Hnin - The Physiotherapist

28/01/2024

အားလုံးပဲ မင်္ဂလာပါရှင့်

အခြေအနေ အကြောင်းကြောင်းကြောင့် ကျွန်မ Career break ယူမှာဖြစ်လို့ Hnin - The Physiotherapist Page ကို မကြာခင်မှာ unpublished လုပ်ပါတော့မယ်ရှင်

ဖုန်းနဲ့ ဖြစ်စေ၊ Page messenger ကဖြစ်စေ Consultation လုပ်ခြင်းလဲ ရပ်နားတော့မည်ဖြစ်ကြောင်း ဝမ်းနည်းစွာ အသိပေးချင်ပါတယ်ရှင့်

ဒီ Page လေးကနေတဆင့် Physiotherapy Knowledge sharing နဲ့ consultation လုပ်ပေးခွင့်ရခဲ့တဲ့ အတွက် တစ်ဦးတစ်ယောက်ချင်းဆီကို ကျေးဇူးအများကြီးတင်ပါတယ်ရှင် 🥰

အားလုံးပဲ ဘေးကင်းလုံခြုံပြီး ကျန်းမာပျော်ရွှင်ကြပါစေ 🙏

08/09/2023

Happy World PT Day 2023! 🎉🎊

အားလုံးပဲ မင်္ဂလာပါရှင့်

နှစ်စဉ်နှစ်တိုင်းရဲ့ စက်တင်ဘာလ ၈ ရက်နေ့ဟာ ကမ္ဘာ့အကြောအဆစ်ကုပညာနေ့ (World Physiotherapy Day) ဖြစ်ပါတယ်။

World Physiotherapy အဖွဲ့အစည်းကြီးက နှစ်တိုင်း Theme တစ်ခုဆီကို Focus လုပ်ပြီး အကြောအဆစ်ကုပညာနဲ့ပတ်သက်လို့ အသိပညာတွေမျှဝေတာ၊ Campaign တွေလုပ်တာ စသဖြင့် ဦးဆောင်ပြုလုပ်ပြီး ကမ္ဘာတစ်ဝှမ်းမှာရှိတဲ့ Physiotherapist တွေကိုလဲ ပါဝင်လုပ်ဆောင်ဖို့ အမြဲတိုက်တွန်းပါတယ်ရှင်။

ကျွန်မတို့ Physiotherapist များကလဲ ဒီလိုနေ့ရောက်ပြီဆိုရင် ဒီနှစ်အတွက် Focus လုပ်တဲ့ Theme အပေါ်မူတည်ပြီး အဖွဲ့အစည်းလိုက်ဖြစ်စေ၊ တစ်ဦးချင်းဖြစ်စေ၊ social platforms တွေမှာ ဖြစ်စေ Campaign တွေပြုလုပ်ပြီး အသိပညာပေးတာ၊ ဆေးကုသမှုပေးတာနဲ့ တိုင်ပင်ဆွေးနွေးပေးတာ စသဖြင့် လိုက်ပါဆောင်ရွက်ပြီး World PT Day ကို ပါဝင်ဆင်နွှဲကြပါတယ်ရှင့်

ဒီနှစ် 2023 ခုနှစ်အတွက် Focus လုပ်ထားတာကတော့ Arthritis လို့ခေါ်တဲ့ အဆစ်ရောင်ရောဂါအမျိုးမျိုးအတွက် အသိပညာဖြန့်ဝေဖို့ပဲ ဖြစ်ပါတယ်။

ဒါကြောင့် ကျွန်မက World PT ကနေ ဒီနှစ်အတွက်ထုတ်ဝေထားတဲ့ Toolkit ထဲကမှ တချို့ Posters တွေ၊ information sheets တွေကနေတစ်ဆင့် အဆစ်ရောင်ရောဂါနဲ့ပတ်သက်ပြီး အသိပညာတွေ မျှဝေပေးချင်ပါတယ်ရှင့်။ (ပုံလေးတွေမှာ ဆက်ကြည့်ပေးပါရှင်)

World PT Day ကိုပါဝင်ဆင်နွှဲပြီး အဆစ်ရောင်ရောဂါများ (Arthritis) အတွက် အသိပညာမြှင့်တင်ဖို့ Post တွေပဲ တင်တင်၊ share ပဲလုပ်လုပ် ဆိုပြီး hashtag လေးထည့်ဖို့မမေ့ပါနဲ့နော်

အားလုံးပဲ အရိုးအဆစ်နာကျင်ယောင်ရမ်းခြင်းများနဲ့ပတ်သက်လို့ ကောင်းမွန်မှန်ကန်သော ကုသမှုများရရှိကြပါစေရှင်

Hnin - The Physiotherapist

01/09/2023

💁🏻‍♀️ အားလုံးပဲ Happy Friday ပါရှင်

ဒီနေ့ ကျွန်မက အိမ်မှာဆောင်ထားသင့်ပြီး လိုအပ်တဲ့ပစ္စည်းလေးတစ်မျိုးကို ပြောပြပေးချင်တယ်ရှင့်

အဲ့တာက အိမ်မှာ ရုတ်တရက်ထိခိုက်ဒါဏ်ရာရတာတွေအတွက် အသုံးဝင်တဲ့ Cool Gel Pack (အအေးအိတ်) လေးပါ။

ကျွန်မကိုယ်တိုင်လည်း အိမ်မှာ ခုံနဲ့တိုက်မိတာ၊ စားပွဲနဲ့တိုက်မိတာ၊ ဆိုင်ကယ်နဲ့ထိခိုက်မိတာတွေကြောင့် ကြွက်သားနာသွားတာ၊ ယောင်သွားတာ၊ သွေးခြေဥပြီး အညိုမဲစွဲလာတာ မကြာခဏဖြစ်တတ်တယ်ရှင့်

အဲ့လိုဖြစ်တဲ့အခါ တခါတလေ ရေခဲကပ်ဖို့အဆင်မပြေတော့ ဒီ Cool gel pack လေးသုံးဖြစ်တာ တော်တော်အဆင်ပြေတယ်ရှင်။

ရေခဲသေတ္တာထဲမှာ တစ်နာရီ၊ တစ်နာရီခွဲလောက်ထားလိုက်ရင် သုံးလို့ရပြီ။ အထဲက Gel မို့လို့ မာတောင့်နေတာမျိုးတွေမရှိဘဲ ထိခိုက်မိတဲ့နေရာကို အလွယ်တကူ ကပ်လို့အဆင်ပြေတယ်။

ပြီးတော့ သူ့မှာအဝတ်အိတ်လေးပါတယ်၊ ဘေးနှစ်ဖက်မှာ ကပ်ခွါပါတဲ့ strap လေးနဲ့ဆိုတော့ အိတ်လေးထဲထည့်ပြီး ပတ်ထားလိုက်ရုံပဲ။ အရေပြားနဲ့တိုက်ရိုက်မထိတော့ Ice burn လဲမဖြစ်တော့ဘူးပေါ့နော်။

ကျွန်မ ဒီ cool pack လေးကို Flamingo Myanmar က ဝယ်ထားတာကြာပြီရှင့်။ ဘူးခွံတောင်မရှိတော့ဘူး။ မကြာခဏ ထိခိုက်မိတတ်တဲ့ ကျွန်မအတွက် တကယ်အသုံးဝင်ပြီး၊ အဆင်ပြေတဲ့ပစ္စည်းလေးမို့ ပြန်လည်မျှဝေပေးလိုက်ပါတယ်ရှင်။

Have a great weekend ahead everyone!

