07/10/2025
𝐇. 𝐩𝐲𝐥𝐨𝐫𝐢 (𝐇𝐞𝐥𝐢𝐜𝐨𝐛𝐚𝐜𝐭𝐞𝐫 𝐩𝐲𝐥𝐨𝐫𝐢) ဆိုတာ အစာအိမ်ရဲ့ အတွင်းနံရံမှာ ရှင်သန်ပေါက်ဖွားနိုင်တဲ့ ဘက်တီးရီးယားပိုးတစ်မျိုး ဖြစ်ပါတယ်။
ကမ္ဘာ့လူဦးရေရဲ့ ထက်ဝက်ကျော်လောက်မှာ ဒီပိုးရှိနေနိုင်ပေမယ့် လူတိုင်းမှာတော့ ရောဂါလက္ခဏာ မပြတတ်ပါဘူး။ ဒါပေမဲ့ တချို့လူတွေအတွက်တော့ အစာအိမ်ရောင်ခြင်း၊ အစာအိမ်အနာဖြစ်ခြင်းကနေ အစာအိမ်ကင်ဆာအထိ ဖြစ်ပွားစေနိုင်တဲ့ အဓိကတရားခံတစ်ခု ဖြစ်ပါတယ်။
❗ဘယ်လိုကူးစက်နိုင်သလဲ?
𝐇. 𝐩𝐲𝐥𝐨𝐫𝐢 ပိုးဟာ အဓိကအားဖြင့် အောက်ပါနည်းလမ်းတွေနဲ့ ကူးစက်နိုင်ပါတယ်။
ညစ်ညမ်းသော အစားအစာနှင့် ရေ ဒါမှမဟုတ် သေချာမကျက်သေးတဲ့ အစားအစာတွေ စားသုံးမိရာကနေ ကူးစက်နိုင်ပါတယ်။ တံတွေး၊ အာခံတွင်းမှတစ်ဆင့် (ဥပမာ- အိုးခွက်၊ ပန်းကန်၊ ဇွန်း မျှဝေသုံးစွဲခြင်း)။ မသန့်ရှင်းသော လက်များမှတစ်ဆင့်။ ပိုးရှိသူရဲ့ မစင်၊ အန်ဖတ်တို့နဲ့ ထိတွေ့မိရာကနေလည်း ကူးစက်နိုင်ပါတယ်။
ဖြစ်တတ်သော ရောဂါလက္ခဏာများတွေကတော့ ❗❗
𝐇. 𝐩𝐲𝐥𝐨𝐫𝐢 ပိုးရှိတဲ့လူအများစုဟာ လက္ခဏာမပြတတ်ပါဘူး။ ဒါပေမဲ့ အစာအိမ်နံရံကို ပိုးက တိုက်ခိုက်ပြီး ရောင်ရမ်းလာတဲ့အခါ အောက်ပါလက္ခဏာတွေ ဖြစ်လာနိုင်ပါတယ်။
ဗိုက်အောင့်ခြင်း၊ ဗိုက်နာခြင်း- အထူးသဖြင့် ဗိုက်အပေါ်ပိုင်းမှာ ပူစပ်ပူလောင်ဖြစ်ပြီး နာကျင်ခြင်း။ အစာမရှိချိန် (ဗိုက်ဆာချိန်) မှာပိုဆိုးတတ်ပါတယ်။
လေပွခြင်း၊ လေထိုးခြင်း။
မကြာခဏ လေချဉ်တက်ခြင်း။
ပျို့အန်ခြင်း။
