Dr P & H Specialist Online Clinic

13/08/2024

ဆေး စျေးနှုန်းများ မြင့်တက်လာခြင်းကြောင့် မိမိရောဂါအတွက် အမှန်တကယ် လိုအပ်သော ရေရှည်သောက်ရမည့်ဆေးများ(ဥပမာ-သွေးတိုး ဆီးချို နှလုံးရောဂါဆေးများ)ကို သာ ဦးစားပေး၍ ဝယ်ယူရန် အကြံပြုပါရစေရှင်။

17/05/2024

ယနေ့ မေလ ၁၇ ရက်နေ့ဟာ ကမ္ဘာ့ သွေးတိုးရောဂါနေ့ (world hypertension day) ဖြစ်ပါသည်။
ယခုနှစ်အတွက် ကမ္ဘာ့ကျန်းမာရေးအဖွဲ့ WHO ရဲ့
ဆောင်ပုဒ်က Measure your blood pressure accurately , control it, live longer - သင်၏
သွေးပေါင်ချိန်ကို မှန်ကန်တိကျစွာ တိုင်းပါ၊ ထိန်းထားပါ၊ အသက်ရှည်စွာ နေထိုင်ပါ ပဲ ဖြစ်ပါသည်။
သွေးတိုးရောဂါအကြောင်းလိုတိုရှင်းရေးသားပါရစေ။

✅သွေးတိုးလို့ဘယ်အချိန်သတ်မှတ်လည်း?
သွေးပေါင်ချိန် 140/90 အထက် ( တကြိမ်တိုင်းတာရုံဖြင့်မသတ်မှတ်ပါ။ တလအတွင်း ၂ကြိမ်နှင့် အထက် ဖြစ်နေလျှင် သွေးတိုးရှိပြီဟု သတ်မှတ်ပါပြီ။)

✅သွေးတိုးရှိတာ ဆေးသောက်ဖို့လိုလား?
မသောက်ပဲ နေရင်ရောမရဘူးလား?
သွေးတိုးရှိတာသေချာလျှင် သွေးကျဆေး သောက်ဖို့ လိုပါပြီ။ လူနာအများစုက သွေးကျဆေးကို သွေးထိန်းဆေးဟုလည်း ခေါ်ကြပါသည်။
သွေးကျဆေးသောက်ရုံသာမက အငန်များသော အစားစာများကို ရှောင်ခြင်း၊ ကိုယ်လက် လှုပ်ရှားမှုပြုခြင်းတို့ကိုပါ ပြုလုပ်ပေးရပါမည်။
သွေးတိုးရှိနေပါလျှက် ဆေးမသောက်ပဲ နေလျှင် ကြာလာလျှင် ကိုယ်တွင်းအဂါများထိခိုက်ပျက်စီးနိုင်ပါသည်။

✅ဘာဆိုးကျိုးတွေဖြစ်နိုင်လည်း?

ရုတ်တရက် လေဖြန်းခြင်း၊ လေဖြတ်ခြင်း
နှလုံးသွေးကြောပိတ်ခြင်း၊နှလုံးကြီးခြင်း
အမြင်အာရုံချို့ယွင်းခြင်း
ကျောက်ကပ်ထိခိုက်ပျက်စီးခြင်း စသည့်အန္တရာယ်များဖြစ်ပေါ်နိုင်ပါသည်။
အသံတိတ်လူသတ်သမားဟု တင်စားခေါ်ဝေါ်ကြသည့်အတိုင်း သွေးတိုးရောဂါသည် မည်သည့် လက္ခဏာမျှ မပြဘဲ ရှိနေနိုင်ပါသည်။

✅ဆေးကအမြဲသောက်ရမှာလား? သွေးပေါင်ဘယ်လောက်မှာထိန်းထားရမှာလည်း?
သွေးကျဆေး ခေါ် သွေးထိန်းဆေး ကို နေစဉ် မှန်မှန် သောက်ရပါမည်။
သွေးပေါင်ချိန်ကို ၁၃၀/၈၀ အောက်ရှိအောင် ထိန်းထားဖို့လိုပါသည်။
သွေးတိုးရောဂါကို ထိရောက်စွာ ကုသခြင်းဖြင့် ရောဂါ၏ နောက်ဆက်တွဲ ဆိုးကျိုးများကင်းဝေးစေရန် ရည်ရွယ်၍ရေးသားလိုက်ရပါသည်။

20/04/2024

သံဓာတ်အားနည်းလို့ သံဓာတ်အားဖြည့်ဆေး သောက်နေရသူများ သိထားသင့်သည့် ဆောင်ရန်ရှောင်ရန်များ

အကြောင်းအမျိုးမျိုးကြောင့် သံဓာတ်အားနေလို့ သံဓာတ်အားဖြည့်ဆေးကို သောက်နေရတယ်။ ဆေးသောက်ပြီး ပြန်စစ်တဲ့အချိန်မှာ ထိုက်သင့်သလောက် သွေးအားပြန်မတက်လာဘူး၊ ဘာတွေကြောင့် ဖြစ်နိုင်မလဲဆိုရင် ပထမဆုံးစဥ်းစားရမယ့် အရာကတော့ ဆေးသောက်ပုံ သောက်နည်း မှန်ရဲ့လားဆိုတာပါဘဲ

ဒါဆိုရင် သံဓာတ်အားဖြည့်ဆေးကို ဘယ်လိုသောက်ရမလဲ ပြောပြပေးမယ်နော်
• သံဓာတ် အားဖြည့်ဆေးဟာ အစာမရှိချိန်တွင် စုပ်ယူမှုအား ကောင်းပါသည်။
• ထို့ကြောင့် အစာနှင့်ဝေးဝေးသောက်ပေးရန်လိုအပ်ပါသည်။ အစာမစားမီဆိုလျင် တစ်နာရီကြိုသောက်ရပါမည် (သို့) အစာစားပြီးနောက်ဆိုလျင် အနည်းဆုံး အစာနှင့် နှစ်နာရီခြားပြီးမှသောက်ပေးရပါမည်။ သို့မှသာ သံဓာတ်စုပ်ယူမှုအားကောင်းပြီး လိုအပ်သော သံဓာတ်ပမာဏပြန်လည်ပြည့်ဝမှာဖြစ်ပါသည်။
• သံဓာတ်အားဆေးကို ရေများများ၊ အသီးဖျော်ရည် ၊ vitamin C တို့နှင့် တွဲဖက်သောက်သုံးပါက သံဓာတ်စုပ်ယူမှု အားကောင်းပါသည်။
• သံဓာတ်အားဆေးသောက်ရာတွင် နွားနို့၊ကော်ဖီ၊ရေနွေးကြမ်း၊အစာကြေဆေးများနှင့် တွဲဖက်၍ မသောက်သုံးရပါရှင့်။

သံဓာတ်အားဖြည့်ဆေးကို သောက်သုံးရာတွင် အနည်းဆုံး 3 လ မှ 6 လအထိ သောက်သုံးရန်လိုအပ်ပါသည်။ ဘာကြောင့်သံဓာတ်အားနည်းသလဲပေါ်မူတည်ပြီး တယောက်နှင့်တယောက် သောက်ရမည့် အချိန်ကာလ ကွာခြားမှုရှိနိုင်သောကြောင့် ဆရာဝန်နှင့်တိုင်ပင်ပြီး သောက်သုံးရန် လိုအပ်ပါသည်။

ကျွန်မတို့ မြန်မာနိုင်ငံမှာရှိတဲ့သူအများစုဟာ အစာမရှိဘဲ ဆေးသောက်ရမှာ အလွန်ကြောက်ကြသောကြောင့် သံဓာတ်အားဖြည့်ဆေးသောက်နေပါလျက်နှင့် ဘာကြောင့်သွေးအားပြန်မပြည့်လဲဆိုရင် ဆေးသောက်သည့်အချိန်လွဲမှားမှုများကို မကြာခဏတွေ့နေရသောကြောင့် တင်ပြပေးလိုက်ရပါသည်။ ကျွန်မတို့ Dr P & H Specialist Online Clinic page လေးမှ ယခုကဲ့သို့ ပြည်သူများအတွက်အကျိုးရှိစေမည့် ကျန်းမာရေးနှင့်ပတ်သတ်သော အကြောင်းအရာများကို ဆက်လက်တင်ပြပေးသွားမှာဖြစ်လို့ like and follow လေး လုပ်ထားကြပါနော်။

18/04/2024

သွေးတိုးကြောင့် ကျောက်ကပ် ပျက်တာလား
ကျောက်ကပ်ပျက်လို့ သွေးတိုးတာလား

ဒီမေးခွန်းလေးကို လူနာတွေ အမြဲမေးလေ့ရှိလို့ တင်ပြပေးလိုက်ပါတယ်။
အမှန်တကယ်တော့ သွေးတိုးနဲ့ ကျောက်ကပ်ဆိုတာ တစ်ခုနှင့်တစ်ခု တန်ပြန်သက်ရောက်မှု ရှိကြတဲ့အရာတွေပါ။
သွေးတိုးကို ကောင်းစွာ မထိန်းနိုင်လျင် နာတာရှည်ကျောက်ကပ်ရောဂါကို ဖြစ်စေနိုင်သကဲ့သို့ ကျောက်ကပ်ပျက်စီး အားနည်းသွားလျင်လည်း သွေးပေါင်ချိန်ကို အလွယ်တကူ မထိန်းချုပ်နိုင်ဘဲ အဆမတန်မြင့်တက်လာစေနိုင်ပါသည်။

