https://www.facebook.com/100483513068625/

21 days later, Yangon (2026)

28/03/2026

ဘဝအပေါ် အမှန်မြင်နိုင်ဖို့ဟာ သိပ်ခက်ခဲတာပဲ။

ဒီလိုအမြင်မှန်မျိုးကို တွေ့နိုင်ဖို့ရာကိုတော့ သူတော်ကောင်းတွေဟာ လက်ရှိဘဝကိုတန်ဖိုးထားရင်း လုံလပြုလို့ ဝီရိယထက်သန်စွာ အားထုတ်နေကြရတယ်။

သို့သော်ငြားလည်း ကျနော်တို့လို ဉာဏ်ရည်နိမ့်ပါးတဲ့ ပုထုစဉ်သာမန်လူသားတွေကတော့ ဘဝရဲ့အဓိပ္ပါယ်ကို ရှာတွေ့နေပြီးဖြစ်နေသယောင်ယောင်၊ ကိုယ့်ရဲ့အမှန်တရားဟာပဲ လောကရဲ့အမှန်တရားလိုလို၊ ကိုယ့်အတ္တကိုဦးစားပေးနေပေမယ့် ခံယူချက်မှာတော့ လောကကိုဦးစားပေးနေတာပါလို့ ယူဆနေကြပြီး အချိန်ဖြုန်းနေကြတယ်။

ဒီလိုအချိန်ဖြုန်းရင်း ကိုယ်ယူဆထားတဲ့ အမှန်တရားလေးကို အထိခိုက်ခံရရင်တောင် အတ္တ၊ မာန နဲ့ပြင်းပြင်းထန်ထန်တုံ့ပြန်နေကြသေးပြန်တာပဲ မဟုတ်လား။

ကျနော်တို့ဟာ အမှားပေါ်အမှားဆင့်နေသူ အချင်းချင်းမို့ အခြားသူအပေါ် ဝေဖန်ဖို့ထက် ကိုယ့်စိတ်ကိုကိုယ် ပြန်လည်စောင့်ကြည့်ရင်း ကိုယ့်အကျိုးထက် လောကကောင်းကျိုးကိုသာ ရှေးရှုပြီး နေထိုင်သွားသင့်တော့မယ်လို့ ယူဆမိပါတယ်။

“အနယော နယရူပေန ဗုဒ္ဓိမက္ကမ္မ တိဌတိ”

“မှားသောနည်းသည် မိမိ၏အသိဉာဏ်ကို ကျော်လွှား၍ မှန်သောနည်းအသွင်ဖြင့် ရပ်တည်တတ်၏။” တဲ့။

လူဟာ အတ္တသိ သိပ်အားကြီးလာတဲ့အခါ အမှားကိုအမှန်၊ မကောင်းကို အကောင်း၊ မိတ်ဆွေကိုရန်သူ လို့ထင်တတ်လာကြတယ်။ ဒီလိုအထင်မှားလာခြင်းဟာ ပျက်စီးခြင်းရဲ့ သင်္ကေတ၊ ပျက်စီးခြင်းရဲ့ အရိပ်နိမိတ်သာဖြစ်တယ်….ဆိုတာ….

ကျနော်တို့ ဆင်ခြင်ဖို့ သိပ်ကောင်းတယ်နော် …။

Hanko Htet

21 days later

21/03/2026

“ကျနော်တို့က သူများကိုလိမ်တဲ့အခါ ကိုယ်လိမ်နေတယ်ဆိုတာကို သိကြတယ်။ အခြားသူက ကိုယ့်ကိုလာလိမ်တဲ့အခါတော့ လိမ်နေတဲ့ဖြစ်စဉ်အတွင်းမသိပေမယ့် အလိမ်ခံရပြီးရင်တော့ ကိုယ့်ကိုယ်ကိုယ် အလိမ်ခံလိုက်ရပြီဆိုတာ သိပြန်တယ်။
အင်း….ကိုယ့်စိတ်ကို ကိုယ်ကပြန်လိမ်ပြီ ဆိုတဲ့အခါမျိုးကျရင်တော့ ဒီအလိမ်ဟာ တသက်လုံးမပေါ်တော့ဘူး။” တဲ့။

ဒီစကားဟာ ဆရာကြီး ဦးသုခအရေးအသားကို ကျနော်ဖတ်မိခဲ့သမျှ မှတ်မိသလောက်လေးရေးပြတာပါ။

နောက်ဖတ်ဖူးတဲ့ “စမ်းရေကြည်နု” ဆိုတဲ့စာအုပ်ထဲမယ် ကိုကြည်နုက တစ်ယောက်တည်းစကားပြော၊ ရူးချင်ယောင်ဆောင်ပြီး ပိုက်ဆံတောင်းရင် ပိုရတတ်မှန်းသိခဲ့တော့….
အချိန်ကြာလာတာနဲ့အမျှ ကိုကြည်နုဟာ “သူ့ကိုယ်သူ တကယ်ရူးနေတာလား၊ သူဟာ ရူးချင်ယောင်ဆောင်နေတာလား” ဆိုတာကို အသက်ထွက်သွားတဲ့အထိ မသဲကွဲသွားခဲ့ရှာဘူး။ တဲ့။

စဉ်းစားဖို့ သိပ်ကောင်းတဲ့အရာနော်။
ဒီလိုမျိုး ကိုယ့်ကိုယ်ကိုယ် လှည့်စားတတ်တဲ့ သဘာဝဟာ ကျနော်တို့ရဲ့ နေ့စဉ်ဘဝ၊ အထူးသဖြင့် ချစ်ခြင်းမေတ္တာရေးရာတွေမှာလည်း အများကြီး ရှိနေတတ်ပါတယ်။

တစ်ဖက်သားရဲ့ အကျိုးကိုသာ လိုလားတတ်တဲ့ “မေတ္တာ”၊ နာကြည်းမှု၊ အငြှိုးနဲ့ လက်တုံ့ပြန်ခြင်းတွေမရှိတဲ့ အေးချမ်းသော “မေတ္တာ”နဲ့ ဆန့်ကျင်ဖက် ပူလောင်သောသဘောသာရှိတဲ့ “ရာဂစိတ်” ကို လူတွေဟာ အတူတူပဲလို့ သတ်မှတ်လိုက်ကြတယ်။

