13/09/2025
🚩𝐑𝐞𝐝 𝐅𝐥𝐚𝐠𝐬 𝐢𝐧 𝐂𝐨𝐮𝐧𝐬𝐞𝐥𝐨𝐫𝐬 🚩
📊ဒီနှစ်ပိုင်းကာလတွေမှာ ကျွန်မတို့တွေအနေနဲ့ စိတ်ကျန်းမာရေး၊ ကောင်းဆယ်လင်း၊ စိတ်ကုထုံးစတဲ့စကားလုံးတွေနဲ့ ရင်းနှီးလာတာ၊ “စိတ်ဖိစီးမှု” “စိုးရိမ်စိတ်” “စိတ်ကျမှု” စတဲ့စကားလုံးတွေကို နှိမ်ချရှုံ့ချလှောင်ပြောင်စရာအဖြစ် ရှုမြင်မှုနည်းလာတာတွေက ကျွန်မတို့လူ့အဖွဲ့အစည်းနဲ့ နိုင်ငံအတွင်းမှာ အပြုသဘောဘက်ကနေ တိုးတက်ပြောင်းလဲလာတဲ့အရာတွေဖြစ်ပါတယ်။
🌱တစ်ပြိုင်တည်းမှာ ကျွန်မတို့တွေအနေနဲ့ ကိုယ့်ရဲ့စိတ်ကျန်းမာရေးအတွက် Counseling ၊စိတ်ကုထုံးစတဲ့ ပရော်ဖက်ရှင်နယ်အကူအညီယူရတာကိုလည်း ရှက်ရွံ့စရာအဖြစ် မြင်လာတာက တဖြည်းဖြည်းနည်းပါးလာနေပါတယ်။
🌱ဒီအခြေအနေမှာ ခေတ်၊ လူ့အဖွဲ့အစည်းမှာ စိတ်ပိုင်းဆိုင်ရာပံ့ပိုးမှုကို လိုအပ်လာတဲ့အခြေအနေ များပြားလာတာနဲ့အမျှ စိတ်ပိုင်းဆိုင်ရာပံ့ပိုးမှုကို ရေရှည်စနစ်တကျသင်ကြားလာပြီး ပံ့ပိုးပေးနေကြတဲ့ ကောင်ဆယ်လာတွေရော၊ ရေတိုသင်ကြားပြီး ကိုယ်နိုင်တဲ့အပိုင်းကနေ ပံ့ပိုးပေးနေကြတဲ့ ပံ့ပိုးပေးသူတွေရော ပေါ်ထွက်လာကြပါတယ်။
💁🏻♀️ကျွန်မတို့နိုင်ငံအနေနဲ့ Counseling ပညာရပ်ကို အထူးပြုဘာသာအရပ်အနေနဲ့သင်ကြားပေးနိုင်မှုမရှိသေးတာ၊ နှစ်သိမ့်ဆွေးနွေးခြင်းနဲ့ စိတ်ကုထုံးကုသမှုနဲ့ပက်သက်ပြီး ကုသလိုင်စင်ထုတ်ပေးနိုင်ခြင်းမရှိသေးတာတွေမှာ စိတ်ကျန်းမာရေးပံ့ပိုးမှုရယူသူတွေအနေနဲ့ ကိုယ့်ကို ကုသမှုပေးနေတဲ့သူရဲ့ သင့်တော်တဲ့အရည်အချင်းကို ဘယ်လိုအကဲဖြတ်ရမလဲဆိုတာ ဝေဝါးတာ၊ မသေချာတာမျိုးတွေဖြစ်နိုင်ပါတယ်။
✅ဒီနေရာမှာ စိတ်ပိုင်းဆိုင်ရာပံံ့ပိုးမှုရယူတဲ့သူတွေအနေနဲ့ ကိုယ်ကိုယ်တိုင်ရဲ့အတွေ့အကြုံအပေါ် မူတည်ပြီး ကိုယ့်ကိုပံ့ပိုးမှုပေးနေတဲ့သူက တကယ်ပြည့်ဝတဲ့ပံ့ပိုးမှုပေးနေလားဆိုတာကို တိုင်းတာဆန်းစစ်လို့ရအောင် သတိထားရမယ့် အသုံးဝင်နိုင်တဲ့အချက်ကလေးတွေကို ဖော်ပြပေးလိုက်ပါတယ်။
