ ရလား?
- တစ်ချိန်တည်းမှာ ၂ မျိုးလုံး တွဲထိုးလို့ ရပါတယ်။ Covid နဲ့ Flu တွဲဖြစ်ရင် အဆုတ်ထိခိုက်မှု ပိုများတတ်လို့ ကာကွယ်ဆေး ၂ မျိုးလုံး ထိုးထားသင့်ပါတယ်။

20/04/2023

#အ‌မေးအ‌ဖြေကဏ္ဍ
#မွေးရက်DueDate

၁) Due date ဆိုတာ ဘာလဲ?
- ကိုယ်ဝန်ကို မေမေတို့က လနဲ့ (၆ လရှိပြီ၊ ၈ လထဲ ဝင်ပြီ) သတ်မှတ်ပေ့မယ့် ဆရာဝန်တွေ OG တွေကတော့ အပါတ်ရေနဲ့ သတ်မှတ်ပါတယ်။ Due date ဆိုတာ ကိုယ်ဝန်အပါတ် ၄၀ ပြည့်တဲ့နေ့ကိုပြောတာပါ။ လနဲ့ဆိုရင် ၉ လနဲ့ ၇ ရက်ပါ။

၂) Due date က အရေးကြီးလား?
- အရေးကြီးပါတယ်။
Due date သိထားမှ ကလေးက မွေးမယ့် အချိန် လစေ့လား၊ လမစေ့လား၊ မွေးရက်ကျော်ပြီလား၊ ကလေးထွားနှုန်းက သူ့ရက်သတ္တပါတ်နဲ့ ကိုက်ညီလား စတာတွေကို သိနိုင်မယ်။ အမေမှာ ရောဂါတစ်စုံတစ်ခုဖြစ်လို့ ဆေးပေးတာ၊ ကလေး(သို့)အမေကို စစ်ဆေးကုသမှု လုပ်တာ၊ အကြောင်းအမျိုးမျိုးကြောင်း ကလေးကို မွေးရက်ထက် စောမွေးဖို့ လိုအပ်တဲ့အခါ စသည့်အချိန်တွေမှာ ဒီ due date ပေါ်ပဲ မူတည်ပြီး ဆရာဝန်တွေ ကုသမှု ပြုလုပ်ကြတာပါ။

၃) Due Date ကို ဘယ်လို သတ်မှတ်လဲ??
- အများအားဖြင့်တော့ ရာသီရက်ကနေပဲ တွက်ကြပါတယ်။ ဒါတောင် ရာသီလည်း မှန်မှ၊ တားဆေးနဲ့လည်း ၃-၆ လလောက်ဝေးပြီး ရာသီပုံမှန် ပြန်လာထားမှ၊ မေမေကလည်း နောက်ဆုံးရာသီရက်ကို အတိအကျ သေချာမှတ်မိဦးမှ တွက်ယူလို့ ရတာပါ။
OG တွေကတော့ ကိုယ်ဝန် ၁၀-၁၂ ပါတ်/ ၃ လ ဝန်းကျင်မှာ ရိုက်တဲ့ Ultrasound မွေးရက်ကို ယူကြပါတယ်။
ဒါပေမယ့် ရာသီရက်က တွက်ယူတဲ့ Due date လည်း မှားနိုင်သလို ultrasound က ပေးတဲ့ ရက်ကလည်း မှားနိုင်ပါတယ်။
သေချာတာကတော့ မေမေတို့ကို ဆရာဝန်က မေးမြန်းတာ၊ စမ်းသပ်တာနဲ့ Ultrasound ရိုက်ထားတာတွေကို အကုန်လုံး ခြုံငုံသုံးသပ်ပြီးမှ Due date တစ်ခုကို သေချာပေးနိုင်ပါလိမ့်မယ်။

၄) Ultrasound တွေမှာ Due date က ဘာလို့ ပြောင်းပြောင်းနေတာလဲ?
- Ultrasound ရိုက်ရင် ကလေးရဲ့ အရိုးနဲ့ ဝမ်းဗိုက်ပတ်လည်တွေကို တိုင်းတာပြီး Due Date ကို ခန့်မှန်းပေးတာပါ။ (ခန့်မှန်းတာပါ၊ အတိအကျ မပေးနိုင်ပါဘူး၊)
အဲ့ဒီတော့ ကလေးထွားရင် due date က ရှေ့တိုးလာပြီး ကလေးညှက်ရင် due date နောက်ဆုတ်သွားပါလိမ့်မယ်။
အစောပိုင်း ပြောခဲ့သလို ၃ လဝန်းကျင်မှာ ရိုက်တဲ့ ultrasound ရဲ့ Due date က မှန်နိုင်ချေ အများဆုံးပါ။ နောက်ကျရိုက်လေ မွေးရက် မှားနိုင်လေပါပဲ။
အဲ့ဒါကြောင့် ကျားမသိနိုင်တဲ့ အချိန် လရင့်မှ ultrasound မရိုက် ပဲ OG နဲ့ ဗိုက်စောစောအပ်ပြီး မွေးရက်မှန်နိုင်တဲ့ အချိန်ကို ရိုက်ပါ။ ကျားမ မသိလို့ မေမေတို့ ကလေး‌လေး ဒုက္ခမရောက်ပါဘူး။ မွေးရက်မှားမှသာ အသက်အန္တရာယ်ရှိတာပါ။

၅) ဘယ်တော့ လစေ့မလဲ?
- ကိုယ်ဝန် ၃၇ ပါတ်‌ဆိုရင် လစေ့တယ်လို့ သတ်မှတ်ပါတယ်။
Due date က နေ့စေ့တာပါ။
Due date ကနေ နှစ်ပါတ်ကျော်ရင်တော့ မွေးရက်လွန်တယ်လို့ သတ်မှတ်ပါတယ်။

၆) Due date မတိုင်ခင် မွေးတာ ဘာအန္တရာယ်ရှိလဲ?
- ၃၇ ပါတ်နောက်ပိုင်း (လစေ့ပြီး) မွေးတာ အန္တရာယ်နည်းပါတယ်။ ဒီထက်စောရင်တော့ ကလေးမှာအသက်ရှုလမ်းကြောင်းဆိုင်ရာ ပြဿနာ၊ ပိုးဝင်လွယ်တာ၊ အသားဝါတာ၊ ဖွံ့ဖြိုးမှု နောက်ကျတာ၊ ဉာဏ်ရည်မမီတာ စတာတွေကနေ အသက်အန္တရာယ်ထိ ဖြစ်နိုင်ပါတယ်။
လနုလေ ဆိုးလေပါပဲ။