📣သွေးတိုးရောဂါဆိုတာဟာတိတ်တဆိတ် လူသတ်သမား silent killer လို့ တင်စားခေါ်ဝေါ်ရတဲ့ အင်မတန်ကြောက်စရာကောင်းတဲ့ ရောဂါတစ်ခုပါ။ ကျွန်မတို့ မြန်မာနိုင်ငံလို ငါးပိ၊ငါးခြောက်၊ ပုဇွန်ခြောက် အစရှိတဲ့ အငံဓာတ်အစားများတဲ့နိုင်ငံမှာ သွေးတိုးရောဂါဟာ ပိုပြီး ထိန်းချုပ်ရခက်ပါတယ်။

❌ကျန်းမာရေး ဗဟုသုတ နည်းပါးမှုကြောင့် ကျွန်မတို့ နိုင်ငံက သွေးတိုးရောဂါရှင်များရဲ့ စိတ်ထဲမှာ သွေးတိုးပြီဆိုလျင် လူအများသောက်လေ့သောက်ထရှိတဲ့ Amlong, losartan အစရှိတဲ့သွေးတိုးကျဆေးတွေကို သွေးတိုးတဲ့ အချိန်မှာသောက်ပြီး သွေးပေါင်ပုံမှန်ဖြစ်လျင် ဆေးဆက်မသောက်ဘဲ နေတတ်ကြပါသည်။ အင်မတန်မှားယွင်းသော အယူအဆများ ဖြစ်ပါတယ်ရှင့်။

✔မိမိမှာသွေးတိုးရောဂါ ရှိပြီဆိုတာ သေချာလျင် နားလည်တတ်ကျွမ်းသော ဆရာဝန်များနှင့်တိုင်ပင်ပြီး သင့်တော်သော သွေးစစ်ခြင်း၊ ဆီးစစ်ခြင်းတို့ကို ပြုလုပ်၍ မိမိအတွက် အသင့်တော်ဆုံးသော သွေးပေါင်ကျဆေးကို သောက်သုံးမှသာ သွေးပေါင်ချိန်ကို ထိန်းနိုင်မှာဖြစ်ပြီး နောက်ဆက်တွဲဆိုးကျိုးများကို ကာကွယ်နိုင်မှာပါ။

📣သူများ Amlong သောက်တိုင်း ကိုယ်သောက်ရမှာ မဟုတ်ပါဘူးရှင့်၊ သွေးတိုးစရှိချိန်တွင် မိမိ၏ အသက်အရွယ်၊ ကျောက်ကပ်ကောင်း၊ မကောင်းနှင့် ဆီးထဲတွင် အသားဓာတ်၊ သွေး ပါဝင်မှု ရှိ မရှိတို့အပေါ်မူတည်ပြီး အသင့်တော်ဆုံးသော သောက်ဆေးများကို ရွေးချယ်ရပါသည်။

တချို့သော လူနာများမှာ သွေးတိုးရှိခြင်းကို မသိသူများ (သို့) တချို့ကြတော့လည်း သွေးတိုးရှိမှန်းသိသော်လည်း ကုသမှုကောင်းစွာ မခံယူသူများတွင် သွေးတိုး၏နောက်ဆက်တွဲများ ဖြစ်သည့် ကျောက်ကပ်အားနည်းခြင်း၊ လေဖြတ်ခြင်း၊ နှလုံးသွေးကြောပိတ်ခြင်း တို့ကို စောစီးစွာ ဖြစ်ပေါ်နေကြပါသည်။ သွေးပေါင်ချိန်ကို ပုံမှန်မထိန်းသိမ်းပါက ကျောက်ကပ်သို့သွားသောသွေးကြောများကျဥ်းလာပြီးလျင် ကျောက်ကပ်၏ လုပ်ငန်းများကျဆင်းလာပါသည်။ ထိုသို့ ကျောက်ကပ်၏ လုပ်ငန်းများ ပုံမှန်အတိုင်းမလုပ်ဆောင်နိုင်ပါက သွေးပေါင်ချိန်တတ်စေသော ဟော်မုန်းများထွက်ခြင်း၊ ကျောက်ကပ်မှ စွန်ထုတ်ရမည့် အရည်နှင့် စွန့်ပစ်ပစ္စည်းများကို မစွန့်ထုတ်နိုင်ခြင်းတို့ကြောင့် ခန္ဓာကိုယ်တွင် ရေနှင့်ဆားများစုစည်းနေမှုတို့ကြောင့် သွေးပေါင်ချိန်ပိုတက်လာရ​ခြင်း ဖြစ်ပါသည်။

ထို့အပြင် ကျောက်ကပ်တွင် ရောဂါ တစ်ခုခု (ဥပမာ Renal artery stenosis- ကျောက်ကပ်သွေးကြောများကျဥ်းခြင်း၊ Glomerulonephritis ကျောက်ကပ်ယောင်ခြင်း၊ Renal cell carcinoma - ကျောက်ကပ်ကင်ဆာ) များရှိပါကလည်း သွေးတိုးနေနိုင်ပါသည်။

ထို့ကြောင့် သွေးတိုးရောဂါသည် ကျောက်ကပ်ပျက်စီးရခြင်း၏ အဓိက အကြောင်းအရင်းတွင်ပါဝင်ပြီး ကျောက်ကပ်ပျက်စီးသွားပါကလည်း သွေးပေါင်ချိန်ကို ပိုမိုမြင့်တက်လာစေနိုင်ကြောင်း ကျန်းမာရေး ဗဟုသုတရစေရန်ရည်ရွယ်ပြီး တင်ပေးလိုက်ပါသည်။ ကျွန်မတို့ မြန်မာပြည်သူပြည်သားများ သွေးတိုးရောဂါကို ပေါ့ပေါ့တန်တန်သဘောမထားဘဲ မှန်ကန်သောကုသမှုကို ခံယူခြင်းဖြင့် သက်ရှည်ကျန်းမာသော ဘဝကို ပိုင်ဆိုင်ရရှိနိုင်ကြပါစေ။

12/04/2024

မဂ်လာပါရှင်။
နှစ်ဟောင်းကုန်၍နှစ်သစ်ကူးပြောင်းမည့် အတာသကြ်န်အချိန်လေးကို ရောက်ရှိလို့လာပြန်ပါပီ။
မြန်မာတို့ရဲ့ချစ်စရာကောင်းတဲ့ရိုးရာဓလေ့မှာ ရေကစားကြမည့်သူများအနေနဲ့ ရာသီဥတုအလွန် ပူပြင်းနေသည့် ကာလဖြစ်တာမို့ အထူးဂရုစိုက် စေလိုပါတယ်။
မနက်စောအချိန်များနှင့် ညနေစောင်းအချိန်များတွင်သာအပြင်ထွက်ပြီးကျန်အချိန်များတွင် အရိပ်ရသောနေရာများတွင်သာ နေကြစေလိုပါတယ်ရှင်။
သကြ်န်တွင်းဆေးရုံဆေးခန်းပြဖို့အခက်ခဲရှိသူမိဘပြည်သူများအတွက်လည်း ကျွန်မတို့ Dr P&H online specialist clinic page လေးရှိကြောင်း သတင်းကောင်းပါးပါရစေ။
မြန်မာပြည်သူများအားလုံးနှစ်သစ်မှာအဆိုးများကင်း၍ကောင်းခြင်းအဖြာဖြာရရှိနိုင်ကြပါစေကြောင်း နှစ်သစ်ဆုမွန်ကောင်း တောင်းပေးလိုက်ပါတယ်ရှင်။

10/04/2024

Constipation (ဝမ်းချုပ်ခြင်း)

ဒီနေ့မှာ အရမ်းအဖြစ်များတဲ့ ဝမ်းချုပ်ခြင်းအကြောင်းကို ပြောပြပေးသွားပါမယ်။

ဝမ်းချုပ်တယ်လို့ ဘယ်အချိန်သတ်မှတ်ကြမလဲ
လူတစ်ဦးနဲ့ တစ်ဦး ဝမ်းချုပ်တာကို သတ်မှတ်ကြပုံချင်းမတူညီကြပါဘူး။ နိုင်ငံတကာ သတ်မှတ်ချက်အရတော့ တစ်ပတ်တွင် သုံးခါထက်နည်း၍ ဝမ်းသွားပါက ထိုသူမှာ ဝမ်းချုပ်သည်ဟု သတ်မှတ်ပါသည်။ ဝမ်းချုပ်လျင် သင်၏ ဝမ်းမှာမာကျောခြောက်သွေ့နေပါသည်။ ဝမ်းသွားရန်ခက်ခဲသဖြင့် ဝမ်းကို ညှစ်ပြီးသွားနေရခြင်း၊ ဝမ်းသွာချိန်တွင် နာကျင်ခြင်း နှင့် ဝမ်းသွားပြီးပါက ဝမ်းကျန်သကဲ့သို့ ခံစားနေရပါက သင် ဝမ်းချုပ်နေပါပြီ။

ဝမ်းချုပ်တာ ဘယ်လောက်ထိ အဖြစ်များသလဲဆိုရင် အမေရိကန်နိုင်ငံ၏ စစ်တမ်းအရ ဝမ်းချုပ်ခြင်းကြောင့် ဆရာဝန်နှင့် ကုသမှုခံယူရသည့်အရေအတွက်မှာ တစ်နှစ်လျင် 2.5 သန်း (2.5 million) အထိရှိကြောင်း ေလ့လာတွေ့ရှိရပါသည်။