Hnin - The Physiotherapist

25/08/2023

KINESIO TAPING ON FACIAL PARALYSIS

အားလုံးပဲ မင်္ဂလာပါရှင်

ဒီနေ့တော့ ကျွန်မ အရင်တစ်ပတ်က ပြောပြခဲ့တဲ့ Kinesio Taping ကို Facial Paralysis (မျက်နှာတစ်ခြမ်းလေဖြန်းခြင်း)မှာ ကုသမှုတစ်ခုအနေနဲ့ အသုံးပြုထားပုံကို ပြသချင်ပါတယ်။

တွဲကျလာတဲ့ မျက်နှာကြွက်သားတွေကို ထိန်းဖို့နဲ့ ကြွက်သားလှုပ်ရှားမှုကို အထောက်အကူပြုဖို့၊ မျက်နှာတစ်ဝိုက်နာကျင်တာသက်သာဖို့၊ အာရုံကြောအဖွဲ့အစည်းကို လှုံ့ဆော်ဖို့အတွက် စသဖြင့် အသုံးပြုပါတယ်။

အခု video ထဲမှာ ကျွန်မက

👉 နဖူးကြွက်သား (Frontalis) - အနက်ရောင်တိပ်
👉 မျက်လုံးတဝိုက်ကြွက်သား (Orbitcularis oculi) - အပြာရောင်တိပ်
👉 ပါးကြွက်သား (Zygomaticus muscles) - အသားရောင်တိပ် တို့ကို အသုံးပြုပြီး ကုသမှုပေးထားပါတယ်။

Kinesio Tape မှာရှိတဲ့ Elastic recoil ကြောင့် Paralysis ဖြစ်တဲ့ မျက်နှာဘက်ခြမ်းမှာရှိတဲ့ တွဲကျနေတဲ့ မျက်နှာကြွက်သားတွေကို ပင့်တင်ပေးပြီး မျက်နှာနှစ်ခြမ်း ညီမျှလာစေတယ်။ ပါးရွဲ့ခြင်းလဲ သက်သာလာစေပါတယ်။

Kinesio Taping ကုသမှုကို တခြားသော Physiotherapy treatment တွေနဲ့ အတူတွဲပြီး ကုသမှုပေးတဲ့အခါ လူနာတစ်ယောက်အနေနဲ့ လေဖြန်းခြင်း၊ ပါးရွဲ့ခြင်းကြောင့် ဖြစ်ပေါ်လာတဲ့ စိတ်ခံစားမှုအခြေအနေတွေကို အတိုင်းအတာတစ်ခုထိ လျော့ကျသက်သာစေပြီး၊ ကုသမှုအပေါ် ယုံကြည်မှုပိုတိုးလာစေပါတယ်ရှင်။

မျက်နှာတစ်ခြမ်းလေဖြန်းတဲ့အခါ မှန်ကန်ခေတ်မီတဲ့ကုသမှုတွေရရှိပြီး အချိန်တိုအတွင်းသက်သာပျောက်ကင်းနိုင်ဖို့ ကျွမ်းကျင်တဲ့ Physiotherapist အကြောအဆစ်ကုပညာရှင်များနဲ့ ကုသမှုခံယူဖို့ မမေ့ပါနဲ့နော် 😃

**ကာယကံရှင်၏ခွင့်ပြုချက်ဖြင့် အသုံးပြုထားသော ဓာတ်ပုံများဖြစ်ပါသည်။**

🔴 မှတ်ချက်။ ။ Page messenger မှာ ကျွန်မကို ဒူးနာ၊ ခါးနာအတွက် ကိုယ့်ဟာကိုယ် အိမ်မှာဝယ်ကပ်လို့ရလား လာမေးကြတယ်ရှင့် ။ Kinesio Tape ဟာ ကုသရေးသုံးတိပ်အမျိုးအစားဖြစ်တဲ့အတွက် တိပ်ကိုအသုံးပြုဖို့ ကျွမ်းကျင်ပညာရှင်လိုအပ်ပါတယ်ရှင်။ မိမိရဲ့အရေပြားအခြေအနေ၊ အခြားသောအောက်ခံရောဂါအခြေအနေများနဲ့ ကြွက်သားတွယ်ဆက်အလုပ်လုပ်ပုံများသိရှိမှသာ အသုံးပြုနိုင်သောကြောင့် ကျွမ်းကျင်ပညာရှင်များနှင့်သာ တိုင်ပင်ပြီးကုသမှုရယူနိုင်ပါတယ်ရှင်။

Hnin - The Physiotherapist

19/08/2023

အားလုံးပဲ မင်္ဂလာပါရှင့်

ဒီနေ့ ကျွန်မပြောပြချင်တဲ့အကြောင်းအရာကတော့ ကျွန်မတို့ Physiotherapist တွေ ကုသမှုပေးတဲ့အခါ ပိုပြီးအသုံးများလာကြတဲ့ Kinesio Taping အကြောင်းပဲ ဖြစ်ပါတယ်

ကျွန်မဆေးခန်းမှာလဲ မကြာခဏသုံးဖြစ်တယ်ရှင့်။ အထူးသဖြင့် Musculoskeletal problems ကြွက်သားနဲ့အရိုးအဆစ် နာကျင်ယောင်ရမ်းခြင်းကို သက်သာအောင်ကုသမှုပေးတဲ့နေရာမှာ တခြားသော Physiotherapy Treatment တွေနဲ့တွဲပြီး ကုသမှုပေးပါတယ်။

Kinesio Tape ဆိုတာ ကျွန်မတို့ အရေပြားမျက်နှာပြင်ပေါ်မှာ ကပ်ပြီးအသုံးပြုလို့ရတဲ့ ကျုံ့နိုင်ဆန့်နိုင်တဲ့ ကုသရေးသုံးတိပ်အမျိုးအစားဖြစ်ပါတယ်။ Kinesio Tape ကပ်တဲ့နေရာမှာ မိမိအသုံးပြုချင်တဲ့ ကြွက်သားဖြစ်စေ၊ အရိုးအဆစ်ဖြစ်စေ၊ ကြွက်သားတွယ်ဆက်ပုံနေရာနဲ့ အရိုးအဆစ်ပုံစံပေါ်မူတည်ပြီး အသုံးပြုပုံတွေ ကွဲပြားပါတယ်။

Kinesio Tape ကပ်ခြင်းဖြင့် Musculoskeletal system function and motion ကိုအထောက်အကူပြုဖို့အတွက် ခန္ဓာကိုယ်မှာ biomechanical and neurophysiological effects တွေ ဖြစ်ပေါ်လာစေပါတယ်။ Tape ကပ်လိုက်တဲ့အခါ Tape က အရေပြားကိုကပ်ပြီး ဆွဲမလိုက်သလိုဖြစ်တဲ့အတွက် အရေပြားနဲ့ကြွက်သားနဲ့ကြားမှာ နေရာလွတ်ကလေးဖြစ်သွားစေတယ်။ အဲ့ဒီအခါ အရေပြားအောက်မှာရှိတဲ့ Pain receptors လို့ခေါ်တဲ့ နာကျင်မှုကိုသိတဲ့ ဆဲလ်လေးတွေမှာ ဖိအားလျော့သွားခြင်းဖြင့် နာကျင်မှုတွေကို သက်သာလာစေပါတယ်။

