Shwe Su Myat Medical and Diagnostic Center

12/10/2025

🪲 "မီးပိုးကောင်" 🪲

M seng Lu သာအကိုက်မခံရဘူးဆိုရင်...
ဒီအကောင်ရှိတာ
မေ့မေ့ပျောက်ပျောက်ကို ဖြစ်နေမှာပါ။

ဒီအကောင်လေးတွေက Paederus beetle လို့ခေါ်တဲ့
Insect တစ်မျိုးဖြစ်ပါတယ်။

ပုံစံကတော့ခပ်သေးသေး၊
အမည်းနဲ့အနီစပ်ကြားအရောင်ရှိပြီး
လူကိုကိုက်တာမျိုးတော့မလုပ်တတ်ပါဘူး။

ဒါပေမဲ့....
လူတွေကသူရှိနေတာကိုမသိပဲ
ဖိမိတယ်၊ ချေမိတယ်ဆိုရင်
သူ့ဆီက Pederin လို့ခေါ်တဲ့အဆိပ်တစ်မျိုးထွက်လာပါတယ်။

ဒီအဆိပ်က ...
အရေပြားထဲစိမ့်ဝင်ပျံ့နှံ့မှုကောင်းတာကြောင့်
အရေပြားထဲစိမ့်ဝင်ပြီး အရေပြားရောင်ရမ်းတဲ့လက္ခဏာတွေပြလာတာပါ။

ဒီအဆိပ်နဲ့ထိတွေ့မိပြီး ၁၂ နာရီလောက်အကြာမှာပဲ...
⚠️ အရေပြားနီရဲရောင်ရမ်းလာမယ်၊
⚠️ အရည်ကြည်ဖုတွေထလာမယ်၊
⚠️ မျဉ်းကြောင်းလိုအနာပုံစံပေါက်လာမယ်၊
⚠️ စပ်ဖျဉ်းဖျဉ်းနဲ့ အပူလောင်သလိုခံစားရတာမျိုးတွေ ဖြစ်လာနိုင်ပါတယ်။

ဒီတော့ဘယ်လိုကုသရမလဲ...❓
စိုးရိမ်ရလားပေါ့...❓

အကောင်နဲ့ထိတွေ့မိတာသိသိချင်း
ဆပ်ပြာနဲ့ရေနဲ့သေချာလေးဆေးကြောပေးပါ။ ✅

အရေပြားနီရဲရောင်ရမ်းနာကျင်လာတယ်ဆိုရင်...
ရေခဲကပ်တာ ✅
နဖူးပေါ်ရေပတ်ဝတ်တင်သလို အဝတ်စအသန့်နဲ့
ရေအေးအေးစွတ်ပြီးကပ်ပေးတာ ✅
Steriod cream လိမ်းဆေးလိမ်းတာမျိုး ✅
လုပ်ပေးလို့ရပါတယ်။

❌ အရက်ပြန်သုံးတာ၊
❌ လက်နဲ့ကုတ်ဖဲ့တာ၊
❌ ဟိုအရွက်ကပ် ဒီအရွက်ကပ်တွေ
လုံးဝ(လုံးဝ)မလုပ်သင့်ပါ။

‼️အဆိပ်ကိုပိုမိုပျံ့နှံ့စေပြီး ပိုးဝင်ကာ
အနာကိုပိုဆိုး‌စေနိုင်ပါတယ်။

ဒီတော့အကောင်းဆုံးက...

✔️ အကောင်လေးတွေကမီးအလင်းရောင်ကြိုက်လို့
ညဘက်မီးပိတ်တာ၊ မီးရောင်လျှော့အိပ်တာ
✔️ ခြင်ထောင်ထောင်ပြီးအိပ်တာ၊
✔️ အိမ်ကိုသန့်သန့်ရှင်းရှင်းထားတာ၊
✔️ ပိုးကောင်တွေမဝင်အောင်ဇကာတပ်တာ
✔️ ပိုးကောင်‌လေးတွေအရေပြားပေါ်နားတဲ့အခါ
ဖိချေတာမျိုးမလုပ်ပဲ လေနဲ့မှုတ်ထုတ်တာ၊
စက္ကူလေးနဲ့ကလော်တာမျိုးလုပ်တာ
အနာဖြစ်ပြီဆိုတာနဲ့ ပိုနားလည်တတ်ကျွမ်းတဲ့
ဆရာဝန်နဲ့ပြသပါလို့ အကြံပြုလိုက်ပါရစေ။🙏🏻



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

08/10/2025

📌"လူမသိသူမသိ သွေးတိုးအကြောင်းတွေ..."📌
__________________________________________________

📍 ၁။ သွေးတိုး‌ရောဂါက
အငန်စားတာတစ်ခုထဲကြောင့် မဟုတ်ပါ။

_ အသက် (ကြီးလာရင်)
_ မိသားစုရာဇဝင်
_ အစားအသောက် (အဆီ၊ အငန်)
_ အနေအထိုင် (လှုပ်လှုပ်ရှားရှားမရှိ)
_ ဆေးလိပ်၊ အရက်၊ ကွမ်း
_ Stress များ၊ အိပ်ရေးမဝ

ဒီအချက်တွေအားလုံးက
သွေးတိုးရောဂါဖြစ်စေနိုင်ပါတယ်။

ဒါကြောင့်...
သွေးတိုးရှိတဲ့သူပဲဖြစ်ဖြစ်၊
မရှိသေးတဲ့သူပဲဖြစ်ဖြစ်
အတတ်နိုင်ဆုံးဒီအချက်တွေထဲက
ရှောင်လို့ရတာ‌ရှောင်၊ ဆောင်လို့ရတာဆောင်ရင်
သွေးတိုးရောဂါဖြစ်နိုင်ချေနည်းလာပါမယ်။
_________________________________________________

📍၂။ သွေးတိုးနဲ့ဆီးချိုကတွဲနေနိုင်တယ်။

ဒီရောဂါနှစ်ခုက Risk factor တွေဆင်တူကြတယ်။

ပြောချင်တာက...
ဥပမာ- အဆီတွေအရမ်းအစားများရင်...
အဆီပိတ်ပြီး သွေးလည်းတိုးနိုင်သလို..
အဆီကြောင့် Insulin resistance ကျပြီး
ဆီးချိုလဲဖြစ်လာနိုင်တယ်။

ဒါကြောင့် သွေးတိုးရှိတဲ့သူက
အစားအသောက်အနေအထိုင်မဆင်ခြင်ဘူး၊
ဆေးမသောက်ဘူးဆိုရင်
ဆီးချိုလဲတွဲဖြစ်လာနိုင်သလို ...

ဆီးချိုသမားလဲအလားတူပါပဲ။
__________________________________________________

📍 ၃။ သွေးထိန်းဆေး/ကျဆေးများကို
နေ့တိုင်းမပြတ်သောက်ရပါမယ်။

သွေးတိုးရော၊ ဆီးချိုရော ...

ဒီရောဂါတွေကလုံးဝ
ပျောက်ကင်းသွားတယ်ဆိုတာမရှိပါဘူး။

Control ရတယ်မရဘူးပဲရှိပါတယ်။

ဒါကြောင့် Control ရချင်တယ်၊
ရောဂါသက်သာချင်တယ်၊
ဒီရောဂါရဲ့ နောက်ဆက်တွဲဆိုးကျိုးတွေ
မခံစားချင်ဘူးဆိုရင်
ဆေးပုံမှန်‌နေ့တိုင်းသောက်ရပါမယ်။

တကယ်က...
သွေးထိန်းဆေးနဲ့ သွေးကျဆေးတူတူပါပဲ။

သွေးကျဆေးလို့ပြောရင်
သွေးပေါင်တက်မှသောက်ရတယ်ထင်ကြလွန်းလို့ သွေးထိန်းဆေးလို့ပြောင်းခေါ်ကြတာ...။

သွေးတိုးကရောဂါရှိတာသေချာပြီဆိုတာနဲ့
ဆေးက နေ့တိုင်းတောက်လျှောက်‌‌ပုံမှန်မှီဝဲရမှာပါ။

အစားအသောက်အနေအထိုင်လဲဆင်ခြင်တယ်၊
ဆေးလိပ်၊ အရက်လဲဖြတ်တယ်၊
ကျန်းမာအောင်လဲနေထိုင်တယ်ဆိုရင်...

တစ်ရက်မှဆေးတစ်လုံးလောက်သောက်ရတာပဲဗျာ..

