https://www.facebook.com/1656520027935644/

Mitta Mon Clinic, 191, Thiri Myaing 10 Street, Ward 13, Hlaing Township, Yangon (2025)

12/10/2025

❓️❓️ခွေးကိုက်ခံရလျှင်/ကြောင်ကုတ်ခံရလျှင် ဘာလုပ်ရမလဲ??? 🐶🐱❓

👉 ခွေးရူးပိုး (Rabies Virus) ရှိနေနိုင်သည့် သွေးနွေးသတ္တဝါများဖြစ်သော ခွေး၊ ကြောင်၊ ကြွက်၊ လင်းနို့ စသည်တို့အား ထိတွေ့မိလျှင်/အကိုက်ခံရလျှင်/အကုတ်ခံရလျှင် ထိတွေ့မိသည့်နေရာ/အနာကို ဆပ်ပြာ 🧼 နှင့် ရေ 💧 အသုံးပြုပြီး သေချာစွာဆေးကြောသန့်စင်ပါ။

👉 ထို့နောက် ခွေးရူးကာကွယ်ဆေး 💉 (Rabies Vaccine) ထိုးရန် လို/မလို ကို တတ်ကျွမ်းနားလည်သည့် ဆရာဝန် 👨‍⚕️ 👩‍⚕️ နှင့်တိုင်ပင်ပါ။ ဆရာဝန်မရှိသည့်နေရာတွင်ရောက်ရှိနေပါက နီးစပ်ရာ ကျန်းမာရေးဝန်ထမ်းတစ်ဦးဦးနှင့်တိုင်ပင်ပါ၊ အကယ်၍ တိုင်ပင်ဆွေးနွေးနိုင်မည့်သူ မရှိပါက အလွယ်တကူ မှီငြမ်းကြည့်ရှုနိုင်ရန် World Health Organization (WHO) 🌎 မှ ထုတ်ပြန်ထားသော ခွေးရူးပိုးရှိနေနိုင်သည့် သတ္တဝါများနှင့်ထိတွေ့မိသူများ ကာကွယ်ဆေးများထိုးရန် လို/မလို ဒဏ်ရာအဆင့်ခွဲခြားသတ်မှတ်ပုံကို အလွယ်တကူ မှတ်သားထားနိုင်ရန် ဖော်ပြပေးထားပါတယ်။ 📝

🔸️ ခွေးကိုက်ခံရသူများ/ခွေးရူးများနှင့် ထိတွေ့သူများကို ကာကွယ်ဆေးများထိုးရန် လို/မလို ဒဏ်ရာအဆင့်ခွဲခြားသတ်မှတ်ခြင်း 🔸️

👉 ခွေး/ကြောင်/လင်းနို့/ကြွက် စသောခွေးရူးပိုးရှိနိုင်သော သွေးနွေးသတ္တဝါများ၊ ခွေးရူးပြန်ရောဂါခံစားနေရသော လူနာများနှင့် ထိတွေ့မိပါက /အကိုက်ခံရပါက ခွေးရူးကာကွယ်ဆေးနှင့် ခွေးရူးဖြေဆေးများထိုးရန် လို/မလို ဆုံးဖြတ်နိုင်ရန် ဒဏ်ရာအဆင့်ခွဲခြားသတ်မှတ်ပုံမှာ အောက်ပါအတိုင်းဖြစ်ပါတယ်။ 👇👇👇

🟢️ ဒဏ်ရာအဆင့် (၁) - မိမိနှင့်သွေးနွေးတိရိစ္ဆာန်များ ထိတွေ့ရုံသာထိခြင်း၊ မိမိ၏အကောင်းပကတိအရေပြားပေါ်သို့ တိရိစ္ဆာန်၏ တံတွေး (သို့) လျှာဖြင့် လျက်ခံရခြင်း။ 👅
ထိတွေ့မှုပြင်းအား - မရှိ ❌
အကြံပြုချက် - ခွေးရူးမဟုတ်ကြောင်း သေချာပါက ကာကွယ်ဆေးထိုးရန်မလိုပါ။ (သို့မဟုတ်) သံသယရှိပါက ကာကွယ်ဆေးထိုးနိုင်ပါသည်။

🟡️ ဒဏ်ရာအဆင့် (၂) - သွေးထွက်ခြင်းမရှိသော ပွန်းပဲ့ရာများ၊ ခွေးကိုက်မခံရသော်လည်း ငုံခဲခံရခြင်း၊ အပေါ်ယံကုတ်ခြစ်ဒဏ်ရာများ။ 🐾
ထိတွေ့မှုပြင်းအား - အနည်းငယ်
အကြံပြုချက် - ခွေးရူးကာကွယ်ဆေး (Rabies Vaccine) 💉 ကိုအမြန်ထိုးရန်။ 🏃