အခြေခံချင်းသိပ်ခြားနားပါတယ်ဆိုတဲ့ ရာဂစိတ်ကိုတောင် မေတ္တာစိတ်ဖြစ်နေပါတယ်လို့ ကိုယ့်စိတ်ကကိုယ့်ကို လိမ်၊ လှည့်စား၊ ညာ။
ကိုယ်ကလည်း သူများကို မေတ္တာအစစ်တွေပေးနေပါတယ်လို့ လိမ်မိ၊ ညာမိ။
သူလိုလူတွေကလည်း သူ့ကို သူ့လိုပဲ လိမ်၊ ညာနဲ့။

“ညာခြင်းဆုံ” “လိမ်ခြင်းဆုံ” နေမိကြပေမယ့် ကိုယ်ဟာ သူများကို လိမ်ညာနေမှန်း၊ ကိုယ့်ကိုလည်း လာလိမ်ညာနေမှန်း ဘယ်တော့မှမမြင်နိုင်တော့မယ့် “ညာခြင်းဆုံ” ခရီးစဉ်ကြီးတစ်ခုပါပဲဗျာ။……။

Hanko Htet
21 days later

11/03/2026

“လူဆိုတာ အကျိုးလိုလို့ ညောင်ရေသွန်းကြသူတွေချည်းပဲ” ဆိုတဲ့စကားမျိုးကို ပြောတော့မယ်ဆိုရင် ထိန်းပြောပေးပါ။

ပတ်ဝန်းကျင်မှာ ခင်ဗျားတို့စကားသံတွေကို လေးစား၊ အတုယူရင်းနားစွင့်နေကြတဲ့ လူငယ်တွေရဲ့ စူးစူးရဲရဲ “နားအစုံ” ပေါင်းများစွာရှိနေတတ်ပါတယ်။

“ကိုယ် ဘာမှမရရင် ဘာမှပြန်မပေးနိုင်ဘူး” ဆိုတဲ့ အတွေးအခေါ်အယူအဆမျိုးကို ခင်ဗျားသဘောကျလို့ ကျင့်သုံးချင်တယ်ဆိုရင် တိတ်တိတ်လေး ကျင့်သုံးပါ။ ရပါတယ်။

“ဒီအတွေးအခေါ်ဟာ အမှန်ပဲ” ဆိုတဲ့အယူအဆမျိုးကိုတော့ လူငယ်တွေခေါင်းထဲမထည့်ပေးပါနဲ့။

“လောကမှာ ကိုယ်ကျိုးမငဲ့ပဲ လောကအကျိုး၊ အများအကျိုးအတွက် ဆောင်ရွက်တတ်၊ ဆောင်ရွက်နေသူတွေအများကြီးရှိနေပါတယ်” ဆိုတာ ဒီလူငယ်တွေ နားလည် လက်ခံနေပါစေလေ။

လောကကောင်းကျိုးအတွက် သွားကြရာမှာ…
ကိုယ်မပါချင်ရင် ဘေးကပ်နေခဲ့သင့်ပြီး
သွားချင်ကြသူတွေကိုတော့ တွန်းတင်၊ လက်ခုပ်တီးပေးရတော့မယ့် အခြေနေမျိုးပါ။

Hanko Htet

21 days later

25/02/2026

မိတ်ဆွေကောင်းရယ်လို့ လူတွေသတ်မှတ်လိုက်ရင် “ငွေကြေးပေါများသူမျိုး” “ကိုယ်အဆင်မပြေချိန််မှာ ငွေကြေးထောက်ပံ့ကူညီတတ်သူမျိုး” လောက်ကိုသာ တွေးတတ် သတ်မှတ်တတ်ကြတယ်။ မိတ်ဆွေကောင်းဟာ ငွေကြေးအပေါ်မှာသာမူတည်တယ်လို့ သဘောသက်ရောက်နေတတ်တယ်။

ငွေကြေးအပြင် မိတ်ဆွေကောင်းတစ်ယောက်ဟာ ဘယ်လိုအရည်အချင်းတွေရှိနေနိုင်မလဲ….ဆိုတာကို ဗုဒ္ဓအယူဝါဒနဲ့ တွေးကြည့်ကြရအောင်…..

၁။ လုံခြုံမှုပေးနိုင်ခြင်း (အဘယဒါန နှင့် မေတ္တာ)
မိတ်ဆွေကောင်းရဲ့ အနားမှာနေရင် စိတ်လုံခြုံရတယ်ဆိုတာ ဗုဒ္ဓဟောကြားတဲ့ "အဘယဒါန" (ဘေးကင်းလုံခြုံခွင့်ကို ပေးလှူခြင်း) နဲ့ အတူတူပါပဲ။ သူတို့ရဲ့ ရင်တွင်းကလာတဲ့ မေတ္တာတရားကြောင့် သူတို့အနီးအနားမှာရှိတဲ့သူတွေပါ အပူအပင်ကင်းပြီး အေးချမ်းလုံခြုံမှုကို ခံစားရတာ ဖြစ်ပါတယ်။

၂။ မှန်ကန်သော လမ်းပြဖြစ်ခြင်း (ကလျာဏမိတ္တ နှင့် အတ္ထက္ခာယီ)
လမ်းမှားမရောက်အောင် တားဆီးပေးတာဟာ ဗုဒ္ဓလမ်းညွှန်ခဲ့တဲ့ "ကလျာဏမိတ္တ" (မိတ်ကောင်းဆွေကောင်း) အစစ်အမှန်ပါပဲ။ အထူးသဖြင့် “အတ္ထက္ခာယီ” မိတ်ဆွေတွေရဲ့ အဓိကတာဝန်ကို ကျေပွန်သူတွေပါ။ ကိုယ်ကျိုးမငဲ့ဘဲ မှန်ကန်တဲ့လမ်းကို ရဲရဲဝံ့ဝံ့ ညွှန်ပြပေးတာ ဖြစ်ပါတယ်။

၃။ စိတ်ဓာတ်ခွန်အားဖြစ်စေခြင်း (ကရုဏာ နှင့် မုဒိတာ)
သူတို့ဆီကနေ ခွန်အားတွေရလာတယ်ဆိုတာ သူတို့သန္တာန်မှာ ဗြဟ္မစိုရ်တရား ကိန်းဝပ်နေလို့ပါ။ ကိုယ် လဲကျနေချိန်မှာ "ကရုဏာ" (သနားကြင်နာစိတ်) နဲ့ ဖေးမပေးသလို၊ ကိုယ် အဆင်ပြေနေချိန်မှာလည်း "မုဒိတာ" (ထပ်တူဝမ်းမြောက်ပေးခြင်း) နဲ့ အားဖြည့်ပေးတဲ့အတွက် ဘဝအမောတွေ ပြေပျောက်စေတာပါ။

