Aung Pharmacy

01/02/2024

26/01/2024

https://t.me/aungpharmacyy

21/01/2024

https://t.me/aungpharmacyy

ဒစ်ဂျစ်တယ်စက်နဲ့ နည်းမှန်လမ်းမှန် သွေးပေါင်ချိန်ကြမယ်

ဖတ်ရန်ကြာချိန် (၂)မိနစ်

မြန်မာပြည်သူတွေ သွေးပေါင်ချိန်ကြတဲ့အခါ အမြဲအရိုးစွဲနေကြတဲ့ အယူအဆတစ်ခုရှိပါတယ်။ Digital သွေးပေါင်ချိန်စက်နဲ့ ချိန်တဲ့အခါဆိုရင် မတိကျ/မမှန်ကန်ဘူးဆိုပြီး ယူဆတတ်ကြတာပါ။

တကယ်တမ်းလက်တွေ့ဘဝမှာ Digital သွေးပေါင်ချိန်စက်‌တွေက Error/အမှားအရမ်းများလွန်းနေရင် ကမ္ဘာပေါ်မှာရှိတဲ့ ဘယ်နိုင်ငံကမှ ဝယ်မသုံးတော့လို့ Digital သွေးပေါင်ချိန်စက်တွေကိုထုတ်လုပ်ရောင်းချတဲ့ ကုမ္ပဏီတွေအကုန်လုံး ဒေဝါလီခံကြရမှာပေါ့။

အမှန်တကယ်တမ်းမှာ Digital သွေးချိန်စက်တွေရဲ့ အားနည်းချက်မဟုတ်ပဲ ‌သွေးပေါင်ချိန်တဲ့အခါမှာ လူတွေလုပ်တတ်ကြတဲ့ အလွဲအမှားလေးတွေကြောင့် သွေးပေါင်တွေအလွဲအမှား ဖြစ်ကြရတာပါ။ ဒါကြောင့်မို့လို့ Digital သွေးပေါင်ချိန်စက်နဲ့ သွေးပေါင်ချိန်ရင် ဆောင်ရန်ရှောင်ရန်အချက်တွေကို ပြောပြပေးချင်ပါတယ်။

Digital သွေးပေါင်ချိန်စက်တွေကို အသုံးပြုတဲ့အခါဆိုရင် လက်ကောက်ဝတ်မှာ ပတ်ပြီးသုံးရတဲ့ စက်မျိုးတွေထက်ကို လက်မောင်းမှာပတ်သုံးရတဲ့ စက်မျိုးတွေက ပိုပြီးကောင်းမွန်တယ်လို့ သုတေသနစာတမ်းတွေအရ သိရှိရပါတယ်။ ဒါပေမယ့်လည်း ဘယ်စက်သုံးသုံး နည်းလမ်းမှန်ဖို့သာ အဓိကပဲမို့ သွေးပေါင်ချိန်ရင် လိုက်နာရမယ့်အချက်တွေကို စာရင်းပြုစုပေးထားပါတယ်။

၁) သွေးပေါင်ချိန်တော့မယ်ဆိုရင် သွေးပေါင်ချိန်လက်ပတ်ရဲ့ ပိုက်အမည်းလေးနှစ်ချောင်းက ကိုယ့်လက်မောင်းရဲ့ အရှေ့ဘက်မှာရှိနေဖို့လိုပါတယ်။

၂) လက်ပတ်ပတ်တဲ့အခါ လက်ပတ်အောက်ခြေအနားက တံတောင်ကွေးအရစ်ရဲ့အပေါ် တစ်လက်မ/နှစ်လက်မအကွာမှာ မလျော့မတင်းလေး ပတ်ပေးဖို့လိုပါတယ်။