ဆေးပုံမှန်သောက်မလား....
လေဖြတ်တဲ့ထိဒီတိုင်းပဲနေမလား...
သေချာစဉ်းစားကြည့်နော်။
__________________________________________________

📍 ၄။ သွေးတိုးတာက
ရောဂါအခံတစ်ခုကြောင့်လဲ ဖြစ်နေနိုင်တယ်။

လူအများစုပေါ့နော်..
90% သောလူ‌တွေမှာ သွေးတိုးရောဂါဖြစ်ကြတာကို
Primary or Essential Hypertension လို့ခေါ်ပါတယ်။

ဒါပေမဲ့တချို့လူတွေမှာ သွေးတိုးတယ်ဆိုပေမဲ့ သွေးတိုးရောဂါကြောင့်မဟုတ်ပဲ
တခြားအကြောင်းအရင်းတစ်ခုကြောင့်
သွေးပေါင်တက်နေတာမျိုးဖြစ်နိုင်တယ်။

ဥပမာ- ကျောက်ကပ်မကောင်းတာ၊
ဟော်မုန်းစနစ်မှာပြဿနာတစ်ခုခုရှိတာ
စတဲ့အခြေအနေတွေမှာဆိုရင်လည်း
သွေးတိုးနေနိုင်တယ်။

ဒါတွေကြောင့်သွေးတိုးတာဆိုရင်တော့
ဖြစ်စေတဲ့ရောဂါအရင်းခံကိုကုလိုက်ရင်
သွေးတိုးပါတခါထဲပျောက်သွားမှာဖြစ်ပါတယ်။
__________________________________________________

📍 ၅။ ဆေးမသောက်ရင်ဘာတွေဖြစ်လာမလဲ..

စဉ်းစားကြည့်ပါ။

သွေးတိုးနေတယ်ဆိုတာ
ကျွန်တော်တို့ရဲ့သွေးကြောတွေထဲမှာ
Pressure တွေတက်နေတာ...

သွေးတွေဒလဟောအရှိန်နဲ့စီးဆင်းနေတဲ့အခါ
သွေးကြောနံရံတွေကိုပွတ်တိုက်ပါများပြီး
နံရံတွေဒဏ်ဖြစ်လာတယ်။

ဒဏ်ဖြစ်လာတဲ့နေရာကို
သွေးဥမွှား Cell လေးတွေစုသွားတဲ့အခါ
သွေးခဲလိုဖြစ်လာတယ်။

အဲ့သွေးခဲကကြီးလာရင်း ပြုတ်ထွက်ပြီး
ဦးနှောက်သွေးကြောသွားပိတ်ရင် လေဖြတ်မယ်၊
နှလုံးသွေးကြောသွားပိတ်ရင် Heart Attack ရမယ်၊
အဆုတ်‌သွေးကြောသွားပိတ်ရင် အသက်ရှုရခက်လာမယ်၊ အကုန်သေတတ်တာကြီးပါပဲ။

ဒါမှမဟုတ်လဲ လေပူဖောင်းလို...
လေမတရားတင်းလာရင်ပေါက်ထွက်သွားနိုင်သလိုပဲ

Pressure တွေများလာတဲ့သွေးကြောတွေက
ဖောင်းပြီး ပေါက်ထွက်သွားနိုင်တယ်။

မျက်စိသွေးကြောပေါက်သွားရင်
မျက်စိကွယ်သွားမယ်၊
ခေါင်းထဲကသွေးကြောတခုခုပေါက်သွားရင်
ဦးနှောက်ထဲသွေးယိုစီးမယ်။

တခါတလေ သွေးကြောက
အဆီတွေများလို့ပိတ်ဆို့တယ်ဆိုရင်...

ကျောက်ကပ်ကသွေးကြောသာဆို
ကျောက်ကပ်သွေးမရပဲအလုပ်မလုပ်တော့ဘူး။
==========================================

ဆိုတော့ ...
သွေးတိုးကိုသေချာမကုသဘူးဆိုရင်
သင်ထင်ထားတာထက်
ပိုပြီးအခြေအနေဆိုးနိုင်တယ်ဆိုတာ
ခေါင်းထဲရှိထားဖို့လိုပါတယ်။

❗⭐ အရေးအကြီးဆုံးက ...
ဆေးသောက်ရုံနဲ့လည်းမပြီးသေးပဲ၊
အစားအသောက်အနေအထိုင်ကစလို့
အစစအရာရာဆင်ခြင်မှ
ရောဂါပိုပိုသက်သာပြီး
လူကောင်းပကတိလို နေထိုင်နိုင်မှာပါလို့
အကြုံပြုချင်ပါတယ်။ 🙏🏻

🙏🏻 မြန်မာပြည်သူပြည်သားအားလုံး
သီတင်းကျွတ်အခါသမယမှာ
စိတ်ချမ်းသာကိုယ်ကျန်းမာကြပါစေ။ 🙏🏻



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

05/10/2025

05/10/2025

📌📌📌
ငေါက်ခနဲ သေသွားနိုင်သောအကြောင်းတရားများ

ကွေးသောလက်မဆန့်ခင်...
ဆန့်သောလက်မကွေးခင်...

သေခြင်းတရားက
ကျွန်တော်တို့နဲ့အဲ့လောက်ထိကို
နီးနီးကပ်ကပ်ရှိနေတာပါ။

ဝင်‌‌သွားတဲ့လေပြန်မထွက်တော့ရင်..
ထွက်သွားတဲ့လေပြန်မဝင်တော့ရင်..

ဒါဟာဘဝတစ်ခုပြီးသွားတာပါပဲ။

တကယ်ကိုတရားကျစရာတော့ကောင်းပါတယ်။

သေတယ်ဆိုထဲက..
ရောဂါနဲ့သေသွားတာလဲရှိသလို
ဗုဒ္ဓဘာသာအရ
ဥပေစ္ဆဒကကံနဲ့ သေသွားကြတာမျိုးလဲ
ရှိတာပေါ့။

ရောဂါနဲ့သေတာမှာမှ..
ကင်ဆာလိုကြာမှသေတာမျိုးနဲ့
ချက်ချင်း ငေါက်ခနဲသေသွားတာမျိုး
ကြားဖူးကြမှာပါပဲ။

"သူလား.. မနေ့ကမှအကောင်းကြီးလေ
ဘယ်လိုဖြစ်ရတာတုန်း..."
ဒါမျိုးအဖြစ်အပျက်တွေကြုံကြမှာပါ။

ဘယ်လိုလုပ်ပြီးသေသွားရတာလဲဆိုတာလဲ
သိချင်ကြတာပဲမလား...

သိလဲသိထားသင့်ပါတယ်။

ဘာလို့ဆိုအသက်တစ်ချောင်းတန်ဖိုးမှမနည်းပဲလေ။

ဒါကြောင့်
"သတိဟူသည် ပိုသည်မရှိ.." ဆိုတာ
သေခြင်းတရားက
ဘယ်လောက်ထိကိုယ့်နားနီးနီးကပ်ကပ်မှာ
ရှိနေတယ်ဆိုတာ ကျွန်တော်မီးမောင်းထိုးပြမယ်။

၁။ တစ်ခုခုစားရင်းသောက်ရင်းလဲသေနိုင်တယ်။‼️

သီးတယ်ခေါ်တာပေါ့။

လေပြွန်နဲ့အစာရေမျိုပြွန်က
လည်ပင်းမှာကပ်ရပ်ရှေ့နောက်ကိုရှိနေတာ...

အဲ့တော့အစာစားတယ်၊ ရေသောက်တယ်ဆိုရင်
မျိုချလိုက်တာနဲ့
Epiglottis လို့ခေါ်တဲ့ပြွန်ထိပ်ကအဖုံးလေးက
လေပြွန်ကိုပိတ်ထားလိုက်တယ်။

ဒါဆိုအစာတွေကလေပြွန်ထဲမဝင်ပဲ
အစာရေမျိုပြွန်ထဲပဲဝင်သွားပါတယ်။

ပုံမှန်ကဒီလိုပဲဖြစ်ရမှာ...

အဲ့တာကိုထမင်းစားရင်း၊ ရေသောက်ရင်း
ရယ်လိုက်တာ၊ စကားပြောလိုက်တာဆို
အဲ့အဖုံးလေးကမလုံတော့ဘူး...

ဘာလို့ဆို လေထွက်တာကိုး စကားပြောတော့...

အဲ့မှာအစာတွေကအဲ့လေပြွန်ထဲဝင်ပြီး
အစာသီးတယ်၊
ရေသီးတယ်ဆိုတာဖြစ်လာတာ...။

သီးရင်ခန္ဓာကိုယ်ကပြန်ပြီးချောင်းဆိုးပေးတယ်၊
လေပြွန်ထဲအစာတွေ၊ ရေတွေဝင်မလာအောင်....

ဒါပေမဲ့ ပေါ့လို့မရဘူး။

ဝင်သွားတာများလို့လေပြွန်မှာပိတ်သွားရင်
အသက်ရှူမရပဲသေတတ်ပါတယ်။

ဒါကြောင့်လူကြီးတွေပြောတာ...

"ထမင်းစားရင် ....
စကား‌‌မပြောနဲ့၊ မရယ်နဲ့၊ သီချင်းမဆိုနဲ့...."