ဘယ်အရာတွေက ဝမ်းချုပ်ခြင်းကို ဖြစ်စေပါသလဲ
ဝမ်းချုပ်ခြင်းကိုဖြစ်စေတဲ့ အဓိက အကြောင်းအရင်းကတော့ နေထိုင်စားသောက်မှုပုံစံနှင့် အများကြီး သက်ဆိုင်ပါသည်။
• အမျှင်ဓာတ်ပါဝင်သော အစားအသောက်ကို လုံလောက်စွာ မစားခြင်း
• နို့၊ cheese နှင့် စည်သွပ်ဘူးများ၊ အသင့်စားသုံးနိုင်သော အစာများကို များစွာ စားသောက်ခြင်း
• ရေကို လုံလုံလောက်လောက်မသောက်ခြင်း
• ကိုယ်လက်လှုပ်ရှားမှု နည်းပါးခြင်း
• စိတ်ဖိစီးမှု များခြင်း
• ဝမ်းသွားချိန်ပုံမှန်မထားရှိခြင်း
• အိမ်သာ အပြောင်းအလဲ ရှိခြင်း
• ဝမ်းသွားချင်သည့်အချိန်တွင် မသွားဘဲ အောင့်ထားခြင်း တို့ကြောင့် ဝမ်းချုပ်ခြင်းကို ဖြစ်ပေါ်စေနိုင်ပါသည်။
အချို့သော ဆေးများ ကြောင့်လည်း ဝမ်းချုပ်နိုင်ပါသည်။
• ကိုက်အခဲပျောက်ဆေး ( eg. codeine, NSAID.... )
• စိတ်ရောဂါတွင် အသုံးပြုသောဆေးများ ( eg Tricyclic antideprssant,olanzapine. ..)
• အစာကြေဆေး ( antacids)
• သံဓာတ်အားဆေး (iron pill)
• သွေးပေါင်ကျဆေး ( CCB, beta- blocker)
• အယားသက်သာဆေး ( antihistamine)
• အတက်ကျဆေး ( phenytoin, gabapentin)
• အအန်ပျောက်ဆေး ( ondansetron)

အချို့သောရောဂါများတွင်လည်း ဝမ်းချုပ်နိုင်ပါသည်။
• Colorectal cancer (အူမကြီး ကင်ဆာ )
• Hypothyroid ( thyroid ဟော်မုန်း နည်းခြင်း)
• Hypercalcemia (သွေးတွင်း ကယ်လဆီယံများခြင်း)
• irritable bowel syndrome (အူလမ်းကြောင်းလှုပ်ရှားမှု မမှန်ခြင်း)
• ဦးနှောက် အာရုံကြောဆိုင်ရာရောဂါများ ( stroke, Parkinson disease, spinal cord injury)

အသက်ကြီးသူများ၊ ကိုယ်ဝန်ဆောင်သည်များနှင့် ဝမ်းပျော့ဆေးကိုများစွာ သုံးစွဲသူများတွင်လည်း ဝမ်းချုပ်နိုင်ပါသည်။

ဝမ်းချုပ်ခြင်းကြောင့် နောက်ဆက်တွဲ ဖြစ်နိုင်သည့်ဆိုးကျိုးများ
• Haemorroids ( လိပ်ခေါင်း)
• A**l fissures ( စအိုဝ ကွဲခြင်း)
• F***l impaction (စမျဥ်းတုံး ခံခြင်း)
• Stress urinary incontinence (ဝမ်း​ကြာရှည် ညှစ်ခြင်းကြောင့် ကြွက်သားများထိခိုက်ပြီး ဆီးအိမ်မှ ဆီးထွက်ကျခြင်း) တို့ ဖြစ်နိုင်ပါသည်။

ဝမ်းမချုပ်အောင် ဘာတွေလုပ်ရမလဲ
• ရေကို တစ်ရက်တွင် ပုံမှန်သောက်နေကျထက် 2 ခွက်မှ 4 ခွက်ထိ ပိုသောက်ပါ
• ကော်ဖီ၊ အချိုရည်၊ အရက်သောက်ခြင်းမှရှောင်ရှားပါ
• အသီးအနှံ၊ အစေ့အဆံ နှင့် အမျင်ဓာတ်များသော အစာများကို နေ့စဥ်စားပါ။ အဆီများသော အစားအသောက်များကိုရှောင်ပါ
• လေ့ကျင့်ခန်းပုံမှန်လုပ်ပါ
• ဝမ်းသွားချိန်ကို သတ်မှတ်ပြီး အချိန်မှန်လေ့ကျင့်ကြည့်ပါ၊ စောင့်ကြောင့်ထိုင်သည့် အနေအထားက ဝမ်းသွားရလွယ်ကူစေပါသည်။
• ဝမ်းသွားချင်သည့်အချိန်တွင် အချိန်မဆိုင်းဘဲ ချက်ချင်းဝမ်းထသွားရန် လိုအပ်ပါသည်။
• လိုအပ်ပါက တခါတရံတွင် ဝမ်းပျော့ဆေးသုံးစွဲနိုင်ပါသည်။ မလိုအပ်ဘဲ မသောက်ပါနှင့်၊ ဝမ်းပျော့ဆေးကို ဆရာဝန်ညွှန်ကြားချက်မပါဘဲ နှစ်ပတ်ထက်ပို မသောက်သင့်ပါ။

ဘယ်အချိန်မှာ ဆရာဝန်နှင့်တိုင်ပင် ပြသသင့်ပါသလဲ
• အရင်က ဝမ်းချုပ်လေ့မရှိဘဲ ယခုမှ ဝမ်းချုပ်ခြင်းကို စတင်ခံစားရပါက
• ဝမ်းထဲတွင် သွေးပါလာပါက
• ကိုယ်အလေးချိန် ကျလာပါက
• ဝမ်းသွားလျင် ပြင်းထန်သော နာကျင်မှုကို ခံစားရပါက
• ဝမ်းချုပ်ခြင်းမှာ နှစ်ပတ်ထက် ပိုကြာလာပါက ဆရာဝန်နှင့် ပြသတိုင်ပင်ပြီး လိုအပ်ပါက သွေးစစ်ခြင်း၊ ဝမ်းစစ်ခြင်း၊ ဓာတ်မှန်ရိုက်ခြင်း၊ အူလမ်းကြောင်းမှန်ပြောင်းကြည့်ခြင်း နှင့် ထိရောက်သောကုသမှုကို အချိန်မှီ ရယူရန်အရေးကြီးပါသည်။

ကျွန်မတို့ မြန်မာစကားပုံ ဝမ်းတစ်လုံးကောင်းလျင် ခေါင်းမခဲ ဟုဆိုသည့်အတိုင်း ဝမ်းပုံမှန်သွားပြီး ကျန်းမာပျော်ရွှင်သော ဘဝကို ရရှိနိုင်ကြစေရန် ရည်ရွယ်၍ ရေးသားတင်ပြလိုက်ရပါသည်။

05/04/2024

Heat Stroke and Heat exhaustion

AVOID
SPOT
TREAT

ယခုလို အပူချိန် အဆမတန်မြင့်တက်လာသည့် အချိန်တွင် လူတိုင်းလူတိုင်း သိထားသင့်သည့် အပူဒဏ်အန္တရာယ်များနှင့် ပတ်သတ်၍ ရှောင်ရှားရမည့်အချက်များ၊ သိထားသင့်သည့်အချက်များနှင့် မည်သို့မည်ပုံ သက်သာအောင်ပြုလုပ်ရမည့် အချက်များကို ဖော်ပြပေးသွားမှာဖြစ်ပါတယ်ရှင့်။

(1) Avoid
ပထမဦးစွာ ရှောင်ရှားရမည့်အချက်များကို ပြောပြပေးပါမယ်ရှင့်
ယခုလို အပူချိန်အဆမတန်မြင့်တက်သည့်အချိန်များတွင် ဖြစ်နိုင်လျင် အပြင်မထွက်ဘဲ အိမ်ထဲတွင်သာ နေရန် အရေးကြီးပါသည်။
မဖြစ်မနေ ထွက်ရန်လိုအပ်ပါက လုပ်ဆောင်ရမည့် အချက်များမှာ
• ပေါ့ပါး၍ လွတ်လပ်သော အရောင်ဖျော့ဖျော့ အဝတ်အစားများကိုသာ ဝတ်ရန်
• ဦးထုပ်၊ ထီးနှင့် နေကာမျက်မှန် အသုံးပြုရန်
• sunscreen နေလောင်ကာကွယ်ဆီများ လိမ်းရန်
• ရေဘူးကို မိမိနှင့်အတူ ထားရှိ၍ ရေများများသောက်ရန်
• နေပူထဲတွင် အချိန်ကြာမြင့်စွာ မနေဘဲ မကြာခဏ အနားယူပေးရန်
• တတ်နိုင်သမျှ အေး၍ အရိပ်ရသောနေရာများတွင်သာ နေရန်
• ကလေးငယ်နှင့် အိမ်မွေးတိရစ္ဆာန်လေးများကို အလုံပိတ်ထားသောနေရာများတွင် မထားခဲ့ရန် တို့ဖြစ်ကြပါသည်။

🔔🔔🔔
အပူဒဏ် အန္တရာယ် ခံနိုင်ရချေ အများဆုံးသူများမှာ - ကလေးသူငယ်များ၊ သက်ကြီးရွယ်အိုများနှင့် နာတာရှည်ရောဂါ ခံစားနေရသူများဖြစ်ကြပါသည်။

(2) Spot
ဒုတိယအနေဖြင့် အပူဒဏ်အန္တာရယ် (Heat stroke and heat exhaustion) ခံစားရပါက ဖြစ်တတ်သော လက္ခဏာများကို သိရှိထားရန် လိုအပ်ပါသည်။