၃) လက်ပတ်ရဲ့အမြင့်တည်နေရာက ကိုယ့်နှလုံးအမြင့်နဲ့ တစ်ညီတည်းဖြစ်နေဖို့ အရေးကြီးပါတယ်။ လက်မောင်းမှာပတ်ရတဲ့ သွေးပေါင်ချိန်စက်တွေကတော့ ပြဿနာသိပ်မရှိပေမယ့် လက်ကောက်ဝတ်ချိန်ရတဲ့စက်တွေကတော့ စက်တုံးနဲ့လက်ပတ်ကို လူနာရဲ့ရင်ဘတ်မှာ ကပ်ပြီးချိန်ဖို့လိုအပ်ပါတယ်။

၄) ဖြစ်နိုင်ရင်တော့ စက်တုံးကိုလည်း မိမိနှလုံးအမြင့်နဲ့ တစ်ညီတည်းထားရင် ပိုကောင်းပါတယ်။ နှလုံးအမြင့်ထက် နိမ့်လွန်း/မြင့်လွန်းရင် အဖြေမှားတတ်ကြပါတယ်။

၅) သွေးပေါင်ချိန်နေတုန်းမှာ ခြေထောက်နှစ်ဖက်ယှက်ထိုင်တာမျိုး၊ ခြေချိတ်ထိုင်တာမျိုး လုံးဝလုပ်လို့မရပါဘူး။ အကောင်းဆုံးကတော့ ခြေဖဝါးနှစ်ဖက်စလုံးကို မြေပြင်ညီမှာချထားပြီး သက်တောင့်သက်သာ သွေးပေါင်ချိန်ရမှာပါ။

၆) သွေးပေါင်ချိန်နေစဉ်မှာ လူနာကိုယ်တိုင်ရော အနီးပတ်ဝန်းကျင်ကလူတွေပါ စကားပြောတာမျိုး‌ ရှောင်ကြဉ်ရပါမယ်။ လူနာကလှုပ်ရွနေတာမျိုးလည်း လုပ်လို့မရပါဘူး။

၇) လူနာတော်တော်များများရဲ့ စိတ်ထဲကဖြစ်ရပ်တစ်ခုက ဘယ်အချိန်အဖြေထွက်မလဲ ဆန္ဒစောနေတတ်ကြတာပါ။ သွေးပေါင်ချိန်စက်က အဖြေထွက်ပြီဆိုရင် အချို့စက်တွေကတော့ အသံမြည်ပေးပြီးတော့ စက်တော်တော်များများကတော့ တုန်ခါတာရပ်သွားကြပါတယ်။ အဲ့လိုအသံမြည်/အတုန်ရပ်မှ သွေးပေါင်ကိုအေးဆေးဖတ်ပါ။

၈) ပက်လက်အိပ်ပြီး သွေးပေါင်တိုင်းရင် လက်မောင်းပတ်စက်ဆိုရင် လက်ပတ်ကလက်မောင်းမှာ စက်တုံးကကိုယ်လှဲနေတဲ့နေရာနဲ့ ကြမ်းတစ်ပြေးတည်းမှာ ထားရှိဖို့လိုပါတယ်။ လက်ကောက်ဝတ်ပတ်ဆိုရင်တော့ လက်ကိုခန္ဓာကိုယ်ဘေး ကြမ်းတစ်ပြေးတည်းမှာ သက်တောင့်သက်သာထားပြီး တိုင်းပေးရမှာပါ။

ကဲ ဒီလောက်ဆိုရင်တော့ စမတ်ကျကျ၊ နည်းမှန်လမ်းမှန်နဲ့ Digital သွေးပေါင်ချိန်စက်အသုံးပြုပြီး သွေးပေါင်မှန်အောင် ချိန်တတ်ကြပြီလို့ထင်ပါတယ်။ အများသိကြဖို့လည်း ဝေမျှပေးကြပါဦးနော်။



