11/11/2024
သေချာတဲ့ ရင်းနှီးမြှုပ်နှံမှု
☸️☸️☸️☸️☸️☸️☸️☸️
သေချာတဲ့ရင်းနှီးမြှုပ်နှံမှုက ဘာလဲလို့ဆိုတာကို မြတ်စွာဘုရားက ယခုလိုရှင်းပြတယ်။ “လိမ္မာပါးနပ်တဲ့သူ အမျိုးသားပဲဖြစ်ဖြစ်၊ အမျိုးသမီးပဲဖြစ်ဖြစ် တကယ်စိတ်ချရတဲ့ ရင်းနှီးမြှုပ်နှံမှုလုပ်ချင်ပြီဆိုရင် ထိုပစ္စည်းဥစ္စာကို အသုံးပြုပြီး ဒါနကောင်းမှုလုပ်တယ်” ဒါ ရင်းနှီးမြှုပ်နှံမှုတစ်ခုပဲ။
ဒါနကောင်းမှုလုပ်တာက အခက်အခဲတွေ၊ ပျက်စီးဆုံးရှုံးမှု တွေနဲ့ တစ်ခုမှမကြုံရဘူး။ ကိုယ်ဒါနလုပ်ထားတာသိလို့
ဒါနကို ခိုးယူလို့မရဘူး၊ နေရာရွေ့သွားအောင် လုပ်လို့မရဘူး၊ နဂါးတွေ ဘီလူးတွေက ရွှေ့ယူသွားလို့ မရဘူး၊ ကုသိုလ်ကံ ကုန်ခြင်းဆိုတာလည်းမဖြစ်နိုင်ဘူး။ ဒါကြောင့်မို့ ရင်းနှီးမြှုပ်နှံမှုထဲမှာ ဒါနကောင်းမှုပြုပြီး ရင်းနှီးမြှုပ်နှံမှုဟာ အလွန်သေချာတယ်လို့ မြတ်စွာဘုရားက ဟောတာ။
နောက်တစ်ခု ရင်းနှီးမြှုပ်နှံတာက ပစ္စည်းဥစ္စာကို ရင်းနှီးမြှုပ်နှံတာ မဟုတ်ဘူး။ အေး၊ တို့တော့ ဒါနကောင်းမှု များများကြီးမပြုနိုင်ဘူး၊ အဲဒီတော့ တစ်ခြား နည်းနဲ့မြုပ်နှံရမယ်၊ ဘယ်လိုမြှုပ်နှံရမလဲဆိုရင် ကိုယ်ကျင့်တရားနဲ့လည်း ရင်းနှီး မြှုပ်နှံလို့ ရတယ်တဲ့။ အနည်းဆုံး ငါးပါးသီလ
မကျိုး မပေါက် မပျောက် မကြား ရအောင် ထိန်းသိမ်းစောင့်ရှောက်ခြင်းဆိုတဲ့ ကိုယ်ကျင့်တရား။ သီတင်းနေ့များမှာ (၈)ပါးသီလ, (၉)ပါးသီလ ခံယူဆောက်တည်ခြင်းဆိုတဲ့ သီလအကျင့်တရား။ အဲဒီ ကိုယ်ကျင့်တရား ထိန်းသိမ်းစောင့်ရှောက်မှုဟာလည်း စိတ်ချရတဲ့ ရင်းနှီးမြှုပ်နှံမှု တစ်ခုပဲတဲ့။
နောက်တစ်ခုကတော့ ကိုယ့်ရဲ့စိတ်ကလေးကို သမာဓိစွမ်းအားနဲ့ ထိန်းပေးတာ၊ စိတ်ကလေး လွင့်ပါးမှုမရှိအောင်၊ ကောင်းတဲ့အာရုံတစ်ခုပေါ်မှာ စိတ်လေး ငြိမ်အောင် သမာဓိတရား ကြိုးစားအားထုတ်တယ်။ ဆိုလိုတာက သမထကျင့်စဉ် တစ်ခုကို ကျင့်ပြီးတော့လည်း ရင်းနှီးမြှုပ်နှံမှုလုပ်လို့ရတယ်။ ဒါလည်း ရင်းနှီးမြှုပ်နှံမှု တစ်ခုပဲ။