🔴 ဒဏ်ရာအဆင့် (၃) - အနာကို လျှာဖြင့်လျက်ခံရခြင်း၊ ပေါက်ပြဲဒဏ်ရာများ၊ သွေးထွက်အောင်ကိုက်ခဲခံရခြင်း၊ အထူးသဖြင့် ဦးခေါင်း၊ မျက်နှာ၊ လည်ပင်း၊ ပုခုံး စသည့်နေရာများတွင် အကိုက်ခံရခြင်း။ 🩸🤕
ထိတွေ့မှုပြင်းအား - ပြင်းထန် 🔥
အကြံပြုချက် - ပုံမှန်ခွေးရူးကာကွယ်ဆေး (Rabies Vaccine) 💉 နှင့်အဆိပ်ဖြေဆေး (Rabies Immunoglobulin) 🧪 နှစ်မျိုးလုံး အမြန်ထိုးရန် လိုအပ်ပါသည်။ 🚨

‼️မေးခိုင်ကာကွယ်ဆေး (ATT) ကို ဒဏ်ရာအဆင့် (၂) နှင့် (၃) လူနာများတွင် ထိုးနှံရန် လိုအပ်ပါသည်။

Reference : Dog bite article from WHO

Doctor Mon ရေးသားထားသောကျန်းမာရေးစာစုများကို လွတ်လပ်စွာ Share နိုင်ပါသည်။

12/09/2025

တီဘီရောဂါက မျိုးရိုးလိုက်သလား? 🤔
အဖြေကတော့ . . . တီဘီရောဂါဟာ မျိုးရိုးလိုက်တတ်တဲ့ရောဂါမဟုတ်ပါ။ 🙅‍♀️

ဒါဖြင့်ဘာလို့တီဘီရောဂါကို မျိုးရိုးလိုက်တယ်လို့ လူအချို့ကထင်နေ/ပြောနေကြတာလဲ?????

✅️ တကယ်တော့ တီဘီရောဂါဟာ ကူးစက်ရောဂါတစ်မျိုးဖြစ်ပါတယ်။ 😷
ကမ္ဘာပေါ်မှာ ကူးစက်ရောဂါအမျိုးမျိုးရှိပါတယ်။ 🌎 ကူးစက်ရောဂါဆိုတာက ဗိုင်းရပ်စ်ပိုး၊ ဘက်တီးရီးယားပိုး၊ မှိုပိုး၊ ကပ်ပါးပိုး အစရှိသည့် ပိုးမွှားတွေကြောင့်ဖြစ်ပြီး ထိုပိုးမွှားတွေသည် ကနဉီးကူးစက်ခံထားရသည့် သတ္တဝါတစ်ဉီးမှ အခြားတစ်ဉီးထံသို့ တစ်နည်းနည်းနဲ့ ကူးစက်တတ်တဲ့ ရောဂါတွေကို ကူးစက်ရောဂါလို့ခေါ်ပါတယ်။ (ဉပမာ - ကိုဗစ်နှင့်ရာသီတုပ်ကွေးသည် ဗိုင်းရပ်စ်ပိုးကြောင့်ဖြစ်သောကူးစက်ရောဂါအမျိုးအစားများဖြစ်ပြီး၊ ငှက်ဖျားသည် ကပ်ပါးပိုးကြောင့်ဖြစ်သောကူးစက်ရောဂါအမျိုးအစားဖြစ်ပါတယ်။) 🦠
တီဘီရောဂါဟာ Mycobacterium tuberculosis လို့ခေါ်တဲ့ဘက်တီးရီးယားပိုးတစ်မျိုးကြောင့်ဖြစ်ရတဲ့ ကူးစက်ရောဂါအမျိုးအစားတစ်ခုဖြစ်ပါတယ်။ ထိုဘက်တီးရီးယားပိုးဟာ လေမှတဆင့်ကူးစက်တတ်ပါတယ်။ 💨

👉 ကူးစက်တတ်တဲ့နည်းလမ်းတွေကတော့ -

🤧👩‍🎤 တီဘီရောဂါပိုးကူးစက်ခံနေရသူတစ်ဉီးဟာ နှာခေါင်းနဲ့ပါးစပ်ကိုဖုံးအုပ်ခြင်းမပြုပဲ နှာချေတာ၊ ချောင်းဆိုးတာ၊ စကားအကျယ်ကြီးပြောတာ၊ သီချင်းဆိုတာ၊ စတဲ့အပြုအမူတွေကြောင့် ထိုသူရဲ့အသက်ရှုလမ်းကြောင်းက ထွက်လာတဲ့ အမှုန်လေးတွေထဲမှာ တီဘီဖြစ်စေနိုင်တဲ့ဘက်တီးရီးယားပိုးပါလာပြီး အခြားတစ်ဉီးရဲ့ အသက်ရှုလမ်းကြောင်းထဲကို ပိုးဝင်ရောက်သွားပြီး ကူးစက်တာဖြစ်ပါတယ်။ 🤧➡️👩‍🦱