#ဒီဃာယု #ဒီဃာယုကျန်းမာရေးစောင့်ရှောက်မှုလုပ်ငန်း

16/12/2023

https://t.me/aungpharmacyy

လေမဖြတ်ချင် ကြိုပြင်ဆင်

ဖတ်ရန်ကြာချိန် (၂)မိနစ်

လေဖြတ်ခြင်းဆိုတာဟာ အထူးသတိထားသင့်တဲ့ အရေးကြီးကျန်းမာရေး ပြဿနာတစ်ရပ်ပါပဲ။ ဘာကြောင့်လဲဆိုတော့ လေဖြတ်ပြီးသေဆုံးနိုင်တဲ့ လူဦးရေပမာဏက အခုလာမဲ့နှစ်တွေမှာ ယခင်တုန်းကထက်ကို ထက်ဝက်နီးပါးလောက် ပိုများလာနိုင်တယ်လို့ အချို့သုတေသီတွေက ခန့်မှန်းထားကြပါတယ်။

ဒီအတွက်ကြောင့် လေမဖြတ်အောင် ကာကွယ်နိုင်ဖို့ရာ သူ့ရဲ့ရောဂါလက္ခဏာတွေနဲ့ ဘယ်လိုလူမျိုးတွေမှာ ပိုဖြစ်နိုင်သလဲဆိုတာတွေကို သိရှိထားဖို့အတွက် တင်ပြပေးလိုက်ပါတယ်နော်။

~ ရှေ့ပြေးလက္ခဏာများ

လေဖြတ်ခြင်းပြဿနာမှာ အထူးသတိထားသင့်တဲ့ ရှေ့ပြေးလက္ခဏာတွေကတော့ -

၁) မျက်နှာနဲ့ ခြေလက်တွေ ထုံကျဥ်လာတာ၊ အားနည်းလာတာ

၂) ခန္ဓာကိုယ်တစ်ခြမ်းလုံး ရုတ်တရက်ကြီးထပြီး ထုံကျဥ်လာတာ၊ အားနည်းလာတာ

၃) ရုတ်တရက်ကြီး စိတ်မမှန်တော့တာ၊ စကားပြောဖို့ခက်လာတာ၊ သူများပြောတာကို နားလည်သဘောပေါက်ဖို့ ခက်ခဲလာတာ

၄) မျက်စိတစ်ဖက်(သို့)နှစ်ဖက်လုံးမှာ အမြင်အာရုံအားနည်းလာတာ

~ ဖြစ်နိုင်‌ချေများတဲ့သူများ

၁) သွေးတိုးအခံရှိတဲ့သူတွေက သွေးပေါင်တက်ရင် ဦးနှောက်သွေးကြောပေါက်ပြီး လေဖြတ်နိုင်ပါတယ်

၂) သွေးတွင်းအဆီများသူ‌တွေနဲ့ သွေးပျစ်သူတွေကလည်း ဦးနှောက်သွေးကြောထဲမှာ အဆီခဲ/သွေးခဲပိတ်ပြီး လေဖြတ်နိုင်ပါတယ်

၃) အမျိုးသားတွေက ဆေးလိပ်/အရက်/ကွမ်း/မူးယစ်ဆေးသုံးတာ အမျိုးသမီးတွေထက် ပိုပြီးများတဲ့အတွက် လေဖြတ်နိုင်ချေပိုများပါတယ်

၄) ဒါပေမယ့်လည်း ကိုယ်ဝန်ဆောင်မိခင်လောင်းတွေ၊ ပဋိသန္ဓေတားဆေးတွေ စွဲသောက်နေရတဲ့ အမျိုးသမီးတွေနဲ့ သွေးဆုံးကိုင်ပြီးတဲ့ အမျိုးသမီးတွေမှာ ဖြစ်နိုင်ချေပိုများပါတယ်

၅) မိသားစုမျိုးရိုးထဲမှာ လေဖြတ်တဲ့ရောဂါရာဇဝင် ရှိတဲ့သူတွေကလည်း သတိထားရမှာပါ

၆) ဆီးချိုရောဂါသမားတွေ၊ အဝလွန်သူတွေနဲ့ အရက်အလွန်အကျွံသောက်သူတွေကလည်း လေဖြတ်တတ်ပါတယ်