အစာစားချင်စိတ် မရှိခြင်း။
ကိုယ်အလေးချိန် ကျဆင်းသွားခြင်း စတဲ့လက္ခဏာများဖြစ်ပေါ်တတ်ပါတယ်။
𝐇. 𝐩𝐲𝐥𝐨𝐫𝐢 ပိုးကို သေချာမကုသဘဲထားရင် အောက်ပါ နောက်ဆက်တွဲ ကျန်းမာရေးပြဿနာများ ဖြစ်လာနိုင်ပါတယ်။❗❗❗
အစာအိမ်ရောင်ခြင်း (𝐆𝐚𝐬𝐭𝐫𝐢𝐭𝐢𝐬): အစာအိမ်အတွင်းသားတွေ ရောင်ရမ်းပြီး နာကျင်စေပါတယ်။ အစာအိမ်နှင့် အူသိမ်ဦးပိုင်းအနာ (𝐏𝐞𝐩𝐭𝐢𝐜 𝐔𝐥𝐜𝐞𝐫𝐬): အစာအိမ်နဲ့ အူသိမ်မှာ အနာတွေဖြစ်စေပြီး သွေးထွက်ခြင်း၊ အစာအိမ်ပေါက်ခြင်းတို့ ဖြစ်နိုင်ပါတယ်။
အစာအိမ်ကင်ဆာ (𝐒𝐭𝐨𝐦𝐚𝐜𝐡 𝐂𝐚𝐧𝐜𝐞𝐫): 𝐇. 𝐩𝐲𝐥𝐨𝐫𝐢 ပိုးဟာ အစာအိမ်ကင်ဆာဖြစ်စေနိုင်တဲ့ အဓိက 𝐑𝐢𝐬𝐤 𝐅𝐚𝐜𝐭𝐨𝐫 တစ်ခုဖြစ်တယ်လို့ သတ်မှတ်ထားပါတယ်။ ပိုးရှိသူတိုင်း ကင်ဆာမဖြစ်ပေမယ့် ဖြစ်နိုင်ခြေကို မြင့်တက်စေပါတယ်။ ဆရာဝန်တွေက 𝐇. 𝐩𝐲𝐥𝐨𝐫𝐢 ပိုးရှိ၊ မရှိကို အောက်ပါနည်းလမ်းတွေနဲ့ စစ်ဆေးလေ့ရှိပါတယ်။ 𝐔𝐫𝐞𝐚 𝐁𝐫𝐞𝐚𝐭𝐡 𝐓𝐞𝐬𝐭 (လေမှုတ်စစ်ဆေးခြင်း): ဆေးရည်တစ်မျိုးကို သောက်ပြီးနောက် လေကိုအိတ်ထဲ မှုတ်ထုတ်ကာ စစ်ဆေးတဲ့နည်းပါ။ အလွယ်ကူဆုံးနဲ့ အသုံးအများဆုံး နည်းလမ်းတစ်ခု ဖြစ်ပါတယ်။
𝐒𝐭𝐨𝐨𝐥 𝐀𝐧𝐭𝐢𝐠𝐞𝐧 𝐓𝐞𝐬𝐭 (ဝမ်းစစ်ဆေးခြင်း): ဝမ်းနမူနာထဲမှာ ပိုးရဲ့ 𝐀𝐧𝐭𝐢𝐠𝐞𝐧 ရှိ၊ မရှိ စစ်ဆေးတာပါ။
𝐁𝐥𝐨𝐨𝐝 𝐓𝐞𝐬𝐭 (သွေးစစ်ဆေးခြင်း): သွေးထဲမှာ ပိုးကိုတိုက်ထုတ်တဲ့ 𝐀𝐧𝐭𝐢𝐛𝐨𝐝𝐲 ရှိ၊ မရှိ စစ်ဆေးတာပါ။ ❗ဒါပေမဲ့ ဒီနည်းက လက်ရှိပိုးရှိနေတာလား၊ အရင်ကဖြစ်ဖူးတာလားဆိုတာကို တိတိကျကျ မခွဲခြားနိုင်ပါဘူး။