၄။ ကူးစက်တတ်သော တိုးတက်မှု
သီလပြည့်စုံတဲ့ မိတ်ဆွေကောင်းတစ်ယောက်ထံမှ သူတို့ရဲ့ ကောင်းမွန်တဲ့ စိတ်ထားနဲ့ အကျင့်စာရိတ္တတွေ ကိုယ့်ဆီ ကူးစက်လာတာဟာ လက်တွေ့ အကျိုးကျေးဇူးပါပဲ။ ဒီလိုမိတ်ဆွေကောင်းရှိခြင်းဟာ မိမိကိုယ်တိုင်လည်း သီလ၊ စာရိတ္တနဲ့ အသိပညာတွေ အလိုလို မြင့်မားတိုးတက်လာစေတာ ဖြစ်ပါတယ်။

ဒီလိုချိတ်ဆက်ကြည့်လိုက်တော့ မိတ်ဆွေကောင်းဆိုတာ ငွေကြေးထက် အများကြီးပိုမြင့်မြတ်တဲ့ အရာတွေနဲ့ တည်ဆောက်ထားတယ်ဆိုတာ ပိုပြီး ပေါ်လွင်လာတာပါ။

မိတ်ဆွေကောင်းတစ်ယောက်ကို ဘယ်လိုရှာရမလဲ အကျဉ်းချုပ်သာ ပြောပါဆိုရင် “ကိုယ်ကျင့်သီလ ပြည့်စုံသူ”ကိုသာ ညွှန်ပြရမှာပါ။

အဲ့တော့ကိုယ့်ပတ်ဝန်းကျင် ကိုယ့်မိတ်ဆွေတွေထဲမှာ ဒီလိုအချက်တွေနဲ့ပြည့်စုံသူရှိခဲ့ရင် ကိုယ်ကျင့်သီလကိုတန်ဖိုးထားသူတွေ့ခဲ့ရင် တန်ဖိုးမမေ့ဖို့ အတွက် မိတ်ဆွေကောင်းရဲ့တန်ဖိုးကိုမီးမောင်းထိုးပြလိုက်ပါတယ်ခင်ဗျာ။

အေးချမ်းကြပါစေ ❤️

Hanko Htet
21 days later

30/01/2026

ကျွန်တော်အပါအဝင် ဗုဒ္ဓစာပေလေ့လာသူ တော်တော်များများမှာ တူညီတဲ့အချက်တစ်ခု ရှိနေတတ်ကြတယ်။ အဲ့ဒါကတော့ "ရေကူးနည်းစာအုပ်ကို ဖတ်ပြီး ရေကူးမလေ့ကျင့်ဘဲ ရေကူးတတ်ချင်နေကြတာ" ပါပဲ။
"ဟာ... ဒီရေကူးနည်းစာအုပ်ထဲက နည်းလမ်းတွေက သိပ်မှန်တာပဲ၊ သိပ်အဓိပ္ပာယ်ရှိတာပဲ" လို့သာ ပါးစပ်ကပြောနေကြပေမယ့် တကယ့်လက်တွေ့ ရေထဲဆင်းပြီး၊ ရေမွန်းခံပြီး ကျင့်ကြံအားထုတ်တဲ့သူကတော့ ခပ်ရှားရှားပါ။

ဗုဒ္ဓတရားတော်မှာ "ပရိယတ္တိ" (စာပေသင်ကြားခြင်း) ဆိုတာ "မြေပုံ" နဲ့ တူပြီး၊ "ပဋိပတ္တိ" (လက်တွေ့ကျင့်ကြံခြင်း) ဆိုတာ "လမ်းလျှောက်ခြင်း" နဲ့ တူပါတယ်။ ကျွန်တော်တို့အများစုက မြေပုံကိုကျွမ်းကျင်အောင်ကြည့်ပြီး ခရီးရောက်ပြီလို့ ထင်နေတတ်ကြတယ်။ တကယ်တော့ မြေပုံမှန်ဖို့လည်း လိုသလို၊ ကိုယ်တိုင်လမ်းလျှောက်ဖို့လည်း လိုအပ်ပါတယ်။

အခြားသူတွေအကြောင်း ပြောရင် အတင်းအဖျင်း ဖြစ်သွားနိုင်တာမို့ ကျွန်တော့်အကြောင်းပဲ ပြောကြပါစို့။ ဗုဒ္ဓဘာသာဝင်တွေရဲ့ပန်းတိုင်ဟာ နိဗ္ဗာန်ဆိုတာ ဟုတ်ပါရဲ့။
ကျွန်တော် တစ်ရက်ကို ကမ္မဋ္ဌာန်းတရား၊ ဝိပဿနာတရား အားထုတ်ဖို့အတွက် ၁ နာရီဝန်းကျင် သုံးကြိမ်လောက် (တစ်နေ့ ၃ နာရီခန့်) အချိန်ပေးပြီး အားထုတ်ပါတယ်။ "ဒီလောက်ကြိုးစားနေတာ နိဗ္ဗာန်ရဖို့ လုံလောက်ပြီလား" လို့ မေးခဲ့ရင် မလုံလောက်သေးမှန်း အတော်များများလည်းသိကြပါတယ်။ ဒီလိုအားမထုတ်ဖြစ်ရင်တောင် နေ့စဉ် “အပမာဒ”ဆိုတဲ့ သတိကိုလည်း အစဉ်မတည်ဆောက်နိုင်ပြန်ပါဘူး။ တည်ဆောက်ဖို့ကြိုးစားရာမှာလည်းပဲ အားနည်းနေပြန်ပါတယ်။

ရေလမ်းခရီးကို သွားမယ့်သူ၊ ရေကူးတတ်ဖို့ တကယ်လိုအပ်နေသူဟာ ရေကုန်ရေခမ်း ရေကူးကျင့်ရတော့မှာ ဖြစ်သလို၊ နိဗ္ဗာန်ကို တကယ်လိုချင်ရင်လည်း ရေကုန်ရေခမ်း အားထုတ်မှ ရနိုင်မှာပါ။ မြေပုံကြည့်ရုံနဲ့ ခရီးမပေါက်ပါဘူး။