၇) SLE/အရေပြားလေးဘက်နာ, Autoimmune Disease/ခုခံအားဝီရိယလွန်ရောဂါ, Brain Cancer/ဦးနှောက်ကင်ဆာ, Polycythemia/သွေးဆဲလ်များသွေးပျစ်ရောဂါ, Thrombocytosis/သွေးဥမွှားများရောဂါ, Clotting Disorder/သွေးကျဲရောဂါလိုမျိုး ရောဂါအခံရှိသူတွေမှာ ပိုပြီးဖြစ်လေ့ရှိပါတယ်

~ ကာကွယ်နည်းများ

ကြိုတင်ကာကွယ်ခြင်းက ရောဂါဖြစ်မှကုသခြင်းထက် ပိုမိုထိရောက်တာမို့ လေမဖြတ်ဖို့အတွက် အဓိကလုပ်ဆောင်ရမဲ့အချက်က သွေးပေါင်ချိန်ပုံမှန်ဖြစ်‌နေအောင် ထိန်းထားပေးဖို့ပါပဲ။

ကိုယ်လက်လှုပ်ရှား လေ့ကျင့်ခန်းတွေ ပုံမှန်လေးလုပ်ပေးတာကလည်း အဆီမတက်ဖို့၊ ဆီးချိုကျဖို့နဲ့ သွေးပေါင်မှန်ဖို့အတွက် ကူညီပေးနိုင်လို့ လေမဖြတ်ဖို့ကိုလည်း တစ်နည်းတစ်ဖုံအားဖြင့် အထောက်အကူပြုပါတယ်။

အသီးအရွက်၊ အသားငါးနဲ့ အစေ့အဆံတွေ စုံလင်မျှတအောင် စားသောက်တာကလည်း သွေးပေါင်မတက်ဖို့၊ ကိုယ်အလေးချိန်ထိန်းဖို့နဲ့ သွေးတွင်းအဆီကျဖို့ အထောက်အကူဖြစ်စေပါတယ်။

အဆီ၊ အချို၊ အငန်တွေကိုလည်း လျှော့စားသင့်သလို အရက်၊ ဘီယာနဲ့ ဆေးလိပ်‌တွေကိုလည်း လျှော့သောက်သင့်ပါတယ်။

မိသားစုမျိုးရိုးမှာ လေဖြတ်ရောဂါရာဇဝင် ရှိဖူးတယ်ဆိုရင်တော့ ရောဂါလက္ခဏာတွေကို သတိထားစောင့်ကြည့်သင့်ပါတယ်။



#ဒီဃာယု #ဒီဃာယုကျန်းမာရေးစောင့်ရှောက်မှုလုပ်ငန်း

20/10/2023

https://t.me/aungpharmacyy

အားဖြည့်အချိုရည်က အားပြည့်စေနိုင်လား?

ဖတ်ရန်ကြာချိန် (၂)မိနစ်

ကျွဲရိုင်း၊ ကျွဲစိမ်း၊ မကောင်းဆိုးဝါး၊ ငါးမန်း၊ မီးနဂါး၊ ‌ကင်းမြီး‌ကောက်/စီပလပ်၊ ဘန်း၊ လစ်ပို၊ အမ်(၁၅၀)၊ ဂျက်စပါ၊ စပိဒ် အစရှိသဖြင့် အားဖြည့်အချိုရည် တော်တော်များများကို ကြားဖူးသောက်ဖူးကြမှာပါ။ လူကအလုပ်များပြီး ပင်ပန်းလွန်းလာရင် အဲဒီလိုအားဖြည့်အချိုရည်လေးတွေ ကစ်လိုက်မှသာပဲ လန်းဆန်းအမောပြေတတ်ကြပါတယ်။

Energy Drinks/အားဖြည့်အချိုရည်တွေမှာ အမြဲတမ်းပါဝင်တဲ့ အဓိကဓာတ်ပစ္စည်းကတော့ Caffeine/ကဖင်းဓာတ်ပါ။ တခြားပါဝင်တဲ့ ဓာတ်ပစ္စည်းနဲ့ အာဟာရဓာတ်တွေကတော့ ဗီတာမင်ဘီအုပ်စု၊ ဗီတာမင်စီ၊ Taurine/တော်ရင်း၊ Carnitine/ကာနစ်တင်း၊ ဂျင်ဆင်း၊ သကြားဓာတ်တွေနဲ့ အစားအသောက်ဆိုးဆေး အဝါရောင်လေးတွေ ပါဝင်တာများပါတယ်။