ပြီးတော့ အရေပြားမှာရှိတဲ့ mechanoreceptors လေးတွေကို stimulate လုပ်တာကြောင့်လည်း အာရုံကြောအဖွဲ့အစည်းမှာ ကောင်းသောပြောင်းလဲမှုလေးတွေ ဖြစ်ပေါ်လာစေပါတယ်။ သွေးလည်ပတ်မှုနဲ့ ပြန်ရေကြောလည်ပတ်မှုကိုလည်း ကောင်းလာစေတာကြောင့် နာကျင်ယောင်ရမ်းခြင်းကို ပိုမိုသက်သာလာစေပါတယ်။

ဒါကတော့ ကျွန်မ Kinesio Taping အသုံးပြုပုံနဲ့ သူ့ရဲ့အကျိုးသက်ရောက်မှုကို အကြမ်းဖျင်းပြောပြထားတာဖြစ်ပါတယ်။ Kinesio Tape ရဲ့ strips လေးတွေကို အရေပြားရဲ့ thickness & elasticity နဲ့အနီးစပ်ဆုံး (varies within 130-140%) ပြုပြင်ထုတ်လုပ်ထားပြီး cotton elastic fiber ကိုအသုံးပြုထားတယ်၊ ရေစိုခံတယ်၊ လေဝင်လေထွက်ကောင်းတယ်၊ အရေပြားပေါ်မှာကပ်ဖို့အတွက် hypoallergenic glue ကိုအသုံးပြုတာကြောင့် ဓာတ်မတည့်မှုက မရှိသလောက်ရှားပါတယ်။

တချို့ Physiotherapist/sports-medics/kinesiotherapist များက K-Taping ကို ၄ရက်အထိ ထားလို့ရတယ်လို့ ဆိုကြပေမယ့် ကျွန်မကတော့ ကျွန်မတို့နိုင်ငံရဲ့ ရာသီဥတုအလိုက် အများဆုံး ၂ရက်အထိပဲ ထားပါတယ်ရှင့်။

ဒါကြောင့် မိမိမှာ ကြွက်သားနဲ့အကြောအဆစ်နာကျင်ယောင်ရမ်းတဲ့အခါ ကောင်းမွန်မှန်ကန်ပြီး ခေတ်မီတဲ့ကုသမှုတွေရရှိဖို့အတွက် နီးစပ်ရာ အကြောအဆစ်ကုပညာရှင်များနဲ့ တိုင်ပင်ဆွေးနွေး ကုသမှုခံယူဖို့မမေ့ပါနဲ့ရှင် 😃

Hnin - The Physiotherapist

References

https://www.ncbi.nlm.nih.gov/pmc/articles/PMC7668467/

https://www.researchgate.net/profile/Stamenka-Mitova/publication/347606820_NATURE_APPLICATION_AND_EFFECT_OF_KINESIO_-TAPING/links/5fe276bea6fdccdcb8f3dc30/NATURE-APPLICATION-AND-EFFECT-OF-KINESIO-TAPING.pdf

https://bmcmusculoskeletdisord.biomedcentral.com/articles/10.1186/s12891-022-05148-5 #:~:text=The%20Kinesio%20tape%20does%20have,the%20distance%20between%20each%20section.

26/06/2023

22/05/2023

အားလုံးပဲ မဂ်လာပါရှင်။

ကျွန်မတို့ Sun Physiotherapy and Rehabilitation Clinic တွင်

MMOS team ဖြစ်တဲ့ MM OrthoSolutions မှ

ဆွစ်ဇလန် နိုင်ငံမှ ပညာရှင် နှင့်

ထိုင်းနိုင်ငံ Mahidol University မှ

ခြေတုလက်တု နှင့် အားပြုကိရိယာ ပညာရှင်များနှင့်
ပူးပေါင်း၍

လူနာများအတွက်လိုအပ်သော

ကျန်းမာရေး အထောက်အကူပြုပစ္စည်းများနှင့်

ခြေတုလက်တု ပစ္စည်းများအကြောင်းကိုလည်း

တိုင်ပင်ဆွေးနွေးနိုင်ပါပြီရှင်။

ခြေတု လက်တု အပြင်

အခြား ရောဂါများအတွက်လည်း

အထောက်အကူပြုပစ္စည်းများ ကိုလည်း

ပညာရှင်များကိုယ်တိုင် ပြုလုပ်ပေးနေပါပြီရှင်။

ဥပမာ- Foot drop လို့ခေါ်တဲ့ လေဖြတ်လို့ ပဲဖြစ်ဖြစ် အာရုံကြော ထိခိုက်မိလို့ပဲ ဖြစ်ဖြစ်ခြေကျင်းဝတ် မလှုပ်နိုင်တဲ့ လူနာများအတွက် ခြေထောက် ထိန်း ကိရိယာများ ၊

ခြေထောက်နှစ်ဖက် မညီလို့ ခြေထောက် ပြန်ညီစေဖို့ ဝတ်ဆင်ရတဲ့ ဖိနပ်များ၊

ခြေဖဝါး အနာရှိတဲ့ ဆီးချို လူနာတွေအတွက် ဝတ်ဆင်သင့်တဲ့ ဖိနပ်များ

အရိုးကျိုးလို့ပဲ ဖြစ်ဖြစ် အရွတ်ပြတ်လို့ပဲ ဖြစ်ဖြစ် ဝတ်ဆင်ရတဲ့ အထောက်အကူပြု ကိရိယာများ

ခါးစောင်းနေလို့ ဝတ်ဆင်ရတဲ့ ခါးထိန်း ပစ္စည်းများ

Nerve Injury ရလို့ မလှုပ်ရှားနိုင်တဲ့ ခြေချောင်း လက်ချောင်းများအတွက် အထောက်အကူပြု ပစ္စည်းများ

အစအစရှိတဲ့ အထောက်အကူပြု ပစ္စည်းများနှင့် ခြေတုလက်တုပစ္စည်းများကို

လူနာတစ်ယောက်ချင်းစီတိုင်းအတွက်
Body Casting စနစ်တကျ တိုင်းယူပြီး

International standardနဲ့ အညီ

High Quality and Higher Technology များနှင့် ပြုလုပ်ထားသော

ကျန်းမာရေးသုံး အထောက်အကူ ပြု ပစ္စည်းများကို

နိုင်ငံခြား သွားရန်မလိုအပ်ပဲ

တောင်ကြီးမြို့ MMOrtho solutions မှာ ရရှိနိုင်နေပြီ ဖြစ်ကြောင်း သတင်းကောင်း ပါးအပ်ပါတယ်။

MMOrtho Solutions များ ပညာရှင် များနှင့်လည်း

ကျွန်မတို့ Sun Physiotherapy and Rehabilitation Clinic မှာ

Appointment ရယူပြီး Consultation လုပ်နိုင်ပြီ ဖြစ်ကြောင်း သတင်းကောင်းပါတယ်ရှင်။

MMOrtho Solutions page လေးကို အောက်က Link လေးမှာ ဝင်ရောက် ကြည့်ရှုနိုင်ပါတယ်ရှင်။

https://www.facebook.com/profile.php?id=100084427020752&mibextid=LQQJ4d

21/03/2023

Physiotherapy ဆေးခန်းတွေမှာ ဆေးကုသဖို့လာတဲ့အခါ အချိန်ဘယ်လောက်ပေးရလဲ ပြောမယ်ဆိုရင် ကျွန််မတို့ Physiotherapist တွေ လူနာတစ်ယောက်ရောက်လာတဲ့အခါ စမ်းသပ်ကုသမှုပေးတဲ့ပုံစံတွေကို အရင်သိထားသင့်ပါတယ်။