၇) Due date ကျော်ရင်ရော ဘာအန္တရာယ်တွေ ရှိလဲ?
- ဗိုက်ထဲ ကလေးသေနှုန်းမြင့်ပါတယ်။ ကြာလေ ဆိုးလေပါ။ မွေးပြီးတာတောင် မွေးရက်လွန်ပြီး မွေးတဲ့ ကလေးတွေမှာ တစ်နှစ်အောက် သေနှုန်းက နေ့စေ့လစေ့ ကလေးထက်ကို ပိုများပါတယ်။
မွေးရလည်း ခက်တတ်ပါတယ်။

၈) Due date မတိုင်ခင် ဗိုက်နာရင် ဘယ်လိုလုပ်ရမလဲ?
- OG နဲ့ ပြပါ။ မေမေရဲ့ ကိုယ်ဝန်အပါတ်ပေါ် မူတည်ပြီး ကလေးအတွက် အဆုတ်အားကောင်းဆေး ထိုးပေးဖို့ လိုမလို၊ ပိုးသတ်ပေး ထိုးပေးသင့် မပေးသင့် မေမေ့ရဲ့ OG ကပဲ ဆုံးဖြတ်ပါလိမ့်မယ်။ မွေးပြီးလည်း လိုအပ်ရင် ကလေးဆရာဝန်နဲ့ ပြဖို့ လုပ်ပေးပါလိမ့်မယ်။

၉) Due date က ကျော်နေပြီ။ ဗိုက်က မနာသေးတာ ဘယ်လိုလုပ်မလဲ?
- OG နဲ့ပဲ ပြပါ။ စမ်းသပ်ပြီးမှ လိုအပ်ရင် ultrasound ထပ်ရိုက်ပြီး ရေမွှာအနေအထား၊ အချင်းအခြေအနေ စတာတွေအရ မွေးဖို့ ဆက်စောင့်သင့်သလား၊ မကြာခင် မွေးမှ ဖြစ်တော့မလား၊ ဘယ်လိုမွေးသင့်သလဲ၊ ဘာဆက်လုပ်ရမလဲ စသည်ကို ဆုံးဖြတ်‌ဖို့ ကူညီပေးပါလိမ့်မယ်။

18/04/2023

#အမေးအဖြေကဏ္ဍ
#အပူရှပ်ခြင်း

၁) အပူရှပ်တယ်ဆိုတာ ဘာလဲ?
- မြန်မာလို အပူရှပ်တာဟာ ဆေးပညာအရတော့ heat exhaustion, heat cramps နဲ့ heat stroke ရယ်ဆိုပြီး ၃ မျိုး ရှိပါတယ်။ ‌‌ချွေးနဲ့ ဆားဓာတ် ဆုံးရှုံးတာ များတာကြောင့် ခန္ဓာကိုယ် အပူချိန် 104°F (သို့) 40°C နှင့်အထက် တက်လာပြီး အသက်ဆုံးရှုံးသည်အထိ အန္တရာယ်ရှိပါတယ်။

၂) ဘယ်သူတွေ အဖြစ်များလဲ? ဘယ်သူတွေ သတိထားရမလဲ?
- အသက် ၄ နှစ်အောက် ကလေး
- အသက် ၆၅ နှစ်အထက် လူကြီး
- အဝလွန်သူ
- အရက်သောက်သူ
- အဆုတ်ရောဂါ၊ နှလုံးရောဂါ စသည့် အခံရောဂါရှိသူ
- ဆီးဆေး၊ စိတ်ငြိမ်ဆေး၊ စိတ်ရောဂါအတွက် ဆေးစသည်တို့ သောက်သုံးနေရသူ
- နေပူထဲတွင် အချိန်ကြာမြင့်စွာအလုပ်လုပ်ရသူ
- ကိုယ်လက်လှုပ်ရှားမှု များသော သူ (သို့) ပြင်းပြင်းထန်ထန် လုပ်ရသူ
- အပူချိန်ပြင်းထန်သော အရာများအနီး အချိန်ကြာမြင့်စွာ အလုပ်လုပ်ရသူ(ဥပမာ - မီးဖို/မုန့်ဖိုအနီး)

၃) ဘယ်လက္ခဏာတွေကို သတိထားရမလဲ?
••Heat Cramps
- အသားပူခြင်း၊ နီခြင်း
- ကြွက်သားနာခြင်း
- ကြွက်တက်ခြင်း

•• Heat Exhaustion
- ဖြူဖျော့သွားခြင်း
- ကြွက်တက်ခြင်း
- မောပန်းနွမ်းနယ်ခြင်း
- နုံးချိခြင်း
- ခေါင်းကိုက်ခြင်း
- မူးဝေခြင်း
- ပျို့အန်ခြင်း
- ချွေးအလွန်အမင်းထွက်ခြင်း
- ရေခဏခဏငတ်ခြင်း

••Heat Stroke
- ချွေးမထွက်တော့ပဲ အသားအရေ ‌ခြောက်ကပ်ပူခြစ်နေခြင်း
- ခေါင်းအလွန်အမင်းကိုက်ခြင်း
- မူးဝေအော့အန်ခြင်း
- စိတ်ဂနာမငြိမ်ဖြစ်ခြင်း
- တက်ခြင်း
- သတိလစ်ခြင်း

၄) ဘာတွေ ဆောင်ရ/ရှောင်ရမလဲ?? ဘယ်လို ကာကွယ်ရမလဲ??
- တတ်နိုင်လျှင် မနက် ၁၀ မှ ညနေ ၄ နာရီကြား နေပူထဲ မထွက်ပါနဲ့။
- နေပူထဲသို့ ထွက်လျှင် sunscreen၊ နေကာမျက်မှန်၊ ထီး၊ ဦးထုပ် အကာအကွယ်များ သုံးပါ။
- လေဝင်လေထွက်ကောင်းပြီး ချွေးစုပ်တဲ့ အဝတ်အစား အရောင်နုနုကို ရွေးချယ်ဝတ်ပါ။
- အရည်များများသောက်ပါ။
- အရက်၊ ကော်ဖီ၊ လက်ဖက်ရည်၊ coca cola ရှောင်ပါ။
- အရိပ်ရ‌သော လေဝင်လေထွက်ကောင်းသော အေးသောနေရာများတွင် နေပါ။
- နေ့ခင်း အပူမြင့်မားချိန် ကိုယ်လက်အားကစား လုပ်ခြင်း မပြုရ။
- ကိုယ်လက်လှုပ်ရှားမှု ပြုရမည့်ဆိုလည်း မကြာခဏနား၍ ခန္တာကိုယ်ကို အေးအောင် နေပါ။ ဓာတ်ဆားရည် သောက်ပါ။