ဒီအားဖြည့်အချိုရည်တွေကို‌ သောက်သုံးတဲ့အခါ ကောင်းကျိုးတွေရကြသလား၊ ဆိုးကျိုးပိုများသလားဆိုတာ ဒီနေ့ထိကိုပဲလူအများကြား ငြင်းခုန်နေရဆဲပါပဲ။ အဲဒီတော့ကောင်းကျိုးနဲ့ ဆိုးကျိုးလေးတွေကို နှိုင်းယှဉ်လေ့လာ ကြည့်ကြတာပေါ့လေ။

အားဖြည့်အချိုရည်တွေရဲ့ ကောင်းကျိုးတွေကတော့ - မှတ်ဉာဏ်အားကောင်းစေတယ်၊ ခေါင်းကြည်လင်စေတယ်၊ အာရုံစူးစိုက်မှုအားကောင်းစေတယ်၊ စိတ်အားတက်ကြွစေတယ်၊ အမောအပန်းခံနိုင်ပြီးတော့ အားအင်ပြည့်ဝစေပါတယ်။

💪 ဒါဆိုများများသောက်ရင် ကောင်းမှာပေါ့နော်? 💪

"တန်ဆေး၊ လွန်ဘေး" ဆိုတဲ့မြန်မာစကားပုံနဲ့အညီ တော်ရုံတန်ရုံ/ရံဖန်ရံခါ ပင်ပန်းနွမ်းနယ်လို့၊ စာကျက်ဖို့လိုအပ်လို့၊ စိတ်ပင်ပန်းအားနည်းလို့၊ အားဖြည့်ဖို့လိုအပ်လို့ သောက်သုံးမယ်ဆိုရင်တော့ အင်မတန်မှပဲအသုံးဝင်ပါတယ်။ အလွန်အကျွံသောက်သုံးရင်တော့ ဆိုးကျိုးတွေရှိပါတယ်။ အောက်မှာဆက်ဖတ်ကြည့်ပါ။

❣️ နှလုံးနဲ့သွေးကြောပိုင်း - ကဖင်းဓာတ်ကြောင့် နှလုံးခုန်မြန်လာတတ်တယ်၊ အပေါ်သွေးတိုးလာတတ်ပါတယ်။ ရေရှည်စွဲသောက်ရင်တော့ Arrhythmia/နှလုံးစည်းချက်မမှန်တာ၊ နှလုံး ECG မှာစည်းချက်ပြောင်းတာ၊ အဆိုးဆုံးအနေနဲ့ Myocardial Infarction/နှလုံးကြွက်သားပုပ်တဲ့အထိ ပြင်းပြင်းထန်ထန်ဖြစ်တတ်ပါတယ်။

🧠 ဦးနှောက်နဲ့အာရုံကြောပိုင်း - အသောက်များသွားလို့ သွေးထဲမှာကဖင်းဓာတ်တွေ အရမ်းများသွားရင် စိတ်လှုပ်ရှားလာမယ်၊ ဂဏှာမငြိမ်ဖြစ်လာမယ်၊ အကြောတွေလိုက်ကုန်မယ်၊ မမောနိုင်မပန်းနိုင်ပဲ တက်ကြွတဲ့ကြက်ဖဖြစ်မယ်၊ အိပ်မပျော်နိုင်ဖြစ်မယ်၊ အိပ်မပျော်တဲ့အတွက် ခေါင်းကိုက်လာမယ်၊ ပလတ်တွေကျွတ်ပြီး ထင်ယောင်ထင်မှားတွေ ဖြစ်လာတတ်ပါတယ်။