ကျွန်မက Physiotherapy mini clinic လေးဖွင့်ထားပါတယ်။ Mini clinic လေးမို့ Physiotherapist က ကျွန်မတစ်ယောက်ထဲပေါ့။ ကျွန်မအမြဲတမ်း စံထားပြီးပြုလုပ်တဲ့ ကုသမှုပုံစံကတော့ Consultation-Assessment-Treatment ပါ။ ကျွန်မတို့ လူနာတစ်ယောက်ရောက်လာတာနဲ့ စမ်းသပ်စစ်ဆေးပြီး တခါတည်း ကုသမှုပေးတာနဲ့ယှဉ်ရင် အရင်ဆုံး လူနာကို ရောဂါအခြေအနေနဲ့ပတ်သက်လို့ တိုင်ပင်ဆွေးနွေး(Consultation) ပေးတာက Patient-Therapist cooperation ရစေပြီးတော့ ကုသမှုပိုပြီးအောင်မြင်တယ်လို့ ကျွန်မထင်ပါတယ်။

အဲ့ဒီလို တိုင်ပင်ဆွေးနွေး-စမ်းသပ်စစ်ဆေး-ကုသမှုခံယူဖို့အတွက် အနည်းဆုံး ၄၅မိနစ်ကနေ - ၁နာရီ/၁နာရီခွဲထိကြာနိုင်ပါတယ်။ ဥပမာ- လေဖြတ်တာ၊ Parkinson’s Disease လိုမျိုး လမ်းလျှောက်ရခက်ခဲတာ၊ ခြေထောက်အရိုးကျိုးထားပြီးနောက် လမ်းလျှောက်ပြန်ကျင့်ဖို့ လိုအပ်တာစတဲ့အခြေအနေတွေမှာဆိုရင် ဒီထက်ပိုပြီးတော့တောင် အချိန်ပိုယူရပါသေးတယ်။

ကျွန်မရဲ့ အတွေ့အကြုံနဲ့ ကျွန်မစံထားတဲ့ ကုသမှုပုံစံတွေအရ Physiotherapist တစ်ယောက်ဟာ တစ်နေ့မှာ လူနာ အနည်းဆုံး ၈-၁၀ ယောက်၊ follow up ပြန်ပြတဲ့လူနာတွေပါရှိရင် အများဆုံး ၁၅ ယောက်လောက်အထိပဲ ကြည့်နိုင်ပါတယ်။ အဲ့ဒါမှလဲ လူနာတစ်ယောက်နဲ့တစ်ယောက်ကြားမှာ စမ်းသပ်ကြည့်ရှုမှုလိုအပ်သွားတာမျိုးမရှိဘဲ ထိရောက်တဲ့ကုသမှုပေးနိုင်မယ်လို့ ကျွန်မယုံကြည်ပါတယ်။

➡️ ဒါကြောင့် ကျွန်မတို့ Physiotherapy ဆေးခန်းတွေကိုလာတဲ့အခါ ပျမ်းမျှအချိန်တစ်နာရီလောက်တော့ပေးပြီး တိုင်ပင်ဆွေးနွေးကုသမှုခံယူကြဖို့ တိုက်တွန်းပါရစေရှင်

Disclaimer: ကျွန်မရဲ့ စံထားတဲ့ကုသမှုပုံစံနဲ့ အတွေ့အကြုံပေါ်မူတည်ပြီး မျှဝေပေးခြင်းဖြစ်ပါတယ်။ Physiotherapist တစ်ယောက်မှာ အတွေ့အကြုံ၊ Competency နဲ့ ဒီပညာရပ်မှာ ဆက်လက်လေ့လာနိုင်မှုတွေပေါ်မူတည်ပြီး တစ်ယောက်နဲ့တစ်ယောက် ကုသမှုပုံစံတွေကွဲပြားနိုင်ပါတယ်ရှင်။

Hnin - The Physiotherapist

16/03/2023

ထိခိုက်ဒဏ်ရာရပြီးပြီးချင်း မပြုလုပ်သင့်သော အချက် (၃) ချက်

(၁) ဆေးအပူလိမ်းခြင်း၊ ရေနွေးအိတ်ကပ်ခြင်း
(၂) ထိခိုက်ဒဏ်ရာရသည့်နေရာကို နှိပ်နယ်ခြင်း၊ ဆွဲဆန့်ခြင်း၊
(၃) အရက်၊ ဘီယာ သောက်ခြင်း

အထက်ပါ အပြုအမူများသည် ခန္ဓာကိုယ်တွင်း သွေးထွက်ခြင်းနှင့် ရောင်ရမ်းခြင်းကို ပိုမိုဖြစ်စေနိုင်သည်။

If you have just injured, please Do Not

1. Apply heat
2. Massage your injury
3. Drink alcohol

Above mentioned activities increase bleeding and swelling.

Hnin - The Physiotherapist
16/3/2023

08/03/2023

ဒီနေ့က International Women’s Day ဖြစ်ပါတယ် 👸🏼

ကမ္ဘာပေါ်မှာရှိတဲ့ ချစ်ရတဲ့ အမျိုးသမီးများအားလုံး ကျန်းမာသော၊ သန်မာသော၊ ပျော်ရွှင်သော၊ လွတ်လပ်သော၊ မိမိကိုယ်ကို အားကိုးနိုင်သော၊ ဖြစ်ချင်သမျှအိပ်မက်များကို အကောင်အထည်ဖော်နိုင်ပြီး ကောင်းမွန်တဲ့ဘဝကို ပိုင်ဆိုင်ရသော အမျိုးသမီးများ ဖြစ်ကြပါစေလို့ ဆုမွန်ကောင်းတောင်းရင်း နိုင်ငံတကာအမျိုးသမီးများနေ့ ကို ဂုဏ်ပြုအပ်ပါတယ်ရှင် ♥️

Happy International Women’s Day to all the incredible women out there!

07/03/2023

အားလုံးပဲ မင်္ဂလာပါ
စာတွေမရေးဖြစ်တာ အရမ်းကြာသွားပြီရှင့် 😁

ဒီနေ့မှာတော့ လူငယ်၊ လူလတ်ပိုင်းတွေမှာ မကြာခနဖြစ်လေ့ရှိတဲ့ Traumatic Knee Injury လို့ခေါ်တဲ့ ဒူးဆစ်ထိခိုက်ဒဏ်ရာရတဲ့အခါ ဘယ်အစိတ်အပိုင်းတွေထိခိုက်နိုင်လဲ၊ ဘယ်လိုတွေကုသလို့ရမလဲ စတဲ့ ဗဟုသုတအကြောင်းအရာလေးတွေကို မျှဝေပေးချင်ပါတယ်ရှင်

လူငယ်တွေ၊ အားကစားသမားတွေမှာ ဘောလုံးကန်ရင်း၊ ကြက်တောင်ရိုက်ရင်း၊ ပြေးရင်း၊ အားကစားလုပ်ရင်း ချော်လဲတာ၊ ဒူးထောက်လဲကျတာ၊ ဒူးလည်သွားတာ၊ ဒူးဆစ်ကို တိုက်ရိုက်ထိမိတိုက်မိတာ စသဖြင့် အကြောင်းအမျိုးမျိုးကြောင့် ထိခိုက်ဒဏ်ရာရတတ်ကြပါတယ်

ဒူးဆစ် ထိခိုက်ဒဏ်ရာရတဲ့အခါ ဒူးဆစ်အထဲမှာ(သို့မဟုတ်) ဘေးမှာ ရှိတဲ့ အရွတ်/အရွတ်ပြားတွေ (Tendons & Ligaments), အရိုးနုပြားလေးတွေ (menisci), ကြွက်သား၊ သွေးကြောမျှင် စတဲ့ soft tissues လေးတွေ ပျက်စီးသွားပါတယ်