၅) အပူရှပ်ပြီဆို ဘာလုပ်ရမလဲ??
- Heat cramps နဲ့ heat exhaustion ဆိုရင် အလုပ်လုပ်လက်စကို ရပ်ပါ။ အေးမြပြီး အရိပ်ရ၊ လေကောင်းတဲ့ နေရာကို ရွှေ့ပါ။ အဝတ်ထူ/အဝတ်ပိုများကို ဖယ်ရှားပါ။ ယပ်ခတ်ခြင်း၊ တစ်ကိုယ်လုံးကို ရေအေးပတ်တိုက်ခြင်း ပြုလုပ်ပေးပါ။ ခြေရင်းပိုင်းကို မြှင့်ထားပေးပါ။ ဓာတ်ဆားရည် တိုက်ပါ။ ကြွက်တက်သော ကြွက်သားကို ရေခဲကပ်၍ ဖြည်းညင်းစွာ ဆန့်ထုတ်ပေးပါ။
မသက်သာလျှင် (သို့) အရည်မသောက်နိုင်လျှင် နီးစပ်ရာ ဆေးရုံ/ဆေးခန်းသို့ ချက်ချင်းသွားပါ။

Heat stroke ဖြစ်ပါက အပေါ်မှ အချက်များအပြင် ချိုင်းကြား ပေါင်ခြံကြားပါ ရေခဲအိတ် ညှပ်ပေးပြီး နီးစပ်ရာ ဆေးရုံ/ဆေးခန်းသို့ ချက်ချင်းသွားပါ။

၅) အပူမရှပ်အောင် ရေ/ဓာတ်ဆားရည် ဘယ်လောက်သောက်ရမလဲ??
- တစ်နေ့လျှင် စုစုပေါင်း ပျမ်းမျှ ၂ လီတာမှ ၃ လီတာ သောက်ရပါမယ်။ တစ်ယောက်နဲ့ တစ်ယောက် လိုအပ်ချက် မတူတာမို့ ပုံမှန်ဆီးပမာဏ ပေါက်တယ်..အရောင်လည်း ဝါကျင်မ‌နေဘူးဆိုရင် ရေဓာတ်လုံလောက်ပါတယ်။

၆) ဆား/အငန် ပိုစား‌ပေးရမလား?
- မလိုပါ။ အရည်နဲ့ ဆားဓာတ် မျှတစွာပါပြီးသား ဓာတ်ဆားရည်ပဲ သောက်ပါ။

၇) မိတ်ဖုပေါက်တာရော စိုးရိမ်ရလား?? ဘာလုပ်ပေးရမလဲ??
‌- ယားတာက လွဲပြီး အန္တရာယ်မရှိပါ။
- ချွေးထွက်များပြီး စိုစွတ်တဲ့ နေရာ(လည်ပင်း၊ ရင်ပတ်၊ ပေါင်ခြံ၊ ရင်သားအောက် စသည်)တွေမှာ အဖြစ်များတာကြောင့် ချွေးနိုင်အောင် သုတ်ပါ။ ခြောက်သွေ့အောင် ထားပါ။ အယားသက်သာအောင် caladryl/calamine စသည့်ဆေးရည်များ လူး‌နိုင်ပါတယ်။

09/04/2023

မေမေတို့ ဖေဖေတို့ရေ..
ဒီနေ့မနက်ပဲ ဆေးခန်းမှာ အသက် 14 နှစ်သားလေး သွေးလွန်တုပ်ကွေးဖြစ်နေတာ တွေ့လိုက်ရပါတယ်..ကံကောင်းစွာနဲ့ ကလေးက သွေးလွန်တုပ်‌ကွေး အဆင့်တစ်ပဲ ရှိပါတယ်။

မိုးမကျသေးပေမယ့်လည်း ‌ဒီရောဂါတွေ့နေရပြီဆိုတော့ အိမ်မှာ "ဖုံး၊ သွန်၊ လဲ၊ စစ်၊ ခတ်၊ ထောင်၊ လောင်း၊ ဖွင့်၊ မြှုပ်၊ ရှင်း၊ ထည့်"ဆိုတဲ့ လုပ်ငန်းတွေကို သေချာလုပ်ပေးကြပါ။
(ပုံတွင် အကျယ်ကြည့်ရန်)

ကလေးတင်မကပဲ လူလတ်ပိုင်းနဲ့ လူကြီးပိုင်းပါဖြစ်တတ်လို့ မပေါ့ဆကြပါနဲ့။ အသက် ၄၂ နှစ်နဲ့ သွေးလွန်တုပ်ကွေးကြောင့် ဆေးရုံမှာ သွေးသွင်းရတဲ့ လူနာကို ကိုယ်တိုင်တွေ့ဖူးပါတယ်။

တစ်ခါဖြစ်ဖူးပြီးလည်း ထပ်ဖြစ်တတ်ပါတယ်။ ဒုတိယအကြိမ်ဖြစ်ရင် ပထမအကြိမ်ထက် ပိုကြောက်ရပါတယ်။

အရေးကြီးတာက သွေးလွန်တုပ်ကွေးကို ရာသီတုပ်ကွေးနဲ့ မှားပြီး ဆေးခန်းဆေးရုံ မပြဖြစ်/အပြနောက်ကျရင် သွေးလန့်တာ စောစောမသိပဲ အသက်ဆုံးရှုံးရတာ‌တွေရှိတတ်တာမို့ သတိထားဖို့လိုပါတယ် ။

စောစောသိ စောစောကု၊ လိုအပ်ရင် စောစောဆေးရုံတင်ပြီး စနစ်တကျ ကုရင် အသေအပျောက် နည်းပါမယ်။

နောက်ထပ်အရေးအကြီးဆုံးက သွေးလန့် ခြင်း မဖြစ်ခင် အဖျားကျသွားတာကို နေကောင်းသွားပြီလို့ မှားယွင်းယူဆတတ်တာပါပဲ။
အဖျားကျပြီးတာတောင် မလန်းဆန်းလျှင်၊ မှိန်းလျှင်၊ ကယောင်ကတမ်းဖြစ်လျှင်၊ မူးဝေအော့အန်လျှင် ဆေးရုံသ်ို့ အမြန်သွားရပါမည်။
(စားသောက်ဆော့ကစားနေလျှင် မစိုးရိမ်ရပါ။)