၂။ နှလုံးရောဂါတွေ... 🫀

Heart attack ဆိုတာကြားဖူးကြမှာပါ။

နှလုံးရောဂါဖောက်တယ်လို့လည်း
အများသိကြပါတယ်။

Medical terms အရ
Myocardial Infarct လို့ခေါ်ပါတယ်။

မြန်မာလိုကနှလုံးကြွက်သားပုပ်ခြင်းပေါ့။

နှလုံးကြွက်သားတွေကိုသွေးပေးနေတဲ့
သွေးလွှတ်ကြောလေးတွေ
အကြောင်းအမျိုးမျိုးကြောင့် ပိတ်ဆို့သွားတဲ့အခါ
နှလုံးကြွက်သားတွေသွေးမရပဲပုပ်သွားပါတယ်။

ဒါကြောင့် Heart attack ကအချိန်မှီမကုနိုင်ရင် ချက်ချင်းသေနိုင်တဲ့ ရောဂါထဲပါပါတယ်။

၃။ အဆုတ်ကိုထိရင်... 🫁

အဆုတ်ကလည်း
အသက်ရှင်ဖို့အရေးအကြီးဆုံး Organ တစ်ခုဖြစ်လို့

အဆုတ်မှာပြဿနာတက်တက်..!
ပြဿနာကအဆုတ်ဆီပဲရောက်ရောက်..!

ရုတ်ချည်းသေဆုံးမှုတွေဖြစ်နိုင်တယ်။

ဥပမာ --
အဆုတ်အမြှေးပါးအတွင်းလေစုတာ၊
အဆုတ်ကိုသွေးခဲလာပိတ်တာ၊ စတဲ့ရောဂါတွေက
လူတစ်ယောက်ကို
တမဟုတ်ချင်းဇီဝိန်ခြွေသွားနိုင်ပါတယ်။

၄။ လေဖြတ်တာရောသေနိုင်လား...!! 🧠

သေနိုင်ပါတယ်။

လေဖြတ်တာကလက်တွေခြေတွေလှုပ်မရတာ၊
စကားပြောမရတာ၊
မျက်နှာရွဲ့တာ စတာတွေအဖြစ်များပေမဲ့
အဆိုးဆုံးသေတဲ့ထိဖြစ်နိုင်တယ်။

ဘာလို့လဲ....??

လေဖြတ်တယ် Stroke ဆိုတာ...
ဦးနှောက်သွေးကြောပေါက်လို့ပဲဖြစ်ဖြစ်၊
ပိတ်လို့ပဲဖြစ်ဖြစ်၊
ဦးနှောက်ကိုသွေးမရောက်တော့တာကိုခေါ်တာပါ။

ဦးနှောက်မှာခန္ဓာကိုယ်တစ်ခုလုံးကိုထိန်းချုပ်ဖို့
နေရာတွေကန့်ထားပြီးသား...

အဲ့တော့လက်တွေ၊ ခြေတွေထိန်းချုပ်တဲ့နေရာတွေ
သွေးမရရင် လှုပ်မရတော့ပဲ...

အသက်ရှူတယ်၊ နှလုံးခုန်တယ်
စတဲ့အရေးကြီးတာဝန်တွေထိန်းချုပ်တဲ့
နေရာတွေသွေးမရရင်
ချက်ချင်းသေသွားမှာပါ။

ဒါ့အပြင် သွေးကြောပေါက်တာဆိုရင်လည်း
အချိန်မှီခွဲစိတ်မကုသနိုင်ဘူးဆိုရင်
နောက်ဘဝကူးသွားမှာပါ။

ဒါကြောင့်လေဖြတ်တာကလည်း
ချက်ချင်းသေနိုင်တယ်ဆိုတာ
သိထားသင့်ပါတယ်။

၅။ ဓာတ်မတည့်မှုတွေ... ⚠️

အစားအသောက်ပဲဖြစ်ဖြစ်၊
ဆေးပဲဖြစ်ဖြစ်
ဓာတ်မတည့်မှုဖြစ်တယ်ဆိုတာနဲ့
ချက်ချင်းကုသမှုခံယူမှရပါမယ်။

မြင်ဖူးကြုံဖူးကြမှာပါ။

မျက်နှာတွေရော၊ တကိုယ်လုံးရော
ရဲတွတ်ဖောယောင်ပြီးယားတာ၊အသက်ရှူမရတာမျိုး

အချိန်မှီဆေးရုံဆေးခန်းကိုအမြန်ဆုံးပြေးပါ။

၆။ ကိုယ်တွင်းသွေးထွက်နေခြင်း... 🩸

ယာဉ်တိုက်မှုလိုမျိုး၊
အမြင့်ကပြုတ်ကျတာလိုမျိုး
ပြင်းထန်တဲ့ Accident တွေဖြစ်ပြီးရင်...

ပြင်ပမှာဘာမှတော့မဖြစ်တဲ့ပုံစံပေမဲ့
ခန္ဓာကိုယ်ထဲမှာတော့ သွေးတွေထွက်နေတတ်တယ်။

ဥပမာ -- အသည်းတို့ ဘေလုံးတို့
ဆောင့်မိလို့ထိသွားပြီဆိုရင်
Bleeding ဆိုးတတ်တယ်။

အပြင်မှာသွေးထွက်လာမှမဟုတ်ဘူး၊
ဗိုက်ထဲမှာသွေးတွေထွက်နေတာလည်း
စိုးရိမ်ရပါတယ်။

ဒါကြောင့်...
တန်ဖိုးရှိတဲ့အသက်တွေ
ငေါက်ခနဲဆုံးရှုံးမသွားအောင်
ကျန်းမာရေးလည်းလိုက်စား...
သတိလေးလဲထား...
ရှောင်လွှဲလို့မရနိုင်တဲ့ သေခြင်းတရားအတွက်လည်း
တရားဘာဝနာများပွားများကြပါ။ 🙏🏻



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

27/09/2025

HIV ပိုးကဘယ်ကနေကူးစက်သလဲဆိုတာ....
ခုထိကိုလူတွေငြင်းခုန်နေကြတုန်းပဲ။

တစ်လောကပဲ TikTok က Post တစ်ခုမှာ...
HIV ပိုးဘယ်လိုကူးစက်တယ်ဆိုတဲ့အကြောင်း...
တစ်ယောက်တစ်ပေါက်ပြောနေကြတာတွေ့ရတယ်...

တကယ်ကျန်းမာရေးဗဟုသုတရှိတဲ့သူလည်းပါသလို
ခုထိနဂန်းတလုံးမှမသိသေးတဲ့သူလည်းပါတယ်..။

တစ်ယောက်ဆို...
"ကျွန်တော်ဆေး‌ကျောင်းသားပါ" ဆိုပြီး
တလွဲတွေကြီးပြောနေတာတွေ့ရတယ်။

တကယ်ဆေးကျောင်းသားဟုတ်မဟုတ်တော့မသိ...

တကယ်ဟုတ်တယ်ဆိုရင်တော့
စာမေးပွဲတဘုန်းဘုန်းကျနေတဲ့ကောင်မျိုးပဲနေမှာ..
=====================================

ကျွန်တော်ပြောပြမယ်...

HIV ပိုးကူးဖို့က
ဒီ ၃ ချက်ထဲကတချက်ချက်နဲ့ငြိမှကူးတယ်....
၁။ သွေး
၂။ လိင်
၃။ အမေကနေကလေး ဒါပဲ။

ဆိုတော့ကူးနိုင်စရာတွေက...

၁။ ရောဂါပိုးရှိတဲ့သူရဲ့သွေးဟာ ကိုယ့်ခန္ဓာကိုယ်ထဲကို ဝင်သွားရင်ကူးမယ်။ ✅

သွေးသွင်းခြင်း၊
ဆေးထိုးအပ် share သုံးခြင်း၊
ဘလိတ်ဓားတူတူသုံးခြင်း၊
ဒါတွေကကူးစက်နိုင်တယ်။
(မှတ်ချက် - ခြင်ကိုက်တာကမကူးပါ။
ဘာကြောင့်လဲဆိုရင် ခြင်ရဲ့ခန္ဓာကိုယ်ထဲ
ရောက်သွားတဲ့သွေးထဲက HIV ပိုးက
ဆက်မရှင်ပါဘူး။)

၂။ လိင်ဆက်ဆံရာကကူးပါမယ်။ ✅

အကာအကွယ်မဲ့လိင်ဆက်ဆံတယ်၊
ကိုယ့် Partner မှာလဲရောဂါရှိတယ်ဆိုရင်
သူ့ရဲ့သွေးတွေ၊ Ge***al secretions တွေကနေ
တဆင့် ကူးစက်ပါမယ်။

၃။ အမေကကလေးကိုကူးပါတယ်။ ✅

နှစ်မျိုးရှိတယ်။
ကိုယ်ဝန်ဆောင်ချိန်နဲ့ နို့တိုက်ချိန်...