ဒါပေမဲ့ ဒီနေရာမှာ သတိထားစရာသိပ်ကောင်းတာ တစ်ခုက
ကျွန်တော်အပါအဝင် အတော်များများက ဗုဒ္ဓစာပေလေးလေ့လာ၊ အတော်အသင့်လေး သိပြီ၊ တတ်ပြီ၊ တရားလေး ပုံမှန်ထိုင်ဖြစ်ပြီ ဆိုရင်ဖြင့် နိဗ္ဗာန်ပဲ ရောက်တော့မလိုလို၊ ကိုယ်ကပဲ လူတော်ကြီးလိုလို၊ အခြားသူတွေကပဲ မကောင်းသလိုလိုတွေ တွေးမိလာတတ်ကြတယ်။
"ဪ... ငါကတော့ တစ်နေ့ ၃ နာရီတောင် တရားထိုင်တာ၊ သူတို့ကတော့ ဘာမှမလုပ်ပါလား" ဆိုတဲ့ အတွေးမျိုးပေါ့။ တကယ်တော့ ဒါဟာ "မာန" ပါပဲ။ အတ္တကိုဖြုတ်ဖို့ တရားအားထုတ်ကာမှ "ငါ" ဆိုတဲ့ အကောင်က ပိုကြီးလာတတ်ပါတယ်။

ဒါကြောင့် ကိုယ့်ကိုယ်ကိုယ် ပြန်သတိပေးချင်တာက -
မြေပုံ (စာပေ) ကလည်း လမ်းမှန်သိဖို့ အရေးကြီးတယ်။ လမ်းလျှောက်ခြင်း (ကျင့်ကြံခြင်း) ကလည်း ခရီးရောက်ဖို့ အရေးကြီးတယ်။ ဒီနှစ်ခုကို မျှတအောင် လုပ်ရင်း၊ "ငါသာ အတော်ဆုံး" ဆိုတဲ့ စိတ်ကိုပါ သတိထားပြီး လျှော့ချနိုင်မှသာ ရေကူးတတ်တဲ့သူ၊ ခရီးရောက်တဲ့သူ စစ်စစ် ဖြစ်လာမှာပါ။

ခင်ဗျားတို့ရော... ရေကူးနည်းစာအုပ် ဖတ်ပြီး ရေကူးတတ်ပြီလို့ ထင်နေမိပြီလား၊
ဒါမှမဟုတ် တကယ်ပဲ ရေထဲဆင်းပြီး ကျင့်ကြံနေပြီလား...။
ဒါမှမဟုတ် ရေကူးနည်းစာအုပ်တောင် မဖတ်၊ မလေ့လာသေးပဲ လူတွေအပေါ် ဝေဖန်လို့ကောင်းနေတုန်းလား…။

Hanko Htet

25/01/2026

ဒီနေ့မနက်ထပြေးရင်း အတွေးတွေတွေးနေမိတာ ဘယ်လိုကနေဘယ်လို အဲ့အကြောင်းတွေးမိသွားတယ် မပြောတတ်ပါဘူး။

ငါ့ဘဝမှာ “ငါကြည့်လို့မရတဲ့သူ၊ ငါမုန်းတဲ့သူ” ရယ်လို့လည်း လောက်လောက်လား ရှိမနေပါလား ရယ်လို့ပါ။ ကိုယ့်ကိုယ်ကိုယ်တောင် အံ့ဩသွားလို့ စိတ်ထဲမှာပဲ ပြန်မေးကြည့်ပြန်တယ်။ “ဟုတ်ရဲ့လား။ ဟန်ကိုထက်ရာ။ သေချာစဉ်းစားကြည့်စမ်းပါအုန်း။ မင်းကြည့်မရတဲ့သူ၊ မင်းမုန်းနေတဲ့သူ၊ ဒါမျိုးတွေမတွေ့ရင်တောင် မင်းကိုဘယ်သူတွေမုန်းနေလောက်လဲ၊ တွေးကြည့်စမ်းပါအုန်း” တဲ့။
ဘယ်လောက်တောင် ထူးဆန်းလိုက်လဲနော်…

ကိုယ့်ကိုယ်ကိုယ် ပြန်ဖြေပြန်တယ်။ “ငါ့ကိုမုန်းနေလို့ကော ဘာအရေးလဲကွာ။ ငါကတော့ မုန်းမနေချင်တော့ပါဘူး။ ဘဝလေးကတိုတိုလေးပဲမဟုတ်လား။ ငါလည်းဘယ်သူ့ကိုမှမုန်းမနေပါဘူးကွာ၊ တကယ်ပြောတာပါ။” လို့တောင် ပြန်ဖြေမိပြန်တယ်။

အတွေးထဲမှာတင် ကိုယ်တယောက်တည်း ခုလို မေးလိုက်ဖြေလိုက်လုပ်ပြီးတော့ ပြုံးပြုံးကြီးပြေးလာလိုက်တာ ပင်ပန်းနွမ်းနယ်နေတဲ့ ကျနော့်ခြေထောက်တွေ သာ၍တောင် ပေါ့ပေါ့ပါးပါးဖြစ်လာသလိုပဲ။

အေးချမ်းလိုက်တာ။

တိုးထိလာတဲ့ လေလေးတွေတောင် တစ်ခုချင်းစီခွဲပြီးသိနေမိတဲ့ အရသာမျိုးလေး…….❤️

Hanko Htet
21 days later
21 days later

20/10/2025

ကျနော့်သားအကြီးကောင်လေး ဖန်တီးထားတဲ့ နင်ဂျာပုံဂျုံရုပ်လေးကို အငယ်ကောင်လေးက လုံးချေဖျက်ဆီးပစ်လိုက်လို့ အကြီးကောင်လေးဟာ ဝမ်းနည်းဒေါသတွေထွက်ပြီး သူ့ညီရဲ့အရုပ်တွေကိုအကုန်ပြန်ဖျက်ဆီးပစ်မယ် ထလုပ်တယ်။

ကျနော်က “သားကြီး၊ မင်းခံစားချက်ကို ဖေဖေနားလည်တယ်။ ညီလေးမှားတာမို့ ညီလေးကိုဖေဖေ ဆုံးမမယ်။ နားလည်အောင်ပြောပြပေးမယ့် ဖေဖေရှိတယ်။ ဒါပေမယ့် သားအရုပ်ကို ညီလေးကဖျက်ဆီးလိုက်လို့ သားကညီလေးအရုပ်တွေကို ပြန်ဖျက်ဆီးမယ်ဆိုတာမျိုးက မျှတတယ်လို့ သားယူဆတာလား” ဆိုတော့

“ဟုတ်တယ်။ ဒါမှ fair ဖြစ်မယ်။ တရားမျှတမယ်။ ဒီလိုလုပ်ရမှသားကျေနပ်မယ်” လို့ သူပြန်ပြောတယ်။