သွေးလွန်တုပ်ကွေးနဲ့ ပတ်သတ်ပြီး သိမှတ်ထားသင့်တာတွေကို ကလေးအထူးကုဆရာဝန်ကြီး ဆရာဦးစောဝင်းရေးသားထားခဲ့တဲ့ ပုံတွေနဲ့ အောက်မှာ ဖော်ပြပေးလိုက်ပါတယ်။

08/04/2023

ကျွန်မတို့ ကျားဆေးခန်း fb page ရဲ့ အမေးအဖြေကဏ္ဍလေးအကြောင်း မသိသေးသူများကို မိတ်ဆက်ပေးပါရစေ။

ဒီ 2023 ခုနှစ် နှစ်ဆန်းမှ စတင်ပြီး ကျွန်မတို့ ကျားဆေးခန်း fb page တွင် လူနာ/လူနာရှင်နှင့် ဆရာဝန်များအကြား messenger မှတဆင့် အမေးအဖြေများ စတင်ပြုလုပ်နေပြီ ဖြစ်ပါတယ်။
အထွေထွေ‌ရောဂါနှင့် သားဖွားမီးယပ်ဆိုင်ရာ သိလိုသည်များကို သက်ဆိုင်ရာဆရာဝန်များနှင့် အထူးကုဆရာဝန်ကိုယ်တိုင် တတ်အားသမျှ 24 နာရီအတွင်း chat box မှ ပြန်လည်ဖြေကြားပေးပါတယ်။
ယခုဧပြီလမှ စ၍ အခြားသူများလည်း ကျန်းမာရေးဗဟုသုတ ရစေရန် ရည်ရွယ်ကာ လူမေးအများဆုံး မေးခွန်းနှင့် အဖြေများကို ရွေးချယ်စီစစ်ပြီး page တွင် ပြန်လည်ဖော်ပြပေးမည် ဖြစ်ပါတယ်။ (ကိုယ်ရေးကိုယ်တာ ထိန်းသိမ်းသောအားဖြင့် မေးသူအား ဖော်ပြခြင်း မပြုပါ။)

အဘက်ဘက် ခက်ခဲနေသော ကာလအတွင်း ဆေးခန်းတွင် ပြဖူးသော လူနာနှင့် လူနာရှင်များသာမက ရပ်နီးရပ်ဝေးမှ သူများပါ ကျန်းမာရေးဆိုင်ရာ အကူအညီ ရရှိနိုင်စေရန် အမေးအဖြေကဏ္ဍတွင် ပါဝင်ဖို့ ဖိတ်ခေါ်အပ်ပါတယ်ရှင့်။

05/04/2023

#အမေးအဖြေကဏ္ဍ
#တုပ်ကွေးကာကွယ်ဆေး

၁) တုပ်ကွေးကာကွယ်ဆေးက အန္တရာယ် ကင်းရဲ့လား??
- ယခင်က တုပ်ကွေးကာကွယ်ဆေး(သို့) အခြားသော ကာကွယ်ဆေးများနှင့် ဓာတ်မတည့်ဖူးသူးများမှအပ လူအများစုအတွက် အန္တရာယ် ကင်းပါတယ်။

၂) ဘယ်အရွယ်က စထိုးလို့ရလဲ?
- အသက် ၆ လနှင့် အထက် ထိုးလို့ရပါတယ်။

၃) တုပ်ကွေးကာကွယ်ဆေးထိုးပြီးရင် ဖျားတတ်လား?
- တုပ်ကွေးကာကွယ်ဆေးကြောင့် တုပ်ကွေးမဖြစ်တတ်ပါဘူး။ ဒါပေမယ့် ကာကွယ်ဆေးတွေရဲ့ထုံးစံအတိုင်း ကိုယ်တွင်းခုခံအားကို လှုံ့ဆော်တာကြောင့် ဆေးထိုးပြီးရင် ကိုယ့်ငွေ့ငွေ့ဖျားတာ၊ ခေါင်းကိုက်တာ၊ ကြွက်သားနာတာ၊ ပျို့ချင်တာ၊ ကိုယ်လက်မအီမသာဖြစ်တာနဲ့ ဆေးထိုးတဲ့ နေရာ ရောင်ရမ်းနာကျင်တာမျိုးတော့ ဖြစ်တတ်ပါတယ်။

၄) တုပ်ကွေးကာကွယ်ဆေး ထိုးပြီးတာတောင် ဘာလို့တုပ်ကွေးထပ်ဖြစ်တာလဲ?
- တုပ်ကွေးကာကွယ်ဆေး (quadrivalent) က အဖြစ်များတဲ့ Influenza A virus H1N1 ရယ်၊ H3N2 ရယ်နဲ့ နောက်ထပ် Influenza B virus ၂ မျိုး၊ စုစုပေါင်း ၄ မျိုးကိုပဲ ကာကွယ်ပေးတာပါ။ အဲ့ဒါကြောင့် ဒီ ၄ မျိုးမဟုတ်တဲ့ တခြား influenza virus ကူးရင် (သို့) ဆေးမထိုးခင်နဲ့ ထိုးပြီး ကိုယ်ခံအား မထွက်သေးခင် ကူးစက်ခံရရင် တုပ်ကွေးဖြစ်နိုင်ပါတယ်။

၅) တုပ်ကွေးကာကွယ်ဆေး ထိုးတာ ဘာကောင်းသလဲ?
- ကာကွယ်ဆေးထိုးလို့ ကိုယ်ခံအား ထွက်ထားပြီး သူတွေမှာ တုပ်ကွေးရောဂါ ကူးစက်နိုင်ခြေ နည်းပါတယ်။
ကူးစက်ခံရလည်း ရောဂါလက္ခဏာ မပြင်းထန်တတ်ပါဝူး။
ကိုယ်ခံအား ထွက်ထားတဲ့ ကလေးငယ်တွေ၊ အခြားနာတာရှည်ရောဂါ ရှိနေသူတွေနဲ့ ၆၅ နှစ်အထက် လူကြီးတွေမှာဆိုလည်း တုပ်ကွေးရောဂါကြောင့် ဆေးရုံတက်ရတဲ့နှုန်း သိသိသာသာ ကျဆင်းစေပါတယ်။ ကိုယ်ဝန်ဆောင်တွေမှာဆို မိခင်ရော ကလေးလေး မွေးပြီး ၆ လထိ ရောဂါကာကွယ်ပေးနိုင်ပါတယ်။