ဒူးဆစ်တဝိုက်က Soft tissues လေးတွေပျက်စီးသွားတာနဲ့ တပြိုင်နက် ဒူးဆစ်နာလာမယ်၊ ရောင်ရမ်းလာမယ်၊ ညိုမဲလာမယ်၊ လှုပ်ရှားလို့မရဖြစ်မယ်၊ ဒူးအကွေးအဆန့် အပြည့်အဝမရတာ၊ ဆောင့်ကြောင့်ထိုင်လို့မရတာမျိုးတွေ ဖြစ်လာပါတယ်။
အဲ့ဒီလို ရောင်ရမ်းနာကျင်မှုတွေဟာ ထိခိုက်မိတဲ့ပြင်းအားပေါ်မူတည်ပြီး ၃ရက်-၅ရက် ကနေ အဲ့ထက်ပိုပြီးတော့လဲ ကြာနိုင်ပါတယ်။

➡️ Day 1 to Day 3 (ပထမတစ်ရက် ကနေ သုံးရက်အတွင်း)

အိမ်တွင်းကုသမှုအနေနဲ့ ထိခိုက်ဒါဏ်ရာရတာနဲ့ တပြိုင်နက် လုပ်နေကျ လှုပ်ရှားမှု၊ အားကစား စတာတွေကနေ ချက်ချင်း အနားယူပါ။ စနစ်တကျ ရေခဲကပ်ပေးပါ။ Elastic Bandage လို့ခေါ်တဲ့ Elastic ပါတဲ့ ပတ်တီးစည်းပါ (သို့မဟုတ်) ဒူးစွပ် စွပ်ပါ။ ဒူးဆစ်အောက်ပိုင်းတစ်လျှောက် ခေါင်းအုံး၊ စောင် စသဖြင့် ခုထားပြီး ခြေထောက်ကို မြှင့်ထားပေးပါ။

➡️ Day 2 to Day 3 (ဒုတိယရက် နှင့် တတိယရက်)

ဒုတိယရက်ကနေစပြီး Gentle Exercises လေ့ကျင့်ခန်းအပျော့စားလေးတွေ စလုပ်တာ၊ လမ်းဖြေးဖြေးလျှောက်တာ စသဖြင့်လုပ်လို့ရပါပြီ။

➡️ Day 4 to Day 9 (၄ရက် မှ ၉ရက် အတွင်း)

ဒီရက်ပိုင်းအတွင်းမှာတော့ လေ့ကျင့်ခန်းတွေ တဖြေးဖြေးတိုးပြီး လုပ်လို့ရပါပြီ။ ပြုလုပ်ရမယ့် လေ့ကျင့်ခန်းအမျိုးအစား၊ အကြိမ်အရေအတွက်၊ ပြင်းအားစသည်ကို ကျွမ်းကျင်သည့် အကြောအဆစ်ကုပညာရှင် Physiotherapist နှင့် တိုင်ပင်ပါ။

➡️ Day 9 to Day 21 (၉ရက် မှ သုံးပတ်အတွင်း)

ဒီရက်အပိုင်းအခြားမှာတော့ မိမိတို့ရဲ့ ပုံမှန်လုပ်ဆောင်နေကျ နေ့စဉ်လုပ်ငန်းဆောင်တာတွေကို ပြန်လည်လုပ်ဆောင်နိုင်ပြီ ဖြစ်ပါတယ်။သို့ပေမယ့် ဆောင့်ကြောင့်ထိုင်တာ၊ ပြေးတာ၊ ခုန်တာ စတဲ့အပြုအမူတွေကိုတော့ ရှောင်ဖို့လိုအပ်ပါသေးတယ်။
ထိခိုက်မိတဲ့ Injury site မှာ scar tissue (အမာရွတ်တစ်ရှူး) ပြန်လည်အစားထိုးတဲ့အတွက် လေ့ကျင့်ခန်းစနစ်တကျ မလုပ်တဲ့အခါ scar tissue လေးတွေက ကျုံ့သွား၊ တိုသွားတတ်ပါတယ်။ အဲ့တာကြောင့် အကြောလျှော့လေ့ကျင့်ခန်းတွေကို စနစ်တကျ ပြုလုပ်ဖို့လိုအပ်ပါတယ်။

💁🏻‍♀️ ကျွန်မတို့ Physiotherapist တွေအနေနဲ့ ထိခိုက်ဒါဏ်ရာရပြီးနောက် Electrotherapy ကုသမှု (Cryo, Ultrasound, TENS)၊ Kinesio Taping ကုသမှု၊ နောက်ထပ်ပြန်မဖြစ်အောင်၊ ဟန်ချက်ထိန်းနိုင်အောင် လေ့ကျင့်ခန်းကုထုံးတွေ (Injury Prevention, Stretching Exercises, & Proprioception Exercise) ကို လူနာတွေရဲ့ အခြေအနေပေါ်မူတည်ပြီး ကုသမှုပေးလျက်ရှိပါတယ်။

စဖြစ်ဖြစ်ချင်း သင့်လျော်ကောင်းမွန်တဲ့ ကုသမှုရလိုက်မယ်ဆိုရင် soft tissues healing ကောင်းပြီး ပုံမှန်လှုပ်ရှားသွားလာမှု မြန်မြန်ပြန်လုပ်နိုင်မှာဖြစ်လို့ ဒူးဆစ်ထိခိုက်ဒါဏ်ရာရတဲ့အခါ ကျွမ်းကျင်တဲ့ အကြောအဆစ်ကုပညာရှင် Physiotherapist နဲ့ တိုင်ပင်ပြီး ကုသမှုခံယူကြဖို့ တိုက်တွန်းပါရစေရှင်

အားလုံးပဲ အနာကင်းဝေးပြီး ကျန်းမာပျော်ရွှင်သော ဘဝကို ပိုင်ဆိုင်နိုင်ကြပါစေ 🙏🙏🙏

Hnin - The Physiotherapist
7/3/2023

22/01/2023

😁😁😁
Just kidding

Great advice! Always works! 🙂
How many physios will give this advice on Monday you think? 😅