Heat exhaustion အဆင့်တွင် ခံစားရမည့် လက္ခဏာများမှာ
• ချွေးအလွန်အမင်းထွက်ခြင်း
• ဖြူဖတ်ဖြူရော် ဖြစ်ခြင်း
• ကြွက်တက်ခြင်း
• မောပန်းနွမ်းနယ်ခြင်း
• ခေါင်းမူး ခေါင်းကိုက်ခြင်း
• ဗိုက်အောင့်ပြီး အန်ခြင်း
• သတ်လစ်ခြင်း တို့ဖြစ်ကြပါသည်။

Heat stroke အဆင့်တွင့် ဖြစ်ပေါ်နိုင်သည့် လက္ခဏာများ
• ကိုယ်အပူချိန် အလွန်အမင်းတက်ခြင်း (103 ဒီဂရီ ဖာရင်ဟိုက်နှင့်အထက်)
• အရေပြားများ နီရဲ ပူလောင် ခြောက်သွေ့ခြင်း
• ချွေးမထွက်တော့ခြင်း
• နှလုံးခုန်မြန်ခြင်း
• ခေါင်းမူးခြင်း၊ ခေါင်းထိုးကိုက်ခြင်း
• ဗိုက်အောင့်ခြင်း
• ကယောင်ကတမ်းပြောခြင်း
• သတိလစ်ခြင်း တို့ဖြစ်ကြပါသည်။
အထက်ဖော်ပြပါ လက္ခဏာများ ဖြစ်ပေါ်လာပါက အမြန်ဆုံး ကုသမှု ခံယူရန်လိုအပ်ပါသည်။

(3) Treat
နောက်ဆုံးအနေဖြင့် ဆေးရုံ ဆေးခန်းမရောက်မှီ လုပ်ဆောင်ပေးနိုင်မည့်အချက်များကို ဖော်ပြပေးလိုက်ပါသည်။
Heat exhaustion ခံစားရနေသော လူနာများအတွက်
• အနားယူပါ
• အေးသော အရည်များသောက်ပေးပါ
• ရေချိုး၊ ရေပတ်တိုက်ပါ
• အေးသောနေရာတွင်နေပါ
• ပွ၍ချောင်သော အဝတ်များ ဝတ်ပါ။
heat exhaustion လက္ခဏာများ ပိုးဆိုးလာ၍သော်လည်းကောင်း၊ အချိန်တစ်နာရီထက် ပိုကြာလျင်သော်လည်းကောင်း နီးစပ်ရာ ဆေးရုံဆေးခန်းတွင် ကုသမှု ခံယူရပါမည်။

Heat stroke ခံစားနေရသော လူနာများကို
• လူနာကို အရိပ်ရသောနေရာ၊ အိမ်ထဲသို့ အမြန်ဆုံး ရွှေ့ပါ
• ခန္ဓာကိုယ်ကို အေးမြအောင် ရေချိုးပေးခြင်း၊ ရေပတ်တိုက်ခြင်း
• ပန်ကာလေ ဖွင့်ပေးခြင်း
• ခန္ဓာကိုယ်ကို ​တောက်လျောက် အေးမြနေစေရန် အပူချိန် 102 ဒီဂရီ ဖာရင်ဟိုက် အောက်ရောက်အောင် လုပ်ပြီး နီးစပ်ရာ ဆေးရုံ၊ ဆေးခန်းသို့ အမြန်ဆုံး သွားပါ။

ယခုအချိန်တွင် နွေရာသီ၏ အပူဒဏ် ခံစားနေရသူများအတွက် ဆောင်ရန် ရှောင်ရန်များကို သိရှိနိုင်စေရန် Centers for disease control and prevention (CDC) မှ ကောက်နုတ်ဖော်ပြပေးထားပါသည်။
ကျန်းမာရေးဆိုင်ရာ ဗဟုသုတများကို ဖတ်ရှုနိုင်ရန် ကျွန်မတို့ Dr P & H page လေးကို like and follow လုပ်ထားဦးနော်။

01/04/2024

လေးဘက်နာရောဂါ နှင့် A*O

မြန်မာ ပြည်သူပြည်သားများအနေနဲ့ လေးဘက်နာရောဂါနှင့် A*O ဆိုတာ အရမ်းရင်းနှီးတဲ့ အရာတွေပါ။
မြန်မာပြည်မှာရှိတဲ့ အဆစ်နာတဲ့သူတော်တော်များများဟာ သူတို့မှာ လေးဘက်နာရောဂါရှိတယ်လို့ မှတ်ယူထားကြပါတယ်။ ဘာလို့အဲ့လို မှတ်ယူလဲလို့ မေးလိုက်ရင် A*O တက်လို့ဆိုတဲ့ အဖြေကို အများစုက ပြန်ဖြေကြတာ တွေ့ရပါတယ်။
🔺 အဲ့တော့ ဒီနေ့ ပြောပြချင်တာကတော့ A*O တက်တာနဲ့ လေးဘက်နာရောဂါ ဖြစ်ပြီလား ဆိုတာလေးပါ

ပထမဆုံး A*O ဆိုတာ ဘာလဲ လို့ ပြောပြချင်ပါတယ်
A*O ဆိုတာ သွေးထဲမှာရှိတဲ့ antistreptolysin O titre ကို တိုင်းတာခြင်းဖြစ်ပါသည်။
သင်၏ ခန္ဓာကိုယ်တွင် Group A streptococcal bacteria ပိုး ဝင်သောအခါတွင် ထို ဘက်တီးရီးယားမှ ခန္ဓာကိုယ်ကို toxic ဖြစ်စေသည့် streptolysin O ဆိုသည့် အရာကို ထုတ်လိုက်ပါသည်။ ထိုအခါ ကျွနုပ်တို့၏ ခုခံအားစနစ်မှ ထို Streptolysi O ကို တိုက်ခိုက်မည့်အရာများ Antibodies ​ေတွကို ထုတ်လိုက်ပါသည်။ ထို antibodies များထဲမှ တစ်ခုကို A*O (antistreptolysin O Ab) ဟုခေါ်ပါသည်။

A*O ဘယ်အချိန်မှာတက်မလဲ
သင်၏ ခန္ဓာကိုယ်ထဲသို့ ဘက်တီးရီးယားပိုး ဝင်ပြီး တစ်ပတ် အကြာတွင် A*O စ တက်ပါသည်။ ပိုးဝင်ပြီး 3 ပတ် မှ 5 ပတ်အကြာတွင် အများဆုံးတက်ပြီး နောက်ပိုင်းတွင် တဖြည်းဖြည်းနှင့်ပြန်ကျသွားပါသည်။ လပေါင်းများစွာကြာအောင် ဆက်လက်ရှိနေတတ်ပါသည်။

Gp A streptococcal bacteria inf ဝင်လျင် ဘာတွေ ဖြစ်နိုင်လဲ
• sorethroat - လည်ပင်းနာ
• Fever - ဖျား
• Cellulitis - အရေပြားအောက်ရှိ tissue များ ယောင်ယမ်း နာကျင်ခြင်း
• erysipelas- မျက်နှာနှင့် ခြေထောက်တို့တွင် နာကျင်သော အနီကွက်များ ပေါ်ခြင်း
• impetigo- ပါးစပ်၊ နှာခေါင်း၊ လက်နှင့် ခြေထောက်တို့တွင် အနားများ၊ ရေကြည်ဖုများ ဖြစ်ခြင်း
• Bacteriaemia - သွေးထဲတွင် ပိုးဆိပ်​ပြန့်ချင်း
• Rheumatic fever - လေးဘက်နာ ရောဂါ
• Necrotizing fascitis
• Glomerulonephritis - ကျောက်ကပ်ယောင်ခြင်း
• Meningitis - ဦးနှောက် အမှေးယောင်ခြင်း တို့ဖြစ်နိုင်ပါသည်။

အထက်ဖော်ပြပါ အခြေအနေများတွင် A*O level တက်နိုင်ပါသည်။ ထို့ကြောင့် A*O တက်တာ တစ်ခုတည်းနှင့် လေးဘက်နာ ရောဂါလို့ ပြောလို့မရပါ။

ဒါဆိုရင်✴ လေးဘက်နာ ရောဂါလို့ ဘယ်အချိန်မှာပြောမလဲ ဆက်ကြည့်ရအောင်နော်။

Group A Streptococcal bacteria inf ဝင်ပြီးလျင်
major manifestation ( အဓိက အချက်များ)
(1) Carditis - ရင်ဘတ်အောင့်ခြင်း၊ မောခြင်း၊ ရင်တုန်ခြင်း - နှလုံး echo ရိုက်ခြင်းဖြင့် သိရှိနိုင်ပါသည်။
(2) arthralgia - အဆစ်အကြီးများ တွင် ယောင်ယမ်းနာကျင်ခြင်း( ဘယ်နှင့် ညာ တပြိုင်တည်း မဖြစ်တတ်ပါ၊ တဆစ်ပြီးမှ တဆစ်နာရျင်ပါသည်)
(3) subcutaneous nodules - အရေပြားတွင် အလုံးများပေါ်ခြင်း
(4) Sydenham Chorea - ခြေ၊ လက်များ အလိုအလျောက် ဂဏာမ​ငြိမ် လှုပ်ရှားမှုများဖြစ်ပေါ်ခြင်း
(5) Erythema marginatum - ခြေထောက်တွင် နာကျင်သော အနီကွက်များပေါ်ခြင်း