ဒါကြောင့် တီဘီရောဂါဟာ မျိုးရိုးလိုက်တဲ့ရောဂါမဟုတ်ပါဘူး။ ❌ မျိုးရိုးလိုက်တဲ့ရောဂါမဟုတ်သော်လည်း မိမိနှင့် အတူနေမိသားစုတွေမှာ တီဘီရောဂါခံစားနေရရင် မိမိကိုလဲ ကူးစက်နိုင်ချေများတာမို့ အချို့မိသားစုတွေမှာ အဖိုးကတီဘီဖြစ်၊ သားကလဲ တီဘီဖြစ်၊ အဖိုးနဲ့လက်ပွန်းတတီး နေတဲ့ မြေးဖြစ်သူကလဲ တီဘီဖြစ်၊ စသဖြင့် အနေနီးတဲ့သူတွေမှာ ကူးစက်နိုင်ချေပိုများတဲ့အတွက် တစ်မိသားစုတည်းမှာ တီဘီလူနာ တစ်ယောက်ထက်ပိုပြီး တွေ့ရတတ်တာကြောင့် မျိုးရိုးလိုက်တဲ့ရောဂါလို့ အထင်မှားကြတာဖြစ်ပါတယ်။ 👨‍👩‍👧‍👦

ယနေ့ထက်တိုင်လည်း ‌အချို့သောလူနာတွေမှာ တီဘီကူးစက်ခံနေရတယ်လို့သံသယရှိလို့ ဆရာဝန်က “အတူနေမိသားစုထဲမှာ တီဘီဖြစ်ဖူးသူရှိလား/တီဘီဆေးသောက်ဖူးသူရှိလား” လို့မေးတဲ့အခါ “ကျွန်တော်/ကျွန်မတို့မှာ တီဘီမျိုးရိုးမရှိဘူး” လို့ ပြန်ဖြေနေကြတုန်းပါပဲ။ 😟

ခုဆိုရင်တီဘီရောဂါရဲ့ကူးစက်ပုံနည်းလမ်းတွေကို သိပြီးပြီဆိုတော့ တီဘီသည်မျိုးရိုးလိုက်တတ်တဲ့ရောဂါ မဟုတ်ကြောင်း၊ လူတစ်ဉီးမှ တစ်ဉီးသို့ လေမှတဆင့် ကူးစက်နိုင်တဲ့ ရောဂါဖြစ်တဲ့အတွက် မိမိကိုယ်တိုင်လည်း အချိန်မရွေးကူးစက်ခံနိုင်ရပြီး တီဘီရောဂါဖြစ်ပွားနိုင်ကြောင်း မိမိရဲ့ မိသားစု၊ မိတ်ဆွေတွေနဲ့ ပတ်ဝန်းကျင်ကိုလည်း သတင်းစကားလေးမျှဝေပေးလိုက်ပါဉီးနော်။ 🙏 🗣️

Doctor Mon

#တီဘီ #ကူးစက်

27/08/2025

ရင်ပူနေပြီလား? (Heartburn)

တခါတရံ ရင်ခေါင်းထဲမှာ မီးစနဲ့ ထိုးသလို ပူနေတာမျိုးကို ကြုံဖူးကြမယ်ထင်ပါတယ်။ ရင်ညွန့်ရိုးတွေရဲ့အနောက် ရင်ခေါင်းထဲမှာ မီးလောင်သလို/မီးစနဲ့ထိုးသလို ပူနေပြီး အဲ့လို ပူနေတာက အစာစားပြီးရင်ပိုဆိုးလာတာမျိုး၊ လှဲအိပ်လိုက်ရင်ပိုဆိုးလာတာမျိုး ခံစားနေရပါသလား?

ဒါဆိုရင်ဒီပို့စ်လေးကိုဆက်ဖတ်ကြည့်ပေးပါ။ 👇👇👇

🔹️ ရင်ပူနေခြင်းဟာ အတွေ့ရများတဲ့ လက္ခဏာတစ်ခုဖြစ်ပြီး မှတ်ရလွယ်အောင်ပြောရရင် အစာရေမြိုပြွန်နဲ့ အစာချေလမ်းကြောင်းတစ်လျှောက်မှာ အက်ဆစ်တွေ (အစာချေရည်တွေ) များနေလို့ဖြစ်လာရတဲ့ လက္ခဏာတစ်ခုဖြစ်ပါတယ်။