21/11/2022

(Knowledge topic)
ဒီနေ့ရဲ့ topic မှာ ဖီဆီအိုသရပီဆေးခန်းအတွင်း အသုံးပြုမှုမှားယွင်းနေသော စကားလုံးတစ်ခုနဲ့ ပတ်သက်တဲ့ အကြောင်းအရာကို ပြောပြသွားမှာဖြစ်ပါတယ်။
လူနာတချို့ဆီက ပုံမှန်ကြားရလေ့ရှိတဲ့ စကားစုတွေမှာ ဆေးရုံ၊ ဆေးခန်းတစ်ခါမှ မသွားဖူးဘူးတို့၊ အရိုး၊ အကြောဆေးခန်း တစ်ခါမှ မပြဖူးဘူးတို့ စသည်ဖြင့် ရံဖန်ရံခါ နားထောင်ရလေ့ရှိပါတယ်။ ဒီလို လူနာတွေ တစ်ယောက်မကစွာ ကျန်ရှိနေခြင်းအပေါ် ဖီဆီအိုသရပီဟာ ဘယ်လောက်ပဲ awarenessလုပ်လုပ်၊ ကျန်းမာရေးအသိပညာ ဘယ်လိုပဲ ပေးနေနေ မလုံလောက်သေးဘူးဆိုတဲ့ အချက်ဟာ ပေါ်လွင်နေတာကြောင့် ဒီနေ့ topicကို ရွေးချယ်လိုက်တာလည်း ဖြစ်တယ်။ လူတွေဟာ မွေးဖွားမှုနှုန်း တိုးလာသလို လူနာတွေလည်း တစ်နေ့တခြား များပြားလာမှုကြောင့် ဖီဆီအိုသရပီ awarenessလည်း စဉ်ဆက်မပြတ် ပေးနေမှ လူထုကျန်းမာရေးအသိလည်း တိုးလာမယ်လို့ ယုံကြည်ပါတယ်။
ဖီဆီအိုသရပီသည် သိပ္ပံပညာအခြေခံတဲ့ ကျန်းမာရေးစောင့်ရှောက်မှုဖြစ်ပြီး လူကြီး၊ လူငယ်၊ ယောက်ျား၊ မိန်းမမရွေး အလွှာအတန်းအစားမျိုးစုံ၌ ဝင်ဆံ့တဲ့ ကျန်းမာရေးကုသမှုပေးနေတဲ့ ဆေးနှီးနွယ်ပညာရပ်ဖြစ်ပါတယ်။ ပြင်ပမှာတော့ အရိုး၊ အကြော၊ အဆစ်နှင့် ပြန်လည်သန်စွမ်းရေးဆေးခန်းတွေမှာ physiotherapistများကို တွေ့ရတတ်ပေမယ့် ၎င်းတို့၏ အခန်းကဏ္ဍများဟာ ဒီ့ထက်ပိုသော နေရာများ(ကျန်းမာရေး နယ်ပယ်၏ အလွှာအသီးသီး) အထိ အရေးပါ အရာရောက်ကြတယ်။
(စကားချပ်- physiotherapistများသည် ကုသမှုကို စာအုပ်ထဲ ရေးပေးလိုက်သလို ဒါပေး၊ ဒါလုပ်သည့် ကျွမ်းကျင်များမဟုတ်ဘဲ ကိုယ်တိုင် ကုသမှု လမ်းစဉ်ကို ပေးစွမ်း ကုသနိုင်တဲ့ ဆေးနှီးနွယ်ပညာရှင်များဖြစ်တယ်။)
အထက်ပါ ပညာရှင်မျိုးများနဲ့ လည်ပတ်နေတဲ့ ဖီဆီအိုသရပီပညာရပ်မျိုးဖြင့် ကုသမှုပေးရာ ဆေးရုံ၊ ဆေးခန်းတွေမှာ လူနာများထံက မကြာခဏ ကြားရလေ့ရှိတဲ့ စကားလုံးတစ်လုံးရှိတယ်။
‘နှိပ်တယ်’
ဒီစာလုံး၊ ဒီအသုံးအနှုန်းကို လူနာတွေဆီက ကြားရတဲ့အခါ Physiotherapistတွေဟာ အတော် သဘောမကျကြပါဘူး။ စောဒက တက်စရာအနေနဲ့ စာလုံးတစ်လုံးက ဘာဖြစ်သွားနိုင်စရာရှိလို့လဲဆိုရင် ဒီစာလုံးရဲ့ ‘တာ’သွားပုံကို ပြောပြပါဦးမယ်။
ရှေးဦးစွာ မြန်မာအဘိဓာန်မှာ ‘နှိပ်’ဆိုတဲ့ စာလုံးရဲ့ အဓိပ္ပါယ်ကို သိရှိအောင် ဖော်ပြပါမယ်။ ဘာလို့ အခုလို ရှင်းပြရသလဲဆိုရင် ကိုယ်ပြောနေ၊ သုံးနေတဲ့ အသုံးအနှုန်းဟာ သင့်တင့်လျောက်ပတ်ရဲ့လားဆိုတာ ချင့်ချိန်တွေးဆနိုင်အောင်ပါ။

📚မြန်မာအဘိဓာန်တွင် ‘နှိပ်’ ဟူသော စာလုံးရဲ့ အဓိပ္ပါယ် အများအပြားရှိတဲ့ထဲမှ သက်ဆိုင်နိုင်တဲ့တချို့ကို ကြည့်ကြည့်ရင်
အဓိပ္ပါယ် (၁) နှိပ် - အပေါ်က စီး၍ ဖိသည်။ (ဥပမာ- ရီမု ခလုတ်ကို နှိပ်သည်။)
အဓိပ္ပါယ် (၂) နှိပ် - အညောင်းပြေအောင် ကိုယ်လက်တို့ကို လက်ဖြင့် ဖိညှစ် ဆုပ်နယ်ပေးသည်။
အဓိပ္ပါယ် (၃) နှိပ် - အောက်ခံ အရာပေါ်တွင် တံဆိပ်စသည် အမှတ်အသားပေါ်အောင် ဖိသည်။ (ဥပမာ- ဆရာဝန်ကြီး၏ တံဆိပ်နှိပ်ပေးမှသာ အခန်းတွင်း ဝင်ခွင့်ရမည်။)📚

ဖီဆီအို သရပီပညာရပ်သည် အထက်ပါ အဓိပ္ပါယ် သုံးမျိုးနဲ့ တူညီနေတာမျိုး မရှိပါလျက် လူနာများ မှားယွင်းစွာ သုံးနှုန်းနေသည့် နှိပ်တယ်ဆိုတဲ့ စကားလုံးဟာ physiotherapistများလို ဆေးရုံ၊ ဆေးခန်းအတွင်း ကုသမှုပေးနေသည့် ပညာရှင်များအား အညောင်းပြေအောင် ကိုယ်လက်တို့ကို လက်ဖြင့် ဖိညှစ် ဆုပ်နယ်ပေး(အဓိပ္ပါယ် (၂))လို သဘောသက်ရောက်စေပါတယ်။ ရံဖန်ရံခါ Physiotherapyဆေးခန်းနှင့် ဌာနများတွင် ‘အနှိပ်ခန်း မဟုတ်’ ဟူသော စာတန်းချိတ်ဆွဲထားတာတွေ့ရတတ်သည်။ ထိုသို့ ဤသို့သော ဖြစ်ရပ်များကြောင့်သာ ဖြစ်ပေမည်။
ဒါဆို တချို့လူနာများမှာ သုံးနှုန်းဖို့ရာ စကားလုံးအခက်တွေ့ကြပြန်တယ်။ ဘာကြောင့်ဆို ဖီဆီအိုသရပီကို မြန်မာလိုတိတိကျကျ ပြန်ဆိုထားတာမျိုး မရှိသေးသလို အင်္ဂလိပ်အခေါ်အဝေါ်ကိုလည်း နှုတ်မသွက်ကြပေ။ လွယ်ပြီး အသုံးများတဲ့ အပြင် Physiotherapist ဆရာ၊ ဆရာမများရဲ့ သိက္ခာကိုလည်း မထိပါးစေတဲ့ ဝေါဟာရတစ်လုံးကတော့ လေ့ကျင့်ခန်း (သို့) exercise ပဲဖြစ်ပါတယ်။ ဒါသည်ကိုပင် လူတချို့ မှားတတ်သေးတယ်၊ အိမ်စာလုပ်မှ လေ့ကျင့်ခန်းတို့၊ မနက်ခင်း လမ်းလျှောက်တာကမှ exerciseတို့လို စသဖြင့်။