ကိုယ်ဝန်ဆောင်ချိန်မှာ အမေက HIV ရှိနေရင်
ကလေးကိုကူးပါတယ်။

နို့တိုက်ချိန်မှာ အမေ HIV ရသွားရင်လည်း
နို့ကနေတဆင့်ကူးနိုင်ပါတယ်။
(ရှားပေမဲ့ကူးနိုင်တယ်။)
__________________________________________________

ဟုတ်ပြီ။ ။
ဒါဆိုမကူးနိုင်တာတွေက...

ခုနကပြောခဲ့တဲ့ (၃) ချက်မပါရင်လုံးဝမကူးပါ။

❌ တံထွေးကမကူးပါ။
❌ ပါးကိုနမ်းရှုံ့ခြင်း၊ kiss ပေးခြင်းမကူးပါ။
❌ ချွေး၊ မျက်ရည်၊ နှာချေး၊ နှာဖာချေးတွေမကူးပါ။
❌ ဖက်လှဲတကင်းပြုလုပ်ခြင်းက‌နေမကူးပါ။
❌ ပန်းကန်ခွက်ယောက်ဇွန်းတွေ
Share သုံးခြင်းကနေ မကူးပါ။
❌ ခြင်နဲ့တခြား insect တွေကိုက်ခြင်းကမကူးပါ။
❌ ရေကူးကန်တူတူကူးလို့၊
အိမ်သာ share သုံးလို့ မကူးနိုင်ပါ။



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

25/09/2025

*သွေးအန်တယ်* *သွေးဝမ်းသွားတယ်*
ဘာလုပ်ရမလဲ...‼️❓

အရင်ဆုံး...

သွေးအန်တယ်ဆိုရင်...

⚠️ သွေးနဲ့အတူဘာတွေပါသေးလဲကြည့်ပါ။

⚠️ သလိပ်တွေပါလား၊ အမြှုပ်တွေထလားကြည့်ပါ။

⚠️ အရောင်ကရော Coffee ရောင်လား/ သွေးရောင်လား
သေချာမှတ်သားပါ။

⚠️ ဆေးရုံဆေးခန်းမရောက်ခင်ထိ
ပမာဏဘယ်လောက်လောက်သွားတယ်
အကြိမ်ရေဘယ်လောက်သွားတယ်ဆိုတာ
အကြမ်းဖျဉ်းမှတ်ထားပါ။

သွေးဝမ်းသွားတယ်ဆိုရင်...

⚠️ ဝမ်းမဲမဲကြီးသွားတာလား/သွေးတွေပဲသွားတာလား
သေချာကြည့်ပါ။

⚠️ သွေးနဲ့အတူအချွဲတွေရောပါသေးလားကြည့်ပါ။

⚠️ သွေးကဝမ်းနဲ့ရောနေတာလား
ဝမ်းပေါ်မှာကပ်နေတာလား
ကိုယ်မြင်သလောက်မှတ်ထားပါ။

⚠️ မသေချာရင်ဓာတ်ပုံရိုက်ထားပါ။

⚠️ ဝမ်းမဲမဲတွေဆိုရင်
အနံ့ညှီလား
အိမ်သာမှာကပ်နေလား
ရေဆွဲ/လောင်းချရင်နီရဲသွားလား ကြည့်ပါ။

လူနာရှင်တွေအနေနဲ့
လူနာသွေးအန်/သွေးဝမ်းသွားပြီးရင်
ဆေးရုံကိုမသွားခင်/သွားနေတဲ့လမ်းမှာ

❗သွေးထပ်အန်တာ၊ သွေးဝမ်းထပ်သွားတာ
❗မောဟိုက်လာတာ
❗ချွေးစေးပြန်တာ
❗ဖြူဖျော့သွားတာ
❗မူးလဲတာ/သတိလစ်တာမျိုးရှိလား
စောင့်ကြည့်နေပါ။

ဘယ်လိုကြောင့်ပဲဖြစ်ဖြစ်...
သွေးအန်တယ်
သွေးဝမ်းသွားတယ်ဆိုတာနဲ့ ဆေးရုံဆေးခန်းကိုအမြန်ဆုံးပြသပါ။ ‼️‼️



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

24/09/2025

💭အများမသိသေးသောဆီးချိုရောဂါအကြောင်း💭

လူတိုင်းဆီးချိုရောဂါအကြောင်းသိပါတယ်။

မြတ်စွာဘုရားလက်ထက်က
လူမသေဖူးသောအိမ်မရှိကြောင်းဆုံးမခဲ့သလိုပဲ...

ဒီခေတ်ကြီးမှာလည်း
ဆီးချို၊ သွေးတိုးတို့မရှိတဲ့အိမ်
မရှိဘူးလို့တောင်ဆိုရမလိုပါပဲ။

ဒါ‌ကြောင့်ပဲလူတော်တော်များများက
‌ဒီရောဂါတွေအကြောင်း
ရင်းရင်းနှီးနှီးကို
သိကျွမ်းဝင်နေကြတာဖြစ်ပါလိမ့်မယ်။

တချို့ဘယ်လောက်အတွေ့အကြုံရှိလဲဆိုရင်
ဆေးကျောင်းသားတွေထက်တောင်ပိုသိသေး...

ဆေးကိုဘယ်လောက် Unit ပေးတာဘာညာနဲ့
ပြောနိုင်သေးတာ...

ဒါပေမဲ့သူတို့မသိသေးတဲ့၊
သိထားသင့်‌‌တဲ့
ဆီးချိုရောဂါအကြောင်းလေးတွေရှိပါသေးတယ်။

၁။ အချိုစားတာတစ်ခုထဲနဲ့ဆီးချိုဖြစ်လာတာမဟုတ်ပါ။

ဆီးချိုရောဂါကအချိုတွေစားတာကြောင့်
ဖြစ်လာတာဟုတ်တယ်။

ဒီတစ်ခုထဲတော့မဟုတ်ဘူး။

အဆီ၊ အဆိမ့်တွေ၊
လှုပ်လှုပ်ရှားရှားမရှိမှုတွေ၊
အဝလွန်မှုတွေ၊
Genetic နဲ့
အသက်ကြီးလာမှု စတဲ့အချက်တွေစုပေါင်းပြီးမှ
ဆီးချိုဆိုတာဖြစ်လာတာမျိုးပါ။

၂။ ဝတဲ့လူပဲဆီးချိုဖြစ်တာမျိုးမဟုတ်ပါ။

အဝလွန်တဲ့သူတစ်ယောက်ဟာ
သာမန်ကိုယ်အလေးချိန်ရှိသူထက်စာရင်
ဆီးချိုဖြစ်နိုင်ချေပိုများတာဟုတ်ပါတယ်။

ဒါပေမဲ့ပိန်တဲ့သူလဲဖြစ်နိုင်တယ်။

အဓိကကခုနကပြောခဲ့တဲ့
အချက်တော်တော်များများ
ပေါင်းစုသွားရင်ဆီးချိုဖြစ်လာနိုင်တာပါပဲ။



၃။ ဆီးချိုတက်ခြင်းဟာ
အချိုတစ်ခုထဲစားတာကြောင့် မဟုတ်ပါ။

အချိုတွေ၊ သကြားတွေစားရင်
ဆီးချိုတက်တာမှန်တယ်ဆိုပေမဲ့
အဲ့တာရှောင်ရုံနဲ့မပြီးပါဘူး။

ဆီးချိုတက်တယ်၊
သွေးတွင်းသကြားဓာတ်တက်တယ်၊
ဒီလိုမျိုးပြောပြောနေတာ တကယ်က
သွေးထဲက Glucose ကိုပြောနေတာပါ။

ဒီ Glucose ဆိုတဲ့အရာကို သကြားမှမဟုတ်ဘူး၊
ထမင်းကလဲရပါတယ်။
ပေါင်မုန့်ကလဲရပါတယ်။
ခေါက်ဆွဲကလဲရပါတယ်။

ဒါကြောင့်ဆီးချိုသမားက
ကိုယ်စားရမဲ့ထမင်းအမျိုးအစားကစလို့
ကိုယ့် Diet Plan ကို
ဆရာဝန်နဲ့သေချာတိုင်ပင်ပြီး
စားသုံးသင့်ပါတယ်။

အကြမ်းဖျဉ်းဘာတွေစားလို့ရတယ်၊ ဘာတော့စားလို့မရဘူးဆိုတာကို အောက်က Link မှာတင်ပေးထားဖူးပါတယ်။
https://www.facebook.com/share/p/1C1R97Le5o/

၄။ သွေးတွင်းသကြားဓာတ်များတာထက်
နည်းသွားတာကပိုကြောက်စရာကောင်းပါတယ်။

သွေးတွင်းသကြားဓာတ်များခြင်း
(Hyperglycemia) ကြောင့်
ဆီးချိုဆိုတာဖြစ်လာတာလေ...