🍝 အစာအိမ်နဲ့အူလမ်းကြောင်း - ကဖင်းဓာတ်ရဲ့အစွမ်းကြောင့် အစာအိမ်အောင့်လာမယ်၊ ပျို့ချင်အန်ချင်စိတ်တွေ အရမ်းဖြစ်လာမယ်၊ ရေရှည်သောက်ရင်တော့ အစာအိမ်အနာဖြစ်တာ၊ အစာအိမ်သွေးယိုတာ၊ အစာအိမ်ကင်ဆာဖြစ်တာတွေအထိ ဆိုးသွားတတ်ပါတယ်။

🌧️ ဆီးလမ်းကြောင်း - ကဖင်းဓာတ်ရဲ့သဘောက ဆီးလည်းအရမ်းသွားစေတတ်ပါတယ်။ အဲဒါကြောင့်မို့လို့ အပူအရမ်းပြင်းတဲ့ နွေရာသီကာလမှာ အားဖြည့်အချိုရည်တွေ အကစ်များသွားရင် အားမပြည့်တဲ့အပြင် ဆီးသွားများလွန်းပြီး ရေဓာတ်ပါဆုံးရှုံးသွားနိုင်ပါတယ်။

🩸 သွေးချိုဆီးချို - သကြားဓာတ်တွေလည်း အများကြီးပါဝင်နေလို့ ရေရှည်စွဲသောက်ရင် အဝလွန်ရောဂါနဲ့ သက်ကြီးဆီးချိုရောဂါ ဖြစ်လာတတ်ပါတယ်။

အားဖြည့်အချိုရည်ကို မသောက်သင့်တဲ့သူတွေကတော့ - ဆယ်ကျော်သက်လူငယ်တွေ၊ ‌ကဖင်းဓာတ်နဲ့မတည့်တဲ့လူတွေ၊ ကိုယ်ဝန်ဆောင်သည်တွေနဲ့ နှလုံးရောဂါသမားတွေပါ။ ပြိုင်ပွဲဝင်နေကြရတဲ့ အားကစားသမား မောင်‌မယ်တွေလည်း အားဖြည့်အချိုရည်‌တွေ သောက်သုံးမယ်ဆိုရင် ရေတိုကာလမှာ စွမ်းဆောင်ရည်တွေ တိုးတက်လာသလို ထင်ရနိုင်ပေမယ့် ရေရှည်မှာတော့ ရောဂါတွေများပြီး စွမ်းရည်တွေကျဆင်းလာမှာပါ။

ဒါကြောင့်မို့လို့ -

၁) အားဖြည့်အချိုရည်တွေကို လိုအပ်မှသာ သောက်သုံးသင့်ပါတယ်

၂) အားဖြည့်အချိုရည်နဲ့ ကော်ဖီ/လက်ဖက်ရည်တို့ကို တွဲဖက်/နှစ်ပင်လိမ်ပြီး မသောက်သုံးသင့်ပါဘူး၊ ရင်တွေမဟားတရားတုန်ပြီး ခေါင်းအရမ်းကြည်လွန်းနေတတ်ပါတယ် (နောက်ဆုံးနှစ်စာ‌မေးပွဲဖြေတုန်းက ကိုယ်တိုင်ကြုံတွေ့ခဲ့ဖူးတဲ့ဖြစ်ရပ်ပါ)

၃) အားဖြည့်အချိုရည်တွေက ကလေးသူငယ်တွေ၊ နို့တိုက်မိခင်တွေ၊ ကိုယ်ဝန်ဆောင်သည်တွေနဲ့ နှလုံးရောဂါသမားတွေအတွက် လုံးဝမသင့်တော်ပါဘူး

၄) ရဟန်းသံဃာတွေနဲ့ မယ်သီလရှင်တွေကို အားဖြည့်အချိုရည် ဆပ်ကပ်လှူဒါန်းတာမျိုးက ရေရှည်မှာရောဂါများစေနိုင်လို့ အဆင်မပြေနိုင်ပါဘူး

💪 အားဖြည့်အချိုရည်က အားပြည့်စေနိုင်လား? 💪

ဟုတ်ကဲ့၊ အားဖြည့်အချိုရည်က အားပြည့်စေနိုင်ပါတယ်။ ထိုနည်းတူစွာပဲ ရောဂါတွေလည်း အများကြီးပေးနိုင်ပါသေးတယ်ခင်ဗျာ။



#ဒီဃာယု #ဒီဃာယုကျန်းမာရေးစောင့်ရှောက်မှုလုပ်ငန်း

10/10/2023

https://t.me/aungpharmacyy

V**e ရှူတာ စိတ်ပူစရာလား?