၆) တုပ်ကွေးကာကွယ်ဆေး ဘယ်တော့ ထိုးသင့်သလဲ?
- ကာကွယ်ဆေးထိုးပြီး ၂ ပတ်ခန့်အကြာမှ ကိုယ်ခံအားထွက်မှာ ဖြစ်တဲ့အတွက် တုပ်ကွေးရာသီမစခင် အနည်းဆုံး ၂ ပတ်ကနေ ၂ လလောက် ကြိုထိုးသင့်ပါတယ်။

၇) တုပ်ကွေးကာကွယ်ဆေးက တစ်ခါထိုးပြီး မပြီးဘူးလား? နှစ်တိုင်း ထိုးနေရမှာပဲလား?
- ကာ‌ကွယ်ဆေးကြောင့် ရတဲ့ ကိုယ်ခံအားက တစ်နှစ်ခန့်ဝန်းကျင်မှာ သိသိသာသာ ကျဆင်းသွားတာရယ်၊ တုပ်ကွေးရ virus ကလည်း တစ်ရာသီနဲ့ တစ်ရာသီ ပုံစံပြောင်းနေတတ်တာရယ်ကြောင့် တစ်နှစ်တစ်ခါ ထိုးသင့်ပါတယ်။

၈) ကိုယ်ဝန်ဆောင်နဲ့ နို့တိုက်မိခင်တွေရော ထိုးလို့ရလား?
- ကိုယ်ဝန်ဆောင်မိခင်တွေ ကိုယ်ဝန်ဘယ်နှစ်လဖြစ်ဖြစ် စိတ်ချလက်ချ ထိုးလို့ရပါတယ်။ ဆေးကြောင့် မိခင်မှာ ကိုယ်ခံအား ထွက်ထားရင် ကလေးဆီကို အဲ့ဒီ့ကိုယ်ခံအားက မွေးပြီး ၆ လထိ ရောဂါကာကွယ်ပေးနိုင်ပါတယ်။
နို့တိုက်မိခင်တွေလည်း စိတ်ချလက်ချ ကာကွယ်ဆေး ထိုးနိုင်ပါတယ်။

၉) တုပ်ကွေးကာကွယ်ဆေးက COVID-19 ကိုရော ကာကွယ်လား?
- မကာကွယ်ပါ။
တုပ်ကွေးဖြစ်စေတာ Influenza virus ဖြစ်ပြီးတော့ COVID-19 က coronavirus ဖြစ်ပါတယ်။ အမျိုးအစားချင်း မတူပါ။

၁၀) တုပ်ကွေးကာကွယ်ဆေးထိုးတဲ့ သူတွေမှာ COVID-19 ပိုဖြစ်တတ်လား?
- မဖြစ်ပါဘူး။ ရောဂါလက္ခဏာချင်းတူတာမို့ တုပ်ကွေးကာကွယ်ဆေးထိုးထားပြီးသူတွေ လက္ခဏာပြရင် COVID-19 ကို အရင်ဦးစားပေး စစ်ဖြစ်ကြလို့ ရောဂါရှာဖွေ ကုသမှု ပိုများသွားတာပါ။

၁၁) တုပ်ကွေးကာကွယ်ဆေး ဘယ်မှာ ထိုးလို့ရမလဲ?
- တုပ်ကွေးကာကွယ်ဆေးက 2-8° အအေးခန်းမှာ သိုလှောင်ထားမှ အာနိသင် ရှိပါမယ်။ Cold-chain management စိတ်ချရတဲ့ ဆေးရုံ၊ ဆေးခန်းတွေမှာ ခုလို April လ မိုးမကျခင် ၂ လလောက်ကတည်းက ကြိုထိုးထားလို့ ရနေပါပြီ။

Notes :
ကျွန်မတို့ ကျားဆေးခန်းမှာ 2023 တုပ်ကွေးရာသီအတွက်ထုတ်တဲ့ Vaxigrip tetra ကို တစ်ဦးလျှင် ၄၀,၀၀၀ ကျပ်နဲ့ ထိုးလို့ရပါတယ်ရှင့်။ မီးပျက်လည်း ၂၄ နာရီ cold chain နဲ့ ထားထားတာမို့ စိတ်ချလက်ချ ထိုးလို့ ရပါတယ်။ (သင်္ကြန်မတိုင်ခင်ထိ ဈေးအပြောင်းအလဲ မရှိပါ။)

03/04/2023

ကျွန်မတို့ Dr.Win Sein - ကျားဆေးခန်း၏ ဆက်သွယ်ရန် ဖုန်းနံပါတ်ကို အောက်ပါအတိုင်း ပြောင်းလဲလိုက်ကြောင်း အသိပေးအပ်ပါသည်။
ယခင် အကြောင်းအမျိုးမျိုးကြောင့် ဆက်သွယ်ရ ခက်ခဲခဲ့သည်များကို တောင်းပန်ပါသည်ရှင့်။

28/02/2023

7.3.23 တွင် ဆေးခန်းတစ်ရက် ပိတ်မည်ဖြစ်၍ လာမည် 5.3.23(လပြည့်နေ့) ဆေးခန်းဖွင့် ပါမည်

16/02/2023

သားသမီးမရသေးဘူးလား။

💥 အိမ်ထောင်ပြုပီးလို့ တနှစ်လောက်ကြာရင် စုံတွဲတွေရဲ့ 85%မှာ ကိုယ်လေးလက်ဝန် မင်္ဂလာသတင်းတွေ ကြားရပီပေါ့။ 15%လောက်မှာတော့ မေးခွန်းလေးတွေ ပေါ်လာတတ်တယ်။ "ငါတို့ ဘာလို့ ကလေးမရသေးတာလဲ" ဆိုပီးတော့ပေါ့။ တကြိမ်မှ သားမတည်ဖူးသေးသူတွေ (primary subfertility) လို့ဆိုနိုင်ပါတယ်။

တချို့ကျပြန်တော့ ကိုယ်ဝန်တည်ခဲ့ပါရဲ့၊ သားပျက်သားလျော ဖြစ်ခဲ့သူတွေ ရှိသလို ကလေးဝေးသူတွေလည်းရှိတယ် (secondary subfertility)။