တရားမျှတမှုဆိုတဲ့ အဓိပ္ပါယ်အပေါ် သူယုံကြည်ထားပုံ၊ ကိုယ်ခံရသလို အခြားသူလည်းပြန်ခံရမှ၊ သူလုပ်ခဲ့သလို ကိုယ်ပြန်လုပ်ရမှ တရားမျှတမယ်ဆိုတဲ့ thinking မျိုး စိတ်ကျေနပ်မှုရနိုင်မယ်ဆိုတဲ့ ခံစားချက်မျိုးတွေဟာ ကျနော့်သားတွေခေါင်းထဲမဝင်အောင် ကြိုးစားတည်ဆောက်မယ်လို့ တွေးထားမိခဲ့ပေမယ့် ခုတော့ ပတ်ဝန်းကျင်ရဲ့ မှားယွင်းတဲ့အယူအဆတွေဟာ ကျနော်မသိလိုက်ခင်မှာပဲ ကျနော့်သားတွေရဲ့ ဦးနှောက်တွေထဲမှာ အရှိန်အဟုန်ပြင်းပြင်း၊ အစီစဉ်တကျကိုပဲ စီးဆင်းဝင်ရောက်နေရာယူထားပြီးဖြစ်နေကြပြီ။

(ဒါနဲ့အတူ ကလေးတွေကိုဆုံးမ၊ ပဲ့ပြင်ရာမှာ ဘယ်တော့မှစောတယ်ဆိုတာ မရှိမှန်းလည်း ကောင်းကောင်းနားလည်၊သဘောပေါက်သွားခဲ့တယ်။)

"အခု သားရဲ့ ဂျုံရုပ်လေးတစ်ရုပ် ပျက်စီးသွားပြီ။ သားက ညီလေးအရုပ်ကို ပြန်ဖျက်လိုက်ရင် အိမ်မှာ ပျက်စီးသွားတဲ့ အရုပ်က နှစ်ရုပ် ဖြစ်သွားမယ်။ ဝမ်းနည်းနေတဲ့ ကလေးက နှစ်ယောက် ဖြစ်သွားမယ်။ ဖေဖေတို့မိသားစုက အပျက်အစီးတွေ၊ ဝမ်းနည်းမှုတွေကို ပိုများအောင် လုပ်မှာလား၊ ဒါမှမဟုတ် ဖြစ်ပြီးသွားတဲ့ အပျက်အစီးတစ်ခုကို ဘယ်လိုပြန်ပြင်ကြမလဲဆိုတာကို အတူတူစဉ်းစားကြမလား။"

"တရားမျှတမှုဆိုတာ ကိုယ်နာကျင်ရသလို သူများနာကျင်အောင် ပြန်လုပ်တာကို မခေါ်ဘူး သားကြီး။ တရားမျှတမှုအစစ်အမှန်ဆိုတာ အမှားလုပ်တဲ့သူက သူ့အမှားကိုနားလည်ပြီး၊ သူဖျက်ဆီးခဲ့တဲ့အရာကို ပြန်လည်ပြုပြင်ပေးဖို့ ကြိုးစားတာကိုခေါ်တယ်။"

"ကဲ၊ ညီလေးကလည်း၊ သားသားက ကိုကိုကြီးရဲ့ ဂျုံရုပ်လေးကို ဖျက်ဆီးလိုက်တော့ ကိုကိုကြီးဘယ်လောက်ဝမ်းနည်းသွားလဲ ကြည့်လိုက်။ သားအရုပ်ကို အဲ့လိုလုပ်ရင် သားသားဘယ်လိုခံစားရမလဲ။ အခု ကိုကိုကြီးကို 'တောင်းပန်ပါတယ်' လို့ပြောပြီး နောက်တစ်ခါ ကိုကိုကြီးအရုပ်လုပ်တဲ့အခါ ပြန်ကူညီပေးရမယ်နော်။"

တကယ့်ရင့်ကျက်ပြီး အကျိုးရှိတဲ့ တရားမျှတမှုဆိုတာ လက်စားချေခြင်းအပေါ်မှာ အခြေမခံပဲ "ပြန်လည်ပြုပြင်ခြင်းနှင့် နားလည်မှု တည်ဆောက်ခြင်း" ဆိုတာမျိုးတွေအပေါ်မှာပဲ အခြေခံပါတယ်။

Hanko Htet

21 days later

20/10/2025

ခုတလော ကိုယ့်ကိုယ်ကိုယ်ရှာဖွေလေ့လာနေရတာကို ကျနော်တော့ သိပ်သဘောကျ၊ အရသာသိပ်တွေ့နေတယ်။ ဒါ့ကြောင့်လို့ပဲ ပြောရမလား။ ကျနော်အခြားလူတွေအပေါ် ဝေဖန်နေရတာမျိုးမဆိုထားနဲ့။ အခြားသူတွေအပေါ် အာရုံကိုရောက်မနေဘူးလို့ အဓိပ္ပါယ်ကောက်မယ်ဆိုရင် ရနိုင်တယ်။ ဒီစိတ်လေးကိုလည်း ကျနော့်ကိုယ်ကျနော်စောင့်ကြည့်ရင်းပြန်တွေ့မိသွားလို့ ဒီအကြောင်းနဲ့ပတ်သတ်ပြီး တွေးမိတာလေးရှိပါတယ်။

လူငယ်လူကြီးမရွေး၊ ကိုယ့်ဘဝရဲ့ အဓိပ္ပါယ် ဒါမှမဟုတ် ကိုယ်ပိုင်တန်ဖိုးကို ရှာဖွေဖို့ထက်၊ သူတစ်ပါးကို "ဒါကတော့ ဒီလိုဖြစ်သင့်တယ်"၊ "သူကတော့ ဒီလိုလူပဲ"၊ "ဒီလိုလုပ်တာ မှားတယ်/မှန်တယ်" ဆိုပြီး အဓိပ္ပါယ်သတ်မှတ်ပေးဖို့၊ တံဆိပ်ကပ်ဖို့ ပိုပြီးအားသန်နေကြတာကို အတော်လေးတွေ့နေရတယ်။

ဒါဟာ ဘာကြောင့်ဖြစ်နေရလဲဆိုတာကို တို့တွေအတူတူစဉ်းစားကြည့်ကြရအောင်။

အဓိကအကြောင်းရင်းကတော့ "ကိုယ့်ကိုယ်ကိုယ် ရှာဖွေခြင်း" ဟာ "သူတစ်ပါးကို ဝေဖန်ပြီး တန်ဖိုးသတ်မှတ်ခြင်း" ထက် ပိုခက်ခဲနေလို့ပါ။