နောက်တစ်ခုက ပညာအဆင့်ဆင့်ရင်းနှီးမြှုပ်နှံမှု၊ မိမိတို့မှာ လောကီပညာပဲ ဖြစ်ဖြစ်၊ လောကုတ္တရာပညာပဲဖြစ်ဖြစ် နောက်ဆုံး အဆင့်မြင့်တဲ့ ဝိပဿနာပညာ စတဲ့ ပညာရပ်တွေကို မိမိတို့သန္တာန်မှာရအောင် ကြိုးစားအားထုတ်ခြင်းဖြင့်လည်း ရင်းနှီးမြှုပ်နှံမှုဆိုတာ ဖြစ်တယ်တဲ့။ ဒါက သေချာတဲ့ ပစ္စည်းဥစ္စာ ရင်းနှီးမြှုပ်နှံမှ တစ်ခုပဲ။ ပျက်စီးတာတွေ မရှိနိုင်ဘူးတဲ့။
ဒါနဖြင့် မြှုပ်နှံရမည့် ဌာန
☸️☸️☸️☸️☸️☸️☸️☸️
ဒါနဆိုတဲ့ မြှုပ်နှံမှုလုပ်ချင်လို့ရှိရင် ဘယ်နေရာမှာမြှုပ်မလဲ။ ရတနာရွှေအိုးကြီးတွေမြုပ်တဲ့အခါ၊ ပစ္စည်းဥစ္စာတွေကိုမြှုပ်ပြီး သိမ်းတဲ့အခါ ရေထွက်လုနီးပါးဖြစ်တဲ့ တွင်းနက်ကြီးတွေတူးပြီး အဲဒီတွင်းထဲမှာ တော်တော်နဲ့ ဖော်ထုတ်လို့မရအောင် ထည့်ပြီးတော့ထားတဲ့နည်းနဲ့ မြှုပ်နှံတယ်။
အခု ဒါနဆိုတဲ့ ကုသိုလ်ကောင်းမှုကိုတော့ ဘယ်မှာမြှုပ်မလဲဆိုတော့ မြှုပ်နှံတဲ့နေရာကို မြတ်စွာ ဘုရားကဟောတယ်။
ဒါနဆိုတဲ့ ရင်းနှီးမြှုပ်နှံမှုကိုလုပ်မယ်ဆိုရင် ဗုဒ္ဓမြတ်စွာရဲ့ ဓာတ်တော် မွေတော် တွေကို ထည့်သွင်းပြီးတော့ ပူဇော်ထားတဲ့ စေတီပုထိုးတွေမှာ မြှုပ်နှံလို့ရတယ်။ နောက်တစ်ခုက သံဃာတွေမှာမြှုပ်နှံလို့ရတယ်။ သံဃာ့ဂုဏ်ကို အာရုံပြု၍၊ သံဃာ တွေကို လှူဒါန်းခြင်းဖြင့် ဒါနကုသိုလ် ရင်းနှီးမြှုပ်နှံလို့ရတယ်။ နောက်တစ်ခုက ပုဂ္ဂိုလ်တစ်ဦးတစ်ယောက်ပဲဖြစ်စေ လှူဒါန်းပြီး ရင်းနှီးမြှုပ်နှံလို့ရတယ်။ နောက် ရင်းနှီး မြှုပ်နှံမှုက ကိုယ့်အိမ်ရောက်လာတဲ့ဧည့်သည် (သို့) ဖိတ်ထားလို့ ရောက်လာတဲ့ ဧည့်သည်တွေကို ကျွေးမွေးဧည့်ခံတာလည်း ရင်းနှီးမြှုပ်နှံမှုတစ်ခုပဲတဲ့။
နောက်တစ်ခုက မိဘနှစ်ပါးထင်ရှားရှိနေတဲ့ပုဂ္ဂိုလ်တွေဟာ မိဘကို ပြုစု လုပ်ကျွေးတာဟာလည်း ရင်းနှီးမြှုပ်နှံနေတာတစ်ခုပဲတဲ့။ မိသားစုထဲမှာ “အစ်ကိုကြီး အဖအရာ၊ အစ်မကြီး အမိအရာ” ဆိုတဲ့အတိုင်း မိမိရဲ့မိသားစုထဲမှာ မိဘနှစ်ပါး မရှိတော့ဘူးဆိုရင် အစ်ကိုကြီး၊ အစ်မကြီးတွေမှာလည်း ရင်နှီးမြှုပ်နှံပေးလို့ရတယ် လို့ ဒီလိုဆိုလိုတယ်။ အဲဒီမှာ ဒါနကောင်းမှုပြုပြီးတော့ ရင်းနှီးမြှုပ်နှံလိုက်တာဟာ သေချာတဲ့ ရင်းနှီးမြှုပ်နှံမှုကြီးတစ်ခုဖြစ်တယ်လို့ မြတ်စွာဘုရားကဟောတယ်။
နယ်လှည့်ဟောကြား မြတ်တရား အတွဲ(၅)
ကျေးဇူးတော်ရှင် ပါမောက္ခချုပ်ဆရာတော်
ဒေါက်တာ အရှင်နန္ဒမာလာဘိဝံသ
#ပူဇော်သူ- Kyaw Thin (27.4.2024) စနေနေ့