🙅🏻♀️ Judgemental Attitude- ပထမဆုံးအနေနဲ့ ကိုယ့်ကိုစိတ်ပိုင်းဆိုင်ရာပံ့ပိုးမှုပေးနေတဲ့သူက Red Flag ဆိုတာကို သိနိုင်တဲ့အချက်ကတော့ အပြစ်တင်ဝေဖန်တာပဲဖြစ်ပါတယ်။ ကိုယ့်အတွေး၊ ကိုယ့်လုပ်ရပ်၊ ကိုယ့်ခံစားချက်၊ ကိုယ့်ရဲ့ဖြစ်တည်မှုတွေကို တိကျတဲ့စကားလုံးနဲ့ဖြစ်စေ၊ သွယ်ဝိုက်တဲ့စကားလုံးနဲ့ဖြစ်စေ၊ အမူအရာနဲ့ဖြစ်စေ ဝေဖန်မှုလုပ်တာ၊ ပြစ်တင်မှုလုပ်တာက စိတ်ပိုင်းဆိုင်ရာပံ့ပိုးသူတစ်ယောက်ကနေ စောင့်ထိန်းရမယ့်အရာကို ချိုးဖောက်တဲ့အတွက် Red Flag လက္ခဏာရပ်တစ်ခုဖြစ်ပါတယ်။
🙅🏻♀️ Lack of Boundaries- ကိုယ့်ကို ပံ့ပိုးမှုပေးနေတဲ့သူတစ်ယောက်က counseling session အတွင်းမှာ “ကျွန်တော့်တုန်းကလေ၊ ကျွန်မတုန်းကလေ” အစချီတဲ့ သူ့ရဲ့ပုဂ္ဂိုလ်ရေးအကြောင်းတွေပဲ ဝေမျှနေတာ၊ စိတ်ပိုင်းဆိုင်ရာပံ့ပိုးမှုဆက်ဆံရေးမဟုတ်ဘဲ သူငယ်ချင်းလို လုပ်ဖော်ကိိုင်ဖက်လို မိဘနဲ့သားသမီးလို ချစ်သူရည်းစားလိုဆက်ဆံရေးတွေ တည်ဆောက်ဖို့ကြိုးစားတာ၊ ကိုယ့်ရဲ့ ဆိုရှယ်မီဒီယာအကောင့်တွေတောင်းတာ၊ counseling session အတွင်းမှာ ကိုယ့်ကို အသားချင်းထိဖို့ကြိုးစားတာတွေပြုလုပ်နေတယ်ဆိုရင် ဒါကလည်း Red Flag လက္ခဏာရပ်တစ်ခုဖြစ်ပါတယ်။
🙅🏻♀️ Invalidating Feelings - ကိုယ့်ခံစားချက်တွေဖော်ပြတဲ့အချိန်မှာ “အဲ့လောက်ထိ ခံစားမနေပါနဲ့” “အများကြီးပုံကြီးချဲ့ပြီးတွေးမနေနဲ့” “ဒါတွေကို စိတ်ထဲမှာထားမနေနဲ့” စတဲ့ ကိုယ့်ရဲ့ခံစားချက်ကို ပိတ်ပင်တဲ့၊ ချုံ့ပစ်တဲ့၊ ဘာမှမဟုတ်တဲ့အရာလိုပြောင်းပစ်တဲ့လုပ်ရပ်မျိုး လုပ်လာရင်လည်း Red Flag အနေနဲ့ သတိထားလို့ရပါတယ်။