𝐄𝐧𝐝𝐨𝐬𝐜𝐨𝐩𝐲 (အစာအိမ်ကြည့်မှန်ပြောင်းကြည့်ရှုခြင်း): ပါးစပ်ကနေ မှန်ပြောင်းထည့်ပြီး အစာအိမ်အတွင်းပိုင်းကို တိုက်ရိုက်ကြည့်ရှုကာ လိုအပ်ပါက အသားစယူပြီး (𝐁𝐢𝐨𝐩𝐬𝐲) စစ်ဆေးတဲ့နည်းပါ (အတိကျဆုံးနည်းလမ်းဖြစ်ပါတယ်)။
𝐇. 𝐩𝐲𝐥𝐨𝐫𝐢 ပိုးကို ကုသရာမှာ-
ပဋိဇီဝဆေး (𝐀𝐧𝐭𝐢𝐛𝐢𝐨𝐭𝐢𝐜𝐬): ပိုးကိုသေစေဖို့ အနည်းဆုံး ပဋိဇီဝဆေး (၂) မျိုးကို တစ်ပြိုင်နက် ပေးလေ့ရှိပါတယ်။ (ဥပမာ- 𝐂𝐥𝐚𝐫𝐢𝐭𝐡𝐫𝐨𝐦𝐲𝐜𝐢𝐧, 𝐀𝐦𝐨𝐱𝐢𝐜𝐢𝐥𝐥𝐢𝐧, 𝐌𝐞𝐭𝐫𝐨𝐧𝐢𝐝𝐚𝐳𝐨𝐥𝐞)
အက်စစ်လျှော့ဆေး (𝐏𝐫𝐨𝐭𝐨𝐧 𝐏𝐮𝐦𝐩 𝐈𝐧𝐡𝐢𝐛𝐢𝐭𝐨𝐫𝐬 - 𝐏𝐏𝐈𝐬): အစာအိမ်က အက်စစ်ထွက်တာကို လျှော့ချပေးတဲ့ဆေးပါ။ ဒီဆေးက အစာအိမ်အနာကို ကျက်စေပြီး ပဋိဇီဝဆေးတွေရဲ့ အာနိသင်ကို ပိုကောင်းစေပါတယ်။ (ဥပမာ- 𝐎𝐦𝐞𝐩𝐫𝐚𝐳𝐨𝐥𝐞, 𝐋𝐚𝐧𝐬𝐨𝐩𝐫𝐚𝐳𝐨𝐥𝐞)
များသောအားဖြင့် ပိုးသတ်ဆေးများကို (၂) ပတ်အထိ နေ့စဉ်ပုံမှန် သောက်ရပါတယ်။
🚨သတိထားရမယ့် ဆရာဝန်ညွှန်ကြားတဲ့ ဆေးတွေကို အကုန်ကုန်အောင် သောက်ဖို့ အလွန်အရေးကြီးပါတယ်။ ရောဂါလက္ခဏာ သက်သာသွားပေမယ့် ဆေးကိုရပ်လိုက်ရင် ပိုးတွေပြန်ပွားပြီး ဆေးယဉ်ပါးမှု ဖြစ်နိုင်ပါတယ်။ 𝐇. 𝐩𝐲𝐥𝐨𝐫𝐢 ပိုးဟာ အဖြစ်များပြီး ကုသလို့ရတဲ့ ရောဂါတစ်ခုဖြစ်ပါတယ်။ အကယ်၍ သင့်မှာ အစာအိမ်နဲ့ပတ်သက်တဲ့ နာတာရှည် လက္ခဏာတွေ (ဥပမာ- မကြာခဏ ဗိုက်အောင့်ခြင်း၊ လေပွခြင်း) ရှိနေပါက မိမိသဘောဖြင့် ဆေးများဝယ်မသောက်ဘဲ ဆရာဝန်နဲ့ သေချာတိုင်ပင်ဆွေးနွေးပြီး စစ်ဆေးကုသမှု ခံယူသင့်ပါတယ်။ မှန်ကန်တဲ့ ကုသမှုက နောက်ဆက်တွဲဆိုးကျိုးတွေကို ကာကွယ်ပေးနိုင်မှာ ဖြစ်ပါတယ်။