လူတစ်ယောက်အတွက် အခက်ခဲဆုံးအလုပ်ဟာ ကိုယ့်အတွင်းစိတ်ကို ရိုးရိုးသားသား ရင်ဆိုင်ကြည့်ရတာပါပဲ။
- ကိုယ့်ကိုယ်ကိုယ် ရှာဖွေခြင်း (Self-Discovery) ဟာဘယ်လိုမျိုးလဲ? "ငါ တကယ် ဘာဖြစ်ချင်တာလဲ?"၊ "ငါ့ဘဝရဲ့ ရည်ရွယ်ချက်က ဘာလဲ?"၊ "ငါ့ရဲ့ အားနည်းချက်တွေက ဘာလဲ?" စတဲ့ မေးခွန်းတွေရဲ့ အဖြေကို ကိုယ်တိုင် ရှာရပါတယ်။ ဒီအလုပ်ဟာ အချိန်ယူရတယ်၊ စိတ်ပင်ပန်းတယ်၊ တစ်ခါတလေ ကိုယ်မမြင်ချင်တဲ့ ကိုယ့်ရဲ့ အားနည်းချက်တွေကို မြင်ရလို့ နာကျင်ရပါတယ်။
-သူတစ်ပါးကို သတ်မှတ်ခြင်း (Judging Others): ဆိုတာမျိုးကတော့ အလွန့်အလွန်ကိုမှပဲ လွယ်ကူမြန်ဆန်တဲ့ အလုပ်ပါ။ သူများရဲ့ အပြင်ပန်း အပြုအမူ၊ အပြောအဆို၊ အဝတ်အစားကို ကြည့်ပြီး "သူကတော့ ဒီလိုလူပဲ" လို့ ကောက်ချက်ချလိုက်ရုံပါပဲ။ ဒါဟာ ကိုယ့်ကိုယ်ကိုယ် "ငါက ပိုသိတယ်၊ ပိုမှန်တယ်၊ ပိုတော်တယ်" ဆိုတဲ့ ခံစားချက်ကို ယာယီအားဖြင့်လည်း ပေးစွမ်းနိုင်ပါသေးတယ်။ ဘယ်လောက်မိုက်ထည့်လိုက်လဲ….?

ဒါကြောင့် လူတွေဟာ ခက်ခဲပြီး နာကျင်ရမယ့် အတွင်းစိတ်ကိုစောင့်ကြည့်၊ ရှာဖွေရမယ့် ခရီးရှည်ကို မလျှောက်ချင်ဘဲ၊ လွယ်ကူပြီး ကိုယ့်အတ္တ (Ego) ကို ကျေနပ်စေမယ့် အပြင်ဘက်က ဝေဖန်သတ်မှတ်မှုတွေကိုပဲ လွယ်လွယ်ကူကူ အရသာခံပြီးလုပ်နေမိကြတာမျိုးပါ။

Hanko Htet
21 days later

အခြားအချက်တွေကိုလည်း နောက် post တွေမှာ တို့တွေဆက်ဆွေးနွေးကြည့်ကြပါမယ်။

20/10/2025

မကောင်းနေတာကို မကောင်းမှန်းတော့သိနိုင်ပါတယ်။
ဒါပေမယ့် ဒီမကောင်းတာတွေကို ဘယ်လိုမြင်လဲဆိုရင် ဘယ်လိုမှမမြင်မိဘူး။

ဘာလို့ဆို ကောင်းတာတွေအများကြီးရှိနေရက် မကောင်းတာပဲ အာရုံစိုက်မိတယ်ဆိုတာ သာမာန်ပဲ မဟုတ်လား။

ဒီသာမာန်အခြေနေကိုကြိုးစားကျော်နိုင်ပြီဆိုရင် သာမာန်လူတွေလို စိတ်ညစ်နေရတော့မှာ မဟုတ်ဘူး။

ဥပမာ- ကိုယ့်ပတ်ဝန်းကျင်မှာ မကောင်းတဲ့သံဃာတွေရှိနေတာ မှန်တယ်။ ဒါပေမယ့် ကောင်းမွန်စွာကျင့်ကြံအားထုတ်နေသူ ရဟန်းသံဃာတွေဟာလည်း လောကမှာ အများသားပဲမဟုတ်လား။

များနေတဲ့၊ ကောင်းတဲ့အရာအပေါ်အာရုံပိုစိုက်လိုက်မိရင် ကိုယ်လည်းစိတ်ချမ်းသာရတယ်။ မကောင်းတဲ့သူတွေအပေါ်လည်း ဂရုဏာသက်လာနိုင်တယ်။ မကောင်းတဲ့သူတွေကို ဆဲဆိုနေဖို့ဆိုတာ သာလို့ဝေးရောပေါ့။

ဘယ်လောက်တောင်အေးချမ်းသွားလဲ……!

ကောင်းတာလေးတွေပဲ ရွေးတွေးပြီး နေထိုင်တတ်ခြင်းကလည်း အကျင့်တစ်ခုလို တည်ဆောက်ယူရတာမျိုးပါ။ ဘယ်သူ့အတွက်မှကြိုးစားနေရတဲ့အကျင့်မျိုးမဟုတ်ပဲ…..

ကိုယ်ကိုယ်တိုင်အေးချမ်းနေဖို့အတွက်ပဲလေ။

Hanko Htet
21 days later

10/10/2025

လူငယ်တွေတကယ်လိုအပ်နေတာ “မင်းရဲ့လုပ်ရပ်ဟာ မှန်တယ်၊မှားတယ်” ဆိုတဲ့ ဝေဖန်မှု၊ ဘက်လိုက်မှုတွေပါတဲ့ ပဲ့ပြင်၊ ဆုံးမမှုတွေမဟုတ်ဘူး ဆိုတာ ဒီလိုစိတ္တဆန်ဆန်လုပ်ရပ်က သက်သေပြသွားခဲ့ပါပြီ။

သူတို့တကယ်လိုအပ်နေတာ “မေတ္တာကိုအခြေခံတဲ့ နားလည်ပေးနိုင်မှု”ဆိုတဲ့ ရှားပါးပြီး တန်ဖိုးကြီးမားတဲ့စွမ်းအားပါ။