🔹️ အက်ဆစ် (အစာချေရည်) တွေဘာလို့များနေရလဲဆိုရင် အစာကိုအချိန်မှန်မစားဖြစ်တာ၊ အပူအစပ်အချဉ်တွေစားတာများတာ၊ ဆေးလိပ်သောက်တာ၊ အရက်/ဘီယာတွေသောက်တာ၊ အကိုက်အခဲပျောက်ဆေးတွေသောက်တာ၊ အချို့သောအစာအိမ်ထိခိုက်နိုင်တဲ့ဆေးဝါးတွေသောက်တာကြောင့်ဖြစ်တတ်ပါတယ်။

🔹️ ဒါ့အပြင် အစာချေလမ်းကြောင်းတစ်လျှောက် (အစာရေမြိုပြွန်၊ အစာအိမ်၊ အူလမ်းကြောင်း) မှာ အနာတွေဖြစ်နေရင်လဲ အောက်ပါလက္ခဏာတွေကိုခံစားရနိုင်ပါတယ်။
- ရင်ဘတ်ထဲမှာမီးစနဲ့ထိုးသလိုပူနေတာ
- ချက်အထက်ဘက်၊ ရင်ညွန့်အောက် အစာအိမ်နေရာမှာ ပူနေတာ
- ရင်ညွန့်နေရာမှာ တစ်ခုခုနဲ့ဖိထားသလိုဖြစ်နေတာ
- လေချဉ်တွေတက်နေတာ
- လည်ချောင်းမှာလည်းပူနေတာ
- ခံတွင်းနံ့ဆိုးတာ
- ခံတွင်းထဲမှာ အချဉ်အရသာတွေရနေတာ
ဒီလိုလက္ခဏာခံစားနေရသူအများစုကတော့ မိမိရဲ့နေ့စဉ်နေထိုင်စားသောက်မှုပုံစံတွေပြောင်းလဲလိုက်တဲ့အခါမှာ သက်သာသွားတတ်ပါတယ်၊ အချို့မှာတော့ အလွယ်တကူဝယ်လို့ရတဲ့ အိမ်သုံးဆေးဝါးတွေအသုံးပြုပေးခြင်းဖြင့်လည်း သက်သာသွားနိုင်ပါတယ်။

🔹️ အကယ်၍အထက်ပါလက္ခဏာတွေခံစားနေရတာဟာဆက်တိုက်ဖြစ်နေပြီး သင်နေ့စဉ်လုပ်နေတဲ့ လုပ်ငန်းဆောင်တာတွေမလုပ်နိုင်လောက်အောင်ဆိုးဝါးလာတယ်ဆိုရင်တော့ ရောဂါသေချာစစ်ဆေးရှာဖွေဖို့လိုပါတယ်။

‼️ဘယ်လိုအခြေအနေမှာ ရင်ပူတာအတွက် ဆရာဝန်နဲ့ပြသသင့်သလဲဆိုရင် -
- ရင်ပူတာနဲ့ဆက်စပ်လက္ခဏာတွေကို တစ်ပတ်ကို နှစ်ကြိမ်ထက် ပိုခံစားရနေတာ
- အိမ်သုံးဆေးဝါးတွေ (အစာအိမ်ဆေး၊ လေဆေး) အသုံးပြုနေရင်းနဲ့ ရင်ပူတာ မသက်သာတာ
- အစာမျိုရခက်နေတာ
- ပျို့ချင်/အန်ချင် ဆက်တိုက်ဖြစ်နေတာ
- အစာကောင်းကောင်းမစားနိုင်ပဲ ကိုယ်အလေးချိန်ကျသွားတာ စတဲ့ လက္ခဏာတွေခံစားနေရရင်တော့ ဆရာဝန်နဲ့ပြသတိုင်ပင်သင့်ပါတယ်။

‼️ရင်ပူတာဖြစ်စေတဲ့/ပိုဆိုးစေတဲ့ အကြောင်းတွေကတော့ -
- အစပ်တွေစားတာများတာ
- အချဉ်တွေစားတာများတာ
- အဆီများတဲ့အစားအသောက်တွေ
- ငရုပ်ကောင်းလို ပူတဲ့အစားအစာတွေ
- အယ်လ်ကိုဟောပါဝင်တဲ့အစားအစာတွေ (အရက်၊ ဘီယာ၊ ဝိုင်စသည်)
- ဂတ်စ်ပါဝင်မှုများတဲ့အချိုရည်တွေ
- ကဖင်းဓာတ်ပါဝင်တဲ့ ဆေးဝါးတွေ၊ အစားအသောက်တွေ
- ဆေးလိပ်သောက်သူတွေ
- အကိုက်အခဲပျောက်ဆေးနဲ့ အချို့သောဆေးဝါးတွေက ရင်ပူခြင်းကို ဖြစ်စေ/ပိုဆိုးစေပါတယ်။
- အဝလွန်နေသူတွေနဲ့ ကိုယ်ဝန်ဆောင်မိခင်တွေမှာလည်း ရင်ပူတဲ့လက္ခဏာခံစားရတတ်ပါတယ်။