သားသမီးမရချင်သူတွေက တားဆီးရလွယ်ကူလှတယ်။ သိပ်ပီးသောကဖြစ်စရာ မရှိဘူး။

သားသမီးရလိုသူတွေကတော့ တမျှော်မျှော်နဲ့ အတော်လေး စိတ်ပင်ပန်းရတယ်။

💥 ဘယ်လိုကြောင့် ကလေးအရ နှေးကြရတာလဲ။

သားသမီးအရနှေးတာ အမျိုးသမီး အိမ်ထောင်ဘက်ကြောင့် ဖြစ်နိုင်ခြေ 50%, အမျိုးသားကြောင့် ဖြစ်နိုင်ခြေ 30%, ဘယ်သူ့ကြောင့်ရယ်လို မယ်မယ်ရရ အကြောင်းရှာ မရတာ 20% ရှိပါတယ်။
အမျိုးသမီးတွေမှာ မျိုးဥ မကြွေတာ၊ သားဥပြွန်ပိတ်နေတာ၊ သားအိမ်အတွင်းလွှာတု (endometriosis) ဖြစ်နေတာ စသည်ဖြင့် အကြောင်းတခုခု ရှိနိုင်တယ်။
အမျိုးသားတွေမှာတော့ သုတ် အရည်အသွေးပြဿနာကို အများဆုံးတွေ့ရပါတယ်။

💥 ဘယ်လိုစုံတွဲတွေ အထူးသတိပြုသင့်သလဲ။

၁။ သက်ကြီးစုံတွဲတွေ။
အသက် ၃၅နှစ်အထက် အမျိုးသမီး၊ အသက် ၄၀အထက် အမျိုးသား။
၂။ အဝလွန် စုံတွဲတွေ။
အမျိုးသမီး အတွက်ကတော့ ဝလွန်းတာ ပြဿနာ ဖြစ်နိုင်သလို၊ ပိန်လွန်းတာလဲ မကောင်းဘူး။
၃။ ဆေးလိပ်သောက်တတ်သူတွေ။
၄။ အရက်အလွန်အကျွံမှီဝဲသူတွေ။
၅။ လိင်မှ တဆင့် ကူးစက်တတ်သော ရောဂါ ခံစားခဲ့ရသူတွေ။
၆။ ပိုးသတ်ဆေးတွေ၊ ဓာတုဗေဒ ပစ္စည်းတွေနဲ့ ထိတွေ့မှု များသူတွေ (အထူးသဖြင့် အမျိုးသား)
၇။ စိတ်ဖိစီးမှုများသူတွေ။

ကလေးအရနှေးတတ်သူတွေထဲ ပါဝင်ခဲ့ရင် သားဖွားမီးယပ်ဆရာဝန်နဲ့ စောလျင်စွာ တိုင်ပင်ဖို့လိုပါလိမ့်မယ်။

💥 ကုသမှုများ။

ဆေးသိပ္ပံ ထွန်းကားလာတာနဲ့အမျှ ကုသနည်းတွေ စုံလင်လာတယ်။ ဆေးပေးပြီး စောင့်ကြည့်နိုင်တဲ့ အမျိုးအစားက စပြီး ဖန်ပြွန်သန္ဓေမွေးနိုင်တဲ့ အထိ ကျယ်ပြန့်လာတယ်။
ကုန်ကျစရိတ်ကတော့ အတော်များတယ်လို့ဆိုရမယ်။
အချုပ်ပြောရရင်တော့ သားသမီးယူဖို့ ကြိုးစားတော့မယ်ဆိုရင် ငွေရေးကြေးရေးက အစ၊ စိတ်ပိုင်းဆိုင်ရာ အဆုံး သေချာပြင်ဆင်ထားမှသာ တော်ခါကျပါလိမ့်မယ်။

မရသေးတာသာရှိတာပါ။ နည်းလမ်းအသွယ်သွယ်ရှိတာမို့ မျော်လင့်ချက်အပြည့်နဲ့ လျောက်လှမ်းခဲ့ပါ။

credit - အမျိုးသမီး ကျန်းမာရေး - သားဖွားနှင့် မီးယပ်

01/02/2023

နက်ဖြန် ၂.၂.၂၃ ရက်နေ့ မနက်ခင်း ဆေးခန်း ပိတ်ပါမည်
ညနေခင်း ပုံမှန်ချိန် ဆေးခန်းဖွင့်မည်ဖြစ်၍ ယခုလာမည့် ဥပုသ်နေ့ ၄.၂.၂၃ တွင်လည်း ဆေးခန်းကို ပြန်လည်အစားထိုး ဖွင့်မည်ဖြစ်ကြောင်း အသိပေးအပ်ပါသည်

03/01/2023

မွေးကင်းစ

အပိုင်း ၁- သင့်က‌လေးငယ်၊ သိမှတ်ဖွယ်။

💥မိခင်တွေက ကလေးပေါက်စကို ခေါင်းအစ ခြေအဆုံး ကြည့်နေတတ်ကြတယ်။ ကိုယ်နဲ့မတူတာ တခုခုတွေ့တာနဲ့ စိတ်ပူပန်တတ်တယ်။ များသောအားဖြင့် ချက်ကြိုးနဲ့ ငယ်ထိပ်ကိုစိတ်ပူကြတာ သတိထားမိတယ်။

💥 ကလေး ချက်ကြိုး။

ချက်ကြိုးထဲမှာ အာရုံကြောမပါတာမို့ သူ့ကို ကပ်ကြေးနဲ့ ဖြတ်လိုက်တာတောင် မနာပါဘူး။ ချက်ကြိုးညှပ်ကို ကိုင်တွယ်ရင် ဝမ်းဗိုက်အရေပြားတင်းတာလောက်ပဲ ကလေးကသိတာပါ။
ခြောက်သွေးပီး သန့်ရှင်းဖို့ ဂရုစိုက်ရမယ်။ ဘာဆေးမှ ထည့်ဖို့ မလိုပါဘူး။ တပတ်ဆိုရင် ချက်ကြွေပီ။

💥 ငယ်ထိပ်

ဦးထိပ်မှာ စမ်းမိတဲ့ ပျော့စိပျော့စိ လေးထောင့်ကွက်လေးဟာ ငယ်ထိပ်မှန်း လူတိုင်းသိတယ်။ အင်မတန်နုနယ်တယ်ထင်ပီး စိုးရိမ်တတ်ကြတယ်။ တကယ်တော့ ငယ်ထိပ်ကလေးက ထင်တာထက် တောင့်တင်းသန်မာပါတယ်။ ‌ဦးခေါင်းရိုးလေးတွေမဆက်သေးပေမယ့် အပေါ်ဖုံး အမှေးဟာ လုံလောက်အောင်ထူထဲပါတယ်။
ငယ်ထိပ်ပိတ်ဖို့ တနှစ်ခွဲလောက်ကြာပါတယ်။