ပြုပြင်ပြောင်းလဲလို့မရတော့ပဲ လွန်သွားပြီးတဲ့အဖြစ်အပျက်တစ်ခုကို ဝေဖန်ရင်း သူတို့မိသားစုတွေအပေါ်ပါထိုးနှက်၊ ထပ်ထပ်ဆင့်ပြီး ခေါင်းဖော်မလာနိုင်တော့လောက်အောင် အပြစ်ပေးနေမယ့်အစား……
ထွက်ပေါက်ပိတ်ပြီး တွင်းနက်ထဲရောက်နေတဲ့ လူငယ်တွေကို သူတို့နဲ့ထိုက်သင့်တဲ့ ပြစ်ဒဏ်တစ်ခုခံယူပြီးရင် နားလည်မှု လက်အစုံနဲ့ဆွဲထူပေးရမှာပါ။

ဒီလိုပြောလို့ လုပ်ရပ်ပြစ်မှုတွေကို လက်ခံပြီး အားပေး၊ အားမြှောက်ပြုပေးလိုက်ဖို့ ပြောနေတာမဟုတ်ပါဘူး။ လက်ခံအားပေးခြင်းနဲ့ နားလည်ပေးခြင်းဟာ အဓိပ္ပါယ်မတူပါဘူး။
ဒီလိုပြစ်မှုကိုတောင်ပြုစေနိုင်လောက်တဲ့ လူငယ်တွေရင်ဆိုင်နေခဲ့ရတဲ့ အကြောင်းအရာတွေကို နားလည် အဖြေရှာပေးဖို့ တိုက်တွန်းနေတာပါ။

ဒီအမှားတွေကို ပြုလုပ်ခဲ့တဲ့သူတွေဟာ စက်ရုပ်တစ်ရုပ်မဟုတ်ဘူး။ တိရိစ္ဆာန်တစ်ကောင်မဟုတ်ဘူး ဆိုတာကို သတိထားမိစေချင်တာပါ။

ဘယ်သူမှလူယုတ်မာမဖြစ်ချင်ပါဘူး။ အခြေနေ၊အချိန်ခါတွေအပြင် ဖြတ်သန်းခဲ့ရတဲ့ အကြောင်းအရာအမျိုးမျိုးတွေကြောင့် လမ်းမှားရောက်သွားရတဲ့ လူငယ်တွေပါ။

သူတို့ရဲ့လမ်းကြောင်းကို မေတ္တာနဲ့ ပြန်ပြီးမတည့်မတ်ပေးဘူးဆိုရင် သူတို့ဘဝတွေအပြင် ဘေးပတ်ဝန်းကျင်ကလူတွေရဲ့ဘဝတွေကကော ပိုကောင်းလာနိုင်မယ်လို့ မျှော်လင့်လို့ရနိုင်ပါ့မလား။

ပိုကောင်းပြီးလှပတဲ့ လူမှုပတ်ဝန်းကျင်လေးတစ်ခုဟာ အတူတူတည်ဆောက်ကြမှပဲ ရနိုင်မှာပါ။

Hanko Htet

21 days later

07/10/2025

ပြဿနာ

ပြဿနာဆိုတာဘာလဲ။

ပြဿနာဆိုတာ အကုသိုလ်ရဲ့ နာမည်တစ်မျိုးပဲလို့ ပြောလို့ရတယ်။ အကုသိုလ်ဖြစ်ရင် ပြဿနာဟာဖြစ်တော့တာပဲ။ အကုသိုလ်ပိုကြီးရင် ပြဿနာပိုကြီးတယ်။

ပြဿနာဆိုတာ အကုသိုလ်ဆိုတော့ ကျနော်တို့လို သာမန်လူတွေရဲ့လောကကြီးမှာ ပြဿနာတွေကတော့ ရှိနေတာပဲ။ ပြဿနာကြီးတာနဲ့ သေးတာ။ နည်းတာနဲ့ များတာ။ အဆင့်မြင့်တာနဲ့ အဆင့်နိမ့်တာပဲကွာတယ်။

ကျနော်တို့က အကုသိုလ်နဲ့ပျော်တာဆိုတော့ ပြဿနာနဲ့ပျော်တာလို့ ပြောလို့ရတယ်။ အကုသိုလ်မဖြစ်ဘဲ မနေနိုင်သလို ပြဿနာမဖြစ်ဘဲလည်း မနေနိုင်ဘူး။ ကိုယ့်မှာ ပြဿနာကြီးကြီးမားမားမရှိဘူးဆိုရင် အခြားက ပြဿနာတွေကို လိုက်ရှာပြီး လိုက်ကြည့်တယ်၊ လိုက်နားထောင်တယ်၊ ပြန်ပြောတယ်၊ အကူးစက်ခံတယ်။

ကိုယ့်မှာအပူမရှိဘူးဆိုရင် သူများရဲ့အပူကို အငှားယူတယ်။ မနက်မိုးလင်းတာနဲ့ မကောင်းတဲ့သတင်းကိုအရင်လိုက်ရှာတယ်။ မကောင်းတဲ့သတင်းကို နားထောင်တယ်။ ပြန်ပြောတယ်၊ အကူးစက်ခံတယ်။ ဒါက သာမန်လူတွေအများစုရဲ့အလုပ်ပဲ။ ပြဿနာတွေကြားထဲမှာပဲ ပျော်နေကြတာ၊ နေသားကျနေကြတာ။

အဲ…..ဒါပေမယ့်လို့…..ပြစ်ဒဏ်ကျမယ့် ပြဿနာမျိုး အများအပြစ်တင်ခံရမယ့် ပြဿနာမျိုးတွေကိုတော့ ကြောက်ကြပြန်တယ်။ ကျနော်တို့က သာမန်ပြဿနာမျိုးတွေဆိုရင်တော့ ခံတွင်းတွေ့နေကြတယ်။ အရသာဖြစ်နေကြတယ်။ အမြဲတမ်းဖြစ်၊ နေ့စဉ်ဖြစ်နေတာဆိုတော့ ပြဿနာလို့တောင် သိပ်မထင်ချင်ကြတော့ဘူး။

ဒီတော့ ပြဿနာနည်းချင်တယ်ဆိုရင် ပြဿနာကို ခံတွင်းတွေ့နေတဲ့ ကျနော်တို့ရဲ့စိတ်တွေကို အရင်ပြင်ဖို့လိုအပ်တယ်။ ဆိုတာ အထင်းသားကိုပဲပေါ်လွင်နေပါတယ်။