Minor manifestation (သာမန်အချက်များ)
(1) Fever - ဖျားခြင်း
(2) ESR (or) CRP - 30 နှင့်အထက်
(3) ECG changes - prolong PR interval

သင့်တွင် Group A streptococcal inf ဝင်ပြီးနောက်တွင် အထက်ဖော်ပြပါ အဓိက အချက် ငါးချက်တွင် နှစ်ချက်ရှိလျင်သော်လည်းကောင်း၊ အဓိကအချက် တစ်ချက်နှင့် သာမာန်အချက်နှစ်ချက် တွဲရှိလျင်သော်လည်းကောင်း ရှိမှသာလျင် လေးဘက်နာရောဂါဟု ခေါ်ဆိုနိုင်ပါသည်။ ထိုအချက်များအပြင် သင့်ထံတွင် Streptococcal inf ဝင်ထားသည့် လက္ခဏာများ အပါအဝင် A*O titre တက်ခြင်း (သို့) အခြားသော streptococcal Ab titres များတက်ခြင်း (သို့) လည်ချောင်းအတွင်းမှ swab ယူ၍ပိုးမွေးရာတွင် Gp A streptococcus အကောင်ပေါက်ခြင်း တို့ ရှိနေရပါမည်။

🔔🔔🔔ထို့ကြောင့် လေးဘက်နာ ရောဂါဆိုတာ A*O တစ်မျိုးတည်းတက်ရုံနှင့် အလွယ်တကူ ပြော၍ရသော ရောဂါမျိုး မဟုတ်ပါဘူးရှင့်။

ကျွမ်းကျင်သော ဆရာဝန်များမှ လူနာ၏ ေရာဂါရာဇဝင် အပါအဝင် လူနာကို သေချာစွာ စမ်းသပ်စစ်ဆေးပြီး လိုအပ်သော သွေး၊ ဓာတ်မှန်၊ Echo၊ ECG နှင့် ပိုးမွေးခြင်းများပြုလုပ်ပြီး အားလုံးကို ဘက်ပေါင်းစုံမှ ကြည့်ရှုပြီးမှသာလျင် လေးဘက်နာရောဂါဟု သတ်မှတ်နိုင်ပါသည်။
သင့်မှာ လေးဘက်နာရောဂါ ဖြစ်တာသေချာပြီဆိုလျင် ပိုးသတ်ဆေးကို လိုအပ်သော ပမာဏနှင့် လိုအပ်သော အချိန်ကာလတစ်ခုအထိ လုံလောက်စွာ ကုသရန်လိုအပ်ပါသည်။ သို့မှသာ လေးဘက်နာမှတဆင့် နှလုံးထိခိုက်ပျက်စီးခြင်းကို ကာကွယ်နိုင်မှာဖြစ်ပါတယ်ရှင့်။ လေးဘက်နာ ဖြစ်တာ မသေချာဘဲ ပိုးသတ်ဆေးများကို နှစ်ရှည်လများသောက်နေသည့် သူများ အများအပြားတွေ့ရှိနေရပါသည်။ မလိုအပ်ဘဲ ပိုးသတ်ဆေးများကို ကြာရှည်စွာသုံးစွဲပါက ဆေးယဥ်ပါးခြင်း ပြသနာများဖြစ်လာနိုင်ပါသည်။
ထို့ကြောင့် အဆစ်နာပြီး A*O တက်ရုံနှင့် လေးဘက်နာဟု ပြော၍ မရပါ။ လည်ပင်းနာပြီးလျင်လည်း A*O တက်နေနိုင်ပါသည်။ Streptococcal. inf ဝင်ပြီးလျင် လေးဘက်နာမှ မဟုတ်ဘဲ အထက်တွင်ဖော်ပြထားသော ရောဂါများလည်း ဖြစ်ပေါ်နိုင်သဖြင့် ပိုးဝင်ပါက ထိရောက်သော ပိုးသတ်ဆေးဖြင့် ကုသမှုကို ခံယူရန်အရေးကြီးပါသည်။ သို့မှသာ နောက်ဆက်တွဲ ဆိုးကျိုးများကို တားဆီးနိုင်မှာဖြစ်ပါတယ်။

ပြည်သူအများ ကျန်းမာရေး ဗဟုသုတ တိုးပွားပြီး မှန်ကန်သော ကျန်းမာရေးစောင့်ရှောက်မှုကို ရရှိနိုင်ဖို့က ကျွန်မတို့ Dr P & H page လေး ရှိတယ်နော်။

31/03/2024

ခေါင်းကိုက်ခြင်း အမျိုးမျိုး

Tension headache
ခေါင်းကိုက်ခြင်း တွေထဲမှာ အဖြစ်အများဆုံးသော ခေါင်းကိုက်ခြင်း ဖြစ်ပါတယ်။ သင်၏ဦးခေါင်းတစ်ခုလုံးတွင် တင်းကြပ်စွာ ဖြင့် ခေါင်းကိုက်နေတတ်ပါသည်။ စိုးရိမ်ပူပန်မှု stress များကြောင့်ဖြစ်ပါသည်။ ခေါင်းကိုက်ချိန် မိနစ် 30 မှ 7 ရက်အထိ ကြာတတ်ပါသည်။

Migraine - ခေါင်းတခြမ်းကိုက်ခြင်း
ဦးခေါင်းတခြမ်းတွင် ထိုးထိုးပြီး ဆိုးရွာသော ခေါင်းကိုက် ဝေဒနါကို migraine ဟုခေါ်ပါသည်။ migraine မစမီ 1-2 ရက်လောက် အကြိုကတည်းက ရှေ့ပြေး လက္ခဏာလေးများပြတတ်သည်။ရှေ့ပြေးလက္ခဏာများမှာ - အာရုံ မစူးစိုက်နိုင်ခြင်း၊ နုံးခြင်း၊ အိပ်​ပျော်ရန် ခက်ခဲခြင်း၊ ဆာလောင်ခြင်း၊ရေငတ်ခြင်း၊ ဆီးခဏခဏသွားခြင်းတို့ဖြစ်တတ်သည်။ ခေါင်းမကိုက်မီ 5 မိနစ်မှ မိနစ်သုံးဆယ်အတွင်းတွင် ကြွက်သားများအားနည်းလာခြင်း၊ စကားပြောခက်ခဲခြင်း၊ နားအူခြင်း၊ အလင်းတန်းများမြင်ခြင်း၊ ထုံကျဥ်ခြင်း တို့ ကြိုတင် ပြတတ်သူများလည်းရှိပါသည်။ ​ခေါင်းကိုက်ချိန် အနည်းဆုံး 4 နာရီ မှ 3 ရက်အထိ ကြာတတ်သည်။
Migraine ကို အားပေးစေသော အရာများ
အချို့သော အစားအသောက်များ - cheese, အချိုမှုန့်၊ ကော်ဖီ ၊ အရက်
ရေလုံလောက်စွာ မသောက်ခြင်း
အိပ်ချိန်နည်းခြင်း၊ အအိပ်လွန်ခြင်း
screen time များခြင်း
တောက်ပသော အလင်းရောင်များ
စူးရှသောအနံ
ဆူညံသောအသံများ
ဟော်မုန်းအပြောင်းအလဲများ

Cluster headache
ခေါင်းကိုက်ခြင်းနှင့်အတူ မျက်ခွံတွဲကျခြင်း၊ မျက်လုံးနီရဲခြင်း၊ မျက်ရည်ကျခြင်း၊ နှာခေါင်းပိတ်ခြင်းတို့ စုပုံဖြစ်သောကြောင့် cluster headache ဟုခေါ်ပါသည်။

Chronic daily headache
တစ်လတွင် ခေါင်းကိုက်ခြင်းကို 15 ရက်နှင့်အထက်ခံစားရတာ သုံးလကျော်ပါက chronic daily headache ဟုခေါ်သည်။

Sinus headache
Sinus ရှိသောနေရာတစ်ဝိုက် (ပါးရိုး၊ နှာခေါင်းရိုး၊ နဖူးတစ်ဝိုက်တွင်ယောင်ယမ်းနာကျင်ခြင်းကြောင့် sinus headache ဟုခေါ်သည်။ နှာစေခြင်း၊ နားပိုးဝင်ခြင်းတို့နှင့်တွဲ၍ဖြစ်ပေါ်သည်။

Post traumatic headache
ခေါင်းကို ထိခိုက်ဒဏ်ရာရပြီး နှစ်ရက်မှ သုံးရက်အတွင်းဖြစ်ပေါ်တတ်ပြီး လနှင့်ချီ၍ ကြာတတ်သည်။

Exercise headache
လေ့ကျင့်ခန်း လုပ်​ခြင်း ​နှင် လိပ်ဆက်ဆံခြင်း တို့ကြောင့်ဖြစ်ပေါ်လာတတ်သည်။ 5 မိနစ်မှ နှစ်ရက်လောက်ကြာတတ်သည်။

Hormone headache
အမျိုးသမီးများ ရာသီလာချိန်၊ ကိုယ်ဝန်ဆောင်ချိန်နှင့် သွေးဆုံးချိန်များတွင် ဟော်မုန်းအပြောင်းအလဲကြောင့် ခေါင်းကိုက်ခြင်းကိုခေါ်သည်။ ရာသီသွေးမပေါ်ခင် နှစ်ရက်မှ ရာသီလာစဥ် သုံးရက်လောက်အထိ ကြာတတ်သည်။