ဖတ်ရန်ကြာချိန် (၂)မိနစ်

"လူငယ်လူရွယ်တွေ V**e သောက်ရတာကို ရေနဲ့ထမင်းစွဲသလို စွဲလမ်းနေကြပြီ" 😂

ဒီဘက်ခေတ်ရဲ့ လူငယ်လူရွယ်တွေကြားထဲမှာ အရမ်းတွင်ကျယ်လာတဲ့ ဓလေ့တစ်ခုကတော့ V**e လို့ခေါ်ကြသိကြတဲ့ "လျှပ်စစ်စီးကရက်"တွေပါပဲ။ ရေလည်အထာကျတယ်၊ အရမ်းဂေါ်တယ်ဆိုပြီးသကာလ V**e Culture လို့ခေါ်ဆိုကြတဲ့ ခေတ်ပေါ်အထာတစ်ခုကို လူငယ်တွေစီးမြောပါဝင်လာကြတာ မနည်းမနောပါပဲ။

"လျှပ်စစ်စီးကရက်"ကို Electronic Cigarette/E-Cigarette/V**e စသဖြင့်နာမည်အမျိုးမျိုးနဲ့ခေါ်ကြသိကြပါတယ်။ တကယ့်ဆေးလိပ်အစစ်က ရောဂါဖြစ်စေနိုင်တဲ့ ဓာတုပစ္စည်းတွေ အများကြီးပါတဲ့အတွက် ကျန်းမာရေးရှုထောင့်ကနေကြည့်ရင် ဆိုးကျိုးတွေများလွန်းပါတယ်။

ပုံမှန်စီးကရက်ငွေ့ထဲမှာ စိန်အဆိပ်ဓာတ်၊ ဖော်မလင်၊ ဆိုင်ယာနိုက်၊ ခဲဓာတ်၊ ကာဗွန်မိုနောက်ဆိုဒ်၊ အခရိုလင်းအစရှိတဲ့ ဓာတုပစ္စည်းအမျိုးအစားပေါင်း (၇၀၀၀)ကျော်ပါဝင်ပါတယ်။ အဲဒီအထဲကမှ အမျိုး(၇၀)လောက်က ကင်ဆာဖြစ်စေနိုင်ပါတယ်။

V**e/E-Cigarette တွေမှာကျတော့ ဆေးရွက်ကြီးကနေ အဆီအနှစ်ထုတ်ထားတဲ့ နီကိုတင်းဓာတ်ကို အနံ့အရသာအမျိုးမျိုး၊ ဓာတုပစ္စည်းအမျိုးမျိုးတွေနဲ့ ရောနှောပေါင်းစပ်ပြီး ငွေ့ရည်အနေနဲ့ ရှူရတာဖြစ်ပါတယ်။ ပုံမှန်ဆေးလိပ်/ဆေးရွက်ကြီးထက်စာရင်တော့ အန္တရာယ်ဖြစ်စေတဲ့ ဓာတုပစ္စည်းတွေပါဝင်တာ နည်းပါးတယ်ဆိုပေမယ့် E-Cigarette တွေကလည်း လုံးဝစိတ်ချရတာတော့ မဟုတ်ပြန်ပါဘူး။

နိုင်ငံရပ်ခြားမှာ ပြုလုပ်ထားတဲ့ သုတေသနတွေအရ E-Cigarette သောက်သုံးခြင်းနဲ့ ဆက်နွယ်နေတဲ့ အဆုတ်ဒဏ်ရာ/ရောဂါသည် လူနာတွေကလည်း (၂.၅) ရာခိုင်နှုန်းလောက်အထိ များပြားတာကိုတွေ့ရှိရပါတယ်။ အရမ်းကြီးတော့လည်း မစိုးရိမ်သွားပါနဲ့။