ဘာလို့သွေးတွင်းသကြားဓာတ်နည်းတာ
ပိုကြောက်စရာကောင်းရတာလဲ...❓

ဟုတ်ပါတယ်။
သွေးတွင်းသကြားဓာတ်များလို့
ဆီးချိုဆိုတာဖြစ်လာပြီး...

ဒါကိုသေချာမကုဘူးဆိုရင်လည်း
မျက်စိကွယ်၊
ကျောက်ကပ်ထိနိုင်တဲ့အပြင်
နှလုံးနဲ့သွေးကြောဆိုင်ရာရောဂါတွေလည်း
ဖြစ်နိုင်တယ်။

ဒါပေမဲ့
ဆီးချိုဝေဒနာရှင်တွေအနေနဲ့
ဒီရောဂါကိုကြောက်လို့
ဆေးတွေအသည်းအသန်သောက်ပြီး
အစာမစားတော့ဘူးဆိုရင်
Hypoglycemia လို့ခေါ်တဲ့
သွေးတွင်းသကြားဓာတ်ထိုးကျသွားတာမျိုး
ကြုံရနိုင်ပါတယ်။

အဖြစ်များတာတော့ insulin ထိုးနေရတဲ့သူတွေပဲ။

Insulin ထိုးပေမဲ့ စားရင်တက်မှာကြောက်ပြီး
မစားတာမျိုးပေါ့။

မဟုတ်ဘူးနော်အဲ့လို‼️

သင့်တင့်သလောက်တော့ စားပေးရမယ်။

ဦးနှောက်ကအဓိက Glucose ကိုသုံးတာပါ။

Glucose နည်းနေပြီ/မရှိတော့ဘူးဆိုရင်
ဦးနှောက်ကသုံးစရာမရှိတော့ပါဘူး။

အဲ့ခါကျ
သတိလစ်မယ်၊
တက်မယ်၊
အရမ်းဆိုးရင်ကိုမာဝင်ပြီးသေနိုင်တယ်။

ဒါကြောင့်ဆီးချိုရောဂါရှိတယ်ဆိုပြီး
အရမ်းကြောက်ရွံ့စရာမလိုပဲ...

ဆရာဝန်ညွှန်ကြားတဲ့အတိုင်း
ပုံမှန်လေးစားမယ်၊ ဆေးသောက်မယ်၊
ဒါမျိုးလုပ်ပေးရပါမယ်။

၅။ ဆီးချိုကြောင့်...
ခြေထောက်မှာအနာတွေဖြစ်နိုင်တယ်။

လူတော်တော်များများသိတာက အနာတွေဆို
ဆီးချိုရှိရင်ကျက်ဖို့ကြာတယ်ဆိုတာပါ။

ဒါလဲမှန်ပါတယ်။

ဒါ့အပြင်ဆီးချိုကြောင့်အနာတွေဖြစ်နိုင်ပါတယ်။

ဘာကြောင့်လဲဆိုရင်
ဆီးချိုကောင်းကောင်း control မရရင်
Neuropathy ရပါတယ်။

လွယ်လွယ်ပြောရင်
အာရုံကြောတွေမကောင်းတာမျိုးပေါ့။

အာရုံကြောမကောင်းတော့
ထိလို့ထိမှန်းမသိ၊
ဖိလို့ဖိမှန်းမသိ ဖြစ်ပြီး
ခြေဖဝါးဘက်အရိုးငေါထွက်တဲ့နေရာတွေမှာ
အနာတွေဖြစ်လာတတ်ပါတယ်။

၆။ လက်ထိပ်ဖောက်ပြီးကြည့်ရုံနဲ့ ...
ဆီးချိုရှိမရှိမသေချာသေးပါ။

ဘာလို့ဒီလိုပြောလဲဆို
တချို့လူနာတွေလုပ်တတ်တယ်၊

ဆေးခန်းပြခါနီးဆိုဘာမှမစားတော့ဘူး။
လည်တာလည်တာ၊
ဆရာဝန်ဆူမှာဆိုးလို့ဖောက်စစ်လိုက်ရင်..

တို့လူနာတွေချစ်ဖို့ကလည်းကောင်း...
သနားဖို့လည်းကောင်းနဲ့...

ဘာမှမစားထားမှ ဖောက်စစ်
အိုကေစိုပြေမယ်ထင်ကြတာပေါ့။

ဘယ်ရမလဲနော်ဒါမျိုးတော့...အဟမ်း
HbA1c ဖောက်စစ်ပလိုက်တာပေါ့။

ဒီကောင်လေးကလိမ်လို့မရဘူး။
ဒီရက်ပိုင်းအစားမစားပဲဘယ်လောက်နေနေ
သင့်မှာဆီးချို control မကောင်းသေးဘူးဆိုရင်
တက်နေမှာပါပဲ။

သူက glucose တွေသွေးထဲအရမ်းများလာရင်
သွေးဆဲလ်ထဲမှာရှိတဲ့
ဟီမိုဂလိုဘင် (Hemoglobin) လို့ခေါ်တဲ့
Oxygen သယ်ပေးတဲ့ Protein လေးကိုသွားကပ်ပါတယ်။

အဲ့တော့...
ရောဂါမသက်သာသေးဘူး၊
အစားတွေလဲမရှောင်ဘူး၊
ဆေးလဲသေချာမသောက်ဘူးဆိုရင်
HbA1c လေးတက်နေမှာနော်။

ဆေးခန်းလာခါနီးမစားပဲနေလို့
သွေးတွင်းသကြားဓာတ်ကပုံမှန်ဖြစ်ရင်ဖြစ်မယ်၊

HbA1c နဲ့တွေ့ရင်တော့အလိမ်ပေါ်မယ်နော်..

တို့ဆေးခန်းမှာတော့ Lab နဲ့တွဲရက်မို့လို့
တခါထဲကိုဖောက်စစ်ပစ်မှာပါ...ဟင်းဟင်း...

စတာပါ။
ဆရာဝန်တွေလဲအရမ်းမဆူရက်ကြပါဘူး။
ပြောထားတဲ့အတိုင်းမလိုက်နာတဲ့အခါ
သင်တို့ပဲဒုက္ခရောက်မှာမို့
သင်တို့အတွက်ပဲတွေးပြီး ဆူလိုက်ရတာပါ။

ဒါလေးကိုအပြစ်မမြင်ချစ်ခင်ပေးပြီး
ဆီးချိုကိုထိန်းကြမယ်နော်။

တကယ်ကဆီးချိုက
Control သာကောင်းကောင်းရကြည့်...
ဆေးပုံမှန်သောက်ကြည့်ကြည့်...

နောက်ပိုင်း
ကိုယ်စားချင်တာလေးတွေလည်းစားလို့ရလာတဲ့အထိ ခြေနေကောင်းလာပါလိမ့်မယ်။

✅သင့်အတွက် ကျန်းမာရေးအသိနဲ့ ဗဟုသုတရရှိဖို့
✅ဒီလို ကျန်းမာရေးနဲ့ပတ်သတ်တဲ့ အကြောင်းအရာတွေ စဉ်ဆက်မပြတ်ဖတ်ရှုလေ့လာဖို့
✨Shwe Su Myat Medical and Diagnostic Center✨မှ အခမဲ့မျှဝေတင်ဆက်ပေးနေပါတယ်။💯



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

17/09/2025

Paracetamol Overdose ဖြစ်ရင်အသည်းကိုထိတာပါ။
📌📌📌
။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။

ကျွန်တော်တို့အသည်းကကျွန်တော်တို့စားသမျှ၊ သောက်သမျှအရာအားလုံးကို ဒိုင်ခံရှင်းပေးရပါတယ်။

ရှင်းပေးရတယ်ဆိုတာအဆိပ်အတောက်တွေပါရင်ရှင်းမယ်၊
အာဟာရတွေဆိုရင်သူလဲယူမယ်
တစ်ကိုယ်လုံးကိုရောက်အောင်လဲသွေးကြောထဲထည့်ပေးပါတယ်။

ဆေးတွေဆိုလဲဒီလိုပဲ။

အသည်းကအဲ့ဆေးတွေကိုခန္ဓာကိုယ်ထဲကြာကြာရှိမနေပဲ ဆေးအာနိသင်ပြယ်သွားအောင်လုပ်ပေးပါတယ်။

Paracetamol ကိုလဲဒီလိုပဲ...
အသည်းကအာနိသင်ပြယ်အောင်နည်းလမ်းအမျိုးမျိုးနဲ့လုပ်ပေးတယ်။

အဓိကနည်းလမ်းက Conjugation လုပ်ပြီးရေထဲပျော်ဝင်အောင်လုပ်လိုက်တယ်၊
အာ့မှဆီးထဲတခါထဲစွန့်ထုတ်လို့ရမယ်။

တခြားနည်းလမ်းအနေနဲ့ Cyp enzyme တွေနဲ့ဖျက်တာရှိတယ်။

ဒီ enzyme တွေနဲ့ဖျက်ရင်
N-acetyl-p-benzoquinone-imine (NAPQI) ဆိုတဲ့ Metabolite တွေထွက်လာပါတယ်။

နားလည်လွယ်အောင်ပြောရင် NAPQI ဆိုတာ အသည်းကိုအဆိပ်အတောက်ဖြစ်စေတဲ့
Waste တမျိုးပါပဲ။

အသည်းကသူဖျက်တဲ့ဆေးသူ့ပြန်ဒုက္ခပေးဘယ်အဖြစ်ခံပါ့မလဲ...