🔹️ ရင်ပူနေတာနဲ့ဆက်စပ်လက္ခဏာတွေကို သက်သာဖို့ဆိုရင်တော့ -
- အစားအစာကို အချိန်မှန်စားပေးပါ၊ စားတဲ့အခါမှာ သေချာကြေညက်အောင်ဝါးစားပါ
- ဆေးလိပ်ဖြတ်ပါ
- အရက်/ဘီယာ/ဝိုင် စတဲ့ အယ်ကိုဟောပါတာတွေလျှော့ပါ
- ကဖင်းဓာတ်ပါတဲ့ အစားအစာတွေလျှော့ပါ
- အချဉ်/အစပ်/အဆီများတဲ့အစားအစာတွေလျှော့စားပါ
- ဂတ်စ်ပါတဲ့အချိုရည်တွေရှောင်ပါ
- အကိုက်အခဲပျောက်ဆေးတွေကို ဆရာဝန်နှင့်သေချာတိုင်ပင်ပြီးမှသောက်ပါ
- ညအိပ်ယာဝင်ကာနီးမှ အစာစားခြင်းကိုရှောင်ပါ။

🔹️ ဆရာဝန်ဆေးညွှန်းမပါပဲ ဝယ်လို့ရတဲ့ အိမ်သုံးဆေးဝါးအချို့ကိုလည်း အသုံးပြုလို့ရပါတယ်။ ရင်ပူတာသက်သာစေဖို့ အက်ဆစ်ဓာတ်ကို ဓာတ်ပျော့စေတဲ့ အစာအိမ်ဆေး (လေဆေးလို့ခေါ်ကြပါတယ်။) အချို့သောက်လို့ရပါတယ်။

🔹️ သို့သော်လည်း ရင်ပူတာနဲ့ဆက်စပ်လက္ခဏာတွေဟာ မသက်သာသွားဘူးဆိုရင်တော့ ဆရာဝန်နဲ့သေချာတိုင်ပင်ဆွေးနွေးပြီး ရောဂါရှာဖို့အရေးကြီးပါတယ်။

Mitta Mon Clinic Page မှ ကျန်းမာရေးစာစုများကို လွတ်လပ်စွာမျှဝေနိုင်ပါတယ်။

25/08/2025

✨ ညီမလေးတို့ ဓမ္မတာလာစဉ် သတိထားသင့်တဲ့ အချက်များ ✨

🔹 လစဉ်သုံးပစ္စည်းတွေကို ၄ နာရီ/၆ နာရီတစ်ကြိမ် စနစ်တကျလဲလှယ်ဖို့ မမေ့ပါနဲ့!
🔹 အချိန်ကြာကြာမလဲလှယ်ဘဲ အသုံးပြုရင် 👉 အနံ့ဆိုး၊ ယားယံခြင်းနဲ့ ပိုးမွှားပေါက်ဖွားမှုကို ဖြစ်စေနိုင်ပါတယ်။
🔹 အနံ့မပါတဲ့ ပစ္စည်းများကိုသာ အသုံးပြုရင်ပိုကောင်းပါတယ်—ကမ်မီကယ်နည်းလေ ညီမလေးအတွက် ကောင်းလေမို့ပါ။
🔹 ပြန်လည်အသုံးပြုနိုင်တဲ့ ဓမ္မတာခွက်/အတွင်းဝတ် (Reusable menstrual cups/Menstrual pants) တွေကို သုံးမယ်ဆိုရင် ထိုပစ္စည်းများရဲ့ သန့်ရှင်းရေး လမ်းညွှန်ချက်ကို ဂရုတစိုက်လိုက်နာဆောင်ရွက်ပါ။

💡 ညီမလေးတို့ ကျန်းမာရေးက ညီမလေးတို့လက်ထဲမှာပါ! 🩷

**na

Mitta Mon Page မှ ကျန်းမာရေးစာစုများကို လွတ်လပ်စွာမျှဝေနိုင်ပါသည်။

16/08/2025

ဆီးချို/သွေးချို အမြစ်ဖြတ်လို့ရလား???