💥 အရေပြား။

မွေးကင်းစလေးဟာ အရေပြားအတော်ပါးတယ်။ တစ်လသား အရွယ်လောက်ရောက်မှ အရေပြားဖွံဖြိုးမှုက ပြီးပြည့်စုံတာ။
မွေးကင်းစမှာ ထောပတ်ဆီခဲတွေ သုတ်ထားသလို၊ ဝါတာတာ အဆီပြင်၊ အဆီစုလေးတွေ ပါလာတတ်တယ်။ သိပ်ကောင်းတယ်။ ဈေးအကြီးဆုံး moisturizer တောင် သူ့လောက်မကောင်းဘူး။ ရေချိုးပေးရင် တလသား အထိ ရေသန့်သန့်နဲ့သာ ချိုးပေးသင့်တယ်။ ဆပ်ပြာတို့၊ လိမ်းဆေးဆီတို့ မလိုသေးပါဘူး။

💥 မျက်လုံး။

မွေကင်းစကလေးက မြင်ပါတယ်။ တိတိကျကျရှင်းရှင်းလင်းလင်းကြီးတော့ မဟုတ်သေးဘူးပေါ့။ နှစ်ပတ်သားလောက်ဆိုရင်တော့ မျက်နှာကို လိုက်ကြည့်တတ်ပီ။
သုံးလ မပြည့်မီ၊ မျက်စိစွေသလိုဖြစ်တဲ့အချိန်တွေရှိတယ်။ စိုးရိမ်ဖို့ မလိုပါဘူး။ ပုံမှန်ပါဘဲ။

💥 မျက်နှာ။

ကလေးမျက်နှာပေါ်မှာ မိတ်ဖုလိုလို ဝက်ခြံနဲ့ခပ်ဆင်ဆင်လိုလို အဖုအပိမ့်တွေ ထွက်လေ့ရှိတယ်။ ပြည်ဖုလေးတွေတောင် ပေါက်တတ်တယ်။ ကလေးက လန်းတယ်၊ နို့ကောင်းကောင်းစို့တယ်ဆိုရင် ကိစ္စမရှိဘူး။ မကြာခင်ပျောက်သွားမှာပါ။

💥 ရင်ဘတ်နဲ့ ပေါင်ခြံကြား။

‌သားလေးပဲ ဖြစ်ဖြစ် သမီးလေးပဲဖြစ်ဖြစ် နို့သီးရာလေးအောက်မှာမာမာခဲခဲလေးဖြစ်နေတတ်တယ်။
လိင်အင်္ဂါကလည်း အနည်းငယ်ရောင်ရမ်းနေသလိုမျိုးလေး။
မိန်းကလေးဆိုရင် အဖြူရည် သို့မဟုတ် သွေးစနည်းနည်းတောင် ပါတတ်သေးတယ်။
မိခင်ဆီက ပါလာတဲ့ ဟော်မုန်းသက်တမ်းကုန်တာနဲ့ ပျောက်သွားမှာပါ။

💥 အသားဝါ

မွေးပီးသုံးရက် နောက်ပိုင်းမှာ မျက်နှာလေး နည်းနည်းဝါတတ်တယ်။ အန္တရာယ်ကင်းရဲ့လားဆိုတာ မွေးကင်းစအထူးပြု ဆရာဝန်တွေက ကြည့်ပေးပါတယ်။

💥 အသိ

မွေးမွေးချင်း သိတဲ့အသိကတော့ နို့စို့ဖို့ပါပဲ။ နို့သီးခေါင်းရှာတတ်သလို၊ ပါးစပ်ကို လုံလောက်အောင်ဟထားဖို့တော့ သိတတ်လိမ္မာနေပါပီ။

Credit - အမျိုးသမီး ကျန်းမာရေး-သားဖွားနှင့် မီးယပ်

28/12/2022

29.12.23 (ကြာသပတေး) တွင်ဆေးခန်း တစ်ရက်ပိတ် ပါသည်

24/12/2022

မွေးကင်းစကို ရေတိုက်ခြင်းနှင့်ပတ်သက်ပြီး အငြင်းပွားလိုသူများသိစေရန် ရေးပေးပါသည်။

၆ လအောက်ကလေး ရေမတိုက်နဲ့ ပြောခြင်းသည် ကလေးကို ရေငတ်ထားခြင်းမဟုတ်ပါ။ မိခင်နို့(သို့) နို့ ဗူး formula မှ ပေးသောရေနှင့် လုံလောက်ပြီဟု ပြောခြင်းဖြစ်ပါသည်။

လူကြီးတိုက်သော ရေပို ကို မဖွံဖြိုးသေးသော ကလေး၏ ကျောက်ကပ်က မစွန့်နိုင်သောအခါ ကိုယ်ခန္ဓာတွင်း ရေနှင့်ဆားမမျှဘဲ ရေပိုက ဦးနှောက်ထဲ ရောက်သွားပါသည်။ ရေ"ပို" ပမာဏပေါ်မူတည်၍ အောက်ပါအချက်များကို ကလေးခံစားရနိုင်ပါသည်။

(၁) မျက်နှာဖောရောင်ခြင်း
(၂) ဦးနှောက်လေးလံထိုင်းမှိုင်း၍ ခါတိုင်းထက် အိပ်ငိုက်ခြင်း
(၃) ဦးနှောက် ရောင်ပွ၍ အလွန်အကျွံငိုခြင်း
(၄) ကြွက်သားများ ပုံမမှန်လှုပ်ရှားခြင်း/ ကြွက်တက်ခြင်း
(၅) အန်ခြင်း
(၆) အခြားအကြောင်းမရှိဘဲ တက်ခြင်း
(၇) အကြိမ်ကြိမ်တက်ပြီး သေဆုံးခြင်း
(၈) မသေသော်လည်း ဉာဏ်ရည် နိမ့်ကျခြင်း, နားလေးခြင်း, လမ်းလျှောက်နိုင်သောကြွက်သားများ ရာသက်ပန်ပျက်စီးသွားခြင်းတို့ဖြစ်နိုင်ပါသည်။

မွေးကင်းစနှင့် ၆ လအောက်ကလေးကို ရေ"ပို" တိုက်မိခြင်းသည် မသိနားမလည်၍လည်းဖြစ်နိုင်သည်။ စီးပွားရေးအခက်အခဲကြီးလွန်း၍ နို့မှုန့်ဖျော်ရာတွင် ရေပိုထည့်ခြင်းလည်း ဖြစ်နိုင်သည်။ နို့မှုန့်ဖျော်ရာတွင် တခါတရံ မတော်တဆမှားယွင်းခြင်းလည်းဖြစ်နိုင်ပါသည်။ မည်သို့အကြောင်းကြောင့်ဖြစ်စေ ဤစာဖတ်ပြီးလျှင် မွေးစကလေးကို ရေတိုက်လိုသူမိဘဘိုးဘွားများ နားလည်မှုရရှိသွားစေရန် မျှော်လင့်ပါသည်။