New daily persistent headache
ရုတ်တရက်ဖြစ်ပေါ်လာပြီး အချိန် သုံးလနှင့်အထက် ကြာတတ်ပါသည်။ တခါတရံ တုပ်ကွေးမိခြင်း၊ ပိုးဝင်ခြင်း၊ခွဲစိတ်မှုပြုလုပ်ခြင်းနှင့် Stressရှိသောအချိန်တို့တွင်ဖြစ်ပေါ်တတ်ပါသည်။

Medication overuse headache (Rebound headache)
ခေါင်းကိုက်သက်သာစေရန် အကိုက်အခဲပျောက်ဆေးများကို တစ်ပတ်တွင် သုံးရက်ထက်ပိုသောက်ခြင်း (သို့) တစ်လတွင် ဆယ်ရက်ထက်ပိုသောက်ခြင်းကြောင့်ဖြစ်ပေါ်လာသော ခေါင်းကိုက်ခြင်းဖြစ်သည်။

Spinal headache
ခွဲစိတ်မှု ပြုလုပ်သည့်အခါ ခါးရိုးထုံဆေးထိုးပြီးနောက်ဖြစ်ပေါ်လာတတ်သော ခေါင်းကိုက်ခြင်းမျိုးဖြစ်ပါသည်။

Alcohol headache
အရက်အလွန်အကျွံသောက်ခြင်းကြောင့် ဖြစ်ပေါ်လာတတ်သော ခေါင်းကိုက်ခြင်းမျိုးဖြစ်သည်။

Altitude headache
တောင်တက်ခြင်း၊ ဒိုင်ပင်ထိုးခြင်း၊ လေယာဥ်စီးသည့်အချိန်တို့တွင် ပင်လယ်ရေမျက်နှာပြင်နှင့် အမြင့်ကွာဟမှုကြောင့်ဖြစ်ပေါ်လာသည့်ခေါင်းကိုက်ခြင်းဖြစ်သည်

Dehydration headache
ရေဓာတ်ခမ်းခြောက်မှုကြောင့် ဖြစ်ပေါ်လာသည့် ခေါင်းကိုက်ခြင်းမျိုးဖြစ်သည်။

Thunderclap headache
ဘဝတွင် အဆိုးဆုံးသော ခေါင်းကိုက်ခြင်းဟုခေါ်ဆိုနိုင်ပါသည်။ ရုတ်တရက်ဖြစ်ပေါ်လာပြီး အချိန်တိုအတွင်းမှာပင် အဆီုးရွားဆုံးသော ဝေဒနါကို ခံစားရပါသည်။ ထိုခေါင်းကိုက်ခြင်းမျိုးခံစားရပါက အလွန်အန္တရာယ်ကြီးပါသည်။ ဦးနှောက်သွေးကြောပေါက်ခြင်း၊ ပိတ်ခြင်း၊ကျဥ်းခြင်းနှင့် ဦးခေါင်း ထိခိုက်ဒဏ်ရာရထားသူများတွင် ဖြစ်ပေါ်တတ်သည်။

ခေါင်းကိုက်ခြင်း အမျိုးအစားပေါင်း 150 ကျော်ထဲမှ အဖြစ်အများဆုံး ခေါင်းကိုက်ခြင်းတွေကို ဖော်ပြပေးထားပါသည်။ ခေါင်းကိုက်ခြင်းသည် လူတိုင်းကြုံတွေ့ဖူးကြသည့်အရာ ဖြစ်သည်။ များသောအားဖြင့် သာမန်ခေါင်းကိုက်ခြင်းမျိုးသာ ဖြစ်လေ့ရှိကြပြီး paracetamol သောက်ရုံလောက်ဖြင့် သက်သာနိုင်ကြပါသည်။ ထိုသို့ အလွယ်တကူ မသက်သာသော ခေါင်းကိုက်ခြင်းမျိုးအတွက် တစ်ခုချင်းစီမှာ ထိရောက်သောကုသမှုနှင့် ကာကွယ်ရမည့်နည်းလမ်းများရှိကြပါသည်။ တစ်ခုနှင့်တစ်ခု မတူညီပါ။ ခေါင်းကိုက်ခြင်းကင်းဝင်း၍ ကျန်းမာပျော်ရွှင်သော ဘဝကို ပိုင်ဆိုင်နိုင်ကြပါစေ။

30/03/2024

Silent killer (တိတ်တဆိတ် လူသတ်သမား) လို့တောင် တင်စားခေါ်ဝေါ်ရတဲ့ Hypertension (သွေးတိုးရောဂါ)အကြောင်း သိကောင်းစရာလေးများ

Hypertension (သွေးတိုးရောဂါ)
ကျွန်မတို့တွေ့ နေ့စဥ်နှင့်အမျှ ကြားဖူးနေကြ စကားလေး လေးလုံးပါ
အမှန်တော့ သွေးတိုးရောဂါကို ကုရတာဟာ လွယ်မယောင်နဲ့ခက် တိမ်မယောင်နဲ့ နက်လို့ ပြောလို့ရပါတယ်

သွေးတိုးရောဂါ နှစ်မျိုးရှိပါသည်
1. primary or essential hypertension (ရောဂါ အခံမရှိဘဲနှင့် ဖြစ်ပေါ်သောသွေးတိုးရောဂါ)
2. secondary hypertension ( အခြေ ခံရောဂါ တစ်ခုခုကြောင့် ဖြစ်ပေါ်လာသော သွေးတိုးရောဂါ)
ဥပမာ - အဝလွန်​​​ ရောဂါ၊ ကျောက်ကပ်ရောဂါ ၊ ဟော်မုန်းဓာတ် နည်းခြင်း၊များခြင်း၊ အရက်အလွန်အကျွံသောက်ခြင်း၊ တချို့သော ဆေးဝါးများ)ကြောင့် ဖြစ်ပေါ်လာသော သွေးတိုးကို ဆိုလိုပါသည်

သွေးတိုးရောဂါဖြစ်လာစေရန်အားပေးသောအချက်များ
1. အသက်အရွယ်
2. မိသားစု မျိုးရိုးတွင် သွေးတိုးရောဂါ ရှိခြင်း
3. အဝလွန်ခြင်း
4. ကိုယ်လက်လှုပ်ရှားမှု မရှိဘဲ အထိုင်များခြင်း
5. ဆေးလိပ်သောက်ခြင်း
6. အငန်စားများခြင်း
7. အရက်အလွန်အကျွံသောက်ခြင်း
8. စိတ်ဖိစီးမှုများခြင်း

နောက်ဆက်တွဲဆိုးကျိုးများ
1. နှလုံးသွေးကြောကျဥ်း/ ပိတ်ခြင်း
2. နှလုံး အမောဖောက်ခြင်း
3. ကျောက်ကပ်ပျက်စီးခြင်း
4. ဦးနှောက်သွေးကြောပေါက်ခြင်း / ပိတ်ခြင်း
4. အမြင်အာရုံ ချို့ယွင်းခြင်း
5. သွေးတွင်းသကြားဓာတ်များ၍ဆီးချိုရောဂါဖြစ်ပေါ်ခြင်း၊ သွေးတွင်း အဆီဓာတ်များခြင်း တို့ဖြစ်ပါသည်

သို့ဖြစ်ပါ၍ မည်သူမဆို သွေးတိုးရောဂါ ရှိပြီဆိုလျင် ဆရာဝန်နှင့်တိုင်ပင်၍ အောက်ပါ စစ်ဆေးမှုများပြုလုပ်ပြီး ထိရောက်စွာ ကုသရန်လိုအပ်ပါသည်

သွေးတိုးရောဂါရှိသူတိုင်း စစ်သင့်သည့်အရာများ
1. Urine RE (ဆီးအတွင်း အသားဓာတ်၊သကြားဓာတ်နှင့် သွေး ပါဝင်မှုရှိ / မရှိစစ်ဆေးခြင်း)
2. U & E, Cr (ကျောက်ကပ်ဓာတ် စစ်ဆေးခြင်း)
3. Blood glucose ( သွေးတွင်း သကြားဓာတ်စစ်ဆေးခြင်း)
4. lipid profile (သွေးတွင်း အဆီဓာတ် စစ်ဆေးခြင်း)
5. Thyroid function test(လည်ပင်းဟော်မုန်းဓာတ်စစ်ဆေးခြင်း)
6. ECG ဆွဲ ခြင်း တို့ကို အခြေခံ အားဖြင့် ပြုလုပ်ရန်လိုအပ်ပါသည်
ရလာသည့်အဖြေနှင့် လူနာ၏ရောဂါအခြေအနေပေါ်မူတည်၍ လိုအပ်ပါက ထပ်မံစစ်ဆေးရပါသည်

သွေးတိုးရောဂါကို ကုသရာတွင် သွေးပေါင်ချိန်တစ်ခုတည်းကို ကုသရန်မဟုတ်ပါ။ သွေးပေါင်ချိန် အပါအဝင် သွေးတိုးကို ဖြစ်စေနိုင်သော အကြောင်းအရင်းများနှင့် သွေးတိုးကြောင့် ဖြစ်ပေါ်နေသော ဆိုးကျိုးများကိုပါ တပြိုင်နက် အချိန်နှင့် တပြေးညီ ကုသနိုင်မှသာ ထိရောက်သော ကုသမှုနှင့် ကျန်းမာသော ဘဝကို ရရှိနိုင်မှာဖြစ်ပါတယ်

ထို့ကြောင့် သွေးတိုးရောဂါရှိပါက ပေါ့ပေါ့စစ မနေဘဲ နားလည်တတ်ကျွမ်းသည့် ဆရာဝန်များနှင့် ထိရောက်သောကုသမှုကို ခံယူနိုင်ဖို့ အကြံပြု တိုက်တွန်းလိုက်ပါတယ်ရှင့်

Dr P&H Specialist Online Clinic တွင်လည်း သွေးတိုး ရောဂါကို အထူးကု သမားတော်များနှင့် ​စနစ်တကျ ဆွေးနွေးတိုင်ပင်ပြသ၍ ထိ​ ရောက်​ သော ကုသမှု ခံယူနိုင်ရန် အခုဘဲ online booking ယူလိုက်ကြရအောင်

29/03/2024

သင် ခေါင်းကိုက်ဖူးပါသလား?
ဘယ်လို ခေါင်းကိုက်ခြင်းမျိုးက စိုးရိမ်ရသလဲ?