အဖြေ - မရပါ၊ ဆီးချို/သွေးချိုရောဂါကို **ထိန်းထား** လို့ပဲရပါတယ်။ သွေးတွင်းအချိုဓါတ်ကို ပုံမှန်ဖြစ်အောင်ထိန်းပေးထားခြင်းဖြင့် ဆီးချို/သွေးချိုရောဂါရဲ့ လက္ခဏာများသက်သာစေပြီး နောက်ဆက်တွဲဆိုးကျိုးဝေဒနာများ မဖြစ်ရလေအောင် ထိန်းပေးထားလို့ပဲရပါတယ်။

#ဆီးချို
#သွေးချို

06/08/2025

ဆင်တုပ်ကွေးရောဂါ (ချီကန်ဂန်းညား)

အခုရက်ပိုင်း တရုတ်ပြည်မှာ ဆင်တုပ်ကွေးရောဂါအဖြစ်များနေတယ်လို့ သတင်းတွေမှာတွေ့နေရပါတယ်၊ မြန်မာနိုင်ငံမှာလည်း ၂၀၁၉ ခုနှစ် လောက်မှာ ဆင်တုပ်ကွေးတော်တော်များများ ဖြစ်လိုက်ကြပါတယ်။

ဆင်တုပ်ကွေးရောဂါဟာ ချီကန်ဂန်းညားလို့ခေါ်တဲ့ ဗိုင်းရပ်စ်ပိုးတစ်မျိုးကြောင့်ဖြစ်ပြီး ကူးစက်ပုံနည်းလမ်းကတော့ ရောဂါပိုးသယ်ဆောင်လာတဲ့ ခြင်ကိုက်ခံရရာမှတဆင့် လူတစ်ဦးမှ တစ်ဦးသို့ကူးစက်ပါတယ်။

ဒါကြောင့် ဆင်တုပ်ကွေး မဖြစ်အောင် ကာကွယ်ဖို့အကောင်းဆုံးနည်းလမ်းက -

❌️🦟"ခြင်ကိုက်မခံရအောင်ကာကွယ်ခြင်း"🦟❌️ ပဲဖြစ်ပါတယ်။

ဆင်တုပ်ကွေးရောဂါပိုးကိုသယ်ဆောင်လာတာကတော့ ခြင်ကျားလို့ ခေါ်ကြတဲ့ အေဒီးစ် ခြင်အမျိုးအစားတွေဖြစ်ပါတယ်၊ ဒီခြင်တွေက သွေးလွန်တုပ်ကွေးနဲ့ ဇီကာဗိုင်းရပ်စ်ပိုးကိုလည်း သယ်ဆောင်ပါတယ်။ ဒါကြောင့် ခြင်ကျားကိုက်မခံရအောင် သတိထားဖို့လိုပါတယ်။

- ခြင်ကိုက်တာကိုကာကွယ်မယ့် လိမ်းဆေးများလိမ်းခြင်း၊
- ခြင်လုံဇကာများတပ်ဆင်ထားခြင်း၊
- ခြင်ကိုက်မခံရစေရန် အဝတ်အစားများလုံခြုံစွာဝတ်ဆင်ခြင်း၊
- ခြင်ထောင်ဖြင့်အိပ်စက်ခြင်း၊
- ခြင်ပေါက်ဖွားနိုင်သည့်နေရာများကို ရှင်းလင်းထားခြင်း၊
- ဖုံး/သွန်/လဲ/စစ် စနစ်တကျ ပြုလုပ်ထားခြင်း
- ခြင်ဆေးများဖြန်းခြင်းဖြင့် ခြင်မကိုက်အောင် ကာကွယ်နိုင်ပါတယ်။

ဆင်တုပ်ကွေးဟာ ရောဂါပိုးသယ်ဆောင်လာတဲ့ ခြင်ကိုက်ခံရပြီး/ ခန္ဓာကိုယ်တွင်း ရောဂါပိုးကူးစက်ခံရပြီး ၄ ရက်မှ ၈ ရက်အတွင်း လက္ခဏာတွေစတင်ပြသတတ်ပါတယ်။

ဆင်တုပ်ကွေးရဲ့လက္ခဏာတွေကတော့ -
- ဖျားခြင်း၊
- အဆစ်များ ယောင်ခြင်း/ပြင်းထန်စွာကိုက်ခဲခြင်း၊
- ကြွက်သားများနာကျင်ခြင်း၊
- ပျို့ချင်/အန်ချင် ဖြစ်ခြင်း၊
- ခေါင်းကိုက်ခြင်း၊
- ခန္ဓာကိုယ်တွင် အနီစက်များထွက်ခြင်း စသည်တို့ပဲဖြစ်ပါတယ်၊ လက္ခဏာတွေက ရာသီတုပ်ကွေး/သွေးလွန်တုပ်ကွေး စသည်တို့နဲ့ဆင်တူပြီး ဆင်တုပ်ကွေးမှာတော့ အဆစ်တွေက အလွန်အမင်း နာကျင်ကိုက်ခဲတတ်ပါတယ်၊ တချို့သူတွေ ကိုက်ခဲလွန်းလို့ လမ်းတောင်မလျှောက်နိုင်ပဲ ဘေးကတွဲကူမှလျှောက်လို့ရတာမျိုးတွေတွေ့ရတတ်ပါတယ်။