*********************************
ကြားဖူးခဲ့သော အငြင်းပွားမှုများကို အောက်ပါအတိုင်း ရှင်းပြပေးလိုပါသည်။

(၁) မိခင်နို့တိုက်လည်း ရေပါတာပဲ။ တိုက်တော့ ဘာဖြစ်လဲ။

ဖြေရှင်းချက်: မွေးကင်းစမှ ၆ လ မိခင်နို့တစ်မျိုးတည်းသာတိုက်ကျွေးပါဆိုသည်မှာ ရေထပ်မတိုက်ပါနှင့်ဟု ဆိုလိုခြင်းဖြစ်သည်။ ရေမတိုက်ပါနှင့်ဟု ဆိုခြင်းမှာ မိခင်နို့တွင် ကလေးအတွက်လုံလောက်သော ရေဓာတ်ပါသောကြောင့်ဖြစ်ပါသည်။

(၂) နှို့မှုန့်ဖျော်လဲ ရေထည့်ရတာပဲ။ ရေတိုက်တော့ ဘာဖြစ်လဲ။

ဖြေရှင်းချက်: မိခင်နို့ကို ကျန်းမာရေးအရဖြစ်စေ၊ အခြားအကြောင်းများကြောင့်ဖြစ်စေ မတိုက်နိုင်၍ နို့မှုန့်ဖျော်တိုက်သောအခါ Formula Milk ဖော်မျူလာ နို့ ကို ညွှန်းပါသည်။ Formula ဆိုသည်မှာ ပုံသေနည်းအတိုင်းအတိအကျလုပ်ဆောင်ခြင်း ဖြစ်ပါသည်။ နို့မှုန့်များတွင် ကလေးတစ်ယောက်တစ်နေ့တာအတွက် လိုအပ်သော ရေပမာဏကို တွက်ချက်ပြီးမှ နို့မှုန့်ဘယ်နှစ်ဇွန်းကို ရေဘယ်လောက်နှင့် ဖျော်ရန် တိကျစွာ ညွှန်းထားပေးပါသည်။ ထို့ကြောင့် နို့မှုန့်ဗူးတိုက်ပြီး ရေ"ပို"တိုက်ရန်မလိုပါ။

(၃) ကျွန်မကလေးမွေးပြီး အသားဝါလို့ ဆရာဝန်မသိအောင် ရေခိုးတိုက်မှ အသားဝါ ပျောက်သွားတယ်။

ဖြေရှင်းချက်: မွေးစ ကလေး အသားဝါခြင်း အကြောင်းရင်းများစွာရှိသည့်အနက် အများစုက အချိန်တိုအတွင်းပျောက်သွားပါသည်။ ရေခိုးတိုက်လို့ အသားဝါပျောက်သွားခြင်းမဟုတ်ပါ။

(၄) ကျွန်မကလေးက ရေတိုက်ပြီးကြီးလာတာ ဘာမှမဖြစ်ဘူး။

ဖြေရှင်းချက်: တိုက်တဲ့ပမာဏပေါ်မူတည်ပြီး တစ်ရက် နှစ်ရက်အတွင်းသေသွားသောကလေးများရှိခဲ့သလို ရေရှည်မှာ မသိမသာနဲ့ ဦးနှောက် ထိခိုက်ခြင်းဖြစ်နိုင်သည်လည်းရှိသည်ဟုသာ သတိပေးလိုပါသည်။

(၅) Gripe Water ကို ကလေးလေထိုးရင်ပေးတော့လဲ ရေပါတာပဲ။

ဖြေရှင်းချက်: Gripe Water ဟာ ကလေးလေထိုးခြင်းကို ဘာကောင်းကျိုးမှ မဖြစ်စေကြောင်း သြစတေးလျ နှင့် အမေရိကန် ကလေးဆေးရုံများမှာ သတိပေးထားပါသည်။ မသုံးပါနှင့်။

(၆) ကျွန်မနိုင်ငံခြားမှာနေလာတာ နို့စို့ ကလေးကို ရေတိုက်တာအမြဲတွေ့ပါတယ်။ တိုက်သာတိုက်ပါ။

ဖြေရှင်းချက်: နိုင်ငံခြားမှာနေတဲ့လူတိုင်း အမှားအမှန်မသိပါ။ ဘယ်နိုင်ငံမဆို အမှားလုပ်သူ အမှန်မသိသူ လူများစွာရှိပါသည်။ နိုင်ငံခြားမှ အရာရာတိုင်း၊ လူတိုင်းကို အတုခိုးစရာမလိုပါ။

(၇) ရေမသောက်လျှင် အသည်းခြောက်တယ် ကြားဖူးလို့ ရေတိုက်ပါတယ်။

ဖြေရှင်းချက်: အသည်းခြောက်ခြင်းသည် အရက် အလွန်အကျွံသောက်သူများ, အချို့သော အသည်းရောဂါပိုးရှိသူများနှင့် အဝလွန်ရောဂါရှိသူများနှင့် ဆက်စပ်ပါသည်။ နို့စို့ ကလေးကို ရေမတိုက်ခြင်းနှင့် ဘာမှမဆိုင်ပါ။

ဆုံးဖြတ်ချက်မှန်ကန်ပါစေ။

# crd

15/10/2022

Dr.Win Sein ကျားဆေးခန်းကို 16.10.22 (Sunday) တွင် ဆေးခန်းတစ်ရက် ပိတ်ပါမည်

Dr.Win Sein - ကျားဆေးခန်း

18/07/2023

29/05/2023

28/04/2023

20/04/2023

18/04/2023

09/04/2023

08/04/2023

05/04/2023

03/04/2023

28/02/2023

16/02/2023

01/02/2023

03/01/2023

28/12/2022

24/12/2022

15/10/2022

Address

Opening Hours

Telephone

Website

Alerts

Shortcuts

Share

Category

Monday	08:30 - 12:30
	17:00 - 20:00
Tuesday	08:30 - 12:30
	17:00 - 20:00
Wednesday	08:30 - 12:30
	17:00 - 20:00
Thursday	08:30 - 12:30
	17:00 - 20:00
Friday	08:30 - 12:30
	17:00 - 20:00
Saturday	08:30 - 12:30
	17:00 - 20:00
Sunday	08:30 - 12:30
	17:00 - 20:00