လူတိုင်း ခေါင်းကိုက်တဲ့ ဝေဒန္ဓာကို အနည်းနဲ့ အများတော့ ခံစားဖူးကြမယ်ထင်ပါတယ်။ ခေါင်းကိုက်ပြီဆိုတာနဲ့ လူတွေက ခေါင်းမှာ အလုံး အကြိတ် ကင်ဆာရောဂါ ဖြစ်မှာကို ကြောက်တတ်ကြပါတယ်။
ဒါကြောင့် ဒီနေ့မှာတော့ ခေါင်းကိုက်ခြင်း အမျိုးအစား ဘယ်နှစ်မျိုးလောက်ရှိသလဲဆိုတာနဲ့ ဘယ်လိုခေါင်းကိုက်မှုမျိုးဆို အရေးကြီးသလဲဆိုတာတွေကို တင်ပြပေးသွားမှာဖြစ်ပါတယ်ရှင့်။

96 ရာခိုင်နှုန်းသော လူတွေဟာ တစ်သက်မှာ အနည်းဆုံးတစ်ခါတော့ ခေါင်းကိုက်ဖူးကြတယ်လို့လေ့လာတွေ့ရှိထားပါတယ်။ ခေါင်းကိုက်ခြင်း အမျိုးအစားပေါင်း 150 ကျော်ရှိပါတယ်။

အဓိကအား​ဖြင့်တော့ ခေါင်းကိုက်ခြင်းကို primary headache( အကြောင်းအရင်းခံ မရှိပါဘဲ ဖြစ်ပေါ်ခြင်း) နှင့် secondary headache ( အကြောင်းအရင်းခံ ရောဂါ အခံ တစ်ခုခုကြောင့် ဖြစ်ပေါ်ခြင်း) ဆိုပြီး ခွဲထားပါတယ်။

ခေါင်းကိုက်ခြင်းကို ဖြစ်ပေါ်စေနိုင်သော ရောဂါအကြောင်းအရင်းခံများ (causes of secondary headaches)
Middle ear infection and sinus infection - နားနှင့် နှာခေါင်းတွင် ပိုးဝင်ခြင်း
Glaucoma- မျက်လုံးရေတိမ်ရောဂါ
Dental problems -သွားဘက်ဆိုင်ရာ ပြသနာများ
High BP - သွေးပေါင်ချိန်မြင့်တက်ခြင်း
Aneurysm - ဦးခေါင်းအတွင်း သွေကြောဖောင်းများရှိခြင်း
Brain tumour - ဦးနှောက်ကင်ဆာ
Meningitis - ဦးနှောက်အမှေးရောင်
Head injury - ခေါင်း ထိခိုက်ခြင်း
Stroke - လေဖြတ်ခြင်း တို့ကြောင့် ခေါင်းကိုက်ဝေဒန္ဓာခံစားရပါက secondary headache ဟုခေါ်ပါသည်။
⭐️ဖြစ်ပေါ်စေသော အကြောင်းရင်းကို သေချာစစ်ဆေး၍ ကုသမှု ခံယူရန် အလွန်ပင်အရေးကြီးပါသည်။

အကြောင်းရင်းခံမရှိပဲခေါင်းကိုက်ရင် ဘာလုပ်ရမလဲ? (For primary headaches)
• တိတိဆိတ်ငြိမ်သက်သော အခန်းတွင် နားနေပါ၊ အိပ်စက်ခြင်းဖြင့်အနားယူပါ။
• ရေနွေးဝတ် (သို့) ရေခဲဝတ်ကို နဖူးပေါ်တင်ထားပါ။
• ရေများများသောက်ပါ။
• stress ကိုလျော့ချပါ။
• အကိုက်အခဲပျောက်ဆေးများထဲမှ paracetamol ကို သောက်​​ကြည့် နိုင်ပါသည်။

ခေါင်းကိုက်တာ အများစုဟာ သာမန်ခေါင်းကိုက်ခြင်းမျိုးဘဲ ဖြစ်လေ့ဖြစ်ထ ရှိပါတယ်။ သို့သော် တခါတရံမှာ အရေးကြီးသော ခေါင်းကိုက်ခြင်းမျိုးရှိတတ်ပါသည်။
⚠️ဒါကြောင့် ဘယ်လိုခေါင်းကိုက်ခြင်းမျိုးဆိုဆရာဝန်ဆီ အမြန်ဆုံးသွားရောက်ကုသမှုခံယူရမလဲဆိုတာ ပြောပြမယ်နော်။
• အသက် 50 နှစ်နှင့်အထက်တွင် ပထမဦးဆုံးအကြိမ် ပြင်းပြင်းထန်ထန်ခေါင်းကိုက်ပါက
• ရုတ်တရက် ပြင်းပြင်းထန်ထန် ခေါင်းကိုက်ပါက
• ယခင်က ခေါင်းကိုက်သည့်ပုံစံနှင့်မတူညီဘဲ ပြောင်းလဲလာပါက
• ခေါင်းကိုက်သည့်ဝေဒန္ဓာမှာ တဖြည်းဖြည်းနှင့်ပိုမိုဆိုးရွားလာပါက
• အကိုက်အခဲပျောက်ဆေးကို တစ်ပတ်တွင် သုံးရက်ထက် ပိုသောက်နေရပါက
• မနက်မိုးလင်း အိပ်ယာထချိန်တွင် ပျို့အန်၍ ခေါင်းကိုက်ခြင်း
• ညအိပ်နေစဉ်မှ ခေါင်းကိုက်ခြင်းကြောင့် နိုးလာပါက
• ခေါင်းကို ထိခိုက်ဒဏ်ရာရပြီးမှ ခေါင်းကိုက်ပါက
• ခေါင်းကိုက်ခြင်းနှင့်အတူ ဖျားခြင်း၊ ပျို့အန်ခြင်း၊ သတိလစ်ခြင်း၊တက်ခြင်း၊ ကယောင်ကတမ်းပြောခြင်း၊ ကိုယ်တခြမ်း အားနည်းခြင်း၊ စကားမပြောနိုင်ခြင်း၊ အမြင်အာရုံ ချို့တဲ့ခြင်း တို့နှင့်တွဲဖက်၍ ဖြစ်ပေါ်လာပါက အလွန်ရေးကြီးပါသည်။
⭐️အထက်တွင်ဖော်ပြထားသော အချက်တစ်ခုခုနှင့်ကိုက်ညီပါက အချိန်မဆွဲဘဲ ကျွမ်းကျငိသည့် ဆရာဝန်များနှင့် ထိရောက်သော ရောဂါရှာဖွေ စစ်ဆေးကုသမှုများပြုလုပ်ရန် လိုအပ်ပါသည်။
ဆရာဝန်များမှ သင်၏ ခေါင်းကိုက်ခြင်း ဝေဒန္ဓာအပြည့်အစုံကို သေချာမေးမြန်း၍ စမ်းသပ်စစ်ဆေးပြီးလိုအပ်ပါက ဦးခေါင်းကို ကွန်ပျူတာ ဓာတ်မှန်/ သံလိုက်ဓာတ်မှန်ရိုက်ခြင်း၊ ခါးခြင်ဆီ ဖောက်စစိခြင်း၊ သွေးစစ်ခြင်းနှင့် မျက်စိအထူးကုဆရာဝန်များနှင့်စမ်းသပ်စေခြင်းတို့ကို ပြုလုပ်ပေးပြီး လိုအပ်သည့်အတိုင်း ကုသပေးမည် ဖြစ်ပါတယ်။
⚠️အကိုက်အခဲ ပျောက်ဆေးများကို ဆရာဝန်များနှင့်မတိုင်ပင်ဘဲ ရက်ရှည်လများသောက်သုံးပါက ထိုအကိုက်အခဲပျောက်ဆေးကြောင့်ပင် ခေါင်းပြန်ကိုက်နိုင်ပါသည်။
ထို့ကြောင့် ခေါင်းကိုက်တိုင်းတော့ ကြောက်စရာမလိုပါ။ သို့သော် အထက်တွင်ဖော်ပြထားသော ခေါင်းကိုက်ခြင်းမျိုးဖြစ်ပါက ဆရာဝန်များနှင့် တိုင်ပင်ပြီး ရောဂါရှာဖွေ ကုသရန်လိုအပ်ကြောင်း သိရှိစေလိုပါသည်။ သို့မှသာ အချိန်မလွန်မှီ မှန်ကန်ထိရောက်တဲ့ ကုသမှုမျိုးကိုရရှိနိုင်မှာဖြစ်ပါတယ်ရှင့်။
နောက်နေ့တွေမှာ ခေါင်းကိုက်ခြင်း အမျိုးအစား 150 ကျော်ထဲမှ အဖြစ်များသောခေါင်းကိုက်ခြင်းတွေကို ဆက်လက်ဖော်ပြပေးသွားမှာမို့ ကျွန်မတို့ Dr P & H page လေးကို like and follow လုပ်ထားကြဦးနော်။