ဆင်တုပ်ကွေး ဟုတ်/မဟုတ် သေချာချင်ရင်တော့ လက္ခဏာတွေစတင်ခံစားရတဲ့ ပထမတစ်ပတ်အတွင်းမှာ သွေးဖောက်ပြီး RT-PCR နည်းဖြင့်စစ်ဆေးနိုင်ပါတယ်။

ဆင်တုပ်ကွေးဟာ အပေါ်မှာပြောခဲ့သလို ချီကန်ဂန်းညား ဗိုင်းရပ်စ် ကြောင့်ဖြစ်ပြီး ပျောက်ကင်းအောင်ကုသလို့ရတဲ့ဆေးမရှိပါဘူး၊ မိမိကိုယ်ခံအားနဲ့ပြန်လည်သက်သာသွားမယ့်ရောဂါမျိုးဖြစ်ပါတယ်၊ ရောဂါလက္ခဏာစတင်ပြသချိန်မှ စလို့ ရက်အနည်းငယ်အတွင်း ကိုယ်ပူချိန်ကျပြီး ပြန်လည်သက်သာသွားတတ်ပေမယ့် အဆစ်ရောင်ခြင်း/ကိုက်ခဲခြင်းတွေကတော့ တချို့လူနာတွေမှာ လချီ/နှစ်ချီကြာ ခံစားရတတ်ပါတယ်။

အသက်အန္တရာယ် စိုးရိမ်ရလောက်တဲ့ထိ မပြင်းထန်တတ်ပေမယ့် ကလေးငယ်လေးတွေ၊ အသက်ကြီးသူတွေ၊ ကိုယ်ခံအားကျနေသူတွေ၊ အခြားရောဂါအခံရှိသူတွေမှာတော့ အထူးဂရုစိုက်စောင့်ကြည့်ကုသဖို့လိုပါတယ်။

ဆင်တုပ်ကွေးကိုကာကွယ်နိုင်မယ့်ကာကွယ်ဆေးများကတော့ စမ်းသပ်ဆဲကာလဖြစ်ပါတယ်။

ဆင်တုပ်ကွေးကို ကုသရာမှာ ခံစားနေရတဲ့ လက္ခဏာတွေသက်သာစေဖို့ လူနာရဲ့ အခြေအနေပေါ်မူတည်ပြီး အဖျားကျဆေး (Anti-pyretics) တွေနဲ့ အကိုက်အခဲသက်သာတဲ့ဆေး (Analgesics) များပေးခြင်း၊ ရေများများသောက်စေခြင်း၊ ပြည့်ဝစွာ အနားယူစေခြင်း၊ အာဟာရပြည့်ဝအောင် စားစေခြင်းများဖြင့်သာ သက်သာအောင် ဆောင်ရွက်ပေးနိုင်မှာဖြစ်ပါတယ်။

အနှစ်ချုပ်ရရင်တော့ ဆင်တုပ်ကွေးကိုကာကွယ်နိုင်မယ့်အကောင်းဆုံးနည်းလမ်းက ခြင်ကိုက်မခံရအောင် ကာကွယ်ခြင်းဖြစ်ပြီး ခြင်မကိုက်အောင်သေချာကာကွယ်ထားမယ်ဆိုရင် ခြင်မှတဆင့်ကူးစက်တတ်တဲ့ သွေးလွန်တုပ်ကွေး၊ ဇီကာဗိုင်းရပ်စ်၊ ဆင်ခြေထောက်ရောဂါနဲ့ ငှက်ဖျားတို့ကိုပါ ကာကွယ်နိုင်မှာဖြစ်ပါတယ်။

Mitta Mon Page မှကျန်းမာရေးစာစုများကို လွတ်လပ်စွာ Share နိုင်ပါတယ်။

#ဆင်တုပ်ကွေး

20/07/2025

နာလန်ထ မြန်စေဖို့ 💪💪💪

နှစ်စဥ် ဇွန်၊ ဇူလိုင်၊ သြဂုတ်လတွေမှာ တုပ်ကွေးဖျားနာ အဖြစ်များကြပါတယ်၊ ငယ်ရွယ်သူတွေမှာတော့ တုပ်ကွေးမိပြီး ဖျားနာပြီးရင် နာလန်ထဖို့ မြန်ပေမယ့် အသက်ကြီးသူတွေ၊ ကလေးငယ်တွေနဲ့ ကိုယ်ခံအားလျော့နည်းနေသူတွေမှာ နာလန်ထဖို့ကြာတတ်ပါတယ်။