📚လေ့ - အကြိမ်ကြိမ်ပြုသည်။
📚လေ့ကျင့် - စွမ်းရည်တိုးတက်အောင် အထပ်ထပ် အားထုတ်သည်။
📚လေ့ကျင့်ခန်း - အရည်အသွေးတိုးတက်အောင် လက်တွေ့လုပ်သော လုပ်ငန်း။
ဖီဆီအိုသရပီပညာရပ်နှင့် ကုသမှုမှာ အဓိက အချက်အချာသည် Exercises therapy ဖြစ်တာကြောင့် ဖီဆီအိုသရပီဟု မပြောတတ်ရင်တောင် လေ့ကျင့်ခန်းဟု ခေါ်ဝေါ်သုံးစွဲသင့်ပေတယ်။
Physiotherapyသည် မည်သို့သော ကျန်းမာရေးအခန်းကဏ္ဍများ၊ မည်သို့သော ရောဂါရပ်တွေကို ကုသပေးနိုင်ကြောင်းနှင့် စက်အသုံးပြုလေ့ကျင့်ကုသခြင်း (သို့) စက်ဖြင့် လေ့ကျင့်ကုသခြင်း (Electrotherapy)တွင် အသုံးပြုသော စက်များ၏ နာမည်၊ အကျိုးအာနိသင်များကို Pageမှာ အတန်ငယ် ဖော်ပြထားပြီးလည်း ဖြစ်ပါတယ်။
မသိသေးသော အရာများကို ရှင်းပြရမှာ ပညာရှင်များရဲ့ တာဝန်တစ်ခုဖြစ်တာကြောင့် နှိပ်တယ်ဆိုတဲ့ အသုံးအနှုန်းနဲ့ ပတ်သက်ပြီး ရှင်းပြ၊ ပြောပြရတာက Physiotherapistများရဲ့ အသိပညာဖြန့်ဝေမှုဆိုရင် သိရှိလျက်နဲ့ ပြုပြင်ခေါ်ဝေါ် ပြင်ဆင်ပေးဖို့ရာက လူနာများနှင့် လူနာရှင်များ၏ တာဝန်ဆိုရင် နှစ်ဦး နှစ်ဖက်လုံး မျှတပြီး သင့်တင့်တဲ့ အခြေအနေကောင်းတစ်ခု ဖြစ်လာမှာ အမှန်ပဲ မဟုတ်လား။ လူသားထုတစ်ခုလုံးဟာ မသိတဲ့အရာများကို ဝေမျှ သုံးစွဲကြရင်း အချင်းချင်း ကောင်းမွန်တဲ့ ပတ်ဝန်းကျင်တစ်ခုကို ဖန်တီးကြရင် ကျေနပ်စရာပါပဲ။
‘နှိပ်တယ်’ ဆိုတာ စကားလုံးလေး တစ်လုံးဟုသာ ဆိုပင်သော်လည်း ၎င်း၏ကျယ်ပြန့်မှုကြောင့် အဓိပ္ပါယ်လွဲမှားစေပြီး ဆေးနှီးနွယ်ပညာရှင်များဖြစ်တဲ့ Physiotherapistဆရာ၊ ဆရာမများအပေါ် ဂုဏ်သိက္ခာကျဆင်းစေပါတယ်နော်။
ဒီနေ့ knowledge topicမှာတော့ Physiotherapy ဆေးရုံ၊ ဆေးခန်းတွေမှာ အကြားရအများဆုံးသော မှားယွင်းနေတဲ့ စကားလုံးတစ်လုံးနဲ့ ပတ်သက်ပြီး အဓိပ္ပါယ်နှင့်တကွ ရှင်းပြခဲ့ပြီးဖြစ်ပါတယ်။

နောက် Topic တွေမှာလည်း သိသင့်တာတွေ ဝေမျှပေးသွားဦးမှာမို့ Page ကို Like and Share လုပ်ထားပေးကြပါဦးနော် 🙌

🙋🏻စာများကို ပြန်ကူးတင်တာမျိုးထက် မူရင်း postကိုသာ share လုပ်စေချင်ပါတယ်။ ကူးယူတဲ့အခါလည်း မူလစာများကို မဖြတ်တောက်ဖို့နှင့် page ၏နာမည်ကို credit ပေးဖို့ လိုအပ်ပါတယ်။🙋🏻

👨‍👩‍👧‍👦 ကောင်းမွန်တဲ့ လူနေမှုဘဝကို ပိုင်ဆိုင်ဖို့ Physiotherapist များနဲ့ စောစီးစွာ တိုင်ပင်ကြပါစို့ 👨‍👩‍👧‍👦

⚕️Consult with a Physiotherapist if you need to promote your health ⚕️

Thank you 🍀
Physiotherapy Care & Consultation
(ဤစာသည် စာရေးသူ၏ အာဘော်ဖြစ်ပြီး အထက်ပါ စာပိုဒ်များမှာ သိရှိ နားလည်ရခက်ခဲနေပါက စာရေးသူ၏ ဖော်ပြမှု ညံ့ဖျင်းခြင်းသာဖြစ်ပါသည်။)

12/08/2022

Cerebral Palsy (သူငယ်နာအကြောတင်း) ရှိသူကလေးများအတွက် လေ့ကျင့်ခန်းများ

Cerebral Pals (CP) သူငယ်နာအကြောတင်းရှိသူ ကလေးတွေအတွက်

အမြဲမပြတ်ပြုလုပ်ပေးသင့်တဲ့လေ့ကျင့်ခန်းတွေကို တူတူပဲ အစီအစဉ်ကနေ

စုစည်းပြီးဖော်ပြပေးလိုက်ပါတယ်။အခုလေ့ကျင့်ခန်းတွေက အခြေခံလေးတွေပဲဖြစ်ပြီးတော့

ကလေးတစ်ယောက်နဲ့တစ်ယောက် အခြေအနေနဲ့လိုအပ်ချက်မတူနိုင်တာကြောင့် ကျွမ်းကျင်သူ

အကြောအဆစ်ပညာရှင်နဲ့တိုင်ပင်ပြီး သေချာလုပ်ဆောင်ပေးဖို့လိုပါတယ်။


ကိုယ်နေဟန်ထားပုံစံချခြင်း (Positioning)
https://www.facebook.com/bbcmediaactionttp/videos/696035971617001

အကြောလျှော့လေ့ကျင့်ခန်း (Stretching)
https://www.facebook.com/bbcmediaactionttp/videos/3628272067441745

ခန္ဓာကိုယ်အဆစ်များ လှုပ်ရှားတဲ့လေ့ကျင့်ခန်း (Range of Motion, ROM)
https://www.facebook.com/bbcmediaactionttp/videos/1098524010873771

ပုံစံတစ်ခုမှတစ်ခုသို့ကူးပြောင်းခြင်းနှင့်သွားလာခြင်း (Transition and Mobility)
https://www.facebook.com/bbcmediaactionttp/videos/745377733403147

#တူတူပဲ #သူငယ်နာအကြောတင်း

10/06/2022

ခြေဖနောင့်အရိုးအတက်ထွက်ခြင်း (𝗣𝗹𝗮𝗻𝘁𝗮𝗿 𝗙𝗮𝘀𝗰𝗶𝗶𝘁𝗶𝘀 𝗼𝗿 𝗣𝗹𝗮𝗻𝘁𝗮𝗿 𝗙𝗮𝘀𝗰𝗶𝗼𝗽𝗮𝘁𝗵𝘆)

🔴 ခြေဖနောင့်အရိုးအတက်ထွက်ခြင်းဆိုတာ ဘာလဲ? ဘာကြောင့်ဖြစ်လာတာလဲ?

