10/09/2022
Diclofenac Sodium (ဒိုင်ကလိုဖီနက် ဆိုဒီယမ်)
စတီးရွိုက်မဟုတ်သော အရောင်ကျဆေး(NSAID) ဆေးတစ်မျိုးဖြစ်သည်။ အရောင်ကျစေပြီး နာကျင်မှုသက်သာစေသော အာနိသင်အလွန်ထက်မြက်သည်။ အဖျားလည်း ကျစေသည်။
အသုံးဝင်ပုံ
ရူမက်တစ်အဆစ်ရောင်ရောဂါအမျိုးမျိုးတွင် အရောင်ကျပြီး နာကျင်မှုကိုလည်း သက်သာစေသည်။ အခြားအရိုးအကြောရောဂါများနှင့် ဂေါက် အဆစ်ရောင်နာတွင်လည်း အသုံးပြုသည်။ ခွဲစိတ်ပြီးစလူနာများ နာကျင်မှုဝေဒနာသက်သာစေရန်လည်း ထိုးဆေးအဖြစ်သော်လည်းကောင်း စအိုထဲထည့်သော ဆေးတောင့်အဖြစ်သော်လည်းကောင်း အသုံးပြုသည်။
ဆေးညွှန်းနှင့်အသုံးပြုပုံ
စားဆေး တစ်နေ့လျှင် 75-150 မီလီဂရမ်ကို နှစ်ကြိမ်(သို့မဟုတ်)သုံးကြိမ်ခွဲ၍ သောက်ရသည်။ အသားထိုးဆေး ခွဲစိတ်ပြီးစလူနာများ နာကျင်မှုသက်သာရန်နှင့် ဆိုးရွားသောအဆစ်ရောင်နာများတွင် 75 မီလီဂရမ်ကို တင်ပါးတွင် နက်နက်ထိုးရသည်။ ဆီးလမ်းကြောင်းကြောက်တည်၍ ဆီးထိုးသည့်ဝေဒနာ သက်သာရန်လည်း အသားဆေးထိုးနိုင်သည်။ စအိုထဲထည့်သောဆေးတောင့် 75-150 မီလီဂရမ်ကို အကြိမ်ခွဲ၍ထည့်ပေးနိုင်သည်။ စားဆေးဖြစ်စေ ထိုးဆေးဖြစ်စေ စအိုထဲထည့်သောဆေးတောင့်ဖြစ်စေ တစ်နေ့လျှင် 150 မီလီဂရမ်ထက်မပိုသင့်ပါ။
သတိပြုရန်
အစာအိမ်နာဖြစ်ဖူးသူများ အသည်း နှလုံးနှင့် ကျောက်ကပ်ဝေဒနာရှိသူများ သက်ကြီးရွယ်အိုများ သတိထားသုံးရမည်။
ဆေးအပြစ်များ
ရင်ပြည့်ရင်ကယ်ဖြစ်ခြင်း လေချဉ်တက်ခြင်း ဗိုက်အောင့်ခြင်း ပျို့ခြင်း ဝမ်းလျှောခြင်း ခေါင်းကိုက်ခြင်း ခေါင်းနောက်ခြင်းများ
ဖြစ်တတ်ပါသည်။ အရည်ပြားပေါ်တွင် အဖုအပိမ့်ထွက်ခြင်း ဖောရောင်ခြင်း အသည်းထိခိုက်ခြင်း
ဖြစ်နိုင်ပါသည်။ အစာလမ်းကြောင်း အနာဖြစ်ခြင်းနှင့် သွေးယိုခြင်း အသားဝါခြင်း အသည်းရောင်ခြင်း ကျောက်ကပ်အားလျော့ခြင်းလည်း ဖြစ်နိုင်ပါသည်။ ဤသို့ဖြစ်လျှင် ဆေးကို ချက်ချင်းရပ်ရပါမည်။ သွေးဆဲလ်အရေအတွက်များ လျော့ကျခြင်း ရှားပါးသော်လည်း မဖြစ်ဟု မဆိုနိုင်ပါ။
ရှောင်ရန်
ကိုယ်ဝန်ဆောင်များ ဖြစ်နိုင်လျှင် မသုံးသင့်ပါ။ အစာအိမ်နာ အူသိမ်ဦးပိုင်းနာရှိသူများ အစာလမ်းကြောင်း သွေးယိုခြင်းဖြစ်နေသူများ ဤဆေးနှင့်မတည့်သူများ ရှောင်ရပါမည်။ အသည်းရောင်ခြင်း ကျောက်ကပ်အားလျော့ခြင်းများတွင်လည်း မသုံးရပါ။
ဝယ်ယူရရှိနိုင်သော ဆေးအမည်အချို့
Afenac,A-Fenac,Analpan,Clofec,Clofenac,Cox So Gel,Definil,Diclodenk,Diclofen, Diclofenac Sodium,Diclomol,Diclonac,Dicloral,Dicloran,Diclosan,Diclotal,Difisal,Diflosid,Difnac,Divoltar,Dofec,Dolmax,Dyclo,Dynapar,Erdon,Formin,Grofenac,K Veran,Masaren,Medinac,Megnac Gel,Mobifen,Moven,Neo Pyrazon,Onova,Panagesic,Philco-Diclo,Profenac,Putaren,Remafen,Remethan,Soludol,Subsyde,Tarjena,Ultrafen,Umeran,Uniren Spray,Veenac,Versar,Vesconac Gel,Vesnac,Vetin Gel,Vivian Gel,Volero,Volfen,Volnac,Volta,Voltex,Versar Plus(with Paracetamol),Lobak(with Paracetamol and Chlorozoxazone)
ခေတ်ပေါ်ဆေးဝါးလမ်းညွှန်(ဒေါက်တာဇေယျ)
စာအုပ်မှ ကောက်နုတ်ချက်
မှတ်ချက်။ ။မည်သည့်ဆေးဝါးမဆို ဆရာဝန်လမ်းညွှန်မှုဖြင့်သာ အသုံးပြုသင့်သည်။
Credit... Original writer