🙅🏻♀️ Pushing Their Agenda - ကိုယ့်ကောင်ဆယ်လာက သူကောင်းမယ်ထင်တဲ့အရာ၊ သူဖြစ်စေချင်တဲ့အရာကို လုပ်ဖို့ပဲ ကိုယ့်ကိုဇွတ်တွန်းနေပြီဆိုရင်လည်း Red Flag အနေနဲ့ သတိချပ်နိုင်ပါတယ်။ ဉပမာ - စိတ်ပိုင်းဆိုင်ရာပံ့ပိုးသူက ဘာသာတရားကိုင်းရှိုင်းတဲ့သူဖြစ်နေရင် ကိုယ့်ကို “ဒါက ဘုရားအလိုရပဲ”၊ “ကိုယ့်ကိုယ်ကိုယ် တရားနဲ့ဖြေ” စသဖြင့် သူသဘောကျတဲ့၊ ယုံကြည်တဲ့အရာတွေကိုပဲ ကိုယ့်ကိုလည်း ယုံကြည်ဖို့၊ လိုက်လုပ်ဖို့တွန်းနေတာမျိုးဆိုရင်လည်း ပံ့ပိုးမှုရယူသူမှာရှိတဲ့ “Autonomy” ဆိုတဲ့ မိမိဘာသာဆုံးဖြတ်ပိုင်ခွင့်ကို ထိပါးချိုးဖောက်တာဖြစ်တဲ့အတွက် Red Flag လက္ခဏာရပ်တစ်ခုဖြစ်ပါတယ်။ စိတ်ပိုင်းဆိုင်ရာပံ့ပိုးသူက ပံ့ပိုးမှုရယူသူကို သူယုံကြည်လက်ခံတဲ့ ဘာသာတရား၊ နိုင်ငံရေးအမြင်၊ လူမှုစံနှုန်း၊ ဘဝနေထိုင်နည်းတွေကို အတင်းဖိအားပေး လမ်းကြောင်းထဲသွတ်သွင်းပြီး လိုက်လုပ်စေတာမျိုး လုပ်ခွင့်မရှိပါဘူး။
💁🏻♀️ကဲ ဒီလောက်ဆိုရင် ကိုယ့်ကို စိတ်ပိုင်းဆိုင်ရာပံ့ပိုးမှုပေးနေတဲ့သူက စောင့်ထိန်းရမယ့်ကျင့်ဝတ်တွေကို လိုက်နာပြီး ထိရောက်တဲ့ပံ့ပိုးမှုမျိုးပေးနေလား ဒါမှမဟုတ် ကိုယ့်စိတ်ကျန်းမာရေးကို ပိုဆိုးအောင်လုပ်နေတာလားဆိုတာ အကြမ်းဖျင်းစဉ်းစားလို့ရမယ်ထင်ပါတယ်။
နောက်ပိုင်းမှာလည်း ဒီခေါင်းစဉ်နဲ့ပက်သက်ပြီး ထပ်တိုးမျှဝေပေးသွားပါမယ်ရှင်။
🌿စိတ်ပိုင်းဆိုင်ရာပံ့ပိုးမှုရယူတဲ့သူတွေအနေနဲ့လည်း “DO NO HARM” Principle ကို သေချာလိုက်နာကျင့်သုံးတဲ့ အရည်အချင်းပြည့်ဝတဲ့ပံ့ပိုးသူတွေနဲ့ တွေ့ဆုံနိုင်ဖို့ ရည်ရွယ်ပါတယ်။
🌱𝑴𝒊𝒏𝒅 𝑫𝒊𝒂𝒓𝒚🌱
𝑴𝒆𝒏𝒕𝒂𝒍 𝑯𝒆𝒂𝒍𝒕𝒉 𝑪𝒍𝒊𝒏𝒊𝒄
📌𝑯𝒂𝒗𝒆 𝒒𝒖𝒆𝒔𝒕𝒊𝒐𝒏𝒔 𝒂𝒃𝒐𝒖𝒕 𝑴𝒊𝒏𝒅 𝑫𝒊𝒂𝒓𝒚’𝒔 𝒔𝒆𝒓𝒗𝒊𝒄𝒆𝒔
☎️𝑫𝑴 𝒖𝒔 𝒇𝒐𝒓 𝒎𝒐𝒓𝒆 𝒊𝒏𝒇𝒐𝒓𝒎𝒂𝒕𝒊𝒐𝒏—𝒘𝒆’𝒓𝒆 𝒉𝒆𝒓𝒆 𝒕𝒐 𝒉𝒆𝒍𝒑🌱
G