28/03/2024

သင် အဝလွန်နေပါသလား
ဒါဆိုရင်တော့ ဒီpost လေးကို ဆုံးအောင် ဖတ်ကြည့်စေချင်ပါတယ်နော်

Obesity and Metabolic Syndrome

BMI ( Body Mass Index > 30kg/ m2) နှင့်အထက်ကို obesity(အဝလွန်) ဟု သတ်မှတ်ပါသည်။
(မိမိ ၏ BMI ကို ပုံပါဇယားတွင် ကြည့်နိုင်ပါသည်)

ဘာကြောင့် အဝလွန်ရောဂါ ဖြစ်လာကြရသလဲ ဆိုရင်
(1) အထိုင်များပြီး ကိုယ်လက်လှုပ်ရှားမှု မရှိခြင်း
(2) မိမိသုံးနေသော energy ထက် ပို၍ စားသောက်နေခြင်း
(3) ကျန်းမာရေးနှင့် မညီညွတ်သော အစားအစာများ ( ကာဘိုဟိုက်ဒရိတ်၊ အချိုနှင့် အဆီများသော အစာများ)စားသောက်ခြင်း
(4) အရက်အလွန်အကျွံသောက်ခြင်း
(5) စိတ်ဖိစီးမှုများခြင်း
(6) အိပ်ချိန်မလုံလောက်ခြင်း၊ နှစ်ခြိုက်စွာ အိပ်မပျော်ခြင်း
(7) ဟော်မုန်းဆိုင်ရာ ရောဂါများ
(8) တချို့သောဆေးများ ( glucocorticoids, atypical antipsychotics, some OHA, .....)
တို့ဖြစ်ကြပါသည်။

Metabolic syndromeဆိုတာဘာလဲ
ဘယ်အချိန်မှာ Metabolic syndrome ဖြစ်ပြီလို့ သတ်မှတ်မလဲ
(1) အဝလွန်ခြင်း- ခါး တစ်ဝိုက်တွင် အဆီများစုဝေးခြင်း (အမျိုးသားများတွင် ခါးပတ်လည် 40 လက်မနှင့်အထက်၊ အမျိုးသမီးများတွင် ခါးပတ်လည် 35 လက်မနှင့်အထက်) (သို့မဟုတ်) BMI > 30 kg/m2
(2) သွေးပေါင်ချိန် တက်ခြင်း (BP > 130/85 mmHg)
(3) သွေးတွင်းသကြားဓာတ်များခြင်း (အစာအစားခင် 110 mg/ dl နှင့်အထက်)
(4) သွေးတွင်း အဆီဓာတ် Triglyceride မြင့်တက်ခြင်း ( TG > 150 mg/ dl)
(5) သွေးတွင်း အဆီဓာတ် HDL ကျခြင်း (အမျိုးသားများတွင် 40 mg/ dl အောက် နှင့် အမျိုးသမီးများတွင် 35 mg/ dl အောက်)
🔺🔺🔺အထက်ပါအချက် (5) ချက်တွင် (3) ချက်ရှိပါက metabolic syndrome ဟုခေါ်ပါသည်။

Metabolic syndrome က ဘာလို့အရေးကြီးလဲ
Metabolic syndrome ဖြစ်ပြီဆိုလျင် အမျိုးအစား (2) ဆီးချို၊ နှလုံးသွေကြောဆိုင်ရာရောဂါများ၊ လေဖြတ်ခြင်း တို့ကို သိသိသာသာမြင့်တတ်စေနိုင်သည့်အတွက် အလွန် အရေးကြီးလှပါသည်။

metabolic syndrome ရဲ့ နောက်ဆက်တွဲ ဘာတွေဖြစ်နိုင်လဲဆိုလျင်
• Fatty liver - အသည်းအဆီဖုံးခြင်း
• obstructive sleep apnoea - အိပ်နေစဥ်အတွင်း အသက်ရှု ခေတ္တခဏရပ်ခြင်း
• Hyperuricaemia - uric acid တက်လာခြင်း
• polycystic ovarian syndrome - သားဥအိမ်တွင် ရေအိတ်များတည်ခြင်း
• သွေးတိုး၊ဆီးချိုနှင့် သွေးတွင်းအဆီများခြင်း တို့ဖြစ်လာနိုင်ပါသည်။
အဝလွန်ခြင်း၏ နောက်ဆက်တွဲ ရောဂါ လက္ခဏာများရှိပါက ထိရောက်သောကုသမှု ခံယူရန် အလွန်အရေးကြီးပါသည်။

သင် အဝလွန်နေပြီဆိုရင် ဘာလုပ်ရမလဲ
(1)သင်၏ ကိုယ်အလေးချိန်ကို လျော့ချရန် အရေးအကြီးဆုံးဖြစ်ပါသည်။
• သင့်ကိုယ်အလေးချိန်၏ 5-10% လျော့ချရန် targetထားရပါမည်။
• ပုံမှန်အားဖြင့် တစ်ပတ်ကို 0.5 kg / 1.1 ပေါင် အနည်းဆုံးလျော့ချသင့်ပါသည်။ အချိန်တိုနှင့် အမြန်ချရန်လိုပါက တစ်ပတ်ကို 1.5-2.5 kg(3.3-5.5ပေါင်) ကို အာဟာရဆရာဝန်နှင့်တိုင်ပင်ပြီးလျော့ချရပါမည်။
• တစ်ရက်ကို ကယ်လိုရီ လျော့ချရန် 500-600 kcal လျော့စားရပါမည်။
(2) လေ့ကျင့်ခန်း ပုံမှန်ပြုလုပ်ရန်
• အသင့်အတင့် ပြင်းထန်သော လေ့ကျင့်ခန်းမျိုး( ဥပမာ- လမ်းပြင်းပြင်းလျောက်​ခြင်း ၊ စက်ဘီးစီးခြင်း) ပြုလုပ်ပါက တစ်ပတ်လျှင် 150-300 မိနစ် ပြုလုပ်ရန်
• ပြင်းထန် လေ့ကျင့်ခန်းမျိုး (ဥပမာ - ပြေးခြင်း၊ရေကူးခြင်း၊ ဘက်စကတ်ဘောကစားခြင်း) ပြုလုပ်မည်ဆိုလျှင် တစ်ပတ်ကို 75-150 မိနစ် ပြုလုပ်ရန်လိုအပ်ပါသည်။
(3) အငန်နှင့် အချို လျော့စားရန်
(4) ဆေးလိပ်ဖြတ်ရန်
(5) အရက်ဖြတ်ရန်
(6) တစ်ညလျင် အနည်းဆုံး 7-8 နာရီ နှစ်ခြိုက်စွာ အိပ်ရန် လိုအပ်ပါသည်။

🔔ဘယ်အချိန်မှာ ကိုယ်အလေးချိန် ချဆေး သောက်သင့်ပါသလဲ
သင့်တွင် မည်သည့်ရောဂါ အခံမှ မရှိပါက BMI 30 နှင့်အထက်၊ အဝလွန် ရောဂါ၏ နောက်ဆက်တွဲရောဂါ တစ်ခုခုရှိပါက BMI 27 နှင့်အထက်တွင် ကိုယ်အလေးချိန်ချဆေးသောက်ရန် ဆရာဝန်များနှင့်တိုင်ပင်ပြီး ထိရောက်သောကုသမှုခံယူပါ။ အနည်းဆုံး အချိန်တစ်နှစ်လောက် ဆက်သောက်ရန်လိုအပ်ပါသည်။ သို့သော် ဆေးသောက်နေစဥ် ကိုယ်အလေးချိန်မကျသူများ၊ ကိုယ်အလေးချိန်တိုးလာသူများဆိုပါက ဆေးကို ရပ်ရပါမည်။ ဆေးကို တုံ့ပြန်မှု ကောင်းသူများမှာ သုံးလအတွင်း 5% လျော့ကျသူများကို ဆိုလိုပါသည်။
♦♦♦ကိုယ်အလေးချိန်ကျဆေးများတွင် သက်ဆိုင်ရာ ဆိုးကျိုးများရှိပါသောကြောင့် ဆရာဝန်နှင့်မတိုင်ပင်ဘဲ မိမိသဘောအရ သောက်ခြင်းမျိုး လုံးဝလုံးဝ မပြုလုပ်သင့်ပါ။
သင်၏ BMI 35-40 ဖြစ်ပါက ခွဲစိတ်ကုသရန်လိုအပ်ပါသည်။

အဝလွန်ခြင်း၏ နောက်ဆက်တွဲဆိုးကျိုးများမှာ လွန်စွာ ကြောက်စရာကောင်းပါသဖြင့် မိမိ၏ ကိုယ်အလေးချိန်ကို တက်နိုင်သမျှထိန်းသိမ်းနိုင်ရန်ရည်ရွယ်၍ ဤ post ကိုမျှဝေလိုက်ပါတယ်ရှင့်။ သဘောကျ နှစ်ခြိုက်တယ်ဆိုရင် အများသိအောင် share ပေးကြရန် ေတာင်းဆိုပါရစေနော်။ ရပ်ကွက်ထဲက ပိန်ဆေးဆိုသော အရာများကို ဆရာဝန်ညွှန်ကြားချက်မပါဘဲ မသောက်ကြရန် တိုက်တွန်းပါရစေ။ ကျန်းမာရေးနှင့်ပတ်သတ်ပြီး မှန်ကန်တဲ့ ကုသမှုကို လိုအပ်ပါက ကျွန်မတို့ Dr P & H ကို ဆက်သွယ်လိုက်ပါနော်။