ဖျားနာပြီးရင် နာလန်ထမြန်စေဖို့ ဆောင်ရန်၊ ရှောင်ရန်လေးတွေ ပြောပြချင်ပါတယ်။

ဆောင်ရန် ✅️

💧ရေဓါတ်ပြည့်ဝစေရန် ရေနှင့် အရည်များများသောက်ပါ၊ ရေ၊ ဓါတ်ဆား၊ အသီးဖျော်ရည်၊ စွပ်ပြုတ်များသောက်သုံးနိုင်ပါတယ်။ (သွေးတိုးရှိသူတွေ၊ ကျောက်ကပ်ရောဂါခံစားနေရသူတွေကတော့ ဆရာဝန်နဲ့တိုင်ပင်ပါနော်)

🥚အာဟာရပြည့်ဝသော အစားအစာများ စားပေးပါ၊ အသားဓါတ်ကြွယ်ဝတဲ့ ကြက်ဥ၊ အသား၊ ငါးများ စားပေးပါ။ အရည်ရွှမ်းသော အသီးအနှံများစားပေးခြင်းကလည်း မြန်မြန်နာလန်ထဖို့အထောက်အကူပေးနိုင်ပါတယ်။

☺️ ကောင်းမွန်စွာ အနားယူပါ၊ အလုပ်/ကျောင်းစတာတွေကနေ တစ်ရက် နှစ်ရက်လောက်နားပြီး အိမ်မှာ စိတ်ရောလူပါ ကောင်းကောင်း အနားယူပေးပါ။

💦 ပုံမှန် ရေချိုးပါ၊ ရေနွေးနွေးလေးနဲ့ချိုးပေးခြင်းက ခန္ဓာကိုယ်ကိုလန်းဆန်းစေသလို ကြွက်သားများတောင့်တင်းနာကျင်နေတာကိုလည်းသက်သာစေပါတယ်၊ ရေပုံမှန်ချိုးပေးခြင်းဖြင့် ခန္ဓာကိုယ်မှာကပ်ငြိနေတဲ့ ပိုးမွှားများကိုလည်းဖယ်ရှားသန့်စင်ပေးနိုင်ပါတယ်။

🛌 လုံလောက်စွာအိပ်စက်ပါ၊ ယေဘုယျအားဖြင့် အရွယ်ရောက်ပြီးလူတစ်ယောက်ဟာ တစ်နေ့ကို ၇ နာရီမှ ၉ နာရီကြာ အိပ်စက်သင့်ပါတယ်၊ ကလေးငယ်လေးတွေမှာတော့ ဒီထက်ပို အိပ်စက်သင့်ပြီး လူကြီးတွေကတော့ ၇ နာရီလောက်အိပ်စက်မယ်ဆိုလုံလောက်ပါတယ်။

ရှောင်ရန် ❌️

☕️ ❎️ ကဖင်းဓါတ်ပါသော အစားအစာများ (ကော်ဖီ၊ လက်ဖက်ရည်၊ အားဖြည့်အချိုရည်များ) နှင့် အရက်၊ ဘီယာသောက်သုံးခြင်းများရှောင်ပါ၊ ထိုအရာများက ရေဓါတ်ခမ်းခြောက်မှုကို ပိုဆိုးစေတဲ့အတွက် ဖျားနာကိုက်ခဲခြင်းလက္ခဏာများပိုဆိုးစေပါတယ်။

🍆🫑❎️ အစာချေရန်ခက်ခဲသော အစားအစာများရှောင်ပါ၊ ဖျားနာနေတဲ့အချိန်မှာ အစာအိမ်က အစာကောင်းစွာ ကျေညက်အောင် မစွမ်းဆောင်နိုင်တဲ့အတွက် အစာချေဖျက်ဖို့ခက်တဲ့ အစားအစာများ မစားသင့်ပါ။ (ဥပမာ - အသီးအရွက်များအစိမ်းစားခြင်း၊ အခြောက်ခံထားသောအသီးအရွက်များ၊ စပ်လွန်းသောအစားအစာများ၊ နို့နဲ့နို့ထွက်ပစ္စည်းများ)

🤸‍♂️🏃‍♂️❎️ ပြင်းထန်သောလေ့ကျင့်ခန်းများလုပ်ခြင်း၊ ပင်ပန်းသောအလုပ်များလုပ်ခြင်းကိုရှောင်ပါ။

အမြန်ဆုံးနာလန်ပြန်ထပြီး ကျန်းမာပျော်ရွှင်ကြပါစေ။

Doctor Mon

Mitta Mon Clinic page မှ ကျန်းမာရေးစာစုများကို လွတ်လပ်စွာ Share နိုင်ပါသည်။

Mitta Mon Clinic

12/10/2025

12/09/2025

27/08/2025

25/08/2025

16/08/2025

06/08/2025

20/07/2025

Address

Telephone

Website

Alerts

Contact The Practice

Shortcuts

Share

Category