အဲ့ NAPQI ဆိုတဲ့ Waste ထွက်လာရင်သူ့ဆီမှာစုဆောင်းထားတဲ့ Glutathione ဆိုတဲ့ဒြပ်တမျိုးနဲ့တခါထဲပေါင်းပစ်လိုက်ပါတယ်။

အန္တရာယ်မရှိတော့ဘူးပေါ့။

ပြဿနာကဒီမှာစတယ်။

Paracetamol overdose ဖြစ်တော့ အဲ့ NAPQI တွေအများကြီးထွက်လာတာပေါ့။

အဲ့တော့ပေါင်းလို့မနိုင်တော့ပဲစုထားသမျှ Glutathione တွေကုန်၊
NAPQI တွေကလည်း အသည်း Cell တွေကိုဖျက်ပစ်တော့တာပဲ။

ဒါကြောင့် Acute Liver Failure လို့ခေါ်တဲ့အသည်းပျက်စီးခြင်းဖြစ်လာပါတယ်။
။။။။။။။။။။။။။။။။။။။။။။။။။။။။။။။။။။။။။။။။။။။။။

အသည်းပျက်တော့....⚠️

၁။ ဝမ်းဗိုက်အပေါ်ညာဘက်နာကျင်မယ်
၂။ မစားချင်မသောက်ချင်နုံးနေမယ်
၃။ ခေါင်းတွေမူးပြီးအော့အန်မယ်
၄။ အသားတွေ၊ မျက်လုံးတွေဝါလာမယ်
၅။ အသိလွတ်နေမယ်
၆။ Coma ဝင်သွားတာမျိုးတွေဖြစ်လာနိုင်ပါတယ်။

✅သင့်အတွက် ကျန်းမာရေးအသိနဲ့ ဗဟုသုတရရှိဖို့
✅ဒီလို ကျန်းမာရေးနဲ့ပတ်သတ်တဲ့ အကြောင်းအရာတွေ စဉ်ဆက်မပြတ်ဖတ်ရှုလေ့လာဖို့
✨Shwe Su Myat Medical and Diagnostic Center✨မှ အခမဲ့မျှဝေတင်ဆက်ပေးနေပါတယ်။💯



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

14/09/2025

⚠️ Para ဘယ်နှစ်လုံးသောက်ရင်
Overdose ဖြစ်ပြီလဲ ...⚠️

မှတ်ချက် ။ ။
📌 ဤ Post သည် အများပြည်သူဗဟုသုတရစေရန်အတွက်သာရည်ရွယ်ပြီးရေးသားထားခြင်းဖြစ်ပါသည်။
ဆေးဝါးများကိုဆရာဝန်ညွှန်ကြားချက်ဖြင့်သာ သောက်သုံးရပါမည်။ 📌

တန်ဆေးလွန်ဘေးဆိုတာ အစားအသောက်တင်မဟုတ်ဘူး။
ဆေးဝါးတွေမှာလဲရှိပါတယ်။

ပိုလို့တောင်ဆိုးဦးမယ်ပြောရမလားပဲ...
ဘာလို့ဆိုဆေးတွေဆိုတာနဂိုထဲကသူ့ဟာသူဘေးထွက်ဆိုးကျိုးကအနည်းနဲ့အများရှိပြီးသားဆို‌တော့...

ဘယ်လောက်ပဲဘေးထွက်ဆိုးကျိုးနည်းနည်းနဲ့ဆေးဆိုင်တိုင်းမှာဝယ်လို့ရပြီး လူတိုင်းသောက်တဲ့ Paracetamol ပဲဖြစ်နေဦးတော့...

လိုတာထက်ပိုသောက်မိရင်အဆိပ်ဖြစ်တာပါပဲ။

ဘယ်လောက်လောက်သောက်လိုက်ရင် overdose ဖြစ်ပြီးအဆိပ်ဖြစ်လာမလဲ...‼️❓

သတ်မှတ်ထားတာတော့ ၂၄နာရီအတွင်း 75mg/kg ထက်ပိုသောက်မိတယ်ဆိုရင် Overdose ဖြစ်ပြီလို့ဆိုပါတယ်။

ပြောချင်တာက 60 kg ရှိတဲ့သူတစ်ယောက်ဆိုရင် 75×60 = 4500mg (တစ်နည်းအားဖြင့် Para 500mg 9 လုံး) သောက်မိပြီဆိုရင် overdose ဖြစ်ပါပြီ။

150mg/kg (ဥပမာ- 60kg ရှိတဲ့သူတစ်ယောက်သာဆိုရင် Para 18 လုံး) လောက်သောက်မိတယ်ဆိုရင်တော့ အသည်းလုံးဝပျက်ပြီး အနိစ္စသဘောနဲ့ကိစ္စချောသွားနိုင်ပါတယ်။

တကယ့်လက်တွေ့မှာတော့တိတိကျကျပြောပြဖို့ခက်ပါတယ်။

ဘာလို့ဆိုရောဂါအခံရှိသူတွေ၊
အသည်းမကောင်းသူတွေ၊
အရက်အလွန်အကျွံသောက်တဲ့သူတွေ
စတဲ့သူတွေမှာဆို ပုံမှန်လူထက်တောင် Para အဆိပ်သင့်ဖို့ပိုလွယ်ပါတယ်။

ပြောချင်တာသာမန်လူက ၁၀ လုံးသောက်မှ Overdose ဖြစ်တယ်ဆို အသည်းမကောင်းတဲ့သူတွေဘာတွေဆို ၅ လုံးလောက်သောက်တာနဲ့ Overdose ဖြစ်တာမျိုးပေါ့။

တစ်ခါထဲနဲ့အများကြီးပဲသောက်သောက်၊
နေ့တိုင်းသူ့ပုံမှန်သောက်သင့်တဲ့ Dose ထက်ပိုသောက်သောက်
Overdose ဖြစ်တာချင်းတူတူပါပဲ။

ဘယ်သူမှတော့ Para ကြီးနေ့တိုင်းမသောက်နေပေမဲ့
ခန္ဓာကိုယ်ကတစ်ရက်ကို Para 4g လောက်ပဲချေဖျက်နိုင်စွမ်းရှိပါတယ်။
(အစာခြေစနစ်မဟုတ်ဘူးနော်၊
အစာကတစ်နေကုန်ဘာစားစားအကုန်ချေနိုင်တယ်၊ အသည်းကဆေးရဲ့အဆိပ်တွေကိုရှင်းပေးနိုင်တာကိုပြောတာ)

4g ဆိုတော့ 4000mg
တစ်နည်းပြောရင် Para 8 လုံးပေါ့။

ဒါတောင် 4 နာရီခြားတစ်ခါသောက်တာမျိုးဖြစ်ဦးမှ...

အဲ့ထက်ကျော်သွားပြီဆိုရင်
အသည်းကချေဖျက်နိုင်စွမ်းလျော့ကျလာပါတယ်။

ချေဖျက်နိုင်စွမ်းလျော့ကျရင်ဘာဖြစ်လဲဆိုတော့
ဆေးရဲ့အဆိပ်အတောက်တွေစုလာပြီး
အသည်းကိုပဲဒုက္ခ‌ပေးတော့တာပါပဲ။

Dose များရင်များသလောက်အသည်းကပိုပိုပျက်စီးပြီး
နောက်ဆုံးအသည်းအစားထိုးရတဲ့ထိဖြစ်နိုင်ပါတယ်။

ဒါကြောင့်နေမကောင်းတိုင်းသောက်နေကြတဲ့
ဒီ Paracetamol လေးက
ဘေးထွက်ဆိုးကျိုးနည်းတယ်ဆိုပေမဲ့
လွန်ရင်တော့ဘေးဖြစ်တာပဲဆိုတာ
သတိချပ်သင့်ပါတယ်။ ‼️

✅သင့်အတွက် ကျန်းမာရေးအသိနဲ့ ဗဟုသုတရရှိဖို့
✅ဒီလို ကျန်းမာရေးနဲ့ပတ်သတ်တဲ့ အကြောင်းအရာတွေ စဉ်ဆက်မပြတ်ဖတ်ရှုလေ့လာဖို့
✨Shwe Su Myat Medical and Diagnostic Center✨မှ အခမဲ့မျှဝေတင်ဆက်ပေးနေပါတယ်။💯



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

06/09/2025

📍အူမကြီးကင်ဆာဖြစ်နေရင်ပြမဲ့လက္ခဏာများ📍

ယနေ့ခေတ်ရဲ့
မာလာရှမ်း‌ကောလိုအပူအစပ်ပုံစံစားသောက်မှုတွေ၊
လူနေမှုအဆင့်အတန်းတွေ၊
ပတ်ဝန်းကျင်နဲ့ရာသီဥတုတွေ၊
အကုန်လုံးကကင်ဆာဖြစ်ဖို့ကိုအားပေးနေသလိုပါပဲ။

အဓိကအားဖြင့် ယနေ့ခေတ်ရဲ့စားသောက်မှုပုံစံတွေဖြစ်တဲ့ အပူအစပ်တွေ၊ ready made အသားတွေ၊ sausage တွေ၊ ခေါက်ဆွဲတွေကိုအမြဲလိုလိုကိုစားဖြစ်လာကြနေတော့...

လူငယ်တွေမှာတောင်အူမကြီးကင်ဆာတွေအဖြစ်များလာနေကြပါပြီ...!!!

အဲ့တော့အူမကြီးကင်ဆာဖြစ်ပြီဆိုရင်ဘယ်လိုလက္ခဏာတွေပြနိုင်မလဲဆိုတာ လူတိုင်းလူတိုင်း Awareness ရှိထားဖို့လိုလာပါပြီ... 📌

အူမကြီးကင်ဆာဖြစ်ပြီဆိုရင်...

📌 နံပါတ် ၁။ Bowel habit ချိန်းလာပါမယ်။

ဝမ်းချုပ်လာတာ၊
ဝမ်းသွားတာ
အရင်ကဝမ်းချုပ်လို့ဝမ်းနှုတ်ဆေးသောက်ဖူးတယ်ဆိုရင် အခုဝမ်းနှုတ်ဆေးကိုအရင်ကထက်ပိုတိုးသောက်ရတာမျိုးတွေရှိလာပါမယ်။

📌 နံပါတ် ၂။ ဝမ်းသွားရင်သွေးတွေချွဲတွေပါလာပါမယ်။ (မနက်စောစောအိမ်သာတက်ရင် ဝမ်းမပါပဲ သွေးနဲ့ချွဲတွေပါလာတာမျိုးရှိနိုင်ပါတယ်။)

📌 နံပါတ် ၃။ ဝမ်းသွားပြီးရင်တောင်ဝမ်းကျန်နေတာမျိုးခံစားရတာ...

📌 နံပါတ် ၄။ ဝမ်းသွားချင်စိတ်ဖြစ်ပေမဲ့ဝမ်းမထွက်တာမျိုး...

📌 နံပါတ် ၅။ ဝမ်းဗိုက် (ဒါမှမဟုတ်) ပေါင်ကျံ၊ ညှပ်ရိုးအပေါ်ဘက်နားတွေမှာ အကျိတ်တွေစမ်းမိတာ...
စတဲ့လက္ခဏာတွေပြနိုင်ပါတယ်။

ဒါ့အပြင် အူမကြီးရှေ့ပိုင်းမှာဖြစ်တဲ့ကင်ဆာတွေဆိုရင် Bowel symptoms တွေသိပ်မလာတတ်ပဲ...

❗ညာဘက်ဝမ်းဗိုက်အောက်ပိုင်းမှာအကျိတ်စမ်းမိမယ်
❗သွေးအားနည်းမယ်
❗နုံးနေမယ်
❗အူအတက်ရောင်တာနဲ့ဆင်တူသောလက္ခဏာတွေခံစားရနိုင်ပါတယ်။

ဒါကြောင့်အထက်ပါလက္ခဏာတွေခံစားရတယ်ဆိုရင် အချိန်မဆိုင်းပဲဆရာဝန်နဲ့ပြသစစ်ဆေးသင့်ပါတယ်လို့အကြုံပြုလိုက်ပါရစေ။🙏🏻

✅သင့်အတွက် ကျန်းမာရေးအသိနဲ့ ဗဟုသုတရရှိဖို့
✅ဒီလို ကျန်းမာရေးနဲ့ပတ်သတ်တဲ့ အကြောင်းအရာတွေ စဉ်ဆက်မပြတ်ဖတ်ရှုလေ့လာဖို့
✨Shwe Su Myat Medical and Diagnostic Center✨မှ အခမဲ့မျှဝေတင်ဆက်ပေးနေပါတယ်။💯



အမှတ်(၅၃) အိုးဘိုလမ်း ကြည့်မြင်တိုင်မြို့နယ်၊ ရန်ကုန်
09776085316 , 09754669935 , 09754669936 , 01-7508521
Email - shwesumyat.ssm@gmail.com

03/09/2025

နောက် ၃ ရက်နေရင်ပြန်လာခဲ့...
တစ်ပတ်နေရင်ပြန်လာခဲ့...

ဆရာဝန်ကဒီလို Follow up ခေါ်တယ်ဆိုရင် ဘာကြောင့်မို့ပြန်မသွားချင်ကြတာလဲ..❓

ကျွန်တော်ပြောပြမယ်...

ဆရာဝန်တွေ Follow up ခေါ်တယ်ဆိုတာအားအားယားယားခေါ်နေတာလဲမဟုတ်သလိုပိုက်ဆံထပ်လိုချင်လို့ခေါ်တာလဲမဟုတ်ပါဘူး။

တကယ်ကဘာကြောင့်ခေါ်ရလဲဆိုရင်

၁။ ရောဂါသက်သာသွားလား၊ မသက်သာဘူးလား၊ ပိုဆိုးလာလားပြန် Check ချင်လို့ပါ။ ✅

မြန်မာလူမျိုးတွေကဆရာဝန်တစ်ယောက်နဲ့ပြလို့ချက်ချင်းမှမသက်သာဘူးဆိုရင်ဆေးတောင်မကုန်သေးဘူး....
နောက်တစ်ယောက်ကိုထပ်ပြောင်းပြချင်နေတော့တာပါပဲ။

ဥပမာ။ ထားပါတော့ပိုးဝင်တယ်ဆိုပါစို့။
ဆရာဝန်ကပိုးသတ်ဆေးတစ်ခုခုပေးလိုက်တယ်၊
အဲ့ဆေးကိုကိုယ့်ထဲဝင်တဲ့ပိုးက resistance ရနေတယ်။
ဆိုတော့မသက်သာဘူး၊။
မသက်သာတော့ဆရာဝန်ပြောင်းပြန်ရော။
ဒီလိုနဲ့သံသရာလည်နေတာ။
တကယ်ကဆရာရေမသက်သာဘူးဆိုပြီးပြန်ပြလဲဆေးပြောင်းပေးလိုက်ရင်သက်သာသွားမဲ့ကိစ္စပါ။

၂။ ဆေးတွေရဲ့ Side effects တွေကိုခံနိုင်လားမခံနိုင်လားသိချင်တယ်။ ✅

လူတစ်ယောက်နဲ့တစ်ယောက်ကဆေးတွေကိုတုံ့ပြန်ပုံချင်းမတူကြတာတွေရှိတယ်။

တချို့ကျဒီဆေးသောက်ရင် side effects သိပ်မခံရဘူး။
တချို့ကျခံရတယ်။

အဲ့တော့ဒီမှာလဲအဲ့လိုပဲ။
အဲ့ဆရာပေးတဲ့ဆေးကမခံနိုင်ဘူး၊
မူးလို့၊ အန်လို့၊ ဗိုက်အောင့်လို့၊ ခေါင်းကိုက်လို့ စသဖြင့်ဆရာဝန်ကပြောင်းပြန်ရော။

တကယ်က follow up ပြန်သွား၊ ဆေးလေးပြောင်းပေးလိုက်ရင်ကောင်းသွားဦးမှာပါပဲ။

၃။ ဆေး dose တွေလျှော့တာ၊ တိုးတာတွေလုပ်ချင်တယ်။ ✅

လူနာတစ်ယောက်ရဲ့ရောဂါအခြေအနေ
သက်သာလာလား ?
ဆိုးလာသလား ?
ဒီပေါ်မူတည်ပြီး Dose အတိုးအလျှော့လုပ်ရပါတယ်။

ဥပမာ- သွေးတိုးကမသက်သာဘူးဆို Amlong 5mg သောက်ရာကနေ Amlong 10mg ကိုတိုးပေးတာ ဒါတွေလုပ်ရပါတယ်။

နာတာရှည်ရောဂါတွေဆိုရင် ဆေးကိုနာတာရှည်သောက်ရတာကြောင့် side effects တွေပိုခံစားရတတ်ပါတယ်။

ဒီအခါဆရာဝန်ကလိုသလို dose တွေလျှော့တာ၊ ဆေးပြောင်းတာတွေ Follow up မှာလုပ်ရပါတယ်။

ဒါကြောင့်
📌 ကိုယ့်ဆရာဝန်ကိုယ်ယုံကြည်ပါ။
📌 Follow up ခေါ်ရင်သေသေချာချာပြန်ပြပါ။
📌 ယုံရတဲ့ဆရာဝန်တကယ့်အစစ်ကိုပဲအစထဲကပြကြပါလို့သတိပေးပါရစေ။