အဲဒီလိုလူနာမျိုးတွေ သောက်သုံးကြတဲ့ E-Cigarette တွေထဲမှာ Tetrahydrocannabinol/THC လို့ခေါ်ဆိုကြတဲ့ ဓာတုပစ္စည်းတစ်မျိုးရယ်၊ သူ့ကိုပိုပြီးပျစ်စေ/အရသာပြင်းစေတဲ့ Vitamin E Acetate လို့ခေါ်ဆိုကြတဲ့ ဓာတ်တစ်မျိုးရယ် ပါဝင်နေတဲ့အတွက် ဖြစ်ကြရတာလို့ ဆေးပညာရှင်များက ယူဆကြပါတယ်။

တကယ့်ဆေးလိပ်အစစ် မသောက်ပေမယ့်လို့ E-Cigarette တွေထဲမှာလည်း နစ်ကိုတင်းဓာတ် ပါဝင်ပါတယ်။ ဒီဓာတ်ရဲ့သဘာဝက စွဲလမ်းစေတတ်တဲ့အပြင် သွေးတိုးရောဂါ၊ နှလုံးရောဂါတွေကိုပါ ဖြစ်စေနိုင်ပါတယ်။ ဒီရောဂါတွေအပြင် V**e ထဲမှာပါတဲ့ တခြားဓာတုပစ္စည်းတွေက နာတာရှည်အဆုတ်ရောဂါတွေနဲ့ ပန်းနာရင်ကြပ်ရောဂါတွေကိုပါ ဖြစ်စေတတ်တဲ့အတွက် ကျန်းမာရေးအတွက် မသင့်တော်တာတော့ အမှန်ပါပဲ။

ဒါကြောင့်မို့လို့ -

၁) E-Cigarette တွေဟာ သာမန်စီးကရက်/ဆေးလိပ်တွေထက် အဆုတ်ကင်ဆာနဲ့ အဆုတ်ရောဂါတွေ ဖြစ်နိုင်ချေပိုနည်းတယ်ဆိုပေမယ့် သူလည်းသူ့အထွာနဲ့သူ ရောဂါတွေပေးပါတယ်
၂) V**e မသောက်ခင်မှာ ပါဝင်ပစ္စည်းတွေ သေချာဖတ်ကြည့်ပါ၊ Tetrahydrocannabinol/THC နဲ့ Vitamin E Acetate ပါဝင်‌တဲ့ထုတ်ကုန်ဆိုရင် ဝေးဝေးရှောင်တာ ပိုကောင်းပါတယ်
၃) သူငယ်ချင်းတွေ၊ ညီအစ်ကိုမောင်နှမတွေ၊ လိုင်းပေါ်ကညွှန်းတာကောင်းလို့ ဝယ်ယူတာမျိုးတွေ မလုပ်သင့်ပါဘူး၊ ကိုယ်သောက်ဖို့အတွက် ပါဝင်ပစ္စည်းတွေကို သေချာတစ်ခုချင်း စစ်ဆေးဖတ်ရှုပြီးမှ ဝယ်ယူသုံးစွဲသင့်ပါတယ်
၄) နဂိုမူရင်းပါဝင်ပစ္စည်းတွေအပြင် တခြားဓာတ်ပစ္စည်းတွေထပ်ထည့်ပြီး ပြုပြင်သောက်တာမျိုးတွေ လုံးဝမလုပ်သင့်ပါဘူး

V**e ရှူတာ စိတ်ပူစရာလား?
ဟုတ်ကဲ့၊ V**e ရှူတာ စိတ်ပူစရာပါပဲ။

**e **ng ****ne

#ဒီဃာယု #ဒီဃာယုကျန်းမာရေးစောင့်ရှောက်မှုလုပ်ငန်း