Hanko Htet
21 days later

01/10/2025

"ကိုယ်သေချာမသိတဲ့အရာတစ်ခုကို အပေါ်ယံကြည့်ပြီး ဝေဖန်ဆုံးဖြတ်ခြင်းဟာ ဘယ်လောက်တောင် သေးသိမ်ပြီး မှားယွင်းတဲ့ လုပ်ရပ်လဲ" ဆိုတာကို ပေါ်လွင်တဲ့ ဥပမာတစ်ခုကျနော်ပြောပြပါမယ်။

ဒီမြင်ကွင်းကို စိတ်ထဲမှာ မြင်ယောင်ကြည့်ပါ...
ခင်ဗျားဟာ Supermarket တစ်ခုမှာ ပစ္စည်းဝယ်နေပါတယ်။ အဲ့ဒီအချိန်မှာ ကလေးတစ်ယောက်က သူလိုချင်တဲ့အရုပ်ကိုမရလို့ ကြမ်းပြင်ပေါ်မှာလူးလှိမ့်ပြီး အကျယ်လောင်ဆုံးအသံနဲ့ အော်ဟစ်ငိုယိုနေမယ်။ သူ့ရဲ့မိခင်ကလည်း သူ့ကို ချော့မော့ထိန်းသိမ်းဖို့ ကြိုးစားနေပေမယ့် ကလေးက ပိုဆိုးပြီးသာနေခဲ့ပါတယ်။

အပေါ်ယံ ဝေဖန်သုံးသပ်မှု (The Superficial Judgment)
• "ဒီကလေး တော်တော်ဆိုးတာပဲ၊ မိဘကလည်း မဆုံးမဘူး။"
• "ကလေးတစ်ယောက်ကို ဒီလောက်တောင်မထိန်းနိုင်ဘူးလား။ ငါသာဆိုရင်တော့..."
• "အခုခေတ်မိဘတွေ ကလေးကို အလိုလိုက်လွန်းလို့ ဒီလိုဖြစ်နေတာ။"
• "ဘယ်လိုဟာတွေလဲ လူကြားထဲမှာ အရှက်မရှိဘူး။" စသော စသော များ

ဒီအတွေးတွေအားလုံးဟာ စက္ကန့်ပိုင်းအတွင်းမှာ၊ အခြေအနေမှန်ကို လုံးဝမသိဘဲ ကောက်ချက်ချလိုက်တဲ့ "သေးသိမ်တဲ့" ဝေဖန်မှုမျိုးတွေပါ။

မျက်စိဖြင့်မမြင်နိုင်သော နောက်ကွယ်ကအဖြစ်မှန် (The Unseen Reality)
•ဒီကလေးဟာ Autism Spectrum Disorder (ASD) ဒါမှမဟုတ် Sensory Processing Disorder လို့ခေါ်တဲ့ အာရုံခံစားမှုဆိုင်ရာ ပြဿနာတစ်ခုခု ရှိနေနိုင်ပါတယ်။ Supermarket ရဲ့ စူးရှတဲ့မီးရောင်တွေ၊ ကျယ်လောင်တဲ့အသံတွေ၊ လူတွေရဲ့လှုပ်ရှားမှုတွေက သူ့ရဲ့အာရုံကြောစနစ်ကို ဝန်ပိစေပြီး ထိန်းချုပ်မရအောင် ဖြစ်သွားတာမျိုးပါ။
•ကလေးက နေမကောင်းဖြစ်နေတာ၊ ဖျားချင်နေတာ၊ ဒါမှမဟုတ် ဗိုက်အောင့်နေတာမျိုးဖြစ်နိုင်ပါတယ်။ သူခံစားနေရတဲ့ ဝေဒနာကို စကားနဲ့ သေချာမပြောပြတတ်သေးတဲ့အတွက် ငိုယိုပြီး သူ့ရဲ့မသက်မသာဖြစ်မှုကို ဖော်ပြနေတာမျိုးပါ။
•ကလေးရဲ့မိဘဟာ ညတိုင်း ကောင်းကောင်းမအိပ်ရဘဲ အလွန်အမင်းပင်ပန်းနွမ်းနယ်နေချိန် ဖြစ်နိုင်ပါတယ်။ ဒါမှမဟုတ် သူကိုယ်တိုင်လည်း စိတ်ဖိစီးမှုတွေ၊ ကိုယ်ရေးကိုယ်တာပြဿနာတွေနဲ့ ရင်ဆိုင်နေရချိန် ဖြစ်နိုင်ပါတယ်။

ဒီအဖြစ်မှန်တွေကိုသာ သိခွင့်ရခဲ့မယ်ဆိုရင်၊ ဘေးကဝေဖန်ခဲ့တဲ့သူတွေရဲ့အမြင်ဟာ ဂငယ်ကွေ့ ၁၈၀ ဒီဂရီ ပြောင်းပြန်ဖြစ်သွားပါလိမ့်မယ်။ "ဆုံးမမှုမရှိတဲ့ မိဘ" လို့မြင်ခဲ့ရာကနေ "အခက်အခဲတွေကြားက အကောင်းဆုံးကြိုးစားနေတဲ့ မိဘတစ်ယောက်" ဆိုပြီး ကိုယ်ချင်းစာစိတ်တွေ ဝင်လာပါလိမ့်မယ်။

ဆိုတော့…… အကောင်းဆုံးနည်းလမ်းကတော့ ပတ်ဝန်းကျင်မှာ ကိုယ်သဘောမကျတဲ့အရာတွေ့ရင် ပြစ်တင်၊ဝေဖန်မနေပဲ ကျော်သွားလိုက်ပါ။
ဒီလိုမဟုတ်ပဲ ဒီအဖြစ်အပျက်အပေါ် ဂရုဏာနဲ့မြင်ခဲ့ရင်တော့ မေတ္တာနဲ့ဘာကူညီပေးနိုင်မလဲ တွေးကြည့်ပါ။
အဖြစ်အပျက်တစ်ခုဟာ ကိုယ်သဘောကျနေခဲ့ရင်တော့ အတုယူ၊ လေးစား၊ အားကျပြီး လက်ခုပ်တီးပေးလို့ရပါတယ်။

ကိုယ်ကောပတ်ဝန်းကျင်ပါ အေးချမ်းစေမယ့်နည်းလမ်းတွေကိုပဲ ရွေးကြရအောင်လား …..❤️

Hanko Htet
21 days later

21 days later

28/03/2026

21/03/2026

11/03/2026

25/02/2026

30/01/2026

25/01/2026

20/10/2025

20/10/2025

20/10/2025

10/10/2025

07/10/2025

01/10/2025

Address

Website

Alerts

Shortcuts

Share

Category