01/09/2025

လေဖြန်း၊ လေဖြတ်ခြင်းနဲ့ပတ်သက်လို့အယူအဆအမှားများ ...❌

လူတွေကျန်းမာရေးဗဟုသုတအတော်နည်းတာကိုသတိထားမိလာတယ်။

အထူးသဖြင့် Generation X တွေ၊ အခုအသက် 40/50/60 ဝန်းကျင်လူကြီးတွေပေါ့။

ကိုယ်သိထားတဲ့ဆေးမြီးတိုလို့ဆိုကြတဲ့နည်းတွေ၊ ဘယ်ဆေးရွက်ကကောင်းတယ်၊
ဘယ်လိုပြုတ်သောက်လိုက်၊
ဟိုအရွက်ရှူဒီအရွက်ရှူ၊
ဟိုလိမ်းဒီလိမ်းဆိုတဲ့အခြေအမြစ်မရှိတဲ့နည်းတွေကိုပဲ စိတ်ထဲစွဲပြီးဟိုလူ့အကြံပေး၊ ဒီလူ့အကြံပေးလုပ်နေကြတယ်။

ကိုယ်ကိုယ်တိုင်ကလည်းဆရာဝန်ပြောတာလက်မခံ၊ မလိုက်နာ၊ ဆေးမသောက်၊ ပြီးတော့အသည်းအသန်ဖြစ်မှဆရာရေကယ်ပါဦးလုပ်ကြတာလည်းအတော်ကိုများနေပြီ။

ခုလည်းအိမ်ကိုလမ်းလျှောက်ပြန်လာရင်းလမ်းမှာလူတစ်ယောက်လေဖြန်းချင်သလိုဖြစ်လို့ဆိုပြီးလူတွေစုစုစုစုနဲ့၊ ကြည့်ရတာအိမ်နီးနားချင်းတွေနဲ့တူပါတယ်။

အာ့နဲ့ကိုယ်လည်းတတ်နိုင်သလောက်ဝင်မေးမြန်းအကျိုးအကြောင်းပြောပြရှင်းပြပေးပြီး ဆေးရုံကိုအမြန်ဆုံးသွားဖို့ Ambulance ခေါ်ခိုင်းလိုက်ပါတယ်။

အဲပြီးတော့မကြာဘူး။

ရပ်ကွက်ထဲကအာကျယ်အာကျယ်လုပ်တတ်ကြသူတွေနဲ့တူပါတယ်၊
ရောက်လာပြီးအဲ့တာသံပုရာသီးလေးရှူပြီးပွတ်ပေးတဲ့
တစ်ယောက်ကလည်းခြေတွေလက်တွေသေချာနှိပ်ပြီးဆွဲပေးဆိုပဲ၊
နောက်တစ်ယောက်ကလည်းအပ်ယူခဲ့ဆိုပြီးလက်ထိပ်တွေ၊ ခြေထိပ်တွေဖောက်တော့တာပဲ။

လူနာနဲ့သူ့မိသားစုဝင်တွေလဲ ကောင်းလုနိုးနိုး၊ သက်သာနိုးနိုးဆိုပြီးအကုန်လက်ခံရတာပဲ။

နှိမ်ပြောတာမဟုတ်ပေမဲ့ကြည့်ရတာအကုန်လုံးကအခြေခံလူတန်းစားတွေဖြစ်ဖို့များပါတယ်။

မြန်မာလူမျိုးတို့ရဲ့စိတ်ဓာတ်အခံလေးအရ စေတနာအရမ်းကောင်းပြီးတစ်ဖက်သားကိုတကယ်ကူညီချင်စိတ်ရှိကြတာ တော်တော်လေး လေးစားစရာပါ။

ဒါပေမဲ့ဒီလိုအခြေအနေမျိုးမှာကျတော့ ကိုယ့်ရဲ့စေတနာကဝေဒနာဖြစ်သွားနိုင်သလိုမျိုးဖြစ်နေတာပေါ့။

သူ့ဟာသူဆေးရုံရောက်လို့ဆေးထိုးလိုက်ရင်လေဖြန်းတာမျိုးကပြန်ကောင်းသွားမဲ့ဟာကို သက်သက်မဲ့‌‌အပ်နဲ့လျှောက်ဖောက်တာက ပိုးဝင်တာအပြင်ဘာအကျိုးမှမပေးပါဘူး။

အဲ့အချိန်မှာပြိုင်ငြင်းလိုက်ရင် ပွဲကဖြစ်ဦးမှာဆိုတော့
လူနာကိုလည်းငဲ့ရင်း သူ့အတွက်လည်းဆိုးဆိုးရွားရွားဒုက္ခရောက်နိုင်တာမျိုးတော့မဟုတ်တဲ့အတွက် မတားခဲ့တော့ပါဘူး။

Ambulance လဲလာနေပြီမို့လို့ ဆေးရုံတော့သေချာသွားဖို့မှာလိုက်ပြီး ကျွန်တော်လဲအိမ်ပြန်ခဲ့လိုက်ပါတယ်။

ဒါကိုကြည့်ခြင်းအားဖြင့် လူတွေရဲ့ကျန်းမာရေးဗဟုသုတဘယ်လောက်ထိအားနည်းနေတယ်ဆိုတာတော်တော်လေးသိသာထင်ရှားနေပါတယ်။
*****************************************************

လေဖြန်း၊ လေဖြတ်တယ်ဆိုတာ ဦးနှောက်ရဲ့အစိတ်အပိုင်းတွေကိုသွေးမရောက်တော့တာကိုခေါ်ပါတယ်။

ဘာလို့သွေးမရောက်တာလဲဆိုရင် အဲ့ကိုသွားတဲ့သွေးကြောက...
အဆီ(ဒါမှမဟုတ်)သွေးခဲစတာတွေနဲ့ပိတ်သွားတာကြောင့်ဖြစ်ပါတယ်။

လေဖြန်းတယ်လို့ခေါ်တဲ့ Transient Ischemic Attack ကကျခဏပဲပိတ်တာဖြစ်ပြီး
လေဖြတ်တယ်လို့ခေါ်တဲ့ Stroke ကလုံးဝပိတ်သွားတာမျိုးပါ။ (လေဖြတ်တာက သွေးကြောပေါက်သွားရင်လည်းဖြစ်နိုင်ပါတယ်။)

အဲ့ခါကျအဲ့သွေးကြောကထောက်ပံ့နေတဲ့ဦးနှောက်အစိတ်အပိုင်းတွေကသွေးမရတော့အလုပ်မလုပ်တော့ပါဘူး။

Result အနေနဲ့အဲ့ဦးနှောက်အစိတ်အပိုင်းကထိန်းချုပ်တဲ့ခြေတွေ၊လက်တွေ၊မျက်နှာတွေ၊ လှုပ်မရတာရွဲ့တာတွေဖြစ်ကုန်တာပါပဲ။

အဲ့တော့သက်သာချင်ရင် တတ်နိုင်သမျှအမြန်ဆုံး ဆေးရုံဆေးခန်းမှာ
သွေးခဲပျော်ဆေး၊ သွေးကျဲဆေး၊
သွေးကြောပေါက်တာမျိုးဆိုအရေးပေါ်ခွဲစိတ်တာမျိုးတွေလုပ်မှ
ပိတ်နေတဲ့သွေးကြောကိုဖွင့်နိုင်၊ ပေါက်နေတဲ့သွေး ကြောကိုပြန်ပိတ်နိုင်မှာပေါ့။

မြန်နိုင်သမျှအမြန်ဆုံးကုသနိုင်တဲ့အပေါ်မှာပဲ လူနာပြန်လည်ကောင်းမွန်ခြင်းကမူတည်နေပါတယ်။

မဟုတ်ပဲ...
❌ အပ်ထိုင်ဖောက်တာ
❌ သံပုရာသီးထိုင်ရှူပြီးပွတ်နေတာ
❌ ခြေတွေလက်တွေကိုနှိပ်ပေးနေတာဟာ ဘာအကျိုးမှမရတဲ့အတွက် လုံးဝမလုပ်သင့်ပါဘူး။

ဒါ့အပြင်...
❌ လူနာကိုဆေးတွေတိုက်တာ
❌ အားရှိအောင်ဆိုပြီးထမင်းဟင်းတွေကျွေးတာ
❌ ရေတိုက်တာမျိုးတွေလုံးဝမလုပ်သင့်ပါဘူး။

မှန်ကန်တဲ့နည်းလမ်းက
ဘာဆိုဘာမှတုံ့ဆိုင်းစဉ်းစားမနေပဲ နီးစပ်ရာဆေးရုံဆေးခန်းသာအမြန်ဆုံးပြေးပါ။