ကျွန်တော်တို့ ခြေဖဝါးမှာ Plantar Fascia လို့ခေါ်တဲ့ အရွတ်ပြားတစ်ခုရှိပါတယ်။ အရှည်ရေးရရင် တွယ်ဆက်တစ်ရှူးအစုအဖွဲ့တစ်ခုပါ (A band of connective tissue) နားလည်လွယ်အောင် အရွတ်ပြားလို့ပဲ သုံးပါရစေ။

Plantar Fascia က ခြေဖနောင့်အရိုးနေရာကနေ စတင်ပြီး ခြေဖဝါးအရိုးလေးတွေရဲ့ထိပ်အထိ လေးကြိုးသဖွယ် မှီတွယ်တည်ရှိနေတဲ့ အရွတ်ပြားဖြစ်ပါတယ်။ အဲ့ဒီ အရွတ်ပြားကြောင့် ကျွန်တော်တို့ရဲ့ ခြေဖဝါးအခုံး ဖြစ်ပေါ်လာပြီး လမ်းလျှောက်လို့ရတာဖြစ်ပါတယ်။ လမ်းလျှောက်တဲ့အချိန်တိုင်း၊ ခြေဖဝါးကို နင်းလိုက်တဲ့အချိန်တိုင်း၊ ဖိအားသက်ရောက်တိုင်းမှာ အဲ့ဒီ အရွတ်ပြားက shock absorber အနေနဲ့ ကျုံ့လိုက်၊ ဆန့်လိုက် အလုပ်လုပ်ရပါတယ်။

အဲ့ဒီ အရွတ်ပြားကို အလွန်အကျွံ အသုံးပြုလာရတဲ့အခါ ခြေဖနောင့်အရိုး အတက်ထွက်ခြင်း ဖြစ်လာနိုင်ပါတယ်။

🔴 ဘယ်လိုလူတွေမှာ ခြေဖနောင့်အရိုးအတက်ထွက်ခြင်းဖြစ်နိုင်လဲ?

အားကစားသမားတွေ၊ အပြေးသမားတွေဟာ ခြေထောက်ကိုအလွန်အကျွံ အသုံးပြုရခြင်းကြောင့် ခြေဖနောင့်အတက်ထွက်ခြင်း ဖြစ်နိုင်ပါတယ်။

အားကစားသမားမဟုတ်တဲ့ သာမန်လူတွေမှာလဲ အောက်ပါအချက်တွေကြောင့် Plantar fasciitis ဖြစ်နိုင်ပါတယ်။

🔸အဝလွန်သူများ (BMI > 27)
🔸ခြေသလုံးကြွက်သားတင်းသူများ (Calf muscle tightness)
🔸အလုပ်အကိုင်ကြောင့် အကြာကြီးမတ်တတ်ရပ်ရ၊ လမ်းလျှောက်ရသူများ
🔸ခြေဖဝါးအခုံးမြင့်သူများ (High arch)
🔸Excessive foot pronation ရှိသူများ
🔸Sedentary lifestyle နေသူများ

🔴 ခြေဖနောင့်အတက်ထွက်ရင် ဘယ်လိုလက္ခဏာတွေရှိလဲ?

🔸ခြေဖနောင့်မှာ စူးပြီးနာခြင်း၊
🔸မနက်ပိုင်းတွေမှာပိုပြီး နာတတ်ပါတယ် (အထူးသဖြင့် အိပ်ရာထစ ပထမခြေလှမ်းမှာ ပိုပြီးနာပါတယ်)
🔸ခြေလှမ်း လှမ်းတာနဲ့ လှုပ်ရှားမှု အနည်းငယ်လုပ်ပြီးတဲ့အခါ နာတာသက်သာသွားတတ်ပြီးတော့
🔸ညနေဘက်၊ ညဘက်တွေမှာ ပြန်လို့ နာလာတတ်ပါတယ်။

🔴 ခြေဖနောင့်အတက်ထွက်တာကို ဘယ်လိုကုသနိုင်လဲ?

အိမ်တွင်းကုသမှုအနေနဲ့ ခြေဖနောင့်နာတဲ့နေရာကို ရေခဲကပ်တာ၊ ပျော့အိသောဖိနပ် ပြောင်းစီးတာ (ခြေစွပ်ဖိနပ်စီးလေ့ရှိတဲ့သူတွေမှာ heel pad ထည့်စီးတာ)၊ ရေခဲဘူး (သို့မဟုတ်) အအေးဘူးကို ခြေဖဝါးနဲ့လှိမ့်တာ (ပုံတွင်ကြည့်ပါ) ပြုလုပ်ခြင်းဖြင့် နာတာသက်သာစေနိုင်ပါတယ်။

ထို့နောက် နားလည်တတ်ကျွမ်းသော အကြောအဆစ်ကုပညာရှင် Physiotherapist များ၊ ဆရာဝန်များနဲ့ တိုင်ပင်ပြီး Medical & Physical Treatment များ ရယူနိုင်ပါတယ်။

Medical therapy အနေနဲ့ များသောအားဖြင့် NSAIDs ဆေးဝါးများ၊ corticosteroid ထိုးဆေးများ အသုံးပြု၍ ကုသကြပါတယ်။

ကျွန်တော်တို့ Physiotherapist အနေနဲ့ကတော့ လူနာအခြေအနေပေါ်မူတည်ပြီး treatment option တွေအမျိုးမျိုးအသုံးပြုကြပါတယ်။ Ultrasound, TENs, Shock Wave Therapy စတဲ့ Modalities များကို Electrotherapy အနေနဲ့ အသုံးပြုသလို၊ Stretching exercise, strengthening exercise, foot orthoses, taping , night splints အစရှိသဖြင့် လူနာအခြေအနေပေါ်မူတည်လို့ ကုသမှုပေးကြပါတယ်။ လေ့ကျင့်ခန်းအချို့ကို ပုံတွင်ကြည့်ပါ။

အပေါ်မှာရေးထားတဲ့ ကုသမှုတွေယူသည့်တိုင်အောင် နာကျင်မှုက လျော့မသွားဘဲ ၆လကနေ တစ်နှစ်အထိကြာနေပြီဆိုတော့မှ ခွဲစိတ်ကုသခြင်း ပြုလုပ်ရပါတယ်။ ဒါပေမယ့် ရှားပါတယ်။ များသောအားဖြင့် medical and physical therapy နဲ့တင် သက်သာပျောက်ကင်းကြပါတယ်။

ခြေဖနောင့်အတက်ထွက်ခြင်းကြောင့် ကုသမှုယူရတဲ့အခါ Proper Treatment ရရှိဖို့အရေးကြီးပါတယ်။ စနစ်တကျ ကုသမှုရရှိတဲ့အခါ လူနာတွေရဲ့ ၉၀ ရာခိုင်နှုန်းမှာ အချိန်တိုအတွင်း သက်သာလာတာကို တွေ့ရှိရပါတယ်။

ဒါကြောင့်
အားလုံးပဲ မိမိတို့ရောဂါဝေဒနာအတွက် အမှန်တကယ် လိုအပ်သော စနစ်တကျကုသမှုများရရှိပြီး အမြန်ဆုံးသက်သာပျောက်ကင်းနိုင်ကြပါစေလို့ ဆုတောင်းပေးလိုက်ပါတယ်ရှင်။

𝗛𝗮𝘃𝗲 𝗮 𝗻𝗶𝗰𝗲 𝘄𝗲𝗲𝗸𝗲𝗻𝗱 𝗮𝗵𝗲𝗮𝗱!

𝗛𝗻𝗶𝗻 - 𝗧𝗵𝗲 𝗣𝗵𝘆𝘀𝗶𝗼𝘁𝗵𝗲𝗿𝗮𝗽𝗶𝘀𝘁
10/6/2022

References
https://journals.lww.com/jaapa/fulltext/2018/01000/plantar_fasciitis__a_review_of_treatments.4.aspx
https://www.aafp.org/pubs/afp/issues/2019/0